هي حدودنا دي بيتهرب منها كل حاجة ما عدا دوا العيانين؟

ده تقرير عن العبودية في اسرائيل، بيبيعوا ستات روسيات ويدفعوا فلوس زي ايام ويحك يا حنظلة، اذكر الهتنا بخير واله محمد بسوء

مش مهم ده

المهم ان الروسية اللي بتدخل عشان تشتغل رقاصة وفتاحة للزباين ما شاء الله ما شاء الله بتعدي من حدودنا، عشان بس ما ابقاش ظالمة، بتتهرب من حدودنا، وفيه حوالي عشرين الف روسية اتهربوا من حدودنا ويا عيني باينهم عبط وللا ايه كانوا داخلين يشتغلوا خدامات

طب بيتهربوا من حدودنا ازاي وليه؟ واحدة روسية، زي ما قطعت التذكرة عشان تروح مصر، ما قطعتش تذكرة تروح اسرائيل ليه؟

طب لما جات مصر، مين استقبلها؟ والاهم، مين وردها؟ ومين عداها من عندنا؟ لها وكيل يعني؟ انا باسأل مش باتهم، لها وكيل هنا في مصر؟ بيورد عبيد؟ عبيد؟ ارقصي يا جارية؟ لا لن ارقص... عيناي عيناي؟ 

يعني هو الاكل وحليب الاطفال والادوية حرام وفرقة عجبا لغزال قتال عجبا هي دي اللي حلال؟ 

انا بس مش مخوفني غير يكون مصريين ضالعين في الموضوع، امال يعني بتيجي مصر الاول ليه؟ ماهو لازم لها كفيل

وبعدين انا واحدة خيالي بيسرح، والمواضيع بتكبر في دماغي

يعني اللي يورد جاريات حسناوات لابي جهل، يورد اعضاء بشرية، ويورد اطفال كمان، العيال اللي بيتخطفوا دول ومش عارفين بيروحوا فين، واسرائيل، كما هو وارد في التقرير، بلد سبهللة مافيهاش اي قانون خالص، وما عندهاش دستور ينص على اي حاجة، قانونهم: احنا براحتنا

وبعد كده لما بيقفشوهم جوة بقى، وياخدوا باسبورهم، ما بيحاولوش يهربوا باي طريقة ليه؟ ما بيسلموش نفسهم للسلطات ترحلهم ليه؟ ليه بيستسلموا للا مؤاخذة الاريال؟ ده بيضربهم ومش بيديهم فلوس وبيبيعهم بعقد

ماهي دي حاجة غريبة برضه، يعني مهما عملت فيها السلاطات مش ح تعمل فيها اوحش من كده

المهم

احنا ايه اللي حشرنا في الليلة دي؟ اقصد ايه اللي حشر حدودنا، هو مش فيه كاميرات بخمسة وتلاتين مليون دولار عشان تراقب النملة والدبانة؟ وللا الكاميرات متدينة ولما بتشوف مزة بتقول استغفر الله العظيم وتدور وشها؟