ايه اللي مبروك عطية عمله ده؟

تحديث:
استنوا استنوا استنوا، احلى كلمة في كل البرنامج عجبتني، اكتر من خليل فاضل ومن ماما ومن هيام مبروك كلمة بكل البرنامج الشيطان فكرني بيها وانا باصلي
مجدي احمد علي: هم اختاروا له المرشدة دي لانها بتتكلم امريكي وهو اصعب من الانجليزي زي ما كلنا عارفين
-----
يا جدعان اوباما المفروض انه مز للستات، للستاااااااااااااااااااااااااااات، ايه حالة الهياج الجماعي دي؟ ما الناس تمسك نفسها شوية ايه ده؟ وماسكين بس عمالين يقولوا: عايزين تمنعوا ختان الاناث وتبوظوا اخلاق ستاتنا... ستاتكوا قاعدين في حالهم واشرف من الشرف اهو، شوفوا رجالتكوا 

احلى كلمتين عجبوني في اللقاء كله:

خليل فاضل: العالم الاسلامي عامل زي المرأة المحرومة عاطفيا وجنسيا وجالها واحد مختلف وبص لها

وكلمة امي (والله مش عشان امي بس بجد عجبتني قوي) لما واحد اتصل يقول مادد لنا ايده قامت قالت له: مادد لنا ايده عشان نبوسها

---

ايه مشاعر مبروك عطية ناحية اوباما؟ زي ما قلت على التويتر

اقطع دراعي من لغلوغه ان ما كان فاكره مسلم وخافي اسلامه، وان ده مخطط اسلامي للسيطرة على امريكا، وتلاقيه شافها في حلم كمان على رأي يساري مصري، وعشان كده عمال يتغزل فيه غزل صريح خدش حياءنا وجرح مشاعرنا فعلا

على فكرة، انا عمري ما فقدت اعصابي قدام راجل، مهما كان حلو زي اوباما واحلى من اوباما كمان، بالطريقة اللي الدكتور مبروك فقد بيها اعصابه دي ابدا

مش زمان كانوا بيقولوا الست عاطفية والراجل عقلاني؟

وللا ده اخر الزمن ده اللي كل حاجة بتتشقلب فيه وللا ايه؟