Friday 2 January 2009

انا مش ضد الشوفونية بس ساعدوني يساعدكوا ربنا

اه، ولا ضد اختزال بلد تاريخها سبعتلاف سنة وتعدادها تمانين مليون في القائد الرمز، بس ساعدوني، يعني على الاقل يبقى فيه تصريحات تحسسني بالفخر
زمااااااااان
لما كانت اسم مصر: القائد الاعلى للقوات العربية
هيييييييييييييييييييييييه ايام، منه لله اللي كان السبب
ما علينا، كان لما يبقى قائد مصر اللي هي القائد الاعلى للقوات العربية يتشتم، يبقى حاجة تضايق الواحد شوية، شوية مش كتير، بس الواحد يقول ما يصحش، ده القائد الاعلى للقوات العربية، مهما كان
لكن لما الريس حبيبي يطلع يقول باستئذن اسرائيل مع كل فلسطيني داخل وكل فلسطيني خارج، اصل اسرائيل من حقها تأمن حدودها، وما تقوليش فلسطين دي ارض محتلة! ومصر شايلة القضية الفلسطينية من سنة تمانية واربعين
يا خيبتي التقيلة، يعني الوضع كالآتي: دلوقت الحكومة المصرية ما تقدرش تدخل فلسطيني ولا تخرجه الا باذن من اسرائيل ولازم تخطرها عشان "ما نتفهمش غلط ليفتكرونا بنهرب سلاح" واسرائيل هي المسئولة عن تأمين حدودها اللي هي فلسطين المحتلة
وبعدين يرجع يقول اننا احنا اللي شلنا قضية فلسطين من سنة تمانية واربعين
يعني بيلبسنا في حيطة، يعني بيقول اننا احنا السبب في الوضع ده كله، ماهو البني ادم يفهم الكلام قبل ما يقوله يعني، يعرض علينا وضع متنيل بستين نيلة يمس السيادة المصرية قبل ما يمس القضية الفلسطينية وبعدين يرجع يقول احنا اللي ماسكين الموضوع ده من اول ما ابتدا؟
ماهو يا اما احنا اللي ماسكينه من اول ما ابتدا يبقى ماحدش يشرط علينا نعمل ايه وما نعملش ايه، يا اما احنا ملزمين باتفاقيات مخزية تمسنا وتمس سيادتنا وكرامتنا وتفرج علينا العال والدون لحد ما روبرت فيسك يقول على رئيس جمهوريتنا انه "الحاكم الاقليمي المسئول عن ادارة مصالحنا (امريكا) في الشرق الاوسخ" (لا وكمان مش عاجبه اداء الحاكم الاقليمي) يبقى نتلط بقى، بنعاير الناس بايه؟ باننا وكسنا نفسنا وكسناهم معانا؟
مين اللي يلزم مصر - اللي شايلة قضية فلسطين من سنة تمانية واربعين - باتفاقية مخزية تخليها تستأذن الاحتلال قبل ما تعدي المواطنين؟
مين اللي يجبرنا على توقيع معاهدات زي دي بينما كل شوية يذيعوا اغنية وديع الصافي: اذا مصر قالت نعم فاتبعوها واذا قالت لا فاسمعوها؟
طب مش لما تقول؟
هي دولة مش عارفة تتحكم في حدودها وبتستأذن احتلال دولة مجاورة هي شايلة قضيتها بقالها ستين سنة تعرف تقول نعم وللا لا؟ تعرف تقول الحمد لله بس، الله يخرب بيته اللي وحلنا في الاتفاقيات وفتح باب المعاهدات من الاول حسبي الله ونعم الوكيل فيه، حسبي الله ونعم الوكيل، حسبي الله ونعم الوكيل، عمري ما اتغاظت منه قد النهاردة
ياريتنا لا شلنا ولا حطينا، يا ريتنا سيبناهم في حالهم من سنة تمانية واربعين يمكن كانوا حرروا نفسهم بدل ما الجيوش العربية قعدت تتطوح يمين وشمال والعراقيين يقولوا الجيش العراقي كان ح يدخل تل ابيب
طب ما دخلتوش ليه؟
ماكو اوامر
طب يعني انا مستعدة ابقى شوفونية الى ابعد الحدود، واصدق ان فيه مؤامرة سببها الغيرة من مصر عشان اتجوزت قبل كل الدول العربية وكلهم قاعدين عوانس، بس يا ناس انا مش اتنيلت قلت هاتوا لنا واحد ينصب علينا؟
اهو اديني باقول اهو، واحد ينصب علينا، احنا في عرض نصاب يقول كلام يلهب الحماسة الوطنية، او مدام مصمم يبقى صريح قوي في وشنا كده، ويقول لنا انا باستأذن اسرائيل عشان احنا اتفاهمنا معاهم على موضوع المعبر ده، يبقى ما يعايرش الناس ولا يعايرنا كمان باننا مالناش سيادة وبنستأذن في الداخلة والخارجة من سي السيد، وما يعايرش بحاجات هو ما عملهاش وما حصلتش في عهده اصلا
خلينا في دلوقت
بيقول لك مصر شايلة قضية فلسطين لحد دلوقت
طب ياريت بقى كفاية شيل الواد من الارض، وادي الواد لابوه، عشان دراع مصر خدل وح توقع الواد ع الارض
من ساعة ما شفت الكلام ده وانا باسأل سؤال: دي قيادة تمثلني؟
فيه حد في ام البلد دي بيحبها بجد، وعارف قيمتها وقدرها وقاري تاريخها يرد عليا بدل كلام الجهل والهبل والتخلف اللي صابنا وكل واحد منه لله في اللي عمله فينا
معلش مع احترامي كل واحد يبص في المراية ويعرف انه مش هي دي مصر، احنا مش مصر ولا احنا النموذج المصري اللي يحتذى بيه، ياريت نقرا تاريخ بلدنا عشان نعرف قيمتها قبل ما نهبل في الكلام، والواحد يفاجأ ان كتير من العرب عارفين قيمتنا وقيمة بلدنا اكتر مننا، بدليل انهم متوقعين مننا اللي احنا مش متخيلينه في نفسنا، الغلبانة اللي اتبلت بينا بتمر بأسوأ مراحل تاريخها، واحنا اللي بنعمل التاريخ ده ومش واخدين بالنا ان اللي ح ييجوا بعدنا ح يتفوا علينا
حد بقى يعرف تاريخ البلد دي؟ حد قرا ام فجر الضمير، وللا ام عهد البطالمة، وللا ام الدولة الاخشيدية، وللا ام الدولة الايوبية، وللا ام العصر المماليكي لعبد الفتاح عاشور وللا ام ثورة المصريين على خورشيد باشا وللا ام عجائب الاخبار للجبرتي وللا حتى ابن اياس وللا ام تاريخ مصر الحديث وللا ام مذكرات هدى شعراوي ونبوية موسى وللا ام شخصية مصر لجمال حمدان وللا كان بيذاكر تاريخ كويس في المدرسة يرد عليا: دي قيادة تمثل ام بلد ده تاريخها؟
وياريت نبص في المراية ونسأل نفسنا واحنا واخدين المواقف العجيبة دي في مساندة الرئيس مبارك اللي كان كل اللي مساندينه دلوقت من تلات دقايق بس بيقولوا: يسقط يسقط...لحد مافيهم ناس وصل بيهم الزهق ان ما عندهمش مانع يبعتوا جواب لاوباما ويقولوا احنا شباب زي بعض، وللا يشحتوا مساندة من امريكا ومن وزارة الخارجية الامريكية عشان "اصلنا زهقنا، اي حد احسن من مبارك، انشالله الاحتلال" (بعد الشر وقطع لسانهم ورقابيهم كمان) ياريت بقى يبصوا في المراية ويعرفوا انهم عار على ام البلد دي

28 comments:

šσяšαяαα said...

الشوفونية دى بنت عم الشوفونيرة؟
واللا تكونش جارة كرسى عرش الملك حدوقة؟

سؤال عاوزله اجابة سريعة مريعة احسن مش هعرف انام

وبعدين دا اسرائيل دى نسمة.. ياخواتشى .. مش عارفه احنا حارقين دمنا بسببها ليه
عالاقل واثقة الخطا وتمشى ملكا
وعالاقل احنا ملخلخين الخطا ونمشى زى حنا السكران اللى بيعاكس بنت الجيران

ولما سرئولة تقوول اقفل الحدوود ياعبد الودووود يبقى عبد الودود يقفل الحدود
ولما تقول مفيش ضفر فلسطينى هيعدى الحدود
يبقى يندفنوا الفلسطيين فمكانهم احسن ما سرئولة تورينا الوش الغامق وتيجى تفجر مجلس الشعب وتقطع راس ابو الهول

ياجماعة الراس الكبيرة عاوزة مصلحة البلد وماشية على سياسة
عيش مذلول دلدول وبوس الايادى
احسن مايطيروك مالكرسى وتغرق ياشادى

مين شادى دا؟

7 said...

مصر ضعيفة جدا
هما مستنيين منا كتير بس احنا مش قادرين نساعد نفسنا
هو الريس مش بياخد اذن عشان مؤدب ,, هو ميقدرش لاننا ضعفا جدا
مسئوليه مين بقا ,, صراحة كلنا
و يا فرعون ,, مين فرعنك
الغريب هي محاولة تبرير الموقف ده منا
بس اعتقد انه هروب من شعور غبي ان مصر مش بس مش بتعمل حاجة ,, لا ده ليها دور في الحصار

Unknown said...

هههههههههههههه
هو اسمك ده روسي وللا يوناني يا حاج؟
:))
الشوفونية دي هي التعصب للوطن اللي يصل الى حد العنصرية
وهو نسبة الى قائد فرنسي اسمه نيكولا شوفان كان في جيش نابليون بونابرت

7

هو هروب من الشعور بالاحساس بالعار والعجز، ده عند ناس كتير

وفيه ناس معينة (معروفين بالاسم والله) دي مهمتهم وشغلتهم اللي بياكلوا من وراها عيش

بس كلامهم بيلاقي صدى عند ناس كتير عشان الناس مجروحة وحاسة بالعجز والكلام اياه بيريحهم من الاحساس ده

šσяšαяαα said...

لا دا اسم سورسارى
sorsaraa
بس عملاله ديكور
:D

وربنا يكرمك والله على انك وضحتيلى معنى الشوفونيرة:)
انا كنت عمالة ادور عليها واللى توصلتله انها معنى يدل على شخصية مغرورة وطالعة محدش بيقولها رايحة فين:D

لا بس شرحك للمعنى احسن بكتييير.. عالاقل عرفنا القائد الهمام نيكولا شوفان.. يطول عمره وينصره على مين يعاديه..هاى هىء

مواطن مصري said...

من الاخر احنا نشوف العرب يحلوها ازاي
و احنا نسيبلهم الجامعة العربية

و نهتم بشوئنا الداخلية و الافريقية

و نشوفهم هيعملو اية مش هما عاوزين قطر تاخد الزعامة المهلبية تاخدها

و بعد كدة لو وقعو او فشلو في اي مصيبة ميجوش يقولو مصر و مش مصر

مواطن مصري said...

احنا مخدناش من القومية المهلبية العربية غير الاهانة ياما قولنا
نعيد احياء القومية المصرية و هويتها و فكك من جامعة الدول العربية و دي اخرتها

Unknown said...

بص يا مواطن
عزل مصر عن امتدادها العربي ح يضرها ويضر العرب
ماحدش عايز ياخد حاجة من مصر يا مواطن
وماحدش بقى يقول عايزين ياخدوا مكان مصر
عشان مصر اصلا هي اللي سايبة مكانها فاضي
باقول لك ايه
فيه كتاب بتاع جيمي كارتر اسمه: سلام لا فصل عنصري
peace not apartheid
دور عليه في النت واقراه
جيمي كارتر بيشرح بالظبط كيفية عزل مصر عن العالم العربي ومن ثم سلبها دورها في المنطقة والاضرار اللي لحقت بمصر وبالعالم العربي
فيه كمان جون بركنز عنده كتاب عن مصر بالذات، ازاي تم عزل مصر عن دورها
وازاي ان نشر ثقافة: الشأن الداخلي والافريقي
دي مقصودة لعزلها وتهجينها واضعافها وجعلها لقمة سائغة للشركات المتعددة الجنسيات وتحكمات البنك الدولي

Unknown said...

لا مش ايام ياسر عرفات بقى

ايام يحيى عياش الله يرحمه

بس الظروف دلوقت اسوأ

TAFATEFO said...

ابقي اندهي بس نجيب الفيديو علشان الناس تتفرج على الخيبه

الرجل بيقول لازم إسرائيل توافق لأنها سلطة احتلال .. طب يا سيدي حماس سيطرت على القطاع وطردت إسرائيل .. نقفل المعبر؟؟!! يعني المعبر تحت سيطرة حماس شأنه شأن باقي غزه .. وانت معترف ان دي أرض محتله .. ومفيهاش محتل .. يبقى في حكم المحرره

وبعيد عن ده وده

انت سايب الناس تموت هناك علشان إسرائيل متفتكرش بتديلهم سلاح؟؟

يا أخي إسرائيل العدو وبطلت تقوم بالتزاماتها تجاه الشعب المحتل .. هتسيبهم يموتوا من الجوع والحاجه علشان خايف يقولوا عليك بتمدهم بسلاح .. وهي عيبه أصلاً .. وهما بيتعرضوا لهجمات

مش كــــــــحـــــــــك

ده كما قال سعيد صالح في العيال كبرت "أحيه أحيه أحيه .. أحيه يا أبو سوسو .. أحيه"

دقائق وأجيب لحضرتك لنك الفيديو

TAFATEFO said...

وبعدين التوقيتات بايظه خالص .. يا ريت تصلحيها

Unknown said...

لا لو سمحت
لو ينفع بقى تجيب لنا حوار ابو الغيظ مع جيزيل خوري
واحد بيقول لي كان مسخرة

7 said...

@ مواطن مصري
يا سيدي ,, ماشي احنا مش عرب

بس دول جيرانك اللي لازم تعمل معاهم علاقات قوية عشان هما اللي معاك على طول و بنسند بعض
و جيرانا دول عندهم ارض و عايشين فيها عكس الناس التانيه اللي اول ما فكروا يوسعوا كان على ارضك

انت شايف ان مصر كويسة جدا و فلسطين هي اللي عملا كل الفساد اللي في مصر

TAFATEFO said...

مسخرة ايه؟؟ أنا شفت منه تخاطيف بس العربية هتعيده طبعاً

ده كان زفت الزفت .. ده مش أبو الغيظ .. ده إله الغيظ

كان في وقته فهمي هويدي على الجزيره في ما وراء الخبر بيناقشوا الوساطه التركيه

على العموم من عينيا يا فندم .. لما يعيدوه هسجله وأجيب لحضرتك لنك .. مع ان صحتك بالدنيا والزعل مش كويس علشانك

TAFATEFO said...

مش فاكر مين قال في فيلم ايه .. انت شفت شغاله صحتها كويسه وماسكه منفضه بتعمل ايه في السجاده؟؟

TAFATEFO said...

آه افتكرت صلاح قابيل الله يرحمه كان بيقوله لمصطفى متولي الله يرحمه في الراقصه والسياسي

هو ده الوضع تقريباً .. مع اختلاف ان السجاده كانت بتردد نفس الكلام العبيط زي البغبغان

تحضرني نكته قبيحه بس عيب

mahy said...

علي فكرة حسن نصر الله دا صعبان عليا اوي,منتظر من مين يعمل مظاهرة؟؟؟؟؟؟طب دا انا مرة كنت ماشية في الجامعة لقيت واحد ماسك سجارة حشيش كده عيني عينك
++بالنسبة للاخوة المصريين الي طافح عليهم العرق المنوفي
والله بيفكروني بمدام شيرين اه يا ليل تغني ما شربتش من لامؤاخذة نيلها وعايزة تروح تولد في امريكا عشان ابنها ياخد الجنسية
يا لهوي

مواطن مصري said...

اولا يا نوارة لما معمر القذافي انسحب من جامعة الدول الناس اتريقت علية و قالت علية اهبل و عبيط مع ان تصرف صح لائنة قال العرب مش هنخد منهم حاجة و فتح البلاد ل افريقيا و اهتم بشئون بلادة


لية احنا منعملش كدة و نهتم بمصر و السودان و اوغندا و اثيوبيا و الصومال احسن مناننا نهتم بقضايا العرب و خلي قطر تحلها مشى دة امريكا الي عاوزاة ان قطر تبقى الزعيمة تاخد الزعامة
بس لو حصل حاجة للعرب بعد كدة ولا هنسئل عليهم

عشان يعرفو قيمتنا ووجودنا

مواطن مصري said...

@7
حقيقة تقال اننا الدولة العربية الوحيدة الي دخلت في حروب من اجل فلسطين و اقتصادنا تراجع و دورنا في افريقيا انهار و منابع النيل في خطر

šσяšαяαα said...

بجد يانوارة الكتاب دا فعلا موجود؟
انا هدور عليه واقراه

انا فى حالة ذهوووول

ياحلاوة.. دى مابقتش من النيل للفرات وبس
دى بقت تنسف النيل الاول وتجيبه الارض
وبعدين تبنيه على مزاجك من جديد

استرها يارب

Unknown said...

يا مواطن مش صحيح اننا الدولة العربية الوحيدة اللي دخلت حروب من اجل فلسطين
ولا مرة كنا لوحدنا يا مواطن
ولا مرة كنا بنخوض الحرب لوحدنا
انت جبت الكلام ده منين
بس احنا لوحدنا القيادة
ياريتنا ما خضنا ولا نيلنا وكسانهم

واقتصادنا تراجع من بعد السلام مش بسبب الحرب يا مواطن

ودورنا في افريقيا تراجع بعد السلام يا مواطن مش اثناء الحرب
يا عمي انت جبت الكلام ده منين؟

أكون أو لا أكون said...

مواطن مصري...
الصواريخ صناعه ايرانيه أو أفغانيه... إن شاء الله صوماليه... إنت أيه يهمك؟ هي مش بتأدي غرض؟ يبقى خلاص... خليك سياسي...
وبعدين هي إيران بتتصدق بيها... كله بيزنس... أفيد... وأستفيد...
ده أول وآخر كومنت لحضرتك... لأن فكره الصواريح منين جت... ودفع تمنهم مين... كلها على بعضها بتحسسنا إن إحنا عيــــــــــال... مش فاهمين حاجه... وبنتخبط... واللعب الإسرائيلي الحقيقي بيجري من تحتنا زي الأفعى المسمومه
وهما قاعدين يهزآوا فينا ... ويضحكوا علينا..
... وإحنا قاعدين بكل سذاجه بناكل ببعض...
!!!

TAFATEFO said...

*اقتصادنا تراجع من بعد السلام*

اسكت يا لساني .. اللهم اخزيك يا شيطان

soaad fakoory said...

ماتتعبيش نفسك ياختى!!
استطاعت وسائل اعلام النظام المنافقه ان تغيرفكر اغلب الناس وان تحول القضيه من حصار دائم وعدوان آثم الى
الرئد المقتول والى امعابر وسيادة مصر
وانه لو فتح المعبر لتعمق الانفصال بين غزه والضفه وان مصر لها سياده وان عاكف واخوانه بيلعبوا مع ملالى ايران
وان الشيخ نصرالله لم
ينتصر وانما شبه لهم
وبفضل الله مصر دايما فى القمه ..ونغلط
فىسوريا وايران واسعوديه مكسوفه من حوار الاديان .. واخيرااا وسط الاخ ابو الغيط تركيا لمصا لحته مع العرب واصبحت ايران فزاعة العالم وتركيا دوله كبرى اما مصر فهى واقفه على معبر
لا مؤاخذه واسرائيل تصرح لها مين يعدى
ومين لايعدى ! اما الدوله العظمى فى
الشرق الاوسط فهى قطر آسفه للاطاله....!!

TAFATEFO said...

هو ايه حكاية قطر قطر .. هو حد قال ان قطر قائده أو ليها دور قيادي أو تصلح للعب هذا الدور أصلاً؟؟

كل الحكايه ان قطر على مسافه واحده من كل الأطراف .. وموقفها معلن وصريح وواضح .. ومقطعتش علاقتها الدبلوماسيه لحد وبتعامل الجميع بير تو بير

مصر العكس تماماً في هذا الوقت علشان كده مش مؤهله للعب الدور ده دلوقتي

علافاتها متوتره مع أطراف كثيره أصبح ليها دور وطرف في الأحداث .. مش على مسافه واحده وتوجهاتها غير معلنه وغير مكشوفه بالقدر الكافي .. بتتعامل مع بعض الأطراف (اللي أصبحت أطراف مؤخراً) باعتبارها بنت امبارح وانها لازم تقبل الدور المصري وتقبل بتعليماته باعتبارها الكبرى .. رغم اقتناع هذه الأطراف أن مصر متحيزه لطرف دون الآخر

Unknown said...

الاعلام الحكومي نجح؟
ومين اللي بيسمع الاعلام الحكومي؟
ولما الاعلام الحكومي ينجح واحنا شايفين الاطفال الميتة يبقى ايه الفرق بينا وبين الامريكان اللي كنا بنحملهم المسئولية لما انتخبوا بوش لفترة تانية؟
الفرق الوحيد انهم عايشين عيشة كويسة تبرر هم ليه مش حاسين بغيرهم
لكن احنا ايه عذرنا؟

Unknown said...

سؤال محرج
حد بيتفرج على القنوات المصرية؟
هي القنوات دي بتبث من مجرة تانية؟

TAFATEFO said...

الفيديو بتاع مبارك والهلفطه الجامده أوي

soaad fakoory said...

لأ فيه أعلام حكومى شفتى اليوم جريدة
روزا والمؤدب اوى اوى عبد. كمال وقال فى مانشيتاته الاسد وأنثى الاسد عن سوريا الناس اشترت الجريده التى لايقراها احد علشان يتعرف على انثى
الاسد..