Saturday 10 January 2009

بعض اسماء الناس اللي اتمنعنا امبارح بسببهم

طبعا انتوا عارفين ان امبارح كان فيه مصادمات بين الامن والاهالي في العريش
عشان كده حطوا لنا جيش الامن المركزي ده قبل مدخل العريش بشوية، مش عند بير العبد، احنا كملنا بعد بير العبد بصحبة التشريفة الامنية، لكن الامن مشى بتوع العاشرة مساء من عند نقطة بير العبد وكمل معانا
اتقبض على تلاتة وخمسين واحد من اهالي العريش بعد ما عدموهم العافية ضرب. احنا مش قلنا بلاش الطريقة دي مع اهل سيناء؟ مش قلنا مافيش حاجة اسمها بدوي ينضرب؟ على نفسها جنت براقش
مش كفاية سايبينهم في مستوى معيشة ما يفرقش كتير عن مستوى معيشة اهل غزة اللهم الا في الاحتلال (والواحد برضه مش عارف الفرق في النقطة دي مؤكد وللا لا)، ولا بيعملوا لهم خدمات، ولا بيهتموا بيهم، والحالة ضنك، والعريش دي اصلا خارج حركة التاريخ، من ساعة ما سابها اليهود وهي زي ما هي، واتهامات طول الوقت بانهم خونة، انا مش فاهمة على اي اساس يعني اهل العريش خونة؟ مش الناس تبص في المراية قبل ما ترمي بلاها على غيرها؟ ويوم ما يفتكروهم ينزلوا فيهم ضرب عشان بيتضامنوا مع اهل غزة
ندى القصاص دلوقت في العريش (بنت المحظوظة) وكلمتني عشان تمليني كام اسم من اسماء المقبوض عليهم ومنهم من عائلات كبيرة ومعروفة زي حمدان وقويدر والبلك والحفني وعابد، يا اخوانا ما ينفعش كده، مش ح ينفع كده، اللعب مع الاسد مش كويس
اليكم الاسماء
باسم جمال محمود
(مواطن فلسطيني مقيم في العريش وفي ثانوية عامة وعنده امتحان بكرة)
شريف احمد ربيع
يونس عبد السلام يونس
عبد السلام محمد جمعة عابد
محمود علي عبد الحميد
محمود محمد حمدان
ياسين محمد السيد السيد
عبد الله حلمي محمد
اشرف ابراهيم الحفني
(امين حزب التجمع بشمال سيناء)
اشرف منصور قويدر
صلاح الدين مصطفى البلك
(صحفي بالمصري اليوم)
علاء الدين حسن قويدر
قال وهم اللي متهمين بانهم اعتدوا على الامن واحدثوا فيهم اصابات
!!!!!!!!!!!
ازاي؟ الله اعلم، ده ندى بتقول لي وهي داخلة العريش شافت بالعدد تلاتين عربية امن مركزي خارجة، يعني لو كل عربية مسكت لها خمسة طحنتهم يبقى الامن عدم 150 مواطن العافية على الاقل
عشان لما نقول لكوا اهو ده اللي صار وادي اللي كان تصدقونا
وكمان متهمين بتوزيع منشورات، وواخد من ضمن الاحراز البيان بتاع اللجنة الشعبية للتضامن مع فلسطين اللي اتنشر على النت وعاملينه منشورات!
لما تجيلي اسماء او اتهامات تاني ح اقول لكوا

8 comments:

Anonymous said...

احمد سعيد
والله العظيم يا نوارة دة وقت الفرصة الذهبية للشعب المصرى انة يثور بجد النظام دلوقتى فى اضعف حالاتة
ولو نجح الشعب انة ينضف البلد ويجيب ناس تجرى على مصلحتة
وعرفنا من العدو من الحبيب
وعملت مصر تحالف مع ايران وسوريا وتركيا واتعونت مع كل حركات المقاومة فى المنطقة
بجد والله التاريخ هيتغير مش خريطة المنطقة
لاالتاريخ كلة
وساعتها امريكا مش هتقدر تتدخل عسكريا لان حبيبة قلبها سرائيل بقت بين المطرقة والسندان
حزب الله وسوريا من ناحية
وحماس من ناحية
ومصر من ناحية
وايران من ناحية
ساندوتش كومبو
بجد الكورة دلوقتى فى ملعب الشعب المصرى والمعارضة
وياريت يتحدو ويسبوهم من شوية الشعارات الفارغة اللى مفرقاهم عن بعض
وعمنا المهدى عاكف يفوق بقى لنفسة ويبطل فكرة معركة النفس الطويل لانها بتضرالاخوان نفسهم فى المقام الاول
لو كلكم بتحبو مصر اتحدو علشان خاطر مصر وعلشان خاطرعيالكم اللى جايين عالاقل
وماتخافوش من المليون وسبعميت الف عسكرى بتوع الداخلية
لان النظام ضعيف وجبان ومش هيحارب لحد النفس الاخير
وللعلم اثناء هوجة المحلة اللى عملها حيين بس من احياء المحلة وجمعولها فرق الامن المركزى فى الدلتا كلها وبعض فرق القاهرة علشان تقمعها وفشلت

كان كعبول هربان فى شرم الشيخ وبيجهز نفسة علشان يفلسع لو الامور اتطورت اكتر واهو فركة كعب من حبايبة فى تل ابيب
واللة واللة النظام اضعف مما تتخيلو
والجيش اللى بيجهزوة علشان يرد فى حالة فشل الامن المركزى
مشكوك فى ولاء قطاعات كبيرة منة للنظام
علشا ن كدة بيخافو يدخلوة فى اىمشكلة
لانهم مش ضامنين لما ينزل القاهرة هيعمل اية ولا ولائة مع مين

وياشعبى متستنوش الجيش يتحرك لانة مش هيتحرك الا لما تتحركو

ولو اتحرك لوحدة مش هيبقى علشان خاطر سواد عيونكو بل علشان يركب ولامؤاخذة
الكورة فى ملعبكم دلوقتى وياريت بقى تبطلو شغل المظاهرات بتاع سلم النقابة اللى بيزنوقوكوا فيها فى الحيط وبيشبعوكو ضرب وتلطيش
حان الوقت انكو تغيرو اسلوبكم
ولو دة محصلش دلوقتى هتكون الصورة كالاتى

جيمى يحكم مصر بدعم امريكى اسرائيلى بريطانى
بعد ذهاب عوكل فى رحلة بلا عودة الى قاع جهنم لعقد مباحثات دائمة مع قرينة فرعون وابو لهب


تعداد قوات الامن المركزى يتذايد ليصبح 5مليون
معطفرة نوعية وكمية فى التسليح بدعم من اسرائيل وامريكا تضعة على راس قوات مكافحة الشغب الاكثر بطشا فى العالم

تضاؤل تسليح الجيش بالتدريج واعادة تسمية وزارة الدفاع بوزارة الاشغال
وتشوين الدبابات المتهالكة وتحويال الجنود والظباط لزراعة الفجل والقراط فى اقطاعيات رجال الاعمال الشاسعة

انهيار البنية التحتية وتخلى الحكومة بالكامل عنها
مافيش مية
مافيش كهربا
مافيش غاز لانة خلص على اسرائيل
اللى عايز يشرب يشرب من البحر
او الترعة
اللى عيز يطبخ الفرن البلدى موجود وانضف و
أأمن والجلة كتييير
اللى عايز يعمل زى الناس ولامؤاخذة يحفر ترنش تحت بيتة زى زمان
اللى عايز كهربا يشترى مكنة توليد من المكن اللى السيد الملياردير هباش الحرامى لسة جايبها برخص التراب من الكونغو

حل وزارة التعليم والتربية
واستبدلها بكتاتيب اهلية برعاية واشراف المواطنين انفسهم لتعليم مبادىء الكتابة واساسيات الجمع والطرح

الغاء التامينات
الغاء المعاشات
الغاء الدعم
الغاء التامين الصحى
حل وزارة التموين

بيع سكك حديد مصر لمستثمر اجنبى يلغى قطارات الدرجة التالتة والتانية
ويستبدلها بدرجو اولة فاخرة بسعر 1000جنية للتذكرة

بيع المترو

الغاء مرفق التقل العام
هدم المعتقلات نظرا لسياسة الداخلية الجديدة التى تقوم على تصفية المعارض بدلا من المحاكم والسجون ووجع الدماغ
والبلطجية المجهولين والمختلين عقليا كتير
وصحرا المقطم والتجمع الخامس واسعة والحمد للة

حل نظام القضاء الادارى لمخالفتة مواد الدستور(المعدلة)

حل المحكمة الدستورية العليا لمخالفتهامواد الدستور ايضا

تشكيل عصابات اجرامية قوية النفوذ داخل مصر
يمتد نفوذ هذةالملشيات لتسيطر على مدن باكملها سيطرة كاملة وتفرض الجزية على المواطنين من اى ديانة بعد فتوى من زعيم العصابة

حل الازهر الشريف وقرار رئاسى لتحويلة لتكية تسمى بتكية الشيخ طنطاوى تقديرا لمجهودة فى اتلاف هذة المؤسسة

القوات الخاصة الامريكية تنفذ عمليات داخل مصر بدعوى القبض على ارهابيين مطلوبين دوليا

طرد العمالة المصرية من كل الدول العربية

قوات من الداخلية تطلق النار عشوائيا على المواطنين داخل محطة مصر مسببة مقتل 1500 مواطن بسبب خلاف على سيجارة ووزارة الداخلية تستنكر الحادث وتطالب اهالى الضحايا بتعويض


الغاء القطاع العام بالكامل واللى مش عاجبة يشرب من البحر

مظاهرة على سلم نقابة الصحفيين وقد تعامل معاها الامن بالرشاشات والقنابل اليدوية

اعلان تكوين الاتحاد الفيدرالى المصرى الاسرائيلى

افراد من الشعب المصرى يكونون عصابات ضخمة من المفلسين تقوم بغارات على عزب السادة البهوات بغرض اقتحامها والاستيلاء على الاطعمة واللحوم

الاعلان عن تنظيم يقوم اعضاؤة باستهداف ابناء الطبقة الراقية بالقتل

بناء جدار عازل يفصل مصر لقسمين لتامين الاثرياء من هجمات عامة الشعب من الرعاع والجياع على قصورهم وضياعهم


وكالة انباء المانية تعلن عن قيام النظام المصرى باستخدام اسلحة كميائية وبيولوجية فى الجانب الفقير من الجدار العازل بهدف القضاء على من فية من السكان

الولايات المتحدة تعلن ان مايحدث بمصر من ابادة شأن داخلى لا يجب التدخل فية


الزعيم الخالد جمال يعلن اثناء ترشيحة لفترة رئاسية عاشرة
مستمرون فى خطة التنمية
هدفى الاول هو دعم معدوم الدخل
الحزب الوطنى يتبنى حملة تربة لكل مواطن عن طريق عقد مسابقات تلفزيونيةفى برنامج التربة تربتك للاعلامى اللامع اياة
المواطن فقير الكحيان يرقص طربا لفوزة بمقبرة 50سم مربع ويتقدم بخالص الشكر للسيد الرئيس اللى تاعب نفسة معانا وحنا احياء وحامل همنا بعد منموت


انا مش ببالغ على فكرة
احمد سعيد

Ahmed elshebli said...

eh da
enty nasheeta 2awy
ana wallahi ba2eet adkhol 3ala elblog bta3ek awel mafata7 3enaya 3ashan a2ra masr 3amla eih
rabena ywafa2ek

Unknown said...

bosy da mesh t3ly2 3la modo3yk bs ana kont a3yd faty7 al msn labya ola 3lya we a3yd atfrg 3la al gzyra we ashof al blaoy aly bt7syl l2yt wa7da a3rfha b3taly al viedo da http://www.youtube.com/watch?v=GEXvc1_vVEg&feature=related we b2oly "see our isrelian soliders dont hate kid and dont wanan kill them .." we shoyt klam mlosh ay lzma manbny meno 3'yr an damy at7r2 zyada mesh 3arf ana damna da hyfdl kol shoya yt7ry2 l7d amta .. al mohm ana msktsh we adytha men al mn2y ya ...... we tl3t 3ynha al viedo 3ndk aho ab2y atfrgy 3lyh we a2olyly ayh rdk ab3tholha be al mara :@

Empress appy said...

ما قولت لك مينفعش يلعبوا مع الاسد هما اللى هيجنوا على نفسهم هما حرين ويرجعوا يعيطوا تاني طيب بيقرفونا ليه
بصي يا ستى الناس فى سينا عايشين حلو مفيش غير مضايقات الزفت المقرفين الامن
لان طبعا كل شويه يقولك بيهربوا وبيعملوا طيب اهل سينا ورفح والعريش معتبرين الفلسطنين امتداد لاهاليم هو ده عيب عيب حد يقولى بقى يعنى لو عيب احلف لكى ان فيه بيوت فى العريش بيبتدي بيها نفق وينتهي فى غزه واسالى وفى رفح المصريه
بصي يا نواره العريش فيه عائلات كبيره وقابيل محدش بيهزها والامن بيعمل لها حساب لان هما عارفين الناس دي بتعمل ايه
وعندهم ايه
بس فعلا اللى مهضوم حقهم اوي العوائل الصغيره ودول اللى بيحتضنهم الكبار وبياخدوا حقهم فى اي وقت
الناس فى سينا عاوزين الامن يرفع ايده عنهم ويسبهم تحكمهم الاعراف لان اقسم لكي بالله ان الاعراف بتطبق احسن وافضل واعدل من ميه الف قانون وكلمه الراجل او الجد بمعنى اوضح سيف على رقب كل الشنبات اللى فى العيله سواء فى قتل فى سرقه فى اي حاجه فى الدنيا لان دول ناس عندهم حكم ربنا والشرع اقوي ويا ويله اللى بيقع تحت ايديهم طلباتهم برضه الامن يسقط القضايا الملفقه اللى عملها لناس كتير اوي وكبروا بالامن قبل كده وقالوا لهم ادخلوا حلوا المشاكل معرفوش ووقعوا الناس فى بعض اكتر
انا مش هقولك بيقولوا خونه وبتنجان بس فيه شواهد فى المخابرات والدخليه من ايام الحرب بتدل على مين اشرف ناس ومين اللى دافعوا ومش هنقول كلهم لان فيه اللى كان وحش بس مش من القبايل الكبيره
وبكره دول يطلعوا وهتقولى البت بتنجانى قالت

Empress appy said...

وبعدين تعالى هنا انا لسه واخده بالى انتي كاتبه فى البوست بير بير ايه
بير السلم فيه حد مش عارف بير العبد عااااااااا حرام عليكي لو كتا شوفت البوست كنت دخلت عضيتك من مراخييرك دي اصل العيله لها جزء هوناك

Anonymous said...

الحمدلله على سلامتك يازعيمتنا

Mafrousa said...

مع ان المفروض ان اهل العريش لازم يكون ليهم مكانة خاصة جدااا من قبل كل المصريين
لانهم همه اللى فى وش المدفع
يعنى همه خط الدفاع الاول
فلازم يحتضنوهم و براضوهم و يكسبوهم فى صفهم(انا اقصد الحكومة تعمل كدة مع اهل العريش)
و تصدقى كل المصريين لازم يعملوا كده
بس احنا اصبحنا بنخون كل الناس
مش اهل العريش و بس
بقينا نخون اي واحد عاوز يعمل حاجه كويسة فى العريش
من رعب الناس انهم حاسين ان اسرائيل ورا اي مشروع بناء بيتعمل فى العريش ولا فى سيناء
و لا من خوفهم انه يتباع بعد كده للاسرائيليين
ربك يستر يا نوارة و يخيبوا ظنوننا و يكونوا كلهم وطنيتهم عالية
مصر بتاعتنا احنا
مش بتاعة ولا الريس ولا الوزراء
مصر لولادها
بس يحبوها و يحافظوا عليها و يحموها

حسن على said...

يا نوارة يابنتى مصر تحت الاحتلال فعلا الان وامس وقبل ذلك ... الامن المصرى يتعامل مع المصريين -اللى من غير واسطة- معاملة قوات الاحتلال الاسرائيلة مع الفلسطينين. الريس يلزمة كتائب امن مركزى عند ذهابة من غرفتة الى الحمام ليلبى نداء الطبيعة. مليون وسبعميت الف جنود وضباط الداخلية لحماية النظام من باقى المواطنين.حالة الهيستريا والخبل الامنى والذعر الرسمى الشديد تتفاعل وستقتلنا جميعا فى النهاية. القضاة واساتذة الجامعة وطلبتها والصحفيين والمدونين والناشطين وجمعيات حقوق الانسان جميعهم يعاملون معاملة المجرمين وهم على قوائم ترقب الاعتقال.وكأن مصر دى كلها عزبة حسنى افندى مبارك اللى قاعد على قلبنا وكل الناس الباقيين كومبارس صامت لو تجرئوا ونظروا الى الكاميرا او احتجو يتم ضربهم وسحقحم واعتقالهم.الدولة تحتضر وجنون مماليكها يزداد والقانون فية زينب فى كل مادة .والى اهل غزة قلوبونا معكم ونحن محتلون مثلكم من يهودنا نحن ...ويهوذا يخوننا ويبيعنا كما يخونكم ويبيعكم بابخس الاثمان ويفعل ذلك من الوضع ساجدا للأسرائيلين والغرب ومن الوضع منفوخا على الشعب الذى "اجرة"لوظيفتة ويدفع لة تكلفة الحرس والقصر والمزازيك وحملة المزاريق والسجاد الاحمر... حتى كلسون الرئيس-لامؤخاذة عشان قلت الرئيس-من اموال الشعب المحتل من جحافل الامن المتراصة كالذباب فى كل ماكان. ملحوظة:احمد سعيد قال قوالة جميلة وفصيحةواحيية