Saturday 10 January 2009

يعني عباس ده جنس ملة اهله ايه بالظبط؟

لا ينافس ابو الغيط في عبثه الا عباس، لا والله، ابو الغيط ارحم شوية، على الاقل عمره ما قال: المقاومة ليست هدفا في حد ذاتها، واذا كانت المقاومة سوف تفني الشعب الفلسطيني فاننا لا نريدها
يعني اشتم بايه؟ حد يباصي لي قاموس قباحة يليق بالراجل ده؟ بقى المقاومة هي اللي ح تفني الشعب الفلسطيني؟ يا راجل عيب على شيبتك ده انت خطوتين وتقابل رب كريم، ح تقول له ايه؟ يا ابن البجحة ده انت طالع في مجلس الإمن تقول: هذا الحصار الظالم
ياراجل اختشي على دمك، ده المصايب ما حلتش علينا غير مع وشك العكر
طب ما طول عمر حماس موجودة، وكانت اقوى من دلوقت، اصلا حماس نشأ في حياة ياسر عرفات، ومش بس حماس، والجهاد وكل الفصائل الفلسطينية نشأت في حياته، عمرنا ما سمعنا ولا شفنا اللي شفناه ده ابدا غير لما الله يرحمه ياسر عرفات سابنا وربنا بلانا بيك
الواحد كان زعلان من ياسر عرفات وهو عايش دلوقت بيترحم على ايامه
الله يرحمه
الله يرحمه
الله يرحمه ويتقبله في الشهداء
كان فيه صحفي صديق، هو راجل كبير ومشهور عشان كده مش ح اقول اسمه، راح عمل مع عرفات لقاء بعد اتفاقية غزة اريحا، وقال له: يعني انت كنت مقاوم، ودلوقت بتقبض على المقاومين وتحطهم في السجن بدل اسرائيل؟
قال له (والعهدة على الراوي): اقفل التسجيل والكلام اللي ح اقوله ده ما يطلعش برة لحد ما اموت، لما انا اتحفظ عليهم شوية وبعدين اسيبهم احسن ما اسرائيل تقبض عليهم وتعرف اسرار المقاومة منهم بالتعذيب. انا مضطر اعمل كده لحمايتهم.
الله يرحمه
الله يخرب بيتك يا عباس، قال دلوقت بيدافع عن موقف مصر، طب برضه بقى فيه صحفية تانية صديقة (والله لولا انهم ناس كبار وصحاب امي وابويا كنت قلت اساميهم) راحت تزور عرفات اثناء الحصار وكان قرد البرك ده قاعد جنب عرفات، وعرفات اصلا كان بيكرهه بس هو كانت عادته انه اللي يقلق منه يطويه تحت جناحه عشان يأمن شره، وبرضه قتلوه، وراح عباس ده قال للست دي: مصر هي اللي ورطتنا في كل ده. دلوقت بقى مصر بقت حلوة؟
وطالع حبيب الاسرائيليين اللي اولمرت كان طالع يبوسه من خدوده امممممممممووواااااااااااه اممممممممممممووووووووووووواه
يشتم في حماس  كأن هي اسرائيل
ما كل الناس كانت موجودة مافيش حاجة جدت علينا غيره، اقول لكوا كمان حاجة، وحسني مبارك ما كان موجود ايام عرفات كمان، وما عملش اللي عمله دلوقت اشمعنى لما البسوس ده جه كل الدنيا وقعت في بعض؟
انا اغلب الظن عندي تصور لدماغ مبارك، ده فلاح منوفي وغالبا دماغه بتشتغل كده: وانا مالي انا؟ انا مش عايز وجع دماغ، اذا كانوا هم نفسهم واقعين في بعض، وح يعملوا لي مشاكل مع الناس يبقى انا بقى اللي اتدخل لهم؟ لما يبقوا يسطفلوا مع بعض يبقوا يكلموني، هم ح ياكلوا دماغي انا ليه؟ وده يكلمني ويقول لي اقفل، وده يكلمني ويقول لي افتح، هو انا ناقص؟ اقفل يا سيدي بلا وجع دماغ 
اشمعنى لما كان عرفات عايش لا سمعنا عن خناقة بين الفصائل، ولا خناقة مع مصر، ولا حتى خناقة مع الاردن، ده لما اسرائيل حاولت تقتل خالد مشعل عرفات اتصل بحسين وقال له تقب تغطس تجيب من الاسرائيليين الترياق وتعالجوه، وفعلا قب غطس كلم الاسرائيليين وهددهم لحد ما عالجوه
وانا اصلا لو مكان عرفات وحسين عمل فيا اللي عمله سنة سبعين ما كنتش بصيت في خلقته، بس الشهادة لله الراجل كان بيعرف يتعامل مع الفصائل ومع العرب
هو صحيح عك الدنيا شوية مع اسرائيل وامريكا وسمع كلامهم، بس ما سمعش كلامهم قوي، بدليل انهم قتلوه
الله يرحمه، الله يرحمه، الله يرحمه
ربنا يخلصنا منك يا زفت الطين انت ودلاديلك، واللي عملتوه في عرفات يتعمل فيكوا
خدوا...وزعوا الفيديو ده في كل حتة:

23 comments:

TAFATEFO said...

هو حضرتك شفتي المؤتمر الصحفي كله؟؟ ولا شفتي المشاهد اللي بتعرضها الجزيرة في الأخبار؟؟

شاكك ان حضرتك شفتي المؤتمر الصحفي كله

Unknown said...

لا شفت المقاطع اللي عرضتها النشرة دلوقت
انا لسة صاحية من شوية
عندك المؤتمر الصحفي كله؟

TAFATEFO said...

لو لسه في دم متحرقش من امبارح أرفعهولك

بس كده أوفرلود

Unknown said...

هو قال كلام تاني افظع من كده؟
لا ارفعه بقى
خلي ربنا ياخدني بقى وارتاح

TAFATEFO said...

بعد الشر

أصلاً بتاخدي على كلامه بصفته ايه؟؟ هو ولايته خلصت من امبارح .. هو دلوقتي زبله ولا رئيس ولا زفت .. بس هو بيستعبط

حـنــّا السكران said...

عرفات اّخر ايامه كان يسمّي عباس (قرضاي فلسطين ) ..كان يقول له هالكلام بوجهه

TAFATEFO said...

هو أصلاً مين جاب عباس .. موقع حوار فلسطين كان بيقول انه انتهت صلاحية منتج إسرائيلي .. يقصدوا عباس

Unknown said...

كان مفروض عليه يا مصطفى
اتفرض عليه في الفترة اللي هو كان متحاصر فيها

وبعدين انا عايزة اعرف هم انتخبوه ازاي؟

على فكرة هو ح يمشي بس اغلب الظن ان الامريكان ح يجيبوا دحلان

او حد شبه دحلان
هم مش ح يسمحوا بانتخابات حرة تاني في فلسطين
خلاص بقى اتعلموا

TAFATEFO said...

اقري دي

http://beidipedia.wikia.com/wiki/%D9%85%D8%AD%D9%85%D9%88%D8%AF_%D8%B9%D8%A8%D8%A7%D8%B3

TAFATEFO said...

أنا مقصدش عرفات أنا أقصد أمريكا وإسرائيل

TAFATEFO said...

بيتكلموا على الجزيره عن وضع محمود عباس بعد انتهاء ولايته

TAFATEFO said...

مفهمناش حاجه .. قال إذا كانت الفتره المتبقيه سنه على ايه؟؟!!

عباس دلوقتي ايه؟؟

3asheg.nawara said...

شوفي يا غالية أنا لسة بردك زعلان و زعلان تاني لانك شتمتي أم أبو مازن و ينكن تكون ست محترمة. شوفي أنا مش متدين جوي يعني بس اعرف لو الواحد عاوز دعاه يستجيب لازم يكون لسانه ... مش لاجي كلمة دبلوماسية و انتي عارفة مجدرش أجول كلمة تجرحك.

عموما هو راجل عفش و لو كان حدانا في الصعيد كنا تاويناه من زمان. بس دون سلو كل زمن انه يكون فيه عملا. و جصة والي عكا مشهورة.

TAFATEFO said...

مش عارف في ايه .. ساعه بروسيسنج ولسه مخلصش!!!! على العموم أول ما يخلص أبو وش فقر ده هحط اللينك

ده السفير إبراهيم يسري بيعلق على المبادره المصريه وقرار مجلس الأمن للجزيرة

http://www.youtube.com/watch?v=ZSRTz9Bz9nk&feature=channel_page

TAFATEFO said...

أخيراً

شوفي يا ستي .. ومتنسيش الكابوتين

المؤتمر الصحفي للأخ محمود عباس من القاهرة

Anonymous said...

احمد سعيد

واخيرا بعد فشل وسائل الاعلام الامريكية فى حشد الراى العام الامريكى لتاييد اسرائيل بالقدر الكافى
لجأ عتاولة الاعلام هناك لخطة زكية

شخص اسمة جو السباك
الاسطى جو
اشتهر بعد معارضتة لخطة الضرائب التى قدمها اوباما
وللعلم الشعب الامريكى لايهمة سوى الضرائب والرفاهية الشخصية
اما كل مايقع خارج حدودة فهو من اجهل شعوب العالم على الاطلاق ولا يعنية فى شىء مالم يمس امنة واقتصادة
مما يسهل عمل اللوبى الاعلامى الصهيونى هناك ويمكنة من سوق الشعب الامريكى كالنعاج فى اى اتجاة
ونظرا لصعوبة هذا الامر الامر الان
فالخطة هى استغلال جماهيرية الاسطى جو وبعدة عن العمل بالاعلام
حيث وظفتة احدى وكالات الانباء وارسلتة لاسرائيل
ليمارس هناك على حد قولة
لكى اشاهد الامور بعينى مواطن امريكى عادى
وطبعا سيحتشد الشعب الامريكى لمشاهدة اراء الاسطى جو اللى مننا وعلينا ومش من السياسيين الكدابين ولامن الاعلاميين الانتهازيين
وطبعا الاسطى جو هيقول مش قادر اوصف الدمار اللى شفتة فى اسرائيل من الصورايخ القسامية ذات الرؤس البالستية عابرة القارات
بجد بجد الناس هناك غلابة ونفسهم يعيشو فى امان بس الفلسطينيين الوحشين الاشرار الارهابيين مش عاوزين يسبوهم فى حالهم
وبيقتلو الاطفال الاسرائيليين الابرياء
حتى قابلت طفلة مسكينة بريئة اسمها راشيل عمالة تعيط بقالها يومين علشان العروسة الحلاوة بتاعتها اتكسرت اثناء القصف الفلسطينى الغاشم
الفلسطينيين دول اشرار وارهابيين
واسرائيل بتدافع عن عيالها
صدقونى دنا راجل منكم ومن الشعب
وبحبكم
ووالعشرة الشريفة دى ماليا اى مصلحة ولاحاجة ولابستغل الموضوع دة علشان وسائل الاعلام عندنا تلمع اسمى واحصل على وظيفة محترمة واعوم على وش الفتة واترستأ واسيبنى بقى من شغلة السباكة اللى مش جايبة همها دى
وعلى راى المثل
ان بيت ابوك وقع خدلك منة قالب
مراسلكم من تل ابيب
الاسطى جو السباك
اسف
الاستاذ الدكتور جو بية السباك

اتفووووووووو

وقال انا اللى كنت مخنوق من بلدى
وبقول ان الحكومة سايقة الناس زى الخرفان

هههه
غلبتونا يا امريكان
صحيح كل يوم بيعدى بقتنع فية ان كمية الانتهازيين فى امريكا اكتر من مصر بكتييييييييييييييييييير
دا حتى اللى عندنا بيتعلمو منهم

اسفوخسسسسسس

Unknown said...

الله يرحم عرفات علي الاقل اتقتل وهو لابس البدله العسكريه مش اللي لسه مش شايف ان في سبب عشان يلبسها

بالنسبه لموضوع انه كان بيقبض عليهم بدل الصهاينه أعتقد انه صح لأني سمعته كذا مره في حياة عرفات

انتي تعرفي ان عباس كان بيحب السادات جدا وكان معجب بتفكيره وطريقته سياسيا؟؟؟

الفيدوا هننشره مع الاتنين القدام ان شاء الله

Anonymous said...

محمود عباس حسب ما قرأت في ال 2002 أنه اثناء انتفاضة الاقصى (الانتفاضة الثانية) كان يقيم داخل اسرائيل و جرى تحضيره منذ ذلك الوقت لخلافة ياسر عرفات

غير مسؤل عن هذا الكلام قرأته في جريدة أمريكية

Unknown said...

يا سلام
ومالك يعني متوجس قوي كده وانت بتقول المعلومة دي

ماهو باين يا اخي
باين زي الشمس

TAFATEFO said...

شفتي المؤتمر الصحفي لـ بسلامته؟؟

Unknown said...

يا مصطفى

ايه ابن المرة القحبة اللي انت رفعت لي الفيديو بتاعه ده؟
ماحدش يقول لي يمكن امه كانت ست كويسة
مافيش ست كويسة تربي ابن وسخة زي ده

ده عايز قوات دولية في فلسطين ابن الكلب يعني عايز احتلال ثلاثي الاضلاع
هو انا ناقصة؟

TAFATEFO said...

أنا كان لي تعليق واحد لما شفته .. ان مبارك بالنسبه له وطني وقومجي قديم

لما مصر رافضه رفض قاطع جنود على الحدود .. ومش الحدود المصريه بس (زي ما قال الفقي امبارح) لا .. الناس بتقول ان مصر رافضه مبدأ القوات الدوليه ده تماماً لأنه بيحقق المصلحه الإسرائيليه بعزل قطاع غزة عن الضفة الغربية نهائياً

اللي يشوف بلاوي الناس .. تهون عليه بلوته فعلاً

Anonymous said...

الفديو يصور ضحايا زلزال ايران ..فكري فيها.