بركاتك يا حاج اوباما انت والانسة كلينتون

يا سبحان الله يا اخي، اول امبارح الرئيس الباكستاني ابو فرق من النص زي فرق توفيق الدقن والراجل التاني بتاع باكستان اللي بيلبس الف ليلة وليلة قابلوا اوباما وعملوا مؤتمر مع الاميرة هيلاري وقعدوا يشحتوا، والله كانوا بيشحتوا عيني عينك: احنا محتاجين دعم، شجعني يا يبه، شجعني يا يبه

راحت قالت لهم: يعيش بتاع الكبريت

تاني يوم، سبحان الله ولا حول ولا قوة الا بالله باكستان تضرب اقليم سوات

ده اوباما ده ولي وسره باتع والله، هو المدهول مش عنده ازمة اقتصادية، وللا واخد فلوس الناس يشبرق بيها على توفيق الدقن والملك السمندل ملك الجان الاحمر عشان يموتوا له الغلابة؟

----

الملك عبد الله بن الحسين قابل اوباما من فترة، خرج اوباما بيسب ويلعن في ايران

والنهاردة الملك عبد الله اتكلم قدام البابا بنديكت وجاب سيرة القضية الفلسطينية وسبحان الله ولا حول ولا قوة الا بالله ولا اله الا الله

ما جابش سيرة اللاجئين ابدا ولا اشار لهم من قريب ولا من بعيد ولا كأن فيه لاجئين اصلا، واحنا عارفين طبعا ان اوباما قال لعبد الله: لاجئين يوك... انسى يا عمرو

ولما جاب سيرة القدس قال خدمتها حاجة تشرف اي ديانة

مدد يا سيدي اوباما

-----------

تحديث:

الحالة اللي اشتبه فيها امبارح طلعت سليمة الحمد لله، لحد اللحظة دي الحمد لله الحمد لله الحمد لله ما شاء الله لا قوة الا بالله يارب دايما يا رب استر مافيش ولا حالة في مصر، طفاطيفو لسة مكلمني

احتمال انهم يكونوا بيضحكوا علينا مش وارد، انتوا عارفين انا مش باصدقهم، بس منظمة الصحة العالمية عاملة رقابة على مصر زي ما عاملة رقابة على كل الدول، يعني لو كدبوا علينا المنظمة مش ح تكدب

يااااااااااااااااارب يلحقوا يعملوا لها مصل قبل ما تيجي عندنا يارب