Monday 5 January 2009

ما تنسوش الدعا

ان شاء الله يبقى فيه خير، ربنا يستر، السي ان ان بتقول ان حماس بتظهر صور القتلى لاستغلالهم في الحرب الاعلامية عشان تبتز المجتمع الدولي ويضغط على اسرائيل ويجبرها عشان توقف القصف..... يا ضنايا ياختي
!!!!!!!!!!!!!!!!!!!!!!!
والنبي يا ناس انا باقف عاجزة امام هذه التراكيب المنطقية واللغوية غير المسبوقة، الا صحيح، ايه الشر ده؟ ليه كده يبتزوا العالم؟ وليه عايزين يشوهوا سمعة اسرائيل؟ وليه اصلا عايزين المجتمع الدولي يضغط على اسرائل عشان تبطل قصف؟ ما يستحملوا شوية لحد ما تخلص على مهلها، هو يعني خلاص؟ الدنيا طارت؟ وعشان الانصاف السي ان ان جابت صور ضحايا صواريخ حماس
كانوا بيعيطوا
بس
بيعيطوا بس....واقفين زي القرود مافيهمش خدش وبيعيطوا، طب انتوا ايش فهمكوا يا غليظي الحس، يا عديمي المشاعر؟
ده كفاية الخضة
موضة جديدة حكاية: العرب بيستخدموا الاعلام والبروباجاندا عشان يأثروا على الرأي العام العالمي دي دول ناقص يقولوا علينا مسيطرين على هوليود وبنعمل افلام تشوه الصهاينة.... عادة احنا اللي كنا بنقول عليهم كده، جديدة لما تتقال علينا، وفي السي ان ان كمان، وامبارح الاسرائيليين قالوها في المدونة الفاشلة دي، لا وفي السي ان ان، خبير امريكي بيقول: هم بيتعمدوا يصوروا الضحايا من الاطفال والنساء
to bring scorn to Israel
والله العظيم البجاحة لها ناسها
هو احنا بنجيب كومبارس وندلق عليهم صلصة ونصورهم؟ مش ناس ميتة دي؟ يعني كتر خيرهم هم شركاء  في نجاحنا الاعلامي، بينشنوا لنا مخصوص على الاطفال عشان نصعب على الناس، بس احنا اللي ناكرين للجميل
واوراسكوم عاملة اعلان عن شبكتها في السي ان ان يحرق دم اي صهيوني والله، فاكرينه ده اللي فيه طفل فلسطيني بيبني بيت بالحجارة؟ عشان كده عمالين يقولوا لنا انتوا بتشتروا الناس بفلوسكوا؟ هو مش احنا زمان اللي كنا بنقول عليهم كده؟
طب بشرة خير، كل ده بشرة خير
بس لما ربنا ينفخ في صورتنا وينصرنا ان شاء الله مش ح نبقى عنصريين ولا ح نقتل اطفال وابرياء
يارب ينصر المقاومة يارب  
الله ياخد الصهاينة كلهم
ما تنسوش النهاردة بقى عند النقابة الساعة اربعة ان شاء الله، باقول لكوا
اللي معاه يافطة يجيب اللي معاه علم يجيب
يعني ما تجوش ايديكوا فاضية بقى

4 comments:

حفيدة عرابى said...

اصل هى البجاحة ليها ناسها هو مش فى عز مجازر شارون كان المخفى بوش بيقول عليه رجل سلام وان اسرائيل من حقما تدافع عن نفسها هما الناس دول مش موتوا اكتر من 50 مليون بنى ادم فى الحرب العالمية علشان ينشروا التحضر والديموقراطية فى الدنيا مش نابليون لما جه يحتلنا قال انا جاى اخلصكم من ظلم المماليك واطبق الشريعة الاسلامية دى ناس بتعبد مصلحتها ماتعرفش ربنا بس احنا المنطق الفاسد بيجننا لانه فج اوى فى فساده بس هما من فجرهم بيستمتعوا بكده هما ناس متحضرة ومشاعرهم مرهفة فبعد اذنكم ياعرب لما تموتوا اوتولعوا بجاز بعد كده ابقوا اداروا عن عيون الناس الرقة دول

مهندس مصري بيحب مصر said...

باقولك إيه ؟
خلي اي حد من الأجانب عايزة تقنعيه يتفرج على قناة الجزيرة الإنجليزية

بدل الس ان ان و القرف بتاعها

ده لينك البث المباشر لها على النت
http://english.aljazeera.net/watch_now/

و دي صفحتها الرئيسية
http://english.aljazeera.net/

يمكن اللي عايز يفهم منهم يعرف يفهم

مراقب مصري said...

آه طبعا بيبتزوا العالم عشان يصوروا إسرائيل على إنها "عاجزة" وعندها "قصف" مبكر... وبتخلص بدري ومش بتطول

إهلام مأجور فعلا

Anonymous said...

كلام صحيح - على العكس تماما" أن أحنا أفشل ناس فى تطويع الأعلام لخدمة قضايانا ولو كنا شطار كنا بكينا كل شعوب أوروبا وأمريكا لو عرفنا ننقلهم الصور دى
يعنى لولا الجاليات العربيه الموجوده هناك ولولا الأنترنت اللى فيه مدونين شرفاء من أوروبا وأمريكا بيظهروا الحقائق والصور ماكنوش دول أتحركوا وعملوا مظاهرات وكانوا فضلوا يسبوا ويلعنوا ويقولوا أرهابيين كلهم
وبعدين أشمعنى هما يعنى فى 11/سبتمبر ركزوا أوى على مناظر الناس اللى بتبكى تحت واللى على لساهنم (أوه ماى جود)
ياحنيينين ياقطاقيط
والواحد فيهم ماكنش حتى معفر وماشفناش صورة قتيل واحد
عندنا بتظهر صور بتخلى القلب يتعصر وهو فى مكانه بس بتظهرلنا أحنا بس
يعنى تنكيد وكمان شلل علشان الحكومات العربيه اللى مابتتحركش