Thursday, 14 May 2009

البوست ده شكر وعرفان لطفاطيفو

الا طفاطيفو احسن حاجة بيعملها في المدونة دي انه يدخل يقول: لا مش صحيح، على اي حاجة بقى انشالله: انا اسمي نوارة
لا مش صحيح... وريني البطاقة، مين اللي قال ان اسمك نوارة، ثم ان انت اسمك نوارة الانتصار مش نوارة، شفتي بقى انك كدابة؟
جينا في موضوع الخنازير ده، دخل يهزأني هنا واني ما بافهمش لان فهمت تصريحات عدلي حسين غلط (والنبي تقروها عشان انا واحدة غبية ومخي على قدي وتعليمي خامسة ابتدائي وتقولي لي يتفهم ايه من التصريحات دي) ثانيا باقول كلام مش متأكدة منه، مع ان اهو، وربنا اهو
وراح داخل سايب لي اماله واحلامه عن اعدام الخنازير على اساس ان هو ده اللي بيحصل من غير ولا لنك واحد لتصريح حتى واحد من المسئولين اللي هم كدابين خلقة ربنا، ومن غير صورة ومن غير فيديو هو قال فانا لازم اصدقه طبعا
واللي زاد وغطى انه بيتهمني في ذمتي، وانا كله الا ذمتي، ما حيلتيش غيرها
انا طبعا ضميري وجعني ودماغي اكلتني، قلت يا بت حرام، لتكوني ظالمة ومفترية وعمالة بس تبستفي الحكومة على ظلمها وانت زيها؟ ده ربنا ح يشنبرك من ودانك
ادور في سلقط في ملقط عن الكلام اللي قاله طفاطيفو بخصوص: لا ما تقولش لا، بس ما تقولش بس، مش ما تقولش مش ما تقولش مش ما تقولش مشششششششششششششش ده انت اللي ح ترجع النور لعينيا
واكتب في السيرش حقن الخنازير، ان يطلع لي تصريح واحد يوحد ربنا بيقول الكلام اللي قاله عن ازاي انهم بيحقنوهم ويبوسوهم ويطبطبوا عليهم ويغطوهم بالكابرتاية على صوت موسيقى هادية وبعد ما يناموا زي البيبي يشيلوهم بالراحة ويدفنوهم ويولعوا شموع بعد ما يغسلوهم
ما لقتش غير اللنك ده واللي فيه توصيات من بعض الناس ان لو سمحتوا اعملوا كده
قام طبعا عشان هم حلوين، ومؤدبين، وولاد ناس، وبياخدوا برأي العلم سمعوا الكلام وعملوا كده
الجيزة تواصل حملة الإعدام وتدفن ٣٠٠٠ خنزير بالمعتمدية «أحياء»
وواضح ان اللي كلم طفاطيفو في التليفون عارف ان مشاعره مرهفة بزيادة فقال له كلام اتكسف حتى يقوله في الاعلام حيث انه لما اتوجهت اتهامات بانهم بيدفنوهم احياء ماحدش من المسئولين جرؤ يقول لنا الكلام العجب اللي قالوه لمصطفى عشان يهدوا له اعصابه
وانفردت الشروق بخبر عن إعدام الخنازير بغاز "الفورمالدهايد" بعد انتشار اتهامات تفيد إعدام الخنازير بدفنها حية
حسسسسسسسسسسسسسسسبي الله ونعم الوكيل
برضه ميدو قلبها في عقله، وقال لك لتكون البت الملسوعة دي بتألف زي ما مصطفى بيقول اما ادور بنفسي شوفوا اللنك اللي جابه
وخدوا دي كمان
وكانت قد بدأت أمس عمليات التخلص من الخنازير في التاسعة صباحاً، إذ بدأت حملة الإعدام والتي شملت الخنازير العشار والصغار بإعدام 880 خنزيراً بإلقائها وسط النيران أحياءً.
يا لااااااااااااااهويييييييييييييييي
ده انا ما كانش عاجبني انهم يدفنوهم احياااااء
ومصطفى زعلان عشان باقول سنية هررررربت يا رجاااااااااااالة
ياريتها كانت هربيييييييييييييت ست الستات ناميييييييييييييييييييييييييييييت
متشكرة يا مصطفى انك خليتني ادور

18 comments:

جبهة التهييس الشعبية said...

فيه حاجة غريبة بتحصل في المدونة

انتوا شايفين المدونة؟

طب عارفين تعلقوا فيها؟

tamer.sala7 said...

ايون
انا شايف وبعلق اهو

mido said...

ما غريب الا الشيطان :)

جبهة التهييس الشعبية said...

اجي افتح من الداشبورد على فيو بلوج يروح فاتح لي موضوع قديم
لازم اروح على جبهة التهييس من فوق الصفحة

tamer.sala7 said...

استغفري ربنا وخشي اتوضي وصلي العصر وكله حاجة حابقي تمام

:P

mido said...

حصلت معايا الحكاية دي في مدونتك فعلا

مهندس مصري said...

عام على احتلال فلسطين ..

المقاومة وحق العودة...خيار الأمة

فى الذكرى (61 ) لإحتلال فلسطين وقيام الكيان الصهيوني

يقيم ملتقى

"اللجان الشعبية لدعم فلسطين والمقاومة العربية "

بمشاركة نـقـابـة الـصـحـفـيـيـن

لقاءا موسعا

يبدأ فى تمام الساعة 5.30 م يوم الخميس 14 مايو

بنقابة الصحفيين بالقاهرة

برنامج ملتقى اللجان الشعبية لدعم فلسطين والمقاومة العربية، يوم الخميس الموافق 14 مايو لاحياء الذكرى الـ61 لاحتلال فلسطين:

تحت شعار:

المقاومة..وحق العودة..خيار الأمة

أولا: الوقفة:

يبدأ اليوم بوقفة احتجاجية على مجمل السياسات الرسمية اتجاه قضية الصراع العربي الصهيوني، من الساعة 5.30 مساءا:

· ترفع فيها لافتة باسم المتلقى تحمل شعار اليوم.

· يرفع المتلقى أعلام فلسطين وصور نصر الله.

· يسمح للمشاركين برفع صور ورموز وأعلام المقاومة، سواء المصرية او العربية.

ثانيا: فاعليات داخل القاعة: (تبدأ من الساعة 8 مساءا)

· يدير اللقاء الاستاذ / صلاح عبد المقصود عضو مجلس نقابة الصحفيين

· يتولى الشباب التقديم، والنظام.

· يبدأ اللقاء بكلمة (5 دقائق) باسم الملتقى يلقيها المنسق العام.

· يتضمن اللقاء ثلاثة محاور، يتخللها فقرات لإلقاء الشعر، ثم فقرة فنية، على النحو التالى:

الموضوع


المتحدثين


المدة

وثيقة تفكيك (اسرائيل)


عرض: نوارة نجم.

تعقيب: محمد عصمت سيف الدولة


10دقائق


10دقائق



فقرة للشعر


عبد الرحمن يوسف


10دقائق

قضية تنظيم حزب الله فى مصر


د.محمود عزت

ا .محمد السخاوى


10دقائق

10دقائق

فقرة للشعر


جمال بخيت


10دقائق

كامب ديفيد وتصديرالغاز

كامب ديفيد و المعابر

رفح المصرية وحصار غزة


السفير ابراهيم يسرى

د.صلاح الدسوقى

ا. مصطفى سنجر




10دقائق

10دقائق

10دقائق

فقرة للشعر


أحمد فؤاد نجم


10دقائق

الفقرة الفنية


فرقة عباد الشمس

فرقة السويس للسمسمية


ساعة واحدة

قبل بدء الفقرة الفنية:

· يعلن أحد أعضاء الملتقى عن الفاعليات القادمة، سواء للمتلقى او لغيره ولها صلة بنفس الموضوع. (5 دقائق).

· كلمة د.نجلاء القليوبى زوجة الاستاذ مجدى حسين، وأحمد الكردى. (5 دقائق).

يعرض على هامش اللقاء منتجات ومشغولات يدوية تمثل التراث الفلسطينى من انتاج اتحاد المرأة الفلسطبنبة وعدد من النشطاء المصريين

يشرف الملتقى بحضور

الاستشارى ممدوح حمزة

والاديب الكبير بهاء طاهر

arrow said...

اه فعلا كان بيفتح على موضوع قديم
ولازم افتح تانى عشان ألاقى الموضوعات الجديدة، لكن بقت طبيعي خلاص
كان بسبب ايه ده ؟

هندسة وصفية said...

قال رسول الله صلي الله عليه و سلم
لكم في كل ذات كبد رطبة أجر

بدراوى said...

اه فعلاً ده حصل قبل كدة معايا امبارح
بيجيب مواضيع قديمة
و لازم نعمل ريفريش للصفحة

سؤال
هو الفيديو اللى حضرتك حاطه لينكه فى التدوينة ديه
فيه حاجات قلة ادب
؟!

اصل اليوتيوب طالب منى اعمل كونفيرم لماى بيرث داى
ليه
!!!

مواطن مصري said...

هههههه


انت اصلك مش عارفة

ان واحد مرة قعدت معايا و قالي اصلك يا بية مش عارف ان اليهود احفاد القردة و الخنازير

وولازم يموتو زي ما هتلر ما كان بيعمل فيهم
:DDDD'

انا يمكن مع الاعدام او ممكن الحل الثاني بجانب نقل مجموعة من الخنازير في الصحراء معزلوين

عشان المرض ميجيلهومش

فتاه من الصعيد said...

هههههههههههههه
حرام عليكى يا استاذه نواره...هو بس طفاطيفوا حسن النيه
بجد حرام والله اللى بيعملوه فى الخنازير زى ما تكون مرات ابوهم
يلا دمتى بخير....تقبلى مرورى

مهندس حر said...

أنا برضه بقاللى يومين كل ما أخش على المدونة بتاعتك من الفافوريتس ألاقى الموضوع القديم.. أقوم عامل ريفرش للصفحة يطلع خير اللهم إجعله خير الموضوع الجديد..

المهم.. هوه البوست ده شكر و عرفان فعلا على أساس إن الراجل خلاكى و الحقيقة خلانا كلنا ندور أكتر.. على فكرة أنا كنت لقيت موضوع المصرى اليوم عن دفن الخنازير حية فى الجيزة و حطيت لينك فى تعليق إمبارح فيين مش فاكر.. يعنى أنا كنت بدأت ما صدقش أو صدقت على أساس نظرى لأن حاجات من دى متوقعة فى بلدنا بس لما دورت لقيت إثبات عملى بحق و حقيق..

يعنى هوه الشكر لمصطفى فعلا واجب لأن الراجل توثيقى أوى و ما بيحبش الكلام المرسل و كويس لو كلنا بقينا زيه..

و بعدين هوه أنا جديد فى المنطقة بس إنطباعى عنك إنك بتطلعى فى أصحاب الرأى المخالف زى البارودة المحمصة.. لكن لو كنت بتحجرى فعلا على رأيهم كان أسهل ما تنشريش تعليقاتهم..

بصراحة أنا اللى نفسى ترزعيه بوست شد ودن هو مواطن مصرى.. حرق دمى بحكاية كل شوية يجيب سيرة غزة و إزاى إن اللى يموت هنا أهم من اللى يموت هناك.. الرحمة يا رب..

م/ الحسيني لزومي said...

61 عاما علي النكبة
ونحن أقرب للعودة
والعودة حق لا عودة عنه
شارك في الحملة الالكترونية لإحياء الذكري ال 61 للنكبة ( عائدون)
ضع شعار الحملة علي مدونتك

جبهة التهييس الشعبية said...

وانا قلت حاجة غير انه حسن النية
طب ده بيكسب فيا ثواب انه بيخليني ادور واجيب ادلة على كلامي

tamer.sala7 said...

اشرف حمدي عامل كاريكاتير مسخرة عن الموضوع ده



http://www6.mashy.com/jokes/cartoon/ashraf_hamdy/-11111111111111111111111111111111111111111111111115

mido said...

بدراوي : أنت طيب أوي :D‏ الفيديو مصور اعدام الخنازير بطريقة صعبه أوي أجارك الله

جبهة التهييس الشعبية said...

وبالمناسبة السعيدة دي واحد صاحبي ما اعرفوش ولا عمري سمعت باسمه دخل على فيديو كنت معلقة عليه (كنت باقول ان لازم امريكا تتصرف معانا بشكل متحضر..ما انا راخرة مسحوبة من لساني، لا وشوف البجاحة كاتبة في البروفايل بتاعي اني من مصر) وقال لي بالعنجليزي ما معناه: ما تخلي غيرك يا شاطرة يتكلم عن التحضر هو انتوا بتعرفوا تعاملوا الخنازير لما تتكلموا عن معاملة البني ادمين؟