Monday 1 June 2009

هام وعاجل لكل المصريين في اي حتة في الدنيا

نظرا لعبط المصريين، من الاخر كده الواحد يقول الحق عشان ما يحرجش نفسه والناس هم اللي يقولوا له، وفهلوتهم واستنصاحهم واعتقادهم ان انت تيجي فين انت في شياكة اللمبي وحلاوة اللمبي
وجدت انه من الضروري (ايه ده انا مالي قلبت سراج منير كده) اني انشر رد عبقرينو على كلام عبد البرماوي اللي نقلته في البوست ده
وارجو قراءة كلام عبقرينو وتنفيذه بالحرف اعملوا معروف، هم الظاهر سألوا على هبل قالوا لهم فيه تمانين مليون قاعدين هناك اهو، وانا مش باملي على حد حاجة والله، بس عبقرينو كلامه دقيق جدا، وما عهدتش عليه غير الصدق ولا ازكي على الله احدا، وعبقرينو بجد، واعبقر حاجة فيه انه ماعندوش خيالات واوهام عن نفسه مش حقيقية ومش عايش في الوهم، النقطة دي مهمة يا لاعبي مركز شيباب الحقانية، مش كل واحد رطن بكلمتين يتهيأله انه عبقري زمانه واوانه والعالم كله بيجري ورا عبقريته عشان يدفع له مليون دولار وهو يقول كفاية يا جماعة نص مليون انا مش طماع
اليكم كلام عبقرينوا المهم جدااااااااااااااااااااا، اي مصري في الخارج او في الداخل ياخده كده يطبعه ويحطه حجاب في المحفظة ويراجعه كل سبت واربع بالليل:

الكلام صح 100 100 وشوفته بعيننى فى الاردن سنة 2007 فى تجنيد مصريين من قبل شركة تيتان للعمل فى افغانستان والعراق واللى كان المسئول عن الملف ده امريكى من اصل فلسطينى للأسف يدعى انور كراج
وكنت انا اللى بالعب ضده مع المصريين اللى كان بيغريهم بمرتبات خيالية 10 آلاف دولار شهريا وزيارات لأهلهم فى مصر فى مقابل العمل لمدة عام فى افغانستان
واللى انا كنت باعمله انى كنت باقعد مع المصريين دولت واوضح ليهم الوضع واقولهم انى تيتان دى فرع من بلاك ووتر وكان بالصدفة الجزيرة عاملة فيلم وثائقى عن بلاك ووتر وربنا ستر وقدرت امنع شاب مصر من الذهاب هناك
طبعا السفارة فى البطيخ ولا تعرف اى حاجة ومش هاتقف معايا لو بلغتهم فاضطرت العب انا وتيتان على دماغ الواد لغاية لما نشوف مين اللى هايكسب
سؤالك ازاى عرفت وازاى اتعاملت؟؟المشروع اللى انا كنت فيه كان مأجر ليا فيلا فى ارقى منطقة فى الأردن وهياعبدون فى الاردن اللى معظمها وزراء ونواب اردنيين وكانوا هما جيرانى فى الفيلا وعرفت بالصدفة لما نزل التلج على الاردن وقعدنا 3 ايام فى البيت وبكده اتعاملت مع الحارس فى تنظيف مدخل الفيلا من التلج والواد آمن ليا وحكى ليا عن الجيران وكانت تلك القصة
ياريت سفارتنا بالخارج تصحى للى بيحصل للمصريين وياريت اى مصرى فى الخارج يحس انى فيه محاولة لتجنيده او لتشغيله فى حاجة مش مظبوطة حتى لو كانت معلومات عن العدس والفول فى مصر وبخاصة فى الاردن يروح السفارة المصرية ويقابل الملحق العسكرى وبكده يكون عمل اللى عليه علشان لو حصل اى غلط هوا مش مسئول عنه مش يتحاسب من قبل السلطات المصرية لأنه استنجد بيهم وهما مش اتعاونوا معاه
لأنها بتيتدى بطلب بسيط وليكن طلب عادى وتبدأ بعد ذلك سلسلة التنازلات والسقوط فى المستنقع
----------
وزي ما احنا شايفين، الجدع يا اطفالي الصغار مش طالب مننا غير اننا نمشي عدل يحتار عدونا فينا
ونبطل فهلوة
وما ناخدش شلوت في روحنا
ولما حد ييجي يقول لنا عشرتلاف دولار لازم نفكر، انا مين انا عشان يدوني عشرتلاف دولار؟ هو احمد زويل اخد الفلوس دي كلها امتى؟ مش لما بقى شنة ورنة؟
بدل يا حبيبي ما تلاقي نفسك بيتحقق معاك من الاف بي اي ولا شركة ولا بلد ولا حتى الست والدتك ح يقولوا اي حاجة عنك غير جملة واحدة: انا ما اعرفوش يابني الراجل ده

3 comments:

ديالا said...

سفاره ايه والنبي يانواره
هيا السفارات دي فاضيه غير للحفلات والسهر والذي منه

يابنتي سيبك احنا اولادنا يروحوا في ستين داهيه مش مشكله عاااااااادي

اهم حاجه المنظر العام للبلد وفداكي يابلد كل المصريين ده اذا كان لسه في باقي اصلا مصريين في البلد
وسمعني السلام الجمهوري

mido said...

المصريين مش عبط

هم طماعين

TAFATEFO said...

هي دي صورة عادل نخلة .. ومعاها تفاصيل عن إدانته واعترافه وشهادته بحضور عمليات تعيب وانتهاكات جنسية في حق معتقلين

عادل نخلة أكثر من واحد اتعرفوا عليه وأفادوا بحضوره في الانتهاكات دي

قصة الولد الصغير 15 سنه مقريتهاش غير في التليجراف