Thursday 1 January 2009

مجلس السمن

حد شاف الكائن اللي كان وللا كانت بيتكلم او بتتكلم كمندوب اسرائيل؟ بالذمة ده منظر مرة؟ وقاعدة تقول حماس تبع ايران والقاعدة؟ دي ناقص تقول شيوعية اسلامية اشتراكية رأسمالية، ايران والقاعدة مع بعض ازاي؟ يعني لا مخ ولا خلقة؟ وماحدش يقول لي دي خلقة ربنا، ربنا قال لها تحلق شعرها نمرة واحد وتلبس جاكتة رجالي نبيتي وقميص رجالي اسود وساعة حيطة في ايدها وعربية كبدة في عينيها وتنفش مناخيرها؟ لا وقال ايه منزلة قصة طولها اتنين سنتي متر، بتتزوق ام زبعبع، بقى دي وقفت قدام مراية قبل ما تنزل؟ ليه كده يعني؟ ده الله جميل يحب الجمال؟ احنا ذنبنا ايه نتفرج على اسرائيلية وخلقتها كده كمان؟ وتقول لنا في وشنا احنا مش بنحارب الشعب الفلسطيني؟ على اساس ان العيال اللي ماتوا دول تبع المافيا الايطالية؟ دي لو بتكلم عيال في الحضانة ح تحترم عقلهم اكتر من كده.
وبعدين كمان الانسة بان كي مون يقول انا ضد حماس صحيح بس ضد الاستخدام المفرط للقوة؟ هو عايز كام كيلو قوة عشان ينباساط؟ وكلمة العرب كانت كويسة، يبقى الحكاية مش بالكلام ولا حتى بال
presentation
زي ما بيفهمونا، يعني اللي يبص في خلقة المرة دي ويسيبها تكمل حرفين من كلمة واحدة يبقى ده بني ادم عنده دم؟ واللي يسمعها بتخرف وتقول كلام شبه كلام مجدي الدقاق، لا والله، ده مجدي الدقاق عنده مخ عنها، وفيه انوثة اكتر منها كمان بقى لعلمكوا، ويسيبها تقول التخريف وتستغفل كل اللي قاعدين عيني عينك كده وما يقلعش الجزمة وينسلها على قرعتها يبقى ده بني ادم عمره العقلي كام شهر؟
طب احنا بنشتم في الجامعة العربية ليه؟ ماهو مجلس السمن ما يفرقش كتير يعني

10 comments:

مواطن مصري said...

انا بستنى الجامعة العربية عشان اضحك المفروض يتعمل في العيد الصغير

TAFATEFO said...

احنا بنشتم في الجامعة العربية ليه؟ ماهو مجلس السمن ما يفرقش كتير يعني

بالله عليكي ده سؤال؟؟

الجامعه العربيه مختلفه تماماً عن مجلس الأمن

الجامعه العربيه بتطلع بيانات (1) شجب وتنديد وولوله وصويت .. ويضم أصحاب المصالح (2)(العرب وليس الغربيين)

انما مجلس الأمن بيصدر قرارات (1) شكليه لا تنفذ أو يتم الاعتراض بحق الفيتو وإبطال أي قرار لا يرضي أصحاب المصالح (2)(الغربيين مش العرب) مع إسرائيل

وبعدين في فرق جوهري كمان .. ان النهارده الجامعه العربيه برئاسة عمرو موسى في بيانها الختامي أعلنت صراحة على لسان أمينها العام أنه لا طائل منها وأن اجتماعاتها تحصيل حاصل وليس له معنى أو جدوي .. وطالب السيد عمرو موسى السيد محمود عباس (من منطلق كونه رئيس السلطه وليس من منطلق حرصه على الدم الفلسطيني) باللجوء لمجلس الأمن .. وهناك يمكن للعرب أن يساندوه .. ومتشغلوش بالكم بالجامعه العربيه وتفلقوا دماغنا تاني

Ahmed Al-Sabbagh said...

ههههههههههههههههههههههههه
فطست من الضحك

انا من التعساء اللى بيحتفلوا بالنيوير
تصورى ؟
ايوة والله كل سنة ليلة رأس السنة
بعمل طبق سلطة كبير اوى ومتقن
وبقعد اتفرج عليه شوية
وبعدين اكله
ولسه مخلص دلوقت

Ehab said...

Nawara read this please

http://www.independent.co.uk/opinion/commentators/fisk/robert-fisk-the-rotten-state-of-egypt-is-too-powerless-and-corrupt-to-act-1220048.html

كلاكيت تانى وتانى said...

http://www.avaaz.org/ar/
تحياتى

طائرٌ حر said...

إنتي كنتي سهرانة إنتي كمان يا نوارة ؟ أصلي شفتها..

نوارة..النصر قادم برغم كل شيئ

عين فى الجنة said...

وكمان الشحط بتاع روز اليوسف مليان انوثة
اتفو عليهم

Moh'd Shaltaf said...

"Also on Tuesday, Bush called his Egyptian counterpart Hosni Mubarak to thank him for his efforts to stop Palestinian rocket attacks on southern Israel"

http://news.xinhuanet.com/english/2008-12/31/content_10583428.htm

Unknown said...

"Also on Tuesday, Bush called his Egyptian counterpart Hosni Mubarak to thank him for his efforts to stop Palestinian rocket attacks on southern Israel"

!!!!!!!!!!!!!!!!!!!!

shiiiiiiiiiiiiiiiiiiiiiit

الدرويش المرووش said...

الواحد قفاه ورم

أنا مش عارف أبص فى المرايه

و مش عارف أقول إيه للعيال

حسبى الله و نعم الوكيل