الضراير اتصالحوا

ايوة كده، الراجل جاي كمان كام يوم تعبان من الشغل ومش عايز يسمع خناقاتكوا بقى، هو بيعمل ده كله عشان مين؟ مش عشانكوا انتوا وعيالكوا؟ ما تنكدوش عليه بقى، تحضروا له لقمته وتبخروا له الاودة وتمسحوها بالجاز وتشيشوها عشان يتغدى ويشرب الشاي ويرتاح له ساعة. الحكومة الشاطرة الشاطرة هي اللي تراضي ولي نعمتها وما تحسسوش انها تعبانة ولا متضايقة، ما يبقاش برة البيت شقا وجواه شقا ومشاكل بقى، وهو ما كانش ح يتجوز عليكوا سعد الدين ابراهيم الا اذا كنتوا قصرتوا معاه، لو لاقي الراحة في بيته ما كانش بص برة، وبعدين اهو ابو السعود بقى من العيلة، هي صحيح حاجة تحرق الدم، عشان كده اسمها ضرة، بس مشوا حالكوا بقى، يعني ح يطلقه؟ ربنا ما يرضاش بخراب البيت، لو عايز يطلقه ما كانش اتجوزه، ولما عينه زاغت ما عملش غير شرع ربنا، مش احسن ما كان يمشي في البطال؟ ولو مش عايزكوا كان طلقكوا برضه بشرع ربنا واداكوا حقوقكوا، بس هو باقي عليكوا الراجل وعلى العشرة

خلاص بقى، ارضوا بنصيبكوا انتوا الاتنين، وسعد برضه يعرف انه كان داخل على عليكوا، ويراعيكوا بقى عشان يعيش، والا بقى اوباما يزهق منه ويطلقه لان القديمة تحلا ولو كانت وحلة، وانتوا برضه ام العيال

واللي ما بيعرفش انجليزي الخبر اهو

انا مش قلت لكوا سيبوني احلم يا خبر بفلوس بكرة يبقى ببلاش؟ قعدتوا تنكدوا عليا في الحلم والخبر بقى ببلاش اهو، حرام عليكوا، كنتوا سيبوني اصدق انه ح يتعظ لمدة يومين بس، كان لزومها ايه الواقعية دي؟ يا باي