Sunday 11 January 2009

انا مش عايزة غباوة

واحدة طالعة في الجزيرة، من المتظاهرين العرب في احدى الدول الاورومبية بتقول هتلر قال انا تركت عدد قليل من اليهود في العالم ليعلم العالم لماذا كنت ابيدهم
!!!!!!!!!!!!!!
طب وحياة النبي السيدة في ضهر اي حد في الليلة الكحلي دي مش طالبة غباوة خالص يعني، احنا مش ح نقعد نلف وندور في نفس النقطة، وطالعة وتعابة نفسها وسط المظاهرة عشان تقول الكلمتين القطران دول على دماغها
ما هم برضه بيقولوا العرب يستاهلوا الابادة، وما احناش علينا النطلة قوي عشان نبقى عنصريين، ايش حال مضروبين بالجزمة من اللي رايح واللي جاي؟ 
اللي ما بيعرفش يتكلم ما يتكلمش، واليهود دول بني ادمين زي اي بني ادمين، وفيهم كتير قوي مش صهاينة، واللي منهم ضد الصهيونية بيبقى ضدها بقوة اكتر مننا وبيقول كلام مافيش ولا عربي يجرؤ يقوله، ومن مختلف التوجهات شمال ويمين، والمفروض اننا ضد اسرائيل عشان دولة عنصرية وهي الدولة الوحيدة في العالم اللي عملت من الدين عرقية وجنسية، نقوم نعمل زيهم؟
طب ماهو التأكيد على ان اليهود كتلة واحدة كلهم زي بعض (سواء كويسين وللا وحشين) ما اللي اتنين بيخدموا الصهيونية وبيصبوا في مصلحتها، ويبقى اليهودية فعلا بقى عرقية وجنسية مش بس دين، مدام كلهم حاجة واحدة، ويبقى لهم حق يبقى لهم دولة خاصة
اذا كانوا كويسين يبقى هم بقى فوق البشر ولهم دولة لوحدهم
واذا كانوا وحشين يبقى اعزلوهم بقى في دولة لوحدهم عشان يكفوا اذاهم عن الناس
ايه التخرييييييييييف ده؟
اليهودية زي الاسلام والمسيحية والبوذية واي ديانة تانية، اتباعها (خصوصا اللي مولودين على الديانة) كل واحد فيهم له جنسية وعرقية منفصلة عن الدين،
ابوس ايديكوا نركز شوية، الدين دين، والبلد بلد، والعرق عرق ومافيش نقاء عرقي في الدنيا كلها، والقومية قومية، والتوجه السياسي توجه سياسي، كل حاجة من دول لوحدها خاااااااااااااااالص، والبني ادمين بني ادمين، ما بيبقوش وحشين غير لما يحتقروا غيرهم، ولما يحتقروا غيرهم يقوموا يبيدوا غيرهم، وده بيبقى له اسباب في مخ الواحد مش بيرضعها من امه ولا بتبقى موجودة في الجينات
وهتلر ده ابن ستين كلب مخبول وهو اساسا السبب في كل القرف اللي احنا فيه، وهو كمان السبب في ظهور مرض الصهيونية وجنانها ده، ومش ح يكره اليهود ويحبنا احنا مثلا، ده راجل خلل كان بيقعد يسخر علماء المان عشان يثبت ان الجنس الاري اذكى الاجناس والجنس اليهودي غبي ومريض عقليا وخلاهم يعملوا قائمة بحاجة اسمها امراض اليهود، كل ده غير المحرقة، وكانوا بيكتبوا على المحلات: ممنوع دخول الكلاب واليهود، واللي اتعمل فيهم فوق طاقة البشر ولا حتى اتعمل في الافرو امريكان وماحدش يرضى بيه واللي يرضى بيه يبقى يرضى باللي بيتعمل فينا
واللي ضد الصهيونية - سواء بقى غير يهود او يهود وكان لسة في المظاهرات نفسها طالع حاخام بيحرق باسبوره الاسرائيلي - بيحللوا الظاهرة دي بانها عنصرية مضادة ورد فعل مرضي للي عمله هتلر
مافيش حاجة في الدنيا اسمها مجموعة ناس وحشين عشان عرقهم وللا دينهم والا نقبل اللي بيتقال علينا من اننا اصحاب ديانة دموية واننا اغبيا جينيا
هو احنا كمان ح يصيبنا اللي صابهم؟  
ده ايه القرف ده ياربي؟ انا مش قلت ماحدش واكسنا غيرنا؟
  

19 comments:

utopian girl said...

مع الأسف كل واحد قراله كلمتين فاكر انه خلاص ابو العريف و فاهم في كل حاجة .... الكارثة لما يكون حد مش فاهم و بيفتي وانا اكتر حاجة بكرهها الفتي

عامة احنا مش بس موكوسين

احنا بقينا مرضي نفسيين من حالة الكبت الداخلية و الخارجية

وشئ طبيعي تسمعي اي كلام في أي فتي من أي حد

ليس علي الموكوسين حرج

Unknown said...

و هذا ما يسمونه التعميم
Stereotyping
تماما كما يوصفون كل عربي كارهابي فليس كل يهودي متحيزا لاسرائيل بل بعض اليهود يري عبثية قيام اسرائيل من الاساس

وَإِنَّ مِنْ أَهْلِ الْكِتَابِ لَمَنْ يُؤْمِنُ بِاللَّهِ وَمَا أُنْزِلَ إِلَيْكُمْ وَمَا أُنْزِلَ إِلَيْهِمْ خَاشِعِينَ لِلَّهِ لَا يَشْتَرُونَ بِآيَاتِ اللَّهِ ثَمَنًا قَلِيلًا ۗ أُولَٰئِكَ لَهُمْ أَجْرُهُمْ عِنْدَ رَبِّهِمْ ۗ إِنَّ اللَّهَ سَرِيعُ الْحِسَابِ

وَإِنْ مِنْ أَهْلِ الْكِتَابِ إِلَّا لَيُؤْمِنَنَّ بِهِ قَبْلَ مَوْتِهِ ۖ وَيَوْمَ الْقِيَامَةِ يَكُونُ عَلَيْهِمْ شَهِيدًا

وَمِنْ أَهْلِ الْكِتَابِ مَنْ إِنْ تَأْمَنْهُ بِقِنْطَارٍ يُؤَدِّهِ إِلَيْكَ وَمِنْهُمْ مَنْ إِنْ تَأْمَنْهُ بِدِينَارٍ لَا يُؤَدِّهِ إِلَيْكَ إِلَّا مَا دُمْتَ عَلَيْهِ قَائِمًا ۗ ذَٰلِكَ بِأَنَّهُمْ قَالُوا لَيْسَ عَلَيْنَا فِي الْأُمِّيِّينَ سَبِيلٌ وَيَقُولُونَ عَلَى اللَّهِ الْكَذِبَ وَهُمْ يَعْلَمُونَ

Empress appy said...

ندااااااء عاجل انا نزلت مقال ماما عندي علشان الناس تترجمه بس مش فهمين معني كلمتين عااااااا
ادخلى شوفى التعليقات وردي بقى يا حلوه مش ماما تراعي برضه خريجي نحن الاميه اللي زينا
ربنا يكرمها يارب اساليها بقى المعنى

Fatma said...

خبر عاجل قصف غزة يتم من الأجواء المصرية الان

علا من غزة said...

ههههه
انتي ليش بتاخدي كل شي على اعصابك
عادي .. فيه ناس كتير بتردد هادي المقولة ومحدش عارف اصلا اذا كانت صح ولا غلط
عموما هتلر كمان كان بيبيد كل من هم ليسوا اسوياء حتى من جنسه
يعني كان بيبيد العميان والمعاقين والمنغوليين
بالاضافة لليهود

Unknown said...

فنون

ما تلبشنيش ابوس ايدك

شفتي الخبر المنيل ده فين؟

Fatma said...

http://ara.reuters.com/article/topNews/idARACAE50A0IZ20090111

احييييييييه يا نوراة دا بجد ولا ايه

Empress appy said...

واحد يهودي على الجزيره حرق جواز السفر بتاعه الاسرائيلى فى وقفات احتجاجيه ضد اللى بتعمله اسرائيل بجد انا مش مصدقه ممكن يبقى فيه كده

Empress appy said...

لا يا فنون النظر للطياره من الارض غير من فوق المشكله ان رفح المصريه والفلسطينيه حاجه واحده فممكن ميكونش النظر جاب لااااا استحاله ابدا يا بنتى مش ممكن انا شوفت الخبر وممكن تكون فرقعه

Fatma said...

ياريت يكون فرقعة

من شوية 15 مصاب مصري من القصف الاسرائيلي

ودلوقتي طيارات طايرة عندنا

هو في ايه بجد

وفين عوكل على رأي نوارة

فين عوكل من اللي بيحصل

ليه كدا

دانا حتى بحبه

Unknown said...

انا اسفة يا جماعة

الخبر صحيح

اتصلت بكذا حد هناك وقالوا لي الطيارات كانت بتطير فوقيهم

وقالوا لي ان ده من اول الحرب


يا ابي

لو عندك حد في رفح برضه اسأليهم

مواطن مصري said...

http://www.facebook.com/photo.php?pid=30145568&id=1118001546

شوفي الكركاتير دة لقيتة على الفيس بوككك

Anonymous said...

ينصر دينك ياست الكل
العنصرية ممقوتة من الغير مرة ومنا نحن المظلومين الف مرة
واذا تحولنا الى نسخة عنهم ماالذي سيجعلنا افضل منهم؟
النصر يبدأ بهزيمة النفس الامارة بالسؤ، واعتماد الانصاف والعدل ووحدة الموازين في النظر لكل القضايا..التي تخصنا او التي تخص عدونا.
ولم نحرم من النصر على عدونا، ومن العدل في اوطاننا، الا بسبب العمي الاخلاقي الذي يصيبنا عند تأجج العواطف

عاشــــــ النقاب ـقــــة"نونو" said...

يا ست نوارة المقولة دي مش بتقول ان هتلر جميل وراجل صح واللي عمله تمام
دي كانها بتقول انه اللي كانوا اليهود بيعملوه هباب واسود عشان كدة كان بيتخلص منهم
وبعدين اليهودية الموجودة واللي الحاخام اللي شفتيه نفسه بيحرق بسبوره دة والحركات دي بيبث وبيعلم التعاليم الدموية المحرفة واللي الصهيونية بتطبقها
زي سفر صموئيل الاول وغيرها وعندك العهد القديم دوري فيه هتلاقي الصهيونية مستمدة منها والموضوع كله مش توجه سياسي بس ومحاربة ارهاب والابواق المزيفة
الموضوع هو ان اليهود لهم دولة من النيل للفرات وكل يهودي هو اسرائيلي
دة انتي مؤمنة بنظرية المؤامرة والمفروض فاهمة ان اليهودي صهيوني والصهيونية حركة دينية من اهدافها ابادة الاسلام لكن لازم تضليل وقلب للحقايق علشان تحقيق الاهداف بيعرفوا يغطوا على اهدافهم يعني
وبعدين هي لو حركة سياسية بس كنتي هتلاقي مسلم صهيوني ماهي مش حركة سياسية بقى
يبقى فيه مسلم صهيوني ايه المشكلة
وبعدين يسكنوه عندهم بقى ويعملو له مستوطنة ولا ايه

Unknown said...

فيه مسلمين ومسيحيين صهاينة
وفيه يهود مش صهاينة

Unknown said...

اه
وفيه مسلمين ومسيحيين عنصريين زي الصهاينة وما يفرقوش عنهم حاجة

alzaher said...

ها ها ها
بيفكرني بواحد اخواني بقوله احنا عايزين نكسب اليهود غير الصهاينة كحلفاء
قام قال لي :"انت قوة مش محتاجة لحلفاء"
!!!!!!!!!!!!!!!!!

خالد said...

فيه مسلمين صهاينة
؟
يا للعجب
؟
زي مين مثللا

Unknown said...

زي علي سالم مثلا