حد يقرصني عشان انا مش مصدقة

تحديث:

لعلاج اثار القنابل الحارقة والفسفورية اضغط هنا

يعني كل الهبد ده، وتسيبي ليفني سافرت امريكا، انتوا فاهمين يعني ايه تسيب الحرب والدنيا وتسافر امريكا؟ يعني هم موروطين وطلعان عينيهم وهي رايحة تشوف لها حل

اللي انا مش مصدقاه، ومحتاجة عربية تعدي عليا عشان اصدق نفسي ان اللي بيحاول يلحقها دلوقت هي الحكومات العربية! فيه كده؟ فيه كده في الدنيا؟ ايه اللي مصر والسعودية بيعملوه ده؟ وايه بقية الدول العربية مالها بتلف حوالين نفسها كده وباصة في السقف: امممم عايزين....نجـ...تمـ...ع ......في.........قمة....قمة؟ امممم

آه... نتناقش...امممم...نتناقش بقى.....ااااا...في الموضوع ده....طب نروح فين؟ فين يا ترى؟

امممممم

ااااا....نروح....لا ما نروحش بقى.....انا عن نفسي رايح.....امممم....انا....والله انا كنت رايح......ده فيه قمة تانية اهو....ح تروح؟ امممم.....اما اشوف كده......والله انا بقى لا ح اروح هنا ولا هنا......عشان ما ازعلش حد......انا ح اتغدى في البيت مع ام العيال

حد مصدق؟

حد مصدق ان فنزويلا وبوليفيا قطعوا العلاقات، ونجاد طالع في الجزيرة يقول: احنا نتمنى لكوا كل خير....نتمنى لكوا الكرامة

ودول فاتحين بقهم، مالهم؟ فيهم ايه؟

وماسكين المبادرة المهببة دي، اللي هي عقد اذعان، وعمالين يبصوا فيها، نخليها؟ وللا ما نخليهاش؟

انا باقول نخليها

وانا باقول نستنى شوية

وانا باقول...امممم، لا مش عاجباني

لا والله حلوة....مالها؟

حد من ولاد الكلب دول شاف الرضيعة اللي عندها حداشر شهر اللي رقبتها محروقة وبتصرخ: ماما..ماما..؟

انا بجد مش عارفة استوعب، ثم منين حسني بيقول: ما تقوليش فلسطين بقى دي ارض محتلة

ومنين عايز ينزع سلاحهم؟ يعني مش كفاية بيقول: عشان ما نتفهمش غلط ويفتكرونا بنهرب سلاح؟

طب اصلا اي شعب في الدنيا تحت الاحتلال لازم بيقاوم بالسلاح، امال يعمل ايه؟ ايه اللي ممكن يعمله يعني؟ الناس لما بتحتل بتعمل ايه؟ حد يرد عليا

بتعمل ايه غير تقاوم مقاومة مسلحة، وبدل ما يقعد يسفه فيهم ويقول: بترمي صاروخ ما بيموتش حد ويتقابل بقنابل

ما تبعت لهم صواريخ بتموت يا اخي، انت بعت صواريخ وهم قالوا لا؟ لا ما يبتعش صواريخ عشان ما يتفهمش غلط

طيب الدول اللي بتساعدهم وبتبعت لهم ما قسم بتناصبهم العداء ليه؟ عملوا لك ايه؟

انا مش قادرة اصدق، مش عايزة اصدق، يعني مصر كانت طرف في الصراع ضد اسرائيل، بعد السلام بقت طرف "محايد" بين الفلسطينيين واسرائيل ودلوقت بقت طرف في الصراع ضد الفلسطينيين؟

هو الوضع كده؟ هي كده يعني عشان انا مش مصدقة، حد يقول لي اني فاهمة غلط او اني شكاكة

واللي بيلفوا حوالين نفسهم التانيين دول، دول قاصدين، مش كده، قاصدين يعززوا على اسرائيل ومصر

يعني ده العدوان الاتنين وعشريني على غزة؟

لا لا، ده العدوان التلاتة وعشريني على غزة، عشان عباس كمان طرف في الصراع ضد الفلسطينيين، كده اتنين وعشرين ومعاهم اسرائيل، اه، وامريكا، كده العدوان الاربعة وعشريني على غزة

طب دول لوحدهم خالص

لوحدهم خالص في مواجهة اربعة وعشرين دولة

لا انا اكيد فاهمة غلط

اكيد، اكيد، انا فاهمة غلط
--
حتى لو ح يموتوا، من حقهم يموتوا وهم بيقاوموا باللي يقدروا عليه