الفرق بين الديكتاتورية والديمقراطية

زي الفرق ما بين جنينة حيوانات في انجلترا وجنينة حيوانات الجيزة

جنينة حيوانات انجلترا:

الحيوان بيتحط في مكان اخضر، حلو، واسع نسبيا، شبه البيئة الاصلية بتاعته، بس المكان ده متسور بسور مش مرئي، معمول بالكهربا، والحيوان ماشي كده يتمشكح ويتدألج لو من غير ما يقصد خطا الحدود الكهربا تلسوعه قوم يرجع، مرة في مرة دماغه بتتظبط على انه ما يخرجش عن المساحة المسموحة له، وبعد شوية بيتهياله ان دي بيئته الطبيعية ويمكن لو شالوا السور غير المرئي مش ح يحاول يخرج خلاص

دي الديمقراطية

حديقة حيوان الجيزة:

طبعا كلنا رحنا جنينة الحيوانات وشفنا العيشة اللي اقل من عيشة الحيوانات اللي عايشها الحيوانات، الحيوان بيتحط في قفص معفن، ضيق، متسور بقضبان مصدية وشكلها يقرف الكلب الاعور الحزين، من اول اليوم الحيوان بيقول: الله، ايه ده بقى؟ وبيحاول يخرج، ممكن تجيله حالة هياج ويحاول يفتح الباب، يكسر القبضان، يعور الحراس وساعات يموت منهم واحد، يقوموا عافقينه اسم الله على مقامكوا ورابطينه وحارمينه من الاكل عقوبة، يخرج من الحبسة وهو هادي، شوية صغيرين، شهر، شهرين، تلاتة، ستة، سنة وبعدين يرجع العيشة ما تعجبوش، يروح مخبط ومكسر وهابش له حارس، وهكذا دواليب، فيه حيوان حساس في نفسيته يضرب عن الاكل لحد ما يموت، وفي حيوان يفضل يا قلبي يعافر وكل كام شهر وللا حتى كام سنة يهبش له حارس لحد ما الحرس يشتكوه قوم الطبيب البطري يقول اطلقوا عليه رصاصة الرحمة

بس مات وهو بيعافر عشان حريته

عشان كده انا عندي امل