Tuesday 13 January 2009

اعنف قصف حدث لغزة

دلوقت حالا فيه قصف عنيف قوي، اعنف من اي مرة شفته، والاخبار بتقول فيه اشتباكات عنيفة
يارب استر على الناس
تصدقوا بايه؟ الستة مليار بني ادم اللي في الدنيا دي مالهمش اي لازمة خالص، يعني لو قامت القيامة دلوقت حالا الملايكة ح ترتاح من قرفنا
يعني ايه حتة كيان عنصري معفن ما يسواش تلاتة نكلة مسنود من امريكا، ولو امريكا غرقت دلوقت حالا في المحيط الكيان ده ح يختفي بعدها بفيمتو ثانية، يعني ايه شوية صيع ارهابيين نازلين دب وقتل في الناس المدنيين بالطريقة دي وماحدش عارف يوقفهم، ولا حتى مجلس حقوق الانسان في جنيف عرف يدينهم بجرائم الحرب؟ ولا يحاكمهم؟ وهم بيستخدموا اسلحة محرمة دوليا
الاسلحة المحرمة دوليا دي ضد مين؟ وهدفها ايه؟ ويعني ايه ستة مليار بني ادم في الدنيا دي، على الاقل نصهم معترضين على اللي بيحصل وقاعدين زي الطراطير كده 
هي دي الحضارة؟ هو ده تطور الانسانية؟ ده احنا لو كنا ايام شيتا وانسان الغاب طويل الناب ما كانش القرود على الشجرة سكتوا على اللي بيحصل ده، ازاي يعني؟ ازااااااااااااااي؟ حد يفهمني؟ يعني احنا لو اتمشينا كلنا، كام مليون من اللي طلعوا في مظاهرات في العالم، لحد فلسطين ح يحصل ايه؟ ح تموتنا كلنا؟ انا ولا فاهمة حاجة
وايه الديك اللي بيدن ده؟ غريب قوي، كان بيدن اول يوم في القصف وبيدن دلوقت
حماس ثابتة ان شاء الله
ان شاء الله، والناس بتحارب وبتقاوم غصب عن عين المتخاذلين الجبنا، واللي ح يغلط في المقاومين انا ح انشر لسانه بالمنشار بقى عشان بجد الحكاية دي بقت مقززة، انا اتصدمت في ناس ما عندهاش ادنى حد من الانسانية ولا الاخلاق، مافيش اخلاق ابدا تقول ان البني ادم المحترم اللي عنده دم وانسانية يرمي اللوم على المظلوم عشان يبرر للظالم، مافيش بني ادم عنده اخلاق يطعن ناس بتقاوم في ضهرها ويفت في عضدها ويحطمها الا اذا كان مريض في مخه بقى، مافيش حد عنده دم وانسانية قاعد على المؤخرة يدي اوامر لناس بتحارب وتقاوم وكمان بروح اهله مش عاجبه، عاملين زي ابو منص كحيت اللي قاعد يتكلم عن مشكلة الامير اندرو مع الاميرة سارة، مافيش كده ابدا، مافيش كده ابدا غير في اوطى انواع الاخلاق في الكون
ربنا ينصرهم ان شاء الله وينجيهم، ولا يحوجهم لحد
وبالذات لينا، ده احنا المتغطي بينا عريان، ربنا ما يحكمنا على غلابة ابدا
على فكرة بقى انا قرفانة من كل البشر، مش من العرب او المصريين بس
قرفانة من البشر كلهم كلهم كلهم، ومن نفسي
وبرضه مش فاهمة: يعني ايه جريمة انسانية تتم على اعين الناس كده من حتة فسلة وماحدش عارف يتصرف؟ ح نقول لربنا ايه؟ ح نقول ايه لعيالنا؟ ح نبص في المراية ازاي؟
كل حاجة مقرفة
اففففففففففففففففففف

28 comments:

مواطن مصري said...

يا رب يكون مع المواطنين هناك

TAFATEFO said...

مممممم .. نفس الشعور .. امبارح بالليل بعد ما شفت الكلام عن الأسلحه المحظوره .. حسيت أد ايه أنا مش انسان .. نجس ..

"أنا نجس .. شم نفسك هتشم نفس الريحه .. احنا قفلنا بابنا في وش أناس بتموت .. ومش عارفين خايفين على ايه؟؟ ليكو ايه هناك خايفين عليه؟؟ احنا أنجاس"

V.Hayat said...

مشكلة من 60 سنه ولا تزال ليس لها حل هل هذا قوة من اسرائيل اما ضعف وهون العرب اليس 280 مليون عربى لا يقدرون على 4 مليون صهيونى يا ترى العيب فى مين
حد يقدر يجاوب على ها السوال

شوف الاتحاد الاوربى وصل الى اين ونحن للان عشان اروح بلد عربى اخر احتاج الى فيزا وكفيل دين واحد لغة واحدة لكن للاسف ليس هناك امل السلطة والكرسى الذى للاسف يجعل من الرجال اقزام اين النخوة العربية اين من يخطئ يقول انا اخطات اتمنى من الله ان يرحم شعب غزة البسيط الذى لا يجد ملاذ من المحرقة التى وضع فيها اين مبادئ الانسانية البسيطة ان يرحم الانسان اخيه الانسان فى الارض ليرحمهم من فى السماء اقبلوا وقف اطلاق النار يا حما س يا فتح يا اى كان كفاية
ارجو ان تنشرى تعليقى ولا تحذفيه
وزيارتك لقهوتى والمشاريب على حسابى
http://cafedeprestige.blogspot.com/

أكون أو لا أكون said...

الجزيره الحقراء كلموا أحد المجاهدين وعرضوه للخطر...
الجزيره مش أول مره بيعملوا الحركه الندله ده...! يعني هم كلموا المجاهد "أبو هارون" من هنه... قاموا الإسرائيليين الكلاب قصفوا المكان....
لكن الحمد لله ربنا سلمه منهم... ألف حمد وشكر لك يارب.

نفس الشيئ مع العربيه" العبربه" بيشرحوا على الخريطه إيه اللي إتقصف وإيه حجم الدمار اللي حصل جراء القصف...! فبتقوم إسرائيل بقصف المكان اللي لسه فيه حياه بنفس الساعات اللي صرحت فيها العربيه.
الكل منسق مع إسرائيل.

حسبنا الله ونعم الوكيل.

مواطن مصري said...

شوفي الراجل دة بيقول اية

http://www.youtube.com/user/theegyptiandream

أكون أو لا أكون said...

والله يانواره أنا بقى لي كم إسبوع بقول لازم إحنا البنات نعمل حزب... نتدرب ونروح نحارب أعدائنا اللي مقتلين في ولادنا وإخواتنا بدون أسباب...

الرجاله خلاص مالهومش لازمه... محدش قادر يعمل حاجه... الكل مستسلم للحكام العرب الحقراء.
وبين كل كلمه والتانيه بيقولوا أضعف الإيمان...!
فرحانين بالكلمه ده... مهيصين...


هه أضعف الإيمان...!
هم معاهم حق... ماوصلوناش للحاله ده إلا من ضعف إيمانهم.

الله أكبر.

Anonymous said...

وفي الوقت نفسه يا نواره التليفزيون المصري بيعرض مسلسل إسلامي وفيلم لأحمد رمزي وماجدة,

الله أكبر و الأدان بيدن دلوقتي في غزة , وما قالشي المؤذن "الصلاة خير من النوم" عشان هما مش نايمين أصلا يا نوارة,

يارب ما ننفضح أكت من كدة

Anonymous said...

لقد اسمعت لو ناديت حيا
ولكن لا حياة لمن تنادي

Anonymous said...

المضحك فعلا في الموضوع ان الطائرات الاسرائيلية شوهدت اكتر من مرة بتحلق فوق المجال الجوي المصري

والمضحك اكتر الصواريخ اللي بتيجي غلط جوة مصر (فية صاروخ انضرب علي بعد 400 متر جوة رفح المصرية)

انس الفقي كان بيعايب علي سوريا عشان مضربتش علي الطيارات الاسرائيلية لما دخلتها

يعني لا فية دفاع جوي ولا دياولو

يادي الوكسة امال لو اسرائيل اعلنت علينا حرب بجد هيحصل اية

حسن على said...

ايوة يانوارة القصف وحشى عنيف ومجنون برا وبحرا واف16واباتشى ومدفعية ثقيلة من الدبابات وصواريخ ارض ارض واكثر من خمسين قنبلة فوسفور حارق سام...وابطال غزة يصدون الجيش الاسرائيلى الجبان وهو يضرب اهدافا كلها مدنية وبأسلحة محرمة دوليا ولايستطيع التقدم على الاؤض ومن الساعة حداشر وحتى الان.غزة تدافع عن شرف العرب والحكام العرب العملاء يضحكون فى كمهم والشرفاء القليلون منهم عاجزون امام تنطع الكثرة العميلة المتواطئة. ولاينسى"كبيرهم هذا"ات اللة يسمع ويرى واتة غالب على امرة ولكن اكثر الناس لايعلمون. غزة تعطينا درسا فى العزة

TAFATEFO said...

ده كله ضغط على حماس وتحقيق أسرع مكاسب ممكنه للاستفاده السياسيه في اتفاق التهدئة

ربنا ينصرهم ويثبتهم ويسددهم يا رب

TAFATEFO said...

شوفوا بقى .. الأغنية خلصت والحمد لله ..

اللينك أهو

وفي high quality version

هتلاقوا تحت البلاير بالأزرق على اليمين ووتش ان هاي كواليت

وبرفعها دلوقتي على فيميو علشان صورته أحسن في الايمبيد

ولو حد ليه أي ملاحظة يا ريت تقولها وتتعدل بسهوله ان شاء الله

أكون أو لا أكون said...

بالنسبه للتصويت... هو ليه كل الإختيارات بتحيّر؟

; )

Anonymous said...

حالات اختناق للاطفال من جراء القصف

نحن لا نملك الا الدعاء
ربنا ينصر كل المجاهدين ويصبرهم

أكون أو لا أكون said...

الإعلام الإسرائيلي يعترف بوقوع إصابات
الله أكبر
الله أكبر
المقاومه الفلسطينيه تتصدى بشراسه للقوات الصهيونيه التي تحاول التقدم من جنوب وشمال القدس.
"قناة الأقصى"

حـنــّا السكران said...

استطعت قبل قليل , ( قبل الفجر ) أن أتصل بغزة ,و تكلمت مع أخت كريمة صديقة لنا و زميلة في التدوين . و عندما سألتها ان تطمئنني عنها و عن عائلتها قالت لي ( حتى الان لا زلنا على قيد الحياة ,لا نعرف مالذي سيجري بعد قليل و هل سنبقى أحياء ) رغم كل هذا و رغم أنها قالت لي أن الذي جرى و يجري لهم لا يمكن وصفه , إلا أنها كانت صلبة و هادئة ومطمئنة بطريقة أعجزتني تماما .و لم أستطع إيجاد كلمات مناسبة ,,

TAFATEFO said...

وعلى vimeo

كواليتي أعلى

Maha said...

آآآآآآآآآآآه يا غزة

يا مين ياخدني لغزة

Unknown said...

من حديث دحلان مع دير شبيجل

SPIEGEL: How realistic is the Israeli goal of destroying Hamas?

Dahlan: In reality, they don't actually want that. Israel needs Hamas in order to prevent the creation of a Palestinian state. The motive behind the offensive is to achieve better conditions for the next cease-fire.

SPIEGEL: But doesn't the war offer Fatah a new opportunity to assume power in Gaza again?

Dahlan: We will only return to Gaza after we have won an election -- not through military force. If you ask me personally, though, I am happy about the coup against Hamas.

SPIEGEL: What do you mean?

Dahlan: The Palestinians have now realized that Hamas is not capable of governing. Their leaders were celebrated as resistance fighters and for fighting corruption, but since their election they have lost all legitimacy. Their sole strategy is destruction and chaos. Hamas has lost its appeal -- and it will lose the next election.

الحديث كاملا

http://www.spiegel.de/international/world/0,1518,599459,00.html

Unknown said...

طب ما حد يقتل دحلان

بجد والله

Maha said...

اتفرجي يا ستي على حقيقة حكامنا

Anonymous said...

Hey TAFATEFO,

Good job young man, keep up with the good work you always do.

Baheeg

Unknown said...

حلوة قوي يا مصطفى وانا حطيتها على المدونة والكوالتي كمان حلوة قوي على اللي انت حيطتها

انا عاجبني قوي الاسرائيلي اللي اخد الطوبة وفضل يلف حوالين نفسه وراح واقع
هههههههههه

alzaher said...

من قال ان هذا الكيان العنصري الغاصب لا يردعه احد؟
هذا الكيان يردعه يوميا مقاومو القطاع وفدائيوه
حتى الصواريخ التي لا تعجل البعض ويصفها بالعبثية هي في حد ذاتها سلاح ردع

Anonymous said...

الصفحة التالية مترجمة بلغات عديدة
ساعدوا على نشرها

http://www.elfarra.org/gallery/gaza.htm

Unknown said...

و شهد شاهد من اهلهم

عدد مجلة تايم ليوم 12 يناير صدر بعنوان
Why Israel Can't Win
و يوضح تيم ماكجيرك من القدس في مقاله بعنوان
Can Israel Survive Its Assault on Gaza ?
كيف ان اسرائيل لا تستطيع ان تكسب حربها علي غزة.

المقالة كاملة
http://www.time.com/time/world/article/0,8599,1870314,00.html

Ahmad Tawfik said...

الأستاذ / ناصر قنديل ( باحث سياسي لبناني ورئيس مركز دراسات الشرق ببيروت )صرح أمس على قناة المنار انه يمتلك أدلة على الخطة القذرة التي تواطأت عليها مصر والسعودية وإسرائيل وهي ان تنتهي إسرائيل خلال ثلاثة أيام من القضاء على حماس ( السبت والأحد والإثنين ) الثلاثاء تدخل قوات محمد دحلان الموجودة حالياً في مصر ةالذين تم تدريبهم بها لإحلال الأمن داخل القطاع.
ولذلك تأجل إجتماع وزراء الخارجية العرب إلى الأربعاء لإعطاء الشرعية لهذه التصرفات .
يؤيد ذلك ما فضحه عاموس جلعاد على لسان عمر سليمان .

المصيبة الثانية أن ما أسموه إسترتيجية الخروج ( والكلام مازال للسيد / ناصر قنديل ) هي تدويل غزة في حالة تعثر تنفيذ هذه الخطة وهو ما أعلنه محمود عباس من القاهرة بعد لقائه بمبارك من طلب القوات الدولية .

أرجوكم إبحثوا لنا عن طريقة لمحاكمة هؤلاء الجواسيس

muslima said...

السلام عليكم

الاخ مصطفى

جزاك الله خيرا فعلا المرة دى الفغيديو مختلف ومؤثر

فى ميزان حسناتكم ان شاء الله


ياريت بس تقولى لو عايزة اعمل داونلوود للفيديو اعمله منين

الاخ اكون او لا اكون

انا مصدومة من الكلام اللى بتقولوا عن العربية والجزيرة اللى بيكلموا المقاومين فى غزة لمصلحة اسرائيل

يعنى عرفنا كلنا انه اعلام موجه

ومتنيل وكله زيف

بس مش معقول لدرجة انهم يعملوا تمويه لصالح اسرائيل ضد المقاوممة

حضرتك متاكد من المعلومة دى

الله يخليك انا فعلا مصدومة من الخبر

ياريت تقولنا عرفتها منين

حسبنا الله ونعم الوكيل

" ويمكرون ويمكر الله والله خير الماكرين"

اللهم ارفع مقتك وغضبك عنا

ياا جماعة النصر لن يتحقق الا بالوحدة

يد الله مع الجماعة

اومش اى جماعة

جماعة مؤمنة مخلصة

والجماعة المقصود منها هنا جماعة المسلمين فى مشارق الارض ومغاربها

وهذا ابتلاء

ان كانوا كمموا اصواتنا
فلا نملك الا الدعاء الدعاء الدعاء

ادعوا ا خواتى بأن يولى الله علينا خيار المؤمنين الصادقين

فمن صدق الله صدقه الله

صدق فى السر والعلانية

صدق فى قول الحق فى الرضا والغضب

فى النهى عن المنكر والامر بالمعروف

صدق القلوب

فلقد اصبحت قلوب اللمسلمين من بنىجلدتنا الان اشد قسوة من الحجارة الوصف الذى وصف به الله بنى اسرائيل

" ثم قست قلوبهم من بعد ذلك فهى كالحجارة او اشد قسوة "

عافانا الله واياكم من قسوة القلوب
ومن فساد الضمير