Friday 9 January 2009

والله ما انا عارفة مين حاله اوحش من التاني ومين فينا المحتل

انا تعبانة الحقيقة بس كل اللي اقدر اقوله انهم كل نقطة تفتيش يوقفونا ويقعدونا ساعة فما فوق كأنها مش بلدنا
نقطة تفتيش اولى



وزي ما انتوا شايفين يا اصدقائي الصغار لما نزلنا قعدنا لهم في الشارع بعد ما عطلونا اكتر من ساعة راحوا خلوا سواق النقل يرجع بضهره عشان نخاف
نقطة تفتيش تانية



هو انا مش عارفة الفيديوهات ايه، بس هم وقفونا عند تلات نقط قبل ما نروح للنقطة الاخير اللي اتنقطنا فيها



النقطة الاولانية اظن مدخل الاسماعيلية، وبعدين الكوبري، وبعدين بالوظة، وبعدين بير....بير حاجة
وكل مرة يقعدونا القعدة دي وننزل نوقف الطريق ونعتصم وبعدين يقولوا لنا ياللا امشوا واحنا يا عيني نفرح

بير حاجة دي بقى اللي قالوا لنا ان امن الدولة مستنينا فيهم، وما طولش معانا، قال لنا: انتوا عايزين تروحوا العريش؟
حاااااااضر، احنا ح نوصلكوا لحد العريش، وبعتوا معنا عقبال املتكوا تشريفة، بوكس يقودنا الى طريق العريش عشان نروح ونلاقي المنظر ده قبل بوابة العريش






لا عييييييييييب احنا عيال خيطرة خيطرة يعني، كل الجيش ده كان جاي عشانا احنا، وحتى ما رضيوش يتكلموا مع المحامين زي ما كانوا بيعملوا في نقط التفتيش التانية، وش كده بيزعقوا للسواق، امشي من هنا، لف...لف وارجع تانيييييييييي ولما جه مالك عدلي او خالد يكلموهم او حتى مالك مصطفى اقترح اننا ننزل قفلوا الباب علينا وحتى ما عبروناش بكلمة، كل كلامهم مع السواق
مش بس كده
دول وصلونا لحد القاهرة
حتى لما نزلنا في رست هاوس في الطريق واحنا راجعين نزلوا معانا
مالك مصطفى زعلان
بيقول كنا ننزل واللي يحصل يحصل
طيب هو مافيش حاجة كانت ح تحصل غير اننا نتسحل، مالك مصطفى بيقول مش مهم، بس مش ممكن نرجع منقوطين كده، وعمر بيقول معانا ناس كبار ما ينفعش نبهدلهم معانا
على اي حال
احنا كلنا راجعين منقوطين، واعتذارنا للاخوة في غزة: اهو ده اللي صار وادي اللي كان، مالكش حق تلوم عليا، تلوم عليا ازاي يا سيدنا وخير بلادنا ماهوش في ايدنا قول لي عن اشياء تفيدنا وبعدها ابقى لوم عليا
والله ماحد احسن من حد، على الاقل انتوا عارفين مين اللي بيعمل فيكوا كده وليه

34 comments:

TAFATEFO said...

معلش

حمدالله على سلامتكم .. وإن شاء الله هتتحل

الجايكو كان واقع فتره .. وراسيل كريم البحيري اتقطعت طول الفتره دي

حمدالله على سلامتكم مره تانيه

وبعدين النهارده الجمعه كان حلو .. النار استقبلت 12 .. 8 منهم في عملية إسرائيل لغاية دلوقتي مش مصدقاها ومش قادره تعلق عليها

مهندس مصري بيحب مصر said...

معلش يا نوارة

انتم وصلتوا بير العبد و رجعتوا
عملتم اللي قدرتم عليه
و لا يكلف الله نفساً الا وسعها
و القافلة تسير بقدر احتمال اضعفها

هو انا اللي حأقولك الكلام ده و لا ايه ؟

TAFATEFO
===========
يا بختك يا عم
واحد من غزة في البوست اللي فات بيشكرك على فيديوهاتك و بيدعي لك
عايز ايه تاني بقى من الدنيا

اللهم لا حسد

حفيدة عرابى said...

حمدا لله على سلامتكم والله انا كنت بحسدكم النهاردةا نتم فى ايه و احنا لسه الدنيا شاغلانا بس شفت كلام طفاطيفو وال12 اللى غاروا النهاردة وشفت المظاهرات اللىكانت فى العريش النهارده انا حاسة ان الرؤساء العرب بيعضوا ايديهم دلوقت مش قلنالك خلصى بسرعة يا اسرائيل ينفع تكسفينا كده وتجيبلنا الكلام---------خلاصة الكلام الا ان نصر الله قريب

TAFATEFO said...

أولاً النهارده عباس لم يعد عباس رئيس السلطة الوطنية .. وأصبح د. دويك المعتقل في سجون الاحتلال هو الرئيس الشرعي للسلطة الوطنية الفلسطينية

الصبح : عزمي بشارة علق على قرار مجلس الأمن ووضح ان المخول بتنفيذه إسرائيل وانها رفضت تنفيه وشرح ليه هي رفضت وايه اللي ممكن يحصل

http://www.youtube.com/watch?v=ck-1AoFlCn0&feature=channel_page

وبعدين في الجزيره قالوا ان محامين بريطانيين رفعوا دعوى أمام المدعي العام في بريطانيا لتوقيف ومحاكمة نظيف - أبو الغيط - بيريز - أولمرت - ليفني بتهمة ارتكاب جرائم حرب

http://www.youtube.com/watch?v=mO_wyCjzQng&feature=channel_page

مظاهرات فنزويلا هي أفضل مظاهرات النهارده (والأردن واسكندرية) الناس تظاهرت قدام السفارة الإسرائيلية وحدفوها بالجزم .. وكانوا بيخاطبوا العرب ويقولوا ما عندكم دم؟؟ شافيز رجل وانتم مش رجال؟؟ وحرقوا علم إسرائيلي مكتوب عليه حسني مبارك

http://www.youtube.com/watch?v=nWzr7xQccWA&feature=channel_page

وبعدين كان خبر حلو .. أبو عبيدة أكد ان قوة خاصة من القسام قصفت بيت فيه 8 جنود إسرائيليين ودخلت قضت عليهم جميعاً ولم يصب إلا مقاوم واحد .. وفي 4 تانيين اتكلوا قنص وتفجير .. وإسرائيل مش قادره تعلق على اللي حصل

http://www.youtube.com/watch?v=erXiggGh5Uw&feature=channel_page

إسرائيل قصفت منزل صحفي واستشهد .. والأنروا أعلنت انها هتعيد عمليات الإغاثه

وبعدين حماس أعلنت انها سلمت مصر مجموعة مطالب بخصوص المبادرة المصرية وان وفد حماس هيوصل القاهرة بكره للتفاوض والجزيرة استضافت نزال ومصطفى الفقي بعده وعلقوا على المطالب والمبادرة وشكلهم هيتفقوا .. مبارك بكره هيجتمع مع عباس (الؤئيس المنتهية ولايته) وبعدين مع قادة حماس

كمان 5 دقايق هجيب لحضرتك اتصال نزال والفقي

على فكره وزير خارجية فنزويلا في لقاء خاص على الجزيرة

TAFATEFO said...

@ لقد خلقنا الله أحرارا

أنا دلوقتي اتأكدت ان المؤامرة اللي بيتكلم عنها الملك عبدالله ان حماس هتحرج إسرائيل وتنتصر عليها

:D:D:D

احمد العربي said...

الحمد لله على السلامة يا نوارة انتي واللي معاكيو ربنا بيعلم بقلوبكم و أجركم عندة ولا نقول الا لا حول ولا قوة الا بالله, ان شاء الله بيجي اليوم اللي بنشوفك تدخلى غزة _ بوابة فلسطين_ ,حتى لا ننسى, معززة و مكرمة و بين أهلك و اخوانك ان شاء الله , أحلك ساعات الظلام قبل بزوغ الفجر
تحياتي

علا من غزة said...

حمد الله ع سلامتكم

والله ما حد كان هايفرح لو حد منكم حصله اشي لا سمح الله

اقولك هما بيحموكو من ايش
هما بس مش عايزينكو توصلو معبر رفح وتسمعو اصوات القصف على الناحية التانية من السلك

كانو بيحموكو من الصدمة :)

معلش يا استاذة نوارة المهم انكم حاولتو

ولا يكلف الله نفسا الا وسعها

ومحدش هايلوم عليكو

تحياتي

حفيدة عرابى said...

طفاطيفو انت جمعت بين الملك عبد الله والمؤامرة فى جملة واحدة طيب ما كفاية اى كلمة فيهم هتدى معنى التانية وبعدين فنزويلا اثبتت فعلا ان فيها رجالة بس ياريت المارينز مايطلعو يقولولنا دلوقت اصله مالوش مصالح ولاحدود مع اسرائيل ده بس بيغيظ امريكا

Anonymous said...

حبيبتي حمدا لله على سلامتك وانتوا أخذتم الأجر على كل حال وأعذرتم الى الله بأنكم حاولتم أقصى ما تستطيعون.....والله برغم كل ما حدث لكم مازلت أتمنى الذهاب حتى لا أشعر أن اخواني هناك يذبحون وأنا هنا آمنة في بيتي آكل وأشرب وأنام...والله ما يفعله الامن والنظام المجنون لامر يفوق التصور..وكأنكم تقفون عند نقاط تفتيش اسرائيلية من تلك المنتشرة في الارض المحتلة...يبدو أن أرضنا هي الأخرى محتلة...يارب أعنا على الاحتلال...يارب عجل لنا بفرج من عندك
فقد ضاقت علينا الأرض بما رحبت
.حرة المداد-مدونة عرائس الشمع

Rania Lelah said...

حمدلله على سلامتكوا كلكوا
و خيرها فى غيرها ان شاء الله
المهم اننا بنتحرك و مش واقفين ساكتين
و ربنا معانا و معاهم

TAFATEFO said...

لقاء الجزيرة مع نزال ومصطفى الفقي بخصوص مطالب حماس على المبادرة المصرية وزيارة وفد حماس أهو

http://www.youtube.com/watch?v=s0u3qK0Z5yk&feature=channel_page

في لقاء أذاعته الحياه امبارح مع رجل استشهد ابنه في مستشفى مصريه وكان استشهد والده الفلسطيني دفاعاً عن أرض مصر ودفن في مصر مع شهداء الحرب .. هو فيديو صعب لرجل صابر يحمد ربه أن كرمه باستشهاد ابنه إبراهيم ويدعو اله أن يجمع ابنه بإبراهيم ابن محمد عليه الصلاة والسلام في الجنة .. لقاء صعب

http://video.google.com/videoplay?docid=4997500744144596995&hl=en

TAFATEFO said...

على فكره في لقاء نزال و الفقي نزال بشر الأمة الإسلامية بنبأ مقتل 12 جندي إسرائيلي اليوم

Anonymous said...

ليه نافذة حساب الجوجل في التعليقات لا أراها ؟!في أشياء غريبة تحدث معي وروابط تختفي في مدونتي وباقي المدونات....هل حدث مع أحدكم شئ
مماثل؟أفيدونا أفادكم الله
حرة المداد

مواطن مصري said...

يا نوارةةةةةةةةةةةةةةةةةةةةةة شوفي الفيديو دة


http://www.youtube.com/watch?v=8sznMP3dnCg


عشان لما بقولك لازم يكون هناك
قناة على اليوتيوب لفلسطين تصديقني على فكرة


قناة وزارة جيش الدفاع الصهيوني من اعلى مشاهدات

09 January 2009 20:28

Anonymous said...

اولا الف حمدالله عالسلامة يا ست نوارة
بس بعتب عليكى
يعنى همو انتى كنتى متوقعة عدم اللامؤاخذة انهم هيعدوكو
لية شرفا لاسمح الله
وطنيين واليعاذ بالله
اللى حصل دة كان لازم يحصل
لان دول صهاينة اكتر من اليهود نفسهم
عالاقل اليهود بيحاربو علشان وهم فى دماغهم
انما دول مجرد كلاب

دول شغل المظاهرات والاحتجاجات والمحامين مينفعش معاهم
الكلام دة مع نظام راقى ومتحضر نقول ماشى
انما دول مايفهموش اللغة دى
دول مايفهموش الا لغة واحدة بس

زى ماقولتلك قبل كدة المصريين
معركتهم الاولى لازم تكون فى مصر

معلش
والف حمدالله عالسلامة
وكويس انها جت على قد كدة


احمد سعيد

مواطن مصري said...

يا طفطف و نوارة عاوزين نعمل قناة لفلسطين عيب اوي تبقى قناة وزارة الدفاع الصهيوني من اعلى القنوات

حـنــّا السكران said...

معليش ..انتم عملتم اللي قدرتوا عليه , الحمد لله على سلامتكم جميعا , و انشالله يجي يوم قريب , نقدر كلنا نعمل الشيء الضروري و المهمّ و اللي هو مفتاح لكل ما بعده , وهو اننا نغيّر واقعنا المزري والمؤسف . اللي مكبّلنا و مخلينا عاجزين نعمل أقل واجب .

حـنــّا السكران said...

ذكّرتيني بقصيدة تميم البرغوثي

( مين فينا اللي تحت الإحتلال )

أكون أو لا أكون said...

بداية المشوار خطوه...
جزاكم الله خيرا

SOLITUDE® said...

مكانش ينفع ننزل بأي حال من الأحوال
عدد الشباب اللي كانوا موجودين قليل جدا...واللي منهم يعرف يسد ويستحمل الضرب أقل

محتاجين عدد كبير من الناس وتغطية صحفية عشان نعمل خطوة زي دي

بجد الواحد مش عارف يعمل ايه تاني...حاجة تقرف

شكرا على الفيديوهات يا نوراة...وياريت ننزلها على الجروب بتاع القافلة على الفيس بوك هي والصور

Unknown said...

أخر فصول المؤامرة

U.S. seeks ship to move arms to Israel from Greece (Reuters)

مواطن مصري said...

و بعدين لازم يكون في امن بيستقلبكم امن رسمي هو انتو قليلين يعني دي تشريفة ترحيب


و بردو الامن الي بتقولي رجع معاكي دول بيحموكي اصل مش بعيد تكون حياتك معرضة للخطر مش لازم يحمو كتائب الشهيد مالك

:)))

الخوجة said...

الف حمد الله على السلامة طوال اليوم وانا اسال عليكم بالجايكو بعد ماتوقف ودعيتهم لموقع جديد شغال لكن عذرا ان لم نشارك معكم كبرنا بالسن البركة بالشباب
الموقع الجديد اللى شغال اللى طفاطيفو اشترك ومكملش
http://brightkite.com
وبعدين شوفى ليك موبايل تانى بكاميرا ضد الاهتزاز

Anonymous said...

الحمد لله ياجماعةأخيراو بعد محاولات كثيرة فاشلة لأرقام فواتح متعددة، عرفت الفاتح الصحيح لغزة(ذكره بالامس د/حازم شومان على قناة الرحمة جزاه الله خيرا) و لسة فيه أرقام هواتف شغالة في غزة...أنا اتصلت وبعد عدة محاولات يقال فيها ان الهاتف مغلق الحمد لله رد عليا أشخاص في غزة مرتين...الله على صبرهم وثباتهم!...أناكنت بارتعش وصوتي مخنوق ..قلت لهم:أنا من مصر-باتصل عشان أطمئن عليكم- ربنا ينصركم ويعزكم-انتم شرف الامة-احنا حاسين اننا بنتدبح وعاجزين -احنا بنحاول بكل ما نستطيع نصرتكم-فيه ناس كتير حاولوا يروحوا للمعبر بس السلطة مانعاهم وحاطين لهم حواجز كأنها حواجز اسرائيلية-النصر قريب باذن الله(وعد الله الذين آمنوا منكم وعملوا الصالحات ليستخلفنهم في الأرض...الآية)-احنا معاكم بقلوبنا وبكل ما نستطيع-اثبتوا خلف المقاومة بس هما في المرتين كان ثلاث أرباع كلامهم ..الحمد لله-احنا صابرين-الحمد لله احنا ثابتين مع المقاومة-ربنا يأجركم على شعوركم، وشعرت أنهم سعداء بالاتصال
.
كلموهم يا جماعة دا أقل واجب...الفاتح00970599 وبعدها أي ست أرقام. لاتيأسوا أنا حاولت كتير والحمد لله أخيرا وصلت.على فكرة الرقمين اللي ردوا عليا كان أول 3 أرقام من الستة
147

يعني 00970599147 ثم أي 3 أرقام.حرة المداد- مدونة عرائس الشمع

حرة المداد said...

الحمد لله ياجماعة ...


أخيراو بعد محاولات كثيرة فاشلة لأرقام فواتح متعددة، عرفت الفاتح الصحيح لغزة (ذكره بالامس د/حازم شومان على قناة الرحمة جزاه الله خيرا) و لسة فيه أرقام هواتف شغالة في غزة...أنا اتصلت وبعد عدة محاولات يقال فيها ان الهاتف مغلق الحمد لله رد عليا أشخاص في غزة مرتين...الله على صبرهم وثباتهم!


...أناكنت بارتعش وصوتي مخنوق ..قلت لهم: أنا من مصر-باتصل عشان أطمئن عليكم- ربنا ينصركم ويعزكم-انتم شرف الامة-احنا حاسين اننا بنتدبح وعاجزين -احنا بنحاول بكل ما نستطيع نصرتكم-فيه ناس كتير حاولوا يروحوا للمعبر بس السلطة مانعاهم وحاطين لهم حواجز كأنها حواجز اسرائيلية-النصر قريب باذن الله(وعد الله الذين آمنوا منكم وعملوا الصالحات ليستخلفنهم في الأرض...الآية)-احنا معاكم بقلوبنا وبكل ما نستطيع-اثبتوا خلف المقاومة .


بس هما في المرتين كان ثلاث أرباع كلامهم ..الحمد لله-احنا صابرين-الحمد لله احنا ثابتين مع المقاومة-ربنا يأجركم على شعوركم، وشعرت أنهم سعداء بالاتصال.
.
كلموهم يا شباب دا أقل واجب...اعتذروا منهم عن تقصيرنا وعجزنا ....شدوا أزرهم


الفاتح 00970599 وبعدها أي ست أرقام.


لاتيأسوا أنا حاولت كتير والحمد لله أخيرا وصلت.


على فكرة الرقمين اللي ردوا عليا كان أول 3 أرقام من الستة
147

يعني 00970599147 ثم أي 3 أرقام.


انصروا اخوانكم ولو برفع روحهم المعنوية وحثهم على الثبات وتذكيرهم بوعد الله لهم بالنصر وبأننا معهم .

حرة المداد said...

أخ لنا في غزة يطلب عوننا....




اتصل بي أخ من غزة كنت قد كلمت عائلته من قبل وطلب مني أن أساعده في الوصول لأي معلومات عن خالة له دخلت ضمن الجرحى الذين دخلوا للأراضي المصرية وانقطعت أخبارها وهم قلقون عليها.


اسمها منال العريني -مصابة وبترت ساقها جراء القصف-دخلت الى الاراضي المصرية للعلاج.


لا يعرف ان كانت ماتزال في مستشفى العريش أم تم نقلها للقاهرة.


الرجاء ممن يستطيع السؤال عنها ومعرفة أخبارها في أي مستشفى به جرحى فلسطينيين في العريش وفي القاهرة أو يستطيع سؤال أحد الأطباء أو العاملين في هذه المستشفيات أن يبلغني لأطمئنه.وجزاه الله كل خير.


رجاءا نشر هذا الطلب ليصل الى أكبر عدد ممكن.

Anonymous said...

تصدقي هذا اثبتلي ان السيادة المصرية لا تمارس فقط على الفلسطينين
على كل حال شكراً على المجهود

Anonymous said...

بس سؤال ثاني مش لو أخذت معكم مصور قناة ال BBC أو الجزيرة
كان وصلتو بسرعة

TAFATEFO said...

وكمان

د. عبدالله الأشعل وصف المبادرة المصرية بان إسرائيل هي التي وضعتها وأنها أعلنت في القاهرة .. يعني زي هولوكوست غزة .. وفضح قرار مجلس الأمن العبيط وانه قرار عبيط غير ملزم وصيغته ضعيفه وعلشان كده كوندوليزا معترضتش عليه .. قرار مهلهل وملوش لزمه

http://video.google.com/videoplay?docid=-5371208262351191648&hl=en

وده تقرير الجزيرة عن المظاهرات اللي حصلت في محافظات مصر

http://www.youtube.com/watch?v=t4FkgSfdaq4&feature=channel_page

ماجد said...

دة واللى من الا ول انهم احسن مننا هما عدوهم محتل ارضهم واهنا اللى احتلنا محتل مع الارض نخوتنا ودينا ووافكارنا و وكرامتنا يارب يا تهديهم يا تخدهم

Kontiki said...

صباح الخير
حمدالله على السلامة
بس سؤال عشان الفيديوهات مش واضحة هى القافلة بتاعتكوا كان فيها اغذية و ادوية واسعافات ولا تصوير ودعم ادبى لغزة ؟
عموما فى الحالتين كان المفروض ملايين الشباب والبنات يروحوا بس للاسف كل واحد مشغول بلقمة عيشة و همومة ومش عارفين نلاقيها من القرف و الفساد و التعليم البايظ و الغلا اللى جوا و لا الحرب والمجازر و محاولة مساعدة اخواتنا اللى برا

muslima said...

الف حمدالله على السلامة

قدر الله وما شاء فعل

يكفيكم شرف المحاولة ولكم الاجر ان شء الله

مش عارفة اقول ايه
فى حاجات كتير بقت ملخبطة معايا

شوفوا اخواتى الكرام

موضوع غزة هاينتهى هاينتهى

مجلس امن قوات دولية

اى لخبطة اى قرارات المهم انه هاينتهى

المشكلة اننا بننسى يا جماعة دى الحقيقة

حرب تموز 2006 فى لبنان خلصت مين بيتكلم عليها دلوقتى

مروان البرغوثى مثلا ياترى فى حد فاكره

حاجات كتير كتير

احنا شعب بينسى لما الموضوع يهدى ويتحل قصدى يتفقوا علينا كلهم

وحسبنا الله من قبل ومن بعد

احنا عايزين نخليهم هما فى ناحية يتفقوا يروحوا ييجوا يسلموا على بعض يحضنوا بعض

واحنا فى طريقنا بجهد منظم

نشعلل القضية اكتر ونبين زيف الصهاينة المحتلين

مذبحة غزة فعلا كشفت اقنعة كتير ومش عايزين الفرصة تفوتنا خصوصا ان الجميع هنا بفضل الله لهم هدف واحد

يارب ما ننسى ياااااااارب

وعلى فكرة

انا وجدت موقع مماثل لليوتيوب بس عربى ياريت لو نحط عليه الفيديوهات بتاعتنا ونضاهى بيها اليوتيوب الى مسيطر عليه اللوبى الصهيونى ده يبقى كويس قوى

وهذا هو الرابط

http://www.ikhwantube.org/

كل الناس اللى شاطره فى الفيديو تنشر عليه والله المستعان

Zeinobia said...

حمد الله على السلامة يا توارة
كان نفسى ابقى معاكم

Unknown said...

حمدالله علي السلامه
بجد كان نفسي ابقي معاكم
(: