Wednesday 14 January 2009

كلمتين واقفين في زوري بالعرض

ممكن افهم حماس بتتفاوض مع الحكومة المصرية في ايه؟ ممكن؟ يعني قافلين عليهم سنة ونص، وهم بنفسهم قالوا ان مصر قالت لهم مافيش ضربة، ومستضيفين ليفني قبل الضرب بيومين عشان يقول لها تعالي يا ست انت، وبعدين لحد دلوقت قافلة المعبر في وش المنكوبين، وسايبة حدودها تنضرب، واهو...البحر اهو
المبادرة اهي، كل الناس قالت عليها عقد اذعان
ممكن افهم بقى بعد ده كله جايين هنا يهببوا ايه مع الحكومة المصرية؟ وايه المبادرة المهببة دي؟ دي طالبة منهم هدنة من عشرة لخمستاشر سنة ولا يطوروا سلاح ولا يصنعوا سلاح ولا يشتروا سلاح ولا يستخدموا الشوية اللي فضلوا عندهم
والحكومة المصرية بمنتهى البجاحة تقول مش ح ندخل غير المصابين، يعني اقفل عليهم لما يموتوا ابقى هاتهم، طيب هم معاهم فصايل تانية بتقاوم، والجبهة مش راضية بالمبادرة دي ولا حتى عايزة تناقشها، الجهاد ما قالتش، بس دلوقت حماس بتقول من حيث المبدأ موافقين على المبادرة بس لسة فيه اعتراضات، جابت واحد من حماس تقول له ايه بقى الاعتراضات: قال لها يعني مثلا لازم انسحاب الاحتلال ولا مساس بالمقاومة وفتح المعبر
الله، طب ما كده مش موافقين على المبادرة، امال بيضيعوا وقتهم ليه هنا؟ وايه اصرار مصر والسعودية ان ما يبقاش فيه قمة عربية، ليه ح يموتوا ويمنعوا القمة لدرجة ان السعودية قالت بتوع مجلس التعاون يجولي بكرة قبل ما يروحوا القمة دي؟
فيه ايه بقى؟
وحماس دول ناس غريبة قوي، انا لو مكانهم واتعمل فيا ده كله والله ما ابصش في وشهم ولو جابولي طوبة دهب وطوبة فضة، طب مش خايفين منهم طاه؟
خلاص، حماس تعمل الهدنة بتاعتها ام خمستاشر سنة، وبقية الفصايل بقى مالهاش دعوة ما تلتزمش بالكلام ده  

89 comments:

Anonymous said...

لان حماس ماتقدرش ترفض المبادرة المصرية صراحه
لان ساعتها هتيجى حسوسو وابو الغيظ افندى ويقولو كدهو
طييييب
احنا ملناش دعوة
مش مسؤولين
احناعملنا اللى علينا
وهنديكو بالجزمة
مش قلنالكم يا شعب وسخ ان حماس دولم زى القطط تاكل وتنكر
وعلشان كدة مش بيقولو رافضين صراحة
بيقولوها بشكل ديبلوماسى
علشان يباصو الكورة تانى للنظام المصرى
ويجبروهم يعرضو مبادرة تانية
يعنى احنا اهو معاكم
بس البنطلون دة ضيق
شفولنا واحد تانى واسع
وغصب عنهم هيدورو على واحد تانى
لانهم مش ناقصين فضايح
كدة فعلا حماس بتلعبها صح

احمد سعيد

أحمد عتمان - Ahmed Etman said...

انا كنت حكتب، لقيت الأخ أحمد سعيد قال اللي انا عايز اقوله و بشكل أحسن
حماس عندها ذكاء سياسي و حس لا يستهان بيه
هما أهل مقاومة، و لكن مش معنى كده انهم عالم غشيمة بتخبط و خلاص، و الرسول عليه الصلاة و السلام بيقول: المؤمن كيس فطن
و هما مش عايزين يعادوا الأنظمة العربية رسمياً حتى لو كانت الأنظمة دي ظاهر عليها العداء ليهم، عشان برضه في الآخر يظل فيه صلة وصل بينهم و بين الشعوب الشقيقة،و يظل فيه طرف وسيط بينهم و بين إسرائيل و أمريكا، و من باب اللي ماتحتاجش لوشه بكرة تحتاج لقفاه
و كل ده من غير ما يفرطوا في ثوابتهم و أهمها الحفاظ على المقاومة طالما هناك احتلال

Fatma said...

نوارة انا مابقش فاهمه حاجة

شفتي كلام جيمي ؟

هو جيمي مش معاهم بردو ولا ايه
طب ما يقولهم بقى لو دي وجهةنظره ماقالهمش ليه ؟
طب البوقين اللي قالهم جيمي ماكان قالهم ابوه ولا ابو العبيط بدل التصريحات اللي جايبالنا الوكسة دي

لا بجد انا مش فاهمه حاجة

وقمةومصر تعتذر والسعودية ابصر بتعمل ايه وقطر فرحانه انها طالعة في الصورة وحماس جاية تتفاوض وشهداء الاقصى بيحاربوا مع حماس !
وطيارات اسرائيلية طايرة عندنا
لا بجد انا مش فاهمه حاجة على فكرة والله بجد اقسم بالله مافاهمه حاجة وحياة اي حاجة اي حد يفهمني حاجة

Anonymous said...

هذا المقطع يعطي شيئ من الامل شوفي وريحي حالك


http://www.youtube.com/watch?v=ZQxHF7HalE8

TAFATEFO said...

تلاته بالله ما حد فاهم حاجه

دانتي لو كنتي سمعتي كلام امبارح .. سواء المقاومه .. ولا حماس .. ولا مجدي الدقاق

كنتي خبطتي دماغك في الحيط ميت مره

علاء مرسي : محدش فاهم حاجه خالللللللصصصصصصصص .. خالص

لازم في حد بيكدب .. والأطراف التانيه مبيكدبوهوش

Anonymous said...

محدش يقدر يقول لمصر لأ فهمتي

Unknown said...

لا ما فهمتش

يعني ايه؟
يعني يحبسوهم عيني عينك ويقولوا ما يقدروش يقولوا لهم لا؟
ليه؟
بامارة ايه يعني

احنا ح يطلع تلاتين ابونا على فكرة

Fatma said...

طب ممكن حد ابن حلال فاهم اي حاجة يحطلنا السيناريو اللي بيحصل
والله والله والله انا حاسة ان احنا كلنا ترومان شو

TAFATEFO said...

هما كل ده مقالوش لمصر لا؟؟

كل الناس قالت لمصر لا

والقمه العربيه هتنعقد رغم رفض مصر (مع اني مش مقتنع بجدواها .. وهتنعقد بمن حضر على رأي بشار) .. وحماس قالت لمصر لا .. وكل قوى المقاومه قالت لمصر لا

ايه محدش يقدر يقول لمصر لا دي؟؟ اوعى تقولي انت كمان الشيخ نصر الله والبوابه لحسن أشك فيك

Unknown said...

ماهو اسمه ايه داخل يقول لي ماحدش يقدر يقول لمصر لا

اصلا االقمة دي شكلها مش ح تتعمل

ايه رايك بقى

Unknown said...

واسامة بن لادن ده راخر ايه اللي مطلعه دلوقت يقول بقين مالهمش لازمة؟

Anonymous said...

يعنى يا ست نوارة حماس مش عايزة تدى مبرر للنظام المصرى انة يصعد حملتة عليها اكتر من كدة
لانة مستنى المبرر دة
علشان يشيل ايدة خاااالص
من ناحية حماس طبعا

يعنى حماس بتقولة
اشتم براحتك
دة بس من ذوقك
انا برضة متربى وابن ناس ومش هرد عليك

مع الاسف ان السياسة هى فن اللا معقول

اسمعى المؤتمر الصحفى اللى لسة معمول فى القاهرة حالا لوفد حماس
وانتى تلاحظى الموضوع دة بوضوح



احمد سعيد

TAFATEFO said...

وبعدين فين مصر دي؟؟ مفهمتش أنا

مصر أبو الغيط .. حبيب أمه

ولا مصر مبارك .. جنكيزخان

ولا مصر ليفني؟؟ ما هي ليفني أعلنت حربها من هنا

فين مصر دي؟؟ ومحدش يقولها لا ليه؟؟

علشان ليها دور؟؟ ملهاش

إذا كانت مش قادره تحتفظ بعلاقات مع كل الأطراف .. ومسخرة العالم .. ولا رياده ولا قياده .. دي بقت قواده

مصر أصبحت قواده

فلماا أدخلتم كل زناة الليل إلى غرفتها

احنا أدخلنا كل زناة الليل إلى الشعب الفلسطيني وواقفين نتفج عليهم وهما بيتحرقوا ويتقتلوا .. زي وقفتنا نتفرج عليهم وهما بيجوعوا وغرقانين في الظلام

نصدر الغاز لإسرائيل لكن للفلسطينيين لا
نصر لإسرائيل الحديد والأسمنت .. لكن نديلهم أكل بعينهم

يا أخي ملعون أبو ده دور

يقولولها لا وألف لا

Unknown said...

ااااااااه
اتشل انا بقى

والناس اللي ماتت دي؟

مواطن مصري said...

يا حجة نوارة نوارة خلي الامر تتحل 1017 شهيد كفاية عند


في رقبة حماس و رقبة اسرائيل

خلي الامر تتصالح

Unknown said...

يابني ما دور مصر ان تعزز

لا طبعا مصر مبارك مصر ابو الغيط مصر شباب المستقبل

هي دي مصر يا عبلة

احنا ح نروح في الوبا

لو المبادرة دي اتمررت انا ح اعمل زي الراجل التركي اللي ولع في نفسه في الشارع النهاردة

Ahmad Tawfik said...

أتفق تماماً مع التعليقين الأوائل . الناس إتعلموا حديث الديبلوماسية العربية وبدأوا ممارسة اللعبة بإسلوب الأنظمة العربية.
وبعدين هم يعني لقوا مبادرات تانية وقالوا لأ ؟
أهو خلينا في الملعب لعل وعسى .

Unknown said...

طب انا اعمل فيه ايه ده انا دلوقت؟

عم مينا said...

يا نوارة ما الصواريخ بتنزل عليهم.. قدري موقفهم.. الناس كلها بتدين و بتشجب و بتعيط و بس و محدش قادر يعمل حاجة.. علي رأي الست اللي انتي حتطيها امبارح اللي قالت احنا مش مسرحية.. انتي عاوزاهم يعملوا حتة كرامة و يقولونا مش عاوزين حاجة من وشكو بعد اللي عملتوه فينا.. كلام جميل.. و بعدين ايه نهاية اللي بيحصل ده.. هيعدوا يقاوموا الضرب لغاية امتي؟

Anonymous said...

طبعاً محدش يقدر يقول لمصر لأ و القمة مش هنتعقد لو مصر موافتقش و حماس رايحة جاية على مصر مش عارفة تقول لمصر لأ ، أما عن الفصائل فسيبك منها بتلعب في الوقت الضايع


بحب فلسطين

TAFATEFO said...

وأنا بضم صوتي لصوت مواطن

سيبي الموضوع يتحل يا نواره

مواطن مصري said...

طيب يا نوارة انتي عندك الحل اكتيبة
عاوزة مصر تحارب
؟؟؟

يعني
لية الدول العربية مطلع قرار بوقف التصدير

عندك الحل قوليةة

مهندس مصري بيحب مصر said...

يا بنتي فتحي دماغك
حماس بتدور على إيه في الآخر
على الإحتفاظ بحقها في المقاومة و الإحتفاظ بسلاحها و الإعتراف الدولي بشرعيتها
التي رغم شرعيتها القانونية الدستورية الفلسطينية لا يعترف بها احد في العالم

و فتح جميع المعابر و أهمها هو معبر رفح الذي لا تسيطر عليه إسرائيل

يبقى ما ينفعش أكون عايز اوصل لفتح معبر رفح بشكل دائم و طبيعي و بعدها أعادي الحكومة اللي ماسكاه من الناحية التانية
ده الحبل الصري بتاع القطاع و لا يمكن يقطعوه أبداً
فبيناوروا بدبلوماسية و ذكاء
و كل ما صمودهم يزيد و مدة الحرب تطول و خسائر إسرائيل تزيد
كل ده حيشكل ضغط على مصر علشان تعدل المبادرة الوسخة دي بمبادرة تناسب المقاومة و ما تبقاش صيغة إستسلام زي المطروحة حالياً

أحمد سعيد شرح لك يا بنتي

كل الفصائل رفضت المبادرة
بس علشان الميكريفون في إيد حماس فما تقدرش تقول لأ صراحة بس بتناور و تقول لأ محتاجة تعديلات
و لو إتعدلت خير و بركة و نصر للمقاومة
و لو ما إتعدلتش يبقى عداهم العيب و هما ما رفضوش لكن إسرائيل و مصر هما اللي نشفوا دماغهم

ايه يا نوارة لغاية دلوقتي مفهمتيش لعبة السياسة و إنك تضطري تقبلي عدوك لإن دي المصلحة العامة

دا النهاردة بس لسه ضابط مخابرات مصري طارد غازي حمد المتحدث الرسمي بإسم حكومة حماس من الجانب المصري من معبر رفح و رجعه للجانب الفلسطيني و طرده بطريقة مهينة رغم إنه كان بيدلي بتصريحات صحفية ساعتها أثناء إدخال بعض الجرحى لمصر



شوفي الفيديو بتاع السي إن إن CNN
عند عبد الرحمن فارس


و قبلها كان أمن الدولة المصري إعتقل أعضاء من حماس أثناء كسر الحدود و عذبهم عذاب رهيب و إستجوبهم عن أسرار عسكرية لكتائب القسام و حاجات لا تخص الأمن المصري خالص لدرجة إن بعد الإفراج عنهم قالوا إن الموساد الإسرائيلي ما كانش بيعمل فيهم كده
و مازال أحد قادة حماس معتقل هنا في مصر من ايامها بدون تهمة و لا جريمة و لا محاكمة

بس المضطر يركب الصعب
و السياسة و الدبلوماسية لها أحكامها

مهندس مصري بيحب مصر said...

إقري تعليقي و إفهميه كويس و روحي شوفي الفيديو

Anonymous said...

محمد افندى المسلمانى بيتكلم دلوقتى فى دريم
عن قناة الجزيرة



احمد سعيد

مواطن مصري said...

حتى لو فتحنا المعبر و دينا سلاح فاكر الحرب كدة هتكون في صالحنا

؟؟؟

Unknown said...

اسيب الموضوع يتحل يا مصطفى؟

لا الحقيقة انا مش ح اسيبه يتحل

انا سبق وقلت لهم ما باحبش احل حاجات لا الاربع ولا الخميس وقلت هم لو سمحتوا استنوا لما اخف انا عندي برد ولما بتبقى حرارتي عالية مش باعرف افكر

وبعدين جايين تقولوا لي سيبي الموضوع يتحل

انا عن نفسي ح امتنع عن التصويت في مجلس الامن

ويبقوا يوروني ح يحلوها من غيري ازاي

Anonymous said...

يعني انا اريد ان افهم شي ء واحد ، لماذا لا تريد مصر امداد غزة بحاجتها و كل يوم تقول "على اسرائيل تحمل مسؤليتها تجاه قطاع غزة" طب متستفيد من القطاع و لو بشكل تجاري يعني تفكير بشكل بسيط يدركه انه من مصلحة مصر أن تقدم حاجيات غزة ، بس غريب التفكير ،يعني هم مفكرين انه اسرائيل تقدم دعم لغزة (و دعم موجه الى احد الاخوة المصرين اللي ذخايف انه اذا دخل اهل غزة إلى سيناء سيأكلون الخبز المدعوم)

arabi100.wordpress.com

Anonymous said...

يا نوارة انا قلتلك شبشبيله
ما سمعتيش الكلام

أنا عندي خاصية في الموبايل
أقوله الرقم دة لو اتصل ادليله
الطرشة
مفيش في التعليقات حاجة زي
كده
تقوليله ال
IP
ده لو علق زحلقه
أو حاجة زي كده

مواطن مصري said...

بعدين بحق المدنين لازم يكون فية وقف اطلاق النار حتى علىا لاقل حماس تاخد نفسها و على راي علاء ولي الدين ضرب ضرب ضرب مفيش شتيمة

مواطن مصري said...

اة لعلمك حماس وافقت على وقف اطلاق النار تيلي لو كان الكلام دةة من اسبوع او من كام يوم كان انقذنا دم500 فلسطيني

Unknown said...

يا مفتري يا ظالم
بقى هي حماس اللي ما وافقتش على وقف اطلاق النار

انت ح تموت مبربرش على فكرة
:)

Anonymous said...

شيئ أخير بالنسبة للتبرعات الغذائية و التي لا تصل الى اهالي غزة بحسب اقوالهم لمن له تأثير في هذا الموضوع يفضل أن تكون وجبات غذائية جاهزة بدل من حليب المجفف الذي لا يجدون الماء لاذابته و خصوصاً أن هذا الشعب أصبح يعاني من التشرد من جديد

arabi100.wordpress.com

مواطن مصري said...

مين اية مبربرش ؟

مهندس مصري بيحب مصر said...

انتي محسساني إني بأكلم نفسي
رأيك إيه في اللي أنا قلته ده

Unknown said...

قادة اسرائيل العسكريين في رعب من الملاحقة القانونية بتهم جرائم حرب.
المقال من الجيروزاليم بوست
IDF legal team gathering Gaza evidence

Defense Minister Ehud Barak has ordered the IDF to set up a team of intelligence and legal experts that will collect evidence related to IDF operations in the Gaza Strip, that could be used to defend military commanders against future lawsuits.

المقال كاملا

http://www.jpost.com/servlet/Satellite?cid=1231866576208&pagename=JPost%2FJPArticle%2FShowFull

mido said...

و افقوا علي المبادرة بتحفظات

Anonymous said...

شفتو المسلمانى افندى بيقول اية
بيقول ان الباز راح من اربع سنين يبلغ الشيخ طنطاوى
ويقولة الريس بيقولك حان الوقت انك تستقيل
قام طنطاوى قالة لا
احة يا مسلمانى
مش عارف الراجل دة بيتعامل مع الناس على انها داقة عصافير لية
قال يعنى حسوسو قاعد بقالة اربع سنين يا عين امة متكاد ومغلوب على امرة ومش عارف يشيل شيخ الازهر الازعر

ياعينى



احمد سعيد

Unknown said...

مش بتكلم نفسك بس انا متغاظة
ينعل ابو الذل يا شيخ

هو ده اتكتب علينا وعلى الجيران كمان؟

خلاص يعني
مافيش امل
بلكونة ووقعت على راسنا؟

mido said...

اخوان أون لاين كتبوا خبر عاجل ان حماس و افقت علي المبادرة بتحفظات

Anonymous said...

الاخ مهندس مصرى

بجد عفارم عليك

احمد سعيد

مواطن مصري said...

اة تصحيح ماس في الاول كانت رافضة المبادرة قبل اسرائيلي يعني

TAFATEFO said...

على فكره عبدالباري عطوان قال في ما وراء الخبر عن موقف حماس زي ما قال أحمد سعيد و مهندس مصري

TAFATEFO said...

بالنسبه لليه حماس بتتفاوض وتيجي القاهره أقصد

مواطن مصري said...

معرفتيش بولفيا قطعت العلاقات مع اسرائيل http://arabic.irib.ir/pages/news/detailnews.asp?idn=37223

Anonymous said...

يسرنا ان نزف الى جماهير امتنا العربية والاسلامية وزي ماقريتوا تمكنت كتابئنا المجاهدة في السعودية أن تقرر عقد قمة طارئه لدول مجلس التعاون غداً في الرياض انتصرنا والحمد لله
امريكا بتدعم اسرائيل واحنا بندعم غزة بالقمم والمؤتمرات

Anonymous said...

يا جماعه حماس عايزه تفضل فى السلطه وأنا واثقه لو عرضوا عليها أى حاجه تضمن بقائها فى السلطه هايوافقوا!!!!!!!!!!يا جماعه ياسر عرفات كان بيفضل فى فلسطين فى المواجهه مش بيهرب ويعقد المفاوضات 1!! أيه الأرف ده؟؟

Anonymous said...

كتائب العز القساميه تقتحم منزل تحصن به الصهاينه و تجهز عليهم
http://uk.youtube.com/watch?v=g40HQx5PtnA

مواطن مصري said...

الله يرحم ايام ياسر رفات ولا يوم من ايام حماس

Anonymous said...

زى كل مرة احمد سعيد سبق وقال اللى انا كنت هاقولة وبرافو عليهم الجماعة بتوع حماس بالرغم انهم مش دولة كبيرة ولاحتى صغيرة الاانهم بيلعبو سياسة صح مش زى السياسة الحكيمة بتاعة ابو الغيظ ولو سمحتى يا نوارة انا عايزة اسالك على موضوع اسامة بن لادن انتىمقتنعه ان فية حاجة اسمها اسامة بن لادن ارجو انك تفيدين انتى والاخ الجهبذ احمد سعيد لان اختك تعليم حكومى يعنى بالجهود الذاتيةاكون شاكرة فضلك لوادتينى مبرر منطقى ان الحاج اسامة مش لعبة مخابراتية منالامريكان--------------دودو

Unknown said...

http://uk.youtube.com/watch?v=g40HQx5PtnA

شاهدوا هذا الفيديو قبل ان تحذفه اليوتيوب

Unknown said...

بس بقى
ماما زعقت لي
قالت لي ما اللي ايده في المية مش زي اللي ايده في النار، ما تروحي تقعدي تحت القنابل وتوريني



احرجتني

خيرالدين said...

شوفى الفيديو ده يا استاذه

http://www.youtube.com/watch?v=1sT03P6H4VI

حـنــّا السكران said...

الحرب من غير نضال سياسي متزامن و موازي لها تماماً .. لا توصل إلى نتيجة .. و النضال السياسي من غير بندقية قوية لا يمكن أن يوصل إلى نتيجة ..هذا هو قانون النزاعات و القضايا الوطنية. حتى لو لم يكن الطرف المحارب نفسه يفاوض مباشرة .. يجب أن تكون هناك جهة سياسية إما تتبنى رأيه و تمارس حراك سياسي تستمد قوته من واقع القتال على الأرض , أو يكون هناك جناح سياسي للجهة المقاتلة يقوم بحراك سياسي و يتفاوض مع العدو عن طريق وسطاء و يفرض رؤياه و شروطه. . الحالة الوحيدة التي ينعدم فيها النضال السياسي و تنعدم جدواه , هي حين يكون أحد الأطراف المتنازعة عاجز تماما عن التأثير في الحرب .عندها لن يستمع إليه أحد ..
و لو كان هؤلاء أصحاب المبادرات يرون أن حماس عاجزة و أن القضاء عليها سهل , لما سمعتِ لهم صوتا لا هم و لا مبادراتهم ( الكريمة )
ـ يجب على حماس أن تفاوض و تناور سياسيا , جنباً إلى جنب مع صمودها و قتالها في ميدان المعركة .
ـ لا أدري إن كان هناك جدوى من الردّ على كلام غريب .. عرفات ظلّ لحوالي ثلاثين عاما يناضل من الخارج .. و حين عاد إلى الأراضي الفلسطينية عاد بشروط إسرائيلية و عاد بعد أن ألقى البندقية . و حين حاول أن يناور و يناضل من الداخل . حوصر و قـُتل .و الذين وافقوا على أوسلو و عادوا أو أولئك القائدة من الفصائل الأخرى الذين عادوا و ضمنت لهم بعض الدول سلامتهم .. قتلوا أو أسروا , مثل الشيخ أبو علي مصطفى و المناضل أحمد سعدات و مروان البرغوثي ( و هو قيادي في فتح على فكرة , لم نسى هذا الأمر ) ثم أليس اسماعيل هنية و كل أفراد حكومته هم من حماس ؟ أليسوا في غزة ؟ أم أنكم تريدون أن يعود خالد مشعل إلى غزة ليقتل هناك وبذلك تنتهي كل المشاكل برأيكم ؟
الشيخ أحمد ياسين كان رجلاً مقعدا ..و قتلوه بالصواريخ و ليس بطلقة بندقية . و مشعل ذاته حاولوا اغتياله في الأردن .. يكلفي كلاماً بلا معنى أرجوكم .. و كما قالت أستاذتنا صافي ناز كاظم , هناك أناس تقاتل و تموت الاّن .. و هؤلاء يعرفون جيداً ما يريدون و لا يموتون بالنيابة عن أحد و لا يريدون لأحد أن يموت بالنيابة عنهم .هم أصبحوا يدركون أنهم وحدهم تماماً , فإما أن نقل خيراً أو نفعل خيراً أو لنصمت .
ـ بعض الأخوة هنا شرحوا موضوع المفاوضات و المبادرة بكل سهولة . متل الأخ أحمد سعيد و الأخ المهندس المصري و دم دام و كلامهم صحيح تماماً .

حفيدة عرابى said...

انا كان نفسى اقول كلام كتير اهم مافيها لعن الله السياسة ورجالها بس بصراحة كلام والدتك ربنا يخليهالك صح احنا مهما انزعجنا وتعاطفنا ايدينا فى المياه وفعلا لو حماس ما اتصرفتش كده هيطلع مليون واحد ربنا ياخدهم يقول بيتاجروا بدم الغزاويين قاعدين مرتاحين ومستخبيين فى دمشق ومش فى دماغهم الشهداء --كده بصراحة تبقى حماس اتعلمت سياسة وبتلاعبهم بورقهم لغاية ماربنا يفضح نواياهم ---بس هيفضحهم اكتر من كده ربنا قنا عذابا وفتنة لا تصيب الظالمين خاصة

حـنــّا السكران said...

قصدي انهم خلاص مش عم يقولوا انهم بيموتوا بالنيابة عننا و دفاعا عن قضية المفروض هي قضيتنا كلنا .. خلاص ..صاروا عارفين انها قضيتهم و بس .. و ربما قضية شافيز و رئيس بوليفيا . كي نكون منصفين قليلاً .

3asheg.nawara said...

لسه زعلان
أكيد مصر بتضغط جامد ع حماس و بتلعب دور ... (مسموح تشتمي هنا)
بصراحة مش عارف لو مكانهم اعمل ايه
العدو من أمامكم و من خلفكم للأسف.
سبيتشلس

حـنــّا السكران said...

تصحيح

الشهيد أبو علي مصطفى و ليس الشيخ

Unknown said...

في حد ممكن ينشر اي لينك عن السلاح المدمر الذي تستخدمه اسرائيل و يتسبب في بتر اعضاء الضحايا.

مهندس مصري بيحب مصر said...

عاجـل: الهجوم على غزة: (سيهزم الجمع ويولون الدبر)

قناة الأقصى: مصادر صهيونية: سقوط صاروخ فلسطيني على مصنع كيماويات في ميناء أسدود واندلاع حريق هائل يصعب السيطرة عليه
"القسام" تعلن عن تصوير عملية اقتحام لمنزل تحصنت به قوة صهيونية تم قتل وجرح عدد من الجنود الصهاينة خلالها
بوليفيا تقطع علاقاتها مع إسرائيل بسبب العدوان على غزة
عدد شهداء العدوان الإسرائيلي على غزة يرتفع إلى 1013 وعدد الجرحى يفوق 4560
مراسل الجزيرة: 17 قذيفة مدفعية إسرائيلية سقطت على الهبارية وسهل الخيام بجنوب لبنان
إصابة 7 جنود إسرائيليين بقذيفة في قطاع غزة
كتائب القسام تقنص جنديين صهيونيين في منطقة التوام شمال غرب غزة
في عملية نوعية وجريئة في شمال قطاع غزة.. مجموعة قسامية تسللت خلف خطوط العدو ودمّرت عدداً من آلياته وأوقعت قتلى وجرحى وانسحبت مساء أمس الثلاثاء
الجيش الإسرائيلي يعترف بإصابة 10 من جنوده في معارك مع المقاومة في غزة
جيش الاحتلال يعترف بإصابة قائد الكتيبة 101 التابعة لوحدة المظليين الخاصة في اشتباكات أمس
صافرات الإنذار تدوي في مدينة القدس المحتلة والمغتصبات الصهيونية المحيطة بها ما تسبب بحدوث حالة هلع وخوف في صفوف المستوطنين الصهاينة
المدفعية الإسرائيلية تقصف منطقة العرقوب جنوب لبنان بعد سقوط صواريخ على مستوطنة كريات شمونة بالجليل
"القسام" تقصف مغتصبتي بئر السبع واسدود بـ4 صواريخ "غراد" ومفتاحيم بصاروخي "قسام" والعين الثالثة بـ 3 قذائف "هاون
الطيران الإسرائيلي يخترق أجواء مصر مجدداً خلال جولة لجمال مبارك
شهيد وأكثر من 25 جريح في قصف صهيوني على منزل عائلة الكردي في حي الشيخ رضوان في غزة فجر اليوم



فلسطين

100 من العلماء والمشايخ من 15 دولة يصدرون بيانا في مظاهرة اليهود على المسلمين في غزة
عملية مزلزلة.. استشهادي من كتائب الأقصى يقتل ويصيب 18 جنديًا صهيونيًا
قوة صهيونية تقع في كمين مُحكم لـ "القسام" وتتكبد خسائر فادحة شرق خان يونس
المقاومة تضرب بعنف وتقتل ضابطا كبيرا بعد استدراجه لمنزل مفخخ والاحتلال يعترف بإصابة 6 من جنوده
كتائب القسام: مقتل ضابط إسرائيلي وإصابة 4 جنود بعد تفجير منزل مفخخ غرب بيت لاهيا
"القسام" تدمر دبابة صهيونية جنوب تل الإسلام بعد استهدافها بعبوة "شواظ" وقذيفتي "آر بي جي"
"القسام" تقصف مغتصبة "نير اسحاق" بصاروخ قسام
"القسام" تُعلن تدمير وإعطاب 11 آلية عسكرية صهيونية والمقاومة تُفشل لليوم الثاني محاولات الاحتلال اقتحام مدينة غزة وتجبرها على التراجع
سرايا القدس تفجر ناقلتي جند صهيونيتين وتطلق صاروخين باتجاه "ناحل عوز"
مقاومة الضفة تتحرك لنصرة غزة وتصيب 3 جنود صهاينة بالخليل
مقتل إسرائيلية و3 إصابات بصاروخ للمقاومة على مدينة عسقلان المحتلة
جندي أردني يفتح نيران رشاشه على دورية عسكرية إسرائيلية عند معبر وادي عربة
الخليل: استشهاد شاب فلسطيني حاول خطف سلاح أحد جنود الاحتلال قرب حاجز عسكري
ارتفاع عدد شهداء غزة إلى 971 والجرحى إلى 4418 معظمهم من النساء والأطفال
انتشال 22 شهيدا من حي "تل الهوا" بعد محاولات الاحتلال اقتحامه
السماح لـ 25 سيارة إسعاف مصرية بالدخول للقطاع لنقل الجرحى عبر "رفح"
عبور 61 طبيبا عربيا لغزة ومساعدات دولية للقطاع
"كتائب القسام": لم نستبدل الصف الأول.. ومن المستبعد استدعاء المتطوعين وهم لا يقلون جاهزية عن غيرهم
تقرير: "القسام".. قوة صاروخية متنامية ومضادات أرضية وعمليات نوعية على الأرض
كواليس المقاطعة في رام الله.. عباس محبط من صمود حماس وضباط مخابراته وعدوه انهيار الحركة خلال الأيام الأولى
دعوات لإعاقة شحن أسلحة أمريكية لإسرائيل عبر اليونان
«يديعوت»: ليفني تتهم رايس بالعمل ضدها
أقسام الولادة في مستشفيات غزة تتحول إلى غرف عمليات بسبب عدد المصابين الهائل
تايمز: لم يعد هناك مكان للدفن في مقابر غزة
إسرائيل كثفت قصفها الجوي على ممر صلاح الدين ومئات الإنفاق تعمل تحت القصف
أكاديمي يهودي: "الإسرائيليون" يتصرفون مثل هتلر ويحفرون قبورهم بأيديهم
الجارديان: سيدفع الغرب مع إسرائيل ثمن حمام الدم في غزة
اشكنازي: لازال امامنا العديد من الأهداف للقيام بها
خبير إسرائيلي: إيقاف صواريخ حماس هدف غير واقعي
طبيبان نرويجيان: "إسرائيل" تستخدم المدنيين في غزة كحقل تجارب لأسلحة فتاكة جديدة
شاهد عيان يروي تفاصيل مجزرة ارتكبها الاحتلال الإسرائيلي بحق أسرته
مصر طلبت من بلجيكا إرجاء مشروعها نقل أطفال مصابين من غزة
تقرير: البيوت المفخخة وتغيير قواعد اللعبة
تقرير: شماتة فأر غزة المذعور !!
جريمة المحرقة لن تمر / فهمي هويدي
النصابون العرب! / محمود سلطان
إعلام عربي منحاز للعدوان / عبد الباري عطوان
مقترحات لنصرة غزة / الشيخ صالح بن عبدالله الدرويش
مختصر الكلام في مجزرة غزة (الحلقة التاسعة)/ إبراهيم التركي

مواطن مصري said...

طفطفففففف هات حلقة منى الشاذلي النهاردة

منى في رفح


و المعبر مفتوح و العربيات بتدخل


الجزيرة مش بتصور الحجات دي ليةةةةةةةةةة


ولا هما بس لما يحبو يشتموهاا يشتموها برحتها

Ahmed Fawzi said...

من الجزيرة قالت وزيرة الخارجية تسيبي ليفني إن المفاوضات التي يجريها مسؤولون إسرائيليون هذه الأيام مع نظرائهم المصريين بغرض وقف الحرب في قطاع غزة هي "مفاوضات ضد (حركة المقاومة الإسلامية) حماس وليس معها".


ونسب الموقع الإلكتروني (عرب 48) إلى ليفني قولها الاثنين لإذاعة جيش الاحتلال "إذا كانت نتيجة الحرب حصول حماس على الشرعية فستكون نتيجة غير مجدية". وأكدت أن المحادثات التي تجري في مصر تتناول "منع التهريب لقطاع غزة وترتيبات أمنية مع القاهرة".


وأضافت الوزيرة الإسرائيلية أنه منذ أن تبوأت حماس السلطة عام 2006 "عملنا كيلا يتم الاعتراف بها في العالم، ونجحنا بذلك طوال السنوات الثلاث الماضية". وأكدت "نحن والمصريون متفاهمون إزاء الإنجازات المطلوبة

وقالت أيضا "لا أعتزم إجراء مفاوضات مع حماس، ولست بحاجة لأن يوقعوا على أية وثيقة، ولا معنى لما سيقولونه".

TAFATEFO said...

جوووووووو

يسلم فمك

TAFATEFO said...

بعد كلام أحمد سعيد و جو غانم

بقيت فاهم حاجات كتير مكنتش فاهمها

3asheg.nawara said...

لسه زعلان
جاعد بتفرج ع حالة حمار
هو يا نوارة في ناس تجعد تكذب تكذب لحد ما تصدج نفسها بجد في ناس كده

TAFATEFO said...

ما وراء الخبر : القمة العربية والقمة الخليجية والمبادرة المصرية .. بدلاً من التعاون لوقف المجزرة الإسرائيلية في قطاع غزة .. تفرغ العرب لحرب بعضهم البعض .. وبعد 20 يوم على المجزرة .. لا تجد موقف عربي ضاغط من أجل وقف إطلاق النار

النظام العربي الرسمي أصبح بناية قديمة مشرفة على الانهيار

Anonymous said...

الاخت دودو
يصراحة انتى جيتى عالجرح
لان موضوع شريط اسامة ابن لادن دة جايبلى استبحس
يغطس يغطس
ويقب مرة واحدة
بالنسبة للشريط انا سمعتة فى الجزيرة
بصراحة الراجل ماقالش حاجة غلط
كل كلامة مظبوط مية المية

بس مش دة الموضوع

هل هو موجود فعلا

والله انا احترت فى الموضوع دة

فية ادلة انة موجود

بينما فية ادلة تانية بتقول انة لعبة امريكية

يعنى مثلا لية دايما يظهر بشريط هجومى قبل كل انتخابات امريكية

ولية دايما بيجى يشتم ويلعن فى الغرب الكافر فى كل مرة بتبدأ كفه الاعلام العالمى فى الميل ناحية المسلمين والعرب


وبعدها علطول تحصل عملية ارهابية يموت فيها مية ولا متين

وسط حالة من الغباء الرهيب والعتة الامنى الغير معتاد فى الدولة اللى اتنفذت فيها العملية


وبعدها علطوليطلع الرئيس الامريكى هو وشلتة بتوع الحرب على الارهاب ويقولو للناس
شوفتو
مش قلتلكم ان المسلمين دول ارهابيين واشرار
ولازم نحتلهم ونقضى عليهم
شفتو
علشان تيجو بعد كدة وتقولولى حرام دول برضة بشر زينا

اشربو بقى


لالا...والنبى احمينا منهم الاشرار دول
طيب خلاص بس ماحدش يجى بعد كدة ويقولى حرام
ولا يقولى بلاش المدنيين

ولا يقولى اقفل جوانتانامو
ولا يقولى بلاش اسلحة محرمة دوليا
ولا حد يفتح بقو عن اسرائيل
اسرائيل دى هى صمام الامان بتاعكو وهى اللى حايشة العرب عنكو
ولا تحبو نسيبهم ييجو يحتلوكو
ويهدو نييويورك ويقطعو اديكو وجليكو ورقابيكو

اتكتمو خالص وسيبونا نشوف شغلنا
اة ويا ريت تصوتولى فى الانتخابات الجاية علشان اقدر اكمل الحرب على الارهابيين الشريرين

علشان كدة يا جماعة انا متوقع انة تحصل عملية ارهابية قريب
وتكون من العيار التقيييل
علشان يقضو على الحشد الاعلامى الهائل اللى العرب والفلسطينيين كسبوة مؤخرا

ياريت بقى يا عم اسامة لو انت موجود فعلا تقب كدة
وتورينا نفسك
لان كدة بقى ضررك اكتر من نفعك

وعلى فكرة فية شريحة كبيرة من الامريكان بقت مقتنعة دلوقتى ان اسامة دة مالوش وجود اساسا وانة لعبة من السى اى اية

وعلى فكرة لازم نفرق واحنا بنتكلم ما بين اسامة بن لادن اللى قاعد يسجل فى شرايط

وما بين مجاهدين طالبان اللى مطلعين افلاس الامريكان فى افغانستان


احمد سعيد

TAFATEFO said...

MADRID, Jan 14 (Reuters) - Spain's foreign ministry said on Wednesday that a report quoting Foreign Minister Miguel Angel Moratinos as saying Hamas had accepted an Egyptian proposal for a Gaza ceasefire was incorrect.

"This report is not correct," a ministry spokesman said, referring to a report on the website of newspaper El Pais.

"The minister simply mentioned a piece of news that (news agency) EFE had put out saying that," the spokesman said. "He (Moratinos) does not have information from Hamas".

El Pais declined to comment on the Foreign Ministry's denial.

أكون أو لا أكون said...

خوسني وعبد الله السعودي... بيتخبطوا... يحاولوا يحافظوا على ماء الوجه... مش عايزين أي حد يتصرف ويعمل قمم أو إجتماعات ويدعوهم... بالنسبه لهم ده بيحسسهم إنهم تابعين... لأنهم مابيشتغلوش من أجل مصلحه غزه...

وحماس أذكياء... مش بيعترضوا "بالقول" علشان ماحدش يمسك عليهم كلمه أو موقف ويراوغهم بيه.
وخصوصا هم في حالة حصار.

أبو الغيط على العربيه... وهبب في الكلام قوي...

خيرالدين said...

ابو الغائط على العربيه

Anonymous said...

معاملة الحكومة المصرية لحماس
http://www.youtube.com/watch?v=1sT03P6H4VI&eurl=http://www.aljazeeratalk.net/forum/showthread.php?t=182491

فيه لقطه في اخر الفيديو تحرق الدم فعلا

شوفوا تعليقات الناس علي الفيديو

http://www.aljazeeratalk.net/forum/showthread.php?t=182491

Anonymous said...

نوارة
شفتي ضابط الامن عمل ايه مع السيد غازي حمد

الفيديو متصور من كام يوم بس

Unknown said...

امير قطر بيحسبن علينا

مواطن مصري said...

مصداقية الجزيرة بشك فيها


بيريز كان عندهم في قطر و عندهم قاعدة مركزية هناك


نا مع المبادرة و على الهامش اكثر قناة عجبتني في التغطية هي قناة العربية

حسن على said...

طبعا متأكد انك مش بتزايدى على حماس وانك - زيى-عاوزة لهم افضل الشروط انما تعملى اية وانتى فى وسط الحرب لما تلاقى الصديق -اللى انتى شاكة فية اساسا-عمل تحالف مع عدوك وظهرت خيانتة وعمالتة وسفالتة وقلع برقع الحيا ومعة ملابسة الداخلية؟؟؟وممانعة مصر والسعودية فى حضور قمة قطر هو محاولة للهروب من قذائف الاحذية "سيز تن"كما قال بوش .الاصرار على الاجتماع فى الكويت ببساطة هو للتمتع بحماية النظام الكويتى "المتعاص" هو ايضا اكثر منهما والقوادين لا يرتاحون الا فى صحبة زملاء المهنة حيث ان الحال من بعضة يعنى

Unknown said...

لا يا حسن
انا ازايد على حماس مين انا الفسلة اللي قاعدة الكي بورد ما باعملش حاجة

بس ياشيخ ما كنتش عايزاهم يتحوجوا للبهايم اللي هنا
لو كان ينفع كانوا يبقى احسن يرموهم في الزبالة

بس للاسف روح غزة في ايدين النظام الوسخ ده

بس انا سمعت البيان اللي قالوه

هم متمسكين برايهم اللي هو مافيش في المبادرة القذرة بتاعة حسني اي حاجة منه

اهو ح نشوف
ربنا ينصفهم يا شيخ
ربنا ينصفهم من عنده

Anonymous said...

Nawara thanks to u and to u friends i have take the GAZA song which u posted and we Palestinian from Gaza study in Belgium presented in the university today, it was so good

BARK ALLAH FEKOUM

Gaza , Palestine

حسن على said...

ثم ان اللى اسمة مواطن مصرى دة مفقع بامتياز ,حاجة كدة زى اللى الانجليز بيسموة "جاسوس المانى" اشارة الى التائة المضطرب اللى مش عارف هو فين ويتكلم بلكنة غريبة.اما مصطفى واحمد سعيد فهم فرسان حقيقين ولهم تحياتى وشكرى

Unknown said...

وبعدين ما تركيا كانت ح تحلها راح مبارك نط على كتاف تركيا
جات قطر تعمل قمة راح مبارك وعبد الله نطوا في الموضوع

لا فيه حاجة

حكاية فيها لاخفيها دي لازم فيها سر

يارب حماس يطلعوا انبه منهم ويعرفوا يتسلتوا منهم

TAFATEFO said...

طب يا سيد مواطن بعد إعلان تأييدك للمبادرة المصرية .. ايه موقف حضرتك من انعقاد قمة الدوحة؟؟

هو ايه بنود المبادرة المصرية يا مواطن اللي انت بتأيدها؟؟

TAFATEFO said...

آه طبعاً ولا يفوتنا أن نثني على حكمتك ونظرتك الثاقبة في تقييم تغطية قناة العبرية التي ولله الحمد من أول ليلة في التوغل البري تشير إلى تقدم القوات الإسرائيلية في غزة (ولسه مخلصوهاش لحد دلوقتي عزنها الصحراء الغربية) ولما لإسرائيل أعلنت ان 9 جنود قتلوا .. العبرية قالت لا خمسه بس

أبو الغيط تجارة عين شمس .. و عمرو تجارة عين شمس

لا تعجب .. إنها إرادة الله

Unknown said...

بالنوسبة للفيديو بتاع معاملة الامن لاحد قادة حماس

يعني ده الامن المصري يا اخوانا
سمعته سابقاه
هو في الحكومة الفلسطينية طبعا
بس ما الدكتور عبد الوهاب المسيري اذا ما كانش عشان دكتور يبقى عشان كان في سن والدهم وللا حتى جدهم اذا ما كانش عشان سنه يبقى عشان مرضه
وضربوه

دول هم كده
خلاص
قضاء الله وقدره

مواطن مصري said...

@?حسن علي


الحرب كللمة سهلة الي قاعد في بيتة


اة انا ليا رأي و بقول و الله مش عاجبك كلامي انت حر انما تاني مش من حق حد زيك ولا اي حد اانو يقل خاين ماشي

مواطن مصري said...

اولا القمة العربية مجرد كلام

المبادرة وقف الاق نار و هدنة لطرفين

حماس الان تريد هدنة ل اعادة ترتيب الاوراق لديها و و في نفس الوقت تعيد تخطيطها و ترتب نفسها

مواطن مصري said...

اساسا كمان المعركة غير متكافئة

مواطن مصري said...

و انا هنا بتكلم كوني انسان و اطالب حماس و اسرائيل بوقف اطلاق النار ف العند لا يفيد الا المزيد من اراقة المزيد من دم الابرياء

TAFATEFO said...

يا مواطن

ايه هي بنود المبادرة المصرية اللي حضرتك بتأيدها؟؟؟

وايه اللي عجبك في تغطية العبرية؟؟ علشان تغطية العبرية ليها ميزة واحدة إعلامياً عن تغطية الجزيرة؟؟

حسن على said...

صلاح البردويل من حماس بدا حازما واثقا فى المؤتمر الصحفى ولم يتزحزح عن موقف حماس الرسمى ابدا واهل غزة الابطال يقاومون القصف بكل انواع الاسلحة ويفقدون اطفالهم وارواحهم وبيوتهم ولكن الكل يقاوم فمنهم من يستشهد ومنهم من ينتظر وما بدلوا تبديلا . اة وشاهدت جمال مبارك فى رفح المصرية يمشى ويتحدث وهو فى غاية القلق وعيونة المضطربة محلقة بالسواد- حاجة كدة زى" سهاد بالليل وويل على ويل على ويل وشىء منة العذاب ارحم"مع الاعتذارللست ام كلثوم.ونصيحة للة ياجيمى الدور مش لايق عليك والمصحف الشريف

Anonymous said...

حسن على مش معقول كل ما نختلف مع حد نقول عليه خائن!!هى فين بقى الديمقراطيه؟