Tuesday 20 January 2009

خطابك زي وش مراتك ولبسها يا اوباما

ياريتك الابعد ما نطقت يا شيخ. بادئ ذي بدء، الانسان مننا مهما كان بني ادم برضه، والحادث الاليم ده حاجة اونسانية، يعني الافرو امريكان والمهاجرين شافوا ايام اسود من قرن الخروب وجه يوم بقى واحد افرو امريكان ومهاجر يبقى رئيس، ولو انه مش افرو امريكان قوي، هو مهجن، بس شغال يعني، وفجأتن من غير مقدمات لقيت نفسي خايفة عليه ليتقتل ونتنكد بقى. وهو داخل وماشي كده وعلى وشه نص ابتسامة انا دموعي نزلت، وكنت كده اكسايتد شوية، بالرغم من كل تحفظاتي عليه، بس النهاردة يوم استثنائي، اول ما نطق قلت بس بس، ياريتك ما فتحت بقك يا منيل جتك نيلة في شكل اهلك على اليوم اللي اتبلينا بيه
والله العظيم رجع ابوك عند اخوك
ايه الخطبة المتعجرفة المتكبرة التهديدية المتجبرة دي؟ ايه القرف ده، هو هو نفس كلام بوش بعد ما رجع شتم بوش، بس اوباما متعلم عنه شوية
وراجع تاني بعد كل الوساخة والتطهير العرقي اللي بلده عملته، واحنا لسة دمنا سخن واسرائيل قاتلانا بسلاحهم القذر اللي اسمه الدايم، اللي مافيش انسان طبيعي، ولا حتى شيطان يخطر في باله انه يخترع سلاح زي ده، بدل ما يتكسف على دم اهله ويتنيل يتكلم في الشأن الداخلي ووكستهم السودا راجع تاني يقول لنا
Our nation is at war, against a far-reaching network of violence and hatred
مين يا ابن الدايخة اللي بيروج للعنف والكراهية غير يور نيشن؟ مين؟ مين اللي بيضرب الناس بالقنابل المحرمة دوليا غيركوا انتوا والمقطورة بتاعتكوا اسرائيل؟ مين يا ابن المتضايقة اللي قتل اتنين مليون في سبع سنين؟ ح ترتووا من دمنا امتى؟ ما تختشي على دمك بقى، انت اللي زيك وشه يبقى في الطين
And so to all other peoples and governments who are watching today, from the grandest capitals to the small village where my father was born: know that America is a friend of each nation and every man, woman, and child who seeks a future of peace and dignity, and we are ready to lead once more
الهي تولعوا كلكوا يا شيخ، تاني؟
ready to lead once more
تاني؟ انت تاني؟ وتاني بتخرف وتقول كلام عكس بعضه زي اللي قبلك؟ منين اصدقاء ومنين عايزين تاخدوا القياد؟
ولسة بتتعاملوا مع نفسكوا على انكوا امبراطورية وان سيادتك الامبراطور، ياشيخ ربنا يبقى يجيب لكوا مصيبة تاخدكوا وتقصم وسطكوا تقعوا ما تقوموش تاني ابدا، يا شيخ قرفتونا في عيشتنا الله يخرب بيت كلومبوس على امريجو على اليوم اللي اتنيلنا اتبلينا بيكوا فيه
قال
know that America is a friend of each nation and every man, woman, and child who seeks a future of peace and dignity
قال
NO THANKS, JUST GET OFF OUR BACKS FOR GOD''S SAKE
ينعل ميتين كده في الارض، هم فاكرين نفسهم مين عشان يتعاملوا مع البشر بالطريقة دي؟ احنا بني ادمين زينا زيهم ومش عايزين حاجة غير اننا نملك قياد نفسنا، ومش عايزين قيادة من حد
فكوا عنا
لا ويرجع بعد ما يقول لنا: احنا مستعدين دلوقت لقيادتكوا يقول قوتنا نابعة من
the tempering qualities of humility and restraint
كل ده ومتواضعين؟ متواضعين ورابطي الجأش، عشان كده مشيتوا تقتلوا في الناس، وعشان كده لسة حضرتك بتتكلم عن قيادة العالم ولا كأنكوا عاملين كوارث في الدنيا والمفروض تتلطوا وتحلوا عن البشر وتشوفوا وكستكوا ولسة التقيل جاي ورا
We will begin to responsibly leave Iraq to its people, and forge a hard-earned peace in Afghanistan
ايوة يعني اهل افغانستان دول مش بني ادمين يعني؟ انا مش فاهمة يعني ليه كل الناس مستحلة دم الافغان بالطريقة دي؟ وللا عشان مش عرب؟
and for those who seek to advance their aims by inducing terror and slaughtering innocents, we say to you now that our spirit is stronger and cannot be broken; you cannot outlast us, and we will defeat you
متهيالي الكلام ده اولى بيه رام ايمانويل الموساد الصهيوني اللي خدم في الجيش الاسرائيلي تقولهوله، متهيالي يعني؟ وللا ايه؟
انا مش قادرة اصدق ان ابن الـ....ده لسه بعد ما بلده عامت في دمنا على مدى سبع سنين لسة له عين يتكلم بالطريقة دي تاني، يعني ياريت يشرح لنا واحنا لسة خارجين من مدبحة وبندور على جثثنا مين دول اللي عايشين على الارهاب وذبح الابرياء؟ وباسلحة مين؟ ومين يا ترى اللي استخبى تحت الكرسي والناس بتموت وقال
one president at a time?
ولما هو وان بريزيدنت آت آ تايم قابل ليفني السفاحة ليه؟ طب قابل ليفني السفاحة وهو لسة مش رئيس عشان بينه وبينها ود قديم، لسة ابن الكلب له عين يتكلم عن الارهاب وذبح الابرياء وطبعا الشخص ده موجود هنا؟ بالطبع آه، احنا
بصوا بقى في المقطع اللي جاي بيثبت "التهمة" اللي كانوا بتوع ماكين بيقولوها عليه انه رباية مسلمين لا مؤاخذة
To the Muslim world, we seek a new way forward, based on mutual interest and mutual respect. To those leaders around the globe who seek to sow conflict, or blame their society's ills on the West — know that your people will judge you on what you can build, not what you destroy
بيضرب ويلاقي ويرجع يضرب تاني سعادته، يعني عيب عليك ده احنا اللي بدعناها، قصدي العلوقية الناشفة يعني، ما تبيعهاش علينا
ده انت طلعت ربايتنا فعلا
يعني الجملة الاولى طبعا تنطبق على دول الخليج عشان فيها بترول، وبقية المقتطف ينطبق على ايران عشان بتقول اسرائيل ما ينفعش تبقى موجودة
طب انا عايزة اعرف، حلوف مين؟ بغل مين؟ بهيم مين؟ حيوان مين؟ اللي بعد كل اللي حصل في التلات اسابيع اللي فاتوا شايف ان ممكن عالم فيه تلاتة بس محترمين يقبل ان كيان تدميري عنصري متوحش حقير زي ده يستمر في الوجود؟
وده بقى حسني مبارك
To those who cling to power through corruption and deceit and the silencing of dissent, know that you are on the wrong side of history; but that we will extend a hand if you are willing to unclench your fist
طب احنا مش ح نمشي حسني مبارك باذنك يا عم الكتكوت
To the people of poor nations, we pledge to work alongside you to make your farms flourish and let clean waters flow; to nourish starved bodies and feed hungry minds
يعني مش ناوي يقطع المعونة، مش ناوي يقطع المعونة، يعني ح اللي بنبات فيه بنصبح فيه، وبدل ما يديها لفلان ح يديها لعلان اللي بيبعت له جوابات غرامية، ويرجع ابوك عند اخوك، ومش ناويين يسيبونا في حالنا على كل اللي هم فيه ده
يعني الامل الوحيد انه سعادته يبقى مواطن امريكي صالح يتنيل ينشغل في مشاكله الداخلية ويحل عن سمانا تبخر في الخطبة دي، ده ما سابش حد من عندنا ما جابش سيرته، جاب سيرة بن لادن (الشبح اللي هم عاملين يطاردوه) وجاب سيرة الخليج، وايران، وحسني، وايمن نور، وكان ناقص يجيب سيرتي انا واسماء بوابين العمارات بتاعتنا وسواقين الشغل والست اللي بتنضف البيت وصاحب الكشك اللي باشتري منه السجاير
هو احنا ح نفضل عايشين في الكابوس ده طول عمرنا؟
ومعلش حلوف مين اللي ما عندوش كرامة وما اتجرحش من الخطبة دي؟ خصوصا بقى اللي زعلوا من حسن نصر الله عشان قال للمصريين انتوا ناس محترمين ما يصحش تسكتوا على اللي انتوا فيه ده، ح يعملوا ايه بقى في اللي بيقول لنا ح اغير لكوا الريس بتاعكوا عشان فاسد ومش عاجبني؟ وللا الخواجة سره باتع؟ ده كان ناقص في اخر الخطبة يقول لنا: انا عارفك يا بتاع تانية تالت

41 comments:

مواطن مصري said...

نوارة الخططاب كلة كان

متركز على


النحية الاقتصادية
و ثانيا و دة الاهم انو هيحاول يصلح سياسة امريكا الي بقت في الارض ثالثا قال هيعتمد على الطاقة البديلة و دي مهمة في رأي

هو لسة ماسك نشوف هيعمل اية و اهو ربنا يهدي

اة فية ناس طالبة محاكمة بوش

عن جرائم تعذيب

Unknown said...

ده واد ابن قحبة نصاب

ده ربايتنا فعلا، مش ممكن ده متربي في اندونيسيا
ده متربي في المنوفية

مواطن مصري said...

هههههه

بس على الاقل نبص لشىء الايجابي شفتي منظر الجمهور

يشرح القلب سود و بيض و ناس من اسيا و مسيحين و مسلمين و يهود

mido said...

شوفتى المخنس بان كى مون بيقول ايه

:

بان كي مون يعرب عن صدمته من الدمار في غزة وسديروت

بيقول سيدروت هههههه

mido said...

هى مرات اوباما وحشة يا نوارة ؟

:))

السمار نصف الجمال

:D

Unknown said...

لا بقى انا عايزة افهم ايه الحكاية دي؟
:))
ايه حكاية مقاومة العنصرية على اساس اننا شق اللفت يعني

طيب انا لو قلت على مادلين اولبرايت انها شكل الجاموسة ح تردوا بنفس الحساسية دي؟

مرات اوباما مش حلوة لا
هو احلى منها كتير
وانا ما خطرش في بالي لونها خالص
ماهو زي القمر يعني، امال هو هابل الناس كده ليه؟
بس هي لبسها عجيب، والمظنبليط اللي عاملاه في شعرها ده عجب، مش لاقية كوافير يعمل لها شعرها كويس ولبيسة تختار لها لبس عدل بدل قمصان النوم الكتسور اللي هي بتلبسها دي

Unknown said...

الدمار اللي في سيدروت؟
بان كي مون ده معزز

مواطن مصري said...

نوارة مرات اوبما ست مكافحة

و بعدين بسيطة لا اشترت فستان ب 80000 دورر مثلا

Unknown said...

مافيش ارخص من التاييرات في امريكا
اي تايير سيمبل زي لبس هيلاري مثلا ح يبقى حلو ورخيص
انما ايه فستان عروسة المولد اللي هي لابساه ده
واصفر ليه؟ وبيلمع ومعمول ازاي ده عليه ايه ده؟ ايشارب وللا كوفية دي وللا ايه؟ والبت دي متجوزة القمر ده؟

حظوظ

مواطن مصري said...

ههههههههه الولية مرات اوبما اصلها جاية من الاريافففف
:)))

77Math. said...

لأ بقى معلش البنت أمورة كمان !

ولا انت متغاظة منها اكمنها يعني حرمة الرئيس ؟

بطلي بقى غلّ شوية

والراجل خطابه كله حنيّة

يعني بيقول لكم بابا هنا ياولاد .. وبيرتب الأمور قبل ما يرمم العالم

آه ياااااااااني

واحد بيتكلم عن ترتيب العالم كإنه بيعيد تنظيم غرف منزله مثلا

آه ياااااااااااا قلبي

77Math. said...

تصدقي بقى

ال
LABEL

دا طول عمري بقرأها بضمير المتكلم

دلوقت بس قلت أكيد قصدك أمريكا

بما إنك متعمداها كلها كابيتال


والله أعلم بالنيات يعني
!

Unknown said...

هههههههههههههههه

Shaker said...

بوست قوى
تحياتى ليكى يا نوراة

Unknown said...

77math
:(
لا بقى مش حلوة ومش عاجباني
بس
هه


lonely
شالله تسلم يا امير

77Math. said...

لأ ملكيش حق بقى

قولي عيب واحد بس فيها

اقنعيني بالعقل والمنطق والهئ المئ

!!!!

mido said...

مش عارف أعلق علي البوستات القديمة ! انت قفلاها

أسماء - فلسطين للأبد said...

يا إخوتى الذين يعبرون فى الميدان فى انحناء..
منحدرين فى نهاية المساء ..
لا تحلمو بعالم سعيد .. فخلف كل قيصر يموت .. قيصر جديد

ألف رحمة عليك يا أمل يا دنقل

Moh'd Shaltaf said...

فيديو عن غزة يجب مشاهدته
http://globaldayofaction.org/stopwar/index.php?option=com_content&task=view&id=966&Itemid=1

Unknown said...

77math
اولا بتلبس بيجامات كستور، وايه الترتر اللي هي لابساه ده؟ واصفر؟ اصفر؟ طب دي لو جابت تايير في السيل بميت دولار ح يبقى احلى من كده
ثم ايه كوافير سمير اللي هي عاملة شعرها عنده ده؟ ده مظنبليط، دي منزلة شعرها زي ماري ماتيو مش عارفة تسرح شعرها عدل؟ وبعدين ايه الكحل المشلفط حوالين عينيها ده؟ وايه الجوانتي الاخضر ده؟ وايه الجزمة دي؟ لابسة دولاب في رجلها؟

هو كان انطس في نواضره لما جه يتجوزها؟ وهو حلو قوي يا اوختشي وضحكته جميلة، ابخات، عقبال امالتك بقى والبت الكبيرة طالعة شبهها
الحمد لله ان البت الصغيرة حلوة

ميدو

مش قافلة التعليقات ولا حاجة
مين اللي قال كده؟

اسماء

بس احنا كان عندنا امل انه ينشغل في الازمة الاقتصادية مش يحط كل تفكيره فينا

لا ومركز معانا


محمود
ح اشوف الفيديو حالا ان شاء الله

77Math. said...

طيب كدا أقنعتيني بالهئ مئ

فين العقل والمنطق بقى ؟

ياساتر ع الحريم لما تتكلم ع الحريم

دا أكبر دليل إنها بتهتم بالجوهر مش بالمظهر

;)

77Math. said...

وبعدين ايه حكاية أوباما أمور دي ؟

مش أمور خالص خالص

جيمي أحلى حتى يا شيخة

ههههههههههههههه

ولا يكونش بيفكرك بدينزل واشنطن؟أكيد أكيد بتتلخبطي بينهم !!

Unknown said...

ههههههههههههه
اه

Kahramana said...

Of course, you're entitled to your own opinions. But don't you think that Obama or Bush for that matter are not the reasons we are where we're at, it's rather the lack of an Obama in the Middle East that sucks out all the joy and reason in our region.

Anonymous said...

SA
I don't love Obama as I mainly don't love people who's Ideology is very much different than mine, and didn't see nor hear the speech, but reading the parts you had put in your post I didn't feel that much of bad intentions, an advice always treat people that they have good intentions but with carefulness until they show or do the opposite, in a simple way don't take the candy from the stranger but don't treat him as he is only doing that to kidnap you.
P.S. that example is not about Obama in particular its a general advice.
2nd P.S. as always you are overreacting and only looking from one perspective although you might mention the other perspectives and always think that whatever you like is 100% good and whatever against that is 100% wrong and bad.

Unknown said...

كهرمانة
والله الولايات المتحدة شركة استعمارية راسمالية عسكرية مسئولة عن خراب العالم كله والاحتباس الحراري والازمة الاقتصادية العالمية

مستكترة ليه انها تبقى مسئولة عن مشاكلنا خصوصا انها محتلة نص العالم العربي وبتدعم ديكتاتوريات النص التاني والحرب الاخير، اللي ما اعرفش مين يشوفها ويفضل لسة معتقد يعني ان الولايات المتحدة وللا اسرائيل دول بني ادمين اساسا، كانت بالدعم الامريكي والسلاح الامريكي وسعادته كان مستخبي تحت الترابيزة


sa
لا الحقيقة انا مش اوفر رئآكتينج ولا حاجة انت اللي اعصابك هادية زيادة عن اللزوم وما اعرفش لو لا قدر الله كان لك حد في المدبحة اللي فاتت دي كانت اعصابك ح تبقى هادية كده برضه وللا لا؟
وبعدين ما تقرا الخطبة كلها انا حاطة اللنك بتاعها
وما اعرفش انهي بلد او امة تقبل حد غريب يكلمها كده
والله دي مسألة كرامة بقى

يقول أنى امرأة said...

نوارة شفتى قالو اية فى الجزيرة الصبح
قالو ان الجرحى الى جم مصر قالو ان الامن المصرى حقق معاهم و اعد يسالهم عن السلاح بتاع حماس و فين مواقعهم و انواع الاسلحة و قال لهم قولو لحماس احنا مش هنسبكم تفضلو كتير

يا فضحتك يا مصر

مواطن مصري said...

المهم في الحكومة بتاعت الحج اوبما الجديدة حكومة مش سهلة دي صعبة كفاية بيدين دة النائئب بتاعة طلع كان مستشار الحج كلينتور و هو الي خلى عرفات يسلم على رابين

مواطن مصري said...

http://www.alarabiya.net/articles/2009/01/20/64645.html

مسؤول دولي يدعو لمحاكمة بوش ورامسفلد بسبب سجناء غوانتانامو

Anonymous said...

هدى اللعب يا نواره
انتى معجبه بشكله الامور وكارهاه وكنتى خايفه عليه وبتقوليله اتنيل يا منيل

واضح انك كونفيوزد ابوت هيم
وكلنا متهيألى كده
خلينا نستنى وبعدين نحكم عليه
وعاوزه اقولك ان احنا ممكن نستنى لحد سنه تالته ورابعه، ماهو الريس بتاع امريكا ما بيبقاش راجل الا فى سنة تالته

على فكره انا استمتعت بتعليقاتى وشتايمك
يخرب بيت ام اللبط
لو انتى صحفيه امريكيه كنتى بقى ليكى جمهور ياما، وكانو جريو وراكى بالشوط، فرقه عاوزه تشتريكى عشان تلبى الريس وفرقه عاوزه تشتريكى عشان تجخى للريس
وانتى فى النص محتاره،

Unknown said...

لا حضرتك انا مش كونفيوزد ولا حاجة
انا عمر ما الرجالة الحلوين عرفوا يضحكوا عليا
:))

Anonymous said...

جرى اية يا ست نوارة
مش عاجبك لبس الست حرمة المصون
معلش
لسة بيئة
اصبرى بكرة تنضف وتتعلم
كلهم بيبقو كدة فالاول
زى ناس كدة
واخدالى بالك
اول ما يمسكو
تلا قيهم مفصلين افرولات ميرى فساتين
وبعد كام سنة
ينضفو ويتعلمو
وتبقى سفارتهم فى فرنسا
ملهاش شغلة ولا مشغلة غير انها تشترى لبس وجزم للست هانم
السيدة الاولى
صح برضة ولا لا




احمد سعيد

Anonymous said...

التسوق للمسؤلين هو اهم واجبات السفارت المصرية فى الخارج على الاطلاق

Fatma said...

ما ضايقنيش الخطاب كله على بعضه وما حللتوش بالشكل دا بصراحة

رئيس امريكا الجديد يعني انا توقعت يقول اوسخ من كدا مليون مرة

انتي الظاهر نسيتي

وبعدين الراجل مشكور بردو جاب سيرتنا بالخير وماشكرش في اسرائيل زي عادتهم ولا جاب سيرتهم من بابه

حفل التنصيب كله على بعضه يصيب البني ادم بالحسرة على نفسه وحاله وحال بلده وحال العرب والمسلمين

من كام سنة فاتوا كانوا السود ممنوعين من ركوب الاتوبيسات دلوقتي بقى واحد منهم رئيس الولايات المتحدة

شاب اسمر اصوله مسلمة ..مين كان يصدق !

مش قادرة اداري حسدي ولا قادرة اتغلب على حزني علينا
دا بشكل موضوعي بعيدا بقى عن اني مستنية من وشه حاجة
امريكا هي امريكا وسياستها واحدة مش هتتغير بس اسلوب التنفيذ هيبقى مختلف واكيد اي جاموسة بعد بوش هيبقى رحمة للعالم

والواد مز يا نوارة بردو وضحكته تجنن ومنظر الامريكان وهما واقفين جنب
بغض على اختلاف توجهاتهم :(
انا زعلانة علينا والله اوي

اوي

Fatma said...

اه صحيح

مراته مش حلوة ولبسها مريييييييع ايه المهرجان اللي هي عاملاه دا ؟؟؟

سبحان العاطي الوهاب

سارة نجاتى said...

نوارة

انتى متحاملة بشكل مبالغ فيه

أنا معيار حكمى على خطاب تنصيب رئيس الولايات المتحدة هو أثره على الأمريكان ثم علينا
أهل بلده حابينه , و مفيش رئيس عربى يقدر من خطبه لا تزيد عن عشرين دقيقة تخلى الناس تتفاعل معاه و تبكى بالشكل ده
ثانيا كلامه بشكل لفظى مفيش فيه أى حاجه , انتى لو تلاحطى فى كل انتقادك مركزة على نواياه المحتملة أو على سياسات بوش اللى سبقه
الراجل ماله و مال أفغانستان , ده غير انه مش قال فى حقهم حاجه , و ماله و مال غزة , ده مش عدى على توليه المنصب أربعة و عشرين ساعة

أنا عارفة أن مفيش ملايكة و ان دى أجندة ماشيين عليها , لكن على الأقل الحزب الديموقراطى بشكل عام لا يميل للحلول العسكرية بسهولة

و بعدين لما يقول

To the people of poor nations, we pledge to work alongside you to make your farms flourish and let clean waters flow; to nourish starved bodies and feed hungry mind

ده احنا نصقف له حتى و ان كان كلام فض مجالس , بذمتك مين حاكم عربى أو غير عربى حالى قال خطاب تنصيب زى ده , و هو لم يشير لأى خطط أو برنامج معين فى كلام , كلامه عام جدا , و ليه تحميله دلالات لا يتحملها, أنت مستنية له و لا ايه؟؟ههههههه

على عموم ده رأيى و تحياتى

سارة نجاتى said...

ايه الناس اللى عماله تقول مراته مش حلوة ده , انتوا ح تناسبوها ؟؟ههههههه

ده واحدة خريجة ستانفورد أو حاجة زى كده

مسلم مصري said...

معقولة والدك عمل كدة فعلا. ولا إيه حكاية الموضوع.

نقلا عن المصريون:
http://www.almesryoon.com/ShowDetails.asp?NewID=59107&Page=1

خصص حلقة "لهز الوسط" في قناة صديقه "ساويرس".. أحمد فؤاد نجم يطالب وزير الثقافة بإنشاء نقابة للرقص الشرقي في مصر باعتباره ثروة قومية


كتبت مروة حمزة (المصريون): : بتاريخ 20 - 1 - 2009
لم يجد الشاعر أحمد فؤاد نجم، قضية تؤرقه وتشغل اهتمامه في هذا الوقت الذي تموج فيه مشاعر الغضب جراء المذابح الدموية في غزة، أكثر من المشاكل التي يواجهها الرقص الشرقي في مصر، بسبب عدم وجود نقابة ترعى الراقصات، وتعمل على حمايتهن، والحفاظ على هذا "الفن" من الاندثار.
ما جعله يتبنى الدعوة عبر قناة "أون تي في" الفضائية، المملوكة لصديقه رجل الأعمال نجيب ساويرس، لإنشاء نقابة خاصة بالرقص الشرقي، خلال حلقة من برنامج "قول يا مصري" استضاف فيها الباحث في الرقص الشرقي الدكتور سمير جابر، والراقصة الشهيرة نجوى فؤاد، وراقصة مصرية اسمها "جي جي"، وأخرى برازيلية من أصل لبناني اسمها "دندش"، وفنلندية اسمها "أوتي".
وعلى نغمات أغنية "الحلوة داير شباكها شجر الفاكهة وورد البساتين"، وعبارات نجم "إيه الحلاوة دي ياد، إيه الطعامة دي ربنا يحميكي.. ياللا هزي"، قدمت أوتي الفنلندية الرقصة الأولى مرتدية بدلة رقص خضراء ساخنة، وقدمت بعدها دندش وصلة رقص ببدلة حمراء أكثر سخونة على ألحان موسيقى رقص شرقي، وكل وصلة امتدت نحو عشر دقائق وختمت المصرية "جي جي" الحلقة مرتدية بدلة زرقاء لا تقل سخونة وإثارة عن الأخريات، ورقصت على نغمات أغنية "ع الحلوة والمرة".
وبعد انتهاء كل راقصة من وصلتها جلست بجوار نجم الذي حياهن على طريقته، وأعطى لكل واحدة قبلة على وجنتيها، وأنصت باهتمام بالغ لمشاكلهن، فالفنلندية طالبت بإنشاء مدرسة مصرية للرقص الشرقي كما في كل أنحاء العالم، على أن تكون تابعة لوزارة الثقافة حتى لا يندثر هذا الفن التراثي.
بينما طالبت "جي جي" بنقابة "تحمينا مثل الممثلين.. نحن الراقصات نطالب بجهة تحمينا وترعى حقوقنا"، أما دندش فدعت المسئولين في مصر إلى الاهتمام بفن الرقص الشرقي "لأنه مهان في هذا البلد رغم أنه فن مصري أصيل".
شكاوى الراقصات كادت تسيل دموع "الفاجومي"، وهو يقول "والله حرام يا جماعة، علينا أن نحافظ على هذا الفن الجميل، أنا سأكتب في هذا الموضوع، كل حاجة حلوة في حياتنا في ناس بيحاولوا يدمروها ويمحوها، والرقص الشرقي فن مصري أصيل، حتى أن الزعيم عبد الناصر كان يحضر حفلات فرقة رضا"، لكنه توقف عن الاسترسال، "حتى لا ألخبط وأدخل نفسي في مشاكل".
وبعد أن امتلك زمام لسانه، توجه بالدعوة إلى وزير الثقافة لإنشاء نقابة خاصة بالرقص الشرقي في مصر، "عيب ما يحدث لراقصاتنا ليس لديهم جهة تحميهم، وفي أمريكا هناك راقصات بورنو لديهم نقابة تحميهم، نحن نطالب بنقابة للراقصات، ونطالب بحماية هذا الفن المصري الأصيل".
وعقبت نجوى فؤاد بعصبية شديدة: "الناس ترى أن الرقص عيب، ويحاربون بدلة الرقص، وأقول لهم انظروا للبنات في الساحل الشمالي بالمايوهات البكيني أليس عيب؟!!، بدلة الرقص أكثر احترامًا من المايوه، والرقص ليس فيه إثارة، بل فهو فن وهو يعتبر تمارين ،وعلاج للروح والجسد".
وأضافت: "أنا درست الرقص الشرقي لراقصات غربيات، وهناك يحترمن الرقص الشرقي أكثر منا، نحن في مصر نحتاج لمدارس معتمدة من وزارة الثقافة، وأقوم أنا وفيفي عبده وغيرنا من الراقصات المعتزلات بتدريب الراقصات فيها والإشراف عليها، وأيضًا نطالب بمعاهد للرقص لأنه فن علينا الحفاظ عليه".
وتحدثت عن تاريخها الطويل في الرقص، وكيف أنها كانت ترقص أمام الرئيس الأمريكي الأسبق جيمي كارتر الذي قالت إنه انبهر بها عندما رآها ترقص، "كارتر كان يأتي لمصر ويطلب نجوى فؤاد بالاسم كي ترقص له، لأنه انبهر بأدائي كراقصة".
أما الباحث الدكتور سمير جابر، فاستعرض تاريخ الرقص الشرقي في مصر الذي قال إن جذوره تمتد إلى المصريين القدماء، مؤكدا أن "الفراعنة هم الذي ابتدعوا الرقص، قبل سبعة آلاف سنة، والآن في كثير من المستشفيات يستخدمون الرقص كعلاج للاكتئاب بدلاً من المنوم والأدوية، وأصبحت المريضة بالاكتئاب تنام بعد وصلة رقص بدلاً من المنوم، والرقص أكثر شيء يخرج الإنسان من همومه".
وأضاف "الرقص الشرقي فن مصري أصيل وبه أكثر من أسلوب وأكثر من أبجدية فنحن الآن رأينا ثلاث نماذج للرقص وكل نموذج يختلف عن الآخر، ولو رأينا عشر نماذج لاختلفوا أيضًا عن بعض لأن الرقص الشرقي متجدد ومتنوع الأسلوب"، وبحسرة بالغة بدت على وجهه، قال "للأسف نحن أهملنا هذا الفن التراثي الجميل، بينما اهتم به الغرب، كما أهملنا الأهرامات ولم نعرف قيمتها إلا عندما جاء الغرب لزيارتها وانبهروا بها، فهم أيضًا انبهروا بالرقص الشرقي وأعطوه حقه رغم أنه ملكنا نحن".
وبسخريته المعهودة، سأل نجم الراقصة الفنلندية: كم تعداد الشعب الفنلندي؟ فأجابت نصف مليون، فداعبها قائلاً: "أرقصوا حتى تتكاثروا ويزيد عددكم"، وسأل "دندش": قالوا أنكم تزاحمون الراقصات المصريات وبتقطعوا عيشهم؟ فردت: "أبدًا نحن أتينا لمصر كي نتعلم أصول الفن وقواعده الصحيحة ولن نزاحم أحد".
وعندما قال للراقصة "جي جي": إنكم تلعبون على الغرائز، الجنس يعني؟، ردت بالرفض القاطع: "الرقص الشرقي فن أصيل ولا نلعب على الغرائز ولا الموضوع الجنس اللي قلت عنه ده، نحن محترمات".
وغنت نجوى فؤاد أغنية "الليلة مصر المحروسة بتزفك يا أحلى عروسة "، وطلب نجم من الراقصات الحاضرات أن تقوم لكي ترقص "خلوا القاعدة تحلو"، وبعدها أنشد قصيدته:
سلمي يا عزيزة على الأستاذ
فنان اليوم والمستقبل
البنت السنيورة الأمورة
على فكرة بترقص ممتاز
أرقصي يا عزيزة ما تكسفيش
يا عزيزة النيزة كونيزة
تك تم تك تم تك تم
الرقص النقص يزيح الهم
ويخلي القاعدة طرية يا عم
وعزيزة النيزة كونيزة بتحب الرقص
تك تم تك تم تك تم

سارة نجاتى said...

أنا معلش ح أعلق على مسلم مصرى
و مبدئيا أن لا أرعف نوراة و لا شفتها و لم أعلق عندها غير مرتين , لكن اللى أنت بتقولى ده يندرج تحت بند و لا بلاش عشان مشأخد ذنوب ع الفاضى
و انت مالك شاعر الكبير أحمد فؤاد نجم يعمل ايه ؟ غير المحطة يا حبيبى لو مش عجبك , و بعدين دى مدونة نوارة و لا مدونة أبوها , و كل واحد حر فى أرائه و قناعاته, و الطريقة اللى عرضت بيها رأيك مش طريقة "مسلمين " و لا أى حاجة خالص , دى نفسنة , الراجل دهقضى حياته فى السجون عشان كلمة الحق ,و ده اللى لينا عنده , عملت ايه زيه أنت ؟؟ كتبت شعر مساوى له ؟؟و لا عملت ايه لبلدك و قلت كلمة حق فى وجه الظلم ؟؟ ده واحد زيه فى أى بلد تانية كان الناس شالوه على راسهم , أنت مصرى يعنيك هو عمل ايه لمجتمعه , و ازاى أثرى القضايا الوطنية و ازاى أثرى الشعر و الأغنية الوطنية , غير كده لأ , و بعدين زى ما قلت ده رأيه , تبقى غلطانة يا نوراة لو رديتى عليه .
أنا بدافع اعجابى الشديد بعمنا نجم بس ضيعت وقتى فى الموضوع , ياخويا روح اكتبلك كلمة نافعة تعترض بيها , بدل ما أنت جاى بتسأل سؤال مالهوش اجابات , صحيح يا نوارة ؟ أه صحيح يا حبيبى , روح اعمل حاجة مفيدة بقى لنفسك و لغيرك

Anonymous said...

نواره
بطلى ظلم ياشيخه
ميشيل فيها مسحة جمال
يعنى ماهياش بعبع كده
بس فعلا" لبسها
يع
كخخخخ
أففففف
ياااااااى
وبالنسبه لأبوبو فهو هايدى العالم كله بالجزمه بس بالأدب لأنه منوفى ومتعلم زى مانت قلتى

camillou said...

عايز اسئلكم على حاجة ... اية السر فان العالم كلة عايز يحمى اسرئيل باى تمن ؟ هل عشان هم اساسا العالم كلة
يعنى اسرئيل اساسا شعب اوربا المهجلر ولسة ليهم عائلات ومصانع وشركات فى اوربا والعالم كلة . ولا عشان هم متعلمين ومثقفين واحنا اغلبنا جهلة؟
ولا عشان هم ديمقرطيين واحنا امن مركزى وعايزين تكون اسرئيل النوة لزراعة الديمقرطية والدولة المدنية .. ولية هم متهضين الدول الاسلامية عشان مقامة على اساس دينى علما بان اسرئيل دولة يهودية مقامة على اساس دينى بردة
ياريت ياجماعة حد يكلمنى على الشات ويفهمنى عشان انا زهقت من التفكير لوحدى....moh0007@hotmail.com