مش ح يفرق كتير موسوي من نجاد

ولو اني شايفة ان رد الفعل الطبيعي لاي انسان سوي في مصر لهوجة الانتخابات اللي مكتسحة العالم اننا نحقد وبس

لكن بما اننا بقينا اساتذة في متابعة الانتخابات اللي بيعملها غيرنا زي الشاب اللي مش عارف يتجوز وعمال يشتري في مجلات ويأجر في افلام فاحب بس اوضح حاجة، الاصلاحيين والمحافظين، زي الديمقراطيين والجمهوريين في امريكا كده

يعني فيه اساسيات متفقين عليها مش ح تتغير، اللي بيتغير هو التون في الخطاب السياسي

لكن مثلا

1- البرنامج النووي

لو ينفع يبقى فيه مصري يقتنع بهد السد العالي، يبقى ينفع ايراني يقتنع بايقاف البرنامج النووي، محافظ بقى اصلاحي، بيحب الملالي بيكره الملالي، مافيش ايراني يقبل ابدا بوقف النشاط النووي الايراني، ده مشروع قومي بالنسبة لهم، مافيش غير ابن الشاه

والشاه فعلا مكروه، ماحدش بيترحم على ايامه غير اللي كانوا بيشتغلوا استغفر الله العظيم (باتكلم بجد) والحرامية (باتكلم تاني بجد) لانه كان ديكتاتور فعلا، وفاسد، وحرامي، واخلاقه مش كويسة (باتكلم بجد)، ومش زي مبارك، زي صدام، لا والله، هو صدام مفتري بس مش حرامي، هو خليط ما بين فساد مبارك وافترا صدام، وابن الشاه بيقول على ايران انها توقف برنامجها النووي فورا وهم اصلا مش مهتمين بتصريحاته اكتر من اهتمامنا احنا بتصريحات احمد فؤاد ابن فاروق (ولو ان الشهادة لله ابن فاروق مش وغد كده ابدا، الراجل عمره ما قعد يحرب على انه ياخد عرش مصر تاني، ولا قال اي تصريحات فيها خيانة لبلده) فده بالنسبة للنشاط النووي

لو حتى نظام الملالي كله اتغير وجابوا انشالله شيوعيين مافيش حاجة ح تتغير في الموضوع ده

هو فيه حد بيكره بلده يا ناس؟

2- الموقف من اسرائيل وامريكا

بالظبط هو هو نفس الفرق ما بين موقف بوش اوباما، على راي امي واحد ح يقول: قوموا فزوا اخزق عينيكوا، وواحد بيقول: ممكن لو سمحتوا اخزق عينيكوا

نفس الحكاية بالنسبة لايران، المحافظين ح يقولوا امريكا الشيطان الاكبر والمحرقة اسطورة

والاصلاحيين ح يقولوا: لا لا لا لا لا لا، مش شيطان ولا حاجة، هي بس بقرون وديل وشوكة، والمحرقة امممم يعني احنا مش ح نقعد نعيط عليها، اصل ما هياش حاجة مهمة للدرجة دي

المحافظين ح يتكلموا عن فلسطين كتير

والاصلاحيين مش ح يتكلموا عن فلسطين بس دعم المقاومة (اللي هو اصلا متصل بامنهم القومي) ح يستمر زي ما هو

لو فيه حد يتخيل ان امريكا ممكن تبطل تدفع فلوس لاسرائيل، يبقى ينفع ان ايران تبطل تدفع فلوس للمقاومة، امال ح تعمل ايه يعني؟ مش كل الناس ترضى على نفسها اللي احنا قابلينه على نفسنا، الايرانيين معتزين جدا بنفسهم، وبلغتهم، وببلدهم، وعندهم امل انهم يبقوا حاجة كويسة ومش ح يقبلوا انهم يبقوا تابعين لاي حد، وامريكا واسرائيل بتخيرهم ما بين يبقوا تابعين او تهدد امنهم، وهم مش ح يقبلوا كده، هم عندهم اقتناع داخلي انهم اولى بلقب "قوة عظمى" من امريكا، ودي حاجة مش ح تتغير لا بتغير الرئيس ولا حتى بتغير النظام، عشان كده لو تلاحظوا

فيه فرق كبير لما اوباما كلم الايرانيين

ولما كلم العالم الاسلامي من عندنا

حاول في كلامه للايرانيين انه يبقى حسيس وما يقولش ولا كلمة تجرحهم ولا تحسسهم انهم تابعين، ولا كشر ولا شاور لهم بصباعه كده زي ما عمل معانا، ومع ذلك برضه ما عجبهمش وقالوا عليه قليل الادب وجلياط وتطاول علينا، هم كده عندهم احساس متضخم بالكرامة

بس بقى انا الكلام ده غاظني

3- احنا مالنا؟

4- احنا مالنا؟

5- احنا مالنا؟

6- احنا مال امنا؟

اذا كان اصحاب الشأن (اللي هم امريكا واسرائيل) مش فارقة معاهم لانهم عارفين ان مافيش فرق كبير، الفرق ان المحافظين ح يتخانقوا والاصلاحيين ح يمطوحوهم، وفي الاخر الاتنين بينفذوا نفس البرنامج، لانهم ما يقدروش يعملوا غير كده، الايرانيين ياكلوهم، دي عالم مفترية :) انتوا ما شفتوهمش وهم بيسقطوا الشاه كانوا عاملين ازاي؟ 

احنا بقى؟ ايه وضعنا في الحياة؟ احنا بالنوسبة لايه؟ حاشرين مناخيرنا في انتخابات الناس ليه؟ لا وحسني مبارك طالع، بمنتهى البجاحة والبجاسة، يتكلم في القناة الاولى عن الانتخابات اللبنانية ويقول دي ارادة الشعب

طب بالنوسبة لارادتنا احنا يا حاج؟ وللا انت مش معتبرنا شعب؟ ده واحد انطس في عقله ورشح نفسه قدامك اتشرشح واتسجن وبقى كل اللي ما يشتري يتفرج عليه، واديه ح يطلق مراته بسبب ملاحقة دعوة الحاجة ام حسني اللي قالت لك: روح يابني، ربنا ينصرك على مين يعاديك، ولجل الحظ الاسود، بقى فيه تمانين مليون معاديينك

عندك حق

احنا اللي قلالات العقل عشان نعادي منوفي