Tuesday, 2 June 2009

ايه اللخبطة دي؟

انا مش فاهمة حاجة، ليه اسرائيل زعلانة ان اوباما جاي مصر؟ دي تمثيلية دي وللا ايه؟ امال لو كان خاطب العالم الاسلامي من ايران كانت عملت ايه؟ منين بيحبوا النظام المصري وبيبوسوه من بقه كل شوية قدامنا من غير اي مراعاة للشباب اللي مش لاقي شقة ومنين زعلانين ان اوباما جاي مصر؟ مش داخلة دماغي ابدا، هي اسرائيل غاوية تمثليات، بس دي وسعت منهم قوي، امال لو ما كانوش لسة موافقين على فاروق حسني وقالوا: اللي تشوفه يابابا
 بلطجة دي وللا تمثيلية وللا ايه؟
انا اتلخبطت كده ما بقتش عارفة انهي التمثيلية وانهي الحقيقة
بس لا، مشاركتنا في قتل الف وخمسميت واحد ما كانتش تمثيلية، هم ماتوا بجد، واحنا قفلنا الباب في وشهم بجد
يكونوا بيعملوا هيصة وظمبليطة في الصالون عشان يوم ما يوقفوا الاستيطان نحس ان ده انتصار ما حصلش؟ بس هم مش ح يقفوا الاستيطان، يبقى ايه؟ يبقى مثلا عشان هو يقول والله قلت لهم واتخانقت معاهم بس هم اللي منشفين دماغهم؟
وللا عشان ماحدش يعترض على زيارته وبما انهم عارفين اننا كل حاجة بنعملها رد فعل فبيعملوا قال يعني زعلانين عشان احنا زي الهبل نفرح انهم زعلانين؟
والله ما بقيت عارفة حاجة
ايه؟ يكونش عوكل قال لهم اغسلوا وشي ابوس رجليكوا بطلوا تشكروني بقى رقبتي بقت قد السمسمة؟ طب وهو ده بيهمه؟
تؤ.. فيه حاجة مش مفهومة، فيه تمثيلية بس انا مش عارفة هي ايه؟ وطبعا مواطن مصري ح يسيب ده كله ويدخل يقول لي ان ايران دولة استيطانية زي اسرائيل بالظبط ده غير طالبان اللي عاملة له قلق جامد وحماس الظلامية
ابوس رجلك يا مواطن ما تقولش كده المرة دي

17 comments:

مواطن مصري said...
This comment has been removed by the author.
dr aly khamis said...

أول زيارة
أول تعليق
أحمدك يا رب
بسرعة هقرأ و أجى ...جرى

هندسة وصفية said...

شفتي فيلم
countdown: Jerusalem
؟؟؟
هو كفيلم تافه فنيا تعبان جدابس لممكن تلاحظي منه حاجة مهمة جدا

dr aly khamis said...

أختى الكريمة
السلام عليكم و رحمة الله و بركاته
فكى الحجز عن تعليقى الأول الله يكرمك
....شكرا لحسن تعاونكم..
بالنسبة لأوباما
أنا عندى وجهة نظر
أنا شايف كده انهم ( الصهاينة )
ماشيين بخطة منظمة ...
ييجى رئيس أمريكى متوحش ...بجح ..يخش يحتل كام دولة اسلامية و يقتل و يدبح و كده يعنى ...
الشعوب تغلى ...ترتفع اسهم المقاومة ..يزيد حماس الشباب ....و قبل لحظة الإنفجار
هوب
ييجى رئيس أمريكى حنين ( بالكلام بس طبعا )
يقوم يقولنا لا انا عادل مش زى اللى فات انا هزبط كل حاجة و ارجع الحقوق لأصحابها..
هدوء ...(يسجدنا يعنى لو جاز التعبير)
يقوم الناس كلها تهدى ...مفيش مقاومة ..ما هى الناس حلوة اهى و فى كلام كويس ...اصبروا شوية يا بتوع المقاومة انتم ...و طبعا اللى راح مننا على يد السابق البجح لن يرجع ...يبقى الوضع على ما هو عليه ..لغاية ما يطمنوا ان الأمن استتب و الناس نسيت و كل تخلى عن المقاومة ....
ييجى واحد تانى منيل بستين نيلة ..
و دوخينى يا لمونة ..
ريجان ...بعده بوش الكبير ...هدوء مع كلينتون ....بوش الإبن ...(و طبعا راحت أفغانستان و العراق)
....هدجوء مع أوباما و طبعا مش هيرجع حاجة من اللى خدوه...
لغاية ما نهدى و بعدين ييجى اللى بعده من الحزب الجمهورى (يتاع البجحين )
و يكمل على السودان و سوريا ...

يااااااااه انا طولت أوى
معلش أنا آسف

بارك الله فيك
تقبلى تحياتى
و برده لازم تفرجى عن تعليقى الأول ..أنا ما صدقت

TAFATEFO said...

هو ايه الغريب في ان حكومة يمينية تغضب وتعارض (لكنها لا تملك رفض) مطالب أوباما؟؟

ما هي المسألة توازن

حكومة أمريكية متهاودة .. لازمها حكومة إسرائيلية يمينية .. حكومة صقور

وفي الآخر .. اوباما مقتنع أنه إذا أردا التسوية -فعلاً- وبصرف النظر عن كونها عادلة أو لا فلابد من الضغط على الحكومة الإسرائيلية لتقديم تنازلات .. حيث لا تسوية بلا تنازلات

ونظرته أو خطته أو رؤيته للتسوية معلنة .. وهي بالطبع لا يرضى بها العرب (مش أبو مازن) ولا ترضى بها حكومة يمينية إسرائيلية (على فكره لو قبلت ليفني هتنقض على المقعد لأن نتنياهو استطاع تشكيل الحكومه اعتماداً على مقاعد يمينية)

علشان كده .. هو رافض حل الدولتين في الوقت اللي كان قابل بيه زمان وفي الوقت اللي المعارضة بقيادة ليفني بتكيل له السباب على إهدار فرصة حل الدولتين

بس مفيش حاجه بايده .. غصب عن بوزه سيقبل .. وغصب عن بوزه حكومته لن تصمد عام

بدراوى said...

طب انا بقول ان ايران دولة عنصرية و دولة ولاية الفقيه و سبب وجود نووى اسرائيل هو ايران العميلة و اللى شغالة عند شافيز
و شافيز ده عميل يهودى شيعى من ملالى حزب الله الإيرانى

و كمان ايران بتمول الأخوان الظلاميين و الأخوان المنورين
و حماس العميلة لحزب الله اللى قاعدة فى التكييف و فى الجاكوزى
---
امضاء
-------
مواطن مصرى
اى خدمة
:-)

بدراوى said...

اسرائيل قافشة و زعلانة عشان اوباما حيزور مصر و مش حيحود حداهم
بس كدة
---
اه صحيح كفاية حتعمل مظاهرة ضد اوباما فى ميدان التحرير بتقول لا للمخادع
انتى رأيك ايه
؟

TAFATEFO said...

وعلشان كده لو فاكرين ليفني رفضت كل العروض المغرية اللي قدمهالها نتنياهو للإنضمام إلى حكومة ائتلافية

لأن في ظل إدارة أوباما حكومة نتنياهو لن تصمد عام

ما هو يا يتحدى الإدارة الأمريكية وده مستحيل

يا يقبل بالشروط الأمريكية وساعتها اليمينيين ينسحبوا ويقوضوا حكومته .. وهتشكل ليفني الحكومة

سبهللة said...

نفسى اقول للدكتور على اللى كان فاكر نفسه اول تعليق
انسى يا دوك وماتحاولش
لان مواطن مصرى عامل اشتراك فى المدونة
اشتراك سنوى
ومتفق مع نوارة من ورانا
انها تقوله البوست فى التليفون يقوم هو يعلق عليه الاول وبعدين هى تبقى تنزله
==========
بالنوسبة لامريكا على اسرائيل
ان شالله ياكلهم قطر هم الاتنين
ماتخلينا فى نفسنا
ثم انا مش داعيالك عشان فرحتينا من شوية
ولا هو انا كنت بدعى انك تنكدى علينا

TAFATEFO said...

كمان وقف الاستيطان وتفكيك مستوطنات .. لا تقبل به نفس القوى الظلامية المتطرفة

دولة دينية = دولة عنصرية

:d:d

lastcrazyboys said...

سيــبك من مــواطن انتي واعترفي بإن نظرية المؤامــرة خلاااص ..وصلت لمرحلة مرضية .بفتح الواو بعد ان كانت بضمها

طبعــا أنا مقدرش احكم على السياسة الأمريكية الحالية ..واستغربت الاستطلاع الي اتعمل بمناسبة الـ100 يوم على الحكم

لأن الفترة دي اعترف من اعقد واكثر الفترات التي عاصرتها تشابكا
ولو ان ده ميمنعش ان نمشي بمبدأك.ونحرص من السحلبة والدحلبة
المعتادة
====
لسسسسسسسة شايف الدكتور عمارة على الجزيرة ..حديث شيق وموزون..وبأسانيد ورصانة معتــاة
بس عندي استفسار: هو انا ليه حسيت انه بيلمح للعنصرية في الحكم اليهودي..وتوليه مقاليد القدس..هو اطلع عالوثيقة ولا ايييييه؟؟
على فكرة ..ليهم حق يكرهوه

TAFATEFO said...

على فكره صحيح بعيداً عن الموضوع

لمحت في عناوين جرايد بكره ان الحزب الوطني قرر كوتا للمرأة

توكلي على الله .. قلوبنا معك

:D:D:D:D:D

طب والله تكسبي .. بس انتي اختاري دايره معقوله

أكون أو لا أكون said...

على الارجح هو الإختيار الإحتمال الثاني " عشان ماحدش يعترض على زيارته وبما انهم عارفين اننا كل حاجة بنعملها رد فعل فبيعملوا قال يعني زعلانين عشان احنا زي الهبل نفرح انهم زعلانين؟"

بس يامواطن القتل مش ضروري يكون مباشر... فيه قتل غير مباشر...
أنا لا بقول ولا بفترض إن مصر قتلت...
لكن حبيت أوضح لك إن القتل مش بالضروي يكون وجة لوجه...

TAFATEFO said...

بس خلو أوي تعبير الإدارة الأمريكية قافشة على إسرائيل ده .. وموضوع جندي مصري ضرب رصاصة كمان

جبهة التهييس الشعبية said...

ييييييييييييي
بهيج عمال كاتب لي عشمريت تعليق كده:

ايران دولة استيطانية زي اسرائيل بالظبط غير طالبان اللي عاملة قلق وحماس الظلامية

ههههههههههههههههههه

أبو أمير said...

ههههههههه
يكونش بهيج هو مواطن مصري بس متخفي

hasona said...

السلام عليكم

علي رأيك الواحد من كثر التمثيل والسناريوهات
أصبح لا يستطيع التفريق بين الحقيقي وما هو مصطنع

،،،،
وما أجد غريبا هو فرحة المصريين العظمي بهذه الزيارة
وأنه خص مصر بالحديث للعالم الاسلامي في حين انه تحدث من قبل في تركيا
ومن قبلها زار السعودية

،،،،
كلها سيناريو واحد متعدد الاخراج