Sunday 10 May 2009

الهي ينشكوا في جنابهم واحد واحد

اذا كان اوباما وللا اللي قاعدين على ماي سبيس، انا ورايا واجب اعمله وفاضل اسبوع واسلمه، ايه اللي مصيعني على النت؟
وايه اللي بيخليني ارد على تليفونات مينا زكري؟ ليه يتصل بيا ويقول لي ان العاصمة الاسلامية اللي اوباما ح يخاطب العالم الاسلامي منها هي القاهرة؟ ليه؟
طب على فكرة بقى، احنا لازم ندي عوكل حقه، الراجل ده كان بار بامه، وماتت وهي بتدعي له، والدعوة جات على دماغنا احنا
يديلك الصحة وطولة العمر ويخبز لك العيش يابني ويطوي لك الارض طي وينصرك على مين يعاديك
طب ليه كده يا شباب؟ ليه؟ ليه نعاديه؟ طب ما كان يقول لنا ان الحاجة دعت له الدعوة دي كنا اتقينا شره، ده ولا في الاحلام، ربنا فاتحها في وشه حتة دين فتحة، بس وهي بتتفتح نزلت على دماغنا فتحتها
ده كل الادارات من اول ريجان لحد بوش كوم (تصدقوا مر عليه كل دول) ودعم اوباما اللي يا اخويا مش عارفة العالم كله متعلق في رقبته ليه كوم تاني وماحدش يقول ده زي اللي قبله، لا، انا مقتنعة تماما براي الفيلم
ان اوباما اخطر من كل اللي سبقوه
وسونة بقى ح يشوف نفسه علينا وح يبقى نهارنا مدوحس، الله يرحمك يا حاجة،
ومدام ماتت وقلبها راضي عنه يبقى نولع احنا بجاز وسخ
------
على ماي سبيس بقى، وقع في ايدي واحد ايراني عايش في ايران وبيكره احمدي نجاد، او على رأي مذيعة النايل الفرنساوي: احمد الدين جاد (قالتها على الهوا ولما المخرج بعد الحلقة صلحها قالت له: لا ماهم الايرانيين دول كل حاجة عندهم دين دين، حتى الرئيس بتاعهم اسمه احمد الدين ... هو فيه حاجة اسمها احمد الدين، فطبعا اسقط في يد المخرج وبقت من هنا وجاي تقول احمد الدين جاد والناس بتتقي شر مناقشة الموضوع ده معاها) انا بقى عايزة اعرف هو ليه بيكره احمد الدين جاد قوي كده، خصوصا ان مالك بيكرهه وانا مش فاهمة ليه؟
مش فاهمة ليه لسبب بسيط، ان احمد الدين جاد ده اقصى مدة ليه كمان اربع سنين وبعد كده مش ح يشوف الرئاسة طول عمره، ماهواش كسرى يعني، وواضح ان الحاجة ما كانتش داعية له من قلبها زي ناس، وبقاله اربع سنين في الرئاسة ما عملش حاجة غير الكلام، يعني لا عمل حرب، ولا اي حاجة، ولو كانت سياساته الداخلية وحشة، اهم الايرانيين اكيد اكيد مش ح ينتخبوه تاني بقى، صح؟ اقصد يعني هو لو شرير ح يبقى شره مش مستطير ولا حاجة، مش زي بوش اللي خاض حربين، ولا زي اللي امه داعية له وداعية علينا قاعد الى ابد الابدين
وقلت للواد الكلمتين دول، الاقي لك الواد بيكلمني كأني خيشة مسح حمامات معفنة، قرفان مني قرف الدنيا والاخرة وكل شوية يقول لي ماهو طبيعي، ما انت اكيد مخك ما بيشتغلش ده لو كان عندك مخ، مع اني وربنا ما قلت له اي حاجة تزعله
قوم قلبتها في دماغي وقلت، ليكون المضروب في مصارينه من حركة الفارسية الجديدة ومحتقرني عشان عربية
قمت عملت حركة قذرة شوية، قذرة كتير، في نص الكلام قلت له انا جدي ايراني
طبعا ما فسرتش قوي عشان ما اتفقسش، واخدت كوبي بيست من جملة ايراني قال يعني باحرجه في نفسه
قوم الواد قلب مية وتمانين درجة واتعدل معايا وشرح لي ليه هو بيكره احمد الدين جاد وكل الملالي
اسمعوا الدرر بقى:
بقى قال ايه، مسمي الملالي دول العرب، اي وربنا، دول العرب اللي بيحكمونا بحكم العرب وبيصرفوا فلوسنا عليهم وعشان كده كل العرب بيدعموهم :) (شوف النباهة ده اللي بيقول على الفرس اذكيا والعرب هم اللي اغبيا؟) واحمدي نجاد عايز يساوينا بالعرب ويعملنا راسنا براسهم، مع اننا لينا حضارة قديمة لكن هم ما اتسمعلهمش حس غير بعد الاسلام، وحتى كمان بوظوه
واحمدي نجاد فقرنا
احنا عندنا (شوف حالتهم اللي تقطع القلب) 18 في المية فقر!!!! وعشان هو عربي هو والملالي بتوعه بيعادي اسرائيل وامريكا لجل عيون العرب اللي من الف وربعميت سنة جم اغتصبوا نسوانا
(وانا اقول ياربي الاجانب جايبين منين حكاية المسلمين بيحبوا الاغتصاب دي)
(قلت في عقل بالي يا بت ينكن يكون زرادشت وزعلان على نفسه، حقه، ما خلاش عقل بالي يكمل وراح قايل لي)
وانا شيعي ومش ممكن اقبل تفسير الملالي للمذهب الشيعي اللي بوظ المذهب الشيعي وبيقبل مذهب السنة وبيقول عليهم زيهم زينا مسلمين، والملالي دول بيقولوا على نفسهم شيعة وهم كدابين وواخدين البلد كلها وراهم
وللاسف احمدي نجاد ح ينجح في الانتخابات الجاية حملته قوية وشعبيته عمالة تزيد وناس كتير مقتنعة ان ماحدش ح يحمي ايران غيره ودي كارثة بالنسبة لي انا شخصيا عشان كنت عامل مشروع وهم ما وافقوش عليه، ده معناه حكم العرب تاني، العرب ضحكوا علينا من الف وربعميت سنة ورجعوا ضحكوا علينا من تلاتين سنة وبيساعدوا اللبنانيين العرب
وانت المفروض تبقى فخورة بدمك الايراني اكتر من كده، انا مش باقول ان كل العرب اغبيا، فيه منهم ناس معقولين عشان بس ما تقوليش عليا عنصري، احنا بنعمل في الجامعة مظاهرات كل يوم وبنحاول، بس للاسف هو ح ينجح ح ينجح عااااااااااااااااااا
!!!!!!!!!!!!!!!!!!!!!!!
لا اقول عليك عنصري؟ فشر، ماعاش السادات اللي يقول عليك كده، وهم مسيبينك يا حبيبي كده مش مجوزينك هنومة يا قناوي يابني ليه؟ ده لو جابوك عندنا ح نلبسك بدلة الفرح يا قناوي (طبعا الكلام ده كله قلته.... في قلبي، ربنا رب قلوب، وانا ماليش مزاج اتهزأ اكتر من كده) 
قام دخل واد امريكاني على الخط وقال: اه شكله عربي فعلا، عامل زي الكناسين
وواحد تاني راح قايل (امريكاني طبعا وحاطط صورة زومبي): انا باقول احنا نرمي على المسلمين قنبلة نووية او ذرية ونخلص المشكلة
وواحدة اسرائيلية (الاسرائيليين بيتعاملوا معايا على اساس اني مسكينة ومضللة وهم اللي ح يهدوني عشان هم طبعا غير بقية البشر) بعتت لي على البرايفيت تقول لي ان احمدي نجاد ماسوني 
 انا ايه اللي وداني ماي سبيس؟ ده مستشفى مجانين: انا الاكسسسسسسس
اكس عليك
تووووووت تشك تشك تشك
وما بيتكلموش غير في حاجتين: ازاي يرموا قنبلة نووية على العرب وازاي يخلصوا من احمد الدين جاد اللي طلع عربي وسنة وماسوني وزي هتلر (اه والله مسمينه هتلر الجديد) ودي اضافة جديدة تقدر السعودية تضيفها الى جانب انه شيعي وصفوي ومجوسي
انا برضه مش فاهمة، هو الراجل ده انا شايفاه عادي يعني، رئيس يعني واخد اربع سنين وح ياخد اربع سنين تانيين لو نجح زي ما الواحد الايراني ده عمال يولول وخلاص، ايه تمن سنين في عمر الدنيا يعني؟ ثم ان فيه برلمان وفيه مرشد وفيه مجلس للمرشد ده وعندهم عشرميت مجلس بيتخذ القرارات، فيه ايه؟ معمول منه قصة كبيرة ليه؟ ده واخد اهمية في حياتهم اكتر من شافيز نفسه وبيتكلموا عليه اكتر ما بيتكلموا على اوباما
بالمناسبة بطلوا يجيبوا سيرة اوباما خلاص، دلوقت فيه عدد لا بأس به خايف من المسلمين ليغتصبوا ستاتهم لما ينتصروا عليهم في الحرب الجاية،  اه اه، حاطين الاحتمال ده وارد ومقتنعين انه ممكن يحصل، شالله اشوفهم دكاترة يارب، ايه حسن الظن بينا ده، ربنا يجبر خاطرهم والله، قال احنا ماشيين نقول يا حيطة داريني وهم خايفين من الجحافل الاسلامية لتغتصب نسوانهم، ده نص الرجالة قطع الخلف من التلوث والنص التاني قطع الخلف من القنابل، بس طبعا ح اقول لهم كده؟ مش معقولة يعني
طب اوعوا يا عيال بقى لما ننتصر حد يقل عقله ويغتصب شارون ستون.... كبرت خلاص

45 comments:

mido said...

بمناسبة ايران



من فيض غيطه -----------

mido said...

مش معقول الكلام اللى بتقوليه ده !

الحاجة الوحيدة اللى أصدقها ان

نجاد شبه الكناسين

و ده شرف ليه

Unknown said...

والنبي يا اخويا انا احتارت وزادت حيرتي

يعني هو سني مدسوس على المذهب الشيعي
وللا شيعي مدسوس على السنة
عربي ومدسوس على الفرس
وللا فارسي وعايز يرجع الدولة الصفوية

وللا ماسوني وعايز يعمل زي هتلر في اليهود

هو ايه دخل الماسونية بهتلر اصلا؟

مش الماسونية دي كان لابسها اليهود طول عمرهم؟

انا دماغي مششت
وعندي واجب
ولازم اعمله بدماغي اللي على رأي دكتور الحديث اللي مش فاكرة اسمه: بقت تلق زي القربة

مي ثابت said...

بتفكرينى بطبيب الأطفال الإيرانى الخاص بإبنى لما كنا فى ألمانيا


الراجل عنده إعتقاد خاطئ

معرفش جابه منين

إن اللى لابسه الحجاب

مهما كانت نوعية هذا الحجاب

إما إيرانية
يحترمها جداً

أو تركية
تضرب بالشوز

و كان بيتعامل معنا
على أساس إننا من النوع الأول


لحد ما اكتشف إننا جنس تالت مُحجب غير اللى يعرفه

فخد فترة لحد ما فاق من الصدمة





زيارة أوباما لمصر

أعتقد إنها حتكون مرتبطة بما يتم التوافق عليه فى واشنطن

بين عوكل عباس و نتنياهو

فربنا يستر

اصةً إن تم إستباقها

بالحكاية الخيبانة بتاعة اليورانيوم عالى التخصيب

mido said...

واجب ايه ؟

Unknown said...

مي

وانت ايه اللي بيسحبك من لسانك ويخليكي تقولي له
قولي له بلى بلى

الا انا ما اعرفش من الفارسي ده غير بلى ونه
ونه دي
يعني نو... لا يعني

وفي مرة كنت مسافرة وجات بت ابتسمت لي كده
مش فاكرة كانت عمرة وللا كانت ايه
بت صغيرة كده

تقول لي: فارسي بلد نيستيه؟

انا بقى اكسفها؟
طبعا لا

شغلت مخي اللوذعي

قلت فارسي
يعني فارس
بلد يعني بلد

نيستيه
ياربي نيستيه شبه ايه؟
اه
نيستيه يعني
nice

يبقى هي بتسألني: فارس بلد كويسة؟

قمت قلت له: بلىىىىىى

والاقي لك ماسورة فارسي اتفتحت في وشي

وانا اهز راسي ومبتسمة وبعدين الاقيها عملت تون كده كأنها بتسأل

اقوم اقول لها: بلى بلى... فارسي بلد نيستيه

تقوم البت تقول لي: فارسي بلد نيستيه

اقول لها: بلى بلى... فارسي بلد نيستيه
نيستيه جدا

وواحدة عراقية قاعدة وميتة على روحها من الضحك
في الاخر قالت لي: يا اختي دا تجولتش فارسي بلد نيستيه يعني تحتشين فارسي؟
فانا طبعا مش اسكت واستر على نفسي
قلت لها ترجمتي الفورية
راحت الفتانة باصة للبت وقالت لها قامت البت ماتت على روحها من الضحك
وياختي كانوا قاعدين مبسوطين قوي وبيضحكوا عليا تقوليش عبد المنعم ابراهيم في سكر هانم قاعد قدامهم


ميدو
مش انا في المعهد بتاع رأفت الميهي؟ مديني واجب في الاجازة

Kalimalhus said...

شكلك بتهزرى بجد المره دى.. مش كده..

هوه إيه اللى محير فى الموضوع.. إيه الغريب فى إن نجاد يكون له معارضين و كارهين فى إيران.. الراجل ما خدش ال99.99999%
اللى بتتاخد عندنا يعنى مش كل الشعب إخترناه و عشقناه فى الضلمة و إحنا معاه لجهنم و بئس المصير و الكلام ده.. كون إن المعارض ده يكون من المتعصبين للقومية الفارسية فده برضه طبيعى و لما يكون ذلك كذلك فطبيعى برضه لما يحب يقول على الراجل من المنقى خيار ها يستخدم الحاجات اللى تعمل لواحد قومى فارسى إثارة يعنى هايتهمه إنه مش بس بيساند العرب لأ ده عربى متنكر فى صورة زجاجة..

طبعا اللى بيقولوا عليه صفوى و مجوسى ... إلخ إنتى عارفة أسبابهم و لو عايزة الجهتين يكون لهم قاموس شتائم موحد ممكن تقعديهم مع بعض و تسيبيهم يتخانقوا على القاموس..

حكاية المسلمين اللى إغتصبوا النساء دى أصلها إن العرب المسلمين لما فتحوا باد الفرس أخذوا سبايا كتير و دول بقوا جوارى و أمهات أولاد و أعتق منهن الكثيرات و صرن زوجات.. بس فى مفهوم الأمة المهزومة ده يسموه إغتصاب و فى العرف المعاصر يبقى إسمه جريمة حرب بس لما يكون حصل من 14 قرن يبقى يسمى بإسمه حينها..

أما عن شارون ستون .. ياه دانتى كأنك من جيلى.. شباب الأيام دى ما يعرفوهاش أصلا.. يعنى لما الفتح يتم بعون الله هاتلاقيهم بيدوروا على ليندسى لوهان و البت بنت الخواجة شيراتون والا هيلتون.. (و الله واحد محترم بيترجم برنامج ترجم إسمها - فندق هيلتون فى باريس - راجل فله يعنى لما أنت مالكش فى الهلس و مش عارف البت بترجم برامج من دى ليه؟

مي ثابت said...

كان لازم يعرف

لإنه بدأ يتكلم معانا بالإنجليزي اللى بيحبه عن معالم إيران

على إعتبار إننا ولاد عمومة

و أنا لا أعرف عن إيران سوى أنها تقع على الخليج العربى


ياريت تروحى تعملى الواجب

علشان تبقى شطورة

Unknown said...

ما يعارضوه يا اخي

البني ادم يتعارض عشان مفتري
عشان بيحبس الناس ويعذبهم
عشان بيحابي لرجال الاعمال وبيجوع الفقرا ويخرب بيوتهم

مثلا مثلا
وللا الحاجات دي اتكتب علينا احنا بس اللي نعارضها وبقية الناس يعارضوا معارضة سريالية

Unknown said...

انا ح اقعد اعمل الواجب فعلا

احمد سعيد said...

هق هق هق

يابونيتى انتى ايه اللى بيدخلك على المرستان اللى اسمه الماى سبييظ دة ؟؟؟

يالهوى

انا لو حد عمل معايا مناقشه بالشكل دة ممكن ادشدش الجهاز واطلع اقتل اهلى واولع فى البيت وبعدين انط من فوق السطوح على بوز المدنه اللى جمبنا


اللى يرحم اللى فى بالى

كان يقولى ياواد خدها حكمه :
الجهل حشمه

_________________


يالهوززززززززز

مش رأفت الميهى دة المخرج السريالى بتاع سمك لبن تمر هندى , وعلشان ربنا يحبك .......واوخواتهم من الافلام البتنجانيه ؟؟؟؟؟

هو الراجل دة لسه عايش؟؟؟

امال غطسان ليه وحارمنا من افلامه؟؟

والنبى ابقى قوليله عاوزين فيلم عن تمانيه وعشرين سنه انجاز والعلاقه الطرديه بين الحزق الوثنى والضعف الجنسى عند اناث ذبابه الفاكهه

_______________________

مهندس

لااااااااااااا ياباشا لااااااااا


اينعم انا من الجيل التالى ليكم

بس وعيت على ماما شارون ستون

مش دى برضه بتاع بيزك انستنيكت ؟؟؟

ايون انا شفته سينما وانا فى ابتدائى

دنا ضحكت ضووووحك

Kalimalhus said...

لما تخلصى الواجب إبقى عدى على اللينك ده:

http://www.independent.co.uk/opinion/commentators/steve-richards/steve-richards-a-catastrophe-that-leaves-our-democracy-in-crisis-1681809.html

و شوفى الناس بتفقد مستقبلها السياسى عشان إيه و العالم بتصوت و بتردح بالبلدى لأنهى سبب فى بلد بتمارس الديموقراطية اللى مش عجباكى..

يارب أشوف يوم أعارض فيه الحكومة عشان أى سبب سيريالى ده يبقى يوم المنى لما ما يكونش فيه سبب عليه القيمة نشتم الحكومة عليه.. يديكى و يدينا طولة العمر.

soreal said...

yeah , myspace is known to do that to those who spend more time than they should on it

take it lightly... but dont completely dis it.
i gained a lot of knowledge from those ppl, and about those ppl, that is nearly impossible to gain elsewhere.

the only thing that can really make u frustrated during this process is that it sometimes looks like "7ewar el torshan" ....
well, until u learn how the game is played..

what game you ask? the game of expressing your views in a way that can alter your audience's views... and how to sift through disinformation

oh, one last thing: not every body on myspace are like you, some has well intentions, others have an agenda, and are there to spread a certain idea.. lots of spies and intelligence workers too

soreal said...

btw, why did you disable anonymous comments?

Unknown said...

محمد على ابراهيم
عامل مولد
بمناسبة زيارة اوباما لمصر
:-(
ابقى شوفى اللينك
بعد ما تخلصى الواجب

Unknown said...

اه لينك ايه
قصدى موقع جريدة الحمهورية
:-(

lastcrazyboys said...

هو ابو الغيــظ فعلا حاطط الراجــل في دماغه..بس في حاجة مشتركة كان سألني عنها راجل بسييييييط ..وهو بيتفرج عالنشرة

هو أســامة بن لادن ده..وبتاع ايران ..بيفكروني بالراجل بتاع متقدرش ..

وانا بطبعي ..ودني حبتين ..بعترف بالحتة دي ..باخد الكلمة وافصصها
وبالذااات بعد الفيلم ان اللذينة اللي بعتيه
وايش ضمني انه "احمد الدين " نجاد مش كوبارس في الفيلم ..ساعتها هيبقى البطل ارحم ..على الاقل اهو اسمه بطــلوهو مينفعش ماسوني ..والماسونية دي التصقت بأسامي كتير ..الأفغاني كان مش مجرد عضو ..ده كان عضو بارز
والملك عبدالعزيز ال سعود بتاع السعودية ..والحسين بن زينة..كلللل دول وغيرهم
مش قضية بالخطورة اللي الناس عاملاها دي

===
وبعدين تعالي هنا ..دي اخرتها..بتشوهي صورتنا قدام الناس الغريبة ..احنا التلوث قضى علينا

طب خلي الفتح يرجع تاني كده
.,.وهتتفرجي

Unknown said...

ههههههههههههههههههههههه
قريت مقال ابراهيم عيسى

الراجل ح يجيله استبحس

بس ازاي يقول ان ايران عمرها ما اعتدت على مصر

هو نسي من تلاتلاف سنة قمبيز احتل مصر؟

حسن على said...

بصراحة مش هاممنى شارون استون... اناخايف على زيزى البدراوى !!

Unknown said...

هههههههههههههههه
الله يرحمها

نسيت اقول
الواد لما قعد يهطرس الهطرسة دي
قلت له انت بتقول كده بس الحكام العرب بيقولوا ان ايران بتتعاون مع اسرائيل وامريكا في السر
وان ايران بتساعد امريكا في العراق وافغانستان
راح قايل لي: ما قلت لك العرب اغبيا
:(
هي الناس كلها بتقول علينا كده ليه؟

حسن على said...

ثم انة مما يشرف احمدى نجاد تواضعة الجم فى الملبس والمظهر والتوجة العام ,حيث يعيش فى مستوى اواسط الايرانيين وربما اقل قليلا, ولا عاوزينة ينهبها هو وولادة واصهارة وشاماشرجيتة وكلابة ويلبس من جوتشى ويبقى واحد من اشيك عشر رؤساء ... زى المجحوم؟؟؟؟؟؟؟؟؟؟؟؟؟؟؟؟؟؟؟

حسن على said...

ثم ان الرؤساء-بالصلاتو ع النبى - لايقيموا بماركة كرافاتاتهم والا الحكاية حتبقى خيبة مسيحة

حسن على said...

هطرس يهطرس هطرستا(ن) فهو هطراسوا ...اللهم صلى ع النبى نوارة (تنحت وتشتق وتصرف) وتبتكر لغة جديدة تشبة لغة عصر الهطارسة الاول

Anonymous said...

عندى هوس بنفوس الناس.. احب اعرف ايه اللى فى قلوبهم وورا عنيهم تمام زى مااحب يعاملونى.. وكتير الاقى مسوخ بتتصارع ,اقبحهم مسخ العنصرية.

بس سؤال محيرنى.. هى القاهرة عاصمة دولة الاسلام؟؟
كل العلاقة بين مصر والعالم الاسلامى هى الكام اسيوى اللى بيدرسوا فى الازهر وشكرا على كده.. معظمنا ميعرفش فين ايران على الخريطة والمصريين فى عزلة تامة عن هذا العالم. طيب جاى يرزع البؤين من عندنا ليه؟؟ اوباما فعلا اخطر رئيس فى تاريخ امريكا المهبب والتاس هتصحى من حلمه على واقع اسود من عهد بوش. هوا المهدىء اللى بيخدروا بيه عقول الناس بعد مابقت براكين.. من اول ظهور وهو شغال خدع بصرية الله ينور ,طلع فى العربية جعجع شويتين واتصور مع شافيز وعمل قافش على نتنياهو بدون اي نتيجة بيستغل يأس الناس وشوقهم للتغيير.. داهية وعارف تاريخ وجغرافيا زى اسمه عشان كده اختار المحروقه.

TAFATEFO said...

شارون ستون عايشه

TAFATEFO said...

ومش كبيرة

TAFATEFO said...

هتشنعوا على الست

TAFATEFO said...

وبعدين إيران وأحمدي نجاد ودعم المقاومة .. هو تلاقي مصالح .. مش باسم الإنسانية

إسرائيل وأمريكا في المنطقة عدو لإيران لأن ده صراع هيمنة ومصالح مش لوجه الله والحق والإنسانية

النزاع بين أمريكا (وإسرائيل) وإيران .. هو صراع هيمنة مش لوجه الله والحق والإنسانية

أهداف أمريكا كانت دائماً الحفاظ على أمن وتفوق إسرائيل في كافة المجالات، والسيطرة المباشرة على ثروات المنطقه وأهمها حقول النفط

وده يتعارض مع المصلحة الإيرانية .. فبالتالي كان لابد أن تخلق إيران كيانات موالية لها وتدعم كل ما يناهض الأهداف الأمريكية وإسرائيل

معنى كده ان إذا كنا محتلين وتحت السيطرة الأمريكية .. والأنظمة الحاكمة متحالفه معاها .. فالطبيعي إن إيران تلجأ لدعم المقاومة وكسب تأييد الشارع العربي

اللي يقول انه مش صراع مصالح .. يبص للموقف في العراق وأفغانستان

في العراق .. من تدعم إيران؟؟ هل تدعم كل المقاومة للإحتلال الأمريكي

في أفغانستان .. هل تدعم إيران طالبان ضد الإحتلال الأمريكي؟؟

لما الجزيرة سألت هل تقارب أمريكي إيراني في صالح المنطقة .. كانت دي الحيرة

إيران مش بتعمل لصالح المنطقة لوجه الله .. ده لمصالح وأهداف (سيبك من توسعية والكلام ده لكن بسط النفوذ ده أقل شئ واضح) .. احنا كعكه (لأن مفيش لينا أي قوه لا علم ولا تسليح ولا زعامات سياسية ولا اقتصاد ولا أي هباب) بتتصارع عليها القوتين الأبرز في المنطقه .. امريكا وإيران

بكره تشوفوا أمريكا وهي بتنسحب من العراق هتصعد مين علشان يواجه السيطرة الإيرانية على العراق؟؟

TAFATEFO said...

حاجه كمان

هو مين بيسقف ويهري ايده تسقيف وصوته يتبح تشجيعاً كلما أنكر أو شكك نجاد أو أقام مؤتمراً لإنكار المحرقة؟؟

Unknown said...

مش فاهمة السؤال يا مصطفى

TAFATEFO said...

يعني يا فندم ببساطة

ليه إيران بتدعم المقاومة في لبنان وفلسطين

وليه بتتحالف مع أمريكا (ضد المقاومة) في العراق وأفغانستان؟؟

مصالح

وأمريكا خارجة من العراق .. هتصعد الدور السني السياسي اللي أنهته .. هتصعده علشان يبقى في مواجهة النفوذ الإيراني في العراق اللي مكنت له أمريكا .. سواء بالحكومات أو بتفكيك الجيش

أمريكا في العراق بتخسر .. عسكرياً .. وسياسياً لصالح النفوذ الإيراني

نجاد لما بينكر الهولوكوست ويعمل مؤتمر لإنكارها بيخاطب مين بالدرجة الأولى.. أمريكا العدو للثورة؟؟ ولا إسرائيل العدو الأقوى عسكرياً في المنطقة ؟؟ ولا بيخاطب الشارع العربي؟؟ ولا بيخاطب الإيرانيين؟؟

اي مصلحة نجاد في إنكار الهولوكوست؟؟ ليه بيهاجم أمريكاودعمها لإسرائيل وممارساتها العدوانية في غزة؟؟ في نفس الوقت اللي سكت وبيسكت على اللي بيحصل في العراق (وبيتحالف ضد المقاومة) وبيتفاهم مع أمريكا .. وبيسكت على القتل والتدمير في أفغانستان؟؟ هل هنسمع نجاد بينتقد الغارة الأمريكية اللي قتلت 120 مدني في أفغانستان؟؟

مـ ـصـ ـا لـ ـح

سياسة .. صراع نفوذ وهيمنة .. مش لوجه الله والحق والإنسانية

Unknown said...

مين قال ان ايران ضد المقاومة في العراق؟ دي امريكا بتتهمها انها بتدعم المقاومة في العراق

بس اصل فيه ستميت مقاومة في العراق
تلاتربعهم بيموتوا بعض وسايبين الامريكان

TAFATEFO said...

هتقوليلي اتهام بوش اللي حضرتك عارفه كويس مقصود بيه ايه؟؟ وعارفه اللي بتدعمهم امتى بيقاوموا وامتى بيسكتوا وليه؟؟

وليه بيقتلوا بعض أكتر ما بيقتلوا الأمريكان

هل حضرت مقتنعة ان إيران بتدعم المقاومة العراقية؟؟

Unknown said...

انا ما ادعيش اني عارفة ايه اللي بيحصل في العراق
لان العراقيين نفسهم مش عارفين
وايران بتقول حاجة وامريكا بتقول حاجة تانية والعراقيين بيقولوا سبعتلاف حاجة

والعراقيين العاديين اللي اعرفهم مش فاهمين ايه اللي بيحصل بالظبط

TAFATEFO said...

انتهى مفاوضون من الولايات المتحدة وإيران والعراق، في ختام اجتماعهم اليوم الثلاثاء، إلى تشكيل لجنة أمنية ثلاثية؛ لمواجهة جماعات المقاومة العراقية. وقال ناطق باسم الحكومة العراقية: اتفقت الدول الثلاث على تشكيل لجنة أمنية ثلاثية؛ بهدف دعم جهود "إقرار الأمن"، والقضاء على الجماعات المسلحة في العراق.
وجاء في بيان صدر عن مكتب رئيس الوزراء العراقي، "نوري المالكي"، أن الطرفان الأمريكي والإيراني اتفقا على "دعم العملية السياسية في العراق".
وحسب رويترز، قال السفير الأمريكي لدى العراق، "ريان كروكر"، يوم الثلاثاء إن إيران والولايات المتحدة اتفقتا على إنشاء لجنة للمساعدة في تحسين الأمن في العراق.واعتبر السفير الأمريكي أن اللقاء جرى في أجواء "إيجابية وصريحة".
وكان على رأس الوفد الأمريكي السفير "ريان كروكر"، بينما تولى السفير الإيراني "حسن كاظمي قمي" رئاسة الوفد الإيراني، فيما ترأس الوفد العراقي وزير الخارجية "هوشيار زيباري".ويأتي هذا الاتفاق، رغم الخلاف بين البلدين بسبب أنشطة طهران النووية؛ لمواجهة المقاومة السنية التي تعمل على إنهاء الوجود الإيراني والأمريكي من العراق.ويشير المراقبون إلى جود تقارب كبير بين واشنطن وطهران في العديد من القضايا، خاصة في أفغانستان والعراق، بالرغم من خلافهما حول أنشطة إيران النووية.
وهذا ما عبّر عنه "هاشمي رفسنجاني"، الرئيس الإيراني السابق، بقوله: "الولايات المتحدة هي البلد الأهم في العالم، وإيران هي البلد الأهم في المنطقة، ومن المنطقي أن يسويا مشاكلهما"، على حد قوله.

TAFATEFO said...

لمواجهة المقاومة السنية التي تعمل على إنهاء الوجود الإيراني والأمريكي من العراق.ويشير المراقبون إلى جود تقارب كبير بين واشنطن وطهران في العديد من القضايا، خاصة في أفغانستان والعراق.

Unknown said...

ماهو ده الكلام اللي بيتقال وبيتقال عكسه يا مصطفى

بلاش بس الثقة المطلقة دي

انا باقول لك العراقيين اللي عايشين جوة مش فاهمين حاجة

ناس تدخل عليهم وتقول لهم يا كفار وتغتصب البنات ويقولوا على نفسهم سنة وناس تانية تدخل عليهم وتقول لهم يا عملاء وتموت العيال ويقولوا على نفسهم شيعة
وماحدش فاهم ايه الحكاية بالظبط

مين اللي بيطرد الصابئة والمسيحيين من العراق؟

مين اللي بينكل بالعراقيين ويمسك السنة ويقتلهم ويمسك الشيعة ويقتلهم؟

مين اللي بيعمل كده؟
ماحدش عارف
ناس بتقول على نفسها سنة وناس بتقول على نفسها شيعة
وماحدش عارف الحقيقة فين والكل بيتقاذف التهم

ده كلام كل العراقيين اللي اعرفهم اللي جوة

وفيه حالة هيستيريا من الاغتصاب مش مفهومة

وكل الناس ملثمة وماحدش عارف مين دول اصلا

فبلاش تتكلم بثقة انت ما تعرفش
قد يكون الكلام ده صح وقد يكون غلط وقد تكون الحقائق حاجة تالتة خالص
اذا العراقيين ما يعرفوش يبقى انت اكيد ما تعرفش

والتقارير الاخبارية نفسها متناقضة لانها بتاخد من مصادر عدة وكل مصدر بيقول حاجة مختلفة

ناس كانت بتشتغل مع بعض وفجأة قلبوا على بعض

زي الصدريين وهيئة علماء المسلمين
دول قعدوا فترة بعد الاحتلال يشتغلوا مع بعض
وفجأة كل واحد فيهم بيتهم التاني وماحدش عارف الحقيقة فين
والكل بيلغوص
هو فيه حد ما راحش العراق واكل من البوفيه المفتوح؟
ده ساويرس راح يا عم

اسأل على ابن خالتك ليكون هناك

Unknown said...

وبالنسبة لطالبان
طالبان مقاومة شرعية وجدعة واحسن ناس

ويكفي انهم واقفين لوحدهم مافيش كلب بيساعدهم

ولا حتى تنظيم القاعدة بيساعدهم

Unknown said...

ولو انهم عاملين قلق لمواطن
:)
بس رجالة الحقيقة
ارجل ناس وهم دول بقى اللي مقاومة بجد ومنظمين نفسهم ومديين الامريكان علقة موت وممشينهم يكلموا نفسهم
مش ماشيين يموتوا في بعض

TAFATEFO said...

بالظبط

كانوا بيشتغلوا مع بعض امتى .. وبعدين حصل ايه؟؟

كانوا بيشتغلوا مع بعض بدعم إيراني لما كان الهدف مقاومة الوجود الأمريكي في العراق

أمريكا عملت ايه؟؟ وكان ايه موقف مقتدى الصدر؟؟ والنفوذ الإيراني أخباره ايه؟؟ وامتى الاجتماعين اتعملوا والاتفاقية الأمنية اتعملت وليه

ده كله واضح وضوح الشمس

الموف الأمريكي الإيراني من العراق وأفغانستان واضح ومعلن ومش محتاج نقول محدش عارف

ابن خالتي سجد الكل يا ماما

ما هو قال هنسحب .. وبعدين عزز هو راخر :D:D

بذمتك في حد يقلق على ساويرس؟؟

TAFATEFO said...

أهم دلوقتي يقولولك انك بتشوهي صورة الإسلام .. والإسلام بريء

Unknown said...

يا مصطفى الوضع في العراق دلوقت عامل زي الوضع في لبنان ايام الحرب الاهلية بالظبط
ماحدش عارف ده جه منين بالتحديد وماحدش عارف فيه ايه
والكل مجرم بلا استثناء
لحد النهاردة اللبنانيين مش عارفين هو كان ايه اللي حصل
ناموا صحيوا لقوا حرب اهلية

اخر مرة العراقيين كانوا فيها بعقلهم في معركة الفالوجة
وفجأتن راحوا هابشين في بعض
لما مين عمل ايه؟

اشمعنى الافغان مش كده؟
ما شاء الله لا قوة الا بالله يعني لبعدين اقر عليهم
بس الوضع في افغانستان واضح
القاعدة خلعت
طالبان بتقاوم
امريكا احتلال
كرزاي احكي يا شهرزاد احكي لشهريار

وطالبان هي اللي خلّعت القاعدة وكويس انهم عملوا كده
انا مش عايزة اهاجم القاعدة
بس من ساعة ما حطوا على العراق وكأن فيه نوة حصلت
ربنا يهديهم ويوريهم الطريق القويم
بس العراق خلاص
ما بقتش نافعة
وماحدش عارف هي عاملة كده ليه وازاي ماسورة وانفجرت في وش الكل كده
ومافيش حد بريء كلهم ايديهم متعاصة في الدم لما بقت حاجة تقرف
على الله لما الحكاية تخلص يتربوا بقى زي ما اللبنانيين اتربوا اهم اتعلموا ومهما يمسكوا في شواشي بعض ييجوا لحد قبل ما تبقى حرب اهلية ويفرملوا

Unknown said...

اشوه صورة الاسلام؟

طالبان اجدع ناس

طالبان اجدع ناس
طالبان اجدع ناس
ومستعدة اكتبها على الحيطان

طالبان اجدع ناس
ومقاومة محترمة وشريفة
بيقبوا يغطسوا يجيبوا سلاح
وقال ايه امريكا بتقول: ماهم بيبيعوا مخدرات عشان يجيبوا سلاح

انشالله يبيعوا عيالهم
المهم يقاوموا ومش شغالين عند حد وهدفهم واضح وانا باحبهم وربنا ينصرهم

TAFATEFO said...

شوفتي صور اجتماع السيد حسن وبري وعون

الناس دي كسبت خلاص

يا خوووووووفي من القادم

مواطن مصري said...

اة الي بيستغلو ألاطفال في حرب و بيغسلو دماغهم عشان يطلعو مجرمين


اة نوارة بجد برغم اني بحب المدونة بتاعتك بس

مش اي حد معادي ل امريكا يبقى شريف و مش اي حد يرفع مصحف او انجيل يبقى شريف