Sunday 31 May 2009

نخلة لما تبقى تقع على ام نافوخك تفلقك نصين يا عادل

هو ده يا رب، هو ده يارب، طفاطيفو جاب لي صورته، وبيقول ان واقعة الاغتصاب دي مش مذكورة غير في الديلي تلجراف
ده بقى لنك لشهادات الضباط الامريكان قدام الكونجرس، عمالين يحكوا كوارث ويقولوا احنا اسفين، اسفين؟ يعني قتالين القتلا دول ح يسيبوهم؟ طب فيه واحد عمل عصيان عسكري وده كويس، فيه واحد تاني عمال يترعش وده خلاص ما بقاش نافع لكن الباقيين، ح يتسابوا من غير محاسبة بس عشان قالوا احنا اسفين؟ اه، يعني هي جات على دول، السيستم كله حقير، كمان افغانستان، هو ماحدش حاسس بيهم ليه؟ مش بني ادمين دول؟
عبده البرماوي بعت لي اللنك ده بيتكلم عن المقاولين، لا مش نادي المقاولين يا نبيه انت وهو، الكورة اكلت دماغكوا، اسمعوا
الخبر بيقول باللغتي العربتي الفسحاااااااااااااااااا
 الآتي بالمختصار يعني انا عارفة ان مالكوش خلق تقروا ده كله:
متعاقدو القطاع الخاص وابو غريب
يتم الآن التحقيق مع شركات مقاولات القطاع الخاص لضلوعهم في قضايا التعذيب في سجن ابو غريب. شركة سي ايه سي آي، وشركة تايتان. سي ايه سي اي قاولت على محقق، وشركة تايتان قاولت على اتنين مترجمين من ضمنهم مين؟ عادل نخلة الشاب المترجم المصري الامريكي اللي راح رفع راسنا واغتصب عيل عنده خماشر سنة. وهم كلهم على بعضهم اربعة فأط لا غير
ستيفين سيتفانويتش، جون اسرائيل، تورين نيلسون، والمقروص في وراكه عادل نخلة. كلهم كانوا بيشتغلوا في كتيبة المخابرات رقم ميتين وخمسة العسكرية. هلبت بقى سي ايه سي اي دي بتعمل اعلانات بتطلب فيهم مجموعة من المرضى النفسيين، اللي هم محققين عشان يروحوا اسم الله على مقامكوا افغانستان، والعراق وكسوفو وما اعرفش الاخرانية دي ايه دخلها.  وزالوكا العمود بتاع الاعلانات المبوبة وزائف خارية على الموئع بتاعها
هناهوت: لله واد مريض وابن **** وابن ***** عشان يكاونتر تيروريزم معانا
لا والاكادة بتطمن الناس المتقدمين الى انها بتعامل مستوظفينها احسن معاملة، وبتريحهم، (اه والله مكتوب كدهون ينفس ذات التعبير، بتكومفورتهم، لا مؤاخذة) وبيعملوا تحت "اشراف متوسط" يعني ما تخافوش، لا ح نخنقكوا ولا ح نقول لكوا جبتوا الاعترافات دي ازاي؟ بيني وبينك ربنا وهو شاهد عليك، تجيب لي اعترافات احبك، ولزمن ولا بد تلتزم بالتوب سكريتية
(اهو للي مش لاقي شغلانة، ح تروح تاكل وتشرب وتضرب وتغتصب وتاخد فلوس فيه احسن من كده؟)
ايه سر اللجوع للمعذب والمغتصب الخاص؟ لأن مؤخرا الجيش قلص عدد المعذبين والمغتصبين (الظاهر والله اعلم دماغهم لسعت وللا حاجة، بس انا قرايبي في امريكا بيقولوا ان المحاربين اللي جايين من العراق بيلفوا في الشوارع يشحتوا)
بس لا مش هو ده السبب انهم وفروهم، لانهم يتمنوا واحد مجنون، لكن هم وفروهم عشان مرتباتهم، اه، شفتوا النتانة؟
لا واسمع اللي جاية دي عشان انت بتحب الكلام ده
قالوا يوفروا مرتباتهم ويصنعوا بالفلوس دي اسلحة اكثر تطورا احسن، وبدل ما يبقى قاعد له كام واحد مهفوف على دكة الاحتياطي وبيدفع له مرتب وينكن يعمل مشاكل ولما يلاقي نفسه فاضي يغتصب زميله اللي قاعد جنبه
اهو يأجر واحد بالاغتصابة ولما يخلص شغله ياخد عرقه ويتكل على الله
وبرضه بدل ما يرجع لهم المقاتلين في الجيش مجانين او يفضحوهم زي الواد ده
طبعا فيه ناس مجانين اتقدمت للوظايف ومن ضمنهم اللي ينشك في جنابه رافع رايتنا سي عادل
عموما مش كل واحد اسمه عادل يبقى مصري، مش معاه جونسية امريكاوي؟ يبقى امريكاوي، انا ما اعرفوش يابني الراجل ده
طبعا الشركة طلعت بيان شبه الكلام اللي باقوله كده تقول فيه: لا ممكن ابدا تحملونا المسئولية، احنا يا عمي واسطة خير، قلتوا لنا هاتوا لنا محققين عملنا اوعلان واهي لقمة عيش يستنفع بيها الشيباب بدل مدة الايد وللا القعدة على القهوة
ايه بقى؟ مغسلين احنا وضامنين جنة؟ احنا عن نفسنا وفقنا اغتصابين في الحلال وادي اخرتها، وقال على رأي المثل، ما ينوب المعزز  الا تحقيق جنونه
انا ما اعرفوش يابني الراجل ده ايه اللي لما تقول له يا شفيق يرد؟ ما انشالله عنه ما رد
-----
احنا بقى عايزين صورة المضروب في مصارينه عشان نعمل لاهله فضيحة رباية السو اللي عرنا زيادة ما احنا معرورين
هو فيه ايه؟ هو احنا حد دعا علينا ساعة مغربية: روحوا، الهي تصبحوا على فضيحة وتتمسوا على جرسة ويشلحكوا دنيا وآخرة يا ولاد ازيس واوزوريس يا مقاطيع؟
عبده البرماوي قال لي الكلمتين دولم في الميل: 
 ده جزء من الفضيحة

المترجم المصرى عادل نخله اللى اسمه اتذكر متوظف عن طريق شركه اسمها تايتان

وأنا شاكك فى ضلوع طرف مصرى فى الحكيوه

بالذات ان فيه مترجم مصرى برضو اتقبض عليه بتهمة تهريب معلومات

أنا عارف ازاى المقاولين والشركات الامريكية بيشتغلوا من خلال شركات مصرية

عاوزه تبدأى حمله

سميها نحن نشعر بالعار

وطالبى بفتح تحقيق عن ضلوع شركات مصرية فى مد الاحتلال بالعمال سواقين ومترجمين وغيرهم

زى ما عملوا وجرسوا الشركات اللى اشتغلت مع صدام

فاكره الجلده واتهامه بالضلوع فى فساد مشروع النفط مقابل الغذاء

طب ليه نسكت عن ولاد الوسخه دول
--------------
انتهى كلام عبده البرماوي وح يدخل دوقت يمسح بيا البلاط، اولا: عشان قلت ان هو اللي باعت اللنك
 ثانيا عشان نشرت الميل بتاعه، بس اصله بيقول كلام واعر جوي، وانا واحدة على قدي، بصراحة مافهمتش هو بيقول ايه، اصل عبده ده انتوا ما تعرفهوش، اللهم صلي ع النبي متساف ومتنور ومتعلم ما شاء الله
حد بقى يقرا كلامه ويقول لي قصده ايه؟

12 comments:

مواطن مصري said...

نوارة ملحوظة شركات الامن عموما بتاخد الاشخاص بغض النظر عن جنسيتهم في العالم العربي و كانو نزلو اعلان في الجرايد طالبين مترجمين


و بمرتبات خيالية

انما تورط حكومة و الكلام دة انا مش مصدقة

انما اشخاص عاديني بيروحو يقدمو شغل في شركةة ليها فرع في العراق و اول ما بيروحو

بيقوللهم على الي فيها

Unknown said...

اهم راحوا اغتصبوا العيال وفضحونا
لا
بس عادل ده امريكاوي
امريكاوي مالناش دعوة بيه
تلاقيه ما اتولدش في مصر اصلا

Unknown said...

اتارى سى اوباما رافض طلوع الصور
حسبى الله و نعم الوكيل
لازم يتفضحوا العنصريين الهمج

عبقرينو said...

الكلام صح 100 100 وشوفته بعيننى فى الاردن سنة 2007 فى تجنيد مصريين من قبل شركة تيتان للعمل فى افغانستان والعراق واللى كان المسئول عن الملف ده امريكى من اصل فلسطينى للأسف يدعى انور كراج
وكنت انا اللى بالعب ضده مع المصريين اللى كان بيغريهم بمرتبات خيالية 10 آلاف دولار شهريا وزيارات لأهلهم فى مصر فى مقابل العمل لمدة عام فى افغانستان
واللى انا كنت باعمله انى كنت باقعد مع المصريين دولت واوضح ليهم الوضع واقولهم انى تيتان دى فرع من بلاك ووتر وكان بالصدفة الجزيرة عاملة فيلم وثائقى عن بلاك ووتر وربنا ستر وقدرت امنع شاب مصر من الذهاب هناك
طبعا السفارة فى البطيخ ولا تعرف اى حاجة ومش هاتقف معايا لو بلغتهم فاضطرت العب انا وتيتان على دماغ الواد لغاية لما نشوف مين اللى هايكسب
سؤالك ازاى عرفت وازاى اتعاملت؟؟المشروع اللى انا كنت فيه كان مأجر ليا فيلا فى ارقى منطقة فى الأردن وهياعبدون فى الاردن اللى معظمها وزراء ونواب اردنيين وكانوا هما جيرانى فى الفيلا وعرفت بالصدفة لما نزل التلج على الاردن وقعدنا 3 ايام فى البيت وبكده اتعاملت مع الحارس فى تنظيف مدخل الفيلا من التلج والواد آمن ليا وحكى ليا عن الجيران وكانت تلك القصة
ياريت سفارتنا بالخارج تصحى للى بيحصل للمصريين وياريت اى مصرى فى الخارج يحس انى فيه محاولة لتجنيده او لتشغيله فى حاجة مش مظبوطة حتى لو كانت معلومات عن العدس والفول فى مصر وبخاصة فى الاردن يروح السفارة المصرية ويقابل الملحق العسكرى وبكده يكون عمل اللى عليه علشان لو حصل اى غلط هوا مش مسئول عنه مش يتحاسب من قبل السلطات المصرية لأنه استنجد بيهم وهما مش اتعاونوا معاه
لأنها بتيتدى بطلب بسيط وليكن طلب عادى وتبدأ بعد ذلك سلسلة التنازلات والسقوط فى المستنقع

عبقرينو said...

تورط حكومى بشكل غير مباشر بيحصل فى انهم مش بيتابعوا الشركات دى والمصريين فى الخارج بالذات كل همهم امن الرئيس والنظام

مواطن مصري said...

دة موقع بلاك واتر

http://www.ustraining.com/new/index.asp

Unknown said...

ياااااااااااااااادي الفضيحة

انا عايزة افهم احنا باقي لنا ايه ما عملناهوش؟

باقي لنا ايه؟

لا والمصيبة فاكرين نفسنا احسن ناس في الدنيا واللي يكلمنا نتشال ونتحط ونطول ونقصر ونردح ونشرشح

يعني نئذي الناس ونمشي نبلطج على مخاليق ربنا واياك حد يفتح بقه معانا

أكون أو لا أكون said...

انتي عاوزه صورنة تفضحيه فهمنه بس تفضحي اهله ليه ههههههههه مش حرام هم ذنبهم ايه مش يمكن عادل ده ولد عاق؟؟؟
هو أكيد ولد عاق مادام ده عمايله...!

Unknown said...

عبقرينو

نظرا لاهمية تعليقك اعدت نشره في بوست لوحده
بعد اذنك يعني

TAFATEFO said...

مش بقول مش مذكوره .. بقول مقريتهاش غير في التليجراف .. وبعدين ضفت مكان كمان قريتها فيه

وبكرر تاني انه مش مصري .. ده أمريكي .. بروجرامر اتجند بصفته أمريكي .. واشتغل مترجم .. وأدين .. وعلى باب بيته أعلام لأمريكا

انتي هتشيلي مصر وساخته ليه؟؟

TAFATEFO said...

كفايه عليها وزيادة وساخة اللي فيها .. مش محتاجه وساخة اللي بره

Unknown said...

المفروض انه يعرفنا
ازاي هان عليه كده؟
المفروض ان مافيش مصري بينسى اصله ده يبقى واحد مولود برة مصر وعاش طول عمره براها ومش بينسى اصله
اخص عليه وعلى شكله