الهي ينشكوا في جنابهم واحد واحد

اذا كان اوباما وللا اللي قاعدين على ماي سبيس، انا ورايا واجب اعمله وفاضل اسبوع واسلمه، ايه اللي مصيعني على النت؟

وايه اللي بيخليني ارد على تليفونات مينا زكري؟ ليه يتصل بيا ويقول لي ان العاصمة الاسلامية اللي اوباما ح يخاطب العالم الاسلامي منها هي القاهرة؟ ليه؟

طب على فكرة بقى، احنا لازم ندي عوكل حقه، الراجل ده كان بار بامه، وماتت وهي بتدعي له، والدعوة جات على دماغنا احنا

يديلك الصحة وطولة العمر ويخبز لك العيش يابني ويطوي لك الارض طي وينصرك على مين يعاديك

طب ليه كده يا شباب؟ ليه؟ ليه نعاديه؟ طب ما كان يقول لنا ان الحاجة دعت له الدعوة دي كنا اتقينا شره، ده ولا في الاحلام، ربنا فاتحها في وشه حتة دين فتحة، بس وهي بتتفتح نزلت على دماغنا فتحتها

ده كل الادارات من اول ريجان لحد بوش كوم (تصدقوا مر عليه كل دول) ودعم اوباما اللي يا اخويا مش عارفة العالم كله متعلق في رقبته ليه كوم تاني وماحدش يقول ده زي اللي قبله، لا، انا مقتنعة تماما براي الفيلم

the Obama deception

ان اوباما اخطر من كل اللي سبقوه

وسونة بقى ح يشوف نفسه علينا وح يبقى نهارنا مدوحس، الله يرحمك يا حاجة،

ومدام ماتت وقلبها راضي عنه يبقى نولع احنا بجاز وسخ

------

على ماي سبيس بقى، وقع في ايدي واحد ايراني عايش في ايران وبيكره احمدي نجاد، او على رأي مذيعة النايل الفرنساوي: احمد الدين جاد (قالتها على الهوا ولما المخرج بعد الحلقة صلحها قالت له: لا ماهم الايرانيين دول كل حاجة عندهم دين دين، حتى الرئيس بتاعهم اسمه احمد الدين ... هو فيه حاجة اسمها احمد الدين، فطبعا اسقط في يد المخرج وبقت من هنا وجاي تقول احمد الدين جاد والناس بتتقي شر مناقشة الموضوع ده معاها) انا بقى عايزة اعرف هو ليه بيكره احمد الدين جاد قوي كده، خصوصا ان مالك بيكرهه وانا مش فاهمة ليه؟

مش فاهمة ليه لسبب بسيط، ان احمد الدين جاد ده اقصى مدة ليه كمان اربع سنين وبعد كده مش ح يشوف الرئاسة طول عمره، ماهواش كسرى يعني، وواضح ان الحاجة ما كانتش داعية له من قلبها زي ناس، وبقاله اربع سنين في الرئاسة ما عملش حاجة غير الكلام، يعني لا عمل حرب، ولا اي حاجة، ولو كانت سياساته الداخلية وحشة، اهم الايرانيين اكيد اكيد مش ح ينتخبوه تاني بقى، صح؟ اقصد يعني هو لو شرير ح يبقى شره مش مستطير ولا حاجة، مش زي بوش اللي خاض حربين، ولا زي اللي امه داعية له وداعية علينا قاعد الى ابد الابدين

وقلت للواد الكلمتين دول، الاقي لك الواد بيكلمني كأني خيشة مسح حمامات معفنة، قرفان مني قرف الدنيا والاخرة وكل شوية يقول لي ماهو طبيعي، ما انت اكيد مخك ما بيشتغلش ده لو كان عندك مخ، مع اني وربنا ما قلت له اي حاجة تزعله

قوم قلبتها في دماغي وقلت، ليكون المضروب في مصارينه من حركة الفارسية الجديدة ومحتقرني عشان عربية

قمت عملت حركة قذرة شوية، قذرة كتير، في نص الكلام قلت له انا جدي ايراني

طبعا ما فسرتش قوي عشان ما اتفقسش، واخدت كوبي بيست من جملة ايراني قال يعني باحرجه في نفسه

قوم الواد قلب مية وتمانين درجة واتعدل معايا وشرح لي ليه هو بيكره احمد الدين جاد وكل الملالي

اسمعوا الدرر بقى:

بقى قال ايه، مسمي الملالي دول العرب، اي وربنا، دول العرب اللي بيحكمونا بحكم العرب وبيصرفوا فلوسنا عليهم وعشان كده كل العرب بيدعموهم :) (شوف النباهة ده اللي بيقول على الفرس اذكيا والعرب هم اللي اغبيا؟) واحمدي نجاد عايز يساوينا بالعرب ويعملنا راسنا براسهم، مع اننا لينا حضارة قديمة لكن هم ما اتسمعلهمش حس غير بعد الاسلام، وحتى كمان بوظوه

واحمدي نجاد فقرنا

احنا عندنا (شوف حالتهم اللي تقطع القلب) 18 في المية فقر!!!! وعشان هو عربي هو والملالي بتوعه بيعادي اسرائيل وامريكا لجل عيون العرب اللي من الف وربعميت سنة جم اغتصبوا نسوانا

(وانا اقول ياربي الاجانب جايبين منين حكاية المسلمين بيحبوا الاغتصاب دي)

(قلت في عقل بالي يا بت ينكن يكون زرادشت وزعلان على نفسه، حقه، ما خلاش عقل بالي يكمل وراح قايل لي)

وانا شيعي ومش ممكن اقبل تفسير الملالي للمذهب الشيعي اللي بوظ المذهب الشيعي وبيقبل مذهب السنة وبيقول عليهم زيهم زينا مسلمين، والملالي دول بيقولوا على نفسهم شيعة وهم كدابين وواخدين البلد كلها وراهم

وللاسف احمدي نجاد ح ينجح في الانتخابات الجاية حملته قوية وشعبيته عمالة تزيد وناس كتير مقتنعة ان ماحدش ح يحمي ايران غيره ودي كارثة بالنسبة لي انا شخصيا عشان كنت عامل مشروع وهم ما وافقوش عليه، ده معناه حكم العرب تاني، العرب ضحكوا علينا من الف وربعميت سنة ورجعوا ضحكوا علينا من تلاتين سنة وبيساعدوا اللبنانيين العرب

وانت المفروض تبقى فخورة بدمك الايراني اكتر من كده، انا مش باقول ان كل العرب اغبيا، فيه منهم ناس معقولين عشان بس ما تقوليش عليا عنصري، احنا بنعمل في الجامعة مظاهرات كل يوم وبنحاول، بس للاسف هو ح ينجح ح ينجح عااااااااااااااااااا

!!!!!!!!!!!!!!!!!!!!!!!

لا اقول عليك عنصري؟ فشر، ماعاش السادات اللي يقول عليك كده، وهم مسيبينك يا حبيبي كده مش مجوزينك هنومة يا قناوي يابني ليه؟ ده لو جابوك عندنا ح نلبسك بدلة الفرح يا قناوي (طبعا الكلام ده كله قلته.... في قلبي، ربنا رب قلوب، وانا ماليش مزاج اتهزأ اكتر من كده) 

قام دخل واد امريكاني على الخط وقال: اه شكله عربي فعلا، عامل زي الكناسين

وواحد تاني راح قايل (امريكاني طبعا وحاطط صورة زومبي): انا باقول احنا نرمي على المسلمين قنبلة نووية او ذرية ونخلص المشكلة

وواحدة اسرائيلية (الاسرائيليين بيتعاملوا معايا على اساس اني مسكينة ومضللة وهم اللي ح يهدوني عشان هم طبعا غير بقية البشر) بعتت لي على البرايفيت تقول لي ان احمدي نجاد ماسوني 

 انا ايه اللي وداني ماي سبيس؟ ده مستشفى مجانين: انا الاكسسسسسسس

اكس عليك

تووووووت تشك تشك تشك

وما بيتكلموش غير في حاجتين: ازاي يرموا قنبلة نووية على العرب وازاي يخلصوا من احمد الدين جاد اللي طلع عربي وسنة وماسوني وزي هتلر (اه والله مسمينه هتلر الجديد) ودي اضافة جديدة تقدر السعودية تضيفها الى جانب انه شيعي وصفوي ومجوسي

انا برضه مش فاهمة، هو الراجل ده انا شايفاه عادي يعني، رئيس يعني واخد اربع سنين وح ياخد اربع سنين تانيين لو نجح زي ما الواحد الايراني ده عمال يولول وخلاص، ايه تمن سنين في عمر الدنيا يعني؟ ثم ان فيه برلمان وفيه مرشد وفيه مجلس للمرشد ده وعندهم عشرميت مجلس بيتخذ القرارات، فيه ايه؟ معمول منه قصة كبيرة ليه؟ ده واخد اهمية في حياتهم اكتر من شافيز نفسه وبيتكلموا عليه اكتر ما بيتكلموا على اوباما

بالمناسبة بطلوا يجيبوا سيرة اوباما خلاص، دلوقت فيه عدد لا بأس به خايف من المسلمين ليغتصبوا ستاتهم لما ينتصروا عليهم في الحرب الجاية،  اه اه، حاطين الاحتمال ده وارد ومقتنعين انه ممكن يحصل، شالله اشوفهم دكاترة يارب، ايه حسن الظن بينا ده، ربنا يجبر خاطرهم والله، قال احنا ماشيين نقول يا حيطة داريني وهم خايفين من الجحافل الاسلامية لتغتصب نسوانهم، ده نص الرجالة قطع الخلف من التلوث والنص التاني قطع الخلف من القنابل، بس طبعا ح اقول لهم كده؟ مش معقولة يعني

طب اوعوا يا عيال بقى لما ننتصر حد يقل عقله ويغتصب شارون ستون.... كبرت خلاص