Thursday 8 January 2009

Anti Zionism Jews

انا عايزة منكوا خدمة
توزعوا الصور دي على اوسع نطاق، ليه بقى، لان مافيش افيد لنا، بعد المقاومة، من الناس دي، اسرائيل عايزة تقول للعالم انها هي اليهود واليهود هي وان اليهودي لازم بالضرورة يبقى صهيوني، وبما ان موضوع الهولوكوست ده عامل هسهس في الضمير الاوروبي (وبجد مافيش داعي اننا نتريق عليه لان دول بني ادمين واتعذبوا من غير اي ذنب وماتوا ومش ذنبهم ان فيه تجار تاجروا بعذابهم - خصوصا بقى ان الفقرا هم اللي كانوا بيتحرقوا والاغنيا كانوا بيدفعوا رشوة ويهربوا من المحرقة وكانوا بيتعاونوا مع النازي ضد فقراء اليهود كمان - مش احنا لوحدنا اللي عندنا اندال وخونة) وعملوا قانون ضد معاداة السامية كرد فعل لاضطهاد اليهود، بقى حتى المتعاطفين مع الفلسطينيين مش قادرين يتكلموا بكل راحتهم لان اسرائيل عرفت تروج الى فكرة ان اللي يهاجم اسرائيل يبقى معادي لليهود
اليهود اللي ضد الصهيونية، واللي بيقولوا اسرائيل ما تفرقش حاجة عن النازي، (غير انهم ناس كويسة يعني ومش مرضى نفسيين زي الصهاينة) وجودهم اكبر دليل على ان معاداة اسرائيل لا تعني ابدا معاداة اليهود
انا ليا صحاب اجانب بيقولوا لي البيض بالذات عندهم حساسية شديدة من الهجوم على اسرائيل (انا اقصد الرأي العام - الناس العادية) بالرغم من انهم مش بيموتوا في اسرائيل ولا حاجة، بس عشان تأنيب الضمير عشان الهولوكوست
ياريت محمد دماغي ورحاب ينشروا الصور كمان على المدونة بتاعة غزة - دول تقريبا ناتورا كارتا ومهم اننا لما نكلم الرأي العام العالمي نركز عليهم
وانا انبسطت جدا لما اردوغان قال ان العثمانيين اووا اليهود لما هربوا من الاضطهاد، عشان بجد ولاد ال..مافيش حد له فضل عليهم قدنا على مر التاريخ من ايام الخلافة العباسية في بغداد وكل مرحلة الاندلس وادلعوا دلع ماحدش شافه، ولا حتى المسلمين والمسيحيين اتعاملوا المعاملة دي، وهرتزل لما جه العالم العربي عشان يجند اليهود العرب قال ان ماحدش متحمس لان الحياة الناعمة واستمتاعهم بالحرية بددت حماسهم اليهودي، والحكاية دي لازم يتركز عليها عشان لازم نوصل للعالم انهم بيعملوا فينا اللي اتعمل فيهم من غير ما يبقى لنا احنا ذنب، وان الصهيونية دي ظاهرة مرضية زيها زي النازية بالظبط
ومش عايزة والنبي نظريات المؤامرة بتاعة: آه دول يهود ولؤما
عشان ده كلام عنصري بجد، وانا مؤمنة بنظرية المؤامرة وكل حاجة، بس مش علاولة كده، دي فايدة كويسة لينا

15 comments:

Kontiki said...

صباح الخير
الصور معبرة جدا الانسان مهما كان لونة او دينة لازم يرفض حروب الابادة السياسة اقذر لعبة فى التاريخ واللى بيدفع التمن دايما الشعوب

Kontiki said...

صباح الخير
الصور معبرة جدا الانسان مهما كان لونة او دينة لازم يرفض حروب الابادة السياسة اقذر لعبة فى التاريخ واللى بيدفع التمن دايما الشعوب

حرة المداد said...

على فكرة المذيع أحمد منصور وبرنامجه المميز بلا حدود على الجزيرة..زاستضاف واحد من أكبر الحاخامات الذين يترأسون منظمة تعمل ضد دولة اسرائيل(لا أذكر اسمه ولا اسمها للاسف)وذلك من عدة أشهر والحلقة موجودة على موقع الجزيرة

Anonymous said...

مواقع الويب الموجودة في الصور بتاعتهم عليها مواد إعلامية ووضوعات وصور مفيدة في نفس السياق.. أدخلوا عليها

Unknown said...

ياعم باصي لنا لنك الله لا يسيئك

Anonymous said...

http://www.jewsagainstzionism.com/
http://nkusa.org/
http://nkusa.org/Foreign_Language/Arabic/decloration%20Arabic.pdf
http://nkusa.org/activities/Demonstrations/20July03/ArabicVersion.gif
http://nkusa.org/articles/AlMajallah.htm
http://nkusa.org/Foreign_Language/Arabic/AramicaDec2004.pdf
وعلى نفس الصفحة الرئيسية لنكات لموضوعات بلغاات أخرى تحت هذا العنوان (DOCUMENTS IN
OTHER LANGUAGES)
=======
http://nkusa.org/Books/index.cfm
=====
وفي نفس الصفحة الرئيسية برضه لنكات لمواقع أخرى ويوجد لينك لارسال الصفحة بالميل.. مسافة كليك وهو أضعف الإيمان.

Anonymous said...

ومن الآخر الصفحة كلها ممكن نتبناها ونعمل لها موقع عربي بكل محتوياتها ونحطهولهم في أي حتة على بلوجر أو دومين خاص
حد يترجم والجرافيكس عليا.. مين رفع صوباعه؟

dodda said...

روحى يا شيخه ربنا يكرمك ويبرد نارك
يا اميره يا بنت الامرا

عبده البرماوي said...

علم وسينفذ يا افندم
وأرجو الدعوة لكورس عن الصهيونية عشان الجيل الجديد الهمام ده يعرف ليه بنقول صهاينة وما يهمناش نقول يهود. الصهيوينة ظاهرة استعمارية وليست دينية، وهو ده الوجه الأخر لكلام نصر الله الرائع عن الاستعمار فى خطبته الأولانية. الكورس ده نعمله أونلاين يا نواره وده مش صعب تنفيذه. أنا مهتم جدا بمكافحة الصهيوينة وهافضل أطالب بإعادة اعتبارها مساوية للعنصرية والاستعمار. وهافضل أدعو الرفاق فى كل المدونات أن يتحلو بهذا الوعى لأنه أول طريق تخلصنا منها. تحياتى يا زعيمة

Maha said...

خدي بالك إن الناس دي مش كويسة ومحترمة وجميلة .. أقصد اليهود اللى مش صهاينه ؟؟ ولا معنى اللى بيعملوه ده إنهم بيحبوا المسلمين

كل ما في الأمر إن عند اليهود في التوراة إقامة دولة يهودية أو إسرائيلية ده معصية .. لأنهم -اليهود يعني- مستنيين واحد ربنا حينزله هو اللى حيقاتل وهو اللى حيعمل لهم دولة .. وهم عارفين إن إقامة دولة دي نذير لنهايتهم كيهود وده كله موجود في التوراة وممكن تتأكدي من كلامي ده زي ما تحبي

محمد حمدي said...

البوست والصور نزلو هنا

http://nowingaza.blogspot.com/2009/01/jew-is-not-equal-to-zionist.html

شكرا ليكى يا نواره على دعمنا

تحياتى

Unknown said...

مها
طب انا اعمل فيكي ايه انا دلوقت؟ اشدك من ودنك؟

يا بنتي

لما ناس جايين لي على الطبطاب يهود وضد الصهيونية
لا انا اللي رحت جندتهم ولا دفعت لهم فلوس

اقوم اقول لاااااااااا دول في جوة قلبهم بيكروهنا

ما يكرهونا ياختي

هو احنا مين اللي بيحبنا
من جمالنا قوي؟

Maha said...

ههههههههه

أنا مقلتش حاجة أبدا ..نستغل الموقف آه .. نستغله لأقصى الحدود .. كل اللى حبيت أضيفه إننا مننساش في الهوليلة دي مين دول وبيعملوا كده ليه .. وبعد كده نعمل اللى نعمله مش مشكلة

بما إنك اون لاين بقى أنا بس حبيت أقولك إني حبيت مدونتك قوي .. أنا لسه عارفاها من ييجي كام يوم بس .. لكنها دلوقتي قفزت إلى مواقعي اليومية والمفضلة بسرعة رهيبة .. ولسه بقول لصاحبتي على الماسنجر إني حبيت مدونتك لأنها بتقدم مواضيع ومادة مهمة وفي نفس الوقت باسلوب جميل ومرح

بس عايزة أقولك في نفس الوقت إني أحيانا مش بفهم .. يمكن لأني مش متابعة الأخبار كويس ومعظم تدويناتك بتكون تعليقا على اخبار مختلفة

بس عموما مدونة جميلة جدا :)

جزاكم الله خيرا ^_^

كريم عاطف said...

على فكرة هما مش بيعملوا كده إنسانية ولا حبا في الفلسطينيين ولا ايمانا بأن الحق لازم يرجع لصحابه
هما بيعملوا كده عشان هما بيعتقدوا ان اليهود محرم عليهم الدولة ولازم يفضلوا مشتتين لغاية لما المسيح ينزل وفيه نبوءات عندهم بتقول إن قيام دولة لليهود هي علامة لفنائهم
يعني بيعملوا كده عشان مصلحتهم
أما حته هما "يهود ولؤما" فده صحيح وربنا قال في كتابه الكريم آيات كتير تدل على كده
وما تنسيش الآية
لتجدن أشد الناس عداوة للذين آمنوا اليهود والذين أشركوا

alshaimaa said...

نوارة..يمكن ثاني مرة بس اعلق عندك..بس بجد شكرا على البوست..

بالنسبة لكريم و مها..صحيح الكلام اللى قلتوه..لكن الموضوع ببساطة عدو عدوي هو صديقي..و فرق تسد..
من اهم النقاط اللى تم تغيبها عن العالم هي الصهيونية السياسية و الفرق بينها و بين الصهيونية الدينية و بينهم و بين الديانة اليهودية نفسها..
و من اهم النقاط اللي بتجنن الصهاينة نفسهم، هو تذكيرهم بالحقيقة اللى بدل التاريخ لاجلها و هي تعاون هرتزل و قيادات الصهيونية مع النازية..للوصول لماساه تشجع اليهود على الهجرة من اوروبا لما يتطلب منهم...

الموضوع واسع جدا و كبير..و يمكن المسيري و نورمان فرينكشتين و غيرهم غطاه بتوسع ..بس فعلا احنا بحاجة اننا ننشرة بينا كشباب، و بين العالم عشان يفهم الحقيقة اللى غيبت عنه..

شكرا نوارة مرة تانية..