Monday, 18 May 2009

مستودع فيران بيجري في دماغي يمين وشمال

حد يكلمني زي ما باكلمه ويديني عقله ويمشي حافي دقايق مسافة اخر البوست
خلينا نتفق على مقدمات
دونالد رامسفيلد سفاح بقرون وديل
متفقين؟
دونالد رامسفيلد بيمتلك اعلى اسهم في الشركة اللي بتنتج تامي فلو
متفقين؟
الواد اوباما نصاب من اللي بيقفوا على الرصيف يقولوا فين السنيورة
متفقين؟
الواد اوباما خرج من امريكا اللاتينية من هنا وانفجرت انفلوانزا الخنازير من هنا
متفقين؟
الواد اللي كان مرافق لاوباما (بضم الميم لو سمحتوا) في الرحلة بتاعة التامي فلو، اقصد انفلوانزا الخنازير جاله الفلفوسا
متفقين؟
فيه اصرار غريب على دحض اي نظرية مؤامرة لتفسير الحاجة دي اللي شوية يقولوا وباء وشوية يقولوا لا وباء ولا حاجة ده التقيل ورا، اصرار هيستيري، اصرار مبالغ فيه، اصرار يشكك الواحد في صوابع رجليه وارنبة انفه، اصرار شبه الهلع
ولو بمبكت مع الناس اللي بتشكك في نظرية المؤامرة فيما يخص فلفلوسا الخنازير بالذات بيعملوا الاتي:
1- يتخانقوا معاك
2- يتريقوا عليك
3- يفضلوا يجيبوا لك في لنكات ما تشكلش دليل على صحة كلامهم ولا حاجة
4- يشتموك
مع انهم ممكن ما يعملوش كده في اي نظرية مؤامرة تانية
اول ما تقول ما فيه احتمال الفيروس يكون مصنع تلاقي عاصفة الصحراء انفجرت في
وشك: لأ لأ لآلآلآلآلآلآ
والدليل: قالوا له
"ماهم قالوا ان فيه خوف ان الفيروس يتطور من اتش فايف الى اتش وان، يعني مش ممكن يكون مصنع"
ايوة مش ممكن ليه برضه؟ مش ممكن ليه اتش فايف ان وان اصلا يكون مصنع؟ ايه اللي مش ممكنه؟ "عشان هم قالوا ان فيه خوف انه يتطور، يعني مش ممكن يكون مصنع"
الجملة دي مش فاهماها الحقيقة، معلش خدوني على عقلي لا باقول اه ولا باقول لا، انا ممكن اعيش في الوهم في حدود المعقول، ممكن في حياتي الخاصة لكن مش ممكن في حاجة عامة زي دي
مش فاهمة يعني ايه عشان هم قالوا ان فيه خوف الفيروس يتطور يبقى مش ممكن يكونوا هم اللي مطورينه؟
ايه الجملة السيريالية دي؟
ويعني ايه العلاج الوحيد لفلفلوسا الخنازير تبقى التامي فلو بس؟
جات ازاي دي يعني؟ ازاي يعني مرض مالوش علاج في الدنيا غير العلاج اللي بينتجه دونالد رامسفيلد بتاع بيبول داي؟ يعني راح قتل مليون ونص في العراق وتاب واناب وبيعالج البشرية من مرضها والدليل على نيته الصافية وقلبه اللي زي اللبن الحليب ان ربنا قبل توبته وخلق له فيروس من حيث لا يرجو ولا يحتسب مالوش علاج غير اللي هو بيصنعه عشان ياخد ثواب الملايين اللي ح تتعالج بالدوا اللي غلي وبقى سعره في السما؟ ومش بس بيكسبه ثواب، ده كمان بيكسبه فلوس، لا وايه؟ رضي عنه ورفعه الى درجة الصديقين والشهداء وراح مطور له الفيروس لفيروس تاني اخطر، وسبحان الله، مالوش علاج، بررررررررضه، غير هو التامي فلووو، الله اكبر، الله اكبر، الله اكبر
طلبتها ونلتها يا حااااااج
طب بلاش
ليه يا ترى، يا هل ترى، الحاج ابو حسين بتاع فين السنيورة عمل كل التأمينات الاجتماعية ومعاش السادات عشان مافيش حد من الروس الكبيرة يقع تحت طائلة القانون في التحقيقات بتاعة التعذيب؟ ولا حتى الصغيرة؟ التحقيق في عمليات التعذيب اللي بيعمله اوباما ده عبث عبث عبث، ماحدش ح يتحاسب
اوباما ادى ضمانات لاعضاء ادارة بوش كلها اللي فضلت واللي مشيت ان مافيش حد فيهم ح يقع تحت طائلة القانون
والازبل من كده انه ادا ضمانات للضباط الصغنتتين كمان ان ماحدش فيهم ح يتحاسب على اي حاجة، وفوق ده كله بيحميهم وبيخبي الصور
التحقيق ده: نام نام وادبح لك جوزين حمام ما تزعلش يا حمام بس لما البيبي ينام
يعني لو مافيش اي علاقة بين ادارة بوش (اللي هي ادارة بزنس قذر بالدرجة الاولى سلاح ومخدرات وبترول وادوية) وبين الادارة الحالية (ارجو تأمل الادارة الحالية نيفير نيفير، والنبي تبصوا على وش الواد رام امانويل، شكله تاجر ماني فاتورة وفيه واد متحدث رسمي ابيض ومكلبظ وشكله حلاق بشنطة وموسه تلم والبت المندوبة بتاعته في القلل المنتحرة شكلها كانت بتنط من سور المدرسة وتضرب حقن في رقبتها وهو اوباما نفسه عامل زي الرجالة الحلوين القرنية بتوع هارلم في الستينات اللي بيضحكوا على البنات ويوقعوهم في حبهم ويهربوهم من بيت اهاليهم وبعد كده يشغلوهم في البارات استغفر الله العظيم وياخدوا فلوسهم عشان يشموا) لو مافيش بانات شلة البزنس بتاعة بوش وشلة زقاق المدق بتاعة اوماما اي صلة؟ ليه بيحميهم كده؟ ايه يعني؟ قدر وعفي مثلا؟ اصيلة يام العربي
طب بلاش
طب فلفلوسا الخنازير دي طلعت فلفوسا عادية بس علاجها التامي فلو، ايه حالة الهلع اللي عملها الاعلام الغربي دي؟ وايه التقارير بتاعة العالم ح يموت كله عن اخره بتاعة مافيا الصحة العالمية؟ ويالهوي، ومافيش علاج، ومافيش مصل، يا خرابي، يا حوستي، تلت البشرية ح يفنى، وباااااااء وباااااااااااااااء، وبااااااااااااااء
وبعدين رجعوا فجأتن كده سذاجة قالوا:
It is not lethal
مش قاتل....بس.. الخوف من ان الفيروس يتطور لانه يبقى... يا لاهويييييييييي، ما تتهدوا بقى، الخوف من انكوا تفتحوا بقكوا وتفسروا في وشنا باللي ناويين تعملوه فينا
انا بيوستهيألي ان لو ربنا كرمنا وافتكر دونالد رامسفيلد كل الاوبئة دي ح تختفي
او يكرمنا ويغرق القارة الامريكية لان بجد اللي بيعملوه ده ما ينفعش ابدا، ايه ده.؟ ايه الشر ده كله، وزعلانين عشان بنقول امريكا شيطان، لا لهم حق، ده الشيطان تلموذ في كي جي تو بيعلموه لسة النشيد الوطني
يا ناااس، كل ده مصادفة؟ ملكية رامسفيلد تقريبا لتامي فلو مصادفة؟ وانتشار وباء الطيور على طول بعد حرب العراق مصادفة؟ وان سنة 2004 (يعني قبل ترشح اوباما باربع سنين) يطلع فيلم كوميدي انتاج هوليود بيطرح فكرة وصول اسود للبيت الابيض ونجاح الفيلم مصادفة؟ والواد اللي اخدوه من الشارع حموه واكلوه وبطلوه كوكايين وأراب توب عليا وقببوه على وش الفتة من كام سنة بس مصادفة؟ وترشيح الجمهوريين لواحد لا بيشوف ولا يسمع ولما يمشي يتكعبل قدام اوباما مصادفة؟ ومرواحه لامريكا اللاتينية واول ما يرجع يحصل اللي حصل في المكسيك مصادفة؟ اشمعنى المكسيك يعني؟ واصرار الاعلام العالمي على اشعارنا اننا بنمر بكارثة كبيرة بتهدد العالم والبشرية واللعب على خوف الناس مصادفة؟ فيه كارثة؟ فيه كارثة للدرجة دي يعني؟ حد فيكوا حاسسها في حياته الشخصية؟
----
الفاصل الكوميدي في كل المسرحية التراجيدية البوليسية الغامضة دي:
مع المونولجيست الشهير المحبوب باعث البهجة على القلوب جمهورية مصر العربية: ما تستعجبش، ما تستغربش، فيه ناس بتتعب ولا تكسبشي وناس بتكسب ولا تتعبشي ما تستعجبشي ما تستغربشي
اهي مصر دي عاملة زي ما تكون بتتفرج على امريكان جانجسرت وفجأة ابن اختك حول المحطة على مشهد نيرون في فيلم المليونير بتاع اسماعيل يس، طلعت فجأتن كده لوحدها قال ايه: احنا بنعدم بس الخنازير المصابة، اما الخنازير غير المصابة فبندبحها ونجمدها
يعني العالم كله ما لقاش حالة خنزير واحدة مصابة ابدا، كل الاصابات في البشر، لكن احنا سبحان الله ولا اله الا الله ولا حول ولا قوة الا بالله، لقينا كللللللللللللل المساكين اللي بيترموا احياء في المادة الكاوية دول ويفضلوا يصرخوا ويفرفروا لحد ما يسلموا الروح تحت اعين النازيين من منفذي هولوكوست الخنازير، كل دول مصابين، لا سحر ولا شعوذة
لا وشوف حكمة ربنا يا مؤمن، كل الخنازير دي مصابة في مصر بس دونا عن العالم، وولا حالة اصابة في البني ادمين في مصر برضه
ده ربنا له حاجات يا جدع
ومن هاذوها المينطيليق قرر السيد اوميمة انه ييجي يشوف ايه الحكاية الغريبة دي، وله حق يستغرب، اصله ما عداش على مصر، قام قال يعدي ويكمل البزنس اللي بيعمله مع فرانكشتاين التائب العائد قاتل الملايين بدم بارد وهو نفسه اللي بيعالجهم دلوقت
على الله يا اوماما تكون طالع بكوميشن كويس يا ابن النصابة، ياااااا ابن النصابة
لا، الشهادة لله الولية مش نصابة، عرق النصب ده انت حضرتك جايبه من ابوك
راحوا جابوا لنا مسلم من هارلم عشان يعرف يلطعنا على قفانا كويس
ومسلم بقى على فكرة، وربايتنا بجد، امال جايب النصب ده كله منين؟ يازين ما خلفتي يا زينب
انا عارفة ان الكلام مش ح يعجب، بس معلش بقى، ربنا لما وزع الارزاق ماحدش عجبه رزقه، ولما وزع العقول كل واحد عجبه عقله، وانا ما اديش عقلي لغيري ابدا
اه، انا طلبت في الاول حد يديني عقله، بس هو انا ضربتك على ايدك يا كابتشن؟
ثم انك ما طلبتش عقلي، ولو كنت طلبته ما كنتش ادتهولك
الله
امال انا باقول ايه من الصبح؟ انا مش قلت لكوا اوماما جاب النصب ده كله منين؟
البركة في ريري يا ضي العين

63 comments:

ســـــاره said...

انا كمان مش شايفه انها مؤامرة :)

انا مقيمة في هاملتون كندا.. وهنا في المستشفيات عملوا حملات توعية وشرح بالمرض واعراضه وتم الإعلان عن حالة هنا في ولاية أونتاريو بس الشكل العام مش بيدل على انه وباء عالمي ..الموضوع ومافيه بس كان داخل اروقة المستشفيات مافيش اي قلق في المدن الكندية والحياة طبيعية وعادي جدااا اممم مش عارفه يمكن عشان كندا واخده احتياطاتها للحد من انتشار المرض فيها!! الله اعلم

مهندس حر said...

بصى.. أنا ها أنام كام ساعة و بعدين آجى أقرا ملحمة رامسينامه اللى إنتى عاملاها على الوزن الأميبى دى.. عشان أنا قريتها مرة و مش فهمت حاجة..

lastcrazyboys said...

عليكي اختيار لأوقات غريبة عشان تعرضي المواضايع المكلكعة

خدي طيب الخبر ده بقاله يومين ..بس انا مرضيتش اجيبه عشان متعمليش موضوع زي ده ..عن نظرية مؤامرة ..وتقعدي تجيبلنا في فيديوهات ..وحاجات من دي
===
عالم أسترالي يرجح خطأ مخبرياً وراء إنفلونزا الخنازير

May 14 2009 21:30


رجح باحث أسترالي أمس أن يكون فيروس «اتش1.إن1» المعروف بانفلونزا الخنازير قد نتج بصورة غير متعمدة من جانب علماء كانوا يعملون على إنماء فيروسات واختبار أمصال جديدة في أحد المختبرات.ونقل موقع «ساينس إنسايدر» الإلكتروني عن أدريان غيبس، عالم الفيروسات المتقاعد في الجامعة الوطنية الأسترالية بكانبرا قوله أمس إن خطأ مخبرياً قد يكون السبب وراء ظهور فيروس انفلونزا الخنازير الذي يجتاح العالم حالياً

وأوضح «صدمت بإعلان عن مصل للخنازير يحتوي على ثلاثة فيروسات مختلفة، ليس قتل الفيروس هو ما يمكن من خلاله توضيح الأمر بأكمله بصورة دقيقة، غير أنه أحد احتمالات عديدة». وأضاف غيتس، الذي ساهم في الأبحاث التي أفضت إلى إنتاج عقار «تاميفلو»، إنه مستعد لقبول من يثبت عدم صحة فرضيته
==
وبعدين انتي جبتي منيييين الثقة العمياؤ انهم بيقولوا ان التاميفلو هو العلاج الوحييييد..يعني مكناش هنخلص المفروض في الاخبار والجوزيرة ..والسو أون أون

Pink said...

الخنازير اصيبت بالمرض في كندا من عامل في مزرعة خنازير رجع من زيارة للمكسيك.
May 3, 2009
"The Wall Street Journal"

"Unease in the agriculture sector, particularly in the pork industry, was amplified by the weekend discovery of the flu in a swine herd in Canada, which raised the specter of a new avenue of transmission to humans. The infected herd was quarantined and the source of the virus was determined to be a worker recently returned from Mexico, officials said."

http://online.wsj.com/article/SB124135130674780783.
html

جبهة التهييس الشعبية said...

ايوة يا بينك
مما يبرئ الخنازير

انا عارفة الخبر بتاع ان الخنزير هو اللي اتعدى من الراجل ده في كندا ده لسة خبر قريب

انا باتكلم عن حاجة تانية
باتكلم عن خنزير مصاب من عند ربنا كده

الحالة الوحيدة اللي لقوا فيها الخنازير عيانة هي الحالة دي لما اتعدت من البني ادم

لكن ابدا لحد دلوقت مافيش حاجة في الدنيا اسمها: الخنازير المصابة

ده اختراع ده
وطالعين يقولوه في وشنا كدهون بمنتهى البجاحة

جبهة التهييس الشعبية said...

لاستكريزي بوي

وانا يعني ح اجيب ان العلاج الوحيد هو التامي فلو منين؟ شايفني دكتورة
ما انا جايباه من السي ان ان والجزيرة الكلام ده

اما بالنوسبة للخبر بتاع: نأسف لهذا العطل الفني

فدي اخر نكتة بقى
قال خطأ غير مقصود قال

طب نقول لهم ايه؟ شفيتم؟

جبهة التهييس الشعبية said...

سارة

واخدة احتياطاتها؟
طب ده حتى فيه واحد مات في كندا
والخنازير يا عيني اتعدت من ابن ادم عندكوا في كنكا

فين احتياطاتها دي بقى؟

مهندس حر

انا كمان ح اقوم انام

بس انت ما فهمتش ايه؟
هو انا بقيت اللمبي للدرجة دي؟
معلش
باتكلم شوية هنا عربي وشوية هناك انجليزي فالسلوك دخلت على بعض

mido said...

يا أستاذة مااحنا قلنا خلية الخنزير هي الوحيده في العالم اللي بتسمح بتداخل_انترفيرنس_الفيروسات مع بعضها لدرجة ان ثلاثة فيروسات اتخلطوا مع بعض جوه الخلية و ظهرت لنا انفلونزا الاتش ون ان ون و طبعا الجسم ميعرفش الفيروس ده لأنه جديد عليه و مفيش حماية ضده

Founoon said...

المرة دي نظرية المؤامرة منطقية جدا

جابولنا هلع وخلونا نقول اتخلصوا من الخنازير وحصلت هولوكوست الخنازير اللي ماحصلتش في تاريخ البشرية قبل كدا ولطمنا وصوتنا وابصر كام الف مصاب والميتين لحد دلوقتي رقم اهبل

يجي ايه الرقم دا جنب ضحايا الدويقة ولا العبارة ولا حوادث القطر ولا حتى حادثة الدائري الاخيرة

نحن نختلف عن الاخرون

انا دايما حسنة الظن بس المرة دي نظرية المؤامرة واضحة وضوح الشمس

بس عشان المسرحية تكمل كان لازم حالات تظهر في الدول العربية حيث الهوس يزيد

ليه لحد دلوقتي مافيش ولا عربي اصيب ؟

مواطن مصري said...

انا مش مقتنع انها نظرية مؤامرة


اذا كان فية حالات اشتباهة و اصابات في امريكا

فتاه من الصعيد said...

بصى عادى يعنى انه يكون مصنع....ايه المشكله
طيب ما هما صنعوا الايدز فى افريقيا
على فكره انت كان عندك نظريات للمؤامره اصعب تصديقا من دى
اما بالنسبه للتيم فلو....الفيروسات عموما ملهاش علاج ....ده بيعالج الاثار الناتجه عن الفيروس....ووهو اصلا كان علاج لاعراض الانفلونزا العاديه
معلومه كمان ....التيم فلو ده نصبايه كبيره....والاعلام ساعد فيها بايحاء الناس انه العلاج الاوحد للفيرس.....وزى ما قلت ان الفيروسات ليس لها علاج
بس على فكره بيقولو هيفحصوا الصحبه اللى جايه مع اوباما....وهيفحصوا اوباما نفسه بواسطه حاجه تابعه لرئاسه الجمهوريه باين
ولو ظهرت اى حاله بعد الاسطى اوباما ما يشرف....هنقولك برافوا على النظريه
والواحد عادى يصدق اى حاجه لان البزنس بيحرك كل ما حولنا
دمتى بخير....تقبلى مرورى

مى said...

الأمور واضحة يا نوارة

و لتفسيرها نسير تبعاً

لنظرية


إن كان الأمر غير طبيعياً

فابحث عن المستفيد





مهندس حـــر

كده برضة

متستوعبش بسرعةالدرر اللى كتباها نوارة

للدرجة اللى خليتها تشبه نفسها باللمبى

!!

و أنا اللى دايماً

بشبه كتاباتك باللمبة اللى بتنور فى الدماغ

زى عبقرينو اللى فى قصص ميكى

مى said...

السؤال دلوقتى


هل أوباما و الوفد المرافق له

سيخضع للإجراءات الصحية المتبعة فى المطار لكل من هو قادم

من الدول التى ظهر فيها الفيرس

؟؟؟

خاصةً و نحن إلى الآن لم تُسجل عندنا إصابة واحدة

من فيرس المؤامرة هذا

واحد مش فاهم حاجة said...

امم ابتديت اشم فيها ريحة المؤامرة

وبعدين بقى

برضوا هانقعد كدة ونفيسة هاتلم عيالها وتقعد تلطم

عاوز اتفرج على حاجة جديدة بقى

عبقرينو said...

نوارة معاكى أنى ممكن يكون فيه نظرية مؤامرة وممكن يكون مؤكد فعلا لكن
مؤامرة او مش مؤامرة فيه احتمال انه يتحول لوباء ولازم نكون واخدين احتياطتنا يعنى هما هما حضروا العفريت وممكن مش يعرفوا يصرفوه
الذكاء دلوقتى اننا نستعد وناخد احتياطتنا وعلى فكرة التام فلو مش علاج للمرض بصورة قطعية علاج المرض والاحتياط منه هو تغييير سلوكياتنا
يانوارة التاريخ بيعيد نفسه والذكاء اننا نتعلم ومن الحماقة اننا نكرر نفس التجربة ونتوقع نتيجة مختلفة

الحل دلوقتى التوعية وتغيير السلوكيات سواء كانت مؤامرة او غير مؤامرة كمان موضوع الخنازير وذبحها كلها وهل هيا مؤامرة ولا لأ؟؟ الموضوع انا مش موافق عليه بالذبح واعدام كل القطيع ولكنى ايضا مش موافق انى فيه مؤامرة لأنى حكومتنا وقيادتنا السياسية ليس لها قدرة على التآمر اصلا لأنى اللى بيتآمر ده لازم يكون ذكى جدا جدا وهما عكس كده تماما

عابر سبيل said...

راحوا جابوا لنا مسلم من هارلم عشان يعرف يلطعنا على قفانا كويس
ومسلم بقى على فكرة، وربايتنا بجد، امال جايب النصب ده كله منين؟ يازين ما خلفتي يا زينب

حسبى الله ونعم الوكيل ...... يعنى إيه اللى ربط الإسلام بالنصب ؟ طيب بما إنك مسلمة تبقى على طول نصابة ؟ طيب قولى العرب نصابين مثلا ، ورغم كده برضه لا يجوز التعميم لأن الظروف اللى بيمر بيها العرب من غياب الديمقراطية فى بلادهم واضطرارهم لقنص لقمة العيش من بق الأسد هيا اللى غيرت سلوك الناس بس مش كل الناس ، اللى جواه ضمير صاحى بيعرف يفرق بين الصح والغلط ، لكن إيه علاقة ده بالإسلام؟ هيا تعليمات الإسلام بتحض على النصب واحنا مش عارفين؟ .... طيب ما فيه ناس أوربيين وأمريكان بيسلموا ، على طول بقى بيتحولوا لنصابين بمجرد إشهار إسلامهم؟

بتفكرينى بأيام ما طلع المايوه الحريمى الإستريتش اللى عامل زى بدلة الغوص وبدأت الستات تشتريه كنوع من الحشمة بدل المايوهات العادية وطلع عليه إسم المايوه الإسلامى

مهندس حر said...

إيه ده؟ هوه كان فيه إنجليزى؟ يمكن عشان كده أنا ما فهمتش.. ههههههه

هو الكلام بتاعك لا يندرج بالظبط تحت نظرية المؤامرة ..

نظرية المؤامرة بيتبقى متعلقة بتخطيط على مستوى إستراتيجى لتوجيه سياسات دول و التأثير على تاريخ أمم على مدى سنين..

أنا ممكن أقتنع بكلامك عن إن الفيروس مخلق معمليا.. حصلت قبل كده كتير..
إن الفيروس يخرج من المعمل بشكل متعمد لتحقيق مكاسب من ورا عقار بعينه.. ممكن برضه خصوصا إذا حطينا فى الإعتبار إن الفيروس مش شديد الضراوة.. يعنى الناس عملوا حسابهم ما يموتوش الزبون بسرعة قبل ما يلحق يشترى الدوا..

كل دى إحتمالات مقبولة نظريا و لو تجمع عدد كافى من القرائن اللى بتثبتها يبقى ممكن قبولها كحقيقة.. بس طبعا حكاية جمع القرائن دى هاتكون شبه مستحيلة حاليا.. يمكن أولادنا يقدرو يبتوا فى الموضوع ده..

الحتة اللى أنا مش فاهمها.. مال أوباما بالليلة دى؟.. يعنى القصة زى ما بتحكى عنها مش محتاجينوا فيها فى حاجة إلا إذا كان يعنى راجل بركة و واخدينه فاسوخة؟؟

جبهة التهييس الشعبية said...

عابر سبيل
معلش بس من غير زعل كده، انا مسلمة، وزيك زعلانة على المسلمين وتشويههم وكل حاجة
بس الحقيقة، واقع الامر، ان الموضوع مش موضوع عرب بس، لو رحت اندونيسيا وللا اتعاملت مع باكستانيين
احم
اه بقينا نصابين مش في الجينات، ولا الدين الاسلامي بيعلمنا الناصب ههههه ده الباكستانيين نصبوا على الامريكان في عشرة مليار دولار يا راجل
بص
الطبيعي ان المقهور بيبقى نصاب
زي ما اليهود في فترة قهرهم كانوا نصابين
يعني هو الدين اليهودي بيعلم النصب؟ زي ما الافرو امريكان كانوا نصابين يعني هو النصاب لازم يبقى اسود

اللي بيتعرض لقهر وتشويه وظلم لفترات طويلة وبيبقى عنده خوف مستمر انه يتهاجم بيلجأ للطرق غير المباشرة والناعمة في التعامل ولانه بيبقى مظلوم فاكيد بيبقى زعلان ولما يبقى زعلان يبقى جواه مرارة ولما يبقى جواه مرارة يبقى عنده رغبة في الانتقام ولما يبقى عنده رغبة في الانتقام بتلح عليه وهو ضعيف ومضطهد والكل متكالب عليه تلاقيه بينتقم بطرق ملتوية
وده كله تدريب كويس على النصب
مالوش علاقة بجيناتنا ولا له علاقة بدينا
له علاقة بظروفنا الحالية والشلاليت والبونيات اللي ورا بعضه ورا بعضه
الانسان بطبعه بيعرف يتكيف عشان يحافظ على بقائه
والمقهورين بيبقى لهم طرق للحفاظ على بقائهم
ولما يبقى فيه عدل في الدنيا ان شاء الله
مش ح يبقى فيه نصابين
انا لما قلت جايب النصب ده كله منين
كان قصدي انه متربي على القهر فيعرف يبقى ناعم عشان يوصل للي مفروض يعمله

جبهة التهييس الشعبية said...

ميدو

انا مش معترضة على ان الخنزير هو المطبخ اللي اتطبخ فيه الفيروس
بس معترضة على الثقة المبالغ فيها فانه اكيد اكيد مش مصنع
طيب ممكن فعلا يكون مش مصنع ولا حاجة
احتمال خمسين في المية
تسعين في المية
تسعة وتسعين في المية يا سيدي
يظل فيه احتمال واحد في المية انه يكون مصنع
خصوصا ان فيه معطيات بتقوي الاحتمال ده
دونالد رامسفيلد لما يدخل في حاجة على طول تشم ريحة وحشة

قال عنده اسهم في شركة ادوية قال
انسان قوي والله

فنون

طيب يا فنون انا قريت على النت كلام كتير عن الانفلوانزا
ولقيت حاجة غريبة قوي
الانفلوانزا العادية خالص
اللي بتجيلنا دي
بتموت
فيه ناس بتموت منها كل سنة وعددهم اكبر من عدد اللي ماتوا من انفلوانزا الخنازير
وفيه نسبة، مش عارفة كام كل سنة في العالم
بتموت موت الفجأة، اللي هو واحد زي القرد مافيهوش اي حاجة نام ما قامش
ولو حب الاعلام يصيبنا بالهلع من موت الفجأة يقدر يرصد كل يوم عدد حالات موت الفجأة في العالم كله ويحسسنا اننا مش لازم ننام لاننا لو نمنا مش ح نقوم


مواطن مصري

فيه حد من اصحاب رأس المال في الشركة المشكوك فيها مات؟

انت متخيل ان الامريكان دول كلهم ساكنين في عمارة واحدة وكلهم متفقين علينا؟
وللا متخيل ان اللي عايز يكسب من ورا قتل الناس ده ح يفرق معاه اللي مات ده مكسيكي وللا عربي وللا امريكاني؟
ايه يعني امريكان ماتوا يا مواطن؟ ده يبرأ دونالد رامسفيلد
هو مش ده اللي قتل اربعتلاف امريكاني في العراق؟
همه قوي يعني وخايف على الامريكان؟
وبعدين لحد دلوقت كل التقارير اللي بتتكتب عن حداشر سبتمبر بتقول ان السي اي ايه كان عنده اخبارية بالعملية وسابوها تتنفذ
يعني سابوا تلاتلاف بريء يموت عشان هم ليهم مصلحة


فتاة من الصعيد
ح يفحصوا اوباما؟

مش متأكدة انا من الموضوع ده
ح يجيلهم الشجاعة يعني يعملوا كده؟

ده انا متهيالي ممكن يضحوا بجمال ولا انهمش يتطاولوا على اسيادهم

مي

فتاة من الصعيد بتقول لك ح يفحصوا اوباما

مافيش ولا اصابة مسجلة في العالم العربي من انفلوانزا الخنازير

ليه مش عارفة؟
الله اعلم
انا شخصيا مش عارفة اي حاجة
انا بس شامة ريحة مش حلوة وخلاص
لكن مش عارفة ايه الحكاية ولا حتى عندي تخمين

واحد مش فاهم حاجة

مش عارفة
انا حاسة ان مافيش داعي للطم ولا حاجة

يعني حاسة ان مافيش وباء ولا حاجة
وانهم بيخوفوا الناس وكل ما واحد يعطس وللا يسخن يجيله هلع ويروح المستشفى

متهيالي مافيش داعي للرعب ده حاسة انه رعب مصنوع



عبقرينو

انت بتقول ناخد احتياطاتنا
نون النسوة دي عايدة على مين
:D
على مصر؟
ههههههههههههههه
والله انت راجل طيب
طب ما احنا بناخد احتياطاتنا اهو وبنعذب مخاليق ربنا ونرميهم في الجير الحي احياء
عايز ايه اكتر من كده

وبعدين ايه الاحتياطات المطلوبة من المواطن العادي؟ احتياطات الهايجين العادية
ما تسملش وتبوس
لما ترجع البيت تغسل ايديك ووشك وياريت تاخد دش
وتغير هدومك وتغسلها

نضافة يعني

دونالد رامسفيلد حس اننا معفنين قال يخوفنا عشان نستحمى

جبهة التهييس الشعبية said...

اه ونسيت اقول لك حاجة يا عابر سبيل

يعني الغنى الفاحش والراحة المبالغ فيها في الحياة بتخلي الانسان قاسي ومفتري ومشاعرة متبلدة
و
happened
ان ده الحال في اوروبا والدول المتقدمة
لما اقول مثلا مثلا: الواد ده بارد وقلبه قاسي زي الخواجات
مثلا مثلا
هل انا باتهم الجنس الابيض بانه عرقيا مفتري؟
وللا بسبب الظروف الاجتماعية اللي في اوروبا والدول المتقدمة البني ادمين بقوا كده

مش الرسول عليه الصلاة والسلام سمى الغنى مطغي والفقر ملهي وتعوذ منهم الاتنين؟

مواطن مصري said...

بخصوص 11 سبتمبر بيقولك ان مبارك كلم بوش قبل الحادثة بيمومين اخبرة ان هتقع عمليات في امريكا

احمد سعيد said...

ايه ؟
يفعصوا اوباما ؟؟؟؟

ليه بس حرام عليكم

وبعدين هما يستجروا اصلا ؟؟؟

اوباما محدش هيلمس شعرة منه

دى مش محتاجه كلام يعنى

ويااااااااااااااااارب يكون حامل للفيرس

علشان يعدى اللى فى بالى

هو ومن معه

وحيث ان اللى فى بالى ومن معه لا يختلطون بالشعب مطلقا

فمافيش خوف من تسرب الفيرس

وبمجرد ما الشغل يخلص

والفيرس يفنش

هنقفل قصور ( الرياصه ) بجنزير
وقفل كبييييييييييييير

ونعلق عليها يافطه

مكتوب عليها :

مقابر جماعيه

mido said...

الايدز

الانفلونزا

فيروس سى

و غيرهم

امراض ملهاش علاج

-----------
h1n1

ملهاش علاج حتى الان
--------------
الفكرة فى طريقى انتقال المرض
----------------

المرض ده مشكلته فى الانتقال عن طريق الرذاذ

أسرع طريقة لأنتقال الامراض

مشكلته برده أن العلماء معندهومش فكرة كاملة او شبه كاملة عنه





علشان كده فيه خوف

mido said...

عمر طاهر راجع الدستور الاسبوعى تانى من الاربع الجاى فى رصف مصر

جبهة التهييس الشعبية said...

مواطن
يا راجل حرام عليك، هو مبارك ده عارف وين الله حطه على رأي الشوام؟

يعني السي اي ايه والاف بي اي مستنيين اذكى جهاز مخابرات يقول لهم ان فيه عملية ح تتعمل في امريكا؟


احمد سعيد

لا

لو الفيروس اتنقل للي بالي بالك
يتعمل فيهم زي ما بيتعمل في الخنازير الـ هأ مصابة


ميدو

بس يا ميدو العيل الصغير اللي نقل الفيروس للعالم خف وبقى زي القرد دلوقت
وفيه ناس بتخف

ايه بقى؟ حصلت ازاي دي؟

mido said...

سرور: طريقة إعدام الخنازير تتنافي مع مبادئ مصر ونائبة قبطية : قرار الإعدام قد تكون له أبعاد طائفية

mido said...

الواد ده خف لوحده لله فى لله

mido said...

ما انت عارفة برده لازم شركات الادوية تستغل الموقف

ده مفيهوش شك

سواء رامسيفلد او غيره

وكتير بيحصل اوبئة غادى

mido said...

و بعدين استنى بس

الرعب ده مش موجود غير فى مصر بس و حبة الدول العجيبة اللى شبهنا

ايه رأيك بقى ؟

احمد سعيد said...

نوارة

يارييييييييييييت

ونا متبرع بالملح والشبه والجير الحى من عندى

وكمان هاجيب ميه نار تركيز 98ونص فى الميه

يلا

موش خسارة

جبهة التهييس الشعبية said...

الكلام ده دلوقت يا ميدو
لكن اول ما ظهرت الحالة لو تفتكر
مافيا الصحة العالمية طلعت بيانات اعجب من الاعاجيب وقالت تلت البشرية ح يفنى
والانتحار الاورومبي قال مافيش مفر من موت مئات الالاف ان لم يكن الملايين
وبعدين فجأتن راحوا مطمنين الناس وفشوهم

ده زي حداشر سبتمبر
قعدوا يخوفوهم يخوفوهم لدرجة ان كان فيه خوف سائد في فرنسا على سبيل المثال لا الحصر ان صدام ح يكسب الحرب على امريكا
وهلع من اي حد اسمه اسامة
ويرفعوا لهم حالة الطوارئ لبرتقالي وبعدين يطلعوها للاحمر وبعدين ينزلوها للبرتقالي تاني لما جابوا لهم استبحس في دماغهم
وفجأتن
مافيش حاجة
مافيش خطر ومافيش ارهابيين ح يغزوا امريكا ويعملوها امارة اسلامية ولا بنسمع عن برتقالي ولا هافان دلوقت
وما بقيش من كل القصة اللوذعية دي غير الاسلامو فوبيا والعرب فوبيا وخلاص
زرعوا الخوف عشان يزرعوا الكراهية وبعدين شالوا الخوف وسابوا الكراهية
والحياة تسير

نفس الحكاية بالنسبة لانفلونزا الخنازير
زرعوا الخوف وبعدين قالوا اطمنوا اطمنوا له علاج وفيه ناس بتخف
بعد ما سعر التامي فلو غليت
وبيتباع هنا في مصر في السوق السودا وفيه ناس بتشتريه من غير ما يبقى عندها حاجة (مع انه المفروض انه موجود بس في مستشفيات الحميات مش في الصيدليات) بس بيتهرب دلوقت كأنه مخدرات والناس عمالة تاخد فيه زي المهابيش كأنه بونبوني

جبهة التهييس الشعبية said...

خف لله في الله؟

يا راجل ده انت دكتور
فيه حاجة في الدنيا اسمها كده؟

مى said...

أحدث مؤامرة بتتكشف اليومين دول

هيه مؤامرة






إغتيال الحريرى

اللى غيرت الخريطة السياسية اللبنانية فى الكام سنة اللى فاتوا



اللى حصل إن من حوالى إسبوعين

و على قناة روسيا اليوم

تحدث الصحفى وين مادسون المعروف بصلاته الواسعة داخل دوائر الاستخبارات الأمريكية

نقلاً عن الصحفى الشهير سيمون هيرش

عن إن
ديك البرابر و المشهور بديك تشينى

كان مسئول عن وحدة إسمها جناح الإغتيالات فى ال سى أى إيه

و هيه اللى إغتالت رفيق الحريرى

و من قبله إيلى حبيقة فى ال
2002


فاكرينه
؟؟

أيوة الراجل اللى بلجيكا طلبته للشهادة الخاصة بمذابح صبرا و شتيلا

باعتباره كان مسئول الأمن فى حزب الكتائب اللبنانى اللى نسق مع شارون للقيام بالمذبحة

السؤال بأه

نفهم إن تشينى يقتل الحريرى

و كمان يمشى فى جنازته و يعيييييييط
!!
و كمااان
ينصبوا محكمة دولية ما أن تنعقد و تباشر مهامها حتى تنحل

مرة لإنها غير نزيهة و مرة لإنكشاف فضائحها و مرة لكشفها لفضائح


لكن إيه اللى يخليى تشينى يقتل حبيقة
!!
لإن إذا كان حد يهمه قتل حبيقة

فهوه شارون و بس

إلا إذا كان السوبر بور الأمريكانى هانت عليه نفسه و بقى يشتغل

قاتل مأجور عند الصهاينة

جبهة التهييس الشعبية said...

اممممممم

ده كلام واعر جوي
الغريب ان كل الاطراف ناس بتشتغل في البزنس
وانت عارفة انه اذا دخل البزنس من الشباك هربت الاخلاق من الباب
الديك الشركسي بزنس مان كبير
وكذلك الحريري القتيل
وابن الحريري "الشيخ" سعد اللي عامل ضوافره بادكير
وماحدش يقول لي ان ابن الحريري مقتنع ان سوريا هي اللي قتلت ابوه
لو غبي ما كانش عرف يعمل الفلوس دي كلها ويضحك على الناس ويسمي نفسه الشيخ
ولما واحد يبقى عارف القاتل الحقيقي لابوه ويصر انه يلبسها لحد تاني عشان مصالح البزنس بتقول كده
يبقى في يوم من الايام رؤوس البزنس الكبار لازم يترموا في الجير الحي

مى said...

على فكرة حكاية إن الحريرى الصغير ميهموش يعرف قاتل أبوه


مشيها كده
مش حنقول عارف القاتل


ديه كانت معروفة

من أيام الجاسوس السورى المزدوج

هسام طاهر هسام
فكراه
؟؟

الراجل ده مش قال فى المؤتمر الصحفى اللى عقده فى سوريا بعد هروبهمن لبنان

إن إبن الحريرى و عبر وسطاء عرض عليه إنه يشهد شهادة زور

يعنى سعد الحريرى لو كان يهمه فعلاً معرفة القاتل مكنش يحاول يزور فى التحقيق

إنما الهدف و كما إتضح بعد كده

فوز فريق 14 آذار
و ده حصل


الخروج السورى من لبنان
و برضة حصل


النيل من سلاح حزب الله و هو الأهم

و الحمد محصلش و إن شاء الله ميحصلش أبداً

مى said...

لقيتلك مقالة لمالك التريكى بتتكلم عن الحديث بتاع وين مادسن فى القناة الروسية


http://www.moheet.com/show_files.aspx?fid=257158

مهندس حر said...

مى
--
مش عارف ليه تكبرى الحكاية و تقولى قتلة مأجورين و حاجات من دى..

يعنى لما أمريكا إستخدمت حق الفيو مش عارف كام مرة لمنع إدانة مجلس الأمن لإسرائيل لإنتهاكها القوانين و الأعراف الدولية فى كذا و كذا و كذا.. و لما أمريكا بتضغط على وكالات دولية و على رأسها الأمم المتحدة عشان تعيد صياغة تقارير عن أحداث شافها العالم كله فى لبنان 2006 و فى غزة 2009 و قبل و بعد كده و كل ده عشان التقارير دى ما يبقاش فيها إدانة صريحة لإسرائيل أو تنفع أدلة لرفع قضايا جرائم حرب ضد قادة عسكريين و مدنيين إسرائيليين..

عمر أمريكا خدت أجر على الكلام ده و غيره.. ده بتدفع معونة سنوية لإسرائيل و السنة دى و فى عز الأزمة رفعتها 10%..

إنتى مش قريتى وثيقة تفكيك إسرائيل .. مش قالك إن إسرائيل ليست دولة ذات سيادة بل مستعمرة أمريكية.. يبقى ها ياخدوا منهم فلوس عشان يصفولهم راجل خايفين يهلفط بكلام مش لطيف؟؟

mido said...

الواد ادجر هيرناندير _خمس سنين_ اول اصابة بالمرض خف لوحده بعد كام يوم

mido said...
This comment has been removed by the author.
جبهة التهييس الشعبية said...

ميدو
خف لوحده دي كلمة تقولها واحدة فلاحة زيي
لكن انت دكتور
قول لي خف لوحده ازاي؟
واحدة جاهلة زي ح تقول لك ربنا سترها مع امه عشان عالم بيها غلبانة
انت طبيب تقول لي حصلت ازاي دي؟

مى said...

مهندس حـــر

طبعاً عندك حق

بس المفروض إن أمريكا ديه زى المافيا كده

فميصحش تلوث إيديها
"بتعبيرهم فى عالم الإجرام"

بقتل فرفور صغير

تسيب الحاجات ديه للأطفال المجرمين الصوغانين

ده حتى كده يبقى شكلها وحش قدام السفاحين

mido said...

أصل الكلام الطبي ده صعب و انت فلاحة طيبة مش حتستوعبي الشرح من هنا لبكرة :p

مى said...

إيه يا نونة

مالك ماسكة فى ميدو و عمالة تحلفيه كده


بصى يا ستى

هما قالوا إن بفحص الخريطة الجينية لفيرس أنفلوانزا الخنازير

لقوا إنه ضعيف
و لا يصيب الرئة
و يمكن الشفاء منه إذا تم إكتشافه مبكراً
بالمضادات الحيوية المعروفة

مش لازم عقار النصب

و الكلام ده
د. وجدى السواحل خبير الوراثة الميكروبية قاله فى برنامج
الإتجاه المشاكس

يبقى سهل يعن الولد يخف من غير تامى راميسفيلد

دودو said...

مى
احنا عاوزين نفكر مع بعض اية اللى يخلىالسوبر بور الأمريكانى
يشتغل قاتل ماجور عند الصهاينة
السبب الاول انة يكون مقتنع بالفكر الصهيونى اكتر منهم هما شخصيا ودى اشك فيها لان احنا قلنا انة بزنس مان
يعنى المصلحة فوق كل القناعات يبقى هى المصلحة ***بس اية هى المصلحة او المنفعة القوية جدا لدرجة انهم ينفذوا اغتيالات لصالح اسرائيل

نوارة انا معاكى لاخر الخط فى حكاية نظرية المؤامرة
مش فىانفلونزا الخنازير بس
لافى كل حاجة بتحصل واحنا مش لاقيين لها تفسير منطقى

اما بالنسبة للشيخ سعد
فانا مش شايفة انة ذكى ولاحاجة انا شيفاة زى اللعبة بتحركها السعودية كما تشاء
ولايتمتع باى ملمح من ملامح الذكاء
بس هو اليومين دول متغير شوية ***بقى يعرف يقول جملة كاملة من غير ما يتهتهة
شكلة عاش الدور انة زعيم بجد

مهندس حر said...

مالك يا بنتى إنتى ماسكة فى الراجل كده ليه؟..

بصى بقه.. بصفتى مهندس و بكتب روشتات زى الزميلة صاحبتك أنا أقولك..

أصلا الإصابات الفيروسية تعتبر كلها بتخف لوحدها.. يعنى ما فيش أصلا علاج بيخش يجيب الفيروس من قفاه و يرميه بره..

الجهاز المناعى هوه اللى بيقضى على الفيروس.. دور المضادات الحيوية مثلا هو تنشيط الجهاز المناعى و تحفيزه لإنتاج أجسام مضادة ملائمة أكثر للتعامل مع الفيروس.. الأمصال مثلا بتخلق هجوم فيروسى وهمى لتحفيز الجهاز المناعى لخلق أجسام مضادة متخصصة فى التعامل مع تركيب فيروس معين .. قوم لما الفيروس الحقيقى يهاجم الجسم الجهاز المناعى يعيد إنتاج الأجسام المضادة دى و يقضى عليه..

معظم العلاج اللى مريض بياخده بيعالج الآثار الجانبية زى إرتفاع درجة الحرارة و غيرها..

ينفع بقى حد يخف لوحده؟ آه طبعا.. لو جهازه المناعى بحالة جيدة و الفيروس اللى أصيب بيه مش مفترى زيادة يبقى ممكن الجهاز المناعى يقضى على الفيروس بدون الحاجة لأى علاج..

مواطن مصري said...

انا بجد موضوع نظريات المؤامرة دة انان مش مقتنع بية بتاتاً


مش الحرب خلصت خلاص طيب ما يكون فية جيش نظامي في لبنان و مقاتلين حزب الله يبقو في الجيش لبنانين


لية كل فريق في لبنان معاة سلاح دويلات

دولة شيعية و مسيحية

لية بنشجع الانقسات الطائفية و حزب الله لية اخطاء و كل فريق لية اخطاء

الحرب خلصت و حزب الله قال مليش دعوى ب الصواريخ الي انضربت و مش هيقدر يعمل حاجة بعد كدة

بعد ما مضى على قرار 1701

لية منشجع على دولة لكل اللبنانين

و جيش نظامي يدافع على كل اللبناين مش سلاح لدفاع عن الشيعة بس و سلاح يدافع عن المسيحين بس

يا ريت نبطل تقديس الاحزاب و الاشخاص انهم فوق البشر و ملهومش اخطاء

كلنا خطائين
و الشعب اللبناني بيعاني من انانية كل فريق بسبب الطائفية

حرام بجد

mido said...

هو الولد جاتله حمى و صداع و ووجع فى عينه

اخدوه على العياده

اخد مضادات حيوية

خف بعد يومين

--

بعد كده الدكاترة راحوا القرية بتاعته و اخد عينات عشوائية من الناس

لقوا الولد (كان)

positive

لما اخدوا

mucous sample

على الرغم انه اتعالج من أعراض مرض غير انفلونزا الخنازير

مواطن مصري said...

اسف امسحي التعليق بتاع شوفي دة

بدلا ما اعمل كوبي و بيست لنك خبر عملت كوبي و بيست لينك المدونة

http://www.youm7.com/News.asp?NewsID=100325

بدراوى said...

أوباما يوجه خطابه للعالم الإسلامى من جامعة القاهرة

http://www.youm7.com/News.asp?NewsID=100479

-------
عدلى حسين: خنازير مصر "مقرفة" وتستحق الإعدام

http://www.youm7.com/News.asp?NewsID=100324

جبهة التهييس الشعبية said...

ايوة يا مي
على الاقل مش غبي
يعني عنده كومون سنس يخليه يعرف مين اللي قتل ابوه

جبهة التهييس الشعبية said...

والله ما حد مقرف غير عدلي حسين نفسه

مهندس حر said...

مواطن مصرى
----------
الوضع فى لبنان مكلكع كلكعة تستعصى على أفهام الجميع.. و اللى ينفع فى أى حتة فى العالم ممكن ييجى على لبنان و ما ينفعش..

الطريقة الوحيدة للحكم على فريق لبنانى بشكل تقريبى هوه إنك تشوف مين ضده و مين معاه بره لبنان..

يعنى الشيخ الحريرى و الشيخ أمين الجميل و الحاج البركة الفبلسوف جعجع دول معاهم أمريكا و السعودية و إسرائيل بقلبها.. و مصر الرسمية يعنى على قد ما تقدر..

يبقى فى ظنك كده دول ناس محل ثقة .. قوم الواحد يخش فى شراكة معاهم لبسط سيادة الدولة و إعادة بناء الجيش إلخ إلخ..

سيبك من القصة لأن أهل مكة أدرى بشعابها و اللى إيده فى المية مش زى اللى إيده فى مية النار..

mido said...

@نوارة

@بدراوى



عدلى حسين مقلش على الخنازير

مقرفة

قال على حظائر الخنازير

لكن

اليوم الساقع

لعب فى كلامه

على العموم الموضوع كله بقى قرف فى قرف

مى said...

دودو هنا يا مرحبا يا مرحبا


بس اية هى المصلحة او المنفعة القوية جدا لدرجة انهم ينفذوا اغتيالات لصالح اسرائيل


ما هوه ده السؤال يا دوده اللى بسأله



نوارة انا معاكى لاخر الخط فى حكاية نظرية المؤامرة


فعلاً ..و بنكررها

من المؤامرة ألا نؤمن بنظرية المؤامرة



سعد الحريرى
بقى يعرف يقول جملة كاملة من غير ما يتهتهة
شكلة عاش الدور انة زعيم بجد


دوده .. صحيح بقى يعرف يكلم

ما شاء الله ما شاء الله

متأكدة إنهم مكنوش مركبينله سماعة ودان

مى said...

مواااااااااطن

يا ريت نبطل ""تقديس"" الاحزاب و الاشخاص انهم فوق البشر و ملهومش اخطاء



إيه بقى حكاية

تقدددددددددددديس

اللى كل شوية تطلع ديه

إنت شايف الناس اللى هنا حطه سجادة الصلاة و عماله تسجد لكل من هب و دب

!!
!!

بهجت الاباصيري said...

لتفسيرها نسير تبعاً

لنظرية


إن كان الأمر غير طبيعياً

فابحث عن المستفيد
ــــــــــــــــــــــــــــــ
عجبتني قوي النظرية دي ........ دا انجليزي دا يامرسي

عموما انا عندي شوية نظريات ممكن تفسر المؤامرة علي نسق النظرية السابقة
- فتش عن المرأة
- انا افكر اذن انا محظوظ
- انا اشك اذن انا دبوس
- انا اهرتل اذن مسطول
- انا ازغرط اذن انا مبسوط
واخيرا .... النظرية الوجودية المتناغمة ما مرحلة ما بعد الحداثة ...... انا مش عارفني انا مش انا للوجودي الشهير الكونت عبد الباسط حمودة

ودلوقتي بس عرفت القرد كان بيتنطط ليه يا دكتوووووووووووووور

عابر سبيل said...

شوفى يا سيدتى .... اللى بيحصل فى بلاد المسلمين سببه ابتعاد الناس عن الإسلام الصحيح فميصحش أنسب التصرفات الغلط للإسلام ... وبعدين مش صحيح إن القهر والظلم يولد النصب والإنحراف والدليل على كده المسلمين الأوائل فى مكة ، هل فيه حد اتظلم زيهم؟ اتسرقت أراضيهم وبيوتهم وأملاكهم واتعذبوا ، وأما خرجوا من البلد للهجرة محدش نصب على كفار قريش وسرق منه حاجة وهوا ماشى .... الرسول عليه الصلاة والسلام لف على بيوت الناس اللى سايبين عنده ودايع وسابهالهم
يعنى النظرية مش صحيحة ، اللى دينه سليم لا يقبل التعدى على الآخرين ولا يقبل النصب
كل رجائى إننا مانزجش بالإسلام فيما ليس له به علاقة ، احنا من كتر ما بقينا بنعمل كده بقينا نسمى أى متطرف بالإسلامى ودى حاجة لا تليق ..... وعلى رأى مواطن مصرى اللى دايما يجمع الإسلاميين والظلاميين فى أى جملة مفيدة

مهندس حر said...

قيل فى برنامج بلدنا.. أن مفيد شهاب صرح أمام جلسة مجلس الشعب بأن العادلى قاله إن أجهزة البحث بوزارة الداخلية قد توصلت إلى مرتكبى حادث الحسين و أنها خلية إرهابية تضم مصريين إضافة إلى جنسيات أخرى..

و نحن نشكر الأمن على مجهوداته و نحب نقوله الكيف مناولة مش مقاولة.. سالخييييييييير....

مى said...

مهندس حـــر

كده ممكن يبقى فيها زعلة

فيه واحد مشى من جنبيك

معفرناش نقدسه



و إنت يا ميدو

تخلص الإمتحانات و تيجيي تقدس معانل على طووووووول

يا جماعة لازم نتحد و نقدسسسسس

مواطن مصري said...

يا مي مانتي ماسكة حماسة انهم مش بيغلطو و عمرهم ما غلطو و ان قادة حماس فوق البشر و حزب الله نفس الحكاية و اي واحد مختلف مع حزب الله و حماس يبقى على طول خاين و عميل يا سلام

مش دة يبقلى تقديس لزعيم و جعلة نصف الة

لا يخطء ابداً

معن ان حزب الله و حماس ليهم اخطاء و اخطاء حماس كثيرة و كل فريق في لبنان لية انجازات و لية اخطاء

انما عمر ما هنقول مثلا على فريق امل انوو مغلطش مع ان لية اخطاء و لية انجازات

يا ريت نبطل فكرة اننا نتهم اي حد معارض لحزب معين انو عميل

لان لو رافضة ان حد يقول على حزب الله عميل ل ايران يبقى متقوليش على حد انو عميل ل اسرائيل

مى said...

مواطن

حد قال إن حماس و حزب الله مبيغلطوش

؟؟

حتى صحابة رسول الله صلى الله عليه و سلم كان ليهم أخطاء

الرسول المصوم نفسه عاتبه ربه حين لم يعط لعبد الله إبن أم مكتوم حقه فى الإهتمام

و نزلت سورة "عبس" بخصوص هذا الأمر





و برضه محدش إتهم المعارضين بالخيانة

إحنا ممكن ننتقد مواقف و تصرفات

لكن لا يحق لنا إصدار الأحكام

أرجو أن يكون قد إتضح هذا الأمر







أباصيرى

عثل عثل النظريات الللى إنت كاتبها

أرجو أن تحصل على براءة إختراعها خوفاً من النشل

مهندس حر said...

يا مواطن يا بنى..

أنا راضى ذمتك.. حد قال كلمة عميل هنا؟؟

يعنى إنت قلت إن حماس و حزب الله ليهم أخطاء.. ما حدش علق على رأيك ده.. أنا شخصيا علقت على حكاية إن الحرب خلصت و ليه مقاتلى حزب الله ما يندمجوش فى الجيش اللبنانى و الكلام ده..

بص .. سيبك من حكاية التقديس و التخوين و الحاجات دى.. إنت لما بتتكلم فى أى حاجة تانية بتقول كلام زى الفل..

لو عندك وقت إقرا البوست ده عندى هاتلاقى إنى بقول نفس كلامك بس بشكل مختلف و فهم مختلف للأمور:
http://egysoothsayer.blogspot.com/2009/05/blog-post_05.html

lastcrazyboys said...

انا كنت ناوي انسى الموضوع ده ولكن نظرية المؤامرة عمالة تلاحقني

وراءك يا ولدي..يا ولدي

=================
رامسفيلد - وزير دفاع بوش..هكذا كان يستخدم مقاطع دينية..ارضاءا له




كشف تقرير صحافي أن وزير الدفاع الأميركي السابق دونالد رامسفيلد استخدم مقاطع من الإنجيل والتوراة في وثائق استخباراتية في البيت الأبيض لإرضاء الرئيس جورج بوش المعروف بتدينه.
وقالت مجلة «ج كيو» إن رامسفيلد أرفق صورا للقوات الأميركية في العراق بهذه المقاطع رغم التأثير السلبي لهذه الصور على العالم الإسلامي في حال نشرها.
وصدرت على صفحة «ج كيو» الإلكترونية صورة دبابة أميركية في الصحراء التقطت في الحادي والثلاثين من مارس (آذار) 2003، بعد 10 أيام على دخول القوات الأميركية إلى العراق وإسقاط نظام صدام حسين. وجاءت النصوص من الكتاب المقدّس (العهد القديم والجديد لدى المسيحيين) وضعها رامسفيلد،، كشعارات على أغلفة تقارير استخباراتية عسكرية سرية للغاية أعدها أثناء الحرب على العراق ليقدمها للرئيس السابق بوش. وعلى موقعها الإلكتروني، وضعت مجلة «جي كيو» الأميركية صورا لتلك الأغلفة وقد عُنون كل غلاف منها بنص من الكتاب المقدس».
وكتب رامسفيلد فوق الصورة مقطعا من إحدى الرسائل الواردة في الإنجيل تقول «من أجل ذلك احملوا سلاح الله الكامل لكي تقدروا أن تقاوموا في اليوم الشرير». ووصف روبرت درايبر، مؤلف كتاب «ديد سرتن» عن الرئيس الأميركي بوش، إحباط المسؤولين السابقين وغضبهم تجاه سياسة رامسفيلد هذه. وقال درايبر إن المقاطع ظهرت على الصفحات الأولى لتقارير استخباراتية وضعها البنتاغون خصيصا للرئيس. وكان رامسفيلد يسلم هذه التقارير بيده إلى البيت الأبيض لحساسيتها. ولاحظ درايبر أن رامسفيلد، وخلافا لبوش، لم يكن ملتزما دينيا، وقال إن فكرة استخدام المقاطع الدينية تعود لمدير استخبارات يعمل في البنتاغون. وأشار إلى أن «خلط التقارير الاستخباراتية بالاستعارات الدينية حمل توقيع رجل واحد هو دونالد رامسفيلد )).


http://www.amazon.com/reader/0743277287?%5Fencoding=UTF8&ref%5F=sib%5Fdp%5Fpt

=======
يعني الراجل ده مابيلعبش
اينما تكون المصلحة ينبش اظافره

انا حاسس ان الراجل ده فيه عرق منـوفي يا جدعاااان