Tuesday, 19 May 2009

الخبر في الجزيرة: وفاة الطفل محمد علاء مبارك

البقاء لله، محمد علاء مبارك، 13 سنة، توفاه الله والخبر تأكد في الجزيرة
ربنا يرحمه ويصبر امه وابوه، التلفزيون المصري ما جابش سيرة، ساعات البني ادم من كتر حرصه مع غباوته يبقى جلياط، يعني الولد توفاه الله، رحمة الله عليه، مش يذيعوا خبر ويعزوا على الاقل امه؟ مكتمين على ايه؟ نفسي افهم عقلية الابيض واسود ومسلسل هارب من الايام دي ح تخلص امتى، دول لسة ما وصلوش للتلفزيون الملون، هو فيه حاجة بتختفي؟
اهو كل الناس عرفت اهو وقالت وهم مخبيين خبر الدنيا كلها عرفته
ملحوظة: ده طفل مالوش ذنب في اي حاجة، وربنا ما يوري حد اللي امه فيه دلوقت، وارجو من المعلقين مراعاة حاجة زي دي
تحديث:
الخبر نزل في كل حتة في الدنيا مش بس في الجزيرة، عدا مين؟ اسم الله عليكوا
على فكرة ولا حتى الصحف المصرية، هي دي الريادة، كتر خيرهم والله، يعني انا لما شفت الخبر وصورة الولد وهو طفل عيطت، بس لما قلبت على قناة مصرية ضحكت، ربنا يرفه عنهم
البي بي سي
الفجر
الجريدة

147 comments:

مواطن مصري said...

الف رحمة علية و في الجنة انشاء الله

و ربنا يصبر علاء و زوجتة

بدراوى said...

على فكرة اليوم السابع مأكدتش الخبر

سيف said...

بدراوى :



البى بى سى و غيرها أكد الخبر

و بعد بكرة كل الجرايد المستقلة بالذات حتنشر

بس هم طبعوا خلاص

قبل الوفاه

جبهة التهييس الشعبية said...

هو الولد جاله ايه بالظبط
استدعوا له طبيب مخ واعصاب ليه؟

بدراوى said...

حد قاللى انه كان عنده سرطان اطفال

جبهة التهييس الشعبية said...

لا حول ولا قوة الا بالله

بس دول جابوا له طبيب مخ واعصاب
هو كان عنده في المخ؟

بدراوى said...

و الله انا فى انتظار اشوف تغطية صحفنا للموضوع
اتمنى ميبقاش فيه شماته
رغم ان ده مش مستبعد

بس ربنا يرحمه يارب
و يصبر اهله

mido said...

نوارة روحي علي تعليقات البوست السابق حتلاقي لينك الخبر و سبب الوفاه و هي تسمم غذائي !

lastcrazyboys said...

أنــا شكلي هتشاءم من قدم الراجل فعــلا

طلب صغير "مؤقت" ..احترامــا للوضع وخبر الموت ...ممكن بس لو تشيلي

صورة الشبشب لفترة ..انا شايف انها متصحش جنب خبر وفاة

احترام الموت واجب

وربنا يصبر الأسرة اجمعين

بدراوى said...

على فكرة احنا اعلامنا ميقدرش يعمل سبق فى خبر زى ده
لأنه لو فعلاً مماتش و ده نتمناه
حيضيع فيها رقاب كثير

بس الغريب ان قناة العربية المحسوبة على الرئيس مش جايبه سيرة

micheal said...

الله يرحمه
ده طفل في النهاية والموت والمرض مالهمش دعوة بأي إعتبارات تانية
تحياتي يا نوارة

مواطن مصري said...

ربنا يشفي كل الاطفال و يدخل الجنة انشاء الله

Israa El-sakka said...

ربنا قال (ولا تزر وازرة وزر أخرى) و عشان كده أنا بجد حزينة و بجد متعاطفة و من قلبي بقول الله يرحمه و يسكنه فسيح جنانه و إنا لله و إن إليه لراجعون ربنا يصبر أمه ..بجد ربنا يصبرها ...أنا يا نوارة كنت سمعت من فترة أن حفيد مبارك عنده سرطان بس معرفش هو ده ولا لأ دي إشاعات يعني ..ده غير أنه كان في إشاعة إنه مات الله يرحمه في حادثة مش حالة مرضية بس زي ما قولتي حبايب قلبنا مكتمين ولا حس و لا خبر ..فمفيش أكيد ..ياللا أستعدوا للطمية اللي حيعملوها من الصبح...بس على الله نعرف إيه الحكاية

mido said...

علي العموم البي بي سي قايلة كده

micheal said...

نزارة..عندي سؤال مالوش علاقة بالبوست ..بس لفت نظري صورة أوباما وكنت عاوز اسألك ليه؟؟
طبعا أنتي حرة في البلوج بتاعك بس وضحيلي وجهة نظرك بإختصار شديد
تحياتي

تــسنيـم said...

هوأصيب بحالة تسمم غذائي حــاد بسبب تناول وجبة فاسدة طبعا خارج المنزل .. ومن المعروف إن بعض أنواع التسمم الغذائي ممكن تصيب الجاز العصبي المركزي بشلل فيمكن علشان كده استدعوا طبيب مخ وأعصاب


ربنــا يصبر أمــه يارب ويرحمها برحمته

أكون أو لا أكون said...

على البي بي سي قالوا تسمم من وجبه فاسده

جبهة التهييس الشعبية said...

تسمم؟ لا حول ولا قوة الا بالله
تسمم؟
حفيد الريس جاله تسمم؟

امال احنا يجيلنا ايه؟
اكل ايه ده؟
الله يرحمه تعددت الاسباب


مايك

انت تسأل زي ما انت عايز طبعا
ده بقالي مدة نازلة عليه هبد يا مايك
اصله لطعني على قفايا
وانا ما احبش حد يلطعني على قفايا:

1- قال ح يخرج من العراق وبعدين لحس الكلمتين وح يسيب قوات قوامها خمسين الف جندي محتل في العراق الى اجل غير مسمى

2- قال ح يقفل جوانتانامو
ولحس الكلمتين وح ينقل اسرى جوانتانمو لسجون تانية بنفس وضعهم القانون اللا قانوني

3- وقع قرار بوقف التعذيب وبعدها باسبوعين اتصل واحد من جوة جوانتانمو بيقول انا لسة سنتي مكسورة دلوقت حالا من كتر التعذيب

4- قال ح يحاسب مجرمي الحرب وبعدين ادا ضمانات لكل المتورطين في التعذيب وجرائم الحرب انهم مش ح يقعوا تحت طائلة القانون وقال مش ح يدفع تعويضات للضحايا
طب ح يحقق ليه؟ وبعدين في الاخر خبى الصور

5- قال مش ح ادعم الديكتاتوريات وجاي مصر
الواحد مش عايز يتك على مبارك وهو لسة في المصاب اللي هو فيه الله يكون في عونه

6- قال ح نعمل من اجل السلام في الشرق الاوسط وزود المعونة العسكرية لاسرائيل عشرة في المية

7- من ساعة ما طل علينا بطلته البهية وهو نازل هبد في افغانستان وعلى القرى بالذات لما مشاهم يكلموا نفسهم

يعني بيعمل كل اللي بيعمله بوش بس هو اللي امور
فاي حاجة جاية منه حلوة
يعني ممكن اقعد كده شوية
بس مش اقعد افوت له عشان حليوة على طول

Pink said...

انا لله و انا اليه راجعون
ربنا يصبر والديه

مهندس حر said...

أنا كنت كتبت تعليق و طار بس المرة دى الكهربا إنقطعت قبل ما أبعته..

على أى حال جليطة الإعلام الرسمى و شبه الرسمى عندنا سببها إن القلة القليلة من العاملين فيه و اللى كانوا فى الأصل صحفيين فقدوا أصلا حس التعامل مع أى خبر على إنه كده.. زمان كانوا يرفعوا سماعة التليفون يسألوا ننشر يافندم؟ و ينفذوا.. دلوقت بيخافوا حتى يسألوا و بيقعدوا مكانهم مستنيين صيغة الخبر تيجى مكتوبالهم و يا دار ما دخلك شر.. أكتر من كده لو حصل و حد سألهم و همه لسه مستنيين بينفوا عمال على بطال و مش مهم يبقى شكلهم زبالة بعد ما الخبر يتنشر فعلا..

على أى حال.. البقاء لله وحده.. أكثر ما آلمنى هو سن الولد الصغير اللى لسه على أعتاب المراهقة.. و ألم والدته و والده لفقده شيئ لا يعرفه على حقيقته إلا من إبتلاه الله بمثل ذلك المصاب .. و يمكن بإستطاعة الآباء و الأمهات تصور كيف يكون هذا الألم.. أسأل الله له الرحمة و أسأله أن يخفف عن أهله جميعا لا أستثنى أحدا فالتعاطف فى مثل تلك الملمات لا يجوز فيه الإستثناء..

mohamed said...

لا حول ولا قوة الا بالله
انا لله و انا اليه راجعون
البقاء لله وحده
نسأل للفقيد الرحمة و لاهله الصبر و السلوان

بدراوى said...

القاهرةاليوم يؤكد وفاة نجل علاء مبارك فى باريس

http://www.elbashayer.com/?page=viewn&nid=50867

مهندس مصري said...

الأمن المصري يعتقل 24 عنصرا من الإخوان
الإخوان قالوا إن الاعتقالات تأتي في إطار ما وصفوه بالتعامل الأمني العنيف (رويترز-أرشيف)

اعتقلت أجهزة الأمن في مصر نحو 24 من عناصر جماعة "الإخوان المسلمين, في حملة دهم بمحافظة البحيرة.

وذكرت مصادر أمنية أن المعتقلين يواجهون تهما تتعلق بـ"نشر فكر جماعة محظورة والانضمام لجماعة أسست على خلاف القانون والتخطيط لأعمال تخل بالأمن والسلم الاجتماعي في البلاد".

وأوضحت المصادر في تصريحات نقلتها وكالة الأنباء الألمانية أنه تم إلقاء القبض على المعتقلين أثناء اجتماعهم في منزل أحدهم بمحافظة البحيرة (180 كلم شمال غرب القاهرة)، بينما كانوا يخططون لتنظيم مظاهرات وفعاليات قالت المصادر الأمنية إنها تهدد الأمن الاجتماعي.

وطبقا للمصادر نفسها, عثرت قوات الأمن بحوزة المتهمين على مطبوعات وكتب وأسطوانات مضغوطة تدعو لفكر الجماعة.

في المقابل ذكرت الجماعة أن المعتقلين ألقي القبض عليهم في منازلهم كل على حدة دون أن يصادر أي شيء من منازلهم.

وأشارت الجماعة إلى أن القبض على أفراد من عناصرها يأتي في إطار "التعامل الأمني العنيف معها.

وذكرت الجماعة في موقعها على الإنترنت أن المعتقلين من مدينة دمنهور عاصمة محافظة البحيرة وأبرزهم المهندس أسامة سليمان وأشرف الكاتب ومحمد الدهبي وأحمد عيد.

ونفت الجماعة وجود أي صفة تنظيمية للاجتماع الذي تحدثت عنه الأجهزة الأمنية, واتهمت الأمن بإلقاء أحد أعضائها من الدور الرابع بعقار بشارع الموازين بدمنهور أثناء حملة الاعتقالات، حيث "أصيب بأربعة كسور بالفخذ والحوض والرجل اليسرى وعظمة الأنف".

في الوقت نفسه تقدم عضو الكتلة البرلمانية للإخوان المسلمين في مجلس الشعب زكريا الجنايني ببيان عاجلٍ إلى وزير الداخلية حول الوقعة، ووصفها بأنها "تعد واضح على القانون والدستور والحريات، وتضاف إلى سجل مصر السيئ في حقوق الإنسان".

وتحقق نيابة أمن الدولة العليا حاليا مع 13 قياديا بالجماعة بتهم وضع خطط لمساعدة ما يسمى بالتنظيم الدولي للإخوان.

يشار إلى أن الجماعة تشغل نحو 20% من مقاعد البرلمان المصري, وتشارك بقوة في انتخابات النقابات والاتحادات المهنية والتجارية والمجالس المحلية.
المصدر: وكالات
http://www.aljazeera.net/NR/EXERES/EF8843D9-819F-422A-9F75-DFD673DBED25.htm

Rania said...

الخبر على ايلاف
أنباء عن وفاة حفيد الرئيس المصري في مستشفى بفرنسا
http://www.elaph.com/Web/Politics/2009/5/441995.htm

ايوشة said...

لما عرفت الخبر استغربت ازاى يعنى واستغربت اكتر على غباء الاعلام المصرى
ربنا يرحمه ويصبر والديه بجد شئ صعب عليهم

ايوشة said...

العجيب خبر التسمم مش خبر الموت ازاى معرفش

هرطقة said...

ويا ترى المطعم اللى أكل منه الفقيد الأكل اللى جابله تسمم.. هيعملوا فيه ايه

ويا ترى جدود الفقيد وعمه وأبوه بياكلوا من أنهى مطعم

ويا ترى جد الفقيد بيفكر دلوقتى فى ان كل من عليها فان ولا لأ

البقاء لله

مى said...

إنا لله و إنا إليه راجعون

لله ما أعطى و له ما أخذ

و كل شئٍ عنده بمقدار

جبهة التهييس الشعبية said...

يعني حد سمه وللا الواد اكل كشري وللا ايه؟
سبحان الله
ربنا يرحمه
على الله جده يتعظ بقى، اهو لا الدكتور الانجليزي ولا المستشفى الفرنساوي ولا جده الرئيس المخلد قدروا له على حاجة لما ربنا اراد حاجة تانية ويمكن يكون الطفل البريء ده ربنا نجاه، في الجنة ونعيمها ان شاء الله
بس على الله جده يتعظ بقى
مين عارف
يمكن ربنا يهديه في الحادثة دي ويفرج عن اللي عمال يقبض عليهم دول ويعرف انه مش فوق حد وربنا فوق الكل
مين يعني كان يقول ان حفيد الرئيس ياكل اكلة مسممة يقوم يموت؟ سبحان الله ربنا له حكمة، يمكن رايد بيه خير
على الله ينور له بصيرته بقى

عبد من عباد الله said...

ربنا يصبر مامته و ابوه و عيلته يا رب ....

مش عارف بظبط يا استاذه نواره هما ليه مخبيين او بلاش كلمه مخبيين ، ليه ما ذاعوش الخبر ؟؟

انا طبعاً مش حقدر اقولك وجهة نظرهم بظبط بس كأعتقاد مني انا ان الموضوع مهواش تكتيم ولا بيخبوا ولا حاجه بس بصراحه يعني و لو حتختلفي معايا حتى انا من الحاجات اللي بحترمها في الراجل ده " الرئيس مبارك " انه من ساعت ما مسك و هو باعد اسرته و عيلته و حياته الشخصيه عن الحكم و الاعلام ...

براحه براحه .. انا بس بقول وجهة نظري و رأيي الشخصي ، يعني مثلاً متلاقيش اهتمام كبير بعيد ميلاده في التليفزيون و البرامج و البيت بيتك بيعيد على سيادة الريس و تقدم مجلس الوزراء بتقديم التهاني لسياده الرأيس و الكلام ده ، لما علاء اتجوز معرفش هو اتجوز امتى يعني بس ما سمعناش بقى اتجوز ازاي و الفرح فين و الاعلام و الجرايد لأ برده ، حتى جمال مبارك لما اتجوز الناس هى اللي اهتمت و بقت تدور هى بنت مين ؟ و الفرح يا ترى كان عامل ازاي و عمرو حيغني فيه ولا لأ و كلام كتير بس برده اشهد اني محستش ان فرح ابن الريس اتعمل " يا رجاله " لا شفت التليفزيون اتغير و بقى يحط ورود و لا اخبار و حسيت بأمانه ان الموضوع بعيد خالص عن الاعلام و الجو ده ...

على فكره انا مش بقول ان الراجل تكرم علينا و مدخلش حياته الشخصيه في الاعلام و الحكم و كأن البلد بلده لأ ده الطبيعي و ده المفروض و هو من وجهة نظري التزم بكده ... في حين ان فيه دول عربيه كتيييييييير الريس و اولاده هما اصحاب البلد و النجوم الكبار اللي فيها مش لازم اذكر بلاد معينه خصوصاً ان فيه بلد دلوقتي حالتها صعبه و رئيسها توفى و الله يرحمة ان شاء الله ...

ازاي بقول كده اما جمال بيعمل ايه في الحزب الوطني و لجنة السياسات و كل شويه مؤتمرات و السيده الفاضله سوزان مبارك كمان .... مش حقدر اقول غير إن كل ده انا شايفه مش غريب اوي يعني ، يعني الموضوع مش موضوع رئيس جمهوريه و لازم اولاد او قرايب رئيس الجمهوريه دول يدفنوا تحت الارض او تحرم عليهم السياسه لكن في الاول و في الاخر ده رئيس الشركه ابنه بيبقى عضو مجلس الاداره و سعات كتير اوي بيبقى ناجح و ممكن كمان يعمل شركات تانيه و ينافس ابوه لانه فهم منه اصول الاداره ( انا بقول كمثال يعني ) ...

اعتقد ان قرينه الرئيس بقى دي في كل البلاد و حتى كل الشركات ... بس كحياه شخصيه عائليه انا شايف انها بعيده شويه ...... رغيت كتير انا مش كده ، انا اسف .

TAFATEFO said...

هي خلاص بقت أكلة مسممة!!

TAFATEFO said...

مين قال انفلونزا خنازير؟؟ مين قال طيور؟؟

ألاءونا

TAFATEFO said...

ومش فاهم المفروض يعلنوا يعملوا ايه يعني؟؟ يشغلوا قرآن في الفضائية المصرية مثلاً؟؟ ده لو كده يبقى مش طبيعي

ما أخوه مات ومتنشرش في الأهرام غير النعي

مش حتى كمان في الموت هتقولوا مخبيين ودي حاجه تضحك!!!!!!!!!!!!!

جبهة التهييس الشعبية said...

عبد من عباد الله

والنبي يا حبيبي انت ح تشلني والظرف مش مساعد

مين ده اللي ما بيدخلش حياته الشخصية في الحكم
امال مراته اللي ناطة لنا في زورنا في كل حاجة
وابنه اللي ح يبقى رئيس
والظاهر انه مش ح يبقى رئيس
استغفر الله العظيم، ولو اني زعلانة على الطفل ده، ووالله عيطت لما شفت صورته وهو بيبي، كان بيبي امور، وصعبانة عليا امه جدا جدا جدا
بس افتكرت النكتة بتاعة خطبة حسني مبارك سنة الفين وخمسين وهو بيقول: قعدتوا تقولوا مافيش توريث مافيش توريث اهو الواد مات
بس والنبي ما تقوليش ما بيدخلش حياته الشخصية
احنا نفسنا بقينا حياته الشخصية
يارب يهديه بالمصاب ده

TAFATEFO said...

الكلام المش أكيد الوحيد المنطقي انه نزيف في المخ

هيسفروا تسمم غذائي فرنسا؟؟

جبهة التهييس الشعبية said...

يعني انت جبت نزيف في المخ منين؟

اذا كانت الاخبار اللي نزلت لحد دلوقت انه تسمم

وكل اللنكات بتقول "اثر تناوله وجبة مسممة خارج المنزل"
جبت منين نزيف في المخ يعني؟
فين اللنك اللي بيقول نزيف في المخ؟
ولما حفيد الرئيس يموت في حادثة ده خبر
وكل وكالات الانباء ذاعته
والتلفزيون المصري مش ابعدية حسني مبارك
المفروض انه بيشتغل شغل مهني
وصحفيا ده خبر والمفروض ينزلوه
ان شالله على شريط الاخبار
وهو ده الطبيعي
وهات لنك نزيف المخ اللي بتقول عليه

جبهة التهييس الشعبية said...

وقالت أنباء متداولة في القاهرة إن حفيد الرئيس المصري محمد علاء مبارك (13 عاما) أصيب بحالة تسمم غذائي بسبب تناوله وجبة فاسدة خارج المنزل مما أدى إلى تعرضه لمشكلة صحية كبيرة استدعت نقله للمستشفى ومن ثم إلى العلاج العاجل في فرنسا

TAFATEFO said...

جبته من أبويا .. قالهوله شخص ما في وادي النيل وبقول انه مش مؤكد

كل اللنكات اللي هي ايه .. كلها واخده من الجريده .. والكلام ده حتى ان صح مش مسلم بيه

لكن بقول الأقرب للمنطق .. طبيب مخ وأعصاب + سفر لفرنسا فيبقى الكلام الوحيد المش مؤكد المنطقي في رأيي هو نزيف في المخ

دي الحاجه اللي ممكن تحصل فجأة وتقعد في أمل 3 أيام وسفر لفرنسا

TAFATEFO said...

وقالت أنباء متداولة في القاهرة.

يعني حتى ناقل الخبر مأجزمش وناقش .. مهواش طبيب شرعي .. في بلد فيها الخبر قبل ما يحصل بيوم

مهندس حر said...

عبد من عباد الله
--------------
إنت هاتخلينى أقول عليك زى ما قالوا قمل الدولة على واحد إنه إستغل المناخ الديموقراطى عشان يقلب نظام الحكم تقولش طرابيزة..

يعنى إنت دلوقت بتستغل الظرف اللى مخلينا مش عايزين نقول حاجة وحشة على حد معين حتى و لو كانت بالحق إحتراما لمصابه و تعاطفا مع موقف مؤلم لأى إنسان..

على العموم خليك فاكر الكلمتين اللى قولتهم و تعالى قولهم تانى بعد 3 أيام من دلوقت و ساعتها هاقولك إجابة تفصيلية..

TAFATEFO said...

وبرضه مش فاهم ايه المهنية في عدم ذكر الخبر؟؟

قالوا قبل كده ان سوزان بتغير دم؟؟ ولا قالوا ان علاء خلف؟؟ ولا ان ديجا حامل مثلاً؟؟

اسم مرات علاء أصلاً أراهنك ان في ناس كتير متعرفوش

وفي الأول وفي الآخر دي وفاة وهما أحرار .. أحرااااااااااااااار .. لو طلبوا ان الخبر ميعلنش في وسائل الإعلام الرسمية هما أحرار

أما عجايب والله العظيم

إذا كانت بعض وسائل الإعلام بتسعى وراء أخبار الأسرة فده من حقها .. انما مش واجب على الإعلام الحكومي انه يعمل زيها

دي مسأله مش محتاجه جدل .. ده شيء بديهي

جبهة التهييس الشعبية said...

طب والنبي بطل تجيب لنا اخبار من معارفك تاني عشان بتطلع غلط
احنا مالناش غير اللي بيتقال في الجرنال
لما يبقى يتغير يبقى يتغير
اكيد ح نعرف وح يتنشر في الجرنال
مافيش حاجة بتستخبى

TAFATEFO said...

معارفكها ها ها

TAFATEFO said...

بتطلع غلط.

ها ها ها .. برضه

عموماً حاضر

مهندس حر said...

يا بنى إنت و هى.. بكرة المستشفى الفرنسى يعلن أسباب الوفاة.. أو وكالة أنباء عالمية تجيب أسباب الوفاة من جوه المستشفى.. فى نهاية المطاف المحصلة واحدة و معرفة السبب ما لهاش أهمية كبيرة ..

إلا إذا...بس ده مستبعد.. خلاص؟

TAFATEFO said...

Botulism Food Poisoningأعتقد ده التسمم الغذائي الوحيد (مع انه في حالة ابن الريس صعب بصورة لا تتصور ومش هيبقى لوحده) اللي ليه علاقه بالمخ .. بس معتقدش ان ليه علاقة بجراح المخ والأعصاب

TAFATEFO said...

إلا إذا

ههههههههههههههههه

شطحت

مهندس حر said...

TAFATEFO
--------
ده على أساس إنه صح إن الإعلام الرسمى يبقى على مزاجهم و ينفذ رغباتهم و الا على أساس إن ده أخلاقيا صح و ينبغى للإعلام الرسمى أن يتمسك بالأخلاقيات أكتر من غيره و ألا على أساس إن ده أمر واقع و خلاص..

جبهة التهييس الشعبية said...

لا ماهو انت مش ح تفهم ايه عدم المهنية في تصرف الاعلام المصري لانك اصلا بتقول اعلام حكومي
مع ان والله هو مش بيصرف عليه من جيبه ولا هو ابعديته
الاعلام المصري بيتصرف عليه من ضرايب المواطن
وهم مش احرار عشان هم بيحكموا البلد
الاسرة كلها

مهندس حر

لا ما اعتقدش ان حد سمه
مين حيوان يعمل حاجة زي دي؟ ما اعتقدش ابدا
الا اذا كان السم كان محطوط لجده وهو اكله بالغلط بقى
ههههههههههههههههههههههههه

مهندس حر said...

يعنى ليه مسكتوا إلا إذا و سيبتوا.. مستبعد مع إنهم فى جملة واحدة.. عالم غاوية تصطاد..
هههههههههههههههههههه

TAFATEFO said...

حكومي

رئاسي

كلمتين مختلفتين

أخلاقياً .. ومهنياً

مفهمش أبداً ان التليفيزيون يطلع يقول ننعي وفاة حفيد الرئيس؟؟

أيوه الأخبار الخاصة للعائلة بعيدة تماماً من زمان .. والإعلام الغير حكومي (الخاص - اسمه كده) هو اللي بيسعى وراء الأخبار وده من حقه

لكنه ليس من واجب الإعلام الحكومي (الحكومي مش معناه انه رئاسي ......... أظن واضحه) انه ينقل أخبار العائله

لا يعاب عليه إذا ذكر نبأ الوفاة .. لأنه عادي .. لكنه لا يلام إذا لم يذكره

ومن غير المتصور انه يكون بيخبي

TAFATEFO said...

الاعلام المصري لانك اصلا بتقول اعلام حكومي
مع ان والله هو مش بيصرف عليه من جيبه ولا هو ابعديته
.

ايه وجه الاعتراض على الإعلام المصري الحكومي؟؟

الإعلام المصري الحكومي زي الصحف القومية والقنوات الحكومية (المصرية مش السنغالية)

في إعلام مصري غير حكومي زي المصري اليوم ودريم على سبيل المثال لا الحصر

ايه بقى اللي معترض عليه؟؟

TAFATEFO said...

وبعدين الحق علي .. أنا آآآآآآآآآسف

كنا وصلنا لغاية نوع الأكلة .. و بيضحك علشان بيخبوا

enjoyyyyyyyyyyyyyyyyyyy

دمتم بود

جبهة التهييس الشعبية said...

عشان الاعلام الحكومي يعني اللي بيمثل الحزب الحاكم
والاعلام الرسمي يعني اللي بيمثل الدولة المصرية
وبصرف النظر عن ان الدولة المصرية ما بيحكمهاش غير حزب واحد ابد الابدين امون رع
الا ان الاعلام الرسمي ده بيتصرف عليه من ضرايب المواطنين والمفروض انه يبقى مهني ومحايد
ومهني يعني يجيب خبر لما يبقى خبر
ويجيبه من عدة مصادر ومن ضمنها المصادر الحكومية ما تبقاش هي مصدره الوحيد
لان هدفه خدمة اللي بيصرفوا عليه
واللي بيصرفوا عليه المواطنين
مش الحكومة
الحكومة بيصرف عليها المواطن برضه
فمش معقولة المواطن يصرف على الحكومة والاعلام والاتنين يطنشوه ولا كأنه موجود ويروح يعرف اخبار بلده من مصادر تانية
وانا مش فاهمة والله اخبار العيلة دي على كيفهم
مدام حشروا نفسهم في حياتنا
كلهم
يبقى مش على كيفهم نعرف اللي هم يقولوه بس
الكلام ده لو كان زي ايام عبد الناصر حابس الولية والعيال في البيت
لكن مدام الولية والعيال مطلوقين علينا يبقى اي حاجة تخصهم خصوصا موت طفل في سن مش متوقع انه يموت فيه لاسباب مش واضحة
ده مهنيا اسمه خبر
ومعلش يا مصطفى دي شغلتي وانا عارفة المطبخ جوة الاعلام الرسمي بيشتغل ازاي
احنا قعدنا ما نجيبش سيرة محاكمات الاخوان في الاعلام المصري وهي بتتصور وبتتذاع في كل محطات العالم
دي اسمها خيبة
ومافيش حاجة اسمها اعلام حكومي
الا بقى اذا الحزب الوطني ح يصرف عليه

سيف said...

طفاطيفو : دمت بود يا حبيبي مع السلامة و القلب داعيلك

GHARAM said...

بجد حاجه تحزن، معقوله ، سمعت ان أصابه مرض غامض،مسكين طفل صغير، ربنا يرحمه ويصبر قلب أمه،وربنا مايوري حد حرقة القلب على الضنى،أظن دي أفظع حاجه ممكن تحصل للأم والأب أيضا



والله اصيله يانواره، كبرت في نظري، مهما أختلفنا مع الريس، إلا أننا برضه شعب أصيل وطيب


أصيله يابنت نجم

يانوارة مصر
==============

صديقتك القديمه


مكززززززززززززززوفه


بس غيرت العتبه

GHARAM said...

اما بقي أن الخبر نزل في كل حته، وفيه تعتميم في صحفنا وإعلامنا



فمعلش يانواره



اصلهم لسه عايشين زمن صلاح نصر

جبهة التهييس الشعبية said...

مكسوووووووفة

انت فين يا بنتي

مبروك العتبة الجديدة

Rania said...

انا لسه عارفه الخبر ده دلوقت و اقلب على رايك فى اى قناه عربيه مش لاقيه اى سيرة لحد ما اعتقدت انها اشاعه مغرضه
ربنا يرحمه و يصبر اهله

Appy said...

انا عرفت بالليل بعد الوفاه بس مردتش اكتب ولا اقولك قولت يمكن غلط
ربنا يرحمه برحمته يا رب ويصبر قلب امه وابوه فعلا

حـنــّا السكران said...

الله يرحمه

ـ أنا شايف انه الأمر طبيعي جدا بالنسبة للإعلام ..نحنا عارفين انه الإعلام في البلدان العربية لا يمكن ينشر أخبار عن عائلة زيوس ( في كل بلد عربي ) إلا بموافقة العائلة , و العائلة هنا ربما أرادت التعامل مع الأمر على انه حدث خاص بالعيلة نفسها بما انه الفقيد طفل .. و لو كانوا أوعزوا للإعلام ينشر الخبر , الإعلام الرسمي طبعاً , كانوا عملوا فضايح ..و كانوا خلوا الناس بدل ما تترحم عليه .. تعمل حاجة تانية .و تقول كلام من قبيل : ما هو كلّ يوم أطفالنا بيموتوا من الفقر و من المرض و لا حد بيجيب سيرتهم ..و أطفال الديقة و و و كلّ هالكلام كان الشعب رح يقولوا لو الإعلام الرسمي تعامل بطريقته المعروفة , مع خبر موت أحد أفراد السلالات المقدّسة.. أما بقى الإعلام غير الرسمي و غير المسيطر عليه من قبل مجلس الكهنة في كل بلد . بيتعامل مع الأمر من منظور اّخر , بينشره و كأنه حدث عظيم أو زلزال , أو شيء ما كان متوقع أبداً , صدمة و مفاجأة , و حدث تاريخي, باعتبار أن أحد الخلفاء المحتملين قد رحل ..و هو في النهاية ..طفل توفى الله يرحمه .. متل ما أي طفل بيتوفى ..أما حكاية السبب ,,تسمّم أو مرض .. كلّ شيء وارد , و كلّ شيء غير مؤكد . لأنه هيك أمور ما حدا بيعرفها غير المقربين من العائلة .. أقصد مرض أحد أطفال العائلة أو إصابته بشيء معين .. في عائلات حاكمة .. بيصير فيها مصايب كتير و ما حدا بيعرف .
بالنهاية لدينا هنا خبر طفل متوفي .. و هذا خبر مؤسف و محزن ابن مين ما يكون..الله يرحمه .

الصارم الحاسم....يوما هل أكونه said...

لعل الله اراد ان يذيق مبارك وآله ما ذاقته الامهات في غزة...وماذاقته الامهات في لبنا وفي العراق وفي كل مكان كان يستطيع ان يفعل شيئا ولو صغيرا

فان تابوا وانابوا كان هذا رحمة من الله وفضل لهم وليس لسواهم


رحم الله الصبي

Founoon said...

البقاء لله

انا مش متخيلة ان في ناس شمتانة !
دا موت

Appy said...

نواره ده اللى نزل فى الجمهورية النهارده بتاريخ 19 مايو

سوزان مبارك تعتذر عن حفل تكريمها في لندن لمتابعة حالة حفيدها
لندن أ.ش.أ:
كلفت سوزان مبارك قرينة رئيس الجمهورية السفير حاتم سيف النصر سفير مصر في لندن بإبلاغ اعتذارها لقرينة رئيس الوزراء البريطاني جوردن براون والجمعية الملكية البريطانية عن عدم تمكنها من المشاركة في حفل تكريمها كما كان مقررا لاضطرارها للبقاء في مصر لمتابعة الحالة الصحية لحفيدها محمد علاء مبارك.. كان من المقرر ان تصل السيدة سوزان مبارك أمس الأول إلي المملكة المتحدة في زيارة تستغرق عدة أيام تتسلم خلالها العضوية الشرفية المتميزة لجمعية الأطباء الملكية البريطانية في حفل خاص تقيمه الجمعية.

عبد من عباد الله said...

انا من الواضح اني بقيت حزب وطني يا رجاله هههههه ... وشكلي كده حدافع بقى عن الحزب " الوطني في مصلحتك و المستقبل ليك هههه" ....

يا جدعان انا قولت ده رأيي الشخصي اولاً ، ثانياً انا قولت دي من الحاجات اللي انا عن نفسي عجباني فيه من وجهة نظري برده ...

ثالثاً : يا استاذه نوراه انتي قريتي التعليق بتاعي كله ؟ مش عارف ليه انا جالي احساس انك مكملتهوش للأخر .. الله اعلم .

رابعاً : و دي اهم نقطه ... ربما تختلفوا معايا في الرأي اللي انا قولته و ربما تتفقوا بس على العموم ده شئ عادي ما دام مخرجناش عن اداب الاختلاف ، بس المشكله اللي انا شايفها مقدرش اقول انه فيكم انتوا بس و اختلافي معاكم انتوا بس لأ بلعكس انا يمكن لما بقول الكلام ده عندي في البيت بيبقى عليه اعتراض برده " عادي جداً " بس ده من وجهة نظري راجع لنظريتنا الشهيره جداً ( الانسان في الغالب يا اما ملاك او شيطان ) بمعنى اننا من الصعب او يمكن من المستحيل اننا نكره حد و نقول عليه حاجه كويسه و نفس الموضوع من الصعب او من المستحيل اننا نحب حد و نقوله عليه حاجه وحشه او انه غلطان في حاجه ...

زي ما ممكن لما اختلف معاكم مثلاً دلوقتي ، طبيعي ممكن تدايقوا مني مثلاً فمن الصعب جداً ان حد يذكر عني اي كلمه خير و انا مش بقول اني راجل في الموضوع ده عمري ما غلطت لأ بصراحه سعات بيحصل معايا نفس الموضوع و لما بدايق من حد بنسى كل حاجاته الحلوه و الوحش كله بيبقى قدام عيني و العكس صحيح برده ..... في الاخر يظل الامر رأي و وجهة نظر .

Founoon said...

سمعت ان الولد الله يرحمه كان بيلعب كورة في النادي وقع على راسه جاله نزيف في المخ

عموما هنسمع روايات كتير عن موته
ومش هتفرق كلها في حاحة لان النتيجة واحدة

دعوات امهات وابهات كتير اتحرق قلبهم على ولادهم
ربنا يرحمنا جميعا برحمته ويصبر امه ويجعل موته عظة وعبرة

Appy said...

خلاص اكدوا الخبر دلوقتى من شويه فى التليفزيون المصرى

Kontiki said...

الله يرحمة و يرحم اموات المسلمين جميعا
ويصبر اهلة

ديالا said...

ياجماعه انتوا عارفين يعني ايه طفل يموت احنا ملناش دعوه باي حاجه ولا حتي مات ازاي احنا بس ندعيله بالرحمه ويصبر قلب جده وابوه وامه ومننساش ان برضه في الاخر ان جده هو ولي الامر لينا فبجد نسيبنا من اي حاجه وبلاش الضحك في مواقف متستحملش فيها الضحك عيبه في حقنا بجد

حـنــّا السكران said...

لسه كنت بتكلم في تعليقي الصبح ..

أهو يا ستي .. كلّ القنوات الفضائية المصرية الخاصة من دريم للحياة للمحور لقناة الافلام لقناة او تي في ..حاطين قراّن كريم ..لا و في منهم حاطين صورة الطفل مع القران ..طيب مش دي قمة النفاق و الانتهازية ؟... هم اللي بيعطوا الواحد فرصة يقول اي شي و كل شي .. يعني لا بعد حادثة العبّارة و لا بعد حادثة الدويقة شفناهم عملوا حداد

ـ طفل توفى الله يرحمه ..الحزن الوطني ده عشان حفيد رئيس الجمهورية ولاّ عشان طفل مصري ؟؟
معليش أنا اّسف ..مش وقت مناسب و لا حادثة مناسبة انه الواحد يتكلم ...بس انا شايف انه الانفصام بالشخصية صار حالة أمّة بحالها .

مدير التحرير said...

ورغم أن النبأ لم يعلن رسمياً حتى ساعته، فقد خيمت أجواء الحزن على الشارع المصري والدوائر الرسمية، لكن لم تشر وسائل الإعلام الحكومية لهذا النبأ حتى الآن، وتجدر الإشارة إلى أن لمبارك حفيدين وهما نجلا ابنه علاء، وهما : محمد وعمر، بينما لم ينجب الابن الأصغر للرئيس جمال مبارك حتى الآن .

ساعد نسرين الايمن said...

البقاء لله
لله ما اخذ ولله ما اعطي
اللهم ارحمه واسكنه الجنة

ما اصعب ان تموت زهرة شابة
13 سنة
الله يرحمه
تسمم غذائي
ياتري ده ممكن يكون ليه علاقة بشحنة القمح الروسي

مش قصدي طبعا انه كل منها
بس يمكن حد كل منها ودعا علي الرئيس وعائلته وربنا استجاب

ربنا يكون في عون ابوه وامه
وكل الاباء والامهات اللي بيموت ليهم ولادهم وهم في سن زي ده
ربنا يصبر اهله بجد

احمد سعيد said...

ياسادة

كون ان التلفزيون المصرى

او الاعلام المصرى بيتجاهل

او بلاش بيتجاهل

بيغطى على احوال افراد العيله المالكه

فدة مش مساله احترام ولا مهنيه ولا يحزنون

ولا مجدعه من الريس اللى بيبعد الاعلام عن حياة عائلته الخاصه

ولكن لسبب بسييييط جدا

علشان كلها فضايح

يعنى بالله عليكم الاعلام هيتكلم يقول ايه

هيقول ان اونكل علاء قاسم البلد بالنص ومشارك كل خلق الله فى كل حاجه حتى جنى المصباح قاسم معاة الفانوس بالنص ؟؟؟

ولا هيتكلم عن مدام هايدى راسخ بنت اللوا ( المحترم ) راسخ باشا

اللى هى وعيلتها بياكلوا بغاشه على حس الجوازة دى

ولا هيتكلم عن اولاد علاء بيه اللى رضعوا التكبر والطغيان من صغرهم وماسحين الارض بظباط الحرس الجمهورى من نقيب حتى لواء

شتيمه عمال على بطال وتهزيق وسفاله وقله ادب , ولا سمو البرنس مع فلاحين العزبه

ولا جدهم اللى بيقعد يتفرج عليهم وهما نازلين بهدله فى خلق الله وفرحان ومزقطط قوى ان احفادة اتعلموا العنطزة على صغر


ولا تيته اللى العساكر والظباط بيشوفوها يطلعوا يجروا من كتر ما هيا مؤذيه

ولا شله الارشانات اللى محاوطينها عمال على بطال

ولا طنط خديجه وابوها اللى جوز بنته جوازة ياكل من وراها ( الشهد )

وما ادراك ما شهد اللى ينوب عيله البنت مرات جيمى

من اول ابوها

لغايه بواب الفيلا بتاعهم


طيبعى جدا ان دول يبقوا خط احمر للاعلام

هيعملوا بالاعلام ايه

هما ناقصين وش ؟؟؟؟


يمكن الوحيد اللى شذ عن القاعدة دى

جيمى

ودة طبعا لانه بيتأهل علشان ( يركب ) ويدلدل رجليه ولامؤاخذة

ولازم ( الحمار ) يتعود على الراكب الجديد

وخصوصا ان وزنه خفيف ومن السهل الحمار يوقعه من اول رفصه

فلابد من جلسات ركوب
مؤقته

قصدى شو اعلامى يعنى عمال على بطال

جيمى راح جيمى جه جيمى اكل الفقرا جيمى صرح وقال وعاد ووجه واكد ونبه وحذر


صباح الفل


وعلى فكرة يانوارة

اللى فى بالك مش هيتعظ ابدا

دة خلاص

اخد الختم

عارفه مين اللى ممكن يعقل ويتوب ويتهدى

اييييييييييييييييوة

هو دة

مواطن مصري said...

اعلنو في التلفزيون الرسمي و دريم و ميلودي و بقية القنوات المصرية الصبح كانو مشغلين قرأن

sun_shine said...

ربنا يرحمه ويصبر اهله ويبدلهم خير

مش مهم السبب ايه اللي حصل حصل والموقف صعب اوي واكيد فيه حكمة من اللي حصل
وربنا يصبر عائلة محمد ويهون عليهم ويجعل قبره روضه من رياض الجنه ويعفو عنه ويغفرله

ياريت تدعوله بالرحمة ولاهله بالصبر دا اللي هم محتاجينه دلوقتي

أسوور said...

البقاء لله ومحش يورى حد فى ولاده

قلبى معاهم رغم كل شىء .. لأنى أم واعرف معنى فقدان ابن كويس قوى .. يا رب ما تورى حد ابدا

الا الموت .. ولا حول ولا قوة الا بالله

جبهة التهييس الشعبية said...

مهندس حر

فيه واحدة اسمها ديالا دخلت استغلت المناخ الديمقراطي

جبهة التهييس الشعبية said...

والصارم الحاسم
حرام عليك، هو كل اللي بيفقد له عزيز يبقى انتقام؟ انت كده بتجرح ناس تانية متذرعة بالصبر، طب ما طنط شاهندة ابنها راح، كانت عملت حاجة لاهالي غزة؟
قول كفى بالموت عظة وخلاص
لكن ده له ام مالهاش ذنب واحنا عايشين ماحدش عارف فينا مين قبل مين

جبهة التهييس الشعبية said...

يا احمد
الكلام ده الناس عارفاه وما كانش فيه داعي لتكراره في الظرف ده

جبهة التهييس الشعبية said...

معلش يا جماعة انا اسفة
هههههههههههههههه
فتحت التلفزيون
مشغلين اغاني دينية بتاعة الجسمي وحمادة هلال وعمرو دياب
هههههههههههههههه
لا حول ولا قوة الا بالله
انا بس ليا تعقيم هنا بس
التلفزيون المصري فيه كفاءات ممتازة
انا باتكلم بجد
فيه عيال زي الفل، وكفاءات عالية جدا جدا جدا على اعلى مستوى
بس الاوامر بقى
ههههههههههههههههههههههههههههههه

الصارم الحاسم....يوما هل أكونه said...

واضح ان اغلب شعبنا عاطفي اوي ....وده شئ مش وحش في حد ذاته

ربنا يرحم الجميع

احساس طفلة محبة للرومانسية بس واقعية said...

ملحوظة: ده طفل مالوش ذنب في اي حاجة، وربنا ما يوري حد اللي امه فيه دلوقت، وارجو من المعلقين مراعاة حاجة زي دي

اول مرة اعلق عندك
وهو دا الجزء اللى عجبنى
لان عندك حق
ربنا يبعد عنك كل حزن
ويرحم الولد ويدخلة فسيح جناتة
ويصبر اهله

تقبلى مرورى

mido said...

نفسي أشوف الكفاءات دي بتعمل حاجة

zezo said...

عش ع الريح.. حكايات عمو أمير ومحسنة توفيق!

zezo said...

عش ع الريح.. حكايات عمو أمير ومحسنة توفيق!

ده مقال جميل عن كتابك في موقع بص وطل
http://www.boswtol.com/aldiwan/nkasakees_248_02.html

جبهة التهييس الشعبية said...

دلوقت بقى اغنية بتاعة الواد ده بتاع يا معلم
الاذربيجاني الانجليزي ده
اسمه ايه؟
طالع في اغنية هو ومجموعة كده عاملين زي
men in black
وبيصلوا ع النبي
عليه الصلاة والسلام

يعني ساعة ما الخبر كان خبر وعاجل قعدوا ما فتحوش بقهم وكل القنوات بتتناقل الخبر

ولما الخبر قدم مشغلين لنا اغاني دينية

ايه الريادة دي كلها

يعني حتى عايزين يدوا الخبر اهتمام ويصلحوا غلطة تأخرهم في اعلان الخبر
وحتى ينافقوا
يغطوا بقى
يتصلوا بالطبيب المعالج
بالمستشفى الفرنسي بمستشفى وادي النيل حتى انشالله بالممرض
بالرياسة حتى
يعملوا تقرير اخباري بقى من اي نوع
مالهمش مراسل في فرنسا يروح يشوف اخبارهم؟
ايه الوكسة دي؟
لو اسرة الرئيس مش عايزة تتكلم مش فيه مستشفى وطبيب معالج جابوه على ملا وشه من انجلترا
يعني مش معقول مش عارفين يتصلوا بيه
هو الرئيس واسرته مالهمش حكم على المستشفى والاطباء

دلوقت اللي بيغطي الخبر عمرو دياب وايهاب توفيق وهشام عباس ومصطفى القمر

جبهة التهييس الشعبية said...

والله يا ميدو اول ما بيطلعوا برة وياخدوا اجازة بدون مرتب ويشتغلوا انشالله في المنور بيبقوا زي شعلة نار
وشاطرين شطارة والله اسأل عليهم اي قناة فضائية الجزيرة وللا العربية وللا البي بي سي وللا حتى الحرة
كلهم اصلا من التلفزيون المصري وواخدين اجازة بدون مرتب ولهلوبة
(طبعا اخلاقهم اخلاق مصريين شرانيين يعني :) مكفرين الناس كلها بالشر والمقالب على رأي واحد امريكاني كان بيشتكي لي من اخلاق المصريين في امريكا
never forget never forgive
بس في الشغل قطررررررررر
وما بيتهدوش بيشتغلوا اربعة وعشرين ساعة

جبهة التهييس الشعبية said...

دلوقت زينب بتقول نزيف في المخ واحتمال يكون كان عنده ورم
http://egyptianchronicles.blogspot.com/2009/05/rip-mohamed-mubarak-jr.html

والبيبسي سي بتقول تسمم

وفنون بتقول كان بيلعب كورة وقع على راسه جاله نزيف

والتلفزيون المصري بيذيع اغاني دينية

يا ترى ايه؟

جبهة التهييس الشعبية said...

ويدعوت احرنوت بتألف احلى تأليف
بتقول الطفل حفيد مبارك من ابنه الاكبر علي
:)
الله يحظهم طمنوني على الاعلام المصري
http://www.ynetnews.com/articles/0,7340,L-3718117,00.html

جبهة التهييس الشعبية said...

lala
انا اسفة مش ح اقدر انشر تعليقك لانه شديد قوي وكلامك جارح لناس في ظرف ماحدش يتمناه لنفسه وربنا ما يحرمش انسان من عزيز عليه ابدا ويديم الاحبة على بعض
اي انتقاد لشخص حسني مبارك يبقى بعيد عن المصائب اللي مش في ايد حد غير ربنا بس
وربنا يعافينا كلنا ولا يصيبنا في عزيز لدينا ابدا
وياريت تفصلي ما بين كراهيتك لافعال حسني مبارك اللي انا باشاركك فيها وما بين موقف انساني زي ده

lala said...

يا ترى كانت مشاعرك انسانية لما منع فتح معبر رفح و شفتي الاطفال و النساء و الرجال و الشباب و العجايز بيموتوا في غزة و لسة ما انفتح المعبر و لسة الناس مش لاقية بيوت تؤويها.. كانت مشاعرك انسانية لما الناس اللي طلعوا يتعالجوا في مصر تم تعذيبهم و استجوابهم في عز الالم عشان يفسدوا عن المجاهدين.؟؟؟؟؟؟ كانت مشاعرك انسانية لما تم اعتقال طالب من ام فلسطينية بدعوى انه على علم بمكان احتجاز الصهيوني جلعاد شاليط؟؟؟؟ وين الانسانية اللي بتحكي عنها .. طبعا كل انسان مؤمن بيعرف انه الظالم اله يوم.. يمكن هدا الطفل ما اله ذنب في مصايب ابوه و جده و لكن لا بأس من انتقام الله منهم حتى لو كان بهاي الطريقة

جبهة التهييس الشعبية said...

يا استاذة لالا

اطلعي على جنب الصفحة الشمال ح تلاقي
search blog
واكتبي في الخانة غزة أو رفح أو فلسطين أو المعبر أو إسرائيل
اي كلمة من دول في السيرش ح تطلع لحضرتك المعلومات عن البلوج اللي حضرتك محتاجاها
عشان تعرفي كانت مشاعري ايه

البني ادم العاجز بس هو اللي بيشمت
الرسول نهى عن الشماتة
والشماتة مش من اخلاق الكرام ولا المؤمنين وده موقف كل الناس معرضة له وربنا يعافي الجميع

ده قضاء الله، والناس في قضاء الله تقل خيرا او تصمت
واحنا ما نفسرش اقدار الله على كيفنا
هو ربنا كان بينتقم من اهالي غزة لما ابتلاهم بالابتلاء ده؟
اتقي الله

جبهة التهييس الشعبية said...

وعلى فكرة لو كنت فلسطينية انا مقدرة مشاعرك
بس اقتدي بالمقاومين
عمرك شفتي مقاوم شمت في عدو قبل كده؟

lastcrazyboys said...

الحقي


المذيع بتاع الأخبــار حد خد باله قال ايه دلوقتي
!!!!!!!!

بقول : في دعاء مأثور عن النبي صلى الله عليه وسلم"اللهم أبدله دارا خيرا من

داره..وأهلاً خيرا من أهلــه

بس الشهادة لله ..هو شكله افتكر فسكت ثانيتين قبل ما يقول الجزء الأخير

جبهة التهييس الشعبية said...

الجنازة على القناة الاولى

فتاه من الصعيد said...

ان لله وانا اليه راجعون
انا لسه عارفه الخبر دلوقتى من المدونات.........اصلى ما فتحتش التليفزيون...

بدراوى said...

الريس مظهرش خالص
فى الجنازة
ممكن يظهر فى العزاء

بس يا حرام علاء متأثر اوووى

ربنا يرحمه و يصبره
انا كنت حعيط بجد
:-(

جبهة التهييس الشعبية said...

علاء شكله فظيع
يا ساتر يارب ربنا ما يكتبها على حد

جبهة التهييس الشعبية said...

ده انا اول مرة اشوف جمال مبارك بيعيط

بدراوى said...

انا كنت بشوف العزاء
فوالدتى خدت بالها ان الكل عزا و باس
و حضن
قالتلى ربنا يرحمه بس
كدة مينفعش انفلونزا الخنازير
!!!!
----
الا هل تعتقدى ان حيخرج بيان رئاسى عن الأزمة الصحية للفقيد محمد

اصل الواد ملحقش يوم السبت تعب الإثنين مات

حاجة غريبة شوية
نفسى اعرف كان عيان بإيه

واحد قاللى تلاقى اسرائيل سممته
شوفتى ذكاء اكثر من كدة

مهندس حر said...

مناخ التعليقات قلب على الأجواء التقليدية لسرادق العزاء المصرى..

يا إخوانا إطلبوا الرحمة للولد و لموتانا و لموتى المسلمين جميعا.. و كفى بالموت واعظا..

حد يقوللى إيه حكاية الحكومة الفليسطينية الجديدة اللى أدت اليمين دى؟؟

ramez said...

جبهه انا مستغرب كلامك


لان شريك الاخبار بالتلفزيون المصري زاع الصبح الخبر


واكدو ببيان رئاسي ان الجنازة هي العزى بس




ابقي خدي بالك

جبهة التهييس الشعبية said...

رامز
انا قريت تعليقك تلات مرات عشان افهم ايه اللي انت مستغربه ومين شريك في ايه وايه دخل ده بان الجنازة هي العزاء واخد بالي من ايه؟

ramez said...

سؤال بسيط

هو مش مال الشعب الغلبان ده هو اللي اتجوز بيه سي علاء



وماله اما يموت حفيد ولا اتنين


ما الويث جاي بعد سنتين كدة كدة


يا جبهه لو قلتيلي اطفال الدويقة ولا اسطبل عنتر هحزن وازعل انما وريث من وراثة العرش


يبقي المفروض متضايقش لانه ميقربليش اللي يقربلي الفقرا اللي زيي من ابناء الشعب اللي اتحرم من العلاوة


نفسي اعرف 10 % الميه تاكلني ولا هتاكل امي ربنا يحرسك يا جبهه



ومتاكليش كشري اليومين دول

ramez said...

أسف اني لخبطتك


لما قريت الموضوع لاول مرة فكرت انك مخدتيش بالك من شريط الاخبار


الخبر متذاع من بدري بس بفتور وكان اللي مات مش ابن ابن ابن الزعيم اللي بياكلهم

جبهة التهييس الشعبية said...

ما بين حضرتك وما بين ديالا اللي بتقول مبارك اب لينا انا حطيت صوابعي في الشق
مبارك لا اب لينا
ولا ينفع لما طفل يموت نقول الكلام اللي حضرتك بتقوله
واقع الامر ان مبارك رئيسنا وحفيده مات في سن مش متوقع لاسباب غامضة
اولا البقاء لله وواجب العزاء سنة عن الرسول عليه الصلاة والسلام
ثانيا احنا من حقنا نعرف ايه اللي موته والاعلام المفروض يخدمنا احنا مش يخدم اسرة مكونة من تمن افراد
لانه ح يفرق معانا لو حفيد الريس اكل حاجة سممته في مصر وللا جاله نزيف في المخ عشان كان بيلعب كورة تبقى حادثة وللا عنده سرطان اطفال زي ما بدراوي بيقول

ده ح يفرق معانا كمواطنين بنصرف على الدولة وعلى الاعلام مش شقانا وعرقنا
لا يليق الشماتة في طفل واب وام مكلومين ايا كانوا
ولا ينفع نتقلب كلنا حزب وطني ونغني اخترناه اخترناه عشان ربنا افتكر حفيده

احمد سعيد said...

بصى يانوارة

دى وجهه نظر

مش شماته ولا قسوة قلب

لا شماته فى الموت

وربنا يرحمه


انا لا شامت

ولا سعيد

انما بالتاكيد انا مش حزين


والا كان اولى انى احزن واعمل بوست على كل طفل مات فى مصر بسبب اكل فاسد ولا سرقه اعضاء ولا تشرد ولا اى بلوة ومرض من اللى طايحين فى البلد فى عهد الاسرة السعيدة

بل على العكس

الناس اللى بتموت وبيتخرب بيوتها دى اولى بالحزن من مبارك وعيلته


يعنى البقاء لله

اوكيه

بدون شماته ولا اى شىء وحش

بس الغريب اننا نقلب الموضوع محزنه

ولا حفيد الريس ابن ناس

وباقى خلق الله ولاد كلب

عليا النعمه احنا شعب غريييييييييب


الله يمسيك بالخير يافيومى

على رأيك


ناس طيبييييين والله

جبهة التهييس الشعبية said...

الاعلام المصري ما اذاعش الخبر غير بعد ما كل الوكالات اذاعته
الولد توفاه الله بالليل
والجزيرة والبي بي سي والقاهرة اليوم اذاعوا الخبر
والتلفزيون المصري ما نزلش حتى الخبر على شريط الاخبار غير الصبح

جبهة التهييس الشعبية said...

انا طالبة منكوا حاجة لوجه الله

انا نازلة الشغل دلوقت
ادعوا لي بقى اوصل قبل بعد بكرة العصر
ربنا يستر والسكة ما تبقاش مقفولة بالضبة والمفتاح

TAFATEFO said...

صرحت نادية حليم رئيس التليفزيون المصرى، بأن التليفزيون سوف يواكب حدث وفاة حفيد الرئيس مبارك، محمد علاء مبارك لمدة ثلاثة أيام وسيقوم التليفزيون خلالها بعرض أدعية وأغانى دينية وأفلام تسجيلية عن أهم الشخصيات الإسلامية والمساجد، كما ستتركز اهتمامات برامج طعم البيوت اليومى على الأولى وزينة اليومى على الثانية على الاهتمام بالحدث طوال فترة الأيام الثلاثة.

كما سيعرض التليفزيون بعض الأفلام التسجيلية التى تعرض لصور الرئيس مبارك وعائلته وصوره مع الفقيد وعرض تنويه كل نصف ساعة على القنوات الأولى والثانية والثالثة والفضائية والقنوات المحلية جميعاً عن الحدث وعدم إذاعة أى فيديو كليب أو أغانى أو أفلام ومسرحيات أو أى مواد كوميدية طوال الأيام الثلاثة، وقد أوضحت نادية، أن الاهتمام بالحدث لا يصح تسميته بالحداد أو العزاء، لأن الحداد يكون للشخصيات السياسية الرسمية أما وفاة حفيد الرئيس مبارك، فهو حدث أسرى.

أما قطاع الأخبار فسوف تتركز اهتمامات موجز أنباء رأس الساعة وكذلك مقدمة نشرات الأخبار فى الاهتمام بالحدث، حيث يذيع برقيات عزاء رؤساء وملوك الدول العربية وكافة دول العالم التى تبعثها للرئيس مبارك.

السابع

في الخليج احنا .. أهي مواكبة ما بعدها مواكبة هي .. مبيحرموش حد من حاجه

مع مىحظة انه حادث أسري .. وده مش حداد .. امال الحداد يبقى ازاي

مارشات عسكريه وقرآن .. آنآنآنآآ .. مرسي ابن المعلم زناتي انضرب يا رجاله بالانجليزي

أحيييييييييييييييه

حزينه said...

ربنا يصبر والدته ويصبر والدة

دى اكبر مصييبه بعد مصيبه الدين بجد

الله يرحمه ويسكنه جناته

حزينه

ايوشة said...

معلش يانوارة اكيد انتى اللى هتجيبى الخبر اليقين فى الموضوع ده
ايه موضوع الانفجار اللى فى الاسماعيلية انا سمعت الخبر امبارح والنهاردة فى ناس من الاسماعيلية اكدت الخبر
وفى بعض الموقع نشرت الخبر ان شاء الله اكيد عندك الخبر اليقين


http://www.aljazeera.net/NR/exeres/9C4D2B7F-4CEC-4787-90A2-F7B4DEC0CE45.htm




http://www.islammemo.cc/akhbar/arab/2009/05/18/82159.html

mimi said...

نوارة

أحب أحييك علي السرادق اللي أنتي عاملاه هنا ...

وتقبلي عزائي
والباقء لله تعالي ...
ربنا يصبر أمه .. الأم أم برده

Rania said...

انا نفسى اعرف فى ايه
و ايه موضوع خلط الامور اللى رايح و جاى ده
كل واحد بدل ما يقول البقاء لله و يسكت يدينا محاضرة عن المجزرة بتاعه غزة و اكننا نسينا او المفروض منترحمش على واحد مات فى سن صغير
عادى يا جماعه بلاش كده الله يكرمكوا
البقاء لله و بس و ربنا يرحمه و يصبر اهله و بلاش بقى الشماته اللى بجد مقززة جدا

عاشق مصر said...

احمد سعيد


يسلم قلمك ويسلم عقلك
وفعلاً حاجة تفقع المرارة ان يمر خبر موت
آلاف الملائكة الصغار في شوارع مصر مرور الكرام وان ننصب صيوان عزاء لمن لا يستحق التعزية
للطفل الرحمة ولا عزاء للمجرمين

عاشق مصر said...

هذا لا يمنع ان هذا الطفل فاز بنعمة الموت قبل التكليف وخرج من قصر فرعون كما دخله بلا ذنب وهنئياً له الجنة
وعزاءي لكل عائلة مصرية او فلسطينية او عراقية او لبنانية فقدت عزيزاًُ كان للنظام المصري دور في خسارته

Founoon said...

لا ما تقلقيش السكك فضيت خالص
توصلي بالسلامة

مواطن مصري said...

نوارة بعد ازنك امسحي تعليق lala

عشان مستفز و فية شماتة

Huda said...

اهو كله حيفتي دلوقت و يعمل فيها محلل. انا بس مستغربة ليه الاعلام المصري بيخبي خبر زي دة، هو الموت في حاجة غلط و لا ايه؟ دي حاجة من ربنا. على العموم ربنا يرحمه و يصبر اهله.

فتاه من الصعيد said...

ومين بقا اللى قال اننا ما نحزنش علشان ياما ناس ماتت
ليه المسلمات بقت فيها جدال
يعنى لو انا ماشيه وشفت جنازه لولد صغير واهله بيبكوا...المفروض انى ما احزنش واقول طيب ما العيال بتموت فى غزه ولا فى الشوارع
يا جماعه لا شماته فى موت....وكمان الموت له هيبه.....اللى موش هيحزن على موت طفل يبقا موش بنى ادم....وموش معنى حزنه انه منافق وانه مش بيحزن على الناس الغلابه.....يا اخوانا عييييييييييييييب
بالنسبه للاهتمام الاعلامى ده عادى لانه تلفزيون الحكومه.....ومتعودين على كده......وهو فى حد بيتفرج اصلا على الاولى ولا التانيه

ديالا said...

والله العظيم مناخ ديمقراطي ايه بس انتوا شايفين انتوا بتتتكلموا في ايه بتتكلموا في موت كان حفيد رئيس دوله ولا حفيد بواب متفرقش الي تفرق مشاعرنا ولو انتوا محستوش مشاعر حزن واحترام للعائله دي تبقوا سوري احساسكوا خارج نطاق التغطيه

ramez said...

في نشرة التاسعة

بمسجد أل رشدان تقدم علاء مبارك واخيه لحمل النعش الذى تم تغليفه بعلم مصر


خدوا بالكم من علم مصر دى دانا لو مت دلوقت مش راح اتلف بعلم بنما حتي

ايه الحوسه دى


انا اقبل ان ابو علاء ميروحش يصلي الجنازة لانه مبيصليش الا العيد بس

واستحمل استفزاز كبار رجالة الدولة وهما بيسلموا ويعزوا ابو الفقيد ووشهم في الكامرا


واستحمل الاستفزاز الرهيب الذى تم بعمل جنازة عسكرية وعلي مستوى عالي


ورغم خنقة امي من كلام طفاطفيو اللي بيبشرنا بان نادية حليم هتذيع تلات تيام قصه كفاح الفقيد اللي مبلغش الحلم




لكن توصل لدرجه انهم يلفوه بعلم مصر اهو هو ده اللي مستحملوشي بامارة ايه يتلف بالعلم


يعني ملفوش اللي ماتوا بالعبارات ولا اللي وقع عليهم المقطم


ولا ابويا

ولا عم عبد اللاه اللي كان بيصلحلي الجزم بتاعي


لا لا كله الا ده

ديالا said...

غلي فكره انتي صعبانه عليا بجد لما مشاعرك توصلك لدرجه الشماته يبقي بجد لازم تصعبي عليا وربنا يهديكي وبعدين بلاش تسمعي اخبار الجرايد ومبارك عمل كذا كذا محدش بجد يعرف حاجه عشان تحكمي عليه ومن امتي البشر بيحاسبوا الناس رب العباد هو بس الي يحاسبهم اما انتي فتسكتي وتفوضي امرك لله ومتشمتيش في الموت عشان مفيش شماته في الموت وربنا بجد يغفرلكlala

3ishreen said...

مرحبا

أظن الوقت مش وقت تصريحات ولا حتى قول وجهات نظر في أي موضوع من أي حتة كانت
ألف رحمة على الفقيد ةربنا يصبر أمه وابوه وبس
أهل غزة

بنت جامده said...

انا داخلة المدونة وحزينة على مشهد الجنازة فدايقت اكتر من الطريقة التهكمية والالفاظ الجامدة حتى فى ظرف زى دة
اه كلنا متغاظين من سلبيات القيادة
بس نختار الفاظ رقيقة عن كده

Lunatic said...

احزن على النفاق والانتهازية
حداد فى كل القنوات المصرية
وكل واحد صاحب قناة كاتب اسمه ونص النعى
حتى مزيكا وميلودى
ده كلام ناس عاقلين؟

lastcrazyboys said...

مش المفروض خــلاص يعني المــولــد انفض

وكــل حي يروح لحــاله


على العمــوم أنا جي ابلغك انه في اشتــبــاه حــالة في قنــا

بس هما بيقولوا انه طيــور
مش حلاليف

وياخبر.. بفلوس

مى said...

أحمد سعيد

أؤيدك فى كل ما ذكرت



TAFATEFO


مع ملاحظة انه حادث أسري .. وده مش حداد .. امال الحداد يبقى ازاي



جرت العادة فى الأسر الكبيرة المفترية

لما بيموت فيها الصغير تلاقى كل الناس بتصوت

و لما يموت كبيرها

تلاقى العكسسس




نوارة

فيه حكومة فلسطينية جديدة
إتكونت النهاردة



فيه لقاء أوباما مع النت يا هو



فيه الحرب الدايرة فى الصومال



فيه سيريلانكا و نمور التاميل


متحاولى كده تقلبى الصفحة

كفااااااااااية

mido said...

مواطن مصري : ها مين الدكتاتور دلوقتي؟

مهندس حر said...

@ديالا

لأ .. حضرتك فعلا بتستغلى مناخ الديموقراطية و مصرة تدوسى علينا إكمننا قلنا لا شماتة و لا مش عارف إيه..

أولا.. اللى يقول عووكل ظالم ما يبقاش شمتان فى مصابه.. دى حاجة و دى حاجة تانية..

ثانيا.. اللى يقول إن كان طفل مات ففى آلاف ماتوا و آلاف إتشردوا و ذنبهم فى رقبة الكبير.. ده مش شمتان و لا بيقلل من إحترام الموت و هيبته..

ثالثا.. هوه من إمتى البشر بتحاسب حد؟؟؟؟؟؟

ناااااااعم.. نحاسبه و نحاسبه و نطلع عنين اللى خلفوا أهله هى كانت بلدنا و الا العزبة اللى سابهاله أبوه هى كانت فلوسنا و ألا ميراث عيلته.. هى كانت أرواحنا و عيشتنا المنيلة بستين نيلة و مستقبل عيالنا الإسود فى بنى و ألا عشرة طاولة بيلعبها..

أخت ديالا .. ذنبكم مغفور ياختى.. مش شربتى قهوتك؟.. ورينا جمال خطوتك..

مهندس حر said...

نوارة
-----
أنا أؤيد أختنا مى.. فضى السرادق ده لحسن نور الكلوبات لم علينا الهاموش..

جبهة التهييس الشعبية said...

مهندس حر

على فكرة دي مؤامرة على الشعب المصري للقضاء على اخر ما تبقى له من انسانية
مافيش اي مراعاة لظروفنا كبني ادمين خالص
ليه فيه ناس مصرة تطلع مننا كلام الواحد ما يحبش يقوله في الظروف دي؟

ليه؟

جبهة التهييس الشعبية said...

انا فضيت السرادق والله
وكتبت بوست جديد
بس الناس الظاهرة القهوة عجبتها هنا

مواطن مصري said...

اة تبقى متتكلمش عن الاولاد التانين لما تموت

masrwyawy said...

ربنا يرحمه و يرحمنا .....
انا حاسس ان ربنا بيفكر الناس انه كبير و انه موجود .... انا مش شمتان بس متعاطف جدا مع علاء .....
و ربنا اكيد بيختبر البنى ادمين .... المهم ان ابنى ادم ينجح فى الاختبار .. و يتعلم.

lala said...

انا بس دلوقت رجعت قدام الكمبيوتر.. اللي انا شايفاه من تعليقات البعض على تعليقي انه في نفاق واضح... كنت اتمنى انك تكوني خلينا نقول ديمقراطية و تنشري الكلام اللي بعتته بالاول.. حتى لو فسرتوه شماته انا مش زعلانة.. بالعكس انا حكون كتير مبسوطة .. لما تعرفوا مشاعر انسانة مسلمة يئست من امه الاسلام و احنا عارفين انه في مصر حوالي سبعين مليون . .طبعا مش كلهم مسلمين لكن النسبة الاكبر مسلمين لو كل واحد فيهم بصق بصقة واحدة على اسرائيل اكيد اسرائيل راح تغرق بالبصاق بدون استخدام لا سلاح و لا غيره.. يمكن انتي حكيتي انه الشماتة من صفات الضعفاء.. مزبوط كلامك انا ضعيفة و ما قدرتش اعمل حاجة لاخواني المسلمين في غزة فاستنيت انتقام ربنا عشان احس انه الظالم ليه يوم بس يوم ايه.. دة زي دق التوم.. لازم تفهموا انه حتى لو ما مات انتقاما من عمايل ابوه و سيده بيكفي انه يموت لانه تربى بمال الشعب الصري و طبعا كل اللي بيعرف ابوه من فين امواله حيعرف انه مال حرام و المال الحرام ما بيدوم.. بس لازم تفرقوا بين مشاعر على طفل مات و مشاعر على مشاعر الناس اللي فقدوا الطفل ده و اللي كانوا بيربوه و بيحضروه ما عرفش لايه.. يعني محضرينه لمستقبل ما نعرفش شكله ازاي و لا ايه الهدف منه . زي ما كان مبارك محضر ابنه عشان يخلفه و يكمل استعباد للشعب المصري .. بالنسبة للي بيصير في غزة لازم نفرق بين معنى الابتلاء من الله من اجل امتحان عباده و معنى الانتقام من الله عشان الذنوب و المعاصي و الكبائر اللي ارتكبها انسان.. و خطية اهل غزة و كل اللي بيحصللهم او حتى اهل العراق او البانيا او كوسوفو او او او.. طبعا القائمة طويلة لانه المسلمين بيندبحوا وين ما كان و خطيتهم في رقاب الزعماء الصهاينة اللي قاعدين فوق رقابناعشان يحموا اسرائيل و الصهيونية و الماسونية العالمية.. صحيح انا بتمنى تصلحوني في هاي المعلومة .. هي مش المدام حرم رئيس الجمهورية مسؤولة هي و اولادها عن نوادي الروتاري و الليونز.. طبعا الكل عارف ان النوادي دي هي معقل الماسونية . على كل ما تحزنوش على غالي

ديالا said...

مهندس حر بص انت ليك وجهه نظرك وانا كمان عندي وجهه نظر ومتقلش مناخ ديمقراطيه تاني وتتهكم عليا انا يمكن انا حاسه كده عشان الراجل ده انا فعلا بحبه ومن يوم ماكبرت ملقتش حد غيره في البلد وكانوا واحنا صغيرين متعودين نقوله بابا حسنس وماما سوزان ليه عايزنا لما نكبر ننسي اي حاجه اتعلمناها في المدارس واحياه واتربينا عليها انا فعلا لما مات الطفل حسيت انه واحد من اهلي ومتقدرش تلومني في احساسي انا لحد الان مبقولش علي جدو غير بابا حسني لو ده غباء مني انا فخوره اني منستش اي حاجه اتعلمتها او اتربيت عليها من وانا صغيره ومتقدرش تعاتب حد علي حبه لشخص او كرهه ليه انا فعلا بحبه الراجل ده رغم انه مش عملي حاجه حلوه ولا حتي حاجه وحشه بس يمكن بحس بشويه انتماء ومرسيه جدا علي رايك وبرضه ليك وجهه نظر تحترم

جبهة التهييس الشعبية said...

ماما حسني وبابا سوزان؟

ادي جيجي يا طنط سعاد
ادي طنط سعاد يا جيجي

كفاية يا ديالا عشان ح تجيبي الكلام لماما حسني وبابا سوزان

جبهة التهييس الشعبية said...

على فكرة يا ديالا

انت انسانة نادرة

فعلا انسانة نادرة

انا ما اعرفش حد بيحب ماما حسني وبابا سوزان غيرك

ديالا said...

بجد لا دوري كويس هتلاقي غيري كتير وياريت بلاش تهكم انا فعلا شايفه ان مدونتك مدونه جميله جدا فياريت تكوني مقدره مشاعر الناس كلها لا انا هستفيد حاجه لو قلت بحبهم ولا هخسر حاجه لو قلت بكرهم انا بقول الي انا حساه ولو الانسان دلوقتي بيتحاسب علي حبه للناس انا عايزه اتحاسب لاني فعلا مبعرفش اكره حد وياريت لتاني مره تقدري مشاعر اي حد وتحتريميها ولا ايه ياقمر؟

جبهة التهييس الشعبية said...

طيب يا حبيبتي
ما تزعليش مني حقك عليا
بس بجد يعني بجد
قولي لي بتحبي حسني مبارك ليه؟ اكيد فيه سبب غير انك اتولدتي ما لقتيش غيره في الدنيا وانك اتعلمتي في المدرسة تقولي ماما سوزان وبابا حسني
صح؟
ايه الاسباب
يعني انا مثلا مش باكرهه لله في لله او عشان دمه تقيل على قلبي
انا عندي اسبابي
واسباب كتير قوي زي مثلا على سبيل المثال لا الحصر
1- قانون الطوارئ
2- بيع البلد
3- الجوع الكافر
4- البطالة
5- كسرة نفس الناس والشرطة اللي بتذلهم
6- انحيازه المبالغ فيه لاسرائيل مع انه كان في يوم من الايام مشروع شهيد بيحارب في الجيش
7- انحدار الزراعة والصناعة ان وجدت البلد بتتراجع مش بتتقدم
8- غياب السيادة المصرية
9- تعمد اقصاء الكفاءات ووضع انصاف الموهوبين ان لم يكن معدومي الموهبة في الاماكن القيادية
حتى طبيعة المصريين اتغيرت في عهده

انت بقى بتحبيه ليه؟

ديالا said...

بصي بجد مش عارفه يمكن عشان متعودتش اكره او عشان باخد النيه الحسنه في كل حاجه وبقول اكيد هو مش عارف كل حاجه في البلد ويمكن عشان محصليش احتكاك مباشر باي حاجه من الحاجات الي ذكرتيها بس يمكن انا لو جربت حاجه واحده من الي قولتيها يمكن فعلا اضايق منه اوي بس سؤال ليه فعلا بيعلمونا الحب وعايزنا نكره؟

lala said...

الى الست الرقيقة اوي ديالا.. اللي عايزة تعلمني عن حساب ربنا للعباد و مش العباد للعباد و عن الشماتة و غيره.. عايزة اقلك ما يصعبش عليكي غالي و كمان الحاكم اللي ما بيعرفش حاجة عن مشاكل الامة اللي هو بيحكمها ما فيش لازمة ليه انه يحكم.. و الحاكم اللي ما بيحكم بشرع الله الامة هي اللي بتحاسبه قبل حساب ربنا. و مش معقولة اللي انتي بتقوليه .. يعني لامتى حنبقى نستهبل و نعمل حالنا مساكين و عاطفيين و مثاليين ما بنكرههش حد .. ..يعني بجد انا مش عارفة انتوا بتستعبطوا و لا ايه؟؟؟؟؟؟؟؟؟؟

ديالا said...

الي السيده المهذبه لا لا بصي انا لا بستهبل ولا بستعبط زي ماحضرتك تفضلتي واكرمتي عليا بالالفاظ الرقيقه دي انا ده الي حساه وميجيش حد يحاسبني علي حبي زي ماهو مفيش جد بيحاسبك علي كرهك وانا هكتفي بالرد بالاسلوب ده لاني اتعودت احترام الاخر في الحوار وشكرا جدا علي زوقك

عابر سبيل said...

كان من الأفضل إنك تكتبى الخبر وتتقدمى بالعزاء لأهل الطفل وتمنعى التعليقات ، لأننا شعب مايعرفش يمسك لسانه ..... عاجبك اللمة اللى عملتيها دى والناس اللى لطشت فى بعض وقلبت الموضوع سياسة؟

Jafra Jenin said...

في فلسطين نقول

ما يفعله الوالد يتلقاه المولود

حين سمعت عن خبر وفاة حفيد مبارك تذكرت اطفال غزة الذين استشهدوا وذبحوا على بد الصهاينة بينما الصهاينة العرب امثال مبارك وقفوا يتفرجون وبل يساعدون الصهاينة في ذبح اطفالنا

ماذا فعل اطفال غزة كي يذبحوا بالفسفور الابيض والقنابل الحارقة بينما مبارك يمنع المعونة عن اهل غزة ويحاصرهم؟

هل يتعلم مبارك درسا مما حصل له؟ هل يتذكر بكاء وعويل نساء غزة اللواتي فقدن ابنائهن بينما كان هو يساعد في ذبحهم؟

وفاة الطفل كانت رحمة له بدلا من ان يتحول الى عضو في عصابة مبارك المتصهينة التي لا ترحم اهل مصر او اي عربي

حكيم النيل said...

أنا معاكى يا نوارة فى مسألة تغطية الاعلام

: لأن الناس فى كل الاحوال ما بقتش تثق فى البيانات الرسمية والاشاعات مجودة كده أو كده , وممكن تكون دى رغبة أسرة الطفل ,لأن تفاصيل مرضه دى حاجة تخصهم
والمبالغة فى التغطية مش مطلوبة لأننا شوفنا أمراء ورؤساء بيموتوا من غير مايحصل ضجة
أما حكاية شماته ناس معينة فى الحدث فدى حاجة وضيعة جدا لأن مافيش شماتة فى الموت وخصوصا ان دا طفل برىء
وفى النهاية البقاء لله