مفاجئات هيفاء وهبي وهبك

اول هام خشوا على اللنك ده حسام الحملاوي باعتهولي وبيقول لي لسة فاتح وحتى ح تشموا ريحة البوية اول ما تدخلوه بس حلو عجبني قوي

مع الاعتذار للاخوة الزمالكاوية اللي زيي، الموقع كله احمر

ثانيا، حد شاف هيفاء وهبك النهاردة مع منى الشاذلي؟ انا استفوجئت بكذا ميزة، او كزا ميذة

1- هيفاء وهبي مش طالعة حلوة زي ما بتطلع في الكليبات، خدودها ساقطة من كتر العمليات ومش عارفة تضحك

2- انها تطلع اصلا في العاشرة مساء، منى كان شكلها مزمزأ من الموضوع ده مش عارفة ليه، الظاهر حاجة اعلانية عشان الفيلم الجديد

3- المفاجئة الاكبر: هيفاء وهبي ذكية ونبيهة

حاجة غريبة قوي، انا بصراحة ما توقعتش خالص انها تبقى بالنباهة دي، اصلي عمري ما سمعت لها حوار الحقيقة، انا توقعت مثلا ان مخها مش ح يزيد عن مخ سمية الخشاب اللي مرة قالوا لها انت ليه بتتجوزي دايما رجال اعمال اغنيا قالت : ده رزقي، وحسبي الله ونعم الوكيل في اللي بيبص لي في رزقي

الظاهر رزقي كان بيغير والناس بصت عليه، ماهو يقفل الباب يعني هو راخر

بس هيفاء دي مخها نضيف، طب ايه اللي رماها الرمية دي لما مخها نضيف؟

4- مفاجئة رابعة، ان منى الشاذلي انسحبت من لسانها، كالعادة، وقالت لها ما شفتيش قضية سوزان تميم، ولمحت ان يعني: بكرة جوزك يقتلك انت كمان، ههههههههههه والله منى الشاذلي دي عسل، مافيش اي فلتر على بقها خالص كده؟ بس مش دي المفاجئة

المفاجئة ان هيفاء ارتبكت وزي ما تكون اتخضت بجد وبان على وشها الخوف وصوتها ارتعش

طب وانتوا حد بيضربكوا على ايدكوا؟

ايه اللي ودا هيفاء وهبي العاشرة مساء بقى؟