Sunday, 7 June 2009

هو يعني ايه اسلام؟

امبارح في العاشرة مساء، فيه اخت اتصلت وقالت الاتي: اهم حاجة في خطاب اوباما هو الاسلام، الاسلام اللي اهم من العراق واهم من فلسطين واهم من افغانستان، الاسلام اللي كل العالم بقى يتكلم عليه وحش، اول مرة حد يتكلم عليه كويس
!!!!!!!!!!!!!!!!!!!!!!!!!!!
معلش سؤال محرج شوية: هو يعني ايه اسلام؟
انا الاسلام اللي اعرفه بيقول ان دم انسان واحد بريء اكبر حرمة عند الله من حرمة المسجد الحرام في الشهر الحرام في يوم عرفة
ده الاسلام اللي اتعلمته في حصة الدين في المدرسة، وللا هو فيه اسلام تاني؟
اللي عايز يتكلم عن الاسلام وحش ويسب لنا الدين من هنا لحد يوم القيامة، ماهو حر في رأيه، اذا كان القرآن نفسه ادرج اتهامات الكفار للرسول عليه الصلاة والسلام وللاسلام وللقرآن، يتكلم زي ماهو عايز واحنا عندنا ردود، ولو ما عندناش ربنا يرد عنا، احنا مظلومين
انما ما يموتليش ناس
ما يموتليش ناس ويتكلم عن الاسلام كويس، اعمل ايه انا بكلامه وهو كل يوم بيموت ناس حرمتهم عند ربنا اكبر من حرمة الكعبة في الشهر الحرام في يوم عرفة؟ كل انسان بريء بيموت بتتهز له سبع سموات
ايه ييجي يقول لي: من قتل نفسا بغير نفس او فساد في الارض فكأنما قتل الناس جميعا
وهو عمال يقتل الاف الانفس بغير نفس
ثم يعني ايه: كفاية انه اتكلم عن الاسلام كويس؟ يا سلام؟ اجاز الاسلام الاستاذ اوباما؟ بصم عليه وشرفه بإمضته الكريمة؟ اول واحد يتكلم عن الاسلام كويس؟ ماكل المسلمين بيتكلموا عن الاسلام كويس، والشيوخ بيتكلموا عن الاسلام كويس، وجارودي اتكلم عن الاسلام كويس، والجابري بيمشي في الشارع ويسري بيمشي في الشارع ومحمد بيمشي في الشارع.... مادول اللي بيعدوا من جنبه يا راااجل، تفتكر دول وتنسى اللي كان في النص؟
ايه يعني لما اوباما قال الاسلام كويس قام الاسلام اتشرف واتنور واجيز؟ خلاص يعني؟ الحمد لله كده ايمانا ثبت وتأكدنا ان الاسلام دين الحق واسلمنا؟ من هنا ورايح ح نعرف نصلي من غير ما نشك في دينا عشان اوباما قال ان الاسلام كويس؟
طب بقى اوباما لو كان فعلا شايف ان الاسلام كويس ما كانش سابه
ايه رأيكوا بقى؟ ياللا نجري وراه 

21 comments:

سبهللة said...

والله ما حد ينفعك لما يجيلك الضغط
يا حبيبتى الست اللى اتكلمت دى فى من عينتها كتير
كتير اوى كمان
ما هو احنا لو بنحترم ديننا ونقيم حدود الله فى الارض
ماكناش بقينا ملطشة للى يسوى واللى ما يسواش
فى مقولة منسوبة لسيدنا عمر رضى الله عنه
قال
لقد اعزنا الله بالاسلام فإن ابتغينا العزة فى غيره أذلنا الله
وأظن مافيش ذل أكتر من اللى احنا فيه دلوقتى
بقينا ما نساويش عند صهاينةو الامريكان وغيرهم غير تمن الرصاصة اللى بننضرب بيها

مهندس مصري said...

عقدة دونية رهيبة
و إنسحاق أمام عقدة الخواجة بشكل يقرف

عارفة هنا يكادوا يعبدوا الأمريكان
و مع كده لما مهندس أمريكي كبير من حوالي 10 سنين أسلم
قاموا خفضوا مرتبه

عقدة الخواجة الغير مسلم مسيطرة على العقول بشكل مقرف فعلاً

مواطن مصري said...

ممم هل الاسلام هو قتل الابرياء باسم الدين في داخل المساجد مثلما حدث في باكستان و العراق؟؟؟؟؟؟؟؟؟؟؟؟؟؟؟؟


الاسلام هو دين المحبة و التسامح

الاديان الثلاثة اليهودية و لامسيحية و الاسلام اديان تدعو الي السلام و التعايش
لما تكون بعيدة عن السياسة

مهندس حر said...

إنتى يا بنى مضايقة روحك قوى كده ليه؟؟.. لا داهية لتكون دى أول مرة تكتشفى إن متعلمى هذا البلد يتميزون دون خلق الله جميعا بقدر غير عادى من الجهل و الغباء و البلاهة و السطحية و البغبغانية و كل اللى نفسك فيه .. يا بنتى ده المؤسسة التعليمية عندنا بتمارس عملية تكاد تكون منظمة لتدمير كل خلايا التفكير فى دماغ العيال الأبرياء.. إحنا ما عندناش تعليم إحنا عندنا تحرش عقلى و هتك عرض دماغى..

الشابة دى مجرد نسخة من ييجى 10 مليون راجل وست فى مصر المخروسة.. و ياريت ما تلوميهاش ده آخر علامها و منتهى حدود عقلها..

بدراوى said...

انا متفق معاكى فى هذه البوست بلا اى اختلاف
و يمكن كتبت عن نفس الموضوع فى بوست
اتمنى حضرتك اعرف رأيك فيه

http://ta3melboyout.blogspot.com/2009/06/blog-post_05.html

بتنفس حريه said...

انا اتفرجت على العاشره مساءا امبارح
وعايزه اعلق على الشيزوفرنيا الى عند الناس لما شفت اللقاء الى كان فى التقرير اول ما الناس خرجت من قاعه الجامعه
وكان مع خالديوسف بصراحه ماصدقتش الى قاله
ولو حد ركز فى التقرير ده حيلاقى ان كل الناس الى علقت بعد ما الخطبه خلصت زى مايكون منومين مغناطسيا
فعلى راى مامتك الناس مفتونين بيه زى المسيخ الدجال

مايكنش عملنا عمل هههههههه

نعناعة said...

و لسه بيقولك يوم الجمعه خطيب مسجد الحصري الى في 6 اكتوبر دعا لاوباما من على المنبر والناس نصهم قال امين والنص التاني سكت... وبيقولك وماله لما يدعيله ما النبى دعا للنجاشي و ماكانش مسلم

ايوشة said...

الاسلام مش محتاج اوباما او غيره علشان يقوله انه دين عظيم مش مستنين كلمتين مدح فيه ونطلع نقول ياااااااسلام الاهم صورة الاسلام
طيب مفكرناش من الاول خالص مين اللى شوه صورة الاسلام افتكر الاجابة واضحة احنا شوهنا صورة الاسلام صورة كل قيم جميلة وكل هدف نبيل فى وطنا العربى وبعدين دلوقتى بدور على ناس من برة تحسن صورة الاسلام
من اتلف شئ فعليه اصلاحه
ده اللى اعرفه ومش هستنى واحد ميعرفش غير المصلحة ويكون كويس معانا علشان مصلحته وبس علشان يقول للعالم ياااااااه شوفوا الاسلام والمسلمين جمال ازاى
والله العظصم حرقة دممممممممممممممممم

tamer.sala7 said...

كان بيصلي الضهر في جامع سيدي حسن و كان بيعمل عمرة في السعودية قبل ما يجي علي مصر ..... مولد سيدي اوباما

المنفي said...

ارجو ان يسعني حلمك يا نوارة.. والله ما بفهم شو سر هجومك اليومي على اوباما بشكل اصبح يبعث على الملل بصراحة.وبحس انو الجدل في هيك موضوع فقد مبرر وجودو.اذا بتقصدي بالسياسية فالكلام الي عم تكتبيه هو ردة فعل عاطفية مفهومة ومبررة لكن لاتمت بصلة الى السياسة وتعاملاتها بالنهاية اوباما له ما له وعليه ما عليه وما بدي ارغي كتير بعتقد انو احمد شقير قال الي بدي قولو
http://shokeir.blogspot.com/2009/06/blog-post_07.html

يعني هو اوباما يا يكون مسيحي صهيوني مثل بوش يا اما يكون ناصري قومي عروبي.مش ممكن هالكلام.امريكا بلد معقدة جدا واذا بدنا نخوض في حدود صلاحيات الرئيس الامريكي مقابل صلاحيات الادارة الامريكية في رسم السياسيات ما راح نصل لنتيجة لانو الحقيقة بطبيعتها كتير معقدة ..يعني حلو كتير كلنا بنحب نصر الله ومع المقاومة.لكن ناس غلابة متل حكايتنا بغزة حبينا كلام اوباما.بغض النظر عن انو احنا عاطفيين وناقصين عقل ودين لكن الرجل بالفعل جاي معاه رياح تغيير ولما نقول تغيير يعني لم ولن يرتقي لمطالبنا الوطنية.بس ضروري كتييير يا ست نوارة تعرفي انو سقف مطالبنا نزل كتيييير بعد الي عملناه في انفسنا بالصراع اللانهائي بين حماس وفتح.بين المعارضة والمولاه.بين نصر الله والحريري.هالفوضى الي خلقها بوش والي احنا مثل البهايم لسة مربطوين في ساقيتها.احنا ناس مولعين بالرفض واللا وصارت ال لا وسيلة مش هدف وبنعتقد انو لما نتنح ونرفض اي حاجة وباي شكل هيك بنصير قوميين وطنيين وحلوين وبنحب المقاومة وآسف على الازعاج

jafra said...

طيب ما دام قلبوا على الاسلام
ما كان الاخ بفرنسا ليش ما حكى بموضوع المحجبات متلا و حل الازمة اللي بتعيشها كثير من نساء الجالية الاسلامية في فرنسا ؟
و لشو نطلب من اوباما اذا كانوا شيوخنا نفسهم ما همهم الموضوع و بس اللي عملوا انهم قالوا عن فرنسا انهم فرنجة و يبغضون الاسلام

خليها على ربنا
او خليها على رب اوباما
:)

مواطن مصري said...

ام المنتخب المصري خلية في الجزائر احسنلة ميجيش البلد عشان هيطلع تيت تيت تيتتتتتتتتت


هههههه

14 اذار كسبت الانتخبات


زي ما قوت امبارح و سلامي حركة امل

mido said...

الحسنان خسرا شحاتة و نصر الله

مهندس حر said...

المنفى
-----
المشكلة يا أخى تحديدا هى إن ناس غلابة مثل حكايتم و فى غزة يحبوا كلام أوباما و يتعلقوا فيه و يقولوا لنفسهم : هوه صحيح ما وعدش بتحقيق كامل مطالبنا الوطنية بس لما ناخد حاجة أحسن من مافيش و أهو نرتاح من الهم اللى إحنا فيه يعنى كان حد نفعنا أو هاينفعنا من الناس اللى قاعدين ينتفوا فى ريش الراجل؟.. أهو على الأقل الراجل ده رئيس أكبر دولة فى العالم و قد كلمته مش حته مناضل من منازلهم بيقاوم بكلمتين على النت و مش طالع بإيده يفوتلنا حتى عيش و حلاوة فى حبستنا المنيلة دى..

ما أقدرش ألومك لو إنك فكرت بالطريقة دى .. و صحيح إن اللى إيده فى المية مش زى اللى إيده فى النار .. لكن الحقيقة إن أوباما لا يختلف عمن سبقوه و هو بيطلب ثمن وعوده مقدما فى شكل تنازلات يلزمنا بها ثم تضيع وعوده هدرا بعد ذلك فى متاهات التسويف الإسرائيلى .. و تذكر دائما أن بإمكان الرئيس الأمريكى أن يضغط على إسرائيل فى حدود و لا يمكنه فعلا أن يملى على حكومتها ما تفعله..

أوباما لا يقدم إلا وهما لا يرقى حتى إلى مرتبة الحلم فالأحلام لا يمكن أن تكون مشوهة..

مواطن مصري said...

الصراحة انا ارفع القبعة ل شعب اللبناني عن الاداء الانتخابي اليوم

الشعب اللبناني اختار و علينا ان نحترم اختيارة

مهندس حر said...

مبروك يا مواطن.. طول ما إنت بتشمت فى الهزايم يبقى ها تفرح كتير فى الزمن الأغبر اللى إحنا عايشينه ده..

مهندس حر said...

يا واد يامواطن ياللى بتحترم الخيار .. يعنى ما إحترمتش الخيار بتاع أهل غزة لما إنتخبوا حماس و ألا خيار لبنان يفرق عن خيار غزة؟

مع إنه المفروض كله بيروح على السلطة و ألا يكونش خيار منهم ضل طريقه لطبق السلطة و راح حتة ضايقت الصهاينة و الأمريكان؟؟

himalove said...

انا مش داخل اشكرك على التدوينه لكنى لى ملاحظه ضغيره اتمنى انك تاخد بالك منها
اسوا حاجه فى عالم الانترنت ان يكون هناك موقع فيه ملف فيدويا او صوت يعمل بشكل الى دون ان يريد المستخدم
دا مزعج جدااااااااااااا
وبيبطىء التصفح
شوف لو واحد قاعد منسجم فاجاه بدون مبرر يطلع له اغنيه تغنى طبعا عمره ما هيدخل مدونتك او موقعك تانى زى ما انا هعمل
شكرااااااااا

ابوشروق said...

حيثُ أن السيد اوباما يتكلم عن الأسلام كويس وشايف أنه دين سلام وعدل ويستشهد بآيات من القرآن
طب ليه سيادته ما أسلمش مع أن إسلامه من عدمه شىء لا يعنينى إلا أنه سيثبت أن الرجل صادق ومقتنع بما يتكلم

مهندس حر said...

الأخ أبوشروق..

حضرتك شايف إن لما حد يشوف إن أى دين كويس و إنه دين سلام يقوم يعتنق الدين ده؟؟

على كده المفروض إن العكس صحيح.. يعنى الدين اللى ما تعتنقوش يبقى مش كويس و مش دين سلام؟؟؟

طب أنا شايف المسيحية دين كويس و دين سلام و محبة كمان .. بس أنا مسلم .. غريبة دى؟؟

هرطقة said...

نفس الكلام ده انتى قلتيه فى مجموعة الفاجومى على ما أتذكر
لما واحد كان متزرزر وبيقول
يحتلوا أى دولة مسلملة كمان بس محدش يهين الرسول
بس مين يفهم