Monday 10 January 2011

بعد خطاب بن علي.... ذنب الدول العربية في رقبتك يا مصر

البلد دي حالها لازم ينصلح والا حنودي اللي حوالينا في داهية حرام، طب احنا رحناها وانبسطنا فيها، الناس ذنبها ايه؟ بن علي طالع للتونسيين يقولهم جهات اجنبية هي اللي ورا الاحتجاجات عشان غيرانين من تونس بسبب تقدمها في كل المجالات
حرام كده.. ده كان ناقص يقولهم حنقبض على راس الافعى، وبالنسبة للي ماتوا في المظاهرات.. خليهم يتسلوا
وقالهم احنا بنشكر العقيد معمر القذافي عشان وفر لكم فرص عمل، يالا بقى اتكلوا على الله وروحوا له قبل فوات الاوان احسن يرجع في كلامه الراجل لاني انا مش فاضي لكم حيث ان عندي مستثمرين اجانب وسياح!!
وبعدين قالهم كلام الحزب الوطني: انا حاوفر لكم 300 الف فرصة عمل على 2012، حرام ده ولا حلال؟ ينفع نشيل ذنب اللي حوالينا كده ونطرطش على الناس؟ ماحدش يقول لي مش احنا.. انا شامة ريحة الكلام، حاساه بقلب الام.. الكلام ده صنع في مصر 
بكرة وثائق ويكيليكس تثبت لكم ان مبارك بيتصل بالزملاء الحكام العرب وينصحهم يقولوا ايه عشان خايف عليهم، بدليل ان بوتفليقة ما اتكلمش لحد دلوقت، طبعا زعلانين من ايام الماتش، وزمانه عمال يدي له ميسدات ومبارك ولا سائل، واكيد بيبعت له دلوقت في رسائل فيها قلب واي لاف يو عشان يصالحه طبعا بعد ما شاف الابداع اللي قاله بن علي النهاردة
ماحدش يقول لي ان الابداعات دي من ابتكار بن علي
انا اسفة قوي
اساسا الابداعات دي عمر ما حد ابتكرها قبل كده.. ما تخليش الكراهية تعمي قلوبكم، اعترفوا بالحقيقة: ابداعات مبارك غير مسبوقة ولا ملحوقة، دي ثورة في عالم الديكتاتوريات... حد عنده راس الافعى زينا؟ 
جاله منين بن علي فكرة ان احتجاجات الجوعى دي جهات اجنبية؟ عمرها ما كانت تيجي على باله ابدا، وبكرة وزير الداخلية التونسي يقول ان فيه 15 اجنبي دخلوا تونس قبل الاحتجاجات، وان العشرين تونسي اللي ماتوا في المظاهرات دول مافيش اي شبهة جنائية في وفاتهم ده مجرد هبوط حاد في الرصاص اللي دخل راسهم
وعلى فكرة مش بكرة.. النهاردة، النهاردة قالوا على واحد واخد طلقة في راسه انه مات من الخضة لما الامن ضرب طلقة في الهوا عشان يفرق المتظاهرين
هااااا؟ هااااا؟ الكلام ده انتوا سمعتوه فين قبل كده؟ ما تحاولوش تنكروا ريادة مصر، الامن الجزائري كان بيحدف المتظاهرين بالطوب... فاكرين؟ مين اول ناس عملوا كده؟ هاااااا؟ هاااااا؟ مصر الريادة ولا مش الريادة؟ الريادة ولا مش الريادة ردوا.. ردوا يا جاحدين يا ناكرين الجميل
شفت بقى يا بوتفليقة؟ شفت؟ من قدم الماتش لقى نصيحة مبارك قدامه... لو كنت ما صغرتش مخك على الماتش كان زمانك طالع بخطاب يضرب خطاب بن علي، لان مهما كان مافيش في غلاوة الجزائر عندنا.. بس انت اللي قليل العقل، زمانه بيضرب راسه في الحيط دلوقت ويقول: انا اللي جبت ده كله لنفسي
عموما خلاص يا حوس.. اخوك الصغير وغلط فيك، ومهما كان انت ما ترضاش ان ديكتاتور زميل يتئذي، ده انت ياراجل في وثائق ويكيليكس قعدت تعيط لسكوبي وتقولها: انتوا السبب.. وقعتوا كل الانظمة، من ايام الشاه؟ فاكرين الشاه؟ ولا يوم من ايامك يا شاه، سمع كلامكم في الاصلاحات الديمقراطية من هنا، ويا قلبي راح واقع من هنا، حتى صدام، صحيح كان بيني وبينه خلافات، لكن انا وامريكا على الزميل الديكتاتور، وانا والديكتاتور على الشعوب، مهما كان، الراجل كان زميل، ده حتى برويز مشرف يا قلبي سمع كلامكم قصمتوا وسطه.. ابعدوا عني بقى، اخفوا من وشي الساعة دي
فطبعا انت بالنوسبة لك، مهما كان الخلافات بينك وبين بوتفليقة، مش معقولة تسيبه للشعب ابن الكلب ينتصر عليه، لازم توكسهم زي ما وكستنا
ترقبوا خطاب بوتفليقة .... حيكلمكم عن النجاح اللي لا شيء ينجح اكثر منه والاصابع الخارجية التي تعبث في الشئون الداخلية.. ومش بعيد يطلع الموساد هو اللي ورا الاحتجاجات دي
معلم يا ريس... معلم ورائد... 
لو سألتك انت مصري تقول لي ايييييه؟ تقول لي مصري ابن مصري وكل مصري يا عيني عليه.. ارفع راسك يا اخي، خلي مبارك يعرف يطيرها لك بقى انتوا حتقرفونا ليه؟

14 comments:

Ramy said...

هى بقت كدة خلاص

طيب

ماجد العياطي said...

دي تلاكيك

انتم عارفين ان كل حاجه بيلزقوها

Unknown said...

هههههههههههههه
نفسى اعرف انتى بتعترى على الكليبات دى فين ؟!!!!!!!!!!!!!؟؟

Ahmed Mohamed said...

ههههه
بوتفليقه لما يطلع
هيقول نحن نمر بنجني وفي رواية اخري منعطف
تاريخي علي حسب الاس ام اس الي مبعوته له
وغالبا هيتكلم عن ام عنق الزجاجه الي مش عارفين نطلع منها

سامح said...

الخطاب الناري الجديد
سنضرب بيد من حديد كل من يتلاعب بمقدرات الوطن وسلامة اراضيه
ونقول لهم احذروا غضب ابو الغضب
سباقة يامصر

ضحكتيني وانا مليش نفس

Anonymous said...

بس ابن الإيه زفت العابدين طالع في التلفزيون رغم إن الدنيا خربانة مسبسب شعره ولابس النضارة بتاعته المستفزة و بيهدد الشعب و يقولهم المؤسسات الدولية بتحلف بتونس وإيه حكاية العصابات الملثمة دي يعني جم منين من المريخ وكل شوية أيها المواطنون أيتها المواطنات, بس أحلى حاجة إنه كان كل شوية عمال يبلع ريقه و في نص الخطاب كنت حاسه هيبكي أو هيغمى عليه
بالمناسبة في الجزيرة بيقولوا إن الجيش نزل الشارع

الدرويش المرووش said...

إيه الكليب الفظييييييييييييع ده

الناس اللى فى البيت صحيوا على صوتى

الدرويش المرووش said...

أه نسيت

هههههههههههههههههههههه

Anonymous said...

الإعلام الغربي إللي صدعنا أيام المعارضة الخضراء بتاعة إيران و المعارضة البرتقالية بتاعة أوكرانيا و المعارضة إللي مش عارف إيه بتاعة مش عارف مين, ولا كأن في حاجة في تونس و لا كأن في خمستاشر ماتوا و لا كإن في طلبة اتسحلت في كلية الآداب و العلوم الإنسانية, و السياسيين الغربيين مفيش حد اتكلم اللهم إلا واحد في الخارجية الأمريكية قال إيه "التعبير عن قلق واشنطن" طبعا هم مش قلقانين على الشعب هم قلقانين على زفت العابدين خايفين الشعب يقلشه, وهم يلاقوا فين أحسن من كده, مش هم برضه إللي عمالين يلمعوه بقالهم سنين ويطلعوله تقارير إقتصادية زي الفل و البنك الدولي يشيد و مؤ سسة مش عارف إيه تقول إن الإقتصاد التونسي مية فل و أربعتاشر ترد عليها مؤسسة غربية تاني و تقول لااااه ده ميت فل و خمستاشر
آه يا عالم نصابين و حلنجية. 

karima said...

على فكرة يا استاذة نوارة الفيس بوك من البارحة لا احد في الجزائر يستطيع دخوله ...

Anonymous said...

حكاية إن مبارك بيتصل بالإخوة الزعماء ,أنا في رأيي من غير ميتصل ولا حاجة, كل فوهرر منهم بيغش من التاني , خدي بالك أصل دول معندهمش مخ يبدع أو يفكر يعني خدي عندك مثلا حكاية "رأس الأفعى" إللي قالها مبارك بعد حادث الإسكندرية تلاقيه سمعها في الجزيرة لما كانوا بيحكوا على وثائق ويكيليكس على لسان عبد الله فوهرر السعودية لما كان بيحرض الإخوة الأمريكيين على الأعداءالإيرانيين, طيب ياأخي خليك سبشيال وغير قول مثلا سنقطع رجل الوزة ديل القطة زلومة الفيل " حاجة وحشة "الكلب ودان الحمار مش لازم تغش من أخوك و حبيبك عبد الله
الله يخرب بيوتكم فضحتونا حتى الكلام فاشلين فيه

Unknown said...

نوارة شوفي المهزلة إلي في جريدة الأخبار ... القله المسلمة المندسة ، إل"فانتاستيك ٨" دمره جيش كامل ....

http://i52.tinypic.com/2ujlh1l.jpg

samia said...

صباح الخير

والله يا نوارة بوتفليقة ما فكرش حتى يلقي خطاب أصلا هو مش سامع صوت الشعب
فكرك الشباب خج يكسر باطل، النظام يفهم لغة التكسار والتخريب فقط لا غير
أما خطاب الكلام فهذاك للأمم اللي تقدر نفسها ماشي احنا أوباش على رأيكم

samia said...

صباح الخير

والله يا نوارة بوتفليقة مش سامع صوت الشعب حتى يمن عليه بخطاب فكرك الشباب خرج يكسر من عدم السلطة تفهم لغة العنف
أما الكلام فهذاك في الدول الديمقراطية اللي تعطي قيمة للكلمة في كل أبعادها، فكرك خطاب مبارك ولا بن علي صح موجه للشعب والله أخر اهتمامهم الشعوب انشا الله تموت، هما يقولك احنا في مسرحية ديمقراطية أحد فصولها الخطابات يمارسوا أوارهم بجدارة

نوارة خليك من حكاية المعارضة والله تموتي ناقصة عمر وإنتي ذكية بما فيه الكفاية لتعرفي أن التغيير مع شعوب جوعانة مستحيل

تحيات جزائرية