في انتظار الثورة الخراوي

المقال ده بيقول ان السي اي ايه طايح في العالم ثورات ملونة، اه والله، اسمها كده ثورات ملونة، وانه بيتغلغل في اي مجتمع من خلال المجتمع المدني وجايب بالتأريخ موافقة الكونجرس من سنتين على مشروع الاطاحة بالنظام الايراني

كدهون يعني... وش مافيش فصال

بالنوسبة لنا احنا في حال ما يزهقوا من سونة ويجيبوا لنا ثورتنا الخراوي (ماهو يدوبك على قدنا احنا عندنا الوان ايه هنا؟) ان شاء الله بقى ح تلاقوا العالم كله لابس لون خراوي تضامنا مع الكام خرية اللي ح يعملوها، وطبعا، زي موسوي كده، مش ح يصابوا بخدش والناس هي اللي ح تموت

حبيت بس اقترح اللون من دلوقت عشان نخلص النية كده وربنا يكرمنا

المقال ده عن وهمية ثورة التويتر، وان معظم اللي بيقولوا انهم ايرانيين اللوكيشن بتاعهم في كندا وامريكا، وان اي حد في الدنيا يقدر يقول على نفسه ايراني ويهبل في الكلام ويدي معلومات غلط

الا انا شفت واحد اسمه

persiankiwi

باينه مجنون وللا ايه؟ عامل زي جنرال الكازوزة وعمال يدي اوامر كده:

بيبول (ايها الناس يعني) ما تدفعوش فواتير التليفون ولا الكهربا

بيبول لو عندكوا ارصدة في البنوك اسحبوها كلها مرة واحدة عشان نهدم الدولة

بيبول ماحدش يروح الشغل عطلوا الدولة احنا عايزين نهدم اركان الحكومة

بيبول بكرة الساعة اربعة اتصلوا بالامن وادوهم معلومات غلط عن اماكن المظاهرات

وابن المجنونة كاتب اللوكيشن بتاعه في ايران؟ وهو لو في ايران ح يعرف يقول الكلام ده؟ ثم حد في الدنيا يعمل تنظيم سري على التويتر؟

ده غير التضارب بقى في حكاية البنت المسكينة اللي ح يتاجروا بدمها من هنا للصبح، شوية يقولوا كانت واقفة بتتفرج، وشوية يقولوا لا دي كانت في المظاهرة، مع ان ما كانش حواليها مظاهرة، وشوية يقولوا كانت بتشتري حاجات

 كام سؤال بيمغص في نفسيتي:

هو نجاد ليه بيستخدم الرصاص الحي في تفريق المتظاهرين؟ مش فيه اختراع اسمه خراطيم مية؟ مش حتى فيه اختراع اكثر وحشية اسمه القنابل المسيلة للدموع والرصاص المطاطي؟ ليه الرصاص الحي يعني؟ ازاي يعني مش عارف يحتوي الموقف ويهدي بدل ما بيعند معاهم؟ حد يعند مع مليون بني ادم؟

السؤال التاني: بجد يعني انا عايزة اعرف النظام الحالي اللي في ايران عمل لنا احنا ايه؟ الناس اللي محروقة من نظام ما تعرفش عنه حاجة وهم اصلا عندهم مبارك دول وضعهم ايه من الاعراب؟ قال على راي المثل، فوقيهم خرا وتحتيهم خرا ويقولوا اف ريحة خرا، طب اليكم المفاجأة، النظام ده حايش عنا عنصرية كتير من الايرانيين ضد العرب، وبكرة يمشوا وييجي اوساخ زي الشاه، وللا زي الشاه ليه؟ ما واحد شيخ طالع (تبع رفسنجاني) بيقول: المرشد بيقول لنا ان نظامنا ديمقراطي مقارنة بالانظمة اللي حوالينا؟ طب هم ايش جابهم لينا دول؟ احنا الشعب الايراني شعب عظيم ومختلفين عن الكل... بلا بلا بلا

وبالنوسبة للمصريين اللي ح يتهربوا من واقعهم الاليم ويقولوا احنا مش عرب، فلا معلش، احنا بندخل في المناقشة دي على سبيل الفراغ والفضا وبناخد اللي بيقولوا الكلام ده على قد عقله زي ما انا باخد زينب اختي على قد عقلها لما بتقنعني انها بيضا وعينيها عسلي وشعرها اصفر، ساعات اقول لها: لا يا زينب انت سمرا وعينيكي سودا وشعرك اسود، وساعات اسيبها

بس احنا عرب، تاريخيا، وثقافيا، واثنيا، وجغرافيا، ورسميا، وعرفيا و.... مش عارفة اقول لكوا ايه؟ دي مناقشة فعلا عاملة زي مناقشاتي مع زينب لما باحاول اقنعها انها مش بيضا ومش عينيها عسلي ومش شعرها اصفر

يعني لو احنا مش عرب يبقى الدنيا دي مافيهاش عرب، كانوا ح يتولدوا ازاي؟ ما احنا اللي ولدناهم

المهم يعني ح يرجع تاني اخويا الامير بظرميط الايراني يدينا بالجزمة زي ما كان بيدينا زمان واحنا نلحس الارض من تحتيه وساعتها طبعا ما حدش ح يسأل عن الجزر ولا عن المد الشيعي ويوم ما ترجع ايران ترسانة لحماية ضهر اسرائيل ماحدش ح يسأل عن مشروعها التوسعي، ولا حتى عن اسلحتها النووية، عشان اللي جايين دول من عينة الواد اللي قال لي: 

الملالي بيساووا ما بينا وبين العرب، وانتوا ايش اوصلكوا لينا يا جرابيع، احنا دولة حضارة واياك تجيبي سيرة الحضارة المصرية انتوا ناس كل كلب احتلكوا وانضف ناس احتلوكوا هو احنا، لكن احنا عندنا كرامة، والملالي دول بيساووا ما بينا وما بين السنة وبيقولوا عليهم مسلمين زينا، بقى انتوا مسلمين زينا؟ ده انتوا اللي بوظتوا الاسلام، والملالي بيدعوا انهم ايرانيين وشيعة، بس هم عرب وسنة كمان

(ده على اساس ان العرب والسنة دول شتيمة)

هو ده البديل اللي جاي

اشربوا بقى ياللي مش عاجبكوا الملالي، طب والله ح يتكيفوا ويتمزجوا، احنا اصلنا بنعمل دماغ تهزيء واللي يحترمنا يبقى كأنه سب لنا الدين

انا بس كل اللي مزعلني ان الدولة الوحيدة اللي لها سيادة في المنطقة جاية لنا في السكة، اهلا وسهلا

join the club