Saturday, 13 June 2009

مش ح يفرق كتير موسوي من نجاد

ولو اني شايفة ان رد الفعل الطبيعي لاي انسان سوي في مصر لهوجة الانتخابات اللي مكتسحة العالم اننا نحقد وبس
لكن بما اننا بقينا اساتذة في متابعة الانتخابات اللي بيعملها غيرنا زي الشاب اللي مش عارف يتجوز وعمال يشتري في مجلات ويأجر في افلام فاحب بس اوضح حاجة، الاصلاحيين والمحافظين، زي الديمقراطيين والجمهوريين في امريكا كده
يعني فيه اساسيات متفقين عليها مش ح تتغير، اللي بيتغير هو التون في الخطاب السياسي
لكن مثلا
1- البرنامج النووي
لو ينفع يبقى فيه مصري يقتنع بهد السد العالي، يبقى ينفع ايراني يقتنع بايقاف البرنامج النووي، محافظ بقى اصلاحي، بيحب الملالي بيكره الملالي، مافيش ايراني يقبل ابدا بوقف النشاط النووي الايراني، ده مشروع قومي بالنسبة لهم، مافيش غير ابن الشاه
والشاه فعلا مكروه، ماحدش بيترحم على ايامه غير اللي كانوا بيشتغلوا استغفر الله العظيم (باتكلم بجد) والحرامية (باتكلم تاني بجد) لانه كان ديكتاتور فعلا، وفاسد، وحرامي، واخلاقه مش كويسة (باتكلم بجد)، ومش زي مبارك، زي صدام، لا والله، هو صدام مفتري بس مش حرامي، هو خليط ما بين فساد مبارك وافترا صدام، وابن الشاه بيقول على ايران انها توقف برنامجها النووي فورا وهم اصلا مش مهتمين بتصريحاته اكتر من اهتمامنا احنا بتصريحات احمد فؤاد ابن فاروق (ولو ان الشهادة لله ابن فاروق مش وغد كده ابدا، الراجل عمره ما قعد يحرب على انه ياخد عرش مصر تاني، ولا قال اي تصريحات فيها خيانة لبلده) فده بالنسبة للنشاط النووي
لو حتى نظام الملالي كله اتغير وجابوا انشالله شيوعيين مافيش حاجة ح تتغير في الموضوع ده
هو فيه حد بيكره بلده يا ناس؟
2- الموقف من اسرائيل وامريكا
بالظبط هو هو نفس الفرق ما بين موقف بوش اوباما، على راي امي واحد ح يقول: قوموا فزوا اخزق عينيكوا، وواحد بيقول: ممكن لو سمحتوا اخزق عينيكوا
نفس الحكاية بالنسبة لايران، المحافظين ح يقولوا امريكا الشيطان الاكبر والمحرقة اسطورة
والاصلاحيين ح يقولوا: لا لا لا لا لا لا، مش شيطان ولا حاجة، هي بس بقرون وديل وشوكة، والمحرقة امممم يعني احنا مش ح نقعد نعيط عليها، اصل ما هياش حاجة مهمة للدرجة دي
المحافظين ح يتكلموا عن فلسطين كتير
والاصلاحيين مش ح يتكلموا عن فلسطين بس دعم المقاومة (اللي هو اصلا متصل بامنهم القومي) ح يستمر زي ما هو
لو فيه حد يتخيل ان امريكا ممكن تبطل تدفع فلوس لاسرائيل، يبقى ينفع ان ايران تبطل تدفع فلوس للمقاومة، امال ح تعمل ايه يعني؟ مش كل الناس ترضى على نفسها اللي احنا قابلينه على نفسنا، الايرانيين معتزين جدا بنفسهم، وبلغتهم، وببلدهم، وعندهم امل انهم يبقوا حاجة كويسة ومش ح يقبلوا انهم يبقوا تابعين لاي حد، وامريكا واسرائيل بتخيرهم ما بين يبقوا تابعين او تهدد امنهم، وهم مش ح يقبلوا كده، هم عندهم اقتناع داخلي انهم اولى بلقب "قوة عظمى" من امريكا، ودي حاجة مش ح تتغير لا بتغير الرئيس ولا حتى بتغير النظام، عشان كده لو تلاحظوا
ولما كلم العالم الاسلامي من عندنا
حاول في كلامه للايرانيين انه يبقى حسيس وما يقولش ولا كلمة تجرحهم ولا تحسسهم انهم تابعين، ولا كشر ولا شاور لهم بصباعه كده زي ما عمل معانا، ومع ذلك برضه ما عجبهمش وقالوا عليه قليل الادب وجلياط وتطاول علينا، هم كده عندهم احساس متضخم بالكرامة
بس بقى انا الكلام ده غاظني
3- احنا مالنا؟
4- احنا مالنا؟
5- احنا مالنا؟
6- احنا مال امنا؟
اذا كان اصحاب الشأن (اللي هم امريكا واسرائيل) مش فارقة معاهم لانهم عارفين ان مافيش فرق كبير، الفرق ان المحافظين ح يتخانقوا والاصلاحيين ح يمطوحوهم، وفي الاخر الاتنين بينفذوا نفس البرنامج، لانهم ما يقدروش يعملوا غير كده، الايرانيين ياكلوهم، دي عالم مفترية :) انتوا ما شفتوهمش وهم بيسقطوا الشاه كانوا عاملين ازاي؟ 
احنا بقى؟ ايه وضعنا في الحياة؟ احنا بالنوسبة لايه؟ حاشرين مناخيرنا في انتخابات الناس ليه؟ لا وحسني مبارك طالع، بمنتهى البجاحة والبجاسة، يتكلم في القناة الاولى عن الانتخابات اللبنانية ويقول دي ارادة الشعب
طب بالنوسبة لارادتنا احنا يا حاج؟ وللا انت مش معتبرنا شعب؟ ده واحد انطس في عقله ورشح نفسه قدامك اتشرشح واتسجن وبقى كل اللي ما يشتري يتفرج عليه، واديه ح يطلق مراته بسبب ملاحقة دعوة الحاجة ام حسني اللي قالت لك: روح يابني، ربنا ينصرك على مين يعاديك، ولجل الحظ الاسود، بقى فيه تمانين مليون معاديينك
عندك حق
احنا اللي قلالات العقل عشان نعادي منوفي

66 comments:

mido said...

نجاد نسبته بتقل تدريجيا

مهندس حر said...

نوارة..

ريحى نفسك يا بنتى .. فيه ناس بتبلع حبوب منع الفهم على الريق كل يوم و مالهومش حل..

فيه ناس مستنيين النتيجة عشان يفرحو بموسوى لو نجح و يشيدو بديموقراطية إيران أو يشرشحوا لنظام الملالى عديم الديموقراطية إذا نجاد نجح ..

حته إنهم يفهموا إن فيه حاجة إسمها المصالح الإستراتيجية و الثوابت القومية بعيدة عن عقلهم و إلا يبقى ها يعترفوا إننا بعنا مصالحنا الإستراتيجية و قلعنا ثوابتنا القومية و قاعدين بلبوص دلوقت..

mido said...

كان مستفز اوى و هو بيتكلم عن احترام ارادة اللبنانيين

و الحكم للأغلبية

و انه بيقابل ناس غلابة فى طريق موكبه و بيساعدهم

:D

الكلمة نور said...

هذا تعليق ليس له علاقة بالموضوع انما استغلال لمدونتك وعشان باشوف دكاترة هنا اكتر من اللى فى معهد القلب
انا عايز عنوان دكتور عظام كويس يكون متخصص فى علاج المفاصل وخصوصا حالات اصابات الركبة فى القاهرة

هذه اعادة مع الاعتذار
ولكى جزيل الاحترام

mido said...

فيه ناس مستنيين النتيجة عشان يفرحو بموسوى لو نجح و يشيدو بديموقراطية إيران أو يشرشحوا لنظام الملالى عديم الديموقراطية إذا نجاد نجح ..


عجبتنى اوى الكلمة دى يا باشمهندس

و نشرتها على تويتر و فايسبوك
:)

Founoon said...

نجادافضل بالنسبة لاسرائيل

انما في الاخر هما الاتنين واحد

واحنا مالنا

مش معقول بجد احنا ابتدينا نصعب عليا فعلا

ياعيني علينا

نفسنا نعيش موود الانتخابات للدرجة دي
مش ملاحقين يا عيني من امريكا للبنان لايران

آآآآه
دنيا

بالنسبة للمقابلة بلاش السيرة دي

في عمر افتراضي لاجهزة الجسم
بجد حقيقي حرام كدا
خلانا نصعب عليا اكتر

يساري نوبي said...

و الله عندك حق مافيش فرق بين نجاد و موسوي بس احنا اتعودنا علي نجاد
و انت عارفه بقي احنا شعب عشري و مابنفارقش الناس بسهوله .....ماانت شايفه حبيب الملايين قاعد بقاله 28 سنه اهو

جبهة التهييس الشعبية said...

ههههههههههههههه
ههههههههههههههههه
انا بقى مت من الضحك من كلمة

"عايزين نعيش في المود"

ههههههههههههههههههه
والله احنا غلابة

مهندس حر said...

نوارة

هو أوباما فعلا قال: واضح إن خطابى للعالم الإسلامى كان ليه تأثير؟؟
جبتيها منين دى؟؟

و ده المقصود بيه الإنتخابات اللبنانية؟؟

جبهة التهييس الشعبية said...

اه والله يا مهندس
شفتها على الجزيرة

جبهة التهييس الشعبية said...

نجاد عمال يتقدم
احسن احسن
صحيح مافيش فرق بس انا عايزة اللي كايدهم ده يكسب

جبهة التهييس الشعبية said...

اه يا مهندس
جاب سيرة الانتخابات اللبنانية وقال واضح ان خطابي للعالم الاسلامي كان له تأثير

مهندس حر said...

الراجل باينله إتعدى من عوكل فى ال20 دقيقة اللى قعدهم معاه .. مش كان بدرى عليه حكاية الدور و التأثير دى؟؟

بس بصراحة اللى شافه فى القاعة يوميها يلف دماغ أى واحد .. الراجل تلاقيه كان خايف يراودوه عن نفسه!!!

well said...

طريقة تحليل جميلة وبسيطة فى نفس الوقت بصراحة عجبتنى وعجبنى ان الناس دول مش عاوزين يبقوا تابعين لحد
ممكن نكون بنختلف معاهم فى حجات كتير بس بصراحة ناس عندهم مبدأ

بدراوى said...

انا عايز اشكر حضرتك جداً
على التحليل السياسى الجميل
ربنا يخليكى للشعب
لازم تشرحى نفسك فى انتخابات الكوتة
ههههههههههههههههه
---------
ثانى حاجة
مواطن مصرى بيعضعض انامل الندم
بعد تواتر اخبار عن قرب انتصار نجاد
هههههههههههههه
---------
ثالث حاجة
احنا برده لينا ثوابتنا
يعنى اذا كان ايران لن تتخلى عن برنامجها النووى
سواء اصلاحيين او محافظين

احنا لن نتخلى عن مضادنا الحلوى
و خيارنا الإستراتيجى
و عجلة سلامنا
و لن نتغير
ابداً

يعنى فكرك لو جه مبارك بدل مبارك
حتفرق
مع الأخذ فى الإعتبار ان مبارك المقصود مرتين
هو السيد الرئيس لأن جيمى شكله مش حيشوفها ابداً
هههههههههههههههههههه
-------
شكراً ليكى تانى
و نعم للإستقرار

مواطن مصري said...

انا قولتلك مش هيخسر نجاد و موسوي هيكسبب

بس جة س جة ص مش هتفرق كتير


بس الاسلامين او المحافظين شعبيتهم عمالة تقل في الدول

جبهة التهييس الشعبية said...

هههههههههههه
عرفت ليه يا مهندس حر بقالنا سبعتلاف سنة كل اللي ييجي يحكمنا يقول: انا ربكم الاعلى؟

مواطن مصري said...

اة نسيت اقول ان ديموقراطية ايران مزيفة عشان ايران حكم ديني الراي الاول و الاخير في يد مرشد

جبهة التهييس الشعبية said...

هههههههههههههه
مواطن
انت عامل زي امريكا
لما نتائج تعجبك تبقى ديمقراطية حقيقية ولما النتايج ما تعجبش تبقى الديمقراطية زائفة

طب واشمعنى الديمقراطية الطائفية بتاعة لبنان مش زائفة؟

واشمعنى امريكا دولة دينية ومسيطر عليها اللوبيات وابتدت مراسم ترسيم الرئيس بتاعها بصلاة دون اي مراعاة لمشاعر المواطنين الكاثوليك واليهود والهندوس والمسلمين والملحدين والبوذيين اللي انتخبوا اوباما مش ديمقراطية زائفة؟

مواطن مصري said...

امريكا مش بيحكمها المرشد الاعلى

لبنان مش حكم ديني يمكن لبنان فيها طائفية بس مفيش حكم نظام ولاية الفقية او المرشد الاعلى

مهندس حر said...

على فكرة حكاية إننا نفسنا نعيش فى مود الديموقراطية ليها أثر فى الوله العبيط للبعض بأوباما.. الهالة اللى إتعملت لأوباما أيام الإنتخابات بوصفه نموذج للحلم الأمريكى و صعوده هو إنتصار هائل للديموقراطية الأمريكية لعبت بدماغ ناس كتير فى العالم كله..

بدراوى said...

كنت عايز اسأل حضرتك
سؤال

هو احنا ليه من ساعت ما نجاد جه فى 2005
و احنا علاقتنا مع ايران متوترة
قصدى علاقة مصر

و طلع اللى يقولك ده مش عارف عاملين قبر للمجوسى اللى قتل سيدنا عمر

و معرفش شارع الإسلامبولى

طب ما احنا علاقتنا كانت الى حد ما كويسة ايام خاتمى

امال مكنش بيتقال الكلام ده ليه وقتها
؟!

جبهة التهييس الشعبية said...

بدراوي

بقى بذمتك مش عارف ليه؟

عشان ايران محبطة من نجاحنا

بدراوى said...

ههههههههههههههه
لأ بجد مش بهزر

انا بتكلم بجد

ارجوكى رد عليا
بجد
مش بهزار

جبهة التهييس الشعبية said...

مواطن مصري

دي اسمها ديمقراطية على كيفك

ايه تعريف الديمقراطية؟

بص، انا اصلا لا باحترم الديمقراطية ولا باحبها وباحس انها ضحك على الدقون
واكيد فيه نظم حكم كتير تانية غير ديكتاتورية وديمقراطية
وهي ان الناس تتحمل مسئولية بجد مش تنتخب مجلس ورئيس وتخلع دماغها لمدة اربع سنين

المرشد اللي بتتكلم عليه ده رأيه استشاري

وفيه واحد اسمه عاشق مصر شارح التفاصيل بالظبط
وكل ديمقراطية لها مرشدها
امريكا مرشدها اللوبيات المعتمدة اصلا على الضغط الاقتصادي والاعلام
يعني مرشدها الفلوس

ولبنان مرشدها الطائفية
يعني تلاقي واحد مش طايق سعد الحريري - وانا شفتهم والله في لبنان - ويديله صوته عشان هو سني ولازم ينجح المرشح السني

وايران مرشدها ديني
وبصرف النظر عن رايي الشخصي في ان الناس مش محتاجة مرشد اساسا

بس بما ان الديمقراطية في اساسها لازم يكون لها موجه او مرشد يرسم المنهج المتبع في الحياة السياسية
فالحقيقة لما يبقى المرشد ديني احسن بكتير من مرشدين رجال اعمال او عصبية قبلية، على الاقل حاجة فيها روحانية واخلاق

مواطن مصري said...

ايران ملهاش وش صريح مع العرب مازالت تقول على الخليج العربي الخليج الفارسي مازالت تحتل جزر الامارات و حلمها تنقض على الخليج العربي و تغزو العراق

مشروع الدولة الفارسية ثار قديم بينهم و بين روما


دة غير انهم قتلة السادات

مواطن مصري said...

يا سلام الفلوس تعمي الشيخ و القسيس

وقت عصور الوسطى ماكانو بيشترو رجال الدين

جبهة التهييس الشعبية said...

بدراوي
احنا عمرنا ما كانت علاقتنا بايران كويسة

هي في فترة خاتمي كانت هادية بهدوء علاقة ايران مع امريكا واسرائيل
نجاد نجح فورا بعد بوش
واول ما جه طبعا بوش بقى
عامل مشاكل مع طوب الارض
ونجاد مستعد للمشاكل
واتحداهم كتير هم واسرائيل

ايه بدراوي؟ وبجد ومش باهزر، انت كل ده مش مصدق بتبعيتنا لامريكا واسرائيل؟

طب قول لي احنا علاقتنا وحشة بمين امريكا واسرائيل بيحبوه وكويسة بمين امريكا واسرائيل بيكرهوه؟

يا راجل ده احنا شغالين لهم صدى صوت

مهندس حر said...

بدراوى
------
إحنا علاقتنا متوترة مع إيران منذ قيام الثورة الإسلامية و فترات الإنفراج النسبى تعتبر مجرد إستثناءات..

و على فكرة إتهامات النظام لإيران بدور فى محاولة هز الإستقرار الداخلى فى مصر قديمة .. و فى الثمانينات و التسعينات كان فيه إتهمات مباشرة و غير مباشرة بإن إيران كانت بتمول بعض التنظيمات الإرهابية اللى كانت ناشطة فى مصر وقتها..

طبعا فى المقابل إحنا ساندنا العراق فى حربه ضد إيران بشكل كبير جدا وصل لمشاركة خبراء عسكريين فى إدارة بعض المعارك على الأرض..

جبهة التهييس الشعبية said...

اه
احنا ابتدينا نخرف بقى

هم قتلة السادات ازاي بقى؟

ياريت تشرح لي

احنا نفخر ولله الحمد اننا عمرنا ما استوردنا حلول وان اللي قتل السادات - تسلم ايده - مصري ابن مصري من الجيش المصري ولنا الشرف

الايرانيين قتلوا السادات ازاي بقى؟


طب الاخوان وقلنا واحد وانت في المدرسة اخوانجي خطف منك ساندوتش المربى

مالك ومال ايران بقى بتتبلى عليهم ليه؟ واحد ايراني عضك وانت بتلعب كورة؟

بس انا والنبي نفسي اسمع قصة انهم هم اللي قتلوا السادات دي

هي وبعدين؟

بدراوى said...

انا كدة فهمت
و كدة تصورى صح

تعرفى قريت مرة مقال لأسامة غريب
بيقول فيه ان لو ايران حاربت اسرائيل
اخواناه العرب
حيقفوا ضد ايران و يقولوا انها عملت مغامرة غير محسوبة

و مش بعيد الأمر ينتهى بإحتلال ايران
!!!!

لو عايزة لينك المقال اجبهولك
---
و فى مرة تانية فى نقاش على الفيس بوك
مع اخ سورى
و اخ مصرى
انا كنت بقرا النقاش

المهم الأخ المصرى عمال يقول مصر و ضحت و عملت و بدل ما سوريا تتشطر على مصر
خليها تحارب اسرائيل و تحرر الجولان

الأخ السورى رد على المصرى
رد عجبنى جداً

قاله احنا لو فكرنا نحارب اسرائيل حتطلعوا تقولونا مغامرة غير محسوبة
و تتهمونا اننا نغامر و نفعل كذا و كذا

رغم ان السبب الرئيسى فى ضياع هضبة الجولان كانت مصر فى 67

واضح ان فضايحنا منتشرة
:-(

جبهة التهييس الشعبية said...

اسامة غريب بيهزر

لكن نتانياهو لما قال احنا والعرب متفقين اتفاق غير مسبوق فيما يخص ايران ما كانش بيهزر

mido said...

عايز أضيف ان :
المرشد منتخب من مجلس الخبراء و مجلس الخبراء منتخب من مجلس الشوري اللي بدوره منتخب من الشعب يعني المرشد منتخب من الشعب بطريقة غير مباشرة

مهندس حر said...

بس بلاش تسلم إيده دى..

هو أنا ما بحبش السادات الله يرحمه بس يعنى عاجبك اللى حصلنا من بعده؟؟

بدراوى said...

ايوا عارف ان اسامة غريب بطبعه ساخر
و بيهزر
بس جزء من هزاره حقيقى مع الأسف
--
بس عايز اقول حاجة
كلام مواطن عن اطماع ايران حقيقى فى جزء منه
بخصوص الخليج العربى
لكن الفكرة هى مش استبدال عدو بعدو

يعنى تبقى اسرائيل سمن على عسل و ايران كخة

او العكس
و بعدين ايران سهل الصلح معاها
لكن اسرائيل صعب
---
اه بخصوص قتلة السادات
ايه تسلم ايده ديه
!!!!
صدمتينى
!!!

مهندس حر said...

لأ يا بدراوى لأ..

مش عشان ما هو موسم التنطيط على مصر يبقى تصدق كل اللى يتقالك ..

إحنا مال أهلنا إن إسرائيل خدت الجولان فى 67 إحنا مسئولين عن إنها خدت غزة و سينا و بعدين أصلا تصعيد الموقف و غلق خليج العقبة كان سببه إشاعة أو حقيقة الحشود الإسرائيلية على الحدود مع سوريا .. و بعد كده فى 73 تطوير الهجوم اللى كشف خطوطنا و أدى للثغرة كان بهدف تخفيف الضغط على الجبهة السورية لأن سوريا كانت بتخسر الحرب..

مواطن مصري said...

اسرائسيل زي ايران واحدة عاوزة تعمل دولة يهودية و تعيد امجادها و التانية عاوزة تعيد امجاد الدولة الفارسية الي انهزمت على يد الرومان

جبهة التهييس الشعبية said...

مهندس حر

اللي حصل لنا من بعده ده ح يتحط له في ميزان سيئاته
هو اللي راح استحمر له واحد وجابه نايب عشان يبقى نايبة علينا

بيقولوا في السياسة، من قديم من ايام الحضارة الرومانية، كل واحد بيجيب نائب او مساعد ليه يجيبه اغبى منه عشان ما ينطش على كرسيه


قام عبد الناصر جاب السادات، والسادات جاب حسني

وحسني لحد دلوقت مش عارف يلاقي واحد اغبى منه يعمله نائب


بدراوي

يا جدعان ما الراجل ناعوم تشومسكي كاتب نص خطاب كيري اللي بيقول فيه عايزين نعيد صياغة المفاهيم بحيث ان العرب يبطلوا يكرهوا اسرائيل ويبتدوا يكرهوا ايران معانا

اطماع ايه؟

يعني ايران ح تحتل مصر؟
حد يرد على السؤال ده اللي كل ما اسأله ماحدش بيرد عليا

ايران ح تحتل مصر؟ منتظر يعني، عمرها حصلت من ايام قمبيز ودارا لحد دلوقت؟

طيب يعني احنا منتظر اي حد يحتلنا
اسرائيل ممكن تحتلنا
امريكا ممكن تحتلنا
ده دول حوض النيل عايزين يقطعوا علينا المية

سايبين احنا كل دول وماسكين اللي في النص

مش لازم نصاحب ايران
بس انا حاسة انهم بيقولوا لنا: بصوا العصفورة؟

مواطن مصري said...

يعني ايران ح تحتل مصر؟
حد يرد على السؤال ده اللي كل ما اسأله ماحدش بيرد عليا



انا سمعت من كذا واحد ايراني بلاش شيعي ان ايران عاوزة تنشر التشيع في مصر تاني زي الدولة الفاطمية كدا بس انا مصدقتهوش

هرطقة said...

"رغم ان السبب الرئيسى فى ضياع هضبة الجولان كانت مصر فى 67"

أحب أضيف ان فى 73 مصر برضه اللى لبست سوريا فى الحيط

الله يحرقه اللى كان السبب

مهندس حر said...

كلمة أطماع إيرانية كلمة كبيرة ..

فيه مصالح متعارضة و فيه مصالح متوافقة بين إيران و الدول العربية و ده المفروض إنه شيئ طبيعى ..

المفروض إن مصر مالهاش مشاكل حقيقية مباشرة مع إيران .. و لو تصورنا إن مصر بتمارس دورها الطبيعى كقائدة للعمل العربى المشترك -هههههه يعنى فى المشمش بس لو - ها يبقى مشكلتنا مع إيران هو التفاهم بخصوص الجزر الإماراتية و عدم التهديد بالتدخل فى الشأن الداخلى لدول الخليج اللى عندها أقليات كبيرة شيعية و من أصول إيرانية ..

بدراوى said...

ايوا عليكى
نووور
هى بص العصفورة
تشتيت الإنتباه
بالضبط

انا مش ضد ايران و لا معاها

بس مش ابقى افتح الجرايد الاقيها ماسكة ايران مقطعاها تقطيع
و مبهدلاها

و كأن اسرائيل مش عدو
--
بالمناسبة فيه مرة قريت حد
قال اسرائيل عدو معروف لينا
لكن ايران عدو خفى
مش معروف لينا
عشان كدة لازم نركز مع ايران اكثر
عشان اسرائيل عارفين ديتها
و كاشفة وشها
!!!
تخلف صحفى استراتيجى
!!!

جبهة التهييس الشعبية said...

لا حرام عليكوا

احنا عملنا ايه لسوريا؟
سنة سبعة وستين كلنا اتهزمنا
مش احنا ضيعنا الجولان، احنا ضاع مننا سينا وكلنا ضاع مننا بقية فلسطين

وسنة تلاتة وسبعين السبب في الثغرة اننا كنا عايزين نخفف الضغط على سوريا

مش للدرجة دي يعني

احنا كنا ناس كويسين في يوم من الايام
والورد مهما يدبل يفضل عبيره فيه

انا ح اعيط كده

هو عشان احنا بنمر بازمة يبقى مالناش اي حاجة كويسة؟

جبهة التهييس الشعبية said...

مواطن

خلاص اهدا يا مواطن

ما تزعلش

هو واحد ايراني عضك فعلا

تشيع ايه بس
مش لما نسلم الاول

مهندس حر said...

هرطقة
------
إيه ياخوانا الحكاية؟؟؟

إحنا لبسنا سوريا فى الحيط إزاى لا مؤاخذة فى 73؟؟

معظم الجيش الإسرائيلى كان بيحارب فى سينا و مع ذلك سوريا إتهزمت و خسرت أرض فى الجولان.. الحقايق على الأرض بتقول كده..

الكلام ده مالوش أى لازمة دلوقت و مش هايقدم و لا يأخر..

أنا بس بحب أفكر ناس كتير بحكاية إننا كنا مسئولين عن غزة لما إسرائيل إستولت عليها سنة 67.. عشان فى ناس دلوقت بتقولك إحنا مالناش دعوة بالفلسطينيين و زى ما إحنا خدنا أرضنا يروحوا همه ياخدوا أرضهم..

مواطن مصري said...

سوريا هي سبب النكسة و ضغود على عبد الناصر عشان يطرد قوات الام المتحدة المتواجدة في سيناء

و دة اسرائيل اعتبرتة اعلان حرب

عليها و احنا مش مستعدين


سوريا السبب


مصر كانت بتحارب عشان ترجع سيناء و الجيش السوري كان المسئول عن الجولان

مصر كسبت و رجعت سيناء

السورين مسمعوش كلام مصر و الجولان محتلة حتى الان
و سورياانضربت و الطيران الاسرائيلي اخترج المجال الجوي السوري و ضربها في عقر دارها و مردتش برصاصة توحد ربنا

سوريا السبب يا هرطقة مصر عملت الي عليها وزيادة




الله يرحم السادات

مهندس حر said...

و لما إنت ماصدقتوش يا مواطن جاى تقولنا ليه؟؟

إيران على حد علمى ما قالتش إن من أهدافها نشر التشيع .. لكنها فى وقت من الأوقات كان تصدير الثورة الإسلامية أحد أهدافها المعلنة ..

أحد المشاكل للبعض مع نجاد إنه ظهر عليه ميول لمعاودة فكرة تصدير الثورة دى .. لكن عمليا ما فيش حاجة بتقول إن إيران بتحاول تصدر ثورتها لحد و كمان الظروف السياسية داخليا و إقليميا تخطت المرحلة دى..

جبهة التهييس الشعبية said...

مهندس حر

لا ثانية واحدة بقى

احنا لو بندور على مصلحتنا فعلا يبقى مصلحتنا مع ايران وتركيا سوريا

انا باتكلم بقى عن مصر الشأن الداخلي
والدور الاقليمي
مش مصر مبارك

اصل انت عارف فيه مصرين

مبارك اللي مقعد مؤخرته لا مؤاخذة انه حمل وديع وان شارون قال لبوش شخصيا انا عايزه ده بيحمي امن اسرائيل

وش كده
فاكر لما كوندوليزا قالت ده غير مرغوب فيه وكانوا عايزين يقلبوه؟

ايه اللي خلاهم ما يقلبوهوش؟

ان شارون بنفسه سافر عشان خاطره

لكن احنا لو بنتكلم عن دورنا الاقليمي وعن نهضة اقتصادية

احنا مش من مصلحتنا ابدا اننا نعادي القوى النامية اللي في المنطقة
احنا كده بنحط نفسنا في كوردون مع اسرائيل
واسرائيل دي اصلا على كف عفريت ومحاطة بسكان بيكرهوها
وابتدت تتغول وحتى واشنطن زهقت منها على كلام تشومسكي وعلى كلام اللنك اللي سابته سوريل
وده منطقي لانها فعلا بقت خارج السيطرة
وبقى فيه احساس متنامي داخل اسرائيل ان: احنا بخوض حروب بالوكالة عن امريكا وبنعمل لهم كل الشغل الوسخ اخدنا ايه؟

لكن ده للناس اللي بتفكر في مصلحة مصر على المدى البعيد

هو مش بيفكر كده
قصدي عوكل
عوكل بيقول احييني النهاردة وموتني بكرة
احنا من مصلحتنا اننا نبقى في المنطقة الرمادية
يعني اه احنا عاملين سلام مع اسرائيل
بس لازم يبقى في ايدينا ورقة ضغط
ما نبقاش معزولين كده وعلاقتنا بكل الناس وحشة ومالناش غير اسرائيل الصدر الحنين

قول لي احنا علاقتنا بمين كويسة؟
السعودية؟
السعودية دي اصلا شابكة في ديلنا ومن غير امريكا ما تعرفش تروح ولا تيجي

يعني وكسة على دماغنا

ليه مش عاملين طيب تعاون مع تركيا؟ ليه علاقتنا وحشة بسوريا؟ دي سوريا دي اختنا التوأم، ده احنا كنا الاختين الحلوين هناء وشرين

مش بنعمل شغل ليه في السودان؟
بتنخانق مع ايران ليه؟
ما نخلي علاقتنا بيهم لا حلوة ولا وحشة

جزر الخليج ايه؟
معلش بقى بما ان كل واحد بيقول ياللا نفسي

دول الخليج اللي انت بتتكلم عليها دي كلها عندها قواعد امريكية في بلدها

احتلال يعني
الجزر دي لو ايران سلمتها ح تتحول في ثانية الى قواعد عسكرية امريكية يضربوا منها ايران

ما يحرروا بلدهم من الامريكان الاول

مواطن مصري said...

انتي عاوزة تستبدلي احتلال باحتلال ما ايران عاوزة مصلحتها في الاول و الاخير زي ما امريكا عاوزة مصلحتها بردو

جبهة التهييس الشعبية said...

يا مهندس مواطن بيهزر

هو ح يشوف واحد ايراني فين؟

ثانية واحدة بس يا شباب عايزة ارد على بهيج عشان عمال يقول لي ابو التعالب عينيه كلها اندهاش وخدوده مكلبظة وعنده سرطان

لا يا بهيج

ابو التعالب بخير وصحته زي البمب

وبطل تعشمني وتقول لي عيان عيان

مش عيان
مش عيان

خلاص

مبارك حي لا يموت

جبهة التهييس الشعبية said...

مواطن

هو الايراني عضك والله
هههههههههههههههه
احتلال ايه بس

ماشي يا مواطن

مهندس حر said...

نوارة
-----
اللى قلته هو إن فيه نقاط تتعارض فيها المصالح و دى حقيقة.. و ما فيش أى مشكلة فى تعارض المصالح بين أصدقاء و حلفاء كمان .. يعنى عشان نبقى سمن على عسل مع إيران فى إطار إستراتيجية متكاملة لتقوية الموقف العربى .. ده مش لازم يكون المقابل ليه إننا نسيبلهم أرض عربية .. لكن المقابل هو إن حتى لما نتكلم معاهم عن الأرض ده يبقى فى إطار أخوى بيحافظ على المصالح المشتركة الأهم..

لكن إحنا هانعيش فى أحلام اليقظة ليه؟؟

إحنا فى أيام عوكل و العبادله و الإجماع العربى على القلق من التهديد الإيرانى..

مهندس حر said...

يااااااا موااااااطن

حدش قال إيران مش عايزة مصلحتها.. هى مش هبلة زى ناس و نظامها مش مسلم مصالح البلد لأسياده زى ناس..

لكن لأسباب كتير مصالح إيران معظمها متطابقة مع المصالح الحقيقية للعرب .. و على فكرة الكلام ده ينطبف على تركيا و باكستان كمان .. بس هو الشيطان شاطر بقى..

لو كل الدول دى إتسابت لنفسها عشان تحط إطار التعامل بينها على أساس مصالحها و مش على أى أساس تانى .. كان يبقى فى كلام غير الكلام

مهندس حر said...

إحنا لو سيبنا نفسنا لأحلام اليقظة و تخيلنا تحالف إستراتيجى للدول العربية مع تركيا و باكستان و إيران.. ممكن نتخيل عالم تبقى الحياة فيه لونها بمبى بجد..

تخيل حجم الموارد اللى تحالف زى ده ها يسيطر عليها .. و نطاق تأثيره اللى هايمتد بعوامل الدين و القومية و المصلح المشتركة لقلب آسيا و لجزر الملايو و لقلب أفريقيا..

بس مش عيب نحلم .. على الأقل عشان تبقى صورة الفرص المهدرة بسبب الوضع الحالى المتخاذل أكثر وضوحا .. و عشان نعرف إن حكامنا الأقزام إلى أى حد مالهومش أى رؤية و لا عندهم أى طموح وطنى حقيقى .. ده إحنا موكوسين وكسة لا تنحكى و لا تتغنى على الربابة..

دعاء said...

أنتم بتعملوا فينا كدا ليه ؟؟

حرام عليكم الأحلام دي كلها..

عارفين مقولة ان الشء ألي يكئب في الحياة مش كونها لا تحتمل ولكن كون كان ممكن تكون افضل من كده..

اهو ده ألي حساها دلوقت مع كلامكم ده..

في أيدنا كتير نعملة وممكن يتحقق.. ولكن علشان قله مغلبة مصالحها، كلنا مقهورين..

ربنا يهدهم بقى

هرطقة said...

من الأول
عبدالناصر قفل خليج العقبة عن اسرائيل رد على الحشود العسكرية الاسرائيلية على الحدود مع سوريا
ده مش معناه ان سوريا السبب

بالنسبة ل73
السادات فتح قناة الاتصال السرية مع كيسينجر يوم 6 أكتوبر وقال فيها ان مصر لن تطور الهجوم
اسرائيل تفرغت لسوريا من 8-14 أكتوبر
غير ان السادات فضل يشحت وقف إطلاق نار
وقبل بيه قبل ما سوريا ترد بالهجوم المضاد الأكبر
أما حكاية ان تطوير الهجوم بتاعنا يوم 14 أكتوبر سببه خف الضغط على سوريا
النقطة دى بالذات محصها الشاذلى فى كتابه
أنا كنت قريت من فترة تحليلات عسكرية لحرب أكتوبر على مواقع أجنبية مختلفة
يعنى فيه اختلافات كتير فى وجهات النظر على موقف اسرائيل العسكرى ومين اللى يعتبر كسب الحرب
لكن الكل أجمع على ان مصر كانت بتخدع سوريا

مصر 30 said...

تعليق صغير على موضوع غن مافيش مصرى يفكر فى هدم السد العالى ...
للأسف انا مضطر أصدمك إن فيه مصريين لسه حاسين إن السد العالى بوظ الزراعة و أفسد مصر و إنه غلط فى غلط !!! يمكن يكون عددهم قليل بس موجودين و لابدين فى الدرة ...
و لو سالتى والدتك حاتقول لك إن كان فيه معركة فى أخر السبعينات تقريبا على موضوع السد العالى و يمكن كان فيه ناس بتطالب بهدمه و وصل الموضوع إن فيه كتب طلعت علشان توضح ليه السد العالى كويس و مش مفروض يتهد .. و برغم سنوات المجاعة و الجفاف التسعة اللى حصلت فى الثمانينات فى أفريقيا و لم ينقذنا منها سوى السد العالى برحمة ربنا ... لكن لسه فيه ناس و كبيرة بتقول السد العالى ده غلط فى غلط !!!!!

احمد سعيد said...

و بعد كده فى 73 تطوير الهجوم اللى كشف خطوطنا و أدى للثغرة كان بهدف تخفيف الضغط على الجبهة السورية لأن سوريا كانت بتخسر الحرب

________________________

عمى مهندس حر

معلش يعنى

الكلمتين دول وقفوا فى زورى ومقدرتش ابلعهم خالص

معلش

الكلام دة مش مظبوط
فضلا عن انه غير منطقى اصلا

ومستعد انى اتحاور معاك علشان نفهم الصح من الغلط

احمد سعيد said...

يامواطن يامصرى فكر الاول وبص على الخريطه

وشوف الجزر اللى انت بتتكلم عليها دى موقعها فين

مهندس حر said...

أحمد سعيد و هرطقة
----------------
عارف إن السادات أدار الحرب بشكل سياسى .. و إن تأخير تطوير الهجوم هو السبب فى فشله و التأخير لأن السادات كان مستنى رد من أمريكا و لما ما سمعش منهم حاجة إضطر يأمر بتطوير الهجوم لأن السوريين كانوا بيصوتوا..

بس السوريين كان موقفهم أصعب من قبل كده و بالتالى إحنا مالناش دعوة باللى حصلهم..

و آخر الكلام .. إحنا ماعندناش وثائق مصرية و سورية كافية عن الحروب دى و معظم معلوماتنا من مذكرات واحد هنا أو هناك و دى لا يعول عليها ..

و الكلام اللى بعد آخر كلام .. هذا زمان مضى و راح و مش مفيد إننا نناقشه .. نكبتنا النهاردة أفدح و نكستنا أوضح و الثغرة منفدة على المنور .. خلينا فى الهم اللى إحنا فيه..

مهندس حر said...

أحمد سعيد
--------
طبعا إنت عارف إنى مش من رأى مواطن مصرى .. بس أى أرض عربية يحتلها بلد آخر لا ينبغى الإستهانة بيها .. سواء كانت سبتة و مليلة المغربية المحتلة من الأسبان أو الجزر الإماراتية المحتلة من إيران ..

المسألة مسألة أولويات و أسلوب تعامل يعنى الجزر الإماراتية أكيد مش أولوية قبل القدس المحتلة و أسلوب التعامل مع إيران غير أسلوب التعامل مع الكيان الصهيونى و لا يجوز تحت أى ظرف المساواة بينهم لمجرد إن ده محتل أرض عربية و التانى كذلك لأن دى تبقى سذاجة غير مقبولة..

depressed said...

Hi nawwara,
I've been following your blog for more than 2 years now and I really like your opinions in so many issues. I must say I have a lot of admiration for your creative way of thinking and true sense of compassion and sincerity. I'm just having a very hard time trying to understand your constant ruthless attack on president Obama.

Even if it was just words, don't you think that a good word is better than an evil one adopted by Bush and the gangeters who rule the Arab world???.

I really think you are way too harsh on the man while he is sincerely making an increadable effort to clean the mess of the previous adminstration.

احمد سعيد said...

مهندس باشا
اساسا تطوير الهجوم فى حد ذاته قرار فى منتهى منتهى الغباء
ولايتخذة طالب فى اول شهر ليه فى كليته العسكريه
الخطه المصريه اساسا مكانش فيها تطوير هجوم
واللى اعلنت دى كانت خطه مفبركه لارضاء السوريين
لان السوريين اكيد كانوا لن يقبلوا انهم يخشو معانا المعركه علشان نحتل اربعتاشر كيلو شرق القناة ونسيبهم بعد كدة يخبطوا دماغهم فى الحيط مع اليهود

وانت عارف السادات
اساسا يعنى هو واطى ورمه
ودى مش جديدة عليه

فاى قائد محترم لن يلقى بقواته الى التهلكه ويدفعها للقتال فى مناطق مسيطر عليها جويا بواسطه طيران العدو علشان خاطر سواد عيون حلفاؤة
دا لو ابوة مكانش يرضى

فمابالك بقى بواحد واطى زى السادات

حكايه انه كان عايز يخفف الضغط دى كانت مجرد حجه يرفع بيها الحرج عن نفسه
خصوصا ان القرار سياسى واتفرض فرض على القواد العسكريين

ياراجل

هو قائد الجيش التانى اتنقط وطب ساكت من شويه

السادات دمر الجيش فى 73
واى وكسه فى الحرب دى
مسئول عنها السادات اولا
وكبار الظباط المتخلفين عقليا ثانيا

طبعا كان عندنا قادة محترمين

بس انا بتكلم عن الغير محترمين ودول موجودين فى الجيش المصرى بكثرة وفى كل العصور مع الاسف

العيب عمرة مكان من الجندى او الظابط الصغير

علشان دول دايما فيهم الخير



بالنسبه لموضوع الجزر
طبعا احتلال اراضى دوله شىء غير مقبول من الاساس

بس هى ايران مش واخدة الجزر دى طمعا فيها

الجزر دى مشرفه على السواحل الايرانيه وتضع المنشات النوويه الايرانيه فى وضع قاااتل
وطبعا انت عارف ان الجزر دى لور رجعت للخلايجه بالليل
ايه اللى هيحصل الفجر

ايران معاها حق تحتلها
واعتقد انهم لو كانوا يضمنوا ان الامريكان ميسيطروش على الجزر دى

كانوا سابوها من زمان

بس انت عارف اخوانا بتوع القواعد بقى
وديل الكلب عمرة ماينعدل

ولا ايه ؟؟

عاشق مصر said...

بالنسبة للموضوع المصري السوري، يتطابق كلام احمد سعيد مع مذكرات الشاذلي.
والشاذلي على مااعتقد هو حرب العبور وامها وابوها من حيث الاعداد والتخطيط والتنفيذ
وقد ورد في مذكراته مامضمونه انه خجل من ايراد هذه المعلومة ولكنه يوردها لكي تستفيد الاجيال القادمة من عبرتها

يقول طلب مني اعداد خطة لم نكن نملك القدرة على تنفيذها اصلاً ليتم عرضها على السوريين، بهدف ضمان قبولهم لدخول الحرب معنا.

موضوع الجزر المحتلة من ايران ولواء اسكندرون المحتل من قبل تركيا يعود امرهما الى واقع ان الدول العربية لم يكن لها وجود مستقل وحدود معروفة قبل انهيار الامبراطورية العثمانية
والثورة الاسلامية ورثت تفاهماً خليجياً مع ايران الشاه ينص على مايلي
تعترف ايران باستقلال البحرين وتتخلي عن المطالبة بها بمقابل السيادة على الجزر الثلاث
وكما قال احمد سعيد لو كان الامر محصوراً بالعرب والايرانيين لتوصلوا الى تسوية فور جلوسهم على طاولة الحوار
ولكن القواعد الاجنبية في الخليج وتحول البحرين الى مرسى دائم للاساطيل الامريكية واستقدام الامارات للفرنسيين الى قاعدة بنتها لهم بسرعة قياسية خارقة وموجهة ضد ايران بالدرجة الاولى
يدفع ايران للتمسك بكل شبر تستطيع منع القوات الاجنبية من التواجد فيه

عاشق مصر said...

مرجع لواء اسكندرون

http://ar.wikipedia.org/wiki/%D9%84%D9%88%D8%A7%D8%A1_%D8%A5%D8%B3%D9%83%D9%86%D8%AF%D8%B1%D9%88%D9%86

مرجع الصفقة بين بريطانيا وايران

http://ar.wikipedia.org/wiki/%D8%B7%D9%86%D8%A8_%D8%A7%D9%84%D9%83%D8%A8%D8%B1%D9%89

lebneneyeh said...

سلام عليكم
انا وحدة من اشد المعجبين فيكي يا نوارة عن جد و معجبة كمان بالوالدة الكريمة و انا صرلي متابعة مدوناتك من زمان بس ما كنت علَق .
بس حبيت بينلك اعجابي فيكي و قللك انو انتي بتفشي خلقنا بكتباتك و بتحكي عن يللي بقلبنا لله يعطيكي العافية و يطول عمر الةالوالدة الطيبة يا رب.