نداء المرة دي للمسلمين: وقبل ما تخرب.. احب اعمل لكم زي مبارك

آآآآآه.. انا مش قلت؟ أنا قلت وحذرت زي مبارك ما حذر الامريكان كده. انا مش قلت لكم خفوا عليهم؟ قلت لكم مش حيفضلوا يستحملوا كتير، خفوا عنهم، خفوا كل انسان له طاقة، بلاش الشتيمة في الميكروفونات، بلاش الهيجان على كل كنيسة تتبني ولا كل حمام يتصلح، وتطلعوا من صلاة الجمعة على الكنيسة وتحرقوهم وتكسروا لهم الدنيا، بلااااش بلاش يا ام بدوي، بلاش تفافة وقلة ادب وزفة في الشارع، بلاش تمشوا ورا الامن حيوديكوا في داهية، مش كل ما امين شرطة يقول لكم روحوا انصروا دينكم تطلعوا تبرطعوا زي المعزة على الناس تكسروا لهم الدنيا وتخربوا لهم اكل عيشهم من غير ما يعملوا لكم حاجة، بلاش تمشوا ورا ولاد الشيطان اللي عاملين نفسهم شيوخ وهاتك يا شتيمة وسب ولعن في خلق الله وهم قاعدين كافيين خيرهم شرهم، بلاش الهبل اللي بتعلموه على النسوان كل ما يتهيألكم ان واحدة اسلمت، بلاش الكلام الوسخ، بلاش التجريح في الناس، مش حيفضلوا ينضربوا ويسكتوا كتير، دول صعايدة ومخزنين من ايام الكشح، لايموها بقى، حتجيلهم لحظة ويفرقعوا

قلت انا ولا ما قلتش؟ قلت ولا ما قلتش؟ 

اهي البلد بتولع اهي واديهم نكتوا شعرهم علينا وعملوا لنا كتاكييييييت كتاكييييت 

وسبحان الله شوف انتقام ربنا.. ولعت بعملة غيركم، شفتوا؟ شفتوا ربنا بقى؟ سابكم تضربوا وتشتموا وتكسروا وتحرقوا وتعملوا ما بدا لكم، وراح مطققها في وشكم بعملة حد تاني خااااالص، شفتوا آخرة الافترا؟

اشربوا.. اشربوا حسبي الله ونعم الوكيل فيكم واحد واحد، مبسوطين؟ مبسوطين دلوقت؟ على الله تكونوا مبسوطين ونصرتم الاسلام 

ما اسمعش حس واحد فيكم بقى، اسكتوا بقى ولايموها خالص، ايوه انا عارفة انكم ساكتين 

ساكتين دلوقت؟ ساكتين دلوقت ومخضوضين؟ افضلوا ساكتين بقى، ماحدش فيكم يفتح بقه ولا يعمل اي رد فعل مهما حصل، والا في ثانية حتلاقوا قوات متعددة الجنسيات عندكم هنا.. آه امال ايه؟ امال ايه؟ امال فاكرينها سايبة؟ يعني انتوا فاكرين ان الامن يقدر على الاعداد دي؟ ولو قدر عليهم حيقدر عليهم ازاي؟ بالقتل؟ يعني هو حيقتلهم والدنيا حتسكت؟ الدنيا سكتت على الزهرات اللي عملتوها قبل كده، بس ده انفجار، حيعمل فيها البشير حيلاقي نفسه لابس ريش 

وهو ما يهموش، او ما بقاش مركز، احنا اللي حنلبس .. استهدوا كده بالله، وديروا خدكم الايسر، ياما اداروه وكان كل ما يفتحوا بقهم تقولوا النصارى صوتهم علي، اهم جالهم ماس كهربائي، اصبروا عليهم وطولوا بالكم، ولا ما تطولوهوش بقى وخليها تتخرب ونخلص .. عايزين كده؟

اهمدوا بقى، تروحوا تتضامنوا معاهم زي البتاع، ولو طردوكوا تسكتوا، تاخدوا بعضكم من سكات كده وتمشوا.. اجنوا ما زرعت ايديكم

اجنوا ما زرعت ايديكم

هريتوهم.. هريتوهم لما ما بقوش باقيين على حاجة 

على الله بقى حد فيكم يفتح بقه 

على الله

عايزين ايه؟ عايزين قوات احتلال هنا وتتقسم؟ انسوا انكم تعرفوا تعملوا لهم حاجة.. انسوا.. ماحدش عارف يهديهم، ولا البابا شنودة نفسه، ما هم معبيين تعبية سنين، واتفتح الدمل بقى، خلاص، حتوقفوا الصديد ازاي؟ لازم يتفضى خالص، ومبارك مفيص، والعادلي بيتغدا في القرية الفرعونية، وانتوا وشكوا في وش بعض، سيبوهم بقى يرفسوا لحد ما يخلصوا ترفيس خلينا نخلص من الليلة السودا دي، بس على الله تكونوا اتعلمتم وبطلتوا افترا

حسبي الله ونعم الوكيل فيكم 

حسبي الله ونعم الوكيل فيكم

حسبي الله ونعم الوكيل فيكم

خلي كاميليا ودقن كاميليا وحواجب كاميليا تنفعكم... ضيعتوا البلد عشان حرمة