Friday, 12 June 2009

ويا ترى الاخ الملتحي ده من الناجون من النار وللا التكفير والهجرة؟

ما كل الناس عندها دين اهو وبتغطي نسوانها، اشمعنى احنا اللي بيتسب لنا الدين ليل نهار لحد ما بقينا عرة واول ما جالنا واحد يقول لنا البسوا "هاجييييب" زي ما انتوا عايزين زغردنا؟


لا ومغطي وش الحريم زي المجلات السعودي، وعمال يقول: اتحشمي... اتحشمي.. طب ماهو يهودي وهابي اهو، تقدر فرنسا تفتح بقها معاه؟ هم ازاي عملوا كده؟ يعني ازاي اجبروا الناس كلها غصب عن بوزها تقعد تتمحلس لهم وتبلع لهم الزلط بعد ما كانوا بيدوهم بالجزمة؟ ما يشوروا علينا بما اننا بناخد بالقبقاب المتعاص في الكنيف دلوقت حاليا، بس بس، انا عرفت، واتاريهم يا قلبي بيكسبوا فينا ثواب واحنا ظالمينهم، هم بيقتلونا عشان نصعب على الناس زي ماهم صعبوا على الناس، قوم ربنا ينفخ في صورتنا ونقب على وش الفتة زيهم
ولاد الاصول حاجة تانية برضه، احنا ولاد الجارية، ربنا يديك يابني انت واللي زيك على قد نيتك، كان عامل فيديو بيشرح فيه الصهيونية انما ايه؟ زي الفل، زي الفل، تقولش فلسطين دي فرااااااااغ، وكأن الفلسطينيين اللي في الارض "الموعودة" دول لابسين طاقية الاخفا
وعامل موقع ما شاء الله للدعوة... دعوة؟ هي اليهودية ينفع حد يتهود ويدخل فيها؟ هم مش كانوا بيعملوا تحليل دي ان ايه عشان يتأكدوا ان الصخص يهودي اصلي مش براني؟ طب ما لو فيها دعوة تبقى مش عرقية زي ما الصهاينة بيدعوا، يبقى دين عادي اهو زي ما احنا بنقول، انا اتلخبطت كده، دعوة، وحجاب، والاخ ملتحي، ومغطي وش الستات، واعملوا دي ان ايه، لا ادخلوا اليهودية، لا اليهودية دين، لا اليهودية عرقية، وحاسبين المتدين يهودي، والمتهود يهودي، والملحد اللي من اصل يهودي برضه يهودي، حتى زكي فطين عبد الوهاب اسرائيل بعتوا له يقولوا له انت يهودي غصب عنك عشان امك يهودية، مهما حاولت تقول انك مش يهودي، و"احنا اقدم شعوب العالم واثرنا على كل العرقيات"! لا والجملة الاخيرة دي دخلت في الجنان بقى، وبقى كتير من الصهاينة بيقولوها، الظاهر عشان لما عملوا تحليل دي ان ايه لقوا ان اليهود خليط عرقيات فقالوا لا، احنا كلنا واحد والناس هي اللي شبهنا
ايه البرجلة دي؟
طب ماهو لو كل العالم يهودي اللي مش بكيفه يبقى بالدي ان ايه يبقى ايه لزوم اسرائيل؟ يعني ح نسيب الشقة كلها ونقعد كلنا في اودة؟

16 comments:

حـنــّا السكران said...

مصادر في وزارة الثقافة المصرية :

الوزارة تعتزم ترجمة كتب لكتّاب إسرائيليين من العبرية إلى العربية ...
......

أرجوكم حدا يقول لفاروق حسني أنه ما يوصل فيه الأمر انه يقلع لهم كلّ تيابه ..منشان المنظر المؤذي بس .

يعني هي كانت ترجمة الأدب العبري حرام في السابق و الان صارت حلال ؟

أنا لا أناقش الترجمة بحدّ ذاتها , أنا أحبّذ الترجمة من كل لغات الدنيا ,لكن هذا الرجل غريب فعلاً , لا يوجد عنده كلام مناسب لأمر مناسب أو زمان مناسب أو في مكان مناسب .
ألدّ عدو لفاروق حسني .. هو فاروق حسني نفسه .. إنها أعجوبة أن يبقى هذا الرجل وزيراً للثقافة لما يبدو أنه ألف عام .

Dr.Online said...

الشروط اللي بيقولها في لبس الستات تكاد تكون مطابقه للشروط دي في الاسلام

و على فكره
الراهبات كمان بيلبسو كدا

اظن ان الواحد لو رجع للفطره هنلاقي ان ده اللي بنحسه بالفطره اصلا

-------------------

السؤال طالما ادياننا كلها بتنادي باللبس الصح و التواضع
ليه لما احنا كمسلمين بنحاول نتمسك بالشكل دا بيقولو علينا متطرفيين؟

أنفاس الصباح said...

نا مش عارفة مدونتك دى كانت غايبه عنى من زمان ازاى

انا وقعت كده على كنز لما عرفتها

بجد ربنا يبارك فيك وفى اطلاعك الواسع وثقافتك ورؤيتك الموزونة للامور

احى فيك وطنيتك وانتمائك لامتك

فعلا ذرية بعضها من بعض

الجديد بقى انك حسب ما استنتجت ابنة الاستاذه صافيناز كاظم

انا بحبها جدا ومعجبه بيها من زمان

معلش انا معلقتش على التدوينة لان انا كل شوية ادخل اقرء الموضوعات السابقة
تقدرى تقولى ان التعليق ده انطباعى عن المدونة ككل
بصورة مبدئية
تقبلى مرورى الى هيتكرر كتير ان شاء الله

مواطن مصري said...

هو دة محمد حسان بتاع اليهود؟؟؟

هما عندهم بردو سلفين هما موجدين في كل حتة

مهندس حر said...

شكلك ما شفتيش حد لا من الناجون من النار و لا من التكفير و الهجرة .. إسمعى نصيحتى و ما تحطيش الأخ ده فى مقارنة معاهم ده على الأقل فى الفيديو ده شكله معتدل و نميس عالآخر .. و بعدين لا داهية لتلاقى حد يقولك .. مالهم يا ختى ما هم محترمين أهه و بيلبسوا ستتاتهم كويس؟..

مواطن مصري said...

مهندس حربنا ياخد المتطرفين و يريح العالم منهم


بتوع التكفير و الهجرة وامثال الي في الفيديو دة

كان ناقص يتكلم عن عذاب القبر
:D

جبهة التهييس الشعبية said...

جو

اقول لك حاجة
انا عارفة الخبر من امبارح واتكسفت اتكلم فيه

بالظبط للاسباب اللي انت بتقولها
هو ليه اصلا ترجمة الكتب اللي بالعبري ممنوعة؟

ممنوعة عشان احنا ح ندي فلوس للكتاب اللي ح نترجم لهم يا جو
عشان كده الناس معترضة

الاطلاع على اي معلومة بالذات اسرائيلي متاح على النت جدا

حتى اللي بالعبري احنا عندنا ترجمة فورية على النت

وبعدين فاروق حسني ده بقى
انا مش عارفة اقول ايه


dr. online
الظاهر عايزين يلبسوا هم ويقلعونا احنا
ههههههههههه
انت عارف احنا بنسمع الكلام


انفاس الصباح
يا ستي انت نورتيني


مواطن مصري
اه
وقريب قوي ح يسجل فيديو يقول فيه لتسيبي ليفني (حيث ان دي المعتدلة اللي عندهم): يا فاشلة، يا فاشلة يا فاشلة
يا افشل خلق الله
انت اللي فاشلة يا فاشلة
ههههههههههههههههههه

الفيديو ده فكرني بفيلم الباشا التلميذ


مهندس حر

والنبي يا اخويا انا لو كنت اوعى على الفيديو ده كنت ارفقته في خطبة نتانياهو كنوع من انواع التقارب

مواطن مصري said...

متفكرنيش بفيديو بتاع محمد حسان هههههههههههه


الراجل دة انا مش عارف لية الحكومة بتطرد عمرو خالد برة مصر و سايبة السلفين يطلعو على التلفزيون

بدراوى said...

جماعات المرأة فى إسرائيل تهاجم الحجاب: يرفع حرارة الجسم ويسبب الصداع والهرش.. ولم تذكره التوراة


http://www.almasry-alyoum.com/article2.aspx?ArticleID=211593

الكلمة نور said...

عندى سؤال وليس من باب جعله بوابة للتنحجر واستعراض المواقف
انتى لم يخطر ببالك لمرة ان تذهبى لاسرائيل؟
وهل لو خطر فى بالك ايه اللى ممكن يمنعك؟

جبهة التهييس الشعبية said...

لا الحقيقة ما خطرش في بالي خالص اني اروح هناك
لان مافيش حاجة غامضة بالنسبة لي وعايز استطلعها
يبقى ايه اللي يخليني اتمنى حاجة زي دي؟

ايه اللي يمنعني؟
نفس اللي يمنعني اني اشرب مجاري

الكلمة نور said...

الصيام يعنى

فلاشاوي said...

فيديو قصير عن تصريحات أوباما
لمنظمة المصالح الأمريكية-الإسرائيلية

http://www.youtube.com/watch?v=lPwF8ZsIZkc

جبهة التهييس الشعبية said...

الكلمة نور
ههههههههههههههههه
هههههههههههههههههههههههه
ههههههههههههههههههههههههههه
ههههههههههههههههههههههههه
هههههههههههههههههههه

جامدة جداااااااااااااااااا
ههههههههههههههههههههه
هههههههههههههههههههههههههه
الله يحظك
مش عارفة اسكت من الضحك
ههههههههههههههههه

soreal said...

i highly recommend that u google: the noahide

better yet google: noahide lubovitch


interesting insight there :P

طائرٌ حر said...

لا يستطيع أحد في العالم (المتحضر) أن يعتبر ما يدعو إليه هذا اليهودي من تمسك بدينه جهلا أو تخلفا أو ردة إلى القرون القديمة (و ليس الوسطى) لا لشئ إلا أن كل ما عدا الإسلام حلو و الإسلام فقط هو الكخة..


عندما ترتدي اليهودية حجابها أو يأمرها هذا المتعصب بالحشمة يصبح إنسان محترم ملتزم دينيا و طاهر و زي الفل و هما فعلا أطهار و أحباب الله و مساكين

و عندما ترتدي الراهبة حجابها و ردائها المحتشم فهي ملاك طاهر و حبيبة الرب و مترفعة عن الشهوات و محترمة و بجناحين كمان و ما فيش حد يقدر يقولها أي حاجة


لكن عندما ترتدي المسلمة حجاب أو نقاب تكون رجعية و متخلفة و متزمتة و كيس زبالة حسب بعض اعوان الإحتلال من بلادنا ..أما من ينصحها بالحجاب فهو عدو المرأة و عدو التقدم و رجعي و عرعور و سلفي و مخه جزمة و عاوز يرجعنا للقرون الوسطى و عقليته ذكورية و نيته وحشة و متحرش و مغتصب أطفال كمان .

العيب مش فيهم.. العيب إن ف وسطنا خونة و عملاء ليهم..مجرد ما شافو نسوانهم اتهبلو.. و مجرد ما لعبولهم بالدولار انسعرو.. و نسيوا أهلهم و بلادهم و دينهم و شرفهم و عرضهم..

العيب إننا مش مؤمنين و لا مقتنعين بالحق الذي نحمله بينما هم يحاربون و يجادلون عن باطل..

يا حرقة قلبي عليكي يا بلدي