أنا بابوظكوا؟

احمد عاطف المخرج مسكني النهاردة شبحني وقال لي اني بابوظ اللي بيدخلوا لي وبادلعهم

انا؟

بيقول لي اني مش باحمل الناس اي مسئولية وبارمي كل المشاكل والعوائق وعدم الانجاز واسباب الفشل على الدولة وكده انا بادلع الناس

:""""(

مع ان والله انا حواليا ناس كتير، وبيدخل هنا ناس كتير بيحاولوا يعملوا حاجات كويسة هو ذنبهم ان شغلهم مش ظاهر ولا متبلور ولا عليه سبوت اعلامي؟

طب انا عايزة اشتشيركوا اشتشارة كانونية وتقولوا لي ليه عشان مكالمة احمد نقلت لي دماغي الحقيقة

دلوقت انا باشوف ناس، كتير والله، ومنهم كتير من اللي بيدخلوا ويعلقوا هنا بيعملوا الاتي:

بيشوف هو عايز يعمل ايه وبيعرف يعمل ايه وبيحاول يحسن من الحاجة دي او المهارة دي على قد ما يقدر بصرف النظر عن هو خريج ايه، وبيحاول يعمل حاجة ولو بسيطة في سكة اللي هو بيحبه وبيعرف يعمله

طبعا سيبنا من النظام الامريكاني بتاع

think big... look far see far

ده كلام فارغ، الامريكان هم اللي خربوا العالم زي ما انتوا شايفين كده، لان الثينك بيج واللوك فار بيحسس الانسان بالعجز والفشل وانه عمره ما ح يعرف يعمل حاجة، ويخليه زي المواطن الامريكاني كده: بيجري جري الوحوش وملهي في روحه وما عندوش اي فرصة للتأمل

بس الحمد لله انا باشوف ناس كتير بتنتج، ممكن واحد خريج حاجة ما يشتغلش فيها خالص، انشالله بيحب يعمل كراسي، يفضل يعمل في كراسي عشان دي الحاجة اللي هو بيحبها

والانتاج في حد ذاته حاجة مهمة قوي، مش مهم ايه اللي بعد الانتاج، المهم ان الواحد بينتج، تاني انتاج ح يبقى احسن من اول انتاج وعاشر انتاج ح يبقى احسن من خامس انتاج

وده بيحصل وباشوفه

طب ليه فيه حالة عامة من الفشل؟ مع ان كل واحد بيحاول يعمل الحاجة اللي بيحبها على قد ما يقدر ويحسن نفسه فيها، والله، انا شايفة الاتهامات للافراد بانهم عالم فشلة ومش عايزين يعملوا حاجة اتهام مجحف، ناس كتير بتعمل انتاج وبتفكر، ولان اصلا كده كده مافيش فرص لا في المجال اللي هو اتخرج فيه ولا في غيره فبيفكر بقى يعمل حاجة بيحبها

طب ليه فيه فشل عام؟

وانا مش بادلع حد، يعني مش كفاية اللي الناس فيه؟ وللا بادلع؟