بخصوص التمويل الاجنبي عشان نجيب من الاخر

خلينا بس نتفق على أن اي تمويل ده فلوس وفيه قواعد للواحد عشان ياخد فلوس عليها وهو انه يكون بيشتغل وعشان كده بياخد فلوس

وبيشتغل شغلانة شريفة وحلال

او

فيه وسيلة اخرى زي وسائل هشام طلعت واحمد عز، اللي قائمة على تقليب الناس

يبقى ما يسمى بالتمويل، اجنبي بقى وللا هندي، هو مش اي حاجة غير عبارة عن اجر لشغلانة الواحد بيعملها

يبقى بقى، ايه الشغلانة اللي انت بتعملها؟

يعني مثلا انت ترزي، جالك واحد اشقر وللا اخضر وقال لك عايزك تعمل لي فستان فرح، عملت فستان الفرح واخدت عليه فلوس، فيها حاجة دي؟ فلوسك حرام؟ اظن لا، ما انت ترزي

جالك واحد بدقن وزبيبة وقال لك  عايزك تعمل لي يونيفورم للجيش الاسرائيلي وللا للجيش الامريكاني في العراق، فيها حاجة دي؟

امممممم

على حسب

يعني هل انت واحد شايف ان اسرائيل وامريكا دول احتلال؟ والاحتلال ده جريمة في حق الانسانية؟

في الحالة دي لو عملت البدل تبقى الابعد نصاب وتنزل لك بالسم الهاري

وللا انت شايف ان امريكا راحت تحرر العراق وان اسرائيل بتدافع عن نفسها؟

في الحالة دي اعمل البدل انت ما بتعملش حاجة ضد مبادئك، بس انت معروف بقى ان ده رأيك

يعني مؤسسات المجتمع المدني هنا مثلا، مؤسسة غير حكومية مثلا عندها لايحة بتقول احنا بنحب القطط موت موت موت

وبنكره الكلاب عمى عمى عمى

جات مؤسسة تانية في اي حتة في التانية، مؤسسة غير حكومية برضه، وقالت لهم: الله؟ انتوا بتحبوا القطط زينا؟ طيب احنا كمان عايزين نتعاون معاكوا في موضوع القطط ده، وبدل ما انتوا تشتغلوا لوحدكوا بمجهود ضعيف، واحنا نبقى بندن في مالطا هنا، تعالوا نتعاون، انتوا تقدروا على ايه؟ واحنا نقدر على ايه؟

بس فيه شرط، انتوا ليه بتكرهوا الكلاب؟ الكلاب حلوة، احنا عايزينكوا تغيروا رأيكوا في الكلاب او على الاقل تتجاهلوا وجودهم

آآآآآآآآآآآآه

لا احنا اسفين، احنا مبادئنا اننا مع القطط وضد الكلاب، شغالين على كده شغال، مش شغالين على كده بين البايع والشاري يفتح الله

لحد ما يلاقوا مؤسسة تانية زيهم بتحب القطط وبتكره الكلاب

المؤسسة الاولانية معاها فلوس بس عايشة في مجتمع بيكره القطط ويحب الكلاب، ومحتاجة ابحاث وادلة على ان القطط حلوين والكلاب وحشين

المؤسسة التانية في ايدها كل المعلومات اللي تقول ان القطط حلوة والكلاب وحشة بس مش معاهم فلوس تخليهم يوصلوا صوتهم للعالم

في الحالة دي المؤسستين دول لما يتعاونوا بيعملوا حاجة مفيدة للطرفين، دول بيشتغلوا في اطار مبادئهم ودوكهمة محتاجين شغلهم في اطار مبادئهم برضه

وفيه تبادل خبرات والاتنين على نفس المستوى، اي الاتنين مؤسسات غير حكومية، يعني ماحدش بيفرض على التاني حاجة

لو ح تتشرط عليا عشان بتديني فلوس انا بقى مش ح اديك الشغل بتاعي وخليك قاعد فاشل بقى كده وخلي الفلوس تنفعك

يعني لو مؤسسة ضد الصهيونية في امريكا (شوفوا بقى انا جايبة اكتر بلد باكرهها بعد اسرائيل) ومؤسسة غير حكومية وضد السياسات الامريكية وعايزة توسع شغلها وتقول للمواطن الامريكي اللي فيهم ناس نفسهم يخصوا المسلمين عشان ما يتوالدوش ان انتوا فاهمين غلط، مين يقدر يساعدهم في الحكاية دي؟ حد من هنا، الحد اللي من هنا محتاج يتفرغ للشغل ده عشان يعمله كويس ويوصل رايه مظبوط وكل اللي نفسه يقوله ويوضحه بيقوله ويوضحه، وطبعا لازم يمول الشغل ده

يبقى كده انت عملت شغل، مقتنع بيه، وبتحبه، وبتتعامل مع ناس مؤمنة باللي انت مؤمن بيه، واجندتهم شبه اجندتك او على الاقل فيه مصالح متقاطعة في الوقت الحالي.

واذا كان ده ينطبق على المؤسسات غير الحكومية في اوسخ بلد بعد اسرائيل ينطبق على بقية دول العالم قاطبة بما فيهم الصين حتى

واذا ينطبق على المؤسسات ينطبق على الافراد، يعني مثلا فيه بنت من عرب اسرائيل قررت تشارك في مهرجان اغاني في اوروبا بوصفها اسرائيلية. واكيد ح تاخد فلوس على الشغل ده مش ح تغني ببلاش. انا مش باحكم عليها هي غلط وللا صح، هي لها وجهة نظرها اللي بتقول فيها ان اسرائيل مصممة تقصيها كعربية وصاحبة الارض الاصلية وانها ح تبذل كل جهدها عشان ما معناه تغلس عليهم وتفرض نفسها عليهم ويبقى المنظر قدام العالم انها هي اللي عايزة تعيش في بلدها وتتعايش كعربية وهم اللي عايزين يقصوها، وفيه وجهة نظر تانية من بعض العرب ان دي سذاجة منها، وان اسرائيل لم تتخلى عن عنصريتها عشان هي تروح تخدم اهدافهم وتجيب لهم جايزة، لانها كده بتحسن صورتهم قدام الناس وبتقول ان بصوا اسرائيل دولة ديمقراطية ومقدمة متسابقة عربية تمثلها، يبقى ليه العرب متضايقين من اسرائيل وبيقولوا عليها عنصرية؟ دي وجهة نظر ودي وجهة نظر وانا اميل لوجهة النظر التانية، بس في النهاية البنت ما اخدتش فلوس على حاجة ضد مبادئها، هي ضد مبادئي انا، بس هي ما بتشتغلش عندي

-------

فيه طريقة تانية للم الفلوس: انتوا عايزين اعمل ايه وانا اعمله؟ عايزين اعمل قرد؟ اهو باطنطت اهو، عايزين اعمل حمار؟ بانهق اهو

واظن المؤسسات اللي بتعمل كده معروفة والافراد كمان معروفين

دول ولا مؤاخذة اسمهم قرداتية

------

فيه طريقة تالتة: اه اه... اللي انت عايزه اللي انت عايزه بس لايمني ع الفكة، وياخد الفلوس يعمل بيها اللي هو عايزه ويبعت تقارير مضروبة

وبرضه المؤسسات اللي بتعمل كده معروفة

ودول لا مؤاخذة اسمهم نصابين

------

الطريقة الرابعة للم الفلوس هي

واحد قاعد ما بيعملش حاجة خالص، خالص البتة، وهو اصلا ابيض يا ورد، ولا له اي لازمة في الحياة

جم ناس، ايا كان الناس دول بقى، فريدم هاوس، وللا خارجية امريكية، وللا حتى عمر بن الخطاب

قالوا له: ولا... تعالى اعلمك وانضفك واحميك وافسحك واكلك وياللا، من قدم شيء بيداه التقاه

اسمها طريقة الشحاتين

وزي ما احنا عارفين يا اصدقائي الصغار، مافيش صدقة من غير مقابل، المؤمن اللي بيدي صدقة متوقع من ربنا انه يدخله الجنة

ولو حد اكد له بما لا يدع مجال للشك ان الصدقة دي مش ح تنفعه ومش ح تدخله الجنة مش ح يدفعها، يدفعها ليه؟

وفيما يخص السياسة، اكيد الناس مش بتدفع صدقات، الناس لما تجيب واحد مالوش اول من اخر غير عنده اكاونت على الفيس بوك وللا عنده مدونة من ام بلاش وتقول له تعالى اكسب فيك ثواب

اذا هو قبل على كرامته الشحاتة

هم مش ح يقبلوا على فلوسهم انها تروح في الوبا، لازم عايزين حاجة في المقابل

والله لو المقابل ده يوافق اخلاقك وقيمك ومبادئك، ما جراش حاجة، مثلا واحد صاحب جمعية خيرية لقى عيل نايم في الشارع، اخده لبسه وحماه ووداه المدرسة على شرط يحفظ قرآن ويبطل كلة

الواد هو نفسه مؤمن بربنا ومتضايق انه بيشد كلة، يقوم يقبل، ليه لا؟ ده كتر خيره الراجل

لكن اخده وضبه وحماه وعلمه عشان يهرب له مخدرات، والله لو الواد له شوق في المخدرات وبيحبها ياللا ربنا يهني سعيد بسعيدة

لكن لو لا، يبقى لا

ده الغرض يعني