Thursday 15 January 2009

القاعدة الامريكية في قطر تتأهب لحماية المجال الجوي الاسرائيلي

لسة شايفة الخبر دلوقت، القاعدة الامريكية في قطر بتتأهب تحسبا لاي "هجمة خارجية" على اسرائيل
!!!!!!!!!!!!!!!!!!!!!!
الله يخرب بيوتهم كلهم
ما داهية خناقة القمم اللي بينهم دي تكون كلها تمثيل في تمثيل عشان يزنقوا حماس، فيه حد ساب لي تعليق بيقول لي امير قطر بيقول لن اضحي بالعلاقات مع اسرائيل وحدي
!!!!!!!!!!!!!!!!!
اشد شعري؟ انا بقالي عشرين يوم عمالة اشد شعري، طب دلوقت يعني الفلسطينيين لازم يعني يلجأوا للعرب؟ لازم يعني؟ هم مش المقاومين عملوا قمة زي ما المتحدث باسم حزب الله قال؟ خلاص بقى، مالهمش دعوة بقى لا بمصر ولا قطر ولا السعودية (السعودية دي اصلا البسوس اللي مقومة الدنيا) وبعدين يعني الملك عبد الله كان قاعد مع امير قطر يهزروا، والله العظيم الخناقة دي تمثيلية، ولا مبارك متخانق مع امير قطر ولا امير قطر عايز يعمل قمة اصلا
خلي المقاومين مع اللي ينفعهم وبلاش بقى يلطوا نفسهم بالخونة احسن يسموهم وللا يسلموهم، مين عارف مين اللي بلغ على مكان سعيد صيام؟
آه، اذا كانوا محتاجين دعم دولي ممكن بقى عندهم فنزويلا وبوليفيا مع ايران وسوريا
وكفاية كده،بقية العالم عايز يترمي في الزبالة

37 comments:

مواطن مصري said...

ههههههههههههههههههههههه الي اتوقعتة بيحصل

انا بقولك اية من الصبح

mido said...

كفاية شد فى شعرك

مواطن مصري said...

هههههههه كويس ان مصر موافقتش


على القمة


ههههه و يقولك امير و يقول حسبي الله و نعم الوكيل بقى فية في الدنيا امير امييييير يقول كدة


صدقتينيييي

مواطن مصري said...

الغريبة ان لسة الجزيرة بتشتم في مصر و لسة القرضاوي قاعد في قطر

مش عارف قاعد عنناك بيعمل اية

و الجزيرة مقرها لية هناك


فاكرة لما قولتلك دة مخطط

V.Hayat said...

اليس تعلمين ان قاعدة العيديد فى قطر اكبر قاعدة لامريكا فى الخليج العربى واكبر مستودع للقنابل الفسفورية التى يضرب بها اهل غزة كما ان تموين الطائرات من زيوت وبترول كذلك من هناك
يا اهل قطر اتمرؤن الناس بالمعروف وتنسون انفسكم

Anonymous said...

تعتقدي ان سوريا و لاحتى لإيران ممكن تساعد أنا بدأت اشك فيهم كلهم و اعتقد ان الكل يتاجر بالفلسطنيين و كل واحد له هدف خاص به متى حققه سيقول للفلسطنيين يعني المقاومة شكر الله سعيكم

Unknown said...

مواطن
انا نص شد شعري منك
ياابني
باقول لك تمثيلية
تمثيلية من الاول السعودية اصلا هي وقطر ومصر شكلهم متفقين على الفورتينة دي عشان ما يبقاش فيه ادانة
تقوم تقول لي الحمد لله ان مصر ما وافقتش؟

يابني جواسيس كلهم


حياة

ما انا عارفة موضوع القواعد الحربية مش قطر بس قطر والامارات والسعودية والكويت وكل دول الخليج

امنية

بس هم بيساعدوهم فعلا
اقصد مافيش غموض ومافيش داعي للشك
اللي بيشتغل لحساب امريكا واسرائيل مش حاطط برقع على وشه
واللي بيساعد المقاومة مش محرج ولا حاجة

Anonymous said...

انا قلت انه التصريح لرئيس وزراء ووزير خارجية قطر و قاله في اللقاء معه على قناة الجزيرة و ممكن مشاهدته على youtube

Unknown said...

اه نسيت اقول لك حاجة يا مواطن

قناة الجزيرة مش متحدثة باسم الحكومة القطرية
ولا هي قناة حكومية اصلا
يعني مثلا كأنك بتحاسب قناة دريم على تصرفات حسني مبارك

أحمد غانم said...

ربنا يسهل

Unknown said...

بشير نافع بيقول الكلام اللي كنت باقوله: بلا تفاوض بلا نيلة
خلاص عرفوا مطالبنا يطلعوا من دماغنا بقى

TAFATEFO said...

أحب أنا أوي اللي يسأل على حاجه واضحه

يعني لما أمير قطر يحسبن .. تبقى ايه؟؟

لما الملك عبدالله بالدوجلاس الجميل ده خرسان .. يبقى ايه؟؟

لما كل واحد بيعرف يقلد الأراجوز فالقنا بتصريحاته يبقى ايه؟؟

ولما عريقات .. يتكلم باسم الشعب الفلسطيني المقاوم في غزة (ناهيكي عن ان عباس بيتكلم باسم الشعب الفلسطيني) يبقى ايه؟؟

تبقى تمثيليه زباله .. وأهي الناس بتموت .. والمقاومه بتقاوم .. وهما هيطلعوا من المولد بلا حمص؟؟ ما هم لازم يمثلوا .. على الأقل يقولوا بعد كده مواقفنا كانت واضحه

والناس هتنسى وهتسقف .. ومش هتقزل أحييييييييييييييييييييييه

مواطن مصري said...

انا لو مكان القرضاوي


انو يدعو للقطرين بتطهير اراضيهم اولالالالا

Unknown said...

يارب مصطفى يكون بيسجل بشير

TAFATEFO said...

لكن البي بي سي في العدوان الثلاثي حاسبت حكومة انجلترا وضغطت عليها من أجل الانسحاب

الجزيرة تعتبر حكومية .. وتمويلها من قطر .. إنما أهي قدامنا أهي .. هتحاسبها على ما تبثه مش على مكانها ولا تمويلها

الجزيره دلوقتي علامه تجاريه أعلى مصداقيه من معظم القنوات الإخباريه الأجنبيه الأسبق منها

Unknown said...

يا طفطف

انا عايزة بشير نافع
كان بيتكلم دلوقت

TAFATEFO said...

أنا لسه داخل حالاً

لو جه في الإعاده هسجله

آسف بشده

Unknown said...

لا خلاص بقى انسى
ما يتهياليش ح يعيدوه تاني

هو حرن: قال حماس تبطل تفاوض مع تركيا ومصر
خلاص
ما معناه ح يقلبوا دماغنا ويزهقونا ليه احنا مش ح نتنازل عن طلباتنا انا اهلي كلهم في غزة ومش عارف عنهم حاجة
دلوقت اللي مفروض يتفاوض مصر وتركيا يا يرجعوا لنا باتفاق مشرف يا اما ح نموت كلنا في غزة بشرفنا

مواطن مصري said...

وزير خااارجية الكويت كان بيتكلم ع العربية

Unknown said...

يخرب بيت حكام الخليج يا شيخ في الارض مش كفاية خربانين وبيخربوا الناس كمان بفلوسهم

Rania Lelah said...

صلاه النبى احسن
يا ما شاء الله
بقى الكل بيشتغلنا و لااكننا عيال فى كى جى وان
و الناس هناك بتموت
هقول ايه
حاسه ان روحى بقت انهزاميه حاجاة بقت تارف
منهم لله اجمعين
و النصر لكى يا غزه ان شاء الله
ماهو معاكى اللى اكبر من الكل
و قادر يخسف بيهم الارض فى اى لحظة

TAFATEFO said...

أنا لسه راجع محروق دمي من نفس الرجل اللي قال حماس اللي كسبانه

الله يحرق دي ناس يا شيخه

TAFATEFO said...

رمضان شلح : المقاومه تكبد العدو خسائر فادحة ولن تخضع للضغوط

قال كلام كويس قبل عريقات اللي يحرق الدم النهارده على فكره

Unknown said...

مين الراجل ده؟

هم عمالين يتكلموا كأن غزة دي مافيهاش الا حماس ده اولا

وبيبنوا بقى على الحقيقة الموضوعية دي ان حماس دول اصلا مش بني ادمين من الاساس

والنتيجة النهائية
انهم يا تنكسر مناخيرهم ويتذلوا يا يموتوا

الله يخرب بيوتهم

Unknown said...

و ليه نلوم هذا او ذاك اذا كان ابو مازن و عصابته يقفون متفرجين في انتظار استسلام المقاومة في غزة. و لكن السؤال المهم هو كيف يتم تدعيم المقاومة حتي تصمد ؟

Anonymous said...

مين اللى قالك يانوارة ان الجزيرة ملهاش دعوة بالامير اناكنت قريت مرة ان رئيس القناة من الناس المعدودين اللى يقدرو يدخلو للامير فى اى وقت وعموما فى ظل هذة الظروف المهببة الواحد فقد الثقة فى اىحد واى حاجة وواضح ان حجم وعمق المؤامرات اكبر من قدرة الانسان على الاستيعاب ربنا يطف بينا ---------دودو

مواطن مصري said...

ربنا يخدهم اجمعين و يحرقهم في جهنم الحمراء

Rania Lelah said...

اكبر دعوة فى تاريخ الانسانية وعلى مدار الزمن

التوقيت : الساعة 2 بعد الظهر بتوقيت مكة المكرمة

اليوم : الجمعة 16 / 01/ 2009

وعلى كل مسلم فى هذا الكوكب ان يدعو فى هذا التوقيت

اذا قمت بالدعاء فى هذا اليوم و فى هذا التوقيت فسيكون معك اكثر من مليار مسلم فى جميع انحاء اللعالم يدعوا معك وبنفس الكلمات والمعنى , ماذا سيحدث فى هذا اليوم ؟ ماذا ستحدث فى هذه الساعة ؟

الله المستجاب , كن مؤمن بقدرة الله عز وجل فى هذه الساعة فقد يتغير وجه التاريخ

دعائك مطلوب لكل مسلم يجاهد فى سبيل الله , فلا تبخل بالدعاء فى هذه الساعة انت وعائلتك واخوانك وجيرانك , اخبر كل مسلم يعيش حولك ودعونا ندعى جميعاً ونشارك فى اكبر دعوى على
مدار الزمن

( كن واحد من المشاركين فى الدعاء وفى هذا الحدث المهيب )
:
أكبر دعوة فى الزمان
###################
-------------------

, اللهم انصر المقاومة فى غزة , اللهم انصر المسلمين والمسلمات فى كل مكان , اللهم انصرهم على اسرائيل وعلى الظلمة.

اللهم ارحم اموات المسلمين , اللهم ثبت اقدام المقاومة فى غزة وفى كل مكان .

دعاء الكرب

إله إلا الله العظيم الحليم، لا إله إلا الله رب العرش العظيم، لا إله إلا الله رب السموات ورب العرش الكريم
اللهم رحمتك أرجو فلا تكلني إلى نفسي طرفة عين ِوأصلح لي شأني كله لا إله إلا أنت

لا إله إلا أنت سبحانك إني كنت من الظالمين
الله الله ربي لا أشرك به شيئاً

------------------------
حي يا قيوم ..ثبت إخواننا في غزة وانصرهم .. يا رب إن الدنيا ضاقت عليهم بما رحبت .. فما لهم غيرك .. يا رب إنا قد منعنا من الجهاد .. فما لنا غير الدعاء .. وانت قلت إدعوني استجب لكم .. يارب يا قوي يا متين .. يا عزيز يا مقتدر .. انصر اهلنا في غزة .. وثبتهم وزلزل الأرض من تحت أقدام اليهود الغاصبين .. يا رب أنصرهم نصر عزيز مقتدر.. يا رب انزلملائكتك وابعث بجندك تقاتل معهم ..يا رب ارسل على اليهود ريحك ورعدك ومطرك..يا رب انصرهم يا رب انصرهم يا رب انصرهم .. يا رب ثبتهم .. يا رب ثبتهم .. يارب ثبتهم .. انك على كل شيء قدير
-----------------------
و الدعاء بدعاء أهل الثغور

---------------

اللهم انصر اخواننا في غزة

Unknown said...

ماهو عشان كده بشير نافع قال سيبونا في حالنا عرفتوا احنا عايزين ايه والا سيبونا نموت

Rania Lelah said...

الناس هناك عندهم نقص فى الاكفان

طالين منا اكفان يا نواره
شوفتى الحاجة الى تشل و تنفرس و تنقط و تحزن و تبكى
عايزين اكفان
بقى نتبرع باكفان علشان الناس الى بتموت
و لا اننا نبترع بحاجة علشان الناس تعيش
منك لله يا اخى
منك لله و من كل واحد تاخر انه يساند اهل غزه
حسبنا الله

Unknown said...

امال انا ليه مش حاسة ان فيه مؤامرة؟

المؤامرة بتبقى خفية يعني

انما انا شايفة الكل كاشف وشه عادي ماحدش مكسوف من حاجة

امال يعني اللي كان طالع يحسبن ويكشف راسه ده كان قاعد النهاردة جنب الملك عبد الله وبيضحكوا وكفك ولا اي حاجة

يعني لا فيه خناقة ولا عارفين اصلا كان بيحسبن على مين

اكيد كان بيحسبن علينا احنا

والنهاردة بشير نافع قال بلا قمم بلا نيلة دماغنا شوية

Anonymous said...

ماهودةالجديد ك لحاجة فى الدنيااتغيرت حتى المؤامرات يابختك يانوارة يتشدى فشعرك بس انما حاسة انى فعلا اتجننت كم المغلطات والمؤامرات بقى حاجة فوق الاحتمال اللة يكون فى عون اهلنا فى غزة مبقاش ليهم غير ربنا انتى لو كنتى سمعتى الست الفلسطينية وهى على التليفون فى الجزيرة الصبح حاجة مخلية قلبى ودماغى هينفجرو من الحزن والغم وقلة الحيلة -----------دودو

Anonymous said...

الاخوة بتوع مولد القاعدة العسكرية فى قطر

ممكن لحظة واحدة
لحظة واحدة تفكرو فيها بمنطق
بعيد عن الكلام العبيط بتاع الاعلام المصرى الاهبل
والشعب الاكثر هبلا اللى بيصدقة

اة انا معاكم ان قطر فيها اكبر قاعدة
ماشى
محنا مقلناش يعنى ان امير قطر شريف قوى وبتاع ربنا
كلنا عارفين اللى فيها
بس الراجل لما يجى يقول كلمة حق
كلة ينط فى كرشة
ياسيدى بصرف النظر عن غرضة من كلمة الحق دى
هى كلمة حق ولا مش كلمة حق؟

احسن من اللى كلامة كلة باطل على طول الخط
وبياخد فيها ويبجح
ومش بيختشى على دمة
ويقف فى وسط ميدان رمسيس ويقول انا باخد فيها
وكلنا بناخد فيها

عارف موقفكم دة بيفكرنى باية
حارة كلها نسوان بطالة
وكل واحدة فيهم بتعاير اختها باللى بتعملة
ويوم ماجت واحدة فيهم تقول يا جماعة اللى بنعملة دة حراااام
كلهم اتلمو عليها ونزلو فيها ضرب
وقالو هتعملى علينا شريفة يا روح امك
لا بقى غصب عنك هتعملى زى ما بنعمل

الراجل قال كلمة حق ولا لا...ردو؟



وبعدين بمناسبة موضوع القاعدة
يا ريت تبصو عالخريطة تشوفو قطر موجودة فين
موجودة عالناحية التانية

يعنى معقول ان الامريكان على درجة من العتة
ان يبقى اسطولهم مااالى البحر المتوسط وعلى حدود غزة
ومجرش فى موانى تل ابيبويسيبو كل دة ويروحو يجيبو السلاح من اقصى الجزيرة العربية
بالعقل يعنى

يا ريت تفكرو شوية فى الكلام اللى بتقروة

كما ان القواعد فى الخليج ليها مهام تانية ومش ممكن تتحرك من مكانها الا لاجل المهام دى
اما اسرائيل
فالسلاح لة معاها سكك تانية
زى ماشفتو السفنتين اللى كانو رايحيين من كام يوم
بتوع السلاح


احمد سعيد

Unknown said...

و انا هالطم و اصوت و اشد شعرى معاكى
ماهو ده كبيرنا رجالة و ستات
حاجة تحرق القلب والله

TAFATEFO said...

يا أحمد بك سعيد

قال كلمة .. نتشعبط في الكلمه .. ولا لازم يصدقه العمل؟؟

عايز العرب يقطعوا العلاقات مع إسرائيل .. ما يقطع العلاقات مع إسرائيل ويطرد السفير

قطر أكبر مصدر غاز وبترول لإسرائيل (على ما أتذكر) وقف الغاز والبترول

اطرد السفير .. واقفل مكتب التمثيل التجاري .. محتاجه قمه دي؟؟!! انما تمثل وتعمل شريف وبني آدم وانت ابن ستين في سبعين وسخ زي الأوساخ .. متطلبش مننا نصدق اللي جابوك

يعني لما عباس طلع واتكلم على انه حريص على الدم الفلسطيني وهو أول الخونه .. نسقف للي جابوه ونقول برافو .. ولا نقوله ملعونك؟؟

Anonymous said...

طيب اية تفسيرك ياعم مصطفى لمقاطعة مصر والسعودية لقمة قطر ومحاولاتهم افشالها
مع اننا عارفين ان مصر والسعودية واخدين صف اسرائيل

ماشى يا سيدى انا عارف دماغ امير قطر كويس
وعارف اصلا ان القمة دى لا هتنش ولا هتهش
بس طالما مصر معرضاها قوى كدة
يبقى فية حاجة
صح


احمد سعيد

Anonymous said...

وبعدين يا عم مصطفى احنا حكامنا جبنا
عمر ما حد فيهم هيطلع لوحدة ويتخذ موقف ايجابى ولو بسيط
لان شبح صدام لسة بيحلق قدام عنيهم

وحتى اللى عايز ياخد فيهم موقف بسيط
عايز يتحامى فى زمايلة
ويستخبى فى وسطيهم
زى الابلة فى الابتدائى لما تمسك العصاية وتقول مين اللى ضحك

فهمت قصدى اية؟

احمد سعيد