انا مش ضد الشوفونية بس ساعدوني يساعدكوا ربنا

اه، ولا ضد اختزال بلد تاريخها سبعتلاف سنة وتعدادها تمانين مليون في القائد الرمز، بس ساعدوني، يعني على الاقل يبقى فيه تصريحات تحسسني بالفخر

زمااااااااان

لما كانت اسم مصر: القائد الاعلى للقوات العربية

هيييييييييييييييييييييييه ايام، منه لله اللي كان السبب

ما علينا، كان لما يبقى قائد مصر اللي هي القائد الاعلى للقوات العربية يتشتم، يبقى حاجة تضايق الواحد شوية، شوية مش كتير، بس الواحد يقول ما يصحش، ده القائد الاعلى للقوات العربية، مهما كان

لكن لما الريس حبيبي يطلع يقول باستئذن اسرائيل مع كل فلسطيني داخل وكل فلسطيني خارج، اصل اسرائيل من حقها تأمن حدودها، وما تقوليش فلسطين دي ارض محتلة! ومصر شايلة القضية الفلسطينية من سنة تمانية واربعين

يا خيبتي التقيلة، يعني الوضع كالآتي: دلوقت الحكومة المصرية ما تقدرش تدخل فلسطيني ولا تخرجه الا باذن من اسرائيل ولازم تخطرها عشان "ما نتفهمش غلط ليفتكرونا بنهرب سلاح" واسرائيل هي المسئولة عن تأمين حدودها اللي هي فلسطين المحتلة

وبعدين يرجع يقول اننا احنا اللي شلنا قضية فلسطين من سنة تمانية واربعين

يعني بيلبسنا في حيطة، يعني بيقول اننا احنا السبب في الوضع ده كله، ماهو البني ادم يفهم الكلام قبل ما يقوله يعني، يعرض علينا وضع متنيل بستين نيلة يمس السيادة المصرية قبل ما يمس القضية الفلسطينية وبعدين يرجع يقول احنا اللي ماسكين الموضوع ده من اول ما ابتدا؟

ماهو يا اما احنا اللي ماسكينه من اول ما ابتدا يبقى ماحدش يشرط علينا نعمل ايه وما نعملش ايه، يا اما احنا ملزمين باتفاقيات مخزية تمسنا وتمس سيادتنا وكرامتنا وتفرج علينا العال والدون لحد ما روبرت فيسك يقول على رئيس جمهوريتنا انه "الحاكم الاقليمي المسئول عن ادارة مصالحنا (امريكا) في الشرق الاوسخ" (لا وكمان مش عاجبه اداء الحاكم الاقليمي) يبقى نتلط بقى، بنعاير الناس بايه؟ باننا وكسنا نفسنا وكسناهم معانا؟

مين اللي يلزم مصر - اللي شايلة قضية فلسطين من سنة تمانية واربعين - باتفاقية مخزية تخليها تستأذن الاحتلال قبل ما تعدي المواطنين؟

مين اللي يجبرنا على توقيع معاهدات زي دي بينما كل شوية يذيعوا اغنية وديع الصافي: اذا مصر قالت نعم فاتبعوها واذا قالت لا فاسمعوها؟

طب مش لما تقول؟

هي دولة مش عارفة تتحكم في حدودها وبتستأذن احتلال دولة مجاورة هي شايلة قضيتها بقالها ستين سنة تعرف تقول نعم وللا لا؟ تعرف تقول الحمد لله بس، الله يخرب بيته اللي وحلنا في الاتفاقيات وفتح باب المعاهدات من الاول حسبي الله ونعم الوكيل فيه، حسبي الله ونعم الوكيل، حسبي الله ونعم الوكيل، عمري ما اتغاظت منه قد النهاردة

ياريتنا لا شلنا ولا حطينا، يا ريتنا سيبناهم في حالهم من سنة تمانية واربعين يمكن كانوا حرروا نفسهم بدل ما الجيوش العربية قعدت تتطوح يمين وشمال والعراقيين يقولوا الجيش العراقي كان ح يدخل تل ابيب

طب ما دخلتوش ليه؟

ماكو اوامر

طب يعني انا مستعدة ابقى شوفونية الى ابعد الحدود، واصدق ان فيه مؤامرة سببها الغيرة من مصر عشان اتجوزت قبل كل الدول العربية وكلهم قاعدين عوانس، بس يا ناس انا مش اتنيلت قلت هاتوا لنا واحد ينصب علينا؟

اهو اديني باقول اهو، واحد ينصب علينا، احنا في عرض نصاب يقول كلام يلهب الحماسة الوطنية، او مدام مصمم يبقى صريح قوي في وشنا كده، ويقول لنا انا باستأذن اسرائيل عشان احنا اتفاهمنا معاهم على موضوع المعبر ده، يبقى ما يعايرش الناس ولا يعايرنا كمان باننا مالناش سيادة وبنستأذن في الداخلة والخارجة من سي السيد، وما يعايرش بحاجات هو ما عملهاش وما حصلتش في عهده اصلا

خلينا في دلوقت

بيقول لك مصر شايلة قضية فلسطين لحد دلوقت

طب ياريت بقى كفاية شيل الواد من الارض، وادي الواد لابوه، عشان دراع مصر خدل وح توقع الواد ع الارض

من ساعة ما شفت الكلام ده وانا باسأل سؤال: دي قيادة تمثلني؟

فيه حد في ام البلد دي بيحبها بجد، وعارف قيمتها وقدرها وقاري تاريخها يرد عليا بدل كلام الجهل والهبل والتخلف اللي صابنا وكل واحد منه لله في اللي عمله فينا

معلش مع احترامي كل واحد يبص في المراية ويعرف انه مش هي دي مصر، احنا مش مصر ولا احنا النموذج المصري اللي يحتذى بيه، ياريت نقرا تاريخ بلدنا عشان نعرف قيمتها قبل ما نهبل في الكلام، والواحد يفاجأ ان كتير من العرب عارفين قيمتنا وقيمة بلدنا اكتر مننا، بدليل انهم متوقعين مننا اللي احنا مش متخيلينه في نفسنا، الغلبانة اللي اتبلت بينا بتمر بأسوأ مراحل تاريخها، واحنا اللي بنعمل التاريخ ده ومش واخدين بالنا ان اللي ح ييجوا بعدنا ح يتفوا علينا

حد بقى يعرف تاريخ البلد دي؟ حد قرا ام فجر الضمير، وللا ام عهد البطالمة، وللا ام الدولة الاخشيدية، وللا ام الدولة الايوبية، وللا ام العصر المماليكي لعبد الفتاح عاشور وللا ام ثورة المصريين على خورشيد باشا وللا ام عجائب الاخبار للجبرتي وللا حتى ابن اياس وللا ام تاريخ مصر الحديث وللا ام مذكرات هدى شعراوي ونبوية موسى وللا ام شخصية مصر لجمال حمدان وللا كان بيذاكر تاريخ كويس في المدرسة يرد عليا: دي قيادة تمثل ام بلد ده تاريخها؟

وياريت نبص في المراية ونسأل نفسنا واحنا واخدين المواقف العجيبة دي في مساندة الرئيس مبارك اللي كان كل اللي مساندينه دلوقت من تلات دقايق بس بيقولوا: يسقط يسقط...لحد مافيهم ناس وصل بيهم الزهق ان ما عندهمش مانع يبعتوا جواب لاوباما ويقولوا احنا شباب زي بعض، وللا يشحتوا مساندة من امريكا ومن وزارة الخارجية الامريكية عشان "اصلنا زهقنا، اي حد احسن من مبارك، انشالله الاحتلال" (بعد الشر وقطع لسانهم ورقابيهم كمان) ياريت بقى يبصوا في المراية ويعرفوا انهم عار على ام البلد دي