Wednesday 7 January 2009

نائب مصري يرفع قضية لابطال اتفاقية كامب ديفيد

ربنا ينصره، انا مش فاكرة هو اسمه محمد عواد وللا محمد عودة؟ تقريبا عواد، اصلي شفته على الجزيرة بيشرح بالتفصيل ازاي ان اتفاقية كامب ديفيد مناقضة لاهم مواد الدستور، لدرجة انها مناقضة لاول مادة في الدستور
ده الكلام ده بعد التعديلات الدستورية، ياريته كان رفع القضية قبل التعديلات، المهم هو بيقول الوضع قانوني تماما، زي قضية الغاز بالظبط، ومش فرقعة ولا حاجة وقال انه ح يقدم للمحكمة بنود الاتفاقية وبنود الدستور اللي هي مخالفة ليها خصوصا ان اتفاقية كامب ديفيد اكتر من الاسلام، يعني تجب ما قبلها وما بعدها كمان....توماتيكي توماتيكي
المهم ربنا ينصره يارب، يارب ياخد حكم نهائي بالغاء البنود المخالفة للدستور دي، طبعا ح تبقى زي الغاز كده، الحكم قضائي والحكومة ما بتنفذش صح؟ مش مهم بس المهم يبقى معانا حكم قضائي
يارب، يارب، يارب، الهي يسدد خطاك ياللي رفعت القضية ضد اتفاقية كامب ديفيد وينصرك ابتدائي ونهائي قادر يا كريم
ويبيض وشه ويشرفه زي ما شرفنا دنيا واخرة قادر يا كريم
انتوا يا كلاب السيد حسن كان بيتكلم وسبتوني انام؟ ما صحتنويش ليه؟
طب بقى على الله يكون مصطفى ما سجلهاش، ح اخزق عينيه، ايه حكاية ان فيه حد رافع على السيد حسن قضية دي؟ الكلام ده صحيح؟ جو باعت بيسألني، حد رافع عليه قضية؟ يارب يقطم وسط ورقبة اللي رافع قضية على السيد حسن ويقطع لسان اي حد يتعرض له بكلمة، الهي يارب لسانك يتنشر بالمناشير ياللي تغلط نص غلطة في السيد حسن
الهي اللي رفعوا عليه قضية - لو الكلام ده صح اصلا لانه مش معقول، هم ح يجيبوه منين هو مش خاضع للقانون المصري - الهي يارب يبقوا عبرة خلقه وينطسوا في حبابي عينيهم ومعاميعهم تطلع من ودانهم، ربنا يقسم وسط اللي يعاديه يارب، الهي اللي يعادي السيد حسن ولو بكلمة ما يوعى يشوف يوم عدل في حياته، الهي يولع من جوة ومن برة الهي يتشحطط ويتبهدل ويتفضح ومنين ما يمشي الناس تشاور عليه ويا تشمت يا تتصعب
وعايزة الفيديو والا ح اخرب بيتك يا طفاطيفو
اسرائيل تؤيد مبادرة مصر لوقف اطلاق النار! وقال عاملة تلات ساعات اطلاق انساني لنار الوقف، لازم يخلوا بالهم المقاومين، ربنا ينصر المقاومين، لان ممكن يستغلوا التلات ساعات دول عشان يئذوا المقاومة باي طريقة، ياخدوهم على حين غرة، على حين راحة، تبقى الحكاية سبهللة وحد يندس وسطهم
يخلوا بالهم
ربنا يارب ينصرهم ويأييدهم وينجيهم ويسخر لهم الملائكة والحيوان والجماد يارب ويثبتهم ويرعب الصهاينة يارب، ربنا يحميهم ويفرحهم بالنصر ويرفعهم على راس امريكا واسرائيل واذنابهم، ربنا ينصرهم على كل من يعاديهم ويملكهم دنيا وآخرة ويفرح حبيبهم ويكبت عدوهم قادر يا كريم، ربنا ينزل عليهم صبره ويديهم القوة والبأس والشدة ويوهن عدوهم ويضعفه وينجيهم من العملاء والخونة يارب ويحميهم من كل سوء
الهي يارب اللي يتريق على المقاومة يجيله سم يسكن في كبده، الهي يارب اللي يحارب المقاومة وللا عايز يعزل مصر عن دورها عشان يخدم اسرائيل الهي يارب يجيله دمامل في مناخيره من جوه وتعمل مدة، الهي يارب بتوع الشأن الداخلي واللي عامل حرب اعلامية وقارفنا بكلامه الفارغ ويشتم المقاومة ويقول واحنا مالنا، الهي تقع على راسه ملة سرير تجيب له هبل ويبقى بريالة، الهي يبقى فرجة ومسخة خلقه، الهي يجيله جرب وصوابعه تعفن ويبقى عبرة لمن يعتبر، الهي لا يكسب ولا يربح ولا ينفع ولا يشوف يوم عدل في حياته، الهي جسمه يدود على قد الدود اللي في دماغه، الهي اللي يشكك في عروبة مصر يولع بجاز وسخ ويفضل مولع شوية قبل ما يموت وهو بيجري على الطريق الزراعي مولع لحد ما تشيله عربية نقل، يفضل متعلق في عجلتها اليمين الورانية شوية وهو مولع ويتفرم شوية، تاني، وهو مولع، لمدة سبع ساعات لحد ما يموت
الهي يهدي الضال والعبيط اللي مش واعي هو بيقول ايه، او ياخدهم بقى احنا لسة ح نقعد ندادي في عبط
الهي يا مصطفى لو ما جبتليش حسن نصر الله النهاردة النت بتاعتك تهنج خمسة واربعين دقيقة
كانت معكم ام محمد المجذوبة من امام مقام الطاهرة ام العواجز

11 comments:

TAFATEFO said...

ممممم

نوت هوم

بس النهارده أنا معترض

نصر الله على عيني وراسي .. وأشجع العرب .. لكن مش دوله .. نصر الله مش دوله

زي حماس ما هي حركة مقاومة .. حزب الله حركة مقاومة

نصر الله لما يقول للشعب المصري اخرجوا على شيطانكم .. أنا معاه .. لما يقولنا تظاهروا واعتصموا ودعموا غزه أنا معاه .. انما لما يقول انه مكانش بيعادي اللي تآمروا أيام حرب تموز لكنه هيعادي اللي تآمروا على غزه .. أنا مش معاه

السيد نصر الله أنا أعشقه .. لكني النهارده حاسس انه انفعل وغلط

عموماً هجيب لحضرتك لنك الخطبه أز سون أز بوسيبل .. بس تزعل

مواطن مصري said...

انا شفتها انا شفتاها

طيب ما لو اتفاقية السلام باظت يا حجة ب العقل اكيد هيكون ليها ردود افعال تانية
تفتكري

الرد الفعر اية
حرب يسناء هضيع
و لو دخلنا في اي مخاطرة حرب تانية ولا 60 سنة نحرر فيها سيناء اساسا اقتصاد مصر مش هيقدر يمول لحرب تانية


الحاجات دي لازم يبقى ليها دراسات
و خطط
يعني اة شايفز الراجل المحترم طرد السفير الاسرائيليي
عشان متمكن و اقتصاد بلدة يسمح لية ان يواجهة المخاطر دة غير انها من اكبر الدول المصدرة للبترول

اينعم انا مع مبدء المعاملة ب المثل لكن مصر لا تستطيع انها تدخل في مخاطر الان
ولا اية

مواطن مصري said...

اة السادات كان قاليل في خطبة السلام نعيش في سلام دائم اذا احترمت اسرائيل السلام اهلن بها في الوطن العربي و اذا لم تحترمها فيهكون المعاملة ب المثل

و امبارح عمرو موسى قال
ان لو استمرت اسرائيل في العدوان هيكون ل الادارة المصرية كلام تاني مع اسرائيل و الامير الفيصل قال
انة هيكون هناك بدائل اخرى

Anonymous said...

نواره ما تتعصبيش على طفاطيفو
لينك الخطاب
http://video.hizbollah.tv/details.php?cid=1&linkid=489

انا رايحه يوم الجمعه القافله ان شاء الله و بصراحه انا راحه لوحدى و معرفش حد .. ف بليز قوليلى النظام بيبقى عاده ازاى ..لانى بجد عايزه اعمل حاجه و لازم اعمل حاجه.
بى اس: انا الى بعتلك ايميل من يومين :)

Anonymous said...

SA
Kamal Ataturk was also named a hero and was given medals for so called won battles against the enemy before he did what he is more famous about now. Anyone sees any resemblance.

الدرويش المرووش said...

ههههههههههههههههههه

ده إسمه الهم اللى يضحك

أول مره أضحك من 10 أيام

هى دى تقريبا أخرتنا

هاننجذب كلنا و نقف قدام السيده و الحسين نتفرج على المداحين و أبو الغيط بتوع الموالد طبعا علشان ماحدش يفهمنى صح

بس أنا حاجز مكان سوبر لوكس

هأنظم المرور فى ميدان لبنان

بالبيجامه و الشبشب طبعا

مواطن مصري said...

احة يعني

النظام الإيراني يمنح الجائزة لمن يغتال الرئيس المصري


أعلن عدد من المؤسسات والمنظمات التابعة للنظام الإيراني جائزة لمن يغتال الرئيس المصري.
وكتبت وكالة أنباء (فارس) الحكومية: أعلن عدد من المنظمات والمؤسسات وخلال مراسيم خاصة بان يمنح مبلغ مليون دولار لشخص في أي مكان في العالم ينجح في تنفيذ ما وصفوه بـ «الاعدام الثوري لحسني مبارك هذا الارهابي الدولي».
هذا وفي عددها الصادر يوم أمس الاحد كتبت صحيفة (جمهوري اسلامي) الناطق باسم ولي الفقيه خامنئي في افتتاحية وصفت الرئيس المصري بانه (فرعون) و(مفسد) وطالبت بالقضاء عليه.

http://www.iraq4allnews.dk/new/ShowNews.php?cat=6&id=14416



يعني لية مقالوش قتل ليفني ولا اولمرت مثلا او بوش ع سبيل المثال


و يقولك عروبة و مهلبية

Kontiki said...

بدات اتابع البلوج بتاعك من امبارح انت نشيطة جدا و بتجيبى اخبار كتير مهمة حاسة ان دمك محروق وانتى بتدعى بس بجد ياريت الدعاء عليهم يحوق فيهم او يصيبهم

3asheg.nawara said...

يا غالية
أكيد واضح من الاسم جد ايه أنا بحترم حضرتك. بس أنا زعلان من الوصف اللي وصفتي بيه زوار المدونة أنا عارف انه اكيد مش جصدك بس الاعتذار واجب بالذات من شخصية محترمة زيك.

Unknown said...

الانونيمس اللي بيشتم حماس

الحمد لله
شكرا

انا ح انسل الشبشب على دماغك انت

عارف ليه؟

عشان انت كداب

اه والله العظيم تلاتة كداب ومناخيرك بقى طولها سبعة متر من كتر الكدب

وبتردد كلام اسرائيل في الكدب
مش كل كلام اسرائيل كدب في كدب
بس انت بتنقي كدبهم وتقوله

عشان اللي خرق الهدنة هي اسرائيل اللي قتلت ستة من حماس في اثناء الهدنة
ومافيش دولة محترمة وللا غير محترمة بتعمل اغتيالات سياسية

وعشان الحصار في حد ذاته، من قبل قتل الستة بتوع حماس، خرق للهدنة

وعشان امبارح في مجلس الامن اعترفوا بان اسرائيل هي اللي خرقت الهدنة
وحتى محمود عباس زعل من الكلمتين دول

عايز يبرأ اسرائيل

زيك

ها

ح تستناني فين واجيب معايا انهي شبشب؟
البلاستك وللا الجلد

وللا اشتري لك قبقاب مخصوص؟

Unknown said...

ملحوظة تانية

لما يبقى فيه حرب

الحرب دي بتبقى ما بين طرفين

اذا انت ضد طرف فلاني يبقى اكيد انت مع الطرف الاخر

ليه؟

عشان دي مش حرب عادية ينفع تبقى فيه ملتزم الحياد

دي فيها معتدي ومعتدى عليه

ومدام بتقول ان حماس هي المسئولة عن المذابح دي

يبقى بتبرأ اسرائيل

وانا اذا كنت لا ارحب بايتام الديمقراطية الامريكية

فاكيد اكيد
مش بارحب بعملاء الكيان الصهيوني

ياللا من هنا عشان ح نرش مية