حركة كفاية عاملة اعتصام في ميدان التحرير؟

وياترى ياهل ترى كام واحد بقى من القيادات ح يختفي ويقفل تليفونه ويشيع انه اتقبض عليه؟ وكام واحد ح ياخدها من قصيرها ويستخبى في النقابة لحد ما كام عيل يتقبض عليه ويتسحل وهم يطلعوا في الجزيرة يتكلموا عن قهر النظام المصري؟

اقول اللي في قلبي؟ اقول؟

اقول ما اصلا مش سايبة لي حبيب

انا باحمل حركة كفاية كل اللي حصل للشباب اللي نزلوا في التعديلات الدستورية وطلع تلاتين اللي جابوهم وفي الاخر قالوا على امكوا بقى، هو احنا مش بني ادمين يعني؟ امريكا نفسها احسن منكوا

واذا كنت سالخة وش بتوع الفريدم هاوس، فمن العدل اني اقول انهم ضحية كفاية، وان من سنتين بس ما كانش حد فيهم يخطر في باله كل ده

بدون ذكر اسماء، العيال اللي صدقوا وآمنوا وبسذاجة كانوا نازلين يعتصموا في ميدان طلعت حرب، وعلى اخر اليوم عشرين واحد منهم اترمى في بوكس وعشرة بقوا يلفوا وراهم، والباقي كان بيجري في الشوارع الخلفية (لا وايه؟ العيال اللي جريت من الامن بقى فيه ناس بتزعق لهم: انتوا ليه ما اتقبضش عليكوا!)، كتير منهم تف على الليلة كلها، مش كلهم صحيح، وحتى مش اغلبيتهم، بس نسبة معقولة منهم، ونسبة مهمة، وجوهرة التاج كمان زي ما بيقولوا، خصوصا لما المحامين قفلوا تليفوناتهم، والقيادات الشريفة كانت مستخبية وما ظهرتش غير على الجزيرة عشان تقول: النظام المصري ضربنا واعتقلنا

"نا"

دي اللي هي مين؟ ما انت زي القرد اهو، وكنت غطسان طول اليوم وما طلعتش غير لما الليلة خلصت والامن عمال يلف بالعيال كأنه بيسرب قطة، وبقية العيال عمالين يجروا وراهم لمدة واحد وعشرين ساعة، وفي الاخر البوكس رماهم متفرقين في الصحرا وبقوا عاملين زي بني اسرائيل في التيه، او عيال بيجروا من الامن طول النهار وفيه منهم ما باتش في بيته، وهم اصلا ما كانوش محتاجين حد ولا محتاجين حركات ولا قيادات

هم كانوا بيعملوا شغل كويس قوي وبيفيدوا فعلا، واثاروا قضايا ماحدش من "المناضلين" اتكلم فيها، كفاية ان بسببهم دلوقت ظباط البوليس بقوا يخافوا من الناس في الشارع

ليه تركبوا على كتافهم وتفطسوهم وتجروهم لمواجهات مالهاش طائل وتزنقوهم في خانة اليك وتحسسوهم ان لو ما نزلوش ينضربوا يبقوا جبنا؟ ما كانوا كويسين، ومتملكين من ادواتهم، وعرفوا يفاجئوا النظام اللي مقفل كل السكك من سكة ما كانش عامل حسابها، تضحوا بيهم وفعلا بقى تاخدوهم دروع بشرية لحد ما يسبوا الدين للبلد كلها وكل واحد فيهم يقول اشوف نفسي انا بقى، عشان ايه يعني انضرب واتهان واجري زي اللي عامل جريمة وفي الاخر واحد ماشفناش وشه طول النهار وقافل التليفون في وشنا هو اللي يطلع في الجزيرة ويبقى البطل؟ ما اطلع انا كمان واتكلم ويبقى لي حيثية، انا مش ح اعيش طول عمري عيل ينضرب عشان يطلعوا على كتافي

مبسوطين دلوقت؟ مبسوطين؟

ياللا ياللا، اي عيل طلع جديد خدوه اعملوا فيه نفس اللي عملتوه في اللي قبله، عشان تطلعوا في الجزيرة وع العيال والبلد وكرامة البني ادمين

واقول لواحد فيهم: يا فلان العيال ح يتقبض عليهم

يقول لي: احنا مش بنحسبها كده

بس انا بقى باحسبها كده، ومش عايزة حد يتقبض عليه ولا ينضرب ولا يتهان تاني، ومش عايزة ناس نفسها تنكسر تاني، ومش عايزة شباب يروح هدر تاني، ومش عايزة اشوف الوشوش الكابية المجروحة دي تاني، ومش عايزة شباب كانوا واخدينها جد يتحولوا الى عبثيين تاني

كفاية خسرنا عيال زي الالماظ وبقوا هم نفسهم اللي بيتريقوا على اللي كانوا بيعملوه من سنتين وحاسين انهم اتاكلوا على قفاهم

ما تسيبوا الناس في حالها بقى، وخلي بقى اي واحد دلوقت واخداه الحماسة يدخل يسب لي، زي نفس العيال اللي سبوا لي من سنتين عشان قلت ما تنزلوش وهم نفسهم اللي بيسبوا لي دلوقت عشان باقول ايه ايه؟ ايه اللي جرا لكوا؟