Thursday, 28 May 2009

دقة الامثال الشعبية

اذا كنت عايز تتأكد من صحة المثل المصري اللي بيقول: "الخـ... يقدر على اللي ما تقدرش عليه ميت شـ..." اتفضل انقر هنا
وفي كل ده كله مش غايظني غير الكلمتين دوكهمة:
ويأتي اعتذار حسني بعد يومين من نشر الصحف الإسرائيلية تفاصيل ما وصفته بـ"صفقة" بين الرئيس المصري حسني مبارك ورئيس الوزراء الإسرائيلي بنيامين نتنياهو، يتم بموجبها دعم إسرائيل للمرشح المصري مقابل "لفتات طيبة" من مصر، فيما لم يصدر أي رد رسمي من الحكومة المصرية حيال ذلك.
الله؟ انت بتعجزنا ليه يا جدع؟ هو احنا فينا حيل نلتفت؟ وبعدين ح نعمل معاهم لفتات اكتر من كده ايه؟ ده احنا اتروشنا من كتر اللفتات
وذكرت صحيفة "هاآرتس" في تقرير لها نشر يوم 25-5-2009 أن "مبارك ونتنياهو اتفقا خلال لقائهما الأخير في منتجع شرم الشيخ المصري على صفقة سرية تقضي بموافقة إسرائيل على تعيين حسني أمينا عاما لليونسكو مقابل بوادر نية حسنة جوهرية تقدمها مصر لإسرائيل".
انا والله مش عارفة ايه الجوهرية اللي ممكن نقدمها لاسرائيل؟ حد عارف؟ انا باسأل بجد، فيه حاجة لسة ما عملنهاش؟ اللهم الا اننا نموت لهم الفلسطينيين بالجيش بتاعنا عشان هم زهقوا من كتر القتل
تاني حاجة: ايه اهمية اليونسكو يعني؟ رئاسة اليونسكو ح تعمل لنا ايه؟ بجد والله، اصل لو فيها فايدة او مصلحة ما جراش حاجة لو الراجل يقول كلمتين كده ويتمسكن لحد ما يتمكن، انا برضه مش عايزة اسيء النية، يمكن يكون نيته خير، من غير شتيمة، ولا اصوات انا باسمع كل حاجة من وانا قاعدة هنا في مكاني على فكرة
بس اللي اعرفه ان منصب رئاسة اليونسكو ده منصب شرفي زي امانة القلل المنتحرة ويمكن اهفأ كمان
ايه بقى؟ ها؟ ايه؟ ايه الفايدة اللي ح تعود على مصر من انها ترأس المنصب ده؟
تالت حاجة: ايه اسرائيل دي اللي توافق وللا ترفض؟ هي خلاص كده؟ وش كده يعني؟ هي مين دي وللا ايه اهميتها وللا اضافتها الحضارية وللا الصناعية وللا الثقافية وللا التاريخية عشان يبقى لها الوزن ده كله بحيث لما ترفض واحد ما يشمش ريحة منصب ولما تقبله يبقى خلاص ضمن المنصب في جيبه؟ انا بجد عايزة امارة للفتونة دي، دي امريكا نفسها ما قالتش الكلام ده 

52 comments:

مواطن مصري said...

و الله توقعت انك هتكتبي على موضوع دة


انا كنت بجعمة بس بعد الخبر دة نزل من مستوايا

TAFATEFO said...

لا أمريكا قالت

قالت لو تم انتخاب حسني مش هتدفع حصتها لصندوق اليونسكو

دي حكاية مشوقه جداً على فكره

آل ايه يا ستي المفروض ان الدورة دي من نصيب المجموعة العربية

قامت أمريكا اللاتينية أقرت تدعيمها لفاروق حسني .. قامت إسرائيل لفت على واحد من البرازيل (مساعد وزير سابق تقريباً) وأقنعته يترشح .. قام قال هيترشح .. قامت البرازيل نفسها رافضه ترشيحه وقالت انها هتدعم حسني .. قامت إسرائيل لافه على واحد جزائري .. قاموا برضه العرب بعد اتفاقهم على تدعيم فاروق حسني رفضوا الجزائري .. قامت إسرائيل مطلعه اتنين أفارقه علشان تكسر الإجماع الإفريقي .. فكست منهم برضه

قاموا مخليين واحد أوروبي (روسي تقريباً) يترشح .. ودوائر الضغط في أوروبا شغاله لدعم المرشح ده علشان يسقطوا حسني

بس حسني شلح كل حاجه .. برنبيوم وجاب .. اعتذارات واعتر .. بوس ايد وباس .. لحس ولحس

كل حاجه

الاتفاق بين نتنياهو ومبارك (حسب التسريبات) كان على ان إسرائيل كموقف رسمي هتسحب معارضتها لكن ملهاش دعوه بدوائر الضغط الغير رسميه ودعمها للمرشح الأوروبي وحشد الدعم ليه

دي حكايه لذيذه جداً .. ومشوقه جداً .. بس مش ممتعه خالص أصل حسني اللي بيقلع واحنا ستريت

ألا انتي فاكره الوزير السوري اللي كان بيشيه عرفات بالراقضه الاستربتيز -على حد تعبيره- .. بس الفرق انه كل ما بيقلع بيبان قبحه

TAFATEFO said...

على فكره صحيح

أنا متأكد ان حسني ملوش علاقات نسائية نهائياً ولم يسبق له

أصله مدلوق أوي .. ميعرفش ان التقل صنعه

TAFATEFO said...

وكمان ده مش أول اعتار عن تصريحاته على فكره .. بس دي أول مره بيقول "بسحب بتراجع عن كلامي" .. بس اعتذر عن تصريحاته دي ييجي عشرتاشر مره قبل كده

mido said...

شكله بعد كل ده حيلبس في الحيطة

جبهة التهييس الشعبية said...

ايوة يعني ايه اهمية المنصب ده؟

مواطن مصري said...

قضت محكمة أمريكية بعشرين عاما على أخ غير شقيق لخالد مشعل بتهمة دعم حماس التي تعتبرها الولايات المتحدة منظمة إرهابية، فيما قضت بعشرات السنوات على أربعة آخرين من بينهم قريب لنائبه لموسى أبو مروزق.

والخمسة من بينهم مفيد عبدالقادر الأخ غير الشقيق لمشعل رئيس المكتب السياسي لحماس، ومحمد المزين قريب أبو مرزوق، هم مسؤولو "مؤسسة الارض المقدسة" التي كانت تعتبر اكبر منظمة خيرية اسلامية في الولايات المتحدة.

وقال بيار غانم مراسل قناة العربية في دالاس ردا على أسئلة المذيع يوسف الهوتي في نشرة الواحدة صباحا بتوقيت السعودية الخميس 28 -5- 2009 إن ذوي المحكومين اعتبروا الحكم سياسيا، موضحا أنه قابل للاستئناف وهناك إمكانية لتخفيفه.

وشكل هذا الحكم انتصار قانونيا كبيرا للبيت الابيض في اطار "الحرب على الارهاب" ويأتي بعد اعادة المحاكمة اثر تعذر الاتفاق بين اعضاء هيئة المحلفين العام الماضي على قرار في القضية حول "مؤسسة الارض المقدسة" ومقرها في تكساس والمتهمة بارسال 12 مليون دولار إلى حماس.

http://www.alarabiya.net/articles/2009/05/28/74061.html
محكمة أمريكية تقضي بسجن أخ غير شقيق لخالد مشعل 20 عاما


لا تعليق

lastcrazyboys said...

ايه اللي انتي كاتباه ده

ولا ده وقع الصــدمة

وفي الآخــر كاتبالي فاضل نقتل لهم الفلسطينين ..طب ماحنا بنقتل في بعض
سواء احنا او هما

وكمان حكاية المناصب ..ايييه ده

انتي ازاي تسمحي لنفسك تطعني في المورووووث المصري المتراكم

امال ازاي امه تروح عند تفيدة
وتقولها اصل الواد ابني بسم الله ماشاااء الله ..مسك البوسسكو

ولا ابوه لما يركن عند عم مختار الدخاخني ..ويلفله سجارتين
مش برضه ينفش ريشه قدام رجالة الكفر كلاتهم

فووووقوا بقى

mido said...
This comment has been removed by the author.
mido said...
This comment has been removed by the author.
mido said...

ده البرادعي اللي في وكالة الطاقة النووية مخدناش منه حاجة

TAFATEFO said...

بصراحه

أنا مقتنع تماماً بأهمية الحرب على المنصب وبذل كل الجهد للتغلب على الجهود الإسرائيلية .. عن طريق الحرب الدبلوماسيه مش عن طريق اللحس

المنصب من حق المجموعة العربية .. اللي اتفقت على تدعيم فاروق حسني .. يعني من حق فاروق حسني

إسرائيل معترضه .. وسلطت أمريكا تهدد . وعماله تحشد الدعم ضده

بس الـ*ـول مش مخلي حد يتعاطف معاه .. وبدل ما يخوضه صراع .. قعد يلهث وراء إرضاء إسرائيل .. علشان عارف انه لو أمريكا وجماعات الضغط قدرت تحرك الأعضاء الأوروبيين لرفض فاروق حسني هيبقى الموضوع شبه محسوم .. رغم تأييد أمريكا اللاتينية وأفريقيا والمجموعة العربية

أما لو تقصدي ايه قيمة المنصب .. فأعتقد مفيش .. عادي يعني .. بس أهي حاجه شرفيه

جبهة التهييس الشعبية said...

اهو
على رايك
ولا نفعنا بحاجة البرادعي يا رشدي ده

اه
انتوا صغيرين، ما شفتوش مسلسل: انا البرادعي يا رشدي

طب ايه الشرقة على المنصب ده؟ وح يبقى له طعم ازاي المنصب ده بعد ما عمل لهم قرد؟

TAFATEFO said...

ماه مفيش حاجه اسمها تاخد منه

ده منصب زي أي منصب في منظومه .. ده مش رئيس مجل إدارة في هيئة حكومية من هيئاتنا

أهمية الصراع -اللي مقدرش عليه فاروق حسني وراح يلحس ايد إسرائيل- انه كان هيبقى صراع بين العالم وبين قوة إسرائيل وأمريكا ومجموعات الضغط الصهيونية

لو كان انتصر فاروق حسني في الصراع ده (زي ما خاضو قبل كده البرادعي وبطرس غالي في الدوره الثانيه لمناصبهم) كانت بقت حاجه كويسه

بس ده *** .. والاتنين كانوا رجاله

mido said...

بطرس غالي نفسه مخدناش منه حاجة لما مسك المنظمة كلها

TAFATEFO said...

والنبي انتوا كنتوا مستنيين ينفعكوا بايه يعني؟؟

:D:D:D

يفوتلكوا قنبلتين نوويتين مثلاً .. ولا اتنين كيلو يورانيوم علشان الأولاد؟؟

جبهة التهييس الشعبية said...

حاجة شرفية؟
يعني انا مش حمارة قوي اهو
ما انا برضه قلت حاجة شرفية

طب لما هو منصب شرفي
وهو من حق فاروق حسني
وامريكا واسرائيل هم بس الوحيدين اللي بيعملوا شغل ملاعيب شيحة

طيب ما فيه حل احسن واشرف بدل فيلم البورنو اللي هو عامله ده

يتابع اعلاميا من دلوقت ويحشد حملة اعلامية تصيحية بالعربي والعنجليزي يوضح فيه ان المنصب من حقه، وح يبقى بقى بدعم الدول العربية وافريقيا وشوية امريكان يساريين وامريكا اللاتينية وشوية يساريين اورومبيين

حلو كده

دي سهلة دي
ده اي مدون كان يعملها له

طبعا التصييح ده كله مش ح يعمل اكتر من الفضيحة
وفي النهاية الكلمة الاخيرة لامريكا واسرائيل
صح؟

قووووم يتعمل فضيحة بجلاجيل وشناجيل واصلا اصلا ماحدش بقى لا طايق امريكا ولا طايق اسرائيل خالص، هم فارضين اتاوة على العالم كده بلطجة

وطبعا ح ينضم له للفضيحة دي امريكا اللاتينية، وشافيز اسم الله عليه، وافريقيا والدول العربية واليساريين في اوروبا والدول المتقدمة

وتبقى فايدة انه يتظلم ويترفض من المنصب اللي من حقه اكبر من فايدة انه ياخده
لان دي طعنة جديدة في نزاهة امريكا واسرائيل
وكانوا ح يقعدوا يتعايروا بيها عشر سنين كمان
وكان ناعوم تشومسكي عمل عليها كتابين وتلات برامج
وكانت بقت هيصة وزمبليطة في الصالون
وفي نفس ذات الوقت بقى شكله محترم والناس تنسى ماضيه المؤلم وتفتكر ان ده بطل العروبة المضطهد المحاصر اللي اتظلم
وكان اجتمع الناس عليه على قلب رجل واحد ويمكن يعملوا له مظاهرات في اوروبا ويشيلوا صوره
بس هو كان يعمل حملة اعلامية دولية كبيرة
وكانوا عملوه ايقونة بقى وتبقى باضت له في القفص

ليه استعجل القلع على طول مرة واحدة كده؟
ده اللامؤاخذة اللي من ترب اليهود بخمسة جنيه وطبق بامية ما كانتش ح تقلع بالسرعة دي؟

مواطن مصري said...

انا مش عارف بردو هعو منصب اليونسكو زي منصب الامم المتحدة كدة
؟


ولا حاجة مختلفة يعني عشان يوصل بية لدرجة دي؟

مهندس حر said...

قيمة المنصب إنه تلميع للنظام و حاجة يحطوها على لستة دور مصر اللى بقت فاضية دلوقتى .. و دليل على إن السياسة الحكيمة اللى بتدى حقن حققت لمصر مكانة دولية و لا مكانة خالتى نبوية فى عزبة الزغابة..

الكلمة نور said...

اهو على رأى الشاعر
اذا اقبلت باض الحمام على الوتد
واذا ادبرت بال الحمار على الاسد

بس هو علشان احنا اليومين دول ايام ادبرت فالحمار محمى الاسد لان المرة اللى فاتت كان اسماعيل سراج الدين ضد غازى القصيبى وكونشيرو ماتسورا وكسب الاخير من غير الدوشة لخلافات عربية على مرشح واحد
بس عشان حسنى هياخد الشلوت فبيهادوا بجراج شيك
لانه اكتر واحد خدم النظام
واهو بكره ينجح ونقوله
اللى خدته القرعة تاخده ام الشعور

مهندس حر said...

مين ده اللى ها يصيح فى وش أمريكا و إسرائيل .. إنتى شكلك كده بتلعبى فى عداد عمرك و بتدوسى على الخطوط الحمرا..

إظهار أى نوع من العداء اللفظى لأمريكا أو إسرائيل هو خط أحمر فى الإدارة المصرية حاليا نظرا للظرف الحساس جدا اللى بتمر بيه الدولة فى أماكن حساسة منها و حاجتها لغطاء أمريكى و ورقة توت إسرائيلية تستر مثل هذه المناطق الحساسة.. لأنه لا قدر الله لو جت الحساسية فى الحساس كلنا ها نحتاس و ياريت نحسس فى كلامنا و نحس بحساسية الوضع البورنو اللى إحنا فيه..

TAFATEFO said...

لا بقى

الشهادة لله النظام عندنا استريت .. وفاروق حسني عمره ما خدم النظام

ولو على الخدمة .. يبقى صفوت أحق بالمنصب

TAFATEFO said...

ويعني ايه يسيح يا تامر بيه أصلاً

ما كل دوله من حقها تقدم مرشح .. وده انتخاب .. هيسيحوا يقولوا ايه يعني

على العموم هو ابن ستين في سبعين ده قلب الآيه .. ودلوقتي بقى مكسبه وخسارته مكسب لإسرائيل وخساره لينا

الناس دي كل ما تلاعبنا شطرنج .. تبهدل أبونا

في ثانيه .. خدو ده تحت حجرهم .. كده لو كسب هيبقى بعد استعطاف واستجداء واسترضاء إسرائيل .. ولو خسر .. هيبقى كل ده مكنش كافي لكي ترضى إسرائيل

حــــــمـــــار .. أقصد ***

mido said...

مصطفي يا حبيبي : مفيش حاجة اسمها مخدمش النظام ___انت نسيت حظيرة المثقفين اللي نصبها فاروق ليهم و اخدهم تحت باطو عشان كده النظام بيحبه

الكلمة نور said...

طفاطيفو
صفوت الشريف فى الاصل صبى قعدة
فاروق حسنى وزير وفنان وكان للنظام فيه ماّرب اخرى
الريس لما كان يحب يجيب حاجة لمصر من عمان كان يبعت روقه يجيبها لنا من قابوس
وبعدين المثل بيقولك اتقى شر كل مؤخرة ثقافية
وللاسف فقد ترك اثر ثقافته فى مثقفين البلد على مسافة زمنية 25 سنه اكتر وزير خدمة
واستقطب هذا الوزير اقطاب مثل
صلاح عيسى
عبدالرحمن الابنودى
عبدالمعطى حجازى وكتير كتير
دا غير قوايم التفرغ اللى بتدفع فيها الوزارة للمثقفين بدلات تفرغ للابداع
ولن احدثك عن كيفية الدخول فى هذه القوايم

مهندس حر said...

مصطفى .. سواء قلع قبل ما ياخد المنصب أو قلع بعديه مش هاتفرق كتير.. لأنه فى النهاية هايقلع ها يقلع..

القيمة الوحيدة لمنظمة اليونسكو فى المرحلة الطين اللى إحنا فيها هو إنها من منطلق الإختصاص قد تكون معنية بالحفاظ على الهوية الثقافية للقدس و على المسجد الأقصى كمعلم أثرى و يمكن إستخدامها كمنبر له مصداقية فى إظهار عدم إعتماد الحفريات الإسرائيلية تحت الأقصى على أى أسانيد علمية تقول إن فيه حاجة تستاهل الحفر بحثا عنها..

الكلام ده كله ينفع لو واحد ما يهموش إسرائيل أو أمريكا أخد المنصب .. لكن روقة معروف ولاءاته و مين جابه و مين قعده كل السنين اللى فاتت و بالتالى ما كانش منتظر منه إنه يعمل حاجة أيا كانت الطريقة اللى ها ياخد بيها المنصب..

و بعدين هو إعتذر عن تصريح أهبل فى حد ذاته.. يعنى هوه ينفع وزير ثقافة يقول هاحرق كتب أيا كانت الكتب دى إنشالله تبقى الكالندر بتاعة البلاى بوى؟

تانى.. روقة معروف إنه كل ما يتزنق يقلع .. و قلع قبل كده كتير .. مش عارف يعنى إيه الغريب فى المرة دى؟

سبهللة said...

اهمية المنصب منصب شرفى
زيه زي بتاع القلل المنتحرة
لما يوسف بطرس غالى شرفنا ورفع رايتنا على الاخر
وماألعن من سيدى الا ستى

مواطن مصري said...

http://www.youtube.com/watch?v=h-xfZYlVE0Y

شوفي سيد ابو حفيظة الجيش العربي في تل ابيب جامدة
هههههههههههههههههههههههههههههههههه

TAFATEFO said...

@ مهندس حر

طبعاً نقطة متفق عليها .. لما واحد حمار يقول لو في كتب بالعبري هحرقها

ده متخلف .. فضلاً عن كونه كذاب

جبهة التهييس الشعبية said...

اه صحيح
انا فات عليا الموضوع ده
كتب بالعبري تتحرق ليه؟ مش كتب تاريخية دي؟
وللا كتب جديدة؟ ولو كتب جديدة تتحرق ليه
الراجل ده خـ... على اصله على فكرة
منطبق عليه كل صفاتهم

TAFATEFO said...

طب وايه الصفه المنطبقه في حرق الكتب

أحب أفهم

جبهة التهييس الشعبية said...

عشان هو مش ح يحرق اي كتب ولا نيلة

هو لما اتزنق راح مزايد وقلبها خطبة منبرية عشان ياخد سوكسيه وينتقل بحركة بهلوانية من واحد متهم لبطل العروبة

TAFATEFO said...

ده مفهوم .. ايه هي بقى الصفه من صفاتهم المنطبقه عليه في الموقف ده؟؟

:D:D:D:D:D

جبهة التهييس الشعبية said...

هههههههههههههههههه
لو قابلت واحد كده في حياتك اعرف انه كده
واللي يقول عليا هوموفوبيك يقول

TAFATEFO said...

على الصبح شفت حاجه مش فاهمها

خير اللهم اجعله خير .. طلعة المحور من الطريق الزراعي اللي بعد شبرا الخيمة .. جسم الكبري مدهون بمبي مسخسخ

تنزل من المحور في نفس المكان .. تلقى خير اللهم اجعله خير .. الفواصل الأسمنتيه دي لونين متعاقبين .. أصفر فاقع ونفس البمبي المسخسخ

يا ترى دول فسفوري مثلاً علشان يبانوا بالليل .. ولا ده ذوق أحد المسؤولين أطال الله بقاءهم؟؟؟

TAFATEFO said...

هههههههههههههههه

أحب أنا الناس اللي بتجيب من الآخر .. احنا كنا قلنا مفيش مناصب داخلية .. كده ولا دولية كمان

:D:D:D:D:D:D

جبهة التهييس الشعبية said...

ههههههههههههه
ده عشان اوباما
من افريكيا بقى وبيحب الالوان المزهزهة واحنا عايزين نثبت له اننا افاركة ابا عن جد

بس المفروض يبقى احمر وبرتقاني بقى

بالنوسبة للمناصب الدولية
ده ولية اللي يفكر ياخد اي منصب في الدنيا دي
:D
قاعدين يفرضوا علينا قيمهم ومفاهيمهم
واللي تتجوز عندها خمستاشر سنة يبقى بيدوفيليا والراجل اللي لا مؤاخذة ينط على راجل تاني تبقى حرية شخصية وقرفونا في عيشتنا
مين اللي حدد المفاهيم دي يعني؟
مين اللي قال ان راجل يتجوز ست تبقى جريمة عشان البت عندها خمستاشر سنة وراجل يتجوز راجل تبقى حرية
مش فاهماها انا برضه يعني

TAFATEFO said...

بيتهيألي في كل الدنيا ممنوع البنت تتجوز قبل 16 سنه .. في أمريكا ومصر كمان اللي ممكن يسمح بكده هي موافقة المحكمة .. يعني لو البنت حامل بيسمحوا ساعتها بعقد الزواج .. انما قبل كده البنت دي طفله ..متقدرش تميز وتختار اختيار حر ورشيد وملهاش القدرة على رعاية طفلة

أصلا لما في مصر رفعوا السن ده لـ18 .. أعتقد ان كتير جداً أيدوا ده وأنا منهم

ازاي متديش لواحده أهلية التصرف في مالها أو قيادة سيارة قبل 18 .. وتديها الحق في الزواج؟؟!!

جبهة التهييس الشعبية said...

اه
بس مصر مافيهاش
gay marriage
ومافيهاش واحدة يتمسح بيها البلاط عشان قالت انا اللي اعرفه ان الراجل يتجوز ست هو ده الجواز
يعني هنا قارفينا بالتابوهات
طب وده مش تابو؟ لما واحدة تقول المفروض الراجل يتجوز ست يطلع ميتين ابوها بالطريقة دي؟
لا العفو
المفروض الراجل والست يعيشوا من غير جواز والرجالة يتجوزوا رجالة والستات تتجوز ستات واهو يبقى زيتنا في دقيقنا بقى بدل ما البت تتجوز راجل غريب وتتكسف منه وكدهون يعني

جبهة التهييس الشعبية said...

ثم لو حتى رفعوا سن الجواز لستين سنة في مصر
هو فيه حد بيتجوز دلوقت؟

TAFATEFO said...

آه ياستي في

دنا أخويا لسه مخلصش كليه .. وبنجهز لسيادته الشقه علشان يتجوز لما يخلص

امال أنا ايه اللي مطلعني المحور بعد الفجر .. عالم سفيهه .. آي والله سفيهه

آل ايه .. يخطب في خامسه ويتجوز بعد ما يخلص .. فاكر نفسه لما يتخرج هيبقى دكتور أد الدنيا .. بلا وكسه

ميعرفش انه هيلف على الأوتوبيسات يقول سكر يا هانم ضغط يا بيه .. ويروح المستشفى كل يوم الصبح علشان يقبض 300 جنيه آخر الشهر

أصحاب العقول في راحه

TAFATEFO said...

واحد صاحبي (من المضربين برضه) بيقول ان ربنا مبيحبش الرجاله .. ومن رحمة ربنا بالستات .. انه مخلاش ولا واحده ست تتجوز ست

وبيعذر المثليين جداً

بيقول ما هو التجربة العملية أثبتت ان الجواز من واحده ست ده جحيم مقيم

:D:D

مدير التحرير said...

بس مصر لم تدعم البرادعي في المنصب بل المجموعة الافريقية و يقال انه مصر كانت رافضة لتوليه المنصب من الاصل

arsenalwy said...

والله اختى

انا مش عارف لو شفت الشخص ده فى الشارع هعمل فيه ايه

بس الحمد لله انه احتمال مستبعد انى اشوفه فى الشارع

انسان مستفز بكل ما فى الكلمة من معنى ما هو البرادعى كان ماسك الاخطر من يونسكو منظمة الطاقة الذرية عملنا ايه؟؟

كلها مناصب للضحك على اصحاب العقول الضعيفة

ربنا يشفيه او يهده

Kontiki said...

مش عارفة هو فاروق حسنى لسة فى نفس يعيش عشان يقول تصريحات و بعدين يعتذر عنها بعد سنة لما فاق من الغيبوبة او لما الضرورة اوجبت انه يعتذر ويقول كلمتين فاشلين زية انا عاوزة افهم عمل اية دة عشان الثقافة فى مصر بسم الله ما شاء الله المكتبات مالية الشوارع وماشاء الله الناس بقت عارفة تراثها من النوبة و اسوان لاسكندرية ولا حول ولا قوة الا بالله المهرجانات الشعبية الفنية شغالة فى كل مناسبة وطنية او شعبية او تراثية زى فى ريودى جانيرو وياسلام الشعب بقى عارف قيمة الاثار و الاماكن السياحية ومحدش لا بيسرق اثر ولا بيحاول يهربة والاسر ماشاء الله شغالة سياحة داخلية فى الاديرة و الكنائس و الجوامع القديمة لا وبجد بجد فاروق حسنى وزير ثقافة بصحيح عرف ازاى يحافظ على الطابع الحضارى و الثقافى لاسكندرية مدمرهاش والناس عارفة قيمة القاهرة القديمة وقدر فعلا يحافظ على بلدنا اللى هيا اصلا تحفة فى الاثار و الموقع وكل حاجة ويحيى تراثها و يخلق شعب فاهم و واعى و بيحب بلدة
زى اليابان كدة حب لبدهم و حفاظ على تراثهم مش شعب ممسوخ مش عارف هو اية ولا مين ولا قيمتة اية ولا حضارتى تسوى اية ولا عندة حس ثقافى ولا جمالى
يخى بلا ستين الف نيلة انا لو مكانة و اثبت فشلى فى وظيفتى اكتر من عشرين سنة كان زمانى انتحرت
مصر فيها انسان غير مثقف
ولا فاهم قيمة حضارتة
ولا بيقرا
وكل حاجة عندة لازم تترجم لفلوس عشان يفهمها
والمرة دى الحق مش على الفرد الحق على وزير الثقافة اللى لزق على كرسة مكتبة وهو زى العبد عبد المنصب وعبد الفلوس و عبد تصريحات التليفزيون الخايبة
فيا نوارة يا حبيبتى لما يطلع تصريح زى دة من واحد كالح معندوش دم ولازق على كرسية ولا لية قيمة و قابل على نفسة يتسأل يوم القيامة على فلوسة حلال ولا حرام و على منصبة بحكم انه من اولى الامر افاد الشعب بأية فلا نفكر فى تصريحة ولا نعملة قيمة و لا نحرق دمنا عشان ناس متسواش
اهو ساب السوس الفكرى ينخر فى البلد و مبقاش فيها افكار غير الممرضة المنقبة و الحجاب و البهائين و السلفيين والمتأسلمين و اللى مش عاوزين يعلموا بناتهن واللى بيجوز 4 عملا بالشرع بقى مجتمع فاسد متأسلم ماسك فى الشكليات بقينا زى العصور الوسطى المظلمة ولا فية ثقافة ولا فكر و البركة فى اللى لازق على كرسية
وعامل نفسة وزير ثقافة فى مجتمع فاسد والبركة فى فية وفى سياسة عامة خلت الجنية لية قيمة و الانسان المصرى مالوش قيمة ولا تاريخ و لا ثقافة و لا حضارة تستوعبة ولا ياخد منها اصالته او افكارة
ومعروف طبعا ان السياسة اقذر الاعمال على وش الارض
فهو مجرد تصريح قذر من ترس قذر فى منظومة قذرة وفاسدة و يأسة و ضعيفة

احمد سعيد said...

طبعا ياماما

انتى لسه عارفه الموضوع دة دلوقت ؟؟

اذا كان تانى اكبر راس فى بلدك

واللى ممشيها كلها

كدة

وكان معموله فضيحه بجلاجل وشراشيب من اربعه واربعين سنه

طبعا

زمن الشرشر خلاص

انتهى من زمان

احنا دلوقت فى زمن

الخوخو

نيييياهاهاهاهاهاهاهاه ةةةة

فتاه من الصعيد said...

على فكره ما كنتش متخيله ان الامر هيوصل لحد اننا مستعدين نلحس جزمه اسرائيل علشان مصلحه وزير.......انا كنت فاكره ان اللحس مقتصر على حالات مصلحه الاسره المالكه فقط
واليونسكو مهم لجنابه وملوش اى اهميه على فكره لمصر .....وهو سبق وجاب مايسترو اسرائيلى من شهر تقريبا من باب برضه لحس الجزم.....وحضر الاوبرا كل مثقفين مصر اللي طاويهم تحت باطه......اللي منهم اللي ليل ونهار بيزعق ويقول لا للتطبيع
دمتى بخير.....تقبلى مرورى

مسلم مصري said...

اهتمام الحكومة المصرية بتولي فاروق حسني اليونسكو زي اهتمامها بغالي في الأمم المتحدة زي تقديرها لفوز زويل بنوبل. هي مش مسألة دور مسألة شو. إحنا حكومة مية مية وخلينا البلد فلة حتى ولادنا ماسكين حاجات حلوة أوي. بس عايز أقول حاجة مهمة. أنتو زعلانين ليه إن حسني يروح اليونسكو ما تخلوه يروح بالسلامة. يمكن وزارة الثقافة تنضف. متهيألي صعب يجي واحد أسوأ منه. في النهاية إحنا هانستفيد إنه مشي.

مصر 30 said...

يا نوارة سيبيه يروح اليونسكو كده أحسن له و أحسن لنا هو يشوف رزقه هناك و إحنا يمكن ربنا يكرمنا بحد كويس

TAFATEFO said...

@مصر 30

بيتهيألي -والله أعلم- ان مدير اليونسكو مبيستقيلش من منصبه في بلده لو ليه منصب

حسن على said...

فاروق حسنى فنان بصعوبة بالغة ...يشاركة فى اتجاهة ومستواة الفنى الفنان سمير صبرى ويزيد علية صبرى فى اجادتة للغات ...الأمر الذى يجعلنى ارشحة كمدير للحملة الانتخابية لفاروق... طبعا التنورة حتقبى شغالة لهلوبة - لأنها اهم انجازاتة الثقافية -والشو الروسى بتاع سمير حاياكل الجو ويفوز "الروقة" بأية؟؟؟؟ بالمنصب طبعا...قوم اية بقى تحصل لنا البركة بقى والناس تيجى مبسوط كتير(طبعا حتدى مادة جديدة للحس مؤخرة النظام وللتباهى الكاذب بأن عوكل هو اللى اكتشفة ووصلة للعالمية) بس اهم حاجة ان فاروق يسكت خالص ومايتكلمش لأنو هناك لامؤخاذة اللى بيهلفط فى الكلام بيسلخوة وهوة لسة ما قامش من مكانة

مهندس حر said...

مصطفى
-----
لو ده صحيح يبقى إنشالله عنه ما كسب..
ده أنا كان نفسى يكسب عشان يغور من خلقنا.. بصراحة من أيام يوسف والى ما غار و روقة على رأس قائمة الوزرا اللى نفسى يختفوا.. طبعا أنا نفسى أصحى الصبح ألاقى ناس كتير إختفت بس أنا بحب أركز و أخدهم واحد واحد عشان الدعا يجيب نتيجة..