Saturday, 1 January 2011

مظاهرة شبرا للتضامن مع ضحايا الاقباط









انا حرارتي بتتراوح ما بين تسعة وتلاتين ونص الى اربعين ولا اتتعتع من السرير ولا اتحدث في التليفون لان صوتي مش طالع
بس الحمد لله الشباب بينزلوا الفيديوهات اول باول من المظاهرة وبارك الله في التكنولوجيا
الوقفة عددها كويس وان شاء الله الحق اخف يارب واروح اي فاعلية لاني لو ما رحتش وما حسيتش اني عملت حاجة اخدم بيها بلدي في الظرف الحرج ده حاموت كمدا
انا مش عايزة الحاجة دي... مش عايزة اقصد الطائفية دي، خالص، لا بجد مش عايزاها يعني، اللي هو مش عايزاها، بتبقى حاجة مقرفة قوي، كل حاجة بتبقى مقرفة، كل حاجة، كل قضية بيبقى مستهدف فيها ضحايا من ديانة لاسباب طائفية معينة بتبقى تبعاتها قرف السنين، لانك بقى بتلبس فيها في كل طراش البني ادمين اللي في الكون، اللي كرهه لاصحاب الدين ده عاميه ونازع عنه الانسانية، واللي من اصحاب الدين ده بس هو اساسا طائفي وعنصري وحقير وما صدق عشان يبث كراهيته بينما هو في الاصل لو حصل نفس الحاجة للدين التاني مش بيتعاطف بل وبيتريق، واللي داخل يسترزق واللي داخل يظيط واللي كل اللي يهمه انه يقول مش انا يا بيه والله وعامل زي الفار المذعور واللي يقعد ينظر على ميتين ابونا وحاجة قرف يعني، مافيش اي انسانية خالص على فكرة... لما الموضوع بيبقى صراع طائفي هامش الانسانية بينحسر حتى في المتضامنين، نفسي افهم ليه؟ هو الدين شغلته يوحش البني ادمين ولا يحليهم؟ طب لو الدين بيوحش، طب قلة الدين شغلتها تحلي الناس ولا توحشهم؟ هو انت عشان يبقى عندك دين لازم تكره الاديان التانية وتحقرها وتستغل كل فرصة عشان تثبت وجهة نظرك اللي مش مبنية على اي اساس علمي غير انك ربنا يشفيك مريض بالكره والغل والحقد على الناس ومحتاج علاج نفسي اساسا؟ طب هو انت عشان تبقى ما عندكش دين لازم كل الناس ما يبقاش عندها دين زيك؟ طب ده دين في نفسه يعني. هو كل واحد مظبوط على محطة معينة مش عايز يغيرها ليه؟ ناس مظبوطة على محطة: شفتوا؟ احنا قلنا لكم اساسا الاسلام ده حاجة وسخة. وناس مظبوطة على محطة: الاسلام بريء من ذلك. وناس مظبوطة على محطة: شفتوا المسيحيين عشان تفجير مايعرفوش مين اللي عامله لسه نزلوا شتيمة في الاسلام ومحمد.. عشان تعرفوا ان جواهم غل. وناس مظبوطة على محطة: اساسا اساسا مش مفروض يبقى فيه دين. 
انتوا ايه؟ انتوووووواااااااااااا اييييييييييييييييييه؟ انتوا مش بني ادمين؟ ما بتحسوش؟ 
فيه بشر ماتت، فيه بشر اتشوهت بجروح خطيرة، فيه بشر جالها هلع وحتقعد كام سنة تخاف تعدي جنب عربية، فيه بشر اتروع، فيه بشر حتعيش بصدمة انها شافت اهلها متقطعة قدامها بقية عمرها، فيه بلد حتغور في داهية من وشكوا عشان ترتاحوا بقى... انتوا ما بتحسوش ليه؟ ما بتحسوش ليه؟ 
انا زعلانة قوي... زعلانة زعلانة زعلانة... من كل حاجة، واتنكست في العيا وحرارتي ارتفعت تاني وعايزة اغور من الدنيا كلها


خشوا بقى على التشانلز دي 
وهنا 

8 comments:

Ahmed Faissl said...

خديني معاكي :((((
أنا أول مرة أجرب السيكوفيزيكال بسبب تفاعلي مع حدث له علاقة بالشأن العام، وبعيد عنك السيكو بتاعي أصعب من بتاعك بمسافة
حاسس خلاص ان بلدنا ما بقتش صالحة للاستهلاك الآدمي، وكل استعمال ليها بيقصر في عمرنا احنا

lastcrazyboys said...

مش عـارف المشهد اللي كنت عليه ابارح الصبح ..كان يمكن وصفه بالمقزز ..ولا المفروض الناس اللي معايا دي تصعب عليا
!!!
تخيلي داخلين عليا المكتب وكل اللي مضايقهم إن الناس دي أصلاً مطلعلهمش صووووت إلا في عهد عوكل ..قبل كده السادات كان مسففهم الجزمة
وعبناصر ركبهم القطر اللي لسة ما وصلش
......أصلاً دول .....و
==
ولك أن تتصوري الحالة اللي كنت عليها وأنا أجاهد كمن يركب في سيارة بجوار شخص كريه الرائحة ويستحي أن يخبره ..وينتظر أي فرصة توقف لـ... يتقيــأ

lastcrazyboys said...

نســيت أهديكي الصــورة دي

صــورة تغني عن ألف مقـال

أم شـاب مسلم استشهد في الأحداث ..ومتشحتفة عليه يا ولداه
مالقيتش غير انها تترمي على صاحبه "المسيحي" عشان بيفكرها بحضن ابنها

بهيج الشرير said...

رجاءا من كل واحد مسلم أن يتكاتف مع أخوه المسيحي في اللحظات العصيبة دي، وربنا يلهمهم الصبر بعد المجزرة دي

utopia said...

تخيلى لسة وفى الظروف دى لسة
السلفيين بيقولوا نفس كلامهم هما ما عندهمش دم؟؟؟
نفسى اتف فى وشهم واحد واحد
بيتهيألى الاحسن يا نوارة لو ينفع المسلمين يتجمعوا حوالين الكنايس ساعة قداس العيد يمكن نرجع بعض الاحساس بالامان
لهم مادام الشرطة مش فاضية لهم نحمى بعض احنا...بجد بقت حاجة تقرف
الف سلامة عليكى

Alwad Algada3..الواد الجدع said...

Nawara :

I suggest instead of this protest on Jan. 7Th on the Nile Streets, at 4 O'clock,
Let us all the moslems stand outside all the churches during the Salat on Jan. 7th to protect them and send a message to the peoples whom want to harm our brothers that they have to go through us the moslems.
if you this really happend , it will be more strong protest and stand for each others

Alwad Algada3..الواد الجدع said...

Nawara :

I suggest instead of this protest on Jan. 7Th on the Nile Streets, at 4 O'clock,
Let us all the moslems stand outside all the churches during the Salat on Jan. 7th to protect them and send a message to the peoples whom want to harm our brothers that they have to go through us the moslems.
if you this really happend , it will be more strong protest and stand for each others

fatima berri said...

ألف سلامة عليكي يا نوارة..وانشالله مجرد هبة رياح وتعبر..لو كنت عارفة أن هذا سيحصل بعد مغادرتي مصر كنت بقيت لفترة أطول..تحياتي وسلاماتي..؟