Monday 1 June 2009

بخصوص التمويل الاجنبي عشان نجيب من الاخر

خلينا بس نتفق على أن اي تمويل ده فلوس وفيه قواعد للواحد عشان ياخد فلوس عليها وهو انه يكون بيشتغل وعشان كده بياخد فلوس
وبيشتغل شغلانة شريفة وحلال
او
فيه وسيلة اخرى زي وسائل هشام طلعت واحمد عز، اللي قائمة على تقليب الناس
يبقى ما يسمى بالتمويل، اجنبي بقى وللا هندي، هو مش اي حاجة غير عبارة عن اجر لشغلانة الواحد بيعملها
يبقى بقى، ايه الشغلانة اللي انت بتعملها؟
يعني مثلا انت ترزي، جالك واحد اشقر وللا اخضر وقال لك عايزك تعمل لي فستان فرح، عملت فستان الفرح واخدت عليه فلوس، فيها حاجة دي؟ فلوسك حرام؟ اظن لا، ما انت ترزي
جالك واحد بدقن وزبيبة وقال لك  عايزك تعمل لي يونيفورم للجيش الاسرائيلي وللا للجيش الامريكاني في العراق، فيها حاجة دي؟
امممممم
على حسب
يعني هل انت واحد شايف ان اسرائيل وامريكا دول احتلال؟ والاحتلال ده جريمة في حق الانسانية؟
في الحالة دي لو عملت البدل تبقى الابعد نصاب وتنزل لك بالسم الهاري
وللا انت شايف ان امريكا راحت تحرر العراق وان اسرائيل بتدافع عن نفسها؟
في الحالة دي اعمل البدل انت ما بتعملش حاجة ضد مبادئك، بس انت معروف بقى ان ده رأيك
يعني مؤسسات المجتمع المدني هنا مثلا، مؤسسة غير حكومية مثلا عندها لايحة بتقول احنا بنحب القطط موت موت موت
وبنكره الكلاب عمى عمى عمى
جات مؤسسة تانية في اي حتة في التانية، مؤسسة غير حكومية برضه، وقالت لهم: الله؟ انتوا بتحبوا القطط زينا؟ طيب احنا كمان عايزين نتعاون معاكوا في موضوع القطط ده، وبدل ما انتوا تشتغلوا لوحدكوا بمجهود ضعيف، واحنا نبقى بندن في مالطا هنا، تعالوا نتعاون، انتوا تقدروا على ايه؟ واحنا نقدر على ايه؟
بس فيه شرط، انتوا ليه بتكرهوا الكلاب؟ الكلاب حلوة، احنا عايزينكوا تغيروا رأيكوا في الكلاب او على الاقل تتجاهلوا وجودهم
آآآآآآآآآآآآه
لا احنا اسفين، احنا مبادئنا اننا مع القطط وضد الكلاب، شغالين على كده شغال، مش شغالين على كده بين البايع والشاري يفتح الله
لحد ما يلاقوا مؤسسة تانية زيهم بتحب القطط وبتكره الكلاب
المؤسسة الاولانية معاها فلوس بس عايشة في مجتمع بيكره القطط ويحب الكلاب، ومحتاجة ابحاث وادلة على ان القطط حلوين والكلاب وحشين
المؤسسة التانية في ايدها كل المعلومات اللي تقول ان القطط حلوة والكلاب وحشة بس مش معاهم فلوس تخليهم يوصلوا صوتهم للعالم
في الحالة دي المؤسستين دول لما يتعاونوا بيعملوا حاجة مفيدة للطرفين، دول بيشتغلوا في اطار مبادئهم ودوكهمة محتاجين شغلهم في اطار مبادئهم برضه
وفيه تبادل خبرات والاتنين على نفس المستوى، اي الاتنين مؤسسات غير حكومية، يعني ماحدش بيفرض على التاني حاجة
لو ح تتشرط عليا عشان بتديني فلوس انا بقى مش ح اديك الشغل بتاعي وخليك قاعد فاشل بقى كده وخلي الفلوس تنفعك
يعني لو مؤسسة ضد الصهيونية في امريكا (شوفوا بقى انا جايبة اكتر بلد باكرهها بعد اسرائيل) ومؤسسة غير حكومية وضد السياسات الامريكية وعايزة توسع شغلها وتقول للمواطن الامريكي اللي فيهم ناس نفسهم يخصوا المسلمين عشان ما يتوالدوش ان انتوا فاهمين غلط، مين يقدر يساعدهم في الحكاية دي؟ حد من هنا، الحد اللي من هنا محتاج يتفرغ للشغل ده عشان يعمله كويس ويوصل رايه مظبوط وكل اللي نفسه يقوله ويوضحه بيقوله ويوضحه، وطبعا لازم يمول الشغل ده
يبقى كده انت عملت شغل، مقتنع بيه، وبتحبه، وبتتعامل مع ناس مؤمنة باللي انت مؤمن بيه، واجندتهم شبه اجندتك او على الاقل فيه مصالح متقاطعة في الوقت الحالي.
واذا كان ده ينطبق على المؤسسات غير الحكومية في اوسخ بلد بعد اسرائيل ينطبق على بقية دول العالم قاطبة بما فيهم الصين حتى
واذا ينطبق على المؤسسات ينطبق على الافراد، يعني مثلا فيه بنت من عرب اسرائيل قررت تشارك في مهرجان اغاني في اوروبا بوصفها اسرائيلية. واكيد ح تاخد فلوس على الشغل ده مش ح تغني ببلاش. انا مش باحكم عليها هي غلط وللا صح، هي لها وجهة نظرها اللي بتقول فيها ان اسرائيل مصممة تقصيها كعربية وصاحبة الارض الاصلية وانها ح تبذل كل جهدها عشان ما معناه تغلس عليهم وتفرض نفسها عليهم ويبقى المنظر قدام العالم انها هي اللي عايزة تعيش في بلدها وتتعايش كعربية وهم اللي عايزين يقصوها، وفيه وجهة نظر تانية من بعض العرب ان دي سذاجة منها، وان اسرائيل لم تتخلى عن عنصريتها عشان هي تروح تخدم اهدافهم وتجيب لهم جايزة، لانها كده بتحسن صورتهم قدام الناس وبتقول ان بصوا اسرائيل دولة ديمقراطية ومقدمة متسابقة عربية تمثلها، يبقى ليه العرب متضايقين من اسرائيل وبيقولوا عليها عنصرية؟ دي وجهة نظر ودي وجهة نظر وانا اميل لوجهة النظر التانية، بس في النهاية البنت ما اخدتش فلوس على حاجة ضد مبادئها، هي ضد مبادئي انا، بس هي ما بتشتغلش عندي
-------
فيه طريقة تانية للم الفلوس: انتوا عايزين اعمل ايه وانا اعمله؟ عايزين اعمل قرد؟ اهو باطنطت اهو، عايزين اعمل حمار؟ بانهق اهو
واظن المؤسسات اللي بتعمل كده معروفة والافراد كمان معروفين
دول ولا مؤاخذة اسمهم قرداتية
------
فيه طريقة تالتة: اه اه... اللي انت عايزه اللي انت عايزه بس لايمني ع الفكة، وياخد الفلوس يعمل بيها اللي هو عايزه ويبعت تقارير مضروبة
وبرضه المؤسسات اللي بتعمل كده معروفة
ودول لا مؤاخذة اسمهم نصابين
------
الطريقة الرابعة للم الفلوس هي
واحد قاعد ما بيعملش حاجة خالص، خالص البتة، وهو اصلا ابيض يا ورد، ولا له اي لازمة في الحياة
جم ناس، ايا كان الناس دول بقى، فريدم هاوس، وللا خارجية امريكية، وللا حتى عمر بن الخطاب
قالوا له: ولا... تعالى اعلمك وانضفك واحميك وافسحك واكلك وياللا، من قدم شيء بيداه التقاه
اسمها طريقة الشحاتين
وزي ما احنا عارفين يا اصدقائي الصغار، مافيش صدقة من غير مقابل، المؤمن اللي بيدي صدقة متوقع من ربنا انه يدخله الجنة
ولو حد اكد له بما لا يدع مجال للشك ان الصدقة دي مش ح تنفعه ومش ح تدخله الجنة مش ح يدفعها، يدفعها ليه؟
وفيما يخص السياسة، اكيد الناس مش بتدفع صدقات، الناس لما تجيب واحد مالوش اول من اخر غير عنده اكاونت على الفيس بوك وللا عنده مدونة من ام بلاش وتقول له تعالى اكسب فيك ثواب
اذا هو قبل على كرامته الشحاتة
هم مش ح يقبلوا على فلوسهم انها تروح في الوبا، لازم عايزين حاجة في المقابل
والله لو المقابل ده يوافق اخلاقك وقيمك ومبادئك، ما جراش حاجة، مثلا واحد صاحب جمعية خيرية لقى عيل نايم في الشارع، اخده لبسه وحماه ووداه المدرسة على شرط يحفظ قرآن ويبطل كلة
الواد هو نفسه مؤمن بربنا ومتضايق انه بيشد كلة، يقوم يقبل، ليه لا؟ ده كتر خيره الراجل
لكن اخده وضبه وحماه وعلمه عشان يهرب له مخدرات، والله لو الواد له شوق في المخدرات وبيحبها ياللا ربنا يهني سعيد بسعيدة
لكن لو لا، يبقى لا
ده الغرض يعني

51 comments:

TAFATEFO said...

ربنا يديله الصحة محمد صبحي

Unknown said...

يعني ايه؟

TAFATEFO said...

عارفه مسرحية الجوكر؟

Unknown said...

مالها؟

TAFATEFO said...

حلوه

وكان فيها طريقة مختلفة للم الفلوس

TAFATEFO said...

بس كان فيها حتة حلوة قوي لما بيقول لهناء الشوربجي

أدفع 100 ألف جنيه علشان بوسه؟؟ طب ليه .. طب ليه .. -مش فاكر بالظبط السكريبت- بس ما معناه .. دنا أجيب 100 واحده مشكلين وأبوس زي منا عايز

Unknown said...

لا
كان فيه طريقة: احب الم الزبالة قوي

TAFATEFO said...

دائماً وأبداً تفهمي غلط

وعلى فكره .. أحب ألم الزبالة قوي مكنتش في الجوكر

Unknown said...

ماهي فلوس الشحاتة زبالة

واحب الم الزبالة كانت في الجوكر
لما كان عامل عطيات والباروكة وقعت منه

TAFATEFO said...

وايه هي فلوس الشحاته؟

ذو النون المصري said...

مظبوط
...احب الم الزباله كانت فعلا في الجوكر
لكن ايه دا كله
كل دي طرق للم الفلوس
علي فكره
الموظفين في مصر لهم طريقه غير الطرق الاربعه اللي عندك
يشتغل 37 دقيقه في اليوم و يقبض عليهم مرتب زي ميجبش عيش لشهر

Unknown said...

انا ما اعرفش من الشحاتة غير طريقة واحدة: اني اخد فلوس من غير ما اعمل شغل

الا اذا كنت باعمل شغل وانا مش قايلة بقى

Unknown said...

انا عندي تحفظ على موضوع الموظف ده

اولا: فيه تعمد ان الموظف ما يعملش شغل لانه ماحدش بيديله شغل

ثانيا: الموظف ده بيتشبح ضرايب ومش بياخد قصادها اي خدمات البتة
يبقى على الاقل يرتاح شوية

كفاية انه ضرايبه بتروح لبنك الاحتياطي العالمي فوايد للديون اللي ماحدش عارف اخدناها ليه

TAFATEFO said...

بس محدش قال ان اللي بياخد فلوس مبيعملش شغل .. لكن شغله ده بيصب في مصلحة مين وبيخدم أهداف مين .. وليه ناس بتدفع فلوس وهي قد تبدو غير مستفيده

ده اللي فيه كلام

هو لو حضرتك تتكلمي بتفصيل أكثر عن الجمعيات الأهلية والمنح الفردية والأشكال الأخرى للمعونة أو الشحاته إلخ إلخ ممكن نفهم

انما الكلام العايم واتهامات الشحاته والعمالة للأسف الشديد مفهمتهاش

Unknown said...

انا قلت شحاتة
قلت فين عمالة؟

ثانيا
ماهو ده اللي باقوله، اللي باين ان فيه ناس بتاخد فلوس لوجه الله تعالى

هل هم بيعملوا شغل؟
نعرف ايه الشغل ده عشان بس ما نبقاش زي الاطرش في الزفة

وللا هم، زي ما بيدعوا، لا ما بيعملوش شغل

ده يبقى اسمه شحاتة

TAFATEFO said...

طب حضرتك بتقولي هما .. وأنا -هعمل- مش فاهم مين هما

نمشي واحدة واحدة

الجمعيات الأهلية اللي ليها مشاريع معلنة وقد تسعى وتتقدم لنيل تمويل من المعونة الأمريكية

دول ايه نظامهم؟

Unknown said...

انا والله كتبت بوست طويل وعملت كأني باكلم اطفال عندهم خمس سنين عشان اوضح وجهة نظري، مش عارفة ايه الغامض؟

انا جمعية، عندي خطة معلنة
الخطة دي بتقول ايه؟
والله اذا كانت الجمعية دي زي ابن خلدون مثلا مع التطبيع ونشر الديمقراطية باي وسيلة بتعريف معين للديمقراطية
لما ياخد تمويل من المعونة الامريكية هو اصلا اجندته موافقة اجندتهم

انا من حقي اني اقول ينعل ميتينك على ميتين اللي انت بتاخد منهم فلوس
وانت ايه الفرق بينك وبين حسني مبارك؟ ما هو بياخد من المعونة وانت بتاخد من المعونة
وهو من حقه يقول لي: انت واحدة مخك على قدك احنا عايزين ننضف البلد
بصي على العراق، بقت زي الفل اهي
وانا احسن من حسني مبارك عشان انا دمي خفيف وهو دمه تقيل

لكن جمعية عاملة لي حنجوري وتاخد من المعونة الامريكية
على اساس ايه؟
يعني مثلا مؤسسة بتقول انها اشتراكية
تاخد من دولة رأسمالية؟ من معونة الناس؟

كده مش بس ح اقول له ينعل ميتينك
ح اقول له انت يا واد نصاب؟

TAFATEFO said...

يا نوارة هانم حضرتك في النص بتاكلي جمعيات كتير من جمعيات المجتمع المدني

أمثلة مش عارف في مشروعات ليهم بيدخل في تمويلها المعونة الأمريكية ولا لا .. بس من أمثلة الجمعيات دي نهضة المحروسة وعلشانك يا بلدي وغيرها وغيرها

الجمعيات دي بتعمل مشاريع وساعات بتتقدم لنيل تمويل من المعونة الأمريكية .. وفي جهات مانحة غير المعونة الأمريكية زي ساويرس مثلاً

ايه الموقف؟؟

ايه اللي مستفيداه أمريكا من دعم مشروعات الجمعيات الأهلية ومشروعات المجتمع المدني .. وايه اللي مستفيده ساويرس مثلاً

بسأل علشان أفهم

TAFATEFO said...

ده مبدئياً لأن الموضوع تخين

الكلام عن جمعيات المجتمع المدني .. ده مبدئي

mido said...

الميل لو سمحتى

Unknown said...

اولا انا مش هانم

ثانيا انت بتسألني انا؟

سيدنا علي قال: يعرف الرجال بالحق ولا يعرف الحق بالرجال

مش عشان فيه جمعيات عاجباك وبتاخد من المعونة الامريكية تبقى المعونة دي حاجة كويسة

المعونة دي بتتصرف في اطار المخطط الاستعماري
وانا مش باتكلم نظريات مؤامرة

انا باقول اللي قاله صاحب كتاب اعترافات قرصان اقتصادي بالادلة والوثائق

المعونة معمولة عشان تفقر الدول مش تغنيها

ولو سمحت اقرا الكتاب ده لانه مهم

Unknown said...

ومش معقولة ابدا السؤال اللوذعي ده

يعني من غير ما تقرا الكتاب كده بالكومن سنس

امريكا دي دولة محتلة وللا احنا بنتبلى عليها؟

امريكا دولة بتدعم اسرائيل وللا احنا بنلقح جتتنا؟

امريكا دولة بتكبل دول العالم التالت اقتصاديا عشان تفضل تابعة ليها وللا احنا بنستعبط؟

امريكا دولة بتدعم الديكتاتوريات اللي بتخدم مصالحها وللا احنا بنهلوس؟

امريكا بتاخد ضرايب المواطنين تصرفها على السلاح والحروب وللا احنا بنحلم؟

تفتكر فجأتن كده لوجه الله ح يطلعوا معونة محبة في الله والرسول والمؤمنين؟

من غير اي اهداف ولا مصالح ولا استفادة؟

ده عشان ايه؟

وادخل على فور شير واكتب اعترافات قرصان اقتصادي
وحمل الكتاب واقراه
او ادخل على موقع
john perkins
ونزل الكتاب واقراه بالانجليزي

Unknown said...

رديت عليك يا ميدو

TAFATEFO said...

لا مهي مش جمعيات عاجباني ولا عارف بتاد من المعونة ولا لا

أنا بسأل .. ومش معترض ان أمريكا دولة محتلة وراعية الإرهاب وراعية الصهيونية إلى آخره

كنت عايز أسأل على شوية حاجات بس محصلش نصيب

:D

عبقرينو said...

من عاداتى فى النظر الى اى موضوع ان اراه بصورة فوقية وعدم الغوص فى التفاصيل لذلك فى تدوينتى المنشورة سابقا http://3abkarino.blogspot.com/2009/03/roi-vs-voi.html
والتى انقلها بالنص فى تعبيقى حول كل المعونات واهدافها وبخاصة الامريكية
-------------------------------
فى معضلة المعونة والنامرو

Return of Investement
ومعناها العائد على الإستثمار
Value of Investement
ومعناها قيمة الإستثمار
بدأت هذه التدوينة بوضع تلك التعبيرات التى يستخدمها رجال الأعمال والرأسماليين فى كل استثماراتهم لكى تكون تلك خلفيتنا وليست نظرية المؤامرة او اننا متشككون أو أو .... كل مايمكن ان يقال عنى ولكننى سأستخدم التعبيرات التى يعرفها ويستخدمها الرأسماليين واصحاب المصالح لتوضيح المعضلة
العائد على الإستثمار تعنى نسبة المكاسب بالنسبة الى رأس المال المستثمر فى خلال مدة زمنية محددة وكلما كان العائد على الاستثمار بالموجب كلما كان هذا الإستثمار جيدا وجاذبا
قيمة الإستثمار هى العائد على الإستثمار مضافا اليها قيم أخرى لايمكن ترجمتها الى اموال ولكنها تنعكس فى صورة مكسب مع مرور الوقت فمثلا رضاء العميل عن الخدمة التى اقدمها هى قيمة تنعكس فى المستقبل فى زيادة معدلات الشراء لذلك العميل.....وهكذا
وايضا لابد ان نتفق على شىء لا أحد يعطى اى انسان لوجه الله بمعنى لا الإتحاد الأوروبى ولا امريكا ولا فلان او علان سيعطينا معونة لوجه الله سيعطيها طبقا للمقاييس المذكورة بعاليه
سألخص فى الأسفل العائد والقيمة على الإستثمار فى معضلة المعونة والنامرو وايضا سأطرح بعض الأسئلة التى اتمنى ان نأجد إجابة عليها
العائد على الإستثمار التى استطيع تخمينها:

* شراء المنتجات الأمريكية من معامل وكيماويات واجهزة
* استقدام خبراء يحملون الجنسية الأمريكية والعمل فى البلاد التى تستخدم المعونة
* مرتبات الخبراء والعاملين تكون معفاة من الضرائب بحكم ان ذلك يكون كمعونة
* الإنتفاع بكل موارد البلد الذى يستقبل المعونة دونما مقابل بداية من تأشيرات الدخول حتى مصاريف الإقامة والسفر.

العائد على الستثمار كرقم مادى فى حالة المعونة الامريكة والمعونات الاخرى بالسالب ولكنه سالبا أقرب مايكون الى الصفر بمعنى من الممكن ان نقول ان مايتم صرفه يتم استرجاع معظمه او كله للدولة التى قدمت المعونة فى الصورة التى ذكرناها بعاليه (مرتبات واعفاءات ومنتجات....الخ)ز

قيمة الإستثمار :

* بالإضافة الى العائد على الإستثمار ايضا معلومات يستطيعون تجميعها بصورة شرعية عن البلد الذى يستقبل المعونة
* التحرك بحرية ودون قيود للعمل داخل البلد مستقب المعونة.
* وضع البلد المستخدم للمعونة فى وضع الإحتياج دائما وبالتالى يكون بصفة دائمة معتمدا على المعونة ولا يستطيع الإستغناء عنها
* وبالتالى فى وقت ما الضغط على البلد الذى يستقبل المعونة بقطع المعونات اذا لم تنفذ شروط ما.
* دائما البلد الذى يستقبل المعونة يكون فى وضع سياسى اقل وايضا لايمتلك حرية قراراته.
* البلد الذى يقدم المعونة له كل حقوق الملكية الفكرية وما يتبعا من انجازات علمية كبراءات اختراع وعلاجات وأمصال وابحاث ملكا له ملكية تامة ويبيعها للبلد الذى يستقبل المعونة.

تلك بعض الإستنتاجات من وجهة نظر ملاحظ ومهتم بأمر ذلك البلد وليس فى فكره نظرية المؤامرة او ارث تراكمى من العداء ولكن يناقش على الأسس التى يتحدث بها العالم الغربى الرأسمالى وبنفس لغته

أسئلتى:

هل يتم مراقبة نشاط تلك المعونات والمراكز من قبل الحكومة المصرية لا أقصد مراقبة مالية او حتى بالصوت والصورة ولكن مراقبة قيمة الإستثمار كما ذكرت؟
هل نستطيع فى وقت من الاوقات الإستغناء عن انشطة تلك المعونات وانشطتها والإعتماد على كوادرنا المصرية؟
ماهى عدد المعونات العاملة فى مصر وكم عددها ومامجالات تخصاصاتها؟
لماذا طردت الحكومة الاندونسية وحدة النامرو 2 من اراضيها العام الماضى فى ظل تفشى مرض انفلونزا الطيور هناك واحتياجها الشديد لهم ولخبراتهم؟
تلك بعض الأسئلة جالت بخاطرى وانتظر الرد عليها
وفى النهاية لاننكر العمل الذى تقدمه تلك المعونات والأنشطة التى تقوم بها ولكن مكاسبها قليلة ذائعة الصيت فى مقابل خسارة مادية كبيرة خفيه على المستقبل البعيد

تحياتى
------------------
كل شخص يشغل شوية دماغه وهو يفكر لماذا يعطينى هذا مالا ولماذا لايعطينى هذا وهكذا وهذا لايعنى انى ارفض كل المعونات ولكن فى حال قبولى لمعونة اكون على وعى بالاهداف الخفية

TAFATEFO said...

هو في سؤال يهمني بصورة أساسية .. معلش استحملي غباوتي

المنح الدراسية

لما جامعات حكومية أمريكية تقدم منح دراسية

أو جامعات أوروبية أو كندية أو أسترالية

أو إيرانية مثلاً

أو ماليزية

Unknown said...

ميدو

Kamal Adham was a participant or observer in the following events:
1976: CIA and Other Intelligence Agencies Use BCCI to Control and Manipulate Criminals and Terrorists Worldwide

September 1, 1976-Early 1980s: Secret Intelligence Cabal Works with Rogue CIA Elements to Influence Middle East and Africa

1978-1982: Criminal BCCI Secretly Buys CIA’s Main US Bank; Even as CIA Uses Bank for Covert Operations

والتفاصيل هنا

http://www.historycommons.org/entity.jsp?entity=turki_bin_faisal

راجل تاريخه مشرف الصراحة

mido said...

ده سبق


أدهم صبري بقي :D

Fatma said...

اعتقد ان الناس اللي بتتمول في الغالب ممكن يكون عندها اهداف كويسة
وممكن تكون دي الوسيلة الوحيدة اللي لاقوها قدامهم
ووارد جدا يكونوا عارفين ان في تمن هيتدفع وان دا مش لوجه الله
وممكن يكون التمن اللي هيتدفع في نظرهم جزء من اجندتهم بس بطريقة مختلفة وممكن يكونوا متخليين ان الوضع مش بالسوء دا
او ان اللي يجي منهم احسن منهم
او مبدأ اتمسكن لحد ما تمكن

عموما دي اكتر الحلول افتراضا لحسن النية
مثلا عمرو خالد وايمن نور

مش معنى كدا اني بحبهم او متفقة معاهم او شايفة ان اللي بيعملوه صح
بشكل اوضح وادق ما بحترمش فكرة الغاية تبرر الوسيلة وان كان ممكن ابلعها لو كان الهدف مساعدة البني ادمين
ومش ممكن ابلعها ابدا لو الهدف ان البني ادم يوصل للكرسي

عشان كدا ممكن اقبل عمرو خالد بس نور من اول طلعته وهو ضاغط على اعصابي

وقياسا

التمويل الاجنبي لتحقيق هدف شخصي مرفوض جملة وتفصيلا
ومش لاقية وصف يليق

ولو الهدف مساعدة البني ادمين ف يا حسرتي اننا وصلنا للدرجة دي ومافيش منظمات عندها دم تساعد

دا رأيي

mido said...

عشان كده رشحتلك فيلم انترناشونال من فترة في موضوع البنك

AbdElRaHmaN Ayyash said...

:D:D:D:D
و الله عسل
جميل جداا الموضوع ده
في وقته و مفيد و في الجون يعني
شكران جدا يا نوارة

Unknown said...

يا طفاطيفو المنح الدراسية بتبقى على اسس علمية بالتعاون مع الجامعة المصرية والجامعة الاجنبية ايا كانت
الجامعة المصرية بترشح واحد متفوق وبتبعته
اذا كنت تقصد الفول برايت
وما شابهها انا مش بابلعها قوي لكن في النهاية هي منحة دراسية على اساس علمي وامتحان ودرجات معينة واصلا انت بتدفع فلوس عشان تقدم على المنحة انت وغيرك وهم بيختاروا على الاساس العلمي الشخص المتفوق او الاشخاص مش كل الناس بتروح يعني كان المتقدمين عملوا جمعية وشاركوا في تعليم المتفوقين المختارين وهم مستحقين للمنحة دي باجتهادهم الدراسي وبمساهمتهم المادية كمان

عبقرينو said...

معلش اعذورينى بس بجد انا بتنرفذ بسرعة
اللى بيسأل المعونات الدراسية فايدتها ايه؟؟
فايدتها انى امريكا اكبر دولة فى العالم بتدى منح دراسية
فايدتها انى احسن عقول بتيجى عندها وبتعمل اختراعات وابتكارات والجامعات دى بتمتلكها
,,,,,,,,,,,,,الخ حاجات كتير جدا
بس ده مش معناه نرفض المعونات ولكن على الاقل نبقى عارفين انها مش لوجه الله وايضا نتعب دماغنا شوية ازاى نعرف اهدافهم ونوازن اما نقبلها او نرفضها

Unknown said...

لا هو يمكن يكون عايز يعرف الفرق ما بين منحة كمال ادهم واي منحة دراسية اخرى
منحة كمال ادهم بتاعة المدونين بالتعاون مع الفريدم هاوس وهيئة المعونة
ماحدش قدم ودفع فلوس وامتحن وراح في منحة دراسية
دي دورة تدريبية هم بينقوا الناس
هم الحقيقة مش بينقوا حد
هم بيكلموا كل الناس اللي يوافق يوافق
واللي يشرشح لهم زي ما انا عملت من حوالي سنة يشرشح
وبرضه بتبقى من توصيات ناس واحد يسافر تبع المحنة دي ويديهم اسامي ناس
مافيش اي شروط غير انك توافق
ليه؟
هو ده السؤال
المنحة الدراسية فيها فايدة متبادلة
زي ما عبقرينو قال
هم بيستفيدوا بالعقول الكويسة اللي بتيجي من الدول المتخلفة
واحنا بنستفيد ان عيالنا يتعلموا
وعشان كده فيه شروط للمنح دي
اهمها ان الواحد يكون متفوق في المجال الدراسي اللي هو رايح فيه ويجيب سكور معين
الى جانب خطابات توصية من استاذ او اتنين من اللي درسوك
عشان ما تروحش هناك تعلق البنات وتسكر وما تذاكرش
وللا تطلع غشيت في الامتحان وجبت النمر دي
لكن اولا اصلا اصلا ان رئيس المخابرات السعودي التاريخه كله تعاون مع السي اي ايه يعمل معهد اعلامي في الجامعة الامريكية
ايه ده؟
وفجأتن تلاقي واحدة بتتكلم عربي مكسر ما تعرفهاش بتقول لك تعالى اما اسفرك
ايه ده؟
وتروح هناك تلات شهور وتقابل وزيرة الخارجية الامريكية
ايه ده؟
اي واحد غلبان قاعد في بيتهم تجيله فرصة يسافر ويتفسح ويشوف الدنيا ح يوافق طبعا
ولما يروح مش ح يحس بحاجة
لا ح يدوله حبر سري ولا ح يصوروه صور مخلة
ح يقضي وقت لطيف ويرجع مبسوط

ايه ده بقى؟
ماهم يا معاهم قرش محيرهم بيجبوا مدونين ويطيروهم

يا اما فيه حاجة نفسهم المدونين مش فاهمينها ولا عارفين هي ايه؟
انا شخصيا مش عارفة احددها لان نفس المستهدفين واللي سافروا مش حاسين باي حاجة
ماحدش عمل معاهم حاجة تقلقهم

مما يزيد قلق البني ادم
عايزين من الناس ايه؟

انا عارفة اللي سافر عايز ايه؟
عايز يتفسح وينبسط
اللي نقوه بقى
عايزين منه ايه؟

TAFATEFO said...

بس

معلش يا عبقرينو بك ده اللي عايز أوصله .. أنا مش بسأل فايدتها ايه .. أنا بقول والنوع ده من التمويل ايه نظامه .. شحاته ولا أي من الأنواع المذكورة

ويا ترى تفرق لو كان من كيان استعماري زي أمريكا .. ولا من دول ملهاش ميه زي بعض دول أوروبا وكندا وأستراليا .. ولا من دولة إسلامية وملهاش دور في المنطقة زي ماليزيا .. ولا من دولة ليها أهداف في المنطقة زي إيران

اللي عايز أقوله

1- ان مفيش حد بيضحك على حد .. أنا بديلك فلوس علشان اللي بتقوم بيه يخدم أهدافي حتى لو كنا مختلفين في المبدأ .. من أول المشتغلين بالسياسة أو المؤهلين للعب دور سياسي ولو كفزاعه أو بديل محتمل لغاااااااااية أصحاب المؤهلات المتوسطة واللي بيسعوا لشهادات معتمدة

2- في أوجه من أوجه التمويل قد يكون لا غنى عنها .. وقد تخدم متلقي التميل أكثر بكثير من الجهة المانحة .. في بعض الجهات المانحة لما بتديلك فلوس منحة دراسية على سبيل المثال بتشترط انك تعمل لديهم فترة من الزمن بع حصولك على الشهادة زي الحكومة المصرية مثلاً .. هما ادولك التمويل علشان هيستفيدو بيه

لكن محش خبى عنك حاجه .. ومفيش حاجه اسمها يغرروا بيك

3- مفيش حاجه اسمها حكم عام على مصادر التمويل ومتلقي التمويل .. مفيش حاجه اسمها اللي ياخد تمويل من الجهة الفلانية يبقى كذا

في حاجه اسمها ده شغله ايه وهل التمويل خدم أهدافه ولا لا .. وايه وجه التقارب بين أهدافه وأهداف الجهة المانحة

4- أمريكا داعمة لإسرائيل وراعية الإرهاب إلخ إلخ إلخ .. بس مش كل ما يأتي من جهة أمريكا شر مطلق .. ومش كل اللي بيتعامل مع أمريكا خائن .. ومش كل اللي بيتلقى تمويل من المعونة الأمريكية ده بيخدم أجندة خفية إلخ .. مش بنفي تهمة .. بقول مش كل

5- انت طالب .. امريكا (أو غيرها) هتستفيد منك ايه - انت رجل أعمال على قدك .. أمريكا (أو غيرها) هتستفيد منك ايه .. انت مشروع سياسي .. أمريكا (أو غيرها) هتستفيد منك ايه - انت سياسي .. أمريكا (أو غيرها) هتستفيد منك ايه - انت عالم .. أمريكا (أو غيرها) هتستفيد منك ايه إلخ

السؤال مش في محله

السؤال الصح

أنا هستفيد ايه في مقابل ايه .. وده من غير أحكام مسبقة

TAFATEFO said...

أما بالنسبة للأهداف والأجندات الخفية .. اللي بتخضع لعدة مسميات أشهرها المجهول ومنها تسويق النموذج الأمريكي

مع استبعاد التدنيس والاستعمال وأصل الحكومه عايزه كل الناس أوساخ زيها

لو أنا طالب وطلعوني آخد دبلومه سنه واحده هناك فأكيد هما مش مطلعيني يستفيدوا من عقليتي الجبارة

لو أنا مشروع سياسي أو حقوقي وطلعوني آخد دوره في حقوق الإنسان مثلاً فأكيد هما مش هيشتروا ذمتي لخدمة أهدافهم التوسعية في المنطقة

لو أنا مشروع رجل أعمال وطلعوني يدربوني أو يعلموني آليات السوق لفترة قصيرة فهما أكيد مش مطلعيني يسقوني التطبيع ويستخدموني لمصلحة التطبيع

ايه المصلحة المستتره؟؟

TAFATEFO said...

الأخ عبقرينو علشان ميتنرفـ(ـذ)ش

أمريكا أكبر دولة في العالم .. في مجالات كتير هي قبلة العلم .. هي أكبر دولة بتصرف على المنح الدراسية

حضرتك حصرت ده في أقل القليل من الإنفاق

استقطاب العلماء والعقول لتسخيرهم لخدمة المجتمع الأمريكي أو العلم الأمريكي

وعلشان كده سألت طب والمنح الأوروبية والماليزية والباكستانية والإيرانية .. حتى ومنح الشيخ راشد آل مكتوم وساويرس والحكومة المصرية

كل دول عايزين يستقطبوا العلماء والعقليات الجبارة لخدمة أهدافهم

لما أطلع أدرس دبلومة بابليك هيلث مثلاً لمدة سنة أو ام بي ايه فأكيد لا أنا العالم والعقلية اللوذعية ولا في اكتشاف في دراسة إدارة الأعمال

لما أطلع ناس معاهم شهادات متوسطة علشان ياخدوا شهادات أعمال معتمدة من جامعات أمريكية فأنا أكيد مبهدفش لإستغلال عبقرياتهم واختراعاتهم

ومع استبعاد الاستعمال

ممكن بس أفهم وجهة نظر حضرتك في الهدف المستتر من وراء منح وتمويل كهذا؟

عبقرينو said...

سؤالك صح جدا انا هاستفيد ايه فى مقابل ايه
ونظرا للعوز اللى فيه المصريين وفقدان القدوة والنموذج فبعض المصريين فقد البوصلة للتمييز بين الصح والغلط
اما الأهداف المستترة فادعى ربنا يبصرك بيها لو جاتلك فرصة زى دى لأننا بتفكيرنا المحدود وعدم اطلاعنا على الآخر بصورة كافية فاحنا متاخرين جدا جدا فى اننا نعرف وبنرجع بعد فترة نبكى على اللبن المسكوب
انا مش مع انى كل حاجة وراها مؤامرة ولكنى مع انى كل سعى بشرى فى الدنيا ورائه مصلحة ولن يعطيك اى انسان شىء لوجه الله غير ابوك او امك :):)وعن تجارب مع كل مارايته من معونات سواء داخل مصر او خارجها وماهالنى من اهداف خبيثة مخبأة رايتها فى سفرياتى فى بلادنا العربية وبعض الدول الافريقية

Unknown said...

طفاطيفو

انت يابني بتقول اي كلام؟ ايه اللي لما تقول له يا شفيق يرد، ما انشالله عنه ما رد

ده اسمه دفن رؤوس في الرمال

الجهة اللي انت بتتلقى منها اجرتك - ودي اسمها اجرة - لازم تكون بتعمل شغلانة انت على الاقل موافق عليها

ما تروحش تقول انا ضد الاستعمار وتاخد من المعونة الامريكية

ما تروحش تقول انا ضد اسرائيل وتاخد معونة من اسرائيل

قول انا مش شايف ان امريكا استعمار انا شايفها داعمة الحريات واسرائيل لها حق في الوجود وانا مع التطبيع وعشان كده باخد فلوس منهم

كده انا احترمك
انما فلوس المعونة دي فلوس الحكومة الامريكاني اللي بتصرف نفس الفلوس دي على قتل الفلسطينيين وبتاخد ضرايبك فوايد

عاجبك اللي بتعمله اشتغل معهاها
مش عاجبك ما تلخبطنيش بقى وتلخبط الناس معاك

ده كده واحد ضد الرقص وبيتشغل في الكباريه يلم النقطة ويقول انا ماليش دعوة، الرقاصة بترقص، انا بس بالم النقطة

عبقرينو said...

طيب ياطفطيفو.....منح ساويسرس بيتم خصمها من الضرايب المستحقة عليه بنص قانون على ماظن موجود فى مصر زى اللى يبنى مسجد تحت بيته مش بيدفع عوايد على البيت وبالتالى منح ساويرس تضرب عصفورين صرف الفلوس فى منح هوا يتحكم فيها وفلوس كده او كد كان هايدفعها ضرايب وثانيا صيت حلو قوى يقدر يتكلم فيه فى اى حته فى الدنيا
منح ايران....طبعا زى منح امريكا هاترجع تحلف بجمال الايرانيات:) باهزر هاتحلف باصرار الايرانيين على مواجهة العزل الامريكى لهم ومدى تقدمهم وبالتالى مكسب سياسى للايرانيين فى تحسين صورتهم وايضا تنشيط اللغة الفارسية وهكذا
افضل انا بقى اضيع وقتى وافكر ليك ايه الاهداف من ورا كل حاجة :):) لكن المؤكد مافيش حاجة لوجه الله

TAFATEFO said...

:D

طب خلاص .. أنا آسف

بس أنا شايف أمريكا راعية الإرهاب وداعمة الصهيونية

والمنحة لو ممولة من الحكومة الأمريكية هفكر أنا هستفيد ايه وفي مقابل ايه .. وبعدين أقرر

مش هرفض بس علشان هي جايه من أمريكا .. إلى أن يقنعني أحد بالعكس

على فكره المنحة اللي المفروض اني رايحها 2010-2011 هي بإعلان من الحكومة المصرية .. في أمريكا .. ومعرفش التمويل من فين .. ومشترطين العمل معاهم (الحكومة) لمدة 36 شهر

TAFATEFO said...

يا عبقرينو بك أعتقد اننا متفقين

ما لم يرى شره ليس بشر .. أو كما قال

Rasim Marwani said...

الاستثمار في مجال العقول والقلوب والمواهب ككل استثمار، لديه اصوله وقواعده وسلعه ومصانعه وتجاره...وفيه ايضاً ربح وخسارة

الاستاذ مصطفى، يرى ان الاستفادة من الطفرة العلمية الموجودة في الولايات المتحدة لا تجعل من المستفيد مشبوهاً بشكل تلقائي، طبعاً اقصد شبهة الشحاتة او العمالة او اي شيء آخر.

وبشكل مجرد لا شك ان العلوم على اختلاف انواعها ملك للبشرية جمعاء، بدأت في مكان وتطورت في مكان وترحل تبعاً للظروف الموضوعية من مكان الى آخر .

وبهذا المعنى من حق وواجب اي انسان ان يسعى الى طلب العلم في كل مكان يستطيع ان يصل اليه حراً مختاراً وان يقيم فيه حراً مختاراً وان يغادره اذا رغب بذلك بحريته واختياره.

نأتي الى الوسيلة والهدف، تقول السيدة نوارة ان لكل قرش يصرف هدف ووظيفة وعائد دنيوي او آخروي، ومن الانصاف الاقرار ان هذه القاعدة سليمة مائة بالمائة وشواذها السفهاء ولهم احكام في الشريعة الاسلامية تمنع عليهم حق التصرف باموالهم.

نأتي الى نقطة الخلاف حول العائد المتوقع للصارف لامريكي على المصروف له المصري او العربي
وهنا لابد من العودة لقواعد الاستثمار في مجال العقول والقلوب والمواهب، وتنص على مايلى :
من اصل كل الف عملية تعليم قد لا ينتج كعائد على الاستثمار الا ظهور موهبة واحدة جديرة بتبرير الاموال المصروفة على الالف

من اصل الف موهبة مكتشفة تتوزع نسب تطوير عملية الاستثمار قبل جنى الارباح الى معادلات من قبيل:

ستون بالمائة يصرون على العودة الى اوطانهم برغم الاغراءات وخلافها

ثلاثون بالمائة مواهبهم تنفع المستثمر في بلادهم الاصلية ويعودون كموظفين لحسابه بين اهلهم

خمسة بالمائة ممكن ان يعود تشغليهم بالارباح في بلاد غير بلادهم الاصلية وغير بلد المستثمر
خمسة بالمائة لا يجوز ان يخرجوا من دولة المستثمر الا على نقالة او بعد تقادم الفن الذي برعوا فيه

وهكذا دواليك

لا يعاقب الله من حلمه على الذنب الاول ولوى ذلك لما سرق سارق ولا قتل قاتل وبعضهم يسيء استخدام الستر الآلهي للتمادي بالجرائم بدلاً عن التوبة

والتجنيد لا يكون لكل طالب ولا لمنعت كل الدول ابناءها من طلب العلم في دولة اخرى

وتوصيف عملية الاستثمار يختلف بين المتلقى والواهب

الواهب يراها رأسمال تشغيل فيه هوالك
والمتلقى يراها بحسب قدرته على التجرد

أبو عمر - الصارم الحاسم said...

هاديكي
tip
صغيرة بخصوص الموضوع قبل قبل قبل قبل اللي فات

اوراسكوم للانشاءات

اشمعنى
؟

بتورد مصريين لعمل في القواعد الامريكية بافغانستان والعراق

الهدف المعلن هو العمل في النشاءات...لكن لا اظن ان ده هو الهدف الوحيد

المعلومة اكيدة بنسبة
100%

خالد الدخيل said...

انا عملت كوبى من الكلام ده وهخللى ابنى يقراه (9 سنوات ) وبعد اذنك هبعت لنك لكل اللى اعرفهم
انتى انسانة عظيمة يانوارة
اشكرك من قلبى وجزاكى الله خير
عارفة انا ساعات كتير لما بازهق من كلحاجة افتح مدونتك و
مش مهم انا نازل
خالد
صحفى مصرى

المهندس said...

الاخت العزيزة / نوارة
اولا ارجو الا يفسد الاختلاف للود قضية .... علشان مترجعيش تقولي انك بتتنرفزي بسرعة
ثانيا : فقط ارجو ان تقرائي هذا الخبر
http://www.almasry-alyoum.com/article2.aspx?ArticleID=213088&IssueID=1422
ثالثا : اتمني ان اقراء تعليقك علي الخبر سواء هنا ... او بمدونتي المتواضعة ... واحب ان اسمع منك ..اذا كنت تشنين هذا الهجوم الشرس علي امريكا ( الذي فيه جانب كبير صحيح ... وبعضه يحتاج للمراجعة ) ... فاتمني ان تبيني لي ... ما موقع حدث كهذا من اعتبارات الديموقراطية ... ودولة القانون
شكرا مرة اخري ... والسلام عليكم
http://elmohandes2010.blogspot.com/

Rasim Marwani said...

المهندس

انت تعلق على خبر اعدام ثلاثة ايرانيين مدانيين بتهم الفساد في الارض وهم من تولى تزويد المفجرين بادوات

جريمتهم في مجزرة المسجد
والحديث لا يدور حول المفجرين انفسهم، وهم كما قرأت موضوع متابعة.
الآن اذا كان حديثك عن سرعة تنفيذ الحكم، فانا اوضحت لك انهم من شبكة زودت المفجرين بادوات جريمتهم

وتفاصيل القاء القبض عليهم وزمانه ومكانه وفحوى الاجراءات القانونية المتبعة ليست معلومة لي ولا لك
وبالتالي خفف حماستك حتى تحصل على كل البيانات وقم بانتقاد النظام القضائي في ايران وفي الاسلام من الآن
وحتى ينضب ريقك
بالنهاية الرأي كشيء آخر كل انسان له واحد

ومن باب الافتراض وكي تنتبه ان من يدافع عن سامي شهاب لانه جازف بحياته ومستقبله بكل ايثار وتضحية من اجل صون ارواح لا ناصر لها الا من حباه الله بقلب يصدق عليه انه قلب انسان

من باب الافتراض اذا كانت هناك اي جهة تظلم في ايران وتتصرف في خلقه بغير ماامر : انا عن نفسي اقول لعنة الله عليها وعلى من سمع بفعلها ورضي به

والمقارنة بين ايران التي تتعرض لارهاب اممي منظم منذ انتصار الثورة في السبعينات ومصر التي تتعرض لارهاب حكومي من نفس الفترة لا يساعد قضيتك

على الاقل لم يستغل الايرانيون الحروب المعلنة ضدهم لالغاء حق الناس في تقرير حاضرهم ومستقبلهم

Unknown said...

ابو اكزم
الله يكرمك ويجبر بخاطرك يارب

عاشق مصر
انت نبيه قوي... بجد بسم الله ما شاء الله

lastcrazyboys said...

ياااااااااه

من اجمل مواضيعك..واكثرها ابهارا

ما ينفعش الــواحد يكتب تعليق ..ده من المواضيع اللي تفضلي تقريها ...وتقريها ..وبس

انا جي اطلب بس انه كل فترة تعملي تحديث للموضوع

او سميها تذكير..اي حاجة

المهندس said...

الاخ / عاشق مصر
والاخت / نوارة التي وصفت تعليقه " بالنبيه جدا "
معلش انا اسف ... انا مفهمتش حاجة
اولا: ماهي اجراءات التقاضي التي لااعلمها انا او حضرتك ...او التي ممكن ان يعلمها اي شخص علي وجه الكرة الارضية والتي تسوغ اعدام " 3 " اشخاص ...بعد القاء القبض عليهم ب "48 " ساعة ؟
ثانيا : لكي لا تتوه الحقائق وسط الغبار الكثيف ... فارجو الايتم شخصنه المواضيع ...والا يتم محاكمة الضمائر .... انا اوردت خبرا ... وطلبت التعليق عليه وشرحه ... ووكيف يتفق مع دعوات الديمقراطية ... وسيادة دولة القانون .... فارجو ان نلتزم بقواعد الحوار الراقية ... والا ندخل في متاهات المزايدات المتبادلة.
وشكرا ....
ملحوظة .... ياليت ان يتم ...ترك التعليقات بمدونتي المتواضعة ...حتي اذا ما طالع الزائر الخبر ... وجد الراي الاخر " ردكم " اسفله ... ويفكر بينهما ... ويقتنع بما يراه صحيحا .... وشكرا مرة اخري علي زيارتكم للمدونة

Rasim Marwani said...

المهندس

تحية طيبة ..
ومجدداً ارجو ان تخفف من حماسك قليلاً لكي اسمعك، صوتك اعلى مماينبغي لشخص يكتب الشيء ونقيضه
وسأتشرف بالتعليق في مدونتك بمجرد انتهاءي من الرد هنا
اولاً : بالنسبة لطلبك "لكي لا تتوه الحقائق وسط الغبار الكثيف ... فارجو الايتم شخصنه المواضيع ...والا يتم محاكمة الضمائر .... انا اوردت خبرا ... وطلبت التعليق عليه وشرحه ... ووكيف يتفق مع دعوات الديمقراطية ... وسيادة دولة القانون .... فارجو ان نلتزم بقواعد الحوار الراقية ".

انا لاادري اين شخصنت المواضيع التي تخصك
واين حاكمت ضميرك، واذا كانت البداية بان تقولني مالم اقول فانا اسأل الله حسن الختام.

انا شخصنت جوابي بقولي ان رأي الشخصي من يظلم ايا كان ايراني او طلياني عليه لعنة الله وعلى من سمع بظلمه ورضى به ، وشخصنت جوابي لانني بالنهاية شخص ولست الناطق الرسمي باسم الجمهورية الاسلامية في ايران

ثانياً : انت بدأت موضوعك بمهاجمة شرفاء بحسب تعبيرك صدعوك بالدفاع عن ايران وفرعها اللبناني !!!

وتقول اننا قلنا ان الحكومة تسرعت في توجيه الاتهام لخلية حزب الله وانا عن نفسي لم اقول تسرعت انا اقول اجرمت واساءت لانها اعتبرت دعم المحاصرين في غزة جريمة، وانا ارى ان هذا الفعل بحسب الدستور المصري والقانون الانساني واجب على كل مستطيع والمجرم من يتخلف عن دعم اخوه الانسان وقت حاجته اليه

ثالثاً: بالنسبة لايران وتركيا وفنزويلا وكل بلد سمعنا له صوتاً او رأينا له فعلاً يدعم مانعتبره قضية الامة الاولى فلسطين ، فليس له عندي الا الشكر الامتنان والعرفان بالجميل.

وفي حال اردت ان امارس ترفاً فكريا يتعلق باصدار الاحكام على مايحدث في ايران او تركيا او فنزويلا كمثقف او كمسلم او كداعي للديمقراطية وانا لست بالقطع من هؤلاء الثلاثة

ستكون نظرتي الاولى هي السؤال عن نظام الحكم هل تم اعتماد الدستور والقوانين من خلال استفتاء حر ونزيه؟
هل يتم تداول السلطة في هذه البلدان من خلال انتخابات حرة؟
اذا كانت الاجابة بنعم وهي كذلك بما يتعلق بالدول الثلاث، فلن اشغل بالي حول قضايا تفصيلية لها علاقة بناس احرار ودولة حرة تمارس حريتها

ومصائبي ليست متأتية من اعدامهم لمليون مواطن او لمواطن واحد خلال يومين، بالنهاية هذا نظام اختاروه بحرية وليتحملوا مسئولية خيارهم.

مصائبي متأتية من نظام بناه التحتية فقط تقتل الآف من مواطنيه ونظامه الاجتماعي ولاقتصادي والسياسي خلق ملايين من العاطلين عن الحياة

نعود لطلبك حول التعليق على حكم اعدام ثلاثة اشخاص فجروا مسجداً وحكم عليهم بالاعدام خلال يومين فقط

وقلت لك سابقاً هذا التوصيف ليس دقيق، المفجرون شخص انتحاري ومساعدين امنوا عمليته الاجرامية حتى تمت وبعضهم لم يقبض عليه الى الآن

والحكم هو على مساعدين تم القاء القبض عليهم في سياق حرب طويلة عمرها من عمر انتصار الثورة والمفجر انتحاري ولا علاقة له بالاحكام الصادرة

ولم اجد مصدر واحد جدير بالثقة يوضح كيفية القاء القبض عليهم وزمانه لاستطيع ترتيب حكم على القضية في حال كنت راغباً بذلك اصلاً.
واسفت على حماسك في محاكمة نظام دفع الكثير من مقدرات بلده لدعم قضايانا العادلة والمحقة والحكم عليه بالفاشية قبل ان تتوفر لك معطيات موثوقة وكافية الا اذا كان ماينشر في الصحف قرآناً منزلاً وانا لا اعرف

على كل حال وعلى فرض ان القضية التي نشرت دقيقة مائة بالمائة جوابي بسيط وارجو ان تتأمل به قبل الرد :
تنص الشريعة الاسلامية المعتمدة كقانون في ايران على الادانة بالقرينة المعتبرة اوالاعتراف بدون اكراه
وروحها يقول بالنص : فوات عقوبة مرتكب خير من عقوبة بريء
وفي حال توفر القرينة او الاعتراف بدون اكراه يجوز اعدام القاتل او القتلة فوراً

وهذا الموضوع المتعلق باحكام الشريعة الاسلامية ليس موضوع خلاف بين المذاهب السبعة التي تعترف بها منظمة الدول الاسلامية

وعليه، اذا كان الحوار هو موضوع رفض احكام الشريعة الاسلامية او القوانين المستمدة منها لمصلحة تشريعات انكلوفونية او فرنكفونية، فهذا الحوار لا يعنيني لانني لست من اهل الاختصاص

واذا كانت المقارنة سياسية بين النظام القضائي المصري والايراني فهذا ايضاً ليس من الميادين التي يمكن لي او لك الخوض بها ونحن شامخي الرؤوس
على الاقل من يموت مظلوماً بايران بموجب حكم قضائي ...هو من اختاره وبيده تغييره

وخلط عباس بدباس، وايران بفرعها اللبناني، وقضائها الداخلي بدعمها الخارجي لفلسطين

لا ادرى الى اين سيأخذك او يأخذنا وماذا سيقدم لك او لنا

وتقبل مودتي