Monday 1 February 2010

الفضائيات تحترم نفسها بقى

الناس في الفرح الهيستيري والزعل الهيستيري طبيعي يقولوا كلام فيه مبالغات وكلام فارغ كتير لانهم بيبقوا مش في حالتهم الطبيعية، مش معقولة الفضائيات تاخد كلام من الناس وهم في الحالة دي وتذيعها كده وتستفز كل الناس حتى زمايلي في الشغل اللي بيشجعوا كورة اصحى الاقيهم باعتين لي رسايل بيشتموا في مصر من كتر اللي الفضائيات عملته، وواحد قال لي انه كسر التلفزيون وهو بيكلمني يعتذر لي على الرسالة اللي بعتها وكان بيقول فيها: ...أم مصر
مقارنات الناس للفوز ده بنصر اكتوبر مبالغات، هم ما يقصدوش بالظبط كده، مش قاعدين وحللوا وفكروا وطلعوا بنظرية، دي ناس فرحانة وبتقول اي كلام، استروهم ليه الفضايح دي؟
ده واحد بيرقص في الشارع، مش واعي قوي هو بيقول ايه، وممكن يكون كان شارب وللا حاجة، مش كل الكلام اللي بيتقال في اللحظات دي يتاخد بجدية، عايزين يحتفلوا يجيبوا ناس تقول تحليلات رياضية يجيبوا الناس وهي بتحتفل ويبقى فيه شوية سنس ان مش كل حاجة الناس تقولها ينزلوها
اسم الله الديمقراطية مقطعة نفسها قوي؟ يعني لو واحد قال: ينعل ابو مبارك في الارض..كانوا نزلوها؟ هم ليه مصممين يصورونا بصورة مش كويسة، الناس لما بتبقى بعقلها بتقول كلام كويس، وساعتها بقى ما بنشوفش الفضائيات تصور معاهم وتسمع منهم
عمالين يقولوا بنحب مصر بنحب مصر ومافيش اي امارات للحب ده خالص، هو الحب بالكلام
التلفزيون جايب شيخ المذيعة تقول له: احنا منتخبنا بيوصف بانه منتخب الساجدين عايزين نعرف انواع السجود وفضل السجود
هههههههههههههههههههههه
طب الناس في الشارع ما تتحاسبش لانها فرحانة، والقائمين على الاعلام ما يتحاسبوش؟ لانهم ايه؟ فرحانين، طيب، عم الشيخ ده اللي طالع بيتكلم على الماتش والسجود ده ماله... خليتوا الناس تكسر التلفزيونات حرام عليك، مش بفلوس الحاجات دي؟

4 comments:

Anonymous said...

http://www.rosaonline.net/Daily/News.asp?id=42237

جمال مبارك سجل الانجاز بكاميوته الخاصة وعلاء بيه عيونه اغرقت بالدموع

وكان هتاف جمال مبارك داخل غرفة الملابس هو

منتخبنا كويس زى ما قال الريس

Mahmoud Ahmed said...

ده سببه بسيط جدا
اننا مش بنعرف نفرق بين الحاجات المهمه و الحاجات الغير مهمه
طبيعي اننا نفرح اننا فزنا و انا اول واحد فرحان جدا بس الفرح ليه اصول و ليه طريقه للتعبير
لأنك كل الناس انظارها ليك

هو برضه الناس في الدول الكبيره مش هتبص على الفضائينين الى حلتنا بس برضه لازم يكون فيه حدود و نراعي الناس الى عايشه جوه البلد ده و بتتفرج عليها

انما الشيخ ده بقي
انا لو مكانه كنت سبت الحلقه و قمت

هو على اي قناه عم الحاج ده ؟؟

صيدلانيه طالعه نازله said...

ههههههههههههههههه
حلوه فضل السجود و انواعه دى
طب ما سألتوش السجود فرض و لا سنه
عالم معاتيه بجد
نشره الاخبار امبارح كانت كلها عن افراح الشارع و لقاء مع اهل جدو

طب اقولك حاجه تانى يوم ما فزنا على الجزائر من 3 ايام
فى نشره الاخبار و الله العظيم

جابوا اغنيه بتقول
لو كنتوا نسيتوا اللى جرى هاتوا الدفاتر تتقرا

شفتيش وكسه اكتر من كده

شمس العصارى said...

لالالالالالالالالالالا
ناس ايه يا هانم
فين الناس دى
الناس دى خارج نطاق الزمن المصرى
ههههههههههههههه
اصل يا ستى الناس دى محدش مات لها فى الحرب و عم و لا خال و لا اب استشهدوا
يبقى حيعرفوا ازاى معنى الحرب و قيمة الدماء الى اريقت
ده شئ بديهى يا نوارة
انتى بتتكلمى فى ايه بس
و بعدين الست الى بتسئل على السجود معزورة يعنى هى سجدت قبل كده
نلتقى بعد الفضائيات