Sunday, 14 June 2009

لو كان نصر الله مكان موسوي

يعني الثابت بالدليل القطعي ان السعودية اشترت الاصوات في لبنان، وبايضن راح هددهم بنفسه، (الصايع، يبعت لاسرائيل ميتشل اللي العرب بيحبوه عشان يلحس جزمة اسرائيل، ويبعت للبنان بايضن اللي بيفتخر انه صهيوني عشان يهدد اللبنانيين) وهيلاري هددتهم، اوباما جاب سيرة المارون في خطبته، والسعودية دفعت فلوس بالهبل، ومع ذلك المعارضة قبلت النتائج
لو افترضنا ان نصر الله ما قبلش النتائج للاسباب السالف ذكرها، ونزل الناس الشارع تكسر وتحرق وتشيل علامة: ممنوع الوقوف، الناس اللي قاعدة بقى تهلل لـ"ثورة الشباب ضد الطاغية" كان ح يبقى ده موقفهم من المعارضة اللبنانية؟
ده الراجل نزل الناس الشارع يرقصوا ويغنوا ويقولوا يا سنيورة اطلع برة، واتقتل منهم ناس وقال لهم: ضبط النفس. وما كسروش شباك، ومع ذلك اتشرشحوا واتشنشلوا وقالوا لهم انتوا معطلين البلد ومصالحها يا عملاء لايران يا عملاء لسوريا ياللي وياللي
ولما السعودية تدفع فلوس في الانتخابات اللبنانية، ده مش تدخل؟ ولما بايضن يقول لهم انتوا احرار بس لو انتخبتوا المعارضة ذنبكوا على جنبكوا ده مش تدخل؟ ولما اوباما يجيب سيرة المارون عشان ينيمهم تنويم تغطاطيسي ده مش تدخل؟ ولما هو يعترف بنفسه ان خطابه غير وجهة نظر الناس في الانتخابات اللبنانية ده مش تدخل؟
انا بس عايزة شوية عدالة، شوية عدالة
لو حسن نصر الله عنده فرصة يقدم طعن في الانتخابات، وقبل ما يقدم طعن يستنى يوم كامل ويدعو انصاره للتظاهر (والناس سهل جدا اثارتها خصوصا في جو انتخابات وحملات انتخابية وبذلوا مجهود ولما الزعيم بتاعهم يقول لهم انزلوا الشارع ح ينزلوا الشارع) وبعد التكسير والحرق والتخريب تاني يوم يقدم طعن رسمي
لو اللي عمل كده نصر الله مش موسوي، كان الاراجوزات اللي بيهللوا للثورة المخملية (بقى دي مخملية؟ يعني دي امخمل حاجة عندهم؟) قالوا ايه؟ كانوا قالوا عليه بيضغط على القضاء بالشارع، وانه المفروض كان يلجأ للقضاء الاول ولما القضاء ما ينصفوش يلجأ للمحكمة الدولية ولما ما تنصفوش يبقى يلجأ للشارع، لأن "اللجوء للشارع ليس هو الحل، لانه يهدف الى انقسام لبنان، واشعال حرب اهلية...." الخ الخ الخ الى اخر كل الاخراج اللي بيطلعوه من معدتهم
بلاش لا ده ولا ده، لو عمال المحلة عندهم فرصة انتخاب (يا قلبي على العمال يا ربي، والله مافيه اغلب من اللي عندنا)، وعندهم فرصة للجوء للطعون والقانون وعملوا اعتصام من اعتصاماتهم الغلبانة دي كان اتقال عليهم ايه؟ دول الغلابة يوم ستة ابريل اشتغلوا وما عملوش اضراب وانضرب عليهم بالرصاص الحي وعينيهم طارت وبرضه اتقال عليهم بلطجية
ما نحط نفسنا مكان الناس، لو دي بلدنا اللي اتعمل فيها كده، جريدة الشرخ الاوسخ السعودية بتقول ان نجاح نجاد في الانتخابات هو اللي اتسبب في انقسام ايران، وطبعا لو كان سقط في الانتخابات ونزل الناس الشارع زي موسوي كانوا قالوا نجاد برضه هو السبب في انقسام ايران، سواء بقى ناجح او ساقط هو الغلطان
طيب امريكا فرحانة عشان من مصلحتها اللي بيحصل، لكن الناس بتاعة حروق اللسان والعدل والمساواة والديمقراطية والبتنجانية بتكيل بمكيالين ليه؟ ليه نزول نصر الله للشارع اللي كان سلمي واللي كان بيطالب بانتخابات وبيقول ح اقبل نتائجها مهما كان وحش ونزول موسوي للشارع اللي كسر وحرق لانه مش قابل نتائج الانتخابات وحتى ما عملش طعن حلو؟
انا عايزة افهمها دي
ثم ايه حكاية نظام الملالي نظام الملالي، ايه النغمة دي؟ طيب امريكا بتشتم في نظام الملالي زي ما بتشتم في النظام الشيوعي لانه ضد مصالحها الاقتصادية، بدليل ان النظام الوهابي على قلبها عسل لانه بيخدم مصالحها الاقتصادية
احنا بقى ايه اللي حشرنا؟ ايه اللي حشرنا نشتم في اي نظام تم اختياره بثورة وارادة الناس سواء ملالي، وللا يساري زي تشافيز، وللا حتى رأسمالي زي امريكا، مش الامريكان عاجبهم النظام الرأسمالي؟ ماحدش بقى بيحاول يفرض عليهم نظام تاني ليه؟
فيه ناس في ايران ضد نظام الملالي زي ما فيه شيوعيين في امريكا، زي ما فيه رجال اعمال رأسماليين في فنزويلا حاولوا يسقطوا تشافيز والناس هي اللي رجعته في اتنين وسبعين ساعة، ماهو كل نظام له معارضين ده طبيعي، احنا مالنا؟ احنا مالنا نحكم على انظمة الناس، احنا مالناش مصالح اقتصادية لاننا مالناش اقتصاد اصلا، احنا شحاتين
اذا كانت الدولة شحاتة، وبتخدم على امريكا ولية نعمتها، احنا مبسوطين من حالنا يعني؟ متكيفين اننا شحاتين ونردد زي البغبغانات كلام الامريكان والاسرائيليين؟
وسؤال بس لكل الناس اللي اعترضت بادب وبقلة ادب على اصراري ان المظاهرات ملعوب فيها
دلوقت انصار موسوي هم الطبقة المتوسطة العليا ورجال الاعمال، وكذلك المعارضين لتشافيز، وكذلك شيوعيين كتير في امريكا، واناركيين، ويساريين ليبراليين...إلخ
اشمعنى القلة المعارضة في ايران وفنزويلا تعمل تكسير وشغب وقلب نظام حكم، والقلة المعارضة من اليساريين في امريكا عمرها ما عملت كده؟
مش لان اليساريين اخلاقيين بطبعهم ومؤدبين، الناس كلها سهل استثارتها، زي ما تم استثارة الناس في الصعيد على البهائيين من قبل مجلس الشعب والاعلام
طب ازاي يعني التيار اليساري في امريكا ما حرقش ولا كسر واشمعنى الدول المعادية لامريكا هي اللي فيها حرق وتكسير اعتراضا على انتخابات؟ انتخابااااااات، يا ريتهم معترضين على قهر وللا تجويع وللا سجن؟
مش حاجة تثير الشكوك دي؟
لا؟
خلاص، انا واحدة مجنونة والايام بينما
اصل هو الاتحاد السوفييتي ده وقع لوحده كده، كانت الحاجة كاملة بتاعة عمارة الموت هي اللي بنته، والثورة البرتقالية دي قامت لوحدها كده، وامريكا هي البلد الوحيدة اللي ما بيحصلش فيها ثورات، لا من الناس اللي متراقبة بالباتريوت اكت، ولا من اليساريين اللي ضد النظام الاقتصادي من اوله لاخره، ولا من الهومليس، ولا من الامريكيين الاصليين اللي فضلوا سنين محرومين من حق التصويت ومحبوسين في ريزيرفيشنز زي الحيوانات
حاجة الهية كده، اصل امريكا كنانة الله في ارضه... مافيش اجهزة استخباراتية بتقتل كل فرصة للثورة في مهدها في امريكا وبتشعل الثورات والفوضى في كل حتة تانية في العالم
انا ما احبش اعيش في الوهم بارادتي، وياريت شوية كتب كده عن المعونة الامريكية والسي اي ايه عشان تصورات بعض الناس الساذجة عن ما يسمى بالعمالة وتجنيد الناس تتصحح شوية، اللي بتشوفوه في فيلم الصعود الى الهاوية ده سيما، سيما
ماحدش بيحرك الناس كده ابدا، ولو السي اي ايه بيشتغل بالطريقة دي كان زمان امريكا دي خلصت من زمان ولو كل واحد بيخدم مصالح اعداء بلده عارف انه بيخدم ضد بلده ما كاتش العين بكت
ثم الايرانيين اكلوا دماغنا: احنا الشعب المتحضر، احنا الشعب المتحضر
بقى دي تصرفات متحضرة؟ شارون من كام سنة قال: المسلمين والعرب لا يناسبهم النظام الديمقراطي
والدولة الاسلامية الوحيدة اللي عندها انتخابات حقيقية اثبتت صحة كلامه
واحنا مبسوطين كأننا بنتفرج على فيلم اكشن
طب اهو نجاد نزل بالناس بتوعه، لما هم مش قد الانتخابات بيعملوها ليه؟ ما كانوا يحلوها في الشارع من الاول وتبقى دي انتخاباتهم، كل واحد ينزل بناسه واللي يكسر اكتر هو اللي يكسب
حاجة تقرف
وانا والله مش عارفة افهم شماتة بعض المصريين دي، بجد يعني، دي في وشنا كلنا، العالم كله بيتفرج ويقول اننا شعوب متخلفة ومحتاجين حد ييجي يعلمنا الحضارة
دي قلة ادب دي 

7 comments:

مهندس حر said...

نوارة
-----
إنتى مالك قاعدة تجيبى قديمه فى جديده..

الإتحاد السوفيتى وقع عشان المقاول غش فى الخرسانة .. لو بيفهم كان سق فى التشطيبات و ساب الخرسانة..

الدنيا مش أبيض و إسود و التدخل الخارجى مش بيكس الشباك عشان يدخل.. لازم حد يكون بيفتحله الشباك و الحد ده مش هايمد إيده لبره لو كان واخد حقه جوه..

المجتمع الأمريكى مش جنة الله على الأرض بس المهمشين فيه همه أقليات متفرقة و النظام الإقتصادى ماوال فيه قدر من تكافوء الفرصة بتدى الفئات الأفقر أمل فى الصعود دون الحاجة للخروج على القوانين .. ده لأن الطبقة الحاكمة عندهم القدر الكافى من الذكاء عشان يبقوا الطبقات الأدنى تحت السيطرة..

نجاد كان ممكن ياكل بعقل الطبقة المتوسطة عنده حلاوة بس هو ثورجى مش سياسى..

جبهة التهييس الشعبية said...

ينعل تيت الطبقة المتوسطة في الارض يا شيخ
ماهي اللي كانت بتكره سيدنا عمر وهي اللي اتسببت في ثورة الفقرا على عثمان وساعة لما اتزنق كعادة كل الطبقة المتوسطة خلعت وسابته يتقتل

طبقة معفنة بجد

ثم هم اقلية اصلا في كل العالم
مالهم قابين على وش الفتة وواكلين العالم في كرشهم كده


مهندس حر

انا باكره الاغنيا
خصوصا لما يبقى فيه فقرا في الدنيا

مهندس حر said...

نوارة
-----
مافيش مجتمع هيتوجد من غير طبقات لأن توزيع الأدوار فى المجتمع هو اللى بيخلق الطبقات دى.. و لو توزيع الأدوار ماكانش معاه توزيع للثروة ما حدش ها يقوم بدور أكبر من غيره و نرجع كلنا للغابة..

العدالة هى إن مافيش طبقة تستغل الطبقات التانية و تحصل على مقابل غير عادل لدورها فى تنمية المجتمع و تبخس الآخرين حقهم فى مقابل عادل لدورهم..

المجتمع العادل مش هيبقى فيه بروليتاريا بالمعنى المعروف .. لأن حصول كل إنسان على حقه فى التعليم السليم هايمكنه من المشاركة فى إدارة بلاده و هايرفع من إنتاجيته و بالتالى من نصيبه فى عوائد الإنتاج..

الفلاح فى الدول الإسكندنافية أنضف و أغنى من المهندس عندنا..

Sosso said...

ya nawwara fe wa7ed sa7bi lebneni kan henak fe fatrat elenti5abet, be2ool ennou el 7ariri kan 3amel charters lennes elli barra. Ya3ni byettesalou we y2ool enta moch3ayez tey lelbnan holidays, we eza baddak ta3a ma3a el3ayla. ya3ni kollou 3ala 7seb el7amla. Erragel by2ool ennou koll es7abou sfarou felfatra dee 3ala 7seb elinti5abet, we 3ala fekra moch ennes elli barra bass elli safret, elli gouwa bardou 5adou tickets compliment . (perto dollar )

Founoon said...

@ مهندس حر

العدالة هى إن مافيش طبقة تستغل الطبقات التانية

عليك نورررررر

Under capitalism man exploits man Under communism it's just the opposite

والاتنين زفت

الحرب الشعواء اللي قايمة عندنا بين الناس بسبب الانتخابات في ايران رعبتني على فكرة

اذا كان دول بيحصل عندهم كدا وهما في الاخر واحد ( في نظري على الاقل

امال عندنا هيحصل ايه؟

نظرية ال 80-20 ابتدت ترعبني فعلا

بتخيل لو حصل عندنا انتخابات طبيعية زي الكون كله

واللي انا عايزاه وشايفاه امل البلد مش هو اللي كسب
والاغلبية اختاروا واحد انا شايفاه حمار
هحس بإيه ؟
بعد ما عيشت على الامل دا سنين وتقمصت دور الامريكاني ودور اللبناني ودور الايراني وعيشت معاهم احاسيسهم لدرجة الاتحاد التام وجاتلي الفرصة اخيرا اني انتخب زي باقي الخلق

هعمل ايه لما الاقي الاغلبية مختارة حد انا مش مقتنعة بيه ؟

دلوقتي التقسيمة بقت نجاد حبيب الفقرا وموسوي بتاع العيال الفرافير

مع ان السيستم واحد

احنا عندنا بقى ايه اللي هيحصل بالذات ان السيستم مش هيكون واحد


دا احنا هنشوف ايام سودا

مسلم مصري said...

بالنسبة للانتخابات اللبنانية. مين قال إن السعودية ما تدخلتش. الكل اتدخل. السعودية وأمريكا وإيرااااااااان.
لو بتتكلمي على فلوس. فحزب الله سلاح وفلوس وكل حاجة من إيران. أمال نجاد مودي فلوس النفط الإيراني فين. بالنسبة للتصريحات. برضه الإعلان عن استعداد إيران لتسليح الجيش اللبناني. كان تدخل. لبنان ملعب مفتوح كل القوى الإقليمية والدولية والمحلية بتلعب فيه. الدعم الخارجي كان موجود وواضح مش بس للموالاة لكن للمعارضة ولنصر الله كمان.
الموضوعية بتقول كدة.

faissl said...

انا ح اقتبس لك حتة من ردي على مالك باعتباره الوحيد اللي باحترم دماغه واتكلم في الموضوع ده.. الرد كان ع الفيس بوك لأني ما كنتش شفت تدوينته ولا تدوينتك:

‎‎MaLek Moustafa‎‎ مارأي الاخوه العوريين(قصده الثوريين),والاخوة الفاشيست فيما يحدث في إيران ؟

Ahmed Faissl
ان حد مرتزق ابن وسخة أعلن نفسه فائز أول ما التصويت خلص عشان يدي الانطباع "لو" خسر -وده الطبيعي والمتوقع طبعا لأن خصمه له شعبية في العالم كله مش إيران لوحدها- ان فيه تزوير حصل
وطبعا كان الطبيعي ان فيه ناس تصدقه ده غير أنصاره طبعا
وده كان كفاية ان يتولد عنه احتقانات يجيد المرتزقة ابن الوسخة تسويقها اعلاميا زي ما كل المرتزقة ولاد الوسخة بيعملوا عادة وأظن واضح من تدويناتك الأخيرة انك عارف زيي بالضبط اشباه النماذج دي عندنا
ده كان رأيي باعتباري من الأخوة الفاشيست طبعا
:D