رجاء الى الاخوة الفلسطينيين

الله يخليكوا ويفك ضيقتكوا، وحقكوا على راسنا من فوق، بس وحياة النبي السلاح اللي معاكوا ما يستخدمش في المواجهات مع الامن المصري على الحدود، الله يكرمكوا، معلش يعني مهما عملوا معاكوا لان ده لا في الصالح ولا له معنى ولا مفيد

اذا هم بيضربوكوا او بيعاملوكوا وحش، عادي، عادي دي طريقتهم مع كل الناس، حتى مع مراتاتهم. ودول عبد المأمور، وايه لازمة انك تشيل السلاح وانت بتمر على الحدود اصلا؟ يعني لو السلاح عندكوا زي الصعيد عندنا، على الاقل ما تعمرهوش وانت داخل على الحدود

والظباط اللي على الحدود دول، رغم كل فظاظتهم، اغلب من الغلب، وبينضربوا من اسرائيل كل يوم والتاني، وبيتقتل منهم ناس كتير، ومن بين كل كام ظابط الحكومة بتعلن عن واحد بس وتغطي على عشرة، فيعني مش انتوا بس اللي بتنضربوا من اسرائيل، هم كمان، ومش انتوا بس اللي خايفين، هم كمان ميتين في جلدهم من الرعب، ومافيش حاجة في ايدهم يعملوها

خلينا نقولها بالمفتشر ولو ان الكلام قاسي بس معلش استحملوني

لو لا قدر الله ظابط مصري ضرب على فلسطيني نار وموته زي الواقعة اللي فاتت، ح يبقى النظام المصري بيضرب على الفلسطينيين نار، وح يلاقوا ناس من جوة مصر تاكلهم اكل قبل ما حد يكلمهم من برة مصر

لكن لو فلسطيني ضرب على ظابط مصري وعور له دراعه زي النهاردة، حتى لو كان رد فعل، ح يستغل من قبل الحكومة المصرية كأسوأ ما يكون: شايفين؟ شايفين اللي بنفتح لهم المعبر بيعملوا ايه؟ هي فلسطين دي اولها فلس واخرها طين، وعلى رأي حسني مبارك لولا اننا شايلين قضية فلسطين كان زمان اقتصادنا كأحسن ما يكون!

طب ليه تدي سلاح لعميل صهيوني واضح زي الشمس يضربك بيه وتخسر نفسك وانت معاك الحق؟ هي غية وللا ايه؟ وماحدش ابدا في الدنيا، مهما كان مساند للقضية الفلسطينية، يرضى ابدا ان ظابط مصري (من اي سلاح) يصاب، احنا بنزعل، بنزعل على ظباطنا حتى لو بنكرههم، مش بس من الفلسطينيين، لو واحد مصري ضرب نار على ظابط مش مقبول في مصر ده (هو الناس هنا دي دماغهم خلاص)، يعني اذا كانوا بيضربونا احنا، وموتوا ناس مننا في المحلة وما ضربناهمش، والحمد لله ان ده ما حصلش

مثلا مثلا، في المحلة، لما الشرطة ضربت الناس وموتت بعضهم وخزقت عينيهم بالرصاص، ومع ذلك الحكومة قالت على بتوع المحلة انهم بلطجية، لو كان لا قدر الله واحد من اهالي المحلة معاه سلاح ودافع عن نفسه وضرب على ظابط كانت الحكومة سابت كل العشرات اللي ماتوا في المحلة ومسكت في الظابط وعملت عليه مناحة، طيب ليه اديهم فرصة انهم يتاجروا عليا؟ هم صحيح بتوع المحلة ما كسبوش حاجة قانونية من "تعقلهم" بس على الاقل ما خسروش تعاطف الناس

واضح؟