Saturday, 6 June 2009

انا ح اعمل استطلاع رأي وعايزاكوا تساعدوني فيه

تحديث:
استنوا استنوا استنوا، دلوقت فيه اتنين بيقولوا لي ان الامن ممكن يضايقنا! يضايقنا ليه
ما احنا لما عملنا استطلاعات الرأي، من حوالي خمسة وسبعين سنة لما كنت لسة في الجامعة، ما كانش معايا لا تصريح ولا كارنيه (كنت طالبة تحت التمرين) ولا اي حاجة وماحدش اتعرض لي
يبقى يضايقونا ليه؟ استنوا بقى ماحدش يعمل حاجة لحد ما اسألكوا

الطريقة دي اتعلمتها لما كنت باتدرب في الاهرام ويكلي وفي الشباب
اول حاجة عايزاكوا تقروا الاستطلاع واللي عنده اقتراحات يقول لي عليها
تاني حاجة، اللي ح يتطوع معايا يعمل الاستطلاع يبقى يقول لي ح يشتغل فين عشان ماحدش يكرر نفسه
اولا: الامكان المقترحة
1- محطة مصر
في اي محافظة انت فيها، يعني انا في القاهرة، وفيه ناس في اسكندرية وكده، اللي بتعمله انك تنزل تنقي ناس مختلفة عن بعض بشكل عشوائي، حاول بقدر الامكان تنقي ناس بيشكلوا الاغلبية، رواد الدرجة التالتة يعني، حاول ان وشك يبقى عليه ابتسامة جامدة لا توحي باي شيء، نبرة صوتك تبقى برضه باردة، لو قابلت اي حد مش بيعرف يقرا ويكتب بتقول له الاختيارات من غير ما تركز على جملة او تأكدها بصوتك، يعني صوتك يبقى شبه صوت الكمبيوتر، وابتسامتك تبقى مرسومة مالهاش اي معنى
2- الجامعات
القاهرة/ عين شمس/ اسكندرية/ حلوان/ المنيا....إلخ انا ممكن اشتغل في جامعة عين شمس لانها جنب بيتي، وح تتبع نفس الطريقة، الابتسامة المرسومة ونبرة الصوت الباردة، الطلبة ح توزع عليهم الورق مش ح تكتب بنفسك، هم بيرتاحوا اكتر لما هم اللي بيكتبوا بايدهم
وايضا الجامعات المفتوحة والجامعات الخواجاتي اللي انا مش باحبها
3- النوادي
دول بيبقوا ابوخ ناس الحقيقة، وردودهم بتبقى سخيفة، معلش، حاول تلبس شيك على قد ما تقدر، خصوصا الجزمة لازم تبقى غالية، عشان دي اول حاجة بيبصوا عليها، ولو لقوا جزمتك وحشة مش ح يردوا عليك، باتكلم بجد
نادي هيليوبليس جنبي ممكن برضه اعمله، مين عنده اكسس لنادي الجزيرة او اي نوادي على نفس المستوى؟
4- مواقف الاتوبيسات والميكروباصات
موقف العباسية جنبي، موقف احمد حلمي، موقف السيدة عائشة، واي حد جنبه موقف يقول لي عليه لو مستعد يشارك، وياريت يبقى فيه ناس من المحافظات يساعدونا في الموضوع ده، لان الاستطلاع المفروض يبقى مش القاهرة بس
مصر مش القاهرة، احنا دايما ننسى الحكاية دي
اي حد عنده اقتراحات تانية لاماكن تغطي اكبر نسبة من شرائح المجتمع؟
انا بافكر في كورنيش النيل وكورنيش البحر في اسكندرية
نموذج الاستطلاع
(قابل للاقتراح والتعديل)
الاسم
(اختياري)
النوع:
(اجباري)
السن
(اجباري)
مستوى التعليم
(اجباري)
المهنة
(غير مطلوب التفاصيل/ اجباري)
هل شاهدت خطاب الرئيس الامريكي باراك اوباما الموجه للعالم الاسلامي؟
نعم
لا
من هو باراك اوباما؟
ما رأيك في خطاب الرئيس الامريكي الموجه للعالم الاسلامي؟
- رائع.. بداية جيدة جدا
- مجرد كلام وننتظر الفعل؟
- انا لا اثق في اي رئيس امريكي
- لا يختلف في مضمونه عن خطابات بوش
- لا اعرف
هل لديك ملاحظات اخرى؟ 
------
طبعا ده نموذج اولي لحد ما يتم الموافقة عليه باجماع المشاركين او يتم تعديله وفقا برضه للاجماع
اللي بتعمله الاتي:
ح تقرر المكان اللي انت ح تنزل فيه (مش لازم تختار اماكن كتير، ممكن تاخد مكان واحد بس) وتطبع الاستفتاء ده وتصوره ميت نسخة بالظبط
ح تنزل المكان اللي انت قررته، زي ما قلنا لو الجامعة،  ح توزع الورق وبعدين تلمه منهم، حاول انك ما تنقيش شلة صحاب قاعدين مع بعض لان دول غالبا بيبقوا بيفكروا بنفس الطريقة، او على الاقل من نفس الخلفية الاجتماعية، ممكن اتنين من كل مجموعة
لو ح تنزل موقف او محطة مش ح توزع الورق ح تقراه عليهم بالطريقة اللي اتفقنا عليها بس
وخللي بالك: باللهجة العامية، ما تقراش الكلام ده بالفصحى، تستخدم لهجة عامية وصوتك يبقى عالي عشان يسمعوا كويس، والاحسن انك تقراها مرتين على اللي بتسأله
لو فيه ملاحظة، زي مثلا ان حد جاوب عليك وبعدين في نص الاجابة راح سايبك وماشي، اكتب الكلام ده
لما ترجع البيت ح تفرز الورق زي الاتي
عدد المصوتين من سن كذا لكذا: كذا
عدد المصوتين من المستوى التعليمي كذا (ولنقل جامعة/ ثانوية عامة/ دبلوم/ محو امية/ غير متعلم...إلخ): كذا
عدد الذكور: كذا
عدد الاناث: كذا
وبعدين تبتدي تفرز بناء على الاجابات
المشاركين في الاستفتاء ح تنزل اساميهم طبعا :) بس لازم يقول لي انا ح اشتغل معاكي ويشتغل معايا
لو ما حدش اشتغل معايا خالص انا ح اعمل الاتي:
ح انزل جامعة عين شمس، نادي هيليوبليس، محطة مصر، موقف العباسية
واظن دي عينة مش بطالة
بس الاحسن اننا نعرف المحافظات وبقية الناس
انا في انتظار مقتراحاتكم وتسجيل المشاركين، بس اللي ح يشارك يلتزم، وبيني وبينه ربنا، لو ضرب نتائج يبقى حسبي الله ونعم الوكيل بقى
:)
اعمل له ايه؟
ملحوظة تانية: ده لا يتضارب مع اي صحيفة او مجلة تعمل الاستفتاء ده
بس، معلش يعني من غير زعل، وبما اني اشتغلت في مطبخ الصحافة، الحاجة اللي بيبقى عليها فلوس ممكن نتائجها تنضرب، يقعد في المكتبة ويضرب نتائج عشان ياخد المكافأة، مالم يكون رئيس تحرير رزل يقول لي وريني الورق اللي اشتغلت بيه وهاتهولي هنا كله، زي ما عملوا معانا في الاهرام ويكلي، وبعدين يعمل مجموعة تانية تفرز الورق
بس الاهرام ويكلي كان فييس وما عندوش مانع انه يدفع مكافآت لكل دول في مقابل تبقى نتائج حقيقية، لكن فيه جرايد جلدة، يهمها تعمل عنوان وما يهمهاش تتأكد من النتائج
لكن المتطوع مافيش حاجة تجبره انه يعمل كده غير انه فعلا عايز يخدم
فمضمون اكتر انه مش ح يضرب نتائج
فائدة الاستطلاع:
1- معرفة حقيقية لاتجاهات الرأي العام
2- بناء على المعرفة دي اي حد عايز يخدم يقدر يقرر خطته
3- مجرد الاهتمام بالرأي العام بيخلي الناس عندها كرامة واحساس انها مشارك وان رأيها مهم
في انتظاركوا

34 comments:

جبهة التهييس الشعبية said...

بصوا انا عدلت فيه شوية

استطلاع رأي حول زيارة أوباما لمصر ومخاطبة العالم الاسلامي

الاسم
(اختياري)

النوع:
(اجباري)
ذكر/ أنثى

السن
(اجباري)


مستوى التعليم
(اجباري)
جامعي (طالب او متخرج)/ متوسط/ فوق متوسط/ اقل من متوسط/ أمي


المهنة
(غير مطلوب التفاصيل/ اجباري)

هل شاهدت خطاب الرئيس الامريكي باراك اوباما الموجه للعالم الاسلامي؟

- نعم

- لا

- من هو باراك اوباما؟

ما رأيك في خطاب الرئيس الامريكي الموجه للعالم الاسلامي؟

- رائع.. بداية جيدة جدا

- مجرد كلام وننتظر الفعل

- انا لا اثق في اي رئيس امريكي

- لا يختلف في مضمونه عن خطابات بوش

- لا اعرف

هل لديك ملاحظات اخرى؟


ومنتظرة اقتراحاتكوا

mido said...

ممكن برده تعملى استفتاء مبدئى على المدونة زى استفتاء المعبر

جبهة التهييس الشعبية said...

استفتاء مبدئي على المدونة؟

بس ده ح يبقى لفئة محدودة جدا ولا تشكل اي شريحة من شرائح المجتمع على فكرة

كلهم على مستوى تعليمي معين
كلهم ما بينزلوش عن مستوى اقتصادي معين

كلهم عندهم من الجرأة والشجاعة انهم يبقوا ناشطين على النت حتى لو ما عندهمش مدونة بس عندهم الجرأة انهم يعبروا عن رأيهم

انا عايزة الاستفتاء ده عشان اقارن ما بين من يسمون انفسهم بالناشطين على النت

وما بين الناس اللي عايشة وبتمشي في الشارع

بدل ما اللي على النت دول جالهم اوتيزم ونسيوا ان في الدنيا بني ادمين غيرهم

mido said...

تمام

يبقى نعمل استفتاء للمدونين

و نقارن

باستفتاء الناس

جبهة التهييس الشعبية said...

اللي انت بتقوليه ده، من ان خطاب اوباما مش مهم، ده اتجاه مهم اننا نعرف اذا كان عام في مصر وللا رأي الاقلية

ده رأيك

زي مثلا لما عملنا استفتاء عن التطبيع
في الويكلي
واحد سفسط زي حضرتك كده: وح يفرق بايه نعرف الناس مع وللا ضد التطبيع اذا كانت الدولة عاملة تطبيع في كل الاحوال
يعني لو طلعوا كلهم ضد التطبيع كامب ديفيد ح تتلغي؟

طيب ده رأيه اللي مهم اننا نعرف هل رأيه العبثي ده هو راي اغلبية وللا اقلية وللا نسبة معقولة

راي حضرتك محترم فعلا وانا موافقة عليه

بس اللي حصل
شئنا ام ابينا

ان العالم كله بلا استثناء

لا فيه استثناء واحد، الصين، هي الوحيدة اللي ما اهتمتش بخطاب اوباما امبارح

بس فيما عدا الصين العالم كله اهتم اهتمام هيستيري بخطاب اوباما
او على الاقل
الاعلام العالمي
حتى اسبانيا زعلت انه جاب سيرة الاندلس

مهم نعرف هل الاهتمام ده موجود في الشارع المصري

تبقى نكتة لو العالم كله واقف على رجل
والشارع المصري بيقول كلامك

وتبقى حاجة ايجابية
ويبقى مافيش داعي اننا نجلد ذواتنا

كل واحد دلوقت بيتكلم نيابة عن الشعب المصري والرأي العام ويقول: احنا

طيب مش الناس دي لها لسان تتكلم بيه؟

مهندس مصري said...

يعني إيه أوتيزم ؟

جبهة التهييس الشعبية said...

اوتيزم ده يعني مرض التوحد

مرض بيولد بيه الانسان

شفت فيلم
rain man
بتاع توم كروز وداستن هوفمان؟

بيبقى شخص متوحد، وعايش في عالمه الخاص ومش بيحب يختلط بالناس ولا حاسس بيهم اصلا

وبيكره ان حد يلمسه

Lunatic said...

انا مستعد أشارك
مع انى خايف يتحرق دمى اكتر من كدة الصراحة

جبهة التهييس الشعبية said...

lunatic

متشكرة قوي

انا قلبي بيقول لي، من كلامي مع الناس امبارح، ان دمنا مش ح يتحرق ولا حاجة ان شاء الله

وعموما مش ح نستبق

ومافيش داعي ان دمنا يتحرق في كل الاحوال

لان لو النتيجة طلعت على عكس امانينا يبقى ده معناه اننا مقصرين في حاجة كونا ناس اعضاء في المجتمع وعلينا واجب ناحية الناس اللي ربتنا وكبرتنا



لو سمحت قول لي المكان او الامكان اللي انت اخترتها

وخد الاستفتاء اللي في التعليق اللي انا صلحت فيه

الا اذا كان عندك مقترح

واطبعه نسخة واحدة
وبعدين صوره ميت نسخة اذا كنت رايح مكان واحد

اذا كنت رايح مكانين يبقى ميتين نسخة وهكذا

77Math. said...

هل شاهدت خطاب الرئيس الامريكي باراك اوباما الموجه للعالم الاسلامي؟
نعم
لا
من هو باراك اوباما؟
\\\\\\\\\\\\\\

يا حاجة نوارة

كونترادكشن هنا

امسحي السؤال التاني أو بدليهم طيب على الأقل

مع إني أفضل تمسحي التاني خالص



أنا لو عملت حاجة حبعت لك النتيجة ع الميل


تحياتي

77Math. said...

باي ذا واي

امسحي أمّي، لأن اللي مش بيقرأ ويكتب أكيد مش حيملأ الورقة، وحتاخدي رأيه شفوي

77Math. said...



Take a look to this

مهندس مصري said...

في مقاله بصحيفة إندبندنت علق روبرت فيسك على خطاب الرئيس الأميركي باراك أوباما للعالم الإسلامي بأنه "كلمات يمكن أن تشفي جروح قرون".

وتعقيبا على خطابه المسهب وصف فيسك أوباما بأنه واعظ ومؤرخ واقتصادي وأستاذ في علم الأخلاق ومدرس وناقد وإمام وإمبراطور، حتى كدنا -أحيانا- ننسى باراك أوباما باعتباره رئيس الولايات المتحدة الأميركية.

وتساءل هل محاضرته تلك التي اختير جمهورها بعناية في جامعة القاهرة المصرية ستعيد تخيل العالم وتشفي جروح قرون بين المسلمين والمسيحيين؟ وهل ستحل مأساة الصراع العربي الإسرائيلي بعد أكثر من 60 عاما؟

وأضاف فيسك أن الخطاب كان ذكيا، حيث جمع بين الرقة والقسوة كما يمكن أن يتمنى أي جمهور وكلنا كنا معنيين بالخطاب. وأشار إلى مدحه الإسلام وأن عدد المسلمين في أميركا يقارب سبعة ملايين والمساجد منتشرة في كل ولايات الاتحاد، وأن المغرب كان أول دولة تعترف بالولايات المتحدة، وأن من واجبنا مكافحة أصحاب الصور النمطية عن المسلمين في أميركا، كما يجب على المسلمين مقاومة أصحاب الصور النمطية عن أميركا بينهم.

وأشار فيسك إلى أن خطاب أوباما اشتمل على كم هائل من الحقيقة عندما تحدث عن معاناة الفلسطينيين الذين لا وطن لهم وأن الموقف غير محتمل وأن أميركا لن تتراجع عن أمل الفلسطينيين المشروع في دولة لهم، وأن على إسرائيل أن تتخذ خطوات قوية لكي يتقدم الفلسطينيون في حياتهم اليومية كجزء من الطريق المؤدي للسلام، وأن عليها أن تقر بمعاناتهم وحقهم في الوجود.

وعقب بأن إسرائيل لم تضطر منذ قرن لتحمل مثل هذا النوع من النقد من رئيس أميركي وأن الأمر بدا كما لو أنه "نهاية الحلم الصهيوني".

وألمح الكاتب إلى أن أوباما كان حصيفا في حديثه عن إيران بأنها كدولة يجب أن تعامل بكرامة، وذكرنا بتآمر أميركا عليها في الماضي للإطاحة بحكومة مصدق المنتخبة ديمقراطيا في الخمسينيات وأنه كان من الصعب التغلب على عقود من عدم الثقة.

وفي معرض حديثه عن كون بعض الحكومات "بمجرد وصولها للسلطة تصبح قاسية في قمع حقوق الآخرين"، أشار فيسك إلى التصفيق الحاد من الجمهور المفترض أنه سريع الانقياد. وأنه لو كان بيد الحكومة المصرية لاختارت من كلام أوباما ما يناسب الشعب المصري. وعقب بأنه بات واضحا جدا مدى استياء النظام البوليسي المصري، ونوه بعدم ذكر أوباما اسم مبارك ولا مرة.

وتابع فيسك تعليقه على الخطاب بأنه رغم انبهار الكثيرين بكلام أوباما فإنه أغفل بعض الأشياء. فهو لم يذكر، أثناء انتقاده الشديد لإيران، الرؤوس النووية الإسرائيلية البالغة 264. وعاتب الفلسطينيين على عنفهم لـ"إطلاق صواريخ على الأطفال النيام أو تفجير النساء المسنات في حافلة"، لكنه لم ينبس ببنت شفة عن عنف إسرائيل في غزة، إلا الأزمة الإنسانية المستمرة في غزة. كذلك لم يأت على ذكر قصف إسرائيل للمدنيين في لبنان ولا عن غزوها المتكرر للبنان (17500 قتيل في غزو عام 1982 فقط).

وأردف أن أوباما طالب المسلمين بألا يعيشوا في الماضي، لكنه استثنى الإسرائيليين من هذا الماضي. ومع ذلك لاحت المحرقة اليهودية في ثنيات خطابه، وذكرنا بأنه ذاهب إلى معسكر اعتقال بوخينفالد في ألمانيا.

وأشار إلى ما أسماه إغفال رحيم، حيث خلا الخطاب الذي قارب ستة آلاف كلمة من الكلمة القاتلة "الإرهاب". فقد صار "الإرهاب" نقاطا فاصلة لكل حكومة إسرائيلية وأصبح جزءا من علم النحو القذر في حقبة بوش.

وختم فيسك مقاله بأن أوباما رجل ذكي ورغم أن خطابه لم يكن كخطاب إبراهام لينكولن في غيتيسبرغ أو خطاب تشرشل، لكنه لا بأس به. وعلق بما جاء في ملاحظات تشرشل من أن "الكلمات سهلة وكثيرة، بينما المآثر صعبة ونادرة".
المصدر: الصحافة البريطانية
http://www.aljazeera.net/NR/EXERES/979E05EC-49F5-4443-8284-6677DE2CFDB9.htm

Lunatic said...

طيب
الاماكن هى جامعة القاهرة
ونادى الزمالك ,من غير تريقة. ده اللى مشترك فيه
واحتمال هندسة شبرا - جامعة بنها

مواطن مصري said...

طيب ما ممكن مينزلش خالص و يضرب النتيجة او يجيب صحابو و يتفقو على النتيجة

ما هي مش هتبقى مضمونة بردو يا نوارة

Sonnet said...

Hi Nawara
What about using online survey
http://www.surveymonkey.com/
It may be better
Thanks

مواطن مصري said...

انا شايف ان استطلاع عن طريق النت افضصل حتى نتأكد من النتائج

77Math. said...

^ ^ ^

أهو دا عين العقل، في النت عمر ما الاستفتاء حيبقى مغلوط، ولا حيتم مسح الكوكيز والتصويت آلاف المرات من ذات الجهاز، مش كل المواقع ذكية بما يكفي لمنع ذلك.

بجد حل عادل سالم ناصف فاهم عبد الشكور

mido said...

لحظة بس :


هو انا قلت رأيى فى التعليقين اللى فوق دول ؟ !!

أنا قلت خطاب اوباما مش مهم ؟ !!



غيرى تاريخ البوست عشان التحديث

ايوشة said...

الجامعات فى الوقت ده بتشطب امتحانات يعنى لا هتلاقى طلبة ولا موظفين حتى فايقين للاستفتاء وهتلاقى الاعداد قليلة جدااااا
حل هيكون استفتاء على النت مع استفتاء الورق برضو

عندما انتهيت من صنع سفينتى..جف البحر said...

مساء الخير الفكرة جميلة وهيكون مجهود جامد بس عندى سؤال مبدئ ايه الهدف منه وازاى الاستفادة من النتايج
تانى حاجة انا من ضمن شغلى الاستبيانات يمكن بشكل مبسط بس انا هقولك بعض الملاحظات نتيجة شغلى فى الموضوع بشكل عام يعنى بحاول اساعد الاستبيان من الجميل انو يكون اختيارات الاجابة لكل سؤال لو نفس الاستبيان مثلا 3 اختيارات او 5 مثلا زى ممتاز - جيد جيد جدا ضعيف مثلا يعنى وجميل انو يكون ليه كود يعنى لو محافظة معينة ليها كود غير التانية لو بيئات مختلفة يكون ليها اكواد دا لو عاو عاوز تحليل اكتر اما لو عاوزة نتائج عامة فمش لازم وابعدى عن الأسئلة المفتوحة الى فيها حكاوى زى السؤال بتاع من هو باراك اوباما
لكن مثلا ممكن تسأليه بطريقة تانية زى مثلا بارك اوبما من اصلى عربى - افريقى -او مثلا باراك اوباما دكتور او باحث او طبيب
او مثلا يعنى انا طبعا مجرد امثلة لان عادة الاسئلة المفتوحة بتزهق الناس وبتتعب فى التحليل
وانا ملاحظة ان مفيش ذكر لفئة الطلاب يعنى لو ممكن نشوف الطلاب المرحلة الاعدادية والثانوية مثلا رايهم ايه لانو رأيهم مهم
وبرافو عليكى وربنا معاكى
وبالنسبة للتحليل فيه برنامج اسمه spss دا طبعا هايل ف شغل الاستبيانات
واهم من دا كله لازم تكونى عارفة ازاى هتستفيدى من النتائج
اما لو مجرد تشوفى اتجاهات الناس فباينة على الفضائيات وربالتوفيق

lastcrazyboys said...

والله انتي فيكي حــاجة لله

مش عشان الموضوع ده كان في دماغي ..لأ عشان سبحان الله ..اللي كنتي خايفة منه ..ورافضاه حصل عكسه تماما
وعسى أن تكرهوا شيئا

انــا لسة جاي من وسط البلد..الناس كلها - اللي اعرفهم طبعا - ودول يعتبروا شرايح ثقافية وعمرية متنوعة من الابيض يا ورد لحد اللي بيستهلوا كلامهم بـ:أنا أرى
كلللللللللله شايف ان اللياقة البدنية بتاعة الراجل جامدة..واول مرة الاحظ ان اصدقائي زي عجائز الفرح بيدققوا في البدلة والكاجوال
بس يمكن لأن الراجل له كاريزما ..ما شفتهاش على الريس من ساعة ما اتولدت وده كلام صديقي المثقف الصحفي"
اه ..اخيرا ليا واحد صاحبي في السويد اقام الفراح والليالي الملاح لما اوباما كسب - انا كنت فاكره معجب بالتجربة زي حالاتي- لقيته النهاردة داخل الفيس بوك مخصوووووص بعد غياب حوالي 3 اشهر عشان يكتب الجملة دي بالعربي والانجليزي

" اوبــاما ..لست سوى ممثل جديد من الهوليوديين ..وامتــداد صريح لذوي الياقات البيضاء ..رحم الله ايامك يا مانديلا"
obama..fuck you


كــاتب كد بالضببببببببط
===

عاجبني جـــدا جدا اقتراحك..بس عايز معالجات قبل الطرح النهائي
خدي اقتراحات الناس قبل التنفيذ

انا شايف انه ممكن نضيف الوسط العائلي ودي مهمة جدا ..وأسهل انواع الانطباع

ابويا مثلا كان شايفه كلام موزون ومعتدل-ابويا ناصري متحفز-..وميضرش انه نشوف الأفعال

خالتي كان صعبان عليها انه عدى من الهرم ومعملتش معاه الواجب ..او حتى على الأقل تعمله باي باي وهو في الهيلكوبتر

ليا ابن عمتي بيسب لمصر من اول ما ينزل البيت لحد ما يوصل مشواره ..في اي وقت واي حتة
شايف انه: ياعم احسسسسن ..واحنا مالنا بولاد التيييييت دول ..عشان يجيلنا واحد زي الجعر بتاع اليمن يقولنا ما بتحاربوش ليه ولا واحد يقولك هنحارب لحد اخر جندي مصري
انا مبكرهش في حياتي زي الفلسطينين دول ...
وثواني ويرجع يكلم نفسه يقول: هو مش ملاك ..بس أهــو بيدور على مصالحه ..واحنا كمان بقى نشوف مصلحتنا بدل ما نجري ورا اللي بيخبطوا فينا في الآخــر
********
يعني دي عينة عشوائية طبعا مكنتش عامل حسابي ..بس كنت بحاول اركز واشوف الانطباعات المختلفة على الأجــواء حولي

على الله اكون هفيدك بحاجة لو بسيطة

over dose said...

كمان مرة

اوباما

"هيئة نابليون وشخصية شارلي شابلن

-----------------


مين الكداب اللي كان بيقول ممكن تخدع بعض الناس بعض الوقت الخخخخخخخخخ


لا معلششششششش

ممكن تخد كلللللللللل الناس
طولللللللللل الوقت

سوري ع التعليق ده

بدراوى said...

الصراحة انا كنت ناوى اقول لحضرتك الكلام ده بخصوص الامن ممكن يضايقنا
لتقوليلى اجمد يا واد بطل جبن

بس الصراحة ورق الإستطلاع ده اكيد
بنسبة مليون المية حيتحرز كمنشورات و نروحوه فى ابو نكله
خاصة لو رحت جامعة اسكندرية
الأمن هناك مفنجل عيونه

mido said...

أوباما كان بيقرا الخطاب مش ارتجال


نفس التقنية اللى كان بيستخدمها بوش

أكون أو لا أكون said...

ليه هو في الجامعات محدش بيعمل استطلاعات للرأي أو إحصائيات لزوم الدراسه؟
وله يعني المشكله في السؤال المطروح...؟

أكون أو لا أكون said...

نواره ...
السؤال كان: هل شاهدت خطاب الرئيس الامريكي باراك اوباما الموجه للعالم الاسلامي؟
بعدين السؤال مطروح اجابته في السؤال اللي بعده...! "من هو باراك اوباما؟

wahat_alshohada said...

ههههههههه
ما هو على ايامك يا نوارة
من 75 سنه مكنش فيه مبارك و لا العادلى
الله يرحمه بقى الملك فؤاد كانت ايامه - كدة
فاكره يا نوارة
ايمان بدوى

مواطن مصري said...

ركزت الصحف الإسرائيلية الصادرة اليوم الجمعة، على تحليل الخطاب التاريخى الذى ألقاه الرئيس الأمريكى باراك أوباما من القاهرة، واهتمت الصحف بتأثير الخطاب على مستقبل العلاقات الإسرائيلية – الأمريكية.

صحيفة معاريف اهتمت بخطاب أوباما، وتحت عنوان "الرئيس أوباما ساذج وسيخيب أمله"، كتبت الصحيفة هذا العنوان الذى نقلته عن مصدر سياسى رفيع المستوى، موضحة أن المخاوف والقلق سيطرت بالأمس، على القدس قبل ساعات من الخطاب التاريخى للرئيس أوباما، موضحة أن المخاوف كانت من أن يدير أوباما ظهره لإسرائيل، ولكن بعد الخطاب، زالت المخاوف والقلق ليحل محلهما الشك.
http://www.youm7.com/News.asp?NewsID=105952

الصحف الإسرائيلية تصف أوباما بـ"الساذج"

simplymoi said...

واشنطن - أ ف ب

أعلن البيت الابيض ان الرئيس باراك اوباما ارجأ الجمعة 6-6-2009 نقل سفارة الولايات المتحدة من تل ابيب الى القدس ستة اشهر، بسبب عدم التوصل الى اتفاق نهائي بين الاسرائيليين والفلسطينيين حول وضع المدينة. وينص قانون صدر في 1995 على نقل السفارة لكن الرؤساء الامريكيين اضطروا باستمرار الى ارجاء تطبيقه. وذكر مسؤول امريكي ان سياسة بلاده لم تتغير، وان الوضع النهائي للقدس يحتاج الى حل في اطار تسوية سلمية بين الاسرائيليين والفلسطينيين.


وقد اعلنت اسرائيل القدس عاصمتها في 1950.

واحتلت اسرائيل ثم ضمت القطاع الشرقي للمدينة خلال الحرب الاسرائيلية-العربية في 1967 وتعتبر المدينة بكاملها "عاصمتها الابدية الموحدة".

ولا تعترف المجموعة الدولية بضم القطاع الشرقي للمدينة الذي يطمح الفلسطينيون الى جعله عاصمة دولتهم المقبلة. واعلن قرار لمجلس الامن ان اعتبار القدس بما فيها شطرها الشرقي عاصمة في القانون الاسرائيلي في 1980 "لاغ وكأنه لم يكن".

وتتخذ البعثات الدبلوماسية الاجنبية في اسرائيل من تل ابيب مقرا لها.

وتعهد الرئيس الأمريكي بالضغط على الفلسطينيين والإسرائيليين من أجل دفع عملية السلام انطلاقا من حل الدولتين.

وأعلن في خطابه للعالم الإسلامي من القاهرة الخميس الماضي، معارضة واشنطن لتوسيع الاستيطان الإسرائيلي في الأراضي العربية المحتلة
IT IS THE END

Lunatic said...

هو فى قانون يقدر يمنع التواصل بين الناس
مش كفاية العزلة اللى عايشينها

جبهة التهييس الشعبية said...

ماحدش يكلمني عن استطلاعات النت تاني
جمهور النت في العالم العربي شريحة صغيرة
وبعض من ناشطين النت في مصر بالتحديد ابتدوا ينسوا ان فيه بني ادمين في مكان تاني غير العالم الافتراضي


lunatic

انت بتركب مواصلات؟
اصل ممكن يمنعونا نوزع ورق
لكن مش ممكن يمنعونا نرغي مع بعض
انا فكرت في اني ارغي مع الناس كده زي ما بنرغي مع بعض
وقبل ما انسى اسجل في النوتة بتاعتي

جبهة التهييس الشعبية said...

ههههههههههههه
واحد امبارح قال لي: يعني يا اثتاذة اوباما ده ح يلغي الدروث الخثوثية؟ اثلها قطمت وثطي
:)

جبهة التهييس الشعبية said...

وواحد قال لي: بيقرا قرآن وعارف ربنا وراح صلى في مسجد السلطان حسن
هههههههههههههههههههههههه