Thursday 1 January 2009

للي بيسألوا عن قادة حماس

نزار ريان استشهد، وهو واحد من اهم قادة حماس، هو ومراته وولاده، وهو اكبر القادة سنا، وكان له ابن هو ارسله في عملية استشهادية.
وفي كل الاحوال سؤال: فين قادة حماس بقى؟ سؤال غبي فعلا
عشان مافيش قادة في الدنيا بيتحطوا على خط النار
ولا مرة في الاربع حروب اللي دخلناها كان القائد الاعلى للقوات المسلحة نازل وسط العساكر ومعرض حياته للخطر
والطبيعي ان القادة دول هم العقول اللي بتدير وفيه ناس تانية شغلتها تنفذ
والا ما كانش ح ينزل امبارح عدد الصواريخ اللي نزلت واي حد بيتريق على الصواريخ يورينا صواريخه بروح اهله ده لو صاروخ العيد فرقع جنبه ح يقطع الخلف، وانا مش عايزة افتق اكتر من كده عن جبن بعض الناس اللي انا اعرفهم اللي بيوصل انهم يبقوا رجالة بشنبات ويخافوا يعدوا الشارع عشان بيخافوا من العربيات
وللا احنا نسينا نفسنا؟ احنا مناضلين كي بورد
لما نبقى نركب الميركافا نبقى نعدل على الناس، ده احنا خايفين ندخل الجعانين لبعدين الحدود اللي بينا وبينها اميال تنضرب
كام واحد من الشباب اتهرب من الجيش؟
ومع ذلك القادة اهم بيموتوا وبيموتوا عيالهم كمان
انا بجد مش عارفة استوعب الناس اللي واخدة موقف عجيب من حماس وبيقولوا الكلام اللي الاعلام الاسرائيلي بيقوله، ومش مصدقة اختلال ميزان العدالة للدرجة دي.
يعني اللي بيشتغلوا لحساب ناس معينة واصلا هم ناس مريبة وتسعيرتهم معروفة كويس معروفين لكل الناس ولا يثيروا العجب لان هي دي شغلتهم اصلا، واخدين منحة تفرغ لكده بالذات ولازم يحللوا لقمة عيشهم
انما الناس اللي بتردد كلام تسيبي ليفني ببلاش وعشان ما اعرفش بقى هم مقتنعين؟ مقتنعين بالكلام اللي بيقولوه؟ وللا ده من فرط الاحساس بالعجز والذنب بيعملوا اسقاط؟ وللا فعلا الرصاص والمية الملوثة؟ وللا عشان حماس اخوان وهم عندهم حساسية رفعت السعيد اللي بيقول اليسار الاسرائيلي اقرب لي من الاخوان؟
طب على فكرة البني ادم ينفع يبقى اخوان ويفضل بني ادم برضه عادي، عادي يعني له عينين ومناخير واحدة في وشه مش في قفاه، وبق، ورجلين بيمشي عليها مش بياكل بيها، وماعندوش ديل ولا حاجة، ولما يعطش يشرب، ولما يستعجل يمد، ولما يبقى حران يقول الدنيا حر، ولما حد يقول له يا شفيق يرد
والبني ادم اللي ما عندوش عدالة مع الناس اللي هو مختلف معاهم يبقى هو احسن من حسني مبارك في ايه؟ ويفرق ايه عن صدام حسين او اي طاغية بيعمل مقابر جماعية لاي حد يختلف معاه؟
والسيد حسن قالها كلمة حكمة، لو حماس شيوعية كانت اتهاجمت ولو مسيحية كانت اتهاجمت ولو بوذية كانت اتهاجمت ولو سينتولوجي برضه كانت اتهاجمت طول ما هي بتضرب صواريخ على المستوطنات
ولو شايلين صورة حسن البنا في الرايحة والجاية وعاملين سلام مع اسرائيل بشروط اسرائيلية زي ناس، ودول المفروض انها محترمة، كانت بقت حلوة وقطة وبطة
زي كده مجموعة نساء سيئات السمعة نازلين شتيمة في واحدة محترمة عشان هي بقى اللي عاملة لهم شريفة، وبدل ما يتكسفوا من مشيهم البطال نازلين عليها هي دب 
سواء ناس مدفوعة الاجر ومعروفة واحد واحد بالاسم ومعروف كمان مين اللي بيدفع لهم او ناس واخداهم حمية الجاهلية او العزة بالاثم او الرصاص والتلوث مأثر على مخهم او احساسهم بالعار مخليهم يقاوحوا بدل ما يحاولوا يغسلوا عن نفسهم العار
اللي يقول كلام اسرائيل............... يبقى بيقول كلام اسرائيل
بس، هو مبسوط انه بيقول كلام اسرائيل، بالهنا والشفا عليه انشالله يربي ضفاير ويلبس برنيطة طويلة سودا زي الطباخ اللي ابنه مات

66 comments:

MN said...

May Allah make these words in your balance in the day of judgement.

I am very surprised did some of us
forgot who is the enemy.
HasbanAllah wa Ne'ama alwakeel.

strategicalone said...

حريمة الاربعة يا حجة

Unknown said...

الجزيرة بتقول زوجته واولاده الثلاثة
جبت منين حريمه الاربعة؟

حريمه الاربع حريمه الاربعة
يعني هو كانوا ظبطوه مع راجل؟
اذا كانوا بيدافعوا عن الخو.....جات

مواطن مصري said...

معلش يا نوارة شفتي منير لغى الحفلة

المهم انا ضد المجزرة في غزة بس مش معنى اني متعاطف مع اهل فلسطين ككل دة ميبقاش معناة بردو اني مع فتح او حماس او اسرائيل لان فتح و حماس الاتنين عنندي بكرهم

و لو فية حاجة تخص الامن اقومي المصري يبقى امن مصر فوق الجميع


و نتعلم من حرب 48 لما دخلنها و الكل باعنا

مواطن مصري said...

اة ب النوسبة لصواريخ الي وصلت الي داخل اسرائيل عورت كام واحد
؟


فين العمليات بتاعت زمان


الي كانت ايام ياسر عرفات
؟

مواطن مصري said...

نوارة فية فرق بين المقاومة كحرب تحرير و فرق بين واحد يصطاد عصافير الي عملتة حزب الله في الصيف دي اسمها حرب تحرير و الي بتعملة حماس اسمها بيصطادو عصافير

انا مش متنع ب الصواريخ الي تعور واحد دي


ولا انتيرائيك اية

Unknown said...

مين يابني اللي باعنا في حرب تمانية واربعين
يابني حرام عليك يابني
يابني ح تموتني ناقصة عمر يابني
يابني الكلام ده بيجيب لنا الكلام وبيجيب لنا الشتيمة حرام عليكوا
مش كفاية ابو الغيظ اللي عرنا؟

مواطن مصري said...

مش ملك الاردن تراجع ايام 48 ؟

مواطن مصري said...

ممم لو عندك يا نوارة حلقة هيكل لما اتكلم عن اتفاقية اعادة تخطيط غزة بتاعت الامن القومي المصري اولو عند طفاطيفو يا ريت حد يجيبها


عشان هيكل اول من توقع او اتكلم عن الي بيحصل الان

سعيد أفندى said...

الشهيد نزار ريان متزوج من أربعة وله ست اولاد وست بنات .

وبالنسبة للموضوع مش وقته ابدا اننا نصنف الناس على انها اخوان ودول حماس ودول كيت وكيت . من الافضل اننا ننسى كل ده فى الوقت الحالى لأننا فى حالة حرب , حتى لو مختلفين معاهم لأننا فى أزمة وماننساش ان هما مسلمين .

أما الهجوم الاعلامى على حماس فهو محض بتنجان وغباء سياسى وعسكرى .

Unknown said...

يابني مندوب فلسطين في الجامعة الاسلامية تف علينا
تف علينا كلنا
مافيش داعي لفتح القديم والنبي عشان ما نعكش في الكلام

وبعدين ده حسني مبارك لما حب يتكلم عن تضحيات مصر في سبيل القضية الفلسطينية قعد يتكلم عن الحقبة الناصرية

يعني واجبنا تجاه امننا القومي والبلد اللي خبط لزق في حدودنا انتهى من حرب الاستنزاف؟

هو واجب المدرسة خلصناه الساعة الستة وح نقعد بقى نتفرج على الكارتون ونلعب عشان عاملين الواجب ومخلصينه بدري

يابني حرام عليك
يابني اسرائيل هي اللي بتهدد امن مصر القومي مش الفلسطينيين

يابني حط نفسك مكان الناس قبل ما تتكلم

يابني تخيل نفسك ليبيا وفلسطين محاصرينك وسايبينك تنضرب ومش عايزين حتى يدخلوا لك دوا ولا اكل وبيعاقبوك لانك اختارت اللي انت عايزه في انتخابات حرة

يابني حسني مبارك لما طلع حط شرط فتح المعبر ان حماس تمشي

يعني مش كفاية هو فارض نفسه علينا
كمان عايز يجبر الفلسطينيين انهم يتخلوا عن اختيارهم اللي جه بانتخابات حرة

هو الراجل ده لا يرحم ولا يسيب رحمة ربنا تنزل

واكلين الخرا وساكتين والناس سايبينا في حالنا
لكن خرانا طرطش على الناس ولما يقولوا حوشوا خراكوا عنا نقول لهم بتشتموا مصر ليه؟

يابني حرام عليك ح الطم على وشي واطلع من ديني

Unknown said...

هي اتفاقية سايكس بيكو دي ملزمة لينا اكتر من الكتب المقدسة ليه؟

عشان سماحة السيد سايكس رضي الله عنه وارضاه واخد علينا دين ام عهد على المصحف؟
ده احنا ما بنحترمش المصحف زي ما بنحترم اتفاقية التقسيم

Unknown said...

ولما امن مصر القومي فوق الجميع
المفروض اننا نبقى في حالة استنفار وللا نستخبى تحت الترابيزة

قريت مقالة روبرت فيسك؟

اتفضحنا
واحنا اللي فضحنا نفسنا
انا مش قادرة افهم ازاي ده عسكري وفي سلاح الطيران وهاين عليه النصايب دي كلها

Unknown said...

لا كفاية كده.... مواطن مصري ده فظييييع... انت بتجيب الكلام التيت ده منين؟

Unknown said...

سعيد افندي

لا يا سعيد مش الاعلام المصري بس

دي ناس عادية وصحفيين ومدونين وحتى ناس لا ليها في الطور ولا في الطحين بيساووا ما بين حماس واسرائيل

والله تسيبي ليفني ما قالت الكلام اللي هم بيقولوه

د. أحمد الحاج said...

هكذا تكون القيادة الشريفة
رغم التهديد المتكرر باستهدافه..
إلا إنه جاد بروحه لينفي تخرصات الذين قالوا أن قيادة حماس هاربة تحت الأرض
نال ما ظل يطلبه سنيييين طويله
وجه كلمة إلى الأمة أمس عبر قناة الأقصى
ثم اليوم بعد آخر تهديد جمع أبناءه وزوجته وطالبهم بلبس الملابس الجديدة ووضع الطيب لزيارة إبراهيم (إبنه الشهيد)
أرأيتم مثل هذا من قبل؟؟
والله ستنتصري يا حماس ما دام هؤلاء قادتك

مواطن مصري said...

اة المقالة بتاعت الحج فيسك شبة مقالة علاء الاسواني بتاعت التدين البديل


يمكن كل واحد بيفكر باسلوب عكس التاني بس متفقين في المضمون مختلفين في الشكل


بس

ط

wafaa said...

نوارة، سبيلى الطلعة دى لو سمحتى ارد بس على المواطن المصرى واى مواطن مصرى غير المواطن المصرى يقول كده،
يضربوا بالصواريخ اللى مش بتعور حد دى ؟ ولا يسكتوا وتبقى خيبتهم زى خيبتنا ؟ انا شايفة ان لو الصواريخ دى ماعورتش حد على الاقل هتعمل قلق ..على امل ان لو كان فيه اى اتفاقية او سلام يكون فيها شوية كرامة لناس بتدافع عن بلادها باللى تقدر عليه ، مش هنقول يكون فيه تعاطف عربى عشان كده يبقى بنهيس على بعض
اتمنى تكون وصلتك فكرة الصواريخ
شكرا نوارتنا

TAFATEFO said...

:D:D

وبعدين حضرتك الأيام دي تدعو لبوست طويل عنوانه "تعرف ايه عن المنطق؟" .. أصبح ضروري هذا البوست

TAFATEFO said...

في بنت في برومو الجزيره عن غزه بتقول يا قادة العرب يا من تسمون صواريخنا عبثيه .. مواقفكم أنتم هي العبثيه

أنا فرحان باللي بتنجزه المقاومه .. أنا كنت خايف منها في الأول (وكان عندي مبرر للخوف) .. بس أنا من امبارح فرحان .. فرحان علشان اسرائيل بقالها كذا يوم متردده تدخل برياً لأنها هتمنى بخساشر فادحه .. فرحان برضه علشان القناع سقط عن الكل وعباس وفتح أصبحوا محاصرين باللعنات .. رغم اني مش متفائل بالاستحقاق الرئاسي القادم .. لكن مش مشكله .. ومبسوط كمان علشان صواريخ المقاومه في تطور .. وده معناه ان بكره مختلف خالص وان في أمل كبير في بقاء مقاومه مسلحه على أرض فلسطينيه قادره على قض مضاجع إسرائيل .. وانها فعلاً إلى زوال قريب .. وان كل يوم على الأرض بيقرب من نهاية إسرائيل

TAFATEFO said...

هو لو زوجاته الأربعه فعلاً .. يبقى نال الحسنيين .. النصر والشهاده

مواطن مصري said...

ب الرغم اني ضد فتح و حماس و اني بكرة اسرائيل الا اني متفائل بغد افضل لفلسطينين

TAFATEFO said...
This comment has been removed by the author.
مواطن مصري said...

انا مش بجري

يا طفطف بس لعل و عسى ان يفيق الفلسطينمين من هذا الدرس ولا ينخدعو مجددا في امثال حماس او فتح و يتحدو

مواطن مصري said...

ههه طفطف شلت تعليقك لية؟

:))

TAFATEFO said...

@MM

حد جاب سيرتك؟؟

:D:D:D

كل عام وانت بخير يا فندم

:D:D

muslima said...

السلام عليكم ورحمة الله

يا جماعة الاعلام الغربى مبهدلنا مش جايب حاجة خالص عن المجزرة ولا حتى صورة طفل متقطع واحد لو كان بيبقى صورة لانفجار من بعيد مالوش اى لازمة وفى الغالب بيكون الصواريخ اللى نزلت فى اسرائيل علشان تبين انهم الضحية وده مقال لسة كنت باقرأة فى صحيفة ديلى تليجراف البريطانية شوفوا بيقولوا ايه .. عايزين نغزوا المواقع دى يا نوارة بمقالات وصور ايه رايك ..
وده لينك المقال
http://www.telegraph.co.uk/comment/4045000/Hamas-is-the-obstacle-to-Middle-East-peace.html

فى انتظار ردكم نعمل حاجة بجد للمواقع المنيلة دى
اختكم مسلمة

muslima said...

السلام عليكم يا نوارة وكل الاخوة الافاضل

انا اول مرة ادخل على المدونةوبعت رد من شوية مش عارفة وصل ولا اييه

ممكن حد يرد عليا

Unknown said...

بعض القادة يابوا الا ان يكونوا في الصفوف الاولي و منهم الفريق اول عبد المنعم رياض رئيس الاركان المصرية و الذي استشهد في الخطوط الامامية من جبهة القتال. ففي أثناء الاشتباكات العنيفة التي حدثت بين القوات المصرية والإسرائيلية في 9 مارس/آذار 1969 على امتداد الجبهة من السويس جنوبا إلى القنطرة شمالا أصر الفريق عبد المنعم رياض على زيارة الجبهة رغم ما في ذلك من خطورة ليرى سير المعارك عن كثب ويكون بين جنوده، ووصل إليها بالفعل على متن طائرة عمودية ومعه مدير المدفعية وانضم إليهما قائد الجيش.

وفي ظهر ذلك اليوم أصر على زيارة إحدى وحدات المشاة الفرعية التي لم تكن تبعد عن مرمى النيران الإسرائيلية سوى 250 مترا والتي كانت في اشتباكات معه طوال اليوم الفائت وتقع تحت سمعه وبصره، وما إن وصل إلى تلك الوحدة حتى وجهت إليهم إسرائيل نيران مدفعيتها، واستمرت المعركة التي كان يقودها عبد المنعم بنفسه حوالي ساعة ونصف الساعة إلى أن انفجرت إحدى طلقات المدفعية بالقرب من الحفرة التي كان يقود المعركة منها ونتيجة للشظايا القاتلة وتفريغ الهواء توفي عبد المنعم رياض بعد 32 عاما قضاها عاملا في الجيش متأثرا بجراحه.

وقد نعاه الرئيس جمال عبد الناصر ومنحه رتبة الفريق أول ونجمة الشرف العسكرية التي تعتبر أكبر وسام عسكري في مصر.

أحمد عبد الوهاب said...

http://www.freegaza.org/index.php?module=latest_news&id=2ce3677c56a012c009f75448db287929&offset=

Mafrousa said...

نوارة
الاول كل سنة و انتى طيبة و بخير
ثانيا اسمحيلي انى اعلق عندك
يمكن و جهة نظري فى الموضوع مش حتتوافق مع اللى انتى بتقوليه
بس انا اعلم عنك انك قارئة درجة اولى يمكن اكتر منى بكتيييييييييييير
و لكن معلشي اسمحيلي برضه اقول راي و ليكي مطلق الحرية فى حزفه

اولا حماس دول مش همه اللى نقضوا الفاتحة اللى اتقرت فى الكعبه مع فتح ؟؟؟؟
اسرائيل متغاظة من المعاهدة اللى تقريبا مقيداها بتعمل بهلوان علشان تزق مصر فى البدء فى نقضها
فبتضغط على مصر بالفلسطنيين اللى بتزقهم ناحيتها

لا تنكري اننا اكثر الشعوب لنا عاطفة قوية
الناس بتصعب علينا بسرعة جدااااااا
و همه بيلعبوا على الوتر ده

اسرائيل من اول الخليقة اللى يومنا هذا لم تتغير سياستها اللى فيها كدب و خيانة
احنا اللى بننسى و مش بناخد احتياطنا منها و من افعالها اللى المفروض نكون قارينها

نوارة فاكرة لما فتحوا المعبر فى يناير و الناس ظهرت فى الاخبار و هيه بتضحك و راكبة عربياتها و لا الميكروباس بتاعهم و بيقولك احنا داخلين نتفسح؟؟

بلاش نسيتي لما دخلوا نهبوا و سرقوا
و احنا بررنا ده على انهم من غلبهم و علشان مش لاقيين؟؟؟
روحي اقري البوست بتاع قوس قزح و انتى تلمي اكتر باللى بيحصل داخل فلسطين

تقدري تقوليلي فين ذكائهم فى انهم يخلقوا مشاكل داخليه فى الوقت اللى همه المفروض يعملوا على مواجههة عدو واحد؟؟؟
مش برضه من الذكاء ان اي طرف له مطالب يتوكس و يستنى لما تبقى البلد بلدهم تحت سيادتهم و بعدين يعملوا اللى همه عاوزينه؟؟؟

و بعدين انا مع اننا مهما كانت خلافتنا فى اسلوب حكومتنا
و مهما كانت حجم اخطاءها معانا
ده مش الوقت اللى نطلع و نقطع فيهم مين ماكان
لأ
احنا النهاردة ربنا بيورينا العرب كلهم رأيهم فينا ايه؟
و احنا اللى فاتحينلهم بلدنا و بياكلو من اكلنا و شربنا و بنعاملهم زي ولاد البلد و احسن كمان
و همه اول ناس بتعض فينا
انا بقول ديه غيرة
ايوه غيرانين مننا
احنا الاحسن
احنا احس عقول
احنا الاحسن حتى لو كنا فى نظرك الاوحش
بس احنا احسن منهم بكتييير
فى كل حاجه
علشان كده همه غيرانين و بيشتغلوا من تحت لتحت للنخورة و التوقيع ما بيننا
لازم نكون اكثر و عيا
ولازم مانعملشي زي اللى حوالينا
مهما كان خلافك مع اخوكي لازم تتكاتفى فى مواجههة عدوك و عدوه

انا ابعتذر على انى طولت عليكي
و اعتذر انى يمكن اكون قلت كلام لم يلاقى استحسان من قبلك و يمكن تكونى مختلفة معاه
و اعتذر على اني يمكن اكون فرستك بكلامي
يمكن تفتكري اني انا سلبية
لكن لأ
انا بحب الذكاء فى التعامل
يعنى انتصر على عدوى بمخي مش بلسانى ولا ايدي

و لو رجعتي لأي من الانتصارات فى الحروب من اول الخليقة
حتلاقى ان النصر فيها بعد ربنا للعقل و المكر فى التفكير

و احنا المصريين لايوجد فى العالم كله من ينافسنا فى مخنا لو وظفناه صح
اعتذر على الاطالة مرة تانية

TAFATEFO said...

فهمي هويدي على الجزيره قال ان مصر .. مصر .. اللي هي جمهورية مصر العربية .. العربية .. وزير الخارجيه زار تركيا وطلب تدخلها للتهدئه والمصالحه بين الفصائل الفلسطينيه .. وان المسؤولين الأتراك فوجئوا بده .. ورجب طيب أردوغان أعلن النهارده استعداده للوساطه من أجل التهدئه وللمصالحه بين الفصائل الفلسطينيه

عظيمه يا مصر

حـنــّا السكران said...

انت فاكرة أول ظهور لأولمرت بعد المجزرة؟؟ ظهر هو و بارك و ليفني جنب بعض ايدهم بإيد بعض و اول ما بدأ حديثه توجه بالشكر لنتنياهو و حزب اسرائيل بيتنا و كل الاحزاب الاسرائيلية اليمينية و اليسارية و سماهم بالاسم ..مع ان كل هؤلاء من اول اولمرت لاخر واحد فيهم ..بينهم الان ما صنع الحداد ..و كل واحد منهم عايز يدمر التاني سياسيا بشكل نهائي ..و بيجيبوا لبعض قضايا من تحت الارض ..لكن لما يشعروا بالخطر ..بيصيروا كلهم واحد ..لان عندهم قضية بتجمعهم كلهم ..أما المخلوقات اللي من فصيلة العرب .فأول ما يشعروا بالخطر الحقيقي و مواجهة المسؤولية ..بيبتدوا يقولوا : و هو فلان عامل فيها مناضل وبطل؟ طيب ما جد جد جد جد جده كان شغال طباخ عند الخديوي اسماعيل ..و ست ست ست سته كان بتحب واحد من المماليك ..و مراته اللي اجهضت العام الماضي كان احتمال تجيب بنت تكبر و تتجوز واحد اخوانجي او بعثي . و لسه بتقولوا عليه بطل و عايز يناضل و يحارب؟؟؟ و عايزينا نصدقه و نأمن جانبه ؟ يعني حماس لو خرجت عن الملة و الدين بكرا الصبح ..مش رح تفرق و رح يقولوا نفس الكلام و لو اعلنت انضمامها للحزب الوطني كمان مش رح تفرق ..طول ما هي ماسكة بندقية ..و نحن منتغنى بالمرحوم ياسر عرفات ..طيب ما ياسر عرفات قتلوه الاسرائيليين و دي حاجة معروفة حتى بعض الاسرائيليين و الفرنسيين حكوا عنها بس طنش عنها العالم كله و لم يتكلم عنها احد من الرسميين العرب سوى الرئيس السوري اللي قالها صراحة . و عرفات كان صديق حميم للرئيس مبارك و ما كان يسميه إلا الرئيس المبارك حسني مبارك ..هو مبارك ما انتبه انه عرفات اتقتل؟؟ و لاّ أخد بواجب العزاء فقط و كفى الله المؤمنين شر القتال .زي ما اخد واجب العزاء بالشيخ احمد ياسين الله يرحمه . و زي ما ممكن ياخد بواجب العزاء بعباس أو هنية لو اتقتلوا لا سمح الله .من غير ما يسأل مين قتلهم .لأنه السؤال لغير الله مذلة .. لكن يجب أن نسأل من هو الله في هذه الحالة .. استغفر الله العظيم .

سندس وأمل said...

هيييييييييييييييييييييييييييييييييييه

اخيرا لقيت من يؤيدنى...

كلامك حلو........

7 said...

رد الفعل فعلا غريب جدا
كل واحد بقى ليه رد فعل لوحدة
بس تحس من كله مش عارف يعمل ايه ؟؟
ناس بتهرب مكسوفة مش متعودين انهم كدة,, ناس بتقول هما اللي جابوه لنفسهم ,, احسن (اه والله) مش هما اختاروا حماس , يشربوا بقا
وناس زهقت وكله بيفوت زي ما فاتت قانا و غيرها و ناس تقول دي مصر محتاجة اكتر منهم
و لسه ناس بيقولو احنا مش عرب ,, و ندافع عن المصريين بس ودول خطر
و ناس عملت مظاهرات و ناس هتدعي و
و
و
بس فعلا ,, بعيد عن ردود الفعل اللي انا شايفها كلها بتهرب من الحقيقة و بتدور علي حقيقة
احنا ( احنا مش اللي محتلين بلدنا ) نعمل ايه ؟؟
نرقص لغزة ,, ندعي ,, نصوم ,, نقف ,, نقعد ,, ....!! ايه

سندس وأمل said...

اسمحيلى انى ارد على (واحده مفروسه)

بصى يافندم.....الفاتحه الى حضرتك بتتكلمى عنها

مش عرفاها وممكن الصحافه تكون شوهت السمعه

يعنى زى مابيعملوا.....

وان لا انكر ان شعبنا من ازكى الشعوب

ولكنه لايستعمل هذا الذكاء للاسف

وبالمناسبه مصر المقصود بيها(الحكومه))

مش الشعب شعب مصر من احسن الشعوب

وكمان شفتى تعاملهم ازاى تضامنى مع غزه

يعنى مش وحشين الوحشين هما (الحكومه)مش

اكتر وعلى فكره لما دخلوا الفلسطنيين

عندنا احنا بعنا ليهم الحاجات الى هما محتجنها

يعنى مش زى مابتقولى حضرتك وكمان اخزوا حاجتهم

وخرجوا ورجعوا بلدهم...مش احتلو سيناء

يافندم ...وبالنسبه لاننا فتحين

لهم بلدنا فده بعد ثلاثه ايام من

العدوان على فلسطين وغزه بعدما ابيدت غزه

حتى عندما فتح المعبر كانت تدخل المساعدات

بالبطىء مع العلم ان مصر هى المتحكمه فى المعبر

ولكن مصر(الحكومه) تأخذ اوامر من اسرئيل

وبالنسبه لحركت حماس فهى متهضه من قبل

الحكومه لانهاتدعوا الى الخير وكل من يفعل

شىء جيد للبلاد يبقى مكروه...ذى الاخوان

فى مصر يقولون كلمت حق فيعدمون

ومن يقول كلمه من الى يحبها الحكومه

والحزب الوطنى يبقى ميه ميه

فين الديموقرطيه....

وانتى نسيتى ان حماس ضربت اسرائيل ب160

صروخ نعم لم يصب الا القليل ولكنه اثار

الرعب فى قلوب الاسرائيليون لانهم بيخافوا من

خيالهم...........

المهم يعنى لو انتى

مش قادره تستوعبى حركت حماس ولا الخوان

فده براحتك كل واحد وحريته

المهم يعنى تكونى استوعبتى حاجه

ووصلت ليكى الهدف

والمهم كمان نكون ايد وحده دلوقت...

عفوا على التطويل...وان كنت قلت كلام ضايقك

معلش

سندس

مهندس مصري بيحب مصر said...

معلش يا نوارة حأنشر نسخة من البوست بتاعي عندك

حول غزة و المعبر نحكي علهم يفهمون
قبل ما نحكي اي حاجة روحوا إقروا مقال ابراهيم عيسى ده http://dostor.org/ar/index.php?option=com_content&task=view&id=11275&Itemid=1
لإنه حيفهمكم حاجات كتير و حيوفر كلام كتير انا كنت عايز اقوله لإن من المعضلات توضيح الواضحات

الهدف من الهجمة الإسرائيلية هو تركيع المقاومة في غزة و وقف اطلاق الصواريخ و ارجاعها ذليلة الى حالة الحصار حيث تتحكم اسرائيل في كل مقدرات القطاع
و هذا هو الحد الأدنى المقبول لديهم

اما الحد الأقصى هو إسقاط نظام حكم حماس المقاوم و الغير معترف بإسرائيل و إعادة نظام حكم عباس و دحلان للقطاع ليقوموا بعملهم القذر الذي يمارسونه في الضفة الغربية حالياً من اعتقال للمقاومين و حماية اسرائيل بزعم المحافظة على عملية سلام عبثية تتمنى اسرائيل لو انها ظلت تتفاوض فيها الف عام و تواصل بناء المستوطنات و الجدران العازلة في الوقت نفسه حتى تستولي على كل ما يمكنها من الارض بدون تحمل مسؤولية السكان بل إلقاؤها على عباس
الذي تستطيع من خلال خيانته و تواطؤه دفن القضية
اسرائيل لا تفكر حالياً في استفزاز حليفتها مصر بل تقوم بالتنسيق معها على اعلى المستويات

و محدش طلب الحرب
بل و لا اطالب بطرد السفير رغم انه اقل شئ ممكن عمله هو و قطع الغاز تنفيذاً لحكم القضاء الإداري
لا اطالب حتى بوقف التطبيع الإقتصادي معهم من كويز و خبراء زراعيين و غيرهم
رغم اننا المفروض ان نفعل ذلك لو كنا حقاً مازلنا الدولة الرائدة و زعيمة العرب
كل ما اطالب به فتح المعبر بشكل مستمر و طبيعي
و لما بنقول فتح المعبر ما نقصدش انها تبقى وكالة من غير بواب
لأ و الف لأ
عايزين المعبر يكون طبيعي زي معبر حلايب مع السودان
زي معبر السلوم مع ليبيا
ان تمر من المعبر البضائع بكل انواعها و التي يشتريها الفلسطينيين من فلوسهم و من حر مالهم و محدش فينا بيجبي عليهم و بيدفعوا تمنها الطاق اتنين و تلاتة ساعات
و ان تمر المساعدات الإنسانية التي تبرع بها ناس من العالم كله لغزة بكل حرية و لا نربط مرورها بالتنسيق مع الحليف الإسرائيلي - المساعدات القطرية اغلبها لم يعبر حتى الآن و معها اغلب المساعدات السعودية و المصرية و المساعدات كلها عموماً لم يعبر منها الا النزر اليسير - كل ما علينا هو إدخالها و بعدها تصبح مسؤولية حكومة القطاع

و ان تكون حركة المسافرين حرة في الإتجاهين
و انا هنا لا أطلب مساواة الفلسطيني الجار العربي المسلم الشقيق بالحليف الإسرائيلي الذي يدخل من طابا حتى شرم الشيخ بهويته الشخصية و بدون جواز سفر بكارت بسيط من منفذ طابا ايلات الحدودي
بل أطالب بمعاملة الفلسطيني معاملة اي سائح اجنبي
و ان يدخلوا بجوازات سفرهم و عليها تأشيرة دخول من السفارة المصرية في غزة كأي سائح اجنبي يحصل على تأشيرة سياحية لمدة 3 شهور
و يتم تفتيشهم جيداً و من يعثر معه على اي ممنوعات مهربة يتم تحويله للقضاء الطبيعي و يحاكم قانونياً
و من يحمل اشياء تستحق عليها رسوم جمركية يقوم بدفع جماركها او يتم مصادرتها في حالة عدم الدفع

يعني يصبح معبر طبيعي زي اي معبر تاني
انتوا عارفين ان فيه فلسطينيين يعملون في الخارج في دول الخليج و غيرها و لكنهم لا يستطيعون الخروج من بلدهم و الدخول إليها و مثلهم الطلاب الذين يدرسون بالخارج و المرضى المحتاجون لعلاج بالخارج و الحجاج و المعتمرين و غيرهم
ما معنى و ما غرض ان يقفل المعبر في وجه هؤلاء ؟

و اللي متخوفين من نزوح جماعي للفلسطينيين في حالة فتح المعبر إذا قامت اسرائيل بهجوم بري
أحب اطمئنهم و اعرفهم ان الفلسطينيين الحاليين عندهم تمسك بارضهم فوق ما يتصوروا
ثم المعبر كان مفتوح منذ انسحاب اسرائيل من غزة و حتى حسم حماس العسكري للموقف في القطاع لمدة سنتين و نصف و قامت اسرائيل خلال هذه المدة بضربات و توغلات و اجتياحات كثيرة اكبرها عام 2006 بالتزامن مع حرب لبنان و مع ذلك لم نشهد نزوحاً لللاجئين وقتها فمن اين جئتم بهذه الافكار الخيالية ؟!!!

و عندما كان المعبر مفتوحاً و تحرسه قوات عباس الخائن المستسلم مع المراقبين الاوربيين الذين كانوا يتم حجزهم من قبل اسرائيل بصفة متقطعة لوقف عمل المعبر بحجة عدم وجودهم
عندما كان المعبر مفتوحاً بهذه الطريقة الذليلة لم يكن يشكل خطراً و كان المسافرون و كانت البضائع تتدفق من خلاله
اما عندما تم تنظيف المعبر من العملاء و المراقبين و اصبح معبراً عربياً خالصاً تحرسه من الجانب الفلسطيني قوات الحكومة الشرعية ( حكومة اسماعيل هنية ) و ذلك بإعتراف واضعي الدستور الفلسطيني انفسهم ( القانون الاساسي )
تم غلقه بحجة واهية و هي ان الوضع الحالي إخلال بإتفاقية المعبر
رغم ان الإتفاقية غير ملزمة لنا اصلاً و تتحدث عن الجانب الفلسطيني من المعبر وليس الجانب المصري بل و لم نقم بالتوقيع عليها اساساً
فأطراف الإتفاقية هم السلطة الوطنية الفلسطينية و الإتحاد الاوربي و إسرائيل

اما غلقنا نحن للمعبر فهو يخالف القانون الدولي و يمثل إشتراكاً في جريمة الحصار المفروضة على الشعب الفلسطيني لتركيعه و حثه على التخلي عن خياره الديموقراطي و حكومته المنتخبة
كما ان اغلاق المعبر هو انتهاك لإتفاقيات جنيف الدولية خاصة اننا لسنا في حالة حرب مع غزة

ضحكت عندما سمعت رئيسنا المبارك يقول و شر البلية ما يضحك : إننا لن نقع في فخ تكريس الإنقسام بين الضفة و القطاع و لن نفتح المعبر :))
و هو ما يمكن اعادة صياغته بعبارة اكثر وضوحاً كالتالي :
إننا لن نفتح المعبر حتى تستسلم حماس و تتخلى عن المقاومة و تعيد سلطة عباس الخائن الى القطاع و تتخلى عن الامانة التي حملها لها الشعب الذي انتخبها و ذلك حتى ترضى عنا امريكا و إسرائيل

إن تصريحات ابو الغيط المستسلم الخانع و الذي لا يستأسد الا على أشقائنا الفلسطينين ضايقت الكثيرين و تمنوا لو يتكلم الرئيس مبارك و ليته ما تكلم فقد ذكرني بالمثل القائل سكت دهراً و نطق كفراً

و لا يجب بأن يتحجج البعض بأن الآخرين من كل حكام الدول العربية لم يفعلوا شيئاً حيث ان الحديث الشريف يقول ما معناه : لا يكون احدكم إمعة يقول إذا احسن الناس احسنت و اذا اساؤوا أسات بل وطنوا انفسكم ان تحسنوا اذا اساء الناس
و لكننا عشنا و شفنا مصر الرسمية بجلالة قدرها إمعة و عميلة و خائنة

قطر قد تكون مزايدة و تحاول لعب دور اكبر من حجمها و لكننا من سمحنا لها بهذا بتراجعنا و انبطاحنا و لابد ان يتقدم غيرنا ليملأ الفراغ الذي تركناه
ثم انها تلعب على الحبلين تؤوي القاعدة الامريكية في السيلية و تقيم علاقات اقتصادية وثيقة مع اسرائيل
و لكنها تلعنهم في قناة الجزيرة و تدعم حماس مادياً و ترسل لفلسطين المعونات الإغاثية
لكن مصر فشلت حتى في اللعب على الحبلين و ظهرت مائلة لجانب الخيانة بشكل مفضوح و مقزز

إن مصر تطالب كما إسرائيل بالعودة الى التهدئة لكن ماذا كانت بنود التهدئة
كانت تنص على وقف اطلاق الصواريخ من القطاع و جميع اعمال المقاومة بصورة مؤقتة
مقابل وقف اطلاق النار من اسرائيل بكافة اشكاله و انهاء الحصار و فك المعابر على ان تمتد التهدئة من غزة الى الضفة

و ماذا حدث في مقابل خرق المقاومة للتهدئة 3 مرات فقط في 6 شهور قامت اسرائيل بما يزيد عن 600 خرق للتهدئة من قصف و قنص و توغل و اعتقال و لم يتم رفع الحصار و لم يتم فتح المعابر و لم تمتد التهدئة الى الضفة
فعن أي تهدئة يتحدثون

و لمن سيتحدثون عن مقتل الضابط المصري على الحدود انصحهم بقراءة بيان جبهة علماء الازهر
http://www.jabhaonline.org/viewpage.php?Id=2116
و هي مستقلة تماماً عن الشيخ سيد طنطاوي
خاصة ان ملابسات مقتل الضابط غير واضحة حتى الآن فقصف الطيران الإسرائيلي تسبب في فتح ثغرة في السور الحدودي فإندفع اليها بعض الفلسطينيين هرباً من القصف و ربما رغبة في شراء احتياجاتهم التموينية بعد استنزافهم في ظل حصار خانق نحكمه نحن عليهم مع إسرائيل بل و ننسف بالإشتراك مع سلاح المهندسين الأمريكي الانفاق التي تستخدم في تهريب القوت الضروري لداخل القطاع
المهم ان قواتنا حاصرتهم و اطلقت النار في الهواء حولهم و اثناء ذلك كان القصف مستمر و لم يعلم احد من بدأ الضرب في المليان و الذي اسفر عن مقتل ضابط مصري و مواطن فلسطيني و اصابة 3 فلسطينيين
اي ان ملابسات الحادث مجهولة تماماً و يجب انتظار نتائج التحقيق فيه
ولكن خليكم فاكرين إن المثل بيقول الجوع كافر
و لاتنسوا ان اسرائيل تقتل جنودنا و مواطنينا بإنتظام و لا تقوم حكومتنا بإتخاذ أي إجراء

و نهاية اقول لكل من اقتنع برأي نظامنا الخائن العميل و يرضى بغلق المعبر تحججاً بما يسمى الامن القومي المصري رغم ان استقرار حدودنا هو من صميم امننا القومي و هو ما لن يتحقق في ظل حصار الغزاويين و قصفهم
اقول لهم (( و من يتولهم منكم فإنه منهم إن الله لا يهدي القوم الظالمين )) المائدة 51
حسبنا الله و نعم الوكيل و لا حول و لا قوة الا بالله العلي العظيم

احمد العربي said...

ياه
لسه حنفضل كل يوم نعيد و نزيد في كل القضايا اللي بنعيد فيها كل يوم, الحمد لله على المدونات لانها بتنقل الرأي و الرأي الآخر بجد , نواره أنتي بتعملي اللي فشل فيه كتير و المدونة دي بتكشف مدي الاختلاف و الاختلاف العميق بين أبناء الشعب الواحد مش الشعوب العربية العريضة

هل إختلاف حماس و فتح سبب العدوان على غزة
الجواب لا بكل تأكيد ,
خلاف حماس و فتح زي خلاف مصر و سوريا و سوريا و السعودية نصف الاحزاب اللبنانية مع النصف الآخر. الاختلاف هو نتيجة لما يحدث في فلسطين و ليس سبب لما يحدث !!!! الخلاف هو نتيجة إنو أمريكا و إسرائيل تدلل طرف فلسطيني يرضخ للشروط المهينة و يعترف بيد إسرائيل العليا في كل فلسطين الاختلاف نتيجة أن إسرائيل و أمريكا تخوض حرباً ضد من يقول لا للاحتلال و لا للهوان ولا للعار . الاختلاف هو نتيجة ان الانظمة العربية نفسها تختلف في كيفية خدمة المشروع الصهيوأمريكي في المنطقة

في 1982 هاجمونا في لبنان لأن سلاح المقاومة الفلسطينية أصبح يشكل خطراً عليهم ولأنه كان هناك – بيننا- من أراد تحويل مخيمات اللاجئين إلى حدائق حيوان بعد طرد الحيوانات البشر الفلسطينيين منها.

لو خرج نصف طفل فلسطيني يقول لا للإحتلال فسيتم قصفة و قتلة و سيوظفوا آله اعلامهم الضخمة لايجاد المبرر لذلك... هم أعداء وهجومهم علينا دائماً مبرر من طرفهم لكن أن نختلف نحن سبب هجوهم علينا
فهذا ما لا افهمه

تحياتي

Nemo said...
This comment has been removed by a blog administrator.
Maha said...

أنا بقول كده برضه

لسه كاتبه تدوينة بعنوان :

كلا يا سيدي لا تلم حماسا

Unknown said...

والله يا واحدة مفروسة انا نزلت تعليقك من غير ما اقراه
بس قريته دلوقت
واسمحي لي اقول لك: ايه التخريف ده يا اوختي؟
وايه العنصرية دي؟
وايه كم المغالطات دي؟

اولا ماحدش دخل سرق ونهب دول دخلوا اشتروا بفلوسهم وما ادناهمش معونات

ثانيا

القصة وما فيها ان حكومة مصر متضايقة عشان الشعب الفلسطيني انتخب حكومة مش على كيفه هو
ومعلش اسمحي لي يعني بامارة ايه الالاطة دي
لا بنديهم معونات
ولا بنعبرهم باي حاجة
ولا هم عبيد احساناتنا
والنظام ده اصلا مفروض علينا
- او على الاقل ده الكلام اللي بنقوله -
ثالثا
غيرانين مننا ليه يا حبيبتي؟
عشان عباراتنا الغرقانة؟
وللا عشان شبابنا اللي بيرمي نفسه في البحر؟
وللا عشان عماراتنا الواقعة
وللا عشان الدويقة اللي قالوا عليها وقعت من شخة الناس؟
وللا عشان الجوع الكافر؟
وللا عشان بلدنا المتباعة للاستثمار الاجنبي؟
مين دول اللي قاعدين واكلين اكلنا وشاربين شربنا يا حبيبتي؟

دول بييجوا هنا يصرفوا فلوسهم علينا ومنه لله اللي حوجنا للقريب والغريب وفقرنا ودمر زراعتنا وصناعتنا وتجارتنا وعمل مننا كومسيونجية

الوليد بن طلال شاري اراضي كتير قوي في بلدك
وبيأكل رجال اعمال مصريين كتير وبيشتغلوا له مرمطونات

الفلسطينيين ح يغيروا مننا ليه؟
اذا كان روبرت فيسك اللي لا من ديني ولا من دينك قال المصريين ما يفرقوش كتير عن الفلسطينيين
من خرية لطوبة يا قلبي لا تحزن

ومين قال لك بقى اننا احسن في العقول؟
ده على اساس ايه يا ستو هانم؟

يعني انهي نظرية عنصرية اللي اثبتت لك كده؟
ما تدخلي على الابحاث الاسرائيلية اللي حاطة مستوى الذكاء المصري قبل موزنبيق بنمرة
وده كلام عنصري

واذا كنتي قابلة انك تقولي ان عقولنا انضف من عقول العرب
وانا برضه مش عارفة ده بناء على ايه وللا بامارة ايه
يبقى بقى تقبلي ان الاسرائيليين اكيد اذكى مننا
على الاقل باين عليهم امارات النباهة يعني

انما احنا فين امارات النباهة اللي بتقولي عليها؟

راي العرب فينا ايه يا اوختشي؟

انا ما سمعتش غير: المصريين شعب عظيم ولا يليق ان تمثلهم هذه القيادة

احنا مش كنا بنقول كده برضه؟

وللا احنا القيادة دي بتمثلنا فعلا؟

والله يا اوختشي انت لو فيه منك عشرة يبقى احنا فعلا احسن واحد يمثلنا حسني مبارك اللي كان طالع في التلفزيون دلوقت يقول: قبل ما ادخل اي فلسطيني باستئذن اسرائيل

وش كده

يمكن غيرانين مننا عشان اسرائيل بتحبنا وبتكرههم؟

مواطن مصري said...
This comment has been removed by a blog administrator.
مواطن مصري said...
This comment has been removed by a blog administrator.
أكون أو لا أكون said...

يانواره... بالنسبه للفيديو اللي قلتي عنه
... لكشف حقائق إجرام إسرائيل
الحقيقه إن قوقل بزيل الفيديو اللي من النوع ده لو كان بالإنجليزي... أنا لاحظت إن كل الفيديو اللي باللغه الإنجليزيه بشيلوه... خصوصا لو كان فيه صور قريبه جدا بتبين حجم المصيبه والدمار اللي أهلنا في غزه بيعيشوه... بيخلوا اللي بالعربي... لان الناس مش حتفهم عن مين المصايب ده...
وبيخلوا اللي فيه صور تفجير من بعيد...
كلهم متأمرين...
يعني هم مش معقول بيتستروا على الأحداث على التلفزيون ويروحوا يعرضوها على النت...
خصوصا الناس بتستعمل النت أكثر ما بتتفرج على التلفزيون.

أنا إتحرق دمي من يو تيوب... ورجعت بقلب مفحم... من الكلام اللي بيكتبوه الكلاب الاسرائليين. ومن الفيديو اللي بيعملوه كله كدب وتشويه للحقيقه.
إحنا لازم نعمل حاجه.

محمود سعيد said...

اللى بيقول على الصواريخ أنها عبثية بيحسسنى أنه ابن امبارح

مكانش عيل ساعة إنتفاضة الحجارة حتى ويقدر يفتكر الفترة ديه

كان طوب عبثى برضه صح
ما هو بسبب الأطفال العابثين اللى كانوا بيحدفوا الطوب دول قامت مجازر

عيال عابثة !!!

طيب إيه المطلوب يعنى يبطلوا صوراريخ عابثة ويحدفوا طوب
ولا يبوسوا الجزم

ثم برضه اللى عمال يقول الحدود والسرقة والنهب

أنا روحت عند الحدود
ومشتريتش من هناك إزازة مياه حتى
ده إزازة المياه كانت بعشرة جنيه

والحاجة الوحيدة اللى ضرت المصريين فى دخولهم
كل ما أركب مع سواق يقولها لى

يقول .... دخلوا مصر
مبقيتش عارف اجيب سجاير
علبة الكليوباترا ب 15 جنيه

وبيروح الاسماعيلية يشترى سجاير

ديه غلطتهم برضه ، صح
مش غلطة مصريين كلهم دناءة

Unknown said...

ثانية واحدة يا مواطن
هو نيمو شتمك؟

انا ما قرتش التعليق قبل ما انشره


استنى ح اقراه

بس ياجماعة مافيش داعي للشتيمة

Unknown said...

يا نيمو

احنا عايزين نوحد الصفوف وللا عايزين نتخانق

ايش عرفك يا نيمو ان لما واحد يبقى مختلف معاك وتكلمه بالراحة وبالمنطق مش ح يقتنع وبدل ما تبقى كسبت عداوة يبقى كسبت صديق؟

ليه تشتم مواطن وهو مش بيشتم حد؟

وبيدخل باحترامه من غير ما يغلط فيك ولا في اي حد

يعني انا مش مع التدوين النظيف ولا حاجة

بس احنا في مرحلة حرجة جدا ومحتاجين نلم على بعض مش نتفرق

نبقى نشتم بعض في ظروف تكون احسن من كده شوية

مواطن

انا شلت الشتيمة وباكرر اسفي انا ما شفتش الشتيمة غير لما شفت تعليقك
وشلت تعليقك كمان

سعيد أفندى said...

اللى بيقوله نيمو ده لا يصح أبدا , مش طريقة حوار دى خالص , هنستفاد لما نشتم ونجرح فى بعض .

مواطن مصري said...

محمود الحجارة وقتها على الاقل كان الصف الفلسطيني موحد و كان عدوة موحد انما الصواريخ دي اخرها تعمل اية دة انا يا راجل لو فرقعت انبوبة البوتجاز هتعمل اصابات اكتر من كدة مش حفرة و تعور واحد

مواطن مصري said...

متشكرين يا نوارة و تعالي اشربي نسكافية بلاك معايا

Unknown said...

انا خلاص يا سعيد شلت التعليقات
وباكرر اعتذاري ما شفتهاش

ونيمو عنده منطق قوي يقدر يرد وممكن هو ومواطن يطلعوا من المناقشة متفقين وصحاب

وكده يبقى احسن من الشتيمة
صح وللا لا يا نيمو

سعيد أفندى said...

الصواريخ حتى وان كانت بدائية من الممكن أن تؤثر اكثر من الغارات الجوية . وفى الموقف الاسرائيى جدا لأنه بطبيعته شعب جبان وبيعمل لأمن حياته ألف حساب , وطالما فيه صواريخ بتهدد امنه ده أو هو متوقعها بتخلق له ذعر وبالتالى هيضغط على حكومته " اللى هو جايبها " علشان تبطل قصف غزة , وده اللى اعتمد عليه نصر الله فى 2006 وبتحاول تعمله حماس

مواطن مصري said...

بس صواريخ حزب الله made in iran
مش لبنان جايلهم تصدير مش منتج محلي

انسانةعادية فى عالم مش عادى said...

والله العظيم انتى فظيعة بسم الله ماشاء الله عليكى بتجيبى من الاخر وكلامك دايما بيجى على الجرح
ربنا يكرمك يارب هكتفى كالعادة بكتفى بمتابعة التعليقات :)

Anonymous said...

هههههههههه
حبيبي يا نيمو، فخر الصناعة السكندرية
هههههههههههههههههه

ما علينا، انا كنت في حوار كتيان من دول، وفوسط الحوار واحدة قالت انه قادة حماس في أنفاق تحت الأرض..

سيبنا من انه أنفاق ومخابئ دي أصلا محتاجة حديد تسليح وده طبعا سعره زي مانتوا عارفين، وطبعا عايزة اسمنت وده مينفعش أصلا لأنه بيطلع من هنا للجدار العازل بتاع اسرائيل عدل..

سيبوكوا من الأنفاق المؤقتة اللي بتتحفر على قد عملية، دي بتبقى معمولة على خشب يعني متلصمة على قد العملية بتاعتها..لو صاروخ نزل عليها ولا دبابة تعدي فوقها دي تبططها..يعني مش مخبأ..
وسيبوكوا أصلا من انه تخبية القادة مش عيب زي ما قالت نوارة!!..هو انا لو مسؤول أمني في حماس هادي القادة الخيار في انهم يستخبوا -وقت ما يكونش لهم احتياج في الميدان- ولا لأ؟..دي مسؤوليتي ولو مسمعش لتوصياتي الأمنية هستقيل مش بمزاجه!!..ورغم كل احتياط أمني فده مبيمنعش انه الشهادة رزق محدش يقدر يمنعه لا عن قائد ولا جندي..

المهم في وسط الحوار، يوصلنا خبر استشهاد الدكتور..

تطمعوا في انه حد يتأسف؟
يقول أنا آسف مشخوخ في دماغي؟
طبعا محصلش..يارب اشوف اليوم ده قبل ما أموت :)

Anonymous said...

يا مواطن شوية متابعة هتعرفك كذا حقيقة..
أولا حماس زي ما بتستعمل صواريخ مصنعة محليا بتستعمل صواريخ سوفييتية مداها زي اللي حزب الله اشتغل بيها..

وأي قصف صاروخي لأي موقع مش هيوقع ضحايا لأنه كله بيستخبى في الملاجئ محدش بيفضل برة..

دلوقتي عشان تبقى عارف، الأخت اليهودية اللي اتقتلت بصاروخ قسام..ماتت ليه؟
عشان اتأخرت في نزول الملجأ عشرين ثانية..

والنبي لو حد اتأخر في الاختباء عشرين ثانية في أي بلد من بلادنا الصاروخ (كانوا صاروخين في البلد كلها) بيختاره على حظه؟
سبحان الله، هي دي بقى وما رميت إذ رميت!!
دي مخليه اليهود قاعدين في الملاجئ وسايبين أشغالهم وكل حاجة عشان الموضوع ده..

نفس الشئ مع حزب الله، يعني كام كانوا ضحايا صواريخ الحزب؟..
مكانوش العدد المرعب يعني، بس الخساير جت من العطلة والرعب والخوف والشلل اللي أصاب الصهاينة..
كل واحد فيهم مستني الصاروخ اللي نازل ده يختاره هو بالذات من بين كل أهل البلد..

صواريخ القسام فكرتها وتركيبها عاملة زي الكاتيوشا..مش عارف يعني إيه يخلي دي جامدة وفظيعة ودي عصافير ولا هي عقدة المنتج الأجنبي؟

Ahmed Al-Sabbagh said...

سلمت يمينك بجد

مواطن مصري said...

واحد مقابل 400


بقى دة اسمو مقاومة فين ايام ياسر عرفات الي واحد كان يفجر نفسة يقتلو 20 واحد

سعيد أفندى said...

كلام احمد نصر تمام

مش مهم الصاروخ مصنع فين الأهم مدى تأثيره فى العدو .

سعيد أفندى said...

واحد مقابل 400"


بقى دة اسمو مقاومة فين ايام ياسر عرفات الي واحد كان يفجر نفسة يقتلو 20 "

الموضوع مش مجرد عدد , الموضوع عقيدة , حتى ولو الألاف استشهدوا مش هيبطلوا ولا سكان غزة هيطالبوهم انهم يستسلموا , لأن اللى استشهدوا كسبوا اكتر باستشهادهم وهو الجنة . انما لما اسرائيلى يموت بتبقى كارثة لأنهم مش مستعدين يموتوا , حبهم للحياة أكبر . ومستعدين يتنازلوا عن أى شىء مقابل حياتهم وده مربط الفرس .

AbdElRaHmaN Ayyash said...

انا مقريتش التعليقات
بس بجد بجد بجد
ميجيبهاش الا نوارة :)
احلى كلام :)

مواطن مصري said...

سعيد انت فكرتني بفلم عادل امام لما قالو

مكانك فوق في الجنة امال انت مش طالع معايا
:)

سعيد أفندى said...

عارف ان الروح البشرية غالية جدا , لكن فيه ناس مستعدة تضحى بروحها الغالية علشان مبدأها . ازاى ممكن تفسر موقف الشهيد نزار ريان اللى استشهد هو وزوجاته الاربعة وخمس من اولاده وبناته الستة بعد ما رفض يسيب البيت؟ سوى ان الناس باعت الدنيا .


مكانك فى الجنة فوق وانت مش طالع معايا , فيه ناس كتير أوى نفسها تطلع معاهم فوق ولو اتيحت لنا الفرصة اننا نكون موجودين هناك معاهم اكيد مش هنتأخر .

ستيتة said...

اللي بيقرأ تاريخ يلاقي ايه بقى بالصلى ع النبي؟ يلاقي اي حضارة تعلى وتعلى وتعلى... وبعدين ينزل المنحنى وتطاطي تطاطي تطاطي.... طيب احنا مناخيرنا بقت في التراب من كتر الفرقه وبؤنا دخله التراب. وبقينا مش بنتنازع بعنصرية بين دول ودول لأ ده احنا جوه البلد الواحده بنقول انت منين (عبط طحن طحن). طيب واللي بيقرأ تاريخ يلاقي ايه برضه بالصلى ع النبي؟ ان بعد كده منحنى الحضارة ها يطلع ان شاء الله وها يرتفع ضهرنا اللي وجعنا تاني بس المهم ازاي؟ بعيال حلوة زي السيدة العظيمة جبهة التهيس الشعبية والسيد مصري وافتخر ومودموزيل خمسة فضفضة ولا ننسى البت خيخة اللي مش خيخة ابدا. يعني قولوا كده بكره ها نصحى من النوم وبعده ها نتاوب وبعده ها نغسل وشنا وبعده نلاقي الصحيان التام أو الموت الزؤام وابقوا قولوا بنت حسب الله الحمش قالت. احذروا حد يقول متفائلة ويصدمني......سيبوني عاوزة افضل نايمالي يومين على ما تقوموا

isawi said...

الله عليكي يا نوارة
لم تتركي لي كلمة... كفيتي ووفيتي
ان كفلسطيني اعيش بالضفة انقل لحضرتكم ماذ تعني لنا مصر> الشعب المصري>
مصر هي العزيزة.الاخ الكبير .الشموخ.الشهامة.الاصالة ويا مواطن مصري اذا ملنا نميل على اخانا الكبير لنجد عنده العدل
وتاكدوا بان الغضب العارم من الناس هو على الحكومة المصرية وليس على الشعب المصري العزيز الذي كان اول من وقف معنا

isawi said...

تحية لنوارة كفيتي ووفيتي
اود ان اعلم الجميع ان مصر غالية علينا نحن الفلسطينين ونحب شعبها لا حكومتها.وكما قال مظفر النواب
لن يبقى عربي واحد
ما دامت حالتنا هذي الحالة
بين حكومات الكتبة
القدس عروس عروبتكم
فلماذا أدخلتم كل زنات الليل الى حجرتها
وسحبتم كل خناجركم
وتنافختم شرفاً
وصرختم فيها ان تسكت صوناً للعرض
فما أشرفكم أولاد ال.............
هل تسكت مغتصبة
أولاد ال...... لست خجولاً
حين أصارحكم بحقيقتكم
ان حظيرة خنزير أطهر من أطهركم