Thursday, 7 May 2009

انا مش قلت لكوا الغباوة غباوة قلب ماحدش صدقني

طب والله الانسان المصري الشعبي بيفهم احسن من كل المتعلمين، لما يقول على واحد انه غبي يقصد بالكلمة انه الابعد ما بيحسش، او قاسي: ما تخلنيش اتغابى عليك بقى
يعني ما تخلنيش اقسى عليك
 والله فعلا الغبي غبي غباوة قلب. وانا عندي نظرية غير علمية مبنية على مافيش اساس خالص ولم يثبت عليها اي دليل ما قريتهاش في اي حتة والفتها من دماغي في لحظة تجلي وانا واقفة في الاشارة والدنيا زحمة وواحد بيتناصح وعايز يعمل غرزة ويدخل ما بيني وبين العربية اللي قدامي اللي المسافة بيني وبينها ربع متر ومتخيل انه ح يعرف يعدي بعربيته من الحتة دي وتأكدت لي نظريتي غير العلمية لما بادي اشارة عشان ادخل يمين فالعربيات اللي جاية من بعيد على مهلها اول ما تشوف الاشارة تدوس بنزين عشان ما اعديش مع ان مافيش سابق عداوة ما بيني وما بينهم ومقتنعة بهذه النظرية وما اخدتش عليها براءة اختراع ولا حاجة لاني استوحتها من التراث الشعبي
اكتبوها يمكن تنفعكوا:
كل البني ادمين مخلوقين من عند ربنا اذكيا ماحدش غبي الا بمزاجه وده نابع من انه الابعد ما بيحسش، وغلظة الحس طبعا اختيارية، وكل ما غلظ حس البني ادم كل ما ربنا ضلم على مخه
ودي انسب مقدمة للي ح اقوله:
طبعا كلنا عارفين لميس الحديدي،
واظن كلنا يا اطفال يا حلوين كنا شفناها لما راحت غزة وقعدت تقول للاطفال اللي لسة خارجين من تحت القصف نفسك تطلع ايه يا حبيبي فيقولوا لها : مقاوم
وانت-
مقاوم
يااااااا برضه مقاوم؟ ليه كده بس؟-
وراحت قايلة قدام العيال: وزي ما احنا شايفين اعزائي المشاهدين للاسف كل الاطفال الفلسطينيين عايزين يطلعوا مقاومين، ماحدش للاسف عايز يطلع دكتور ولا مهندس ولا يعمل نهضة، ولكن للاسف عايزين يطلعوا مقاومين
وقعدت تقول للاسف للاسف للاسف قدام العيال اللي بايتين في المدرسة ونصهم اهاليهم ميتة
راح واحد زئرد بتاع عشر سنين كده شدها من دراعها عشان ينبهها لكلامه: مقاومتنا هي اللي راح تعمل نهضتنا
تحس بقى على دمها؟ ابدا، بصت له وراحت باصة للكاميرا: زي ما انتوا سامعين للاسف
واكيد شفتوها مع مرتضى منصور اللي لاول مرة في حياته يصعب عليا:
استاذ ياسر ايوب، ايه تعليق حضرتك، وايه رأي حضرتك، هل وجود مرتضى منصور فعلا بيعمل مشاكل وللا غيابه بيخلي الدنيا هادية؟
قول لنا بقى اللي حصل يا سعادة المستشار...ما تحكيش بقى اللي حصل خلاص
"ياريت في الكنترول يجيبوا لنا حد يهاجم مرتضى لان الناس ح تفتكر اننا بنختار التليفونات"
وكل ده عشان واحد قال: انا باحب المستشار مرتضى
لا وشوف النباهة والمعية التفكير؟ يعني لما تقول للكنترول قدامنا نقوا لنا تليفونات تشتم مرتضى يقوم المشاهدين كده مش ح يفتكروهم بيختاروا المكالمات ولا حاجة، دول ح يتأكدوا ان المتصل ده عم فوزي بتاع الشاي والقهوة في الدور
---
مين بقى ايهاب صالح؟ اصل اتغابى غباوة قلب امبارح على نجوم اف ام وسمعته وانا راجعة:
وطبعا الكابتن قبل الفاصل كان بيتكلم عن روعة الكرة الاوروبية وتنظيمها وجمالها لكن للاسف يا كابتن جه الافريقي وبوظها
قصده على ابو ركبة ده اللي عمري ما بعرف اسمه بتاع ساحل العاج
يا سلااااااام
يا سلاااااااااااااااااام
ده ايه العظمة دي يا سيد ايهاب صالح، ايه التهذيب، والذوق، والحساسية، اللي حضرتك فيها دي؟ حضرتك قاعد في بلد افريقية، ان كيس يعني ما حدش خبرك وللا حادة
ياريت تحاول تعيشها بشكل تاني

52 comments:

مواطن مصري said...

يعرف يعدي بعربيته من الحتة دي وتأكدت لي نظريتي غير العلمية لما بادي اشارة عشان ادخل يمين فالعربيات اللي جاية من بعيد على مهلها اول ما تشوف الاشارة تدوس بنزين عشان ما اعديش مع ان مافيش سابق عداوة ما بيني وما بينهم ومقتنعة بهذه النظرية وما اخدتش عليها براءة اختراع ولا حاجة لاني استوحتها من التراث الشعبي


مستقصدينك يا نوارة


و بعدي انا كزملكاوي كرهت مرتضى منصور هو الراجل دة مورهوش حاجة غير الزمالك

الزمالك الان قادم قادم و الاهلي بيتراجع

و الاسماعيلي هياخد الدوري و احنا الموسم الي بعدية

mido said...

لميس الحديدي دخلت التليفزيون واسطة من مبارك شخصيا _و دروجبا ده بلطجي

mido said...

اسلوبها ركيك و كتابتها أكثر ركاكة و بمجاملة من ساويرس ليها في المصري

جبهة التهييس الشعبية said...

واسطة من حسني مبارك؟

ليه؟
هي مين؟
وبعدين هم غليظي الحس عاملين نادي برئاسة حسني مبارك وللا ايه؟

mido said...

حد بيتفرج علي اتكلم أصلا ؟

mido said...

كانت مشرفة علي الحملة الاعلامية لمبارك في انتخابات الرئاسة

مواطن مصري said...

لا ميدو الي كان مشرف على الحملة بتاع امين اعلام الحزب الوطني


مش لميس

جبهة التهييس الشعبية said...

طب حسني مبارك هو اللي عينها
وحسني مبارك هو اللي قالها تعمل المكياج والشعر ده اللي مخليها شكل الجرادة؟

احمد سعيد said...

مش دى الوليه اللى كانت عامله حمله على العبايه اللى الستات بتلبسها وبتقول ان دى شادور ايرانى وان دة ( مسسسسسخ ) للهويه القوميه الشعبيه البتنجانيه المصريه وانه غزو شيعى ...

اة والله باينها هيا

ايون هى

اقرى كدة يانوارة اخر بوست عند بدراوى

mido said...

و انت مالك بقي بمكياجها :))

مى said...

يا نوارة

هوه فيه حد بيتفرج على القنوات المصرية

الفضائية و لا حتى الأرضية
علشان يتفرج على لميس

!!

أنا مرة شوفتها فى الفورسيزون
و كان معاها جوزها

اللى يبدو إنه إستعجلها
فنسيت تلبس الشيميز

لدرجة كان فيه طفل واقف

قال لمامته
مامى الست ديه نسيت تلبس حاجة من فوق




خلينا إحنا بأه فى وزراء الخارجية العرب

اللى يبدو إنهم مجتمعين النهاردة علشان يلغوا حق العودة

من المبادرة العربية الميتة

و ده بيفكرنى بمسرحية هزلية

كانوا الطلبة بيمثلوها أيام الجامعة

بيصوروا فيها المفاوض الفلسطينى

و هوه عمال يتنازل عن كل أوراقه

و فى الآخر قعد يتنازل عن هدومه

حتى لم يبق عليه إلا ما يستر العورة

فلما مال عليه نظيره الصهيونى يطالبه بما وصفه بآخر تنازل
حتى يحصل على دولته الوهمية

أخذ الفلسطينى يصيح قائلاً

إلا السروال
إلا السروال

mido said...

@مواطن مصرى

حيث تجلس الإعلامية لميس الحديدي خلف طاولة وتتحدث عبر الهاتف بالإنجليزية، ثم تأتيها فتاة لتستكمل معها حواراً باللغة ذاتها، تُفهم منه عبارات تتعلق بالحملة الانتخابية للرئيس حسني مبارك. اختار الحزب لميس الحديدي، وهي لا تنتمي أصلاً إلى أي حزب، لتقود فريقاً من الإعلاميين المحترفين غير المنتمين كذلك إلى "الوطني"، للتعاطي مع وسائل الإعلام العربية والأجنبية أثناء الحملة.المصدر : العربية

mido said...

@مواطن مصرى

دلوقتى لميس عضو بالحزب الوطنى ( امانة السياسات)

Appy said...

احمد يا سعيد
مش كل حاجه يتقال عليها بتنجانى نيهاهاها انا بس

ثم انت زعلانه ليه من اللى بياخد غرزه انتى نسيتى نظريه ام حلموس فى فهم النفوس البوست بتاعي اللى رديت عليه عندي هههههههههه
وبعدين مرتضي ده هيفضل مقهور طول عمره احسن يستاهل ها بقى

TAFATEFO said...

معرفش مين إيهاب صالح ده .. ولا ممكن أبداً أسمع نجوم اف اخص .. ولا شوية العالم التعبانه اللي بتيجي في الراديو دي

بس هما أكيد كانوا بيتكلموا عن اللي عمله دروجبا بعد ماتش برشلونة وتشيلسي مع الحكم وتهجمه عليه

ومتآخذينيش يعني .. لميس الحديدي مش شبه الجرادة لو سمحتي .. دي أم أويئ السخيفة ومحدش يغلط فيها من فضلك

ماهي جوزها عامل فيها حامل لواء المعارضة والأسد الجسور في مواجهة الذئاب .. اشمعنى هي متعملش برنامج حواري (آل ايه بيحاسب أفراد في الحكومة أو الحزب) على شاشة مصرية .. وتقعد تخلي الدنيا حلوة في عنينا وبلدنا بتتقدم بينا تيجوا عليها

ده لا ممكن أبداً .. محدش يغلط في أم أويئ لو سمحتوا

TAFATEFO said...

هما أكيد كانوا بيتكلموا عن المشهد ده

Memo said...

انا زهقت من الكوسة ما فيش قرع او خيار . لو في فاقوس شغال.

مهندس حر (حسب البطاقة) said...

أنا مش عارف إنتوا ليه لسه بتتفرجوا على التليفزيون المصرى و بتقروا جرايد الحكومة.. يا هاترى دى رغبة منكم فى الإنتحار بالنقطة؟.. يعنى أنا أول مرة أعر إن الست لميس دى مذيعة فى التلفزيون.. أنا كنت شفت مقالات ليها فى المصرى اليوم و مش فاكر إنى قريتلها حاجة تستاهل التعليق.

بس اللقاء مع أطفال غزة ده فعلا حاجة آخر مملكة.. هو مين قال إن الواحد ماينفعش يبقى مهندس أو طبيب أو محامى أو أى حاجة تانية و يبقى مقاوم يعنى إشمعنى فى ناس كتير فى بلدنا بينفع يبقوا مذيع و صحفى و ههندس و طبيب و يبقوا فى نفس الوقت مقاولين؟!.. و بعدين همه الولاد دول ينفع يحلموا يبقوا إيه لما مدارسهم بتتهد كل يوم و التانى و لما أصلا أبسط ضرورات الحياة و البقاء مش مضمون توصلهم.

بس أنا مش معاكى فى حاجة واحدة الغباء ده مش ممكن يكون غباء مقصود ده غباء أصلى و نابع من معاميق كينونة الشخصة دى.

TAFATEFO said...

@مي

من يومين أاعا فيلم اسمه التوطين مفروض أم مرفوش عن حق العودة .. الفيلم حلو وبرفعه حالياً

أول مشهد في الفيلم هو القرار 194

إن الجمعية العامة للأمم المتحدة تقرر وجوب السماح بالعودة في أقرب وقت ممكن للاجئين الراغبين في العودة إلى ديارهم والعيش بسلام مع جيرانهم ووجوب دفع تعويضات (عن) ممتلكات الذين يقررون عدم العودة إلى ديارهم وعن كل مفقود أو مصاب بضرر عندما يكون من الواجب وفقاً لمبادئ القانون الدولي والإنصاف أن يعوض عن ذلك الفقدان والضرر من قبل الحكومات أو السلطات المسؤولة..

بس هما غلطانين وكاتبين عن اللي حاططها بين قوسين من

هبقى أحط لينكات الفيلم لما ربنا يسهله ويترفع

فتاه من الصعيد said...

لميس الحديدى قالت مره لما سألوها انتى التليفونات بتاعت لقاء جمال مبارك فى البرنامج كانت مترتتبه...قالت ايوه طبعا....اشمعنى مرتضى اللى مضطهداه....يمكن علشان زملكاوى وجيمى اهلاوى....ما هو الاهلاويه اغلبيه....وبالنسبه لدروكبا...اصلا عاش نص عمره بره ومتربى فى بلاد الخوجات من صغره....بس هى عقده الخواجه
دمتى بخير ...تقبلى مرورى

TAFATEFO said...

كوقع الجزيرة حاطط سؤال للتصويت محير جداً

هل تعتقد أن تقاربا أميركيا إيرانيا سيكون في صالح المنطقة؟

متأكد ان ناس كتير جداً جداً معرفتش تقول نعم أو لا .. علشان كده عدد المصوتين لغاية الآن وده تاني يوم 5000 بس

هو الواد المفروض يجاوب ايه أو يعتقد ايه .. او يحسبها ازاي

أنا صوتت آه علشان هيحمي المنطقة من الحرب الأخطر وعلشان هيكيد ولاد التيت بتوعنا .. لو تقاربت أمريكا وإيران أظن هيبقى شكلهم بايخخخخخخخخخخخخخ أوييييييييييييي .. وهيحتاسوا ويلوصوا وميعرفوش يعملوا ايه

لكن برضه لا معتبرة .. لأن التقارب الأمريكي الإيراني ربما يجعل أمريكا تبحث عن عدو جديد ويبقى الدور جه على سوريا مثلاً أو بيقرب علينا .. ويمكن لأن ده معناه ان إيران هيبقى عليها قيود سياسية أكثر في دعم المقاومة (ودي سياسة محدش يتطوع ويقول مش هيحصل) ويمكن يطير صواب بعض المتخلفين من حكامنا الملاعين ويقدموا على خطوات غبية زي أشكالهم

مش عارف

نواره هانم .. متفهميني ينوبك صواب

mado said...

بالفعل لميس الحديدي كانت مشرفة علي الحلمة الانتخابية لمبارك.
وكمان هي متجوزة عمرو اديب.
وكويس جدا اني مش بشوف البرنامج بتاعها .
وخصوصا الحلقة الي ذكرتيها في البوست.
عن المقاومة.:(
وبعدين ايه حكاية نجوم اف ام دي.مكنتش اعرف انك بتسمعي نجوم اف ام.
واضح كدا يانوارة انك انتي الي بتجيبي التعب لنفسك.
نجوم اف ام وبرامج علي قنوات محلية.
انتي الي بتجبية لنفسك

مى said...

TFATEFO


هيه ديه طريقة الصهاينة فى التفاوض

و للأسف

عريقات و قريع و النب..لاء شعث و عمرو و أبو ردينة
إتعلموا منهم

فبعد ما خسروا و فرطوا



بيحاولوا يمارسوا نفس الأسلوب
ياريت مع الصهاينة
إنما فى الحوار الفلسطينى الفلسطينى





أنا فى إنتظار تحميل الفيلم

حسن على said...

النطع فى اللغة هو ؛قطعة غليظة من الخشب تتحمل ضربات ساطور الجزار وهو يعد الذبيحة للبيع. لجنة السياسات اشترت جهاز جديد لقياس درجة "النطاعة"فى فى المرشحين لتنفيذ سياساتها اللى خربت بيتنا والست "لميس الحديدى" جاء ترتيبها التالتة بعد جمال مبارك واحمد عز وتساوت مع رؤساء تحرير الصحف الحكومية فى المركز,الامر الذى دعا عبد اللة كمال واحمد موسى للجوء للقضاء لأثبات انة انهما اكثر منها تنطعا ورمامة وقدموا اوراقا تثبت انهما من اكلات الجيف الحقيقين

habiba said...

تسلمى يا نوارة يابنت الغاليين
لميس دى فعلا نموزج للتسلق و النفاق الرخيص
معندهاش اى موهبة و لا معلومات
و اللى يخللى الواحد يرجع انها فاكرة نفسها عقلية عظيمة و هى اصلا ضايعة
الشادور الايرانى حارقها اوى لكن البدل و التاييرات و الساعات الامريكانىة و الفرنسية هى اللى حلوة
حسبنا الله و نعم الوكيل و الله دة شرف ليها انك اتكلمتى عنها
ربنا يحفظك يا نورررررررررررة

احمد سعيد said...

مى
..........

ايه دة ؟؟؟؟

هى لميس الحديدى مرات عمرو ازيط ؟؟؟؟

هههههههههههههه

فعلا والله

ما جمع الا اما وفق

احمد سعيد said...

مصطفى

اعتقد ان التقارب الامريكى الايرانى هيكون على دماغ المنطقه

لان التقارب دة مش ببلاش

يعنى امريكا لو اتفقت مع ايران هتتفق على انها تسيبها تصنع نووى ( او تلم الموضوع ) على قد ما تقدر , بالاضافه لشويه التظبيط السياسى والاقتصادى اياة....


طب دة لو حصل هيكون المقابل ايه ؟؟؟

اكيد مش لوجه الله

انتوا عارفين السياسه مافيهاش حاجه لله

المقابل هيكون ان ايران تبطل لعب فى العراق وتبطل دعم المقاومه العراقيه ايا كان اللى بتدعمهم

وكذلك فى لبنان

حزب الله من غير ايران هيخسؤ جامد

ولو ايران اتخلت عنه امريكا من خلال اسرائيل مش هتفوت الفرصه دى وهتنزل فوق دماغه ضرب لحد ما تمسحه تماما ( دا لو قدروا يعنى )

طبعا وفيه ناس كتير فى المنطقه هتخدم فى الموضوع دة


سوريا كمان هتاخد بالجزمه القديمه

لان سوريا لا طاقه لها بامريكا او اسرائيل

ولولا التحالف مع ايران وحزب الله وباقى حركات المقاومه , بالاضافه للازمه الماليه العالميه

كان زمان سوريا انضربت من زمااااااااااان

الحاجه الاخيرة ان الاخ اوباما منمر على افغانستان وحاططها فى دماغه مش عارف ليه

لو ايران دعمت امريكا عن طريق حدودها فى حربها فى افغانستان

اعتقد ان طالبان هتخسر كتييير قوى


ايران فيه خيوط كتير فى ايديها

لو وقعت الناس دى هتخسر كتير

وايران كمان هتخسر اكتر

لان لولاش الخيوط الممتدة فى العراق ولبنان وسوريا وكل حته دى

اعتقد ان مسأله ضرب ايران ولو جويا فقط هتكون اسهل بكتييييير

من الاخر

التقارب الامريكى الايرانى لن يكون الا فى مصلحه امريكا واسرائيل فقط

اما ايران نفسها

فهتاخد بعض المكاسب السريعه
بس خسايرها هتكون كبيرة جدااااا على المدى الطويل

بالنسبه لكل حركات المقاومه هتخسر برضه كتييير جدا

اما البهايم بتوعنا ياعم مصطفى فمتقلقش عليهم

دول معندهمش دم

يعنى مش هيتكبسوا زى ما انت متوقع ولا حاجه

هتلاقيهم كلهم قلبوا ميه وتمانين درجه

وهتلاقى القط وسرايا نازلين بورق الحائط

وان ايران جزء لا يتخزق من العالم العربى

وهتلاقى طنط لميس الحديدى طالعه تمدح فى الشادور الايرانى على اعتبار انه جزء من التراث العربى فى مواجهه التيار الثقافى الغربى الغااااشم

احمد سعيد said...

حسن على
_________

معلش

استدراك بسيط على كلامك

النطع دة بساط من الجلد كانوا بيفرشوة تحت الناس اللى هيقطعوا راسها زمان

حيث ان الحكم كان كثيرا ما ينفذ امام السلطان او الملك وفى بلاطه

فعلشان ياعينى الارض بتاع البلاط الملكى متتوسخش

كانوا بيفرشوا البساط دة تحت صاحب النصيب


اما اللى انت بتقول عليها دى

اسمها : القرمه

بضم القاف

ودى موجودة الى الان عند كل الجزارين

TAFATEFO said...

@أحمد سعيد

الكلام عن تقارب مش هتشرب إيران حاجه أصفره

انت سودتها أوي كده ليه؟؟ ومفيش حد بيسيب حد يصنع نووي

أعتقد ان التقارب الإيراني ورفع بعض العقوبات الاقتصادية (لو حصل) هيحد من قدرة إيران على دعم المقاومة فعلاً .. هيبقى عندها ما تخسره أو تخاف من خسارته

بس برضه محدش فهمني

نعم ولا لا؟؟

احمد سعيد said...

لأ

مى said...

أنا شايفة إن التقارب الأمريكى الإيرانى خطوة تكتيكية من أوباما


و إن المواجهة بين أمريكا و إيران

لابد قادمة

فأبوما على العكس من بوش

يهمه جداً صورته كرئيس كيس

لذلك فهو يحاول الآن أن يقول للناخب الأمريكى
و كذلك للدول الأوربية "ذات المصالح الإقتصادية المتشابكة و الضرورية فى هذا الوقت فى ظل الأزمة الإقتصادية"مع إيران

إننى إستعملت الجزرة
و لكنها لم تجدى نفعاً

فإيران مازالت مصرة على إستكمال
مشروعها النووى

و عليه

فالمواجهة الأمريكية الإيرانية
قادمة
حتى و إن تأخرت بعض الوقت


فما يقوم به السياسي الأمريكى الآن
أشبه بتبريد السطح

حتى يتم الإنسحاب من العراق
و لو جزئياً
بصورة لا تسمح لإيران بوضع الحذاء على الإصبع الأمريكى الملتهب فى العراق

و حتى يستقر الوضع فى أفغنستان
و هو ما يحاول أن يقوم به أوباما الآن

من إستدعاء كرازى
و آصف زردارى







أما عن الإستفادة العربية

فهذه واضحة تماماً

نحن قوم نعشق الهزيمة
و نتفنن فى التلذذ بها

لذلك ليس هناك إختيارات

فسواء
حدث تقارب
أو لم يحدث

فنحن خسرانين
خسرانين

يا ولدى






و تصبحوا على ألف خيييييير

مهندس حر (حسب البطاقة) said...

صحيح إستفتاء محير!!!!هههه

أولا مين جاب سيرة تقارب إيرانى أمريكى؟ الموضوع آخره حوار و الحوار ده عشان كل واحد عايز حاجة من التانى و بيدور على طريقة ياخد بيها اللى عاوزه بأقل تمن ممكن.

الكلام ده ينفع يبقى فى صالح المنطقة بجد لو إن إيران ها تتكلم نيابة عن المنطقة و تتطلب حاجة بإسمها بس ده مش ها يحصل لأن أمريكا مش ها تسمح بيه (إنتى إتكلم عن نفسك بس)

و ثانا لأن إيران عندها حاجات خاصة بيها أهم عايزاها و اللى يحتاجه البيت يحرم على الجامع.

المهم لما يقعدوا على الترابيزة محدش ها يحط كل ورقه مرة واحدة و يرميه و بعدين يقعد بلبوص يعنى إيران مش ها ترمى ورق سوريا و العراق و حزب الله و المقاومة كله كله كده.. الورقة اللى هاتلعب بيها فعلا هى تخصيب اليورانيوم.. لأن إيران بعد ما إشترت وقت كتير فى الفترة اللى فاتت و عدت من أيام الراجل اللى ندهته النداهة ما هياش مستعجلة على تصنيع أسلحة نووية بجد لأنه ما دام عندها كمية معقولة من اليورانيوم المخصب يبقى مسألة الحصول على رؤوس نووية هى مسألة أسابيع (زى ما عملت كوريا الشمالية)

اللى هايحصل إن إيران ها تقايض على ورقة التخصيب برفع العقوبات الإقتصادية و و ضمانات بإن أى ترتيبات فى العراق بعد خرو أمريكا منه ما تكونش ضد مصالحها..

أمريكا هاتحاول تاخد كمان ضمانات بمساعدتها على لم الليلة فى أفغانستان و إلا ها تمد إيدها لطالبان اللى إيران مابطيقهمش.

و على فكرة أمريكا فى عهد أوباما همها الأساسى هو لم المواضيع فى العراق و أفغانستان.. الإلتزام بأمن إسرائيل طبعا شيئ أساسى بس حكاية إن إيران بتهدد أمن إسرائيل بجد دى ما تخيلش على حد..

نهايته إجابة سؤال الإستفتاء لا لأ و لا آه و حد يقول لبتوع الجزيرة يبقوا يفكروا كويس قبل ما يعملوا الإستفتاءات بتاعتهم.

عاشق مصر said...

الحديث عن تقارب ايراني - امريكي بمعنى تخلى ايران عن حركات المقاومة هو حديث عن استسلام ايراني للتوجهات الامريكية وهذا الامر متاح للايرانيين منذ انتصار الثورة الايرانية
نقاط الاختلاف الحصرية بين ايران وامريكا هي الموقف الايراني من القضية الفلسطينية ودعمها لحزب الله ومساندتها لسوريا في وجه اسرائيل.
الخلاف ليس على مفاعل بوشهر وهو بالاصل مشروع الماني غربي توقف العمل به بعد انتصار الثورة
وليست القنبلة النووية المتاحة لحليف متخلف ومهزوز لامريكا مثل النظام الباكستاني فلماذا تحجب عن حليف اكثر تقدماً واستقراراً مثل ايران في حال رضوخها للعهر الامريكي؟
وليس الدور الاقليمي المتميز لان ايران تحت المظلة الامريكية كانت شرطي الخليج وكبير المنطقة
التقارب الامريكي الايراني محصور في نقطتين لا ثالث لهما :
العراق، وهناك مصلحة مشتركة تسمح بخروج منظم وهاديء للجيش الامريكي مقابل الحفاظ على مكتسبات ايران والشعب العراقي من زوال نظام معادي لايران ومتجبر في تعامله مع الشعب العراقي
وافغانستان، هناك مصلحة مشتركة تقضى بانشاء حكومة اتحاد وطني تجمع فصائل المقاومة الافغانية مع الجناح الموالي للغرب مع الجناح المتعقل في طالبان وخروج القوات الاجنبية من افغانستان مع ضمان عدم عودتها كجنة للمتطرفين العدميين

مهندس مصري said...

لميس الحديدي دي أنا شفت لها حلقة جمال مبارك من سنتين او 3 تقريباً و كانت بالشفاء
و من بعدها و أنا على نغمة واحدة
ما أشوفوش يا بابا
ما أشوفوش يا بابا
ما أشوفوش يا بابا

بلا هم يا شيخة

هو إنتي لسه بتشوفي التلفزيون المصري و لا الوظيفة تحكم
هو إنتي لسه بتقرأي جرايد الحكومة

يا مرارتك القوية يا أختي

لا أنا راجل مش ضامن الضغط بتاعي و الزعل وحش على صحتى و مش ناقص
ربنا يقويكي يا أختي

كويس إني ما شفتش حلقة المقاومة بتاعتها دي مكنتش ناقصها

حسن على said...

@أحمد سعيد: نورت المحكمة يا باشا

lastcrazyboys said...

اولا لميس الحديدي مرات عمرو أديب ..واللي جابها تمسك الحملة أخو جوزها اللي هو الاستاذ عماد الدين اللي عمل اللقاء " التاريخي " مع طويل العمر هاي هئ

ثانيــا ايهاب صالح ده مدير عام دريم بجلالة قدرها يعني بالعربي الفصيح الرجل الثاني بعد الدكتور بهجت وبما إن الراجل بيمر "بوعكة" نقدر نقول انه الرجل الأول حاليا ..هو ابن خالته بالمناسبة

وكان فاتح قناة رياضية اسمها دريم سبورت ..فشلت فسلا ذريعا ..وفلست وقفلت ..وكانت حاجة كده لو مخنوقة تبقي تتفرجي عليها ..لحد ما توصلي لمرحلة هم يضحك ارحم من هم يبكي

ثالثا فتــاة من الصعيــد: أصغر متابع للكــرة في البلد دي ..بلد ابويا وجد جدي..هيقولك انه علاء بيه اسمعلاوي صميم..وجمال بيه زملكاوي بس مش صميم

أخيـــرا: دي بقى ليكي يا نــوارة
في احد ماتشات المونديال الأفريقي ..- وبحكم اني كنت صايع ..إلى جانب اني كروي للنخاع- كنت بحضر ماتشات كتيييير ..لينا فيه او مالنا فيه
كان في تعاضد افريقي جميييل ..والناس دي بجــد جميلة جدا ..وبيحبوا الناس ..لكن كنت بحس ان عندهم توجس خيفة ..مش من المصريين ..اي حد من فوووق ..على كلامهم..مرة سألهم واحد من اللي معانا ..قالوا له : روح للي واقف هناك ده " وشاوروا على شاب مصري كان واقف جنب اتوبيس الكاميرون مستني اللاعيبة اللي بيشوفهم في التلفزيون" وقوله : انت افريقي ..هيمسك فيك
طبعــا هو كان تبع الدراسات بتاعة الأزهر..وكان واضح انه فاهم العقلية المصرية ..وعشان اكون اكثر دقة ..المغربية والتونسية والجزائرية ..او اللي فووووق على حد قولهم

مواطن مصري said...

فاتك حوار وليد جمبلاط الراجل دة اول مرة اسمعلة حوار الصراحة عجبني كلامة جداً

الراجل دة ثعلب

TAFATEFO said...

@عاشق مصر

أضف إلى كلامك ان مع حروج القوات في العراق ومع اتجاه الإدارة لخفض الإنفاق على العمليات العسمريه ولحسم الصراع في أفغانستان؛ من الغباء الشديد الإبقاء على حالة العداء الأمريكي الإيراني وجميع قواعد ومصالح أمريكا في المنطقة تطولها قبضة إيران

كل ده صح

السؤال

هل التقارب (ومحدش قال التحالف تقارب يمثله حوار بعد عداء ونذر حرب تراجعت) ده معناهان إيران هتدفع فاتورة للتقارب من دعمها للمقاومة (ومعتقدش أبداً التخلي عن البرنامج النووي السلمي لأن ده غير وارد على ما أعتقد ولأن مفيش أي دلائل على حقيقية انه برنامج سلاح نووي وان دي كانت ذريعة أمريكية لمعاداة إيران) .. اكيد التقارب هيتضمن تعاون أو تنسيق في العراق وتقليل أو وقف الهجمات اللي بتتعرضلها القوات الأمريكية مثلاً (وربما في أفغانستان كمان) .. لكن تأثير التقارب ده على النطقة هيبقى عامل ازاي

المقاومة - موقف الأنظمة العربية - أصحاب الكراسي

أنا صوتت بـ نعم .. لأني مقتنع ان دخول طرف قوي (مش عميل ضعيف) في لعبة السياسة ومن منطلق قوة معناه ان الميرزان (مش هيميل ولا هيتعدل) هيتحسن .. ووجود طرف قوي وفاعل زي إيران في الصراع في المنطقة وعلى غير عداء مع أمريكا في غير صالح إسرائيل

لكن في الناحية التانيه .. أميد أمريكا لن تسمح لما أسمته بمحور الشر من التواجد والعمل في هدوء لتنفيذ أجندة معروف معظم تفاصيلها .. أضف إلى ذلك المره اللي رموا فيها الكورة في ملعب سوريا بوساطة تركية لفصل محور الشر وتحييدها .. ولما فشلوا وبشار تاني يوم كان في طهران .. ممكن يكونوا بيجربوا اللعبة من جديد مع طرف تاني وبطريقة تانية طبعاً

إيران الآن ليس لديها مصالح مع أمريكا لتخسرها .. فلو تواجدت لها مع أمريكا مصالح .. ايه المانع ان موقفها يتأثر (مش يتغير) من دعم المقاومة .. على الأقل هتبقى في توازنات

حد عارف حاجه يعرفنا معاه؟؟

احمد سعيد said...

اللى مخوفنى يامصطفى ان محدش قرب من امريكا وكسب

مش هقولك تحالف معاها

لا مجرد قرب منها بس

بالظبط زى المراة سيئه السمعه

مجرد الاقتراب منها هيسىء اليك

فعلا لازم ايران تتنازل ولو جزئيا مقابل التقارب دة

وطبعا التنازل دة مش ايران هى اللى هتدفع فاتورته

واعتقد ان ايران معندهاش اى استعداد تقبل انها تتراجع مللى واحد عن برنامجها النووى

يعنى فعلا اللعب هيبقى على ما هو خارج ايران

اللى مخوفنى بقى لو ايران قررت تحط ايدها فى جحر التعبان هل هتامن من لدغه

بمعنى اخر

اتمنى ان دة لو حصل ( وان كنت ارى ان وضع العداوة احسن وافيد )

لو دة حصل الساسه الايرانيين يلعبوها بحداقه وميتعدوش مننا

صباح الصباح said...

بجد يا نوارة.. لميس الحديدى دى خنيقة خنقنة يا جدع.. انا شفت حلقة مرتضى ولاول مرة للامانة اشوفة هادى وذوق ولميس بنت اللذين دى قليلة الذوق جدا جدا

صباح الصباح said...

انا اصلا نفسى افهم.. هية لميس دى بنت مين فى مصر.. يعنى تطلع مين؟

yousef said...

كل ما غلظ حس البني ادم كل ما ربنا ضلم على مخه


الله ينور عليكي

Sonnet said...

صباح الخير
معاك حق العقلية الإعلامية دى ليس لها حل
لكن يبدو انه فى كل المذيعات
انظرى لهذا البوست عن نفس الطريقة و العقلية
و مع الأطفال

http://shayunbiqalbi.blogspot.com/2009/01/blog-post_24.html

عاشق مصر said...

الاستاذ مصطفى

الاكيد ان الميزان سيتحسن وسيصبح الامر تنازل عن قتل الامريكيين مقابل تنازل عن التآمر على قضايا الامة

الاستاذ احمد سعيد
متفق معك على ان عداء امريكا جنة والتحالف معها نار
وهذا لا يمنع ان تستجيب لعدوك عندما يطالبك بهدنة مدفوعة الثمن من قبله بشكل يريح المحاصرين في غزة والمهددين بحرب مذهبية في لبنان والمستنفرين على اعصابهم منذ 8 سنوات في الشام والمقتولين بشكل عبثي وهمجي في العراق وافغانستان وهكذا دواليك
المصالح الايرانية متحققة الآن بالفعل ولا تحتاج الا الى رفع الحظر عن بعض انواع المواد التي قد تسرع تقدم ايران في بعض المجالات بالاضافة الى رفع التهديد الذي يستنزف الخزينة الايرانية للبقاء على جهوزية دائمة للحرب

احمد سعيد said...

وهذا لا يمنع ان تستجيب لعدوك عندما يطالبك بهدنة مدفوعة الثمن من قبله بشكل يريح المحاصرين في غزة والمهددين بحرب مذهبيه
_________________________

مش فاهم

يعنى امريكا هتتقارب مع ايران وبالتالى الحصار على غزة يترفع ؟؟؟

وشرحه فى باقى المناطق ؟؟؟

اصل دة اللى فهمته من الكلام

طب نيجى ازاى دى

دا شىء بديهى ان ايران تلوى الذراع الامريكى عن طريق دعم حركات المقاومه

يقوم لما يحصل تقارب تيجى امريكا وترفع اديها عن المقاومه؟؟!!!!

هل فيه ساسه بالعته والتخلف دة ؟؟؟

ياسلام لو فكرو فعلا بالاسلوب دة
دى تبقى هيييييييييصه

يسمع من بقك ربنا يااخى











بالاضافة الى رفع التهديد الذي يستنزف الخزينة الايرانية للبقاء على جهوزية دائمة للحرب
________________________

يعنى لو حصل تقارب
حاله الجهوزيه للحرب هتنتهى ؟؟؟

دول يبقوا اغبيا قوى

معتقدش ان فيه نظام فى العالم على مستوى من التخلف والغباء انه يخفض من درجه الاستعداد العسكرى لمجرد ان عدوة الاكبر قرر التقارب معاة او حتى التحالف

لاسيما وان كان عدوة دة هو الولايات المتحدة واسرائيل

_______________

معلش يعنى فى دى الكلمه

الكلام غير منطقى بالمرة

عاشق مصر said...

الاستاذ احمد سعيد

معادلة ربح - ربح تحكم اداء اي سياسي واقعي، وتقضى هذه السياسة بان يسعى الطرفين لتحقيق الاهم وتأجيل المهم في سبيل ان يربح الطرفين لتتم التسوية..والا يصبح الامر استسلاماً من طرف لآخر وللاسف انت تتحدث عن تجاربك مع ساسة لم يجتمعوا يوماً مع عدو الا لاعطائه مزيد من التنازلات وهذه ليست سياسة ايران ولا سوريا ولا حركات المقاومة ويشهد على ذلك اتفاق اخراج صدام من الكويت والمكاسب التي حصلت عليها سوريا من جراء المشاركة بشروطها في هذه الحرب
وتفاهم نيسان الذي نجح حزب الله بفرضه على اسرائيل في حرب عناقيد الغضب 96 والتفاهم الذي اجرته الثورة الايرانية مع طاقم ريغان الانتخابي وقضى بتأجيل اطلاق المعتقلين في السفارة الامريكية الى مابعد انتخابات الرئاسة الامريكية بهدف الحاق الهزيمة بكارتر بمقابل الاستجابة للشروط الايرانية
وهكذا دواليك

عاشق مصر said...

بالنسبة لحالة الجهوزية للحرب، العسكريين يدركون ان الجهوزية مراتب
تدبير رقم واحد ويستلزم استدعاء الاحتياطي واستنفار القدرات العسكرية كافة
تدبير رقم 2 ويصار الى استنفار النظاميين فقط
التدبير رقم 3 وهو حالة الجهوزية المتعارف عليها في كل الدول زمن السلم
والتدبير رقم واحد مكلف للغاية لكونه يستلزم تعطيل حياة المدنيين ومصالحهم والانفاق على القطاعات العسكرية بوتيرة تشابه الانفاق زمن الحرب باستثناء ثمن الذخائر
وخذ حريتك بالنقد لولا النقد لما عرف الغث من الثمين

احمد سعيد said...

ايوة يا استاذ

اللى حضرتك بتتكلم عليها دى اسمها رفع درجات الاستعداد

وليها مصطلحات عسكريه وقصه كبيرة

الاستدعاء دة بيتم لما يكون فيه تجهيز فعلى لحرب

مش مجرد استعداد

الدوله الوحيدة اللى بتستدعى الاحطياط عمال على بطال هى اسرائيل

ودة سببه انها مش بتدفع من جيب ابوها

كما ان خطه التعبئه عندها ممتااااازة


الاستدعا ممكن يتم لوحدة معينه فى حال اجراء تدريبات معينه على مستوى عالى
ودى معروفه بالاسم

انما كونت تستدعى الاحتياط للقوات المسلحه بالكامل

دة معناة انك بتعلن الحرب

ودى مفيهاش كلام

اما بتعلن حرب او بتستعد لصد عدوان قادم حتما خلال ايام


انا معتقدش ان ايران وصلت لحاله التعبئه الكامله

الموضوع لسه موصلش للدرجه دى

اما نقطه استدعا الاحتياط فدى ليست اول درجات الرفع زى ماحذرتك قلت

بالعكس الاستدعا دة بييجى فى مراحل متقدمه

المراحل الاولى بتتم بدون استدعا وبتشمل بعض الاجرائات الطارئه عن الاجرائات اليوميه


دا تصحيح فنى بسيط

___________________

بالنسبه لموضوع ايران , انا شخصيا كل اللى يهمنى ان حركات المقاومه ماتاخدش ضربه فى ضهرها

انا واثق ان ايران عارفه مصلحتها ولا شك فى كدة

بس مش عايز مصلحتها دى يتم دفع فاتورتها عن طريق حركات المقاومه
ولو بشكل جزئى


علشان كدة انا متشائم من ناحيه فكرة التقارب دى

بل بالعكس

انا شايف ان التباعد ولو بشكل اكتر من الان هيكون افيد
ونا اسف على الاطاله

عاشق مصر said...

اطالتك ممتعة ومالم نتسبب في ازعاج صاحبة المدونة خذ حريتك في عرض وجهة نظرك واسمح لي بتوضيح الآتي

فضلت استعمال مصطلحات تدبير رقم 1و2و3 ضمن سياق يفهمه القاريء بدون تعريض الامن القومي للخطر هههههههههههههههه والا فمن المعروف ان رموز التعبئة الكلية هي خيلي محرمانة توب سكرت سري للغاية
على كل حال شكراً على لفت نظري
بالنسبة لموضوع ايران والتعبئة الكلية، انا لا اكشف سراً بالقول ان ايران وعلى مدى اشهر كانت في حال تعبئة كلية او مااسميه تدبير رقم 1 وشملت اجراءات التعبئة الباسدران والباسيج والجيش هي الآن في مرحلة تدبير رقم 2 ويشمل الباسدران والجيش
ولا يخفاك ان البقاء على جهوزية مماثلة امر مكلف على المستوى المادي والمعنوي
بالنسبة لموضوع التعبئة الاسرائيلية وجودتها
اولاً:اسرائيل لا تعلن التعبئة الكلية على الاطلاق الا في حال اليقين من وجود خطر مرجح قد يؤدي لوقوع حرب
ويعتبر هذا القرار من اصعب القرارات السياسية نظراً لكلفته على المجتمع والدولة الامر الذي استغلته القوات المسلحة المصرية في حرب 73 عندما ناورت بطريقة الزمت اسرائيل باعلان التعبئة عدة مرات بدون طائل الامر الذي جعلهم يتأخرون في اعلانها عندما وقعت الحرب بالفعل
اما عن جودتها فبرأي المتواضع هي نظام تعبئة سيء للغاية وبانت عيوبه عندما استهدفت الجبهة الداخلية في حرب 2006 ويكفيه سؤاً انه لا يسمح بشن حرب طويلة ويؤدي الى شلل المجتمع المدني

عاشق مصر said...

اما بالنسبة للتشاءم من عملية التقارب، فسبق وقلت ان رأي الشخصي يتلخص بأن عداوة امريكا جنة وان صداقتها نار ولكن هذا لا يمنع ان تجني ثمار صبرك وصمودك على شكل تنازلات من عدو متفوق كلما كان الامر متاحاً وهذا لا يحدث من خلال النوم في سرير واحد كما يفعل البعض
بل من خلال السماح المتبادل لكل طرف ان ينام في سريره بدون ازعاج الآخر ولفترة محدودة

احمد سعيد said...

اما عن جودتها فبرأي المتواضع هي نظام تعبئة سيء للغاية وبانت عيوبه عندما استهدفت الجبهة الداخلية في حرب 2006
______________________

لا ياباشا

حضرتك كدة عنك لبس وخلطت بين نقطتين

اللى انا بتكلم فيه نظام التعبئه نفسه

ازاى انك تجمع الاحطياط من كل مكان فى الدوله ثم توزيعهم على وحداتهم بدقه واعادة تسليحهم وتلقينهم بالمهمه المطلوبه

بدقع عاليه

وبسرعه فاااائقه

دة اللى يحكم نظام الاستدعا ان كان جيد ام سىء

النظام الاسرائيلى ممتاز بشهادة الجميع

اما اللى انت بتتكلم عليه فدا شىء اخر

مرجعه هو نقص الموارد البشريه للجيش الاسرائيلى
مما يضطرة لتجنيد الاناث وصغار السن والكبار حتى 56 سنه ( فى بعض المهام الداخليه )

ودة طبعا لتعويض الفقد الهائل فى الجنود

واكيد كنتيجه لدة ان الدوله بالكامل هتنشل

لان تقريبا كل المواطنين فى المعركه

وكل المؤسسات والهيئات مغلقه تقريبا

ومافيش دوله ممكن تتحمل العبء دة

علشان كدة كانت خطتنا فى اكتوبر هو احتلال حوالى 14 كيلو شرق القناة

او اى مسافه متاحه شرط ان تكون مؤمنه بمظله الدفاع الجوى المصرى

وبعد كدة تتمركز القوات وتنشىء تحصينات تمام زى اليهود ما كانوا عاملين

ودة هيحطهم امام خيارين

الاول انهم يهاجموا ودة هيكلفهم خسائر بشريه فادحه

لان هناك قاعدة عسكريه معروفه بتقول ان المدافع موقفه اقوى بمراحل من المهاجم

وطبعا اسرائيل لن تتقبل موضوع الخسائر البشريه دة للاسباب اللى ذكرتها

والنقطه دى بانت كتير فى حرب غزة وحرب لبنان

الخيار التانى انهم يثبتوا مكانهم ويبقى الحال على ما هو عليه

وطبعا هتفضل حاله التعبئه مستمرة

لانهم معرضين لاى هجمات مصريه فى اى وقت

ومعادش فيه مانع زى خط بارليف وقناة السويس

ولو عملوا كدة فستنهار الدوله بالكامل خلال 3 شهور على اقصى تقدير

وحنا مع الاسف ملتزمناش بالخطه دى


نرجع مرجوعنا لموضوع التعبئه

اعتقد ان نظريتى وصلت

ان العيب مش فى نظام التعبئه ولكن فى تركيبه الدوله نفسها

تحياتى

عاشق مصر said...

نظام التعبئة كما تفضلت يتضمن القدرة على استدعاء وتوزيع وتسليح الاحتياطي في وقت مناسب واضفت انا اليه العنصر الضروري لنجاح نظام التعبئة وهو قدرة المجتمع على تغطية احتياجات الحشد طوال المدة اللازمة للقتال
عندما بدأت الحرب مع اسرائيل سنة 1948 كانت المعركة بين قوى امن داخلي وبين نخبة الجيوش الغربية المنتصرة في الحرب العالمية الثانية، واستمرت على هذه الحال الى سنة 1973 عندما اعدت الجيوش المصرية السورية اعداداً جيداً من الناحية الفنية
وبسبب التفاوت بين القوتين نشأت اساطير اصبحت كالبقرة المقدسة لا يتجرأ الباحث من الاقتراب منها من كثرة "الادمغة" التي اشبعتها بحثاً
من جملة الاساطير كفاءة نظام الاستدعاء للاحتياطي في الكيان الغاصب والسبب بسيط وغائب عن الذهن ويتلخص بجملة مفردة
لم يتعرض الداخل الاسرائيلي لاي امتحان في اي حرب نشأت بين العرب واسرائيل الا سنة 48 وسنة 2006 وفي المحطتين بانت عيوب هذا النظام المبالغ في مقدرته
وتخيل من فضلك كيف كانت تجري التعبئة في الكيان الغاصب : في يوم مشمس اعلنت فيه رموز الاستدعاء فدخل الصهاينة يستحمون ويستبدلون ملابسهم ثم ركبوا في سيارات النقل العام الى ثكناتهم حيث تم تسليحهم وتوزيعهم على الوحدات العسكرية
لا طائرات معادية في الجو على مدار الساعة
لا قصف للجسور وتقاطعات الطرق
لا استهداف للثكنات
لا يوجد رمايات صاروخية
اقرب تهديد معادي يبعد عن الحدود عشرات الكيلومترات ولا نية لديه للتقدم داخل الكيان الغاصب

انا اذكر مناورات كشفية اكثر تحدياً من الظروف التي يجمع فيها الاحتياط الاسرائيلي

ارجو ان اكون قد اوضحت وجهة نظري