Friday, 7 January 2011

يا حبيب قلبي يابني... اللي قتل سيد بلال هو اللي فجر الكنيسة


تحديث:
والعملية مش انتحارية زي ما انا قلت قبل كده... انا فعلا من هنا ورايح حاعمل لكم زي حسني مبارك وحاذلكم بموضوع: انا قلت وحذرت، عشان كل ما اقول حاجة واحذر منها تحصل... بجد كده يعني استغفر الله العظيم من كل ذنب عظيم يعني
حاجة تخنق
-----
صورة سيد بلال، العريس، اللي مالوش ذنب غير انه بلحية، صورته في المشرحة، شكله نايم زي الملاك
وده الفيديو من عند الدستور اللي بيصور الاصابات اللي الحقها به ضباط الامن
صباح الخرا عليك يا بلد
مافيش فايدة ابدا، هو احنا نلم البنطلون الجاكيتة تضرب؟
هو رئيس الجمهورية بذاته مش قال جهات اجنبية؟ طلع كداب؟ رئيس الجمهورية كداب؟
مش وزارة الداخلية قالت ان فيه 15 اجنبي عدوا من الحدود وما رضيتش تقول جنسياتهم؟ سيد بلال اجنبي؟
مش وزارة الداخلية قالت انتحاري؟ سيد بلال انتحاري؟ كانوا بيحققوا معاه في ايه؟ بيسألوه انت فجرت نفسك ولا لا؟
اول امبارح قلت لهم على التويتر خفوا على المسلمين شوية انتوا بتتغابوا عليهم قوي، خلاص، الفاجعة كبيرة، واول ما حصلت عرفناهم هم بالغوا في ايه، وهم كلهم واخدين مواقف كويسة، شجعوهم ما تقعدوش تقطعوا فيهم لحد ما واحدة تقول لي: انا حاسة اني في اجواء حداشر سبتمبر، المتسبب الحقيقي هو مبارك، اجي اقول المتسبب الحقيقي هو مبارك يطلعوا في مصاريني ويقولوا لي انت بتهربي المسلمين من مسئولياتهم، مع ان كل المسلمين اخدوا مواقف كويسة، حتى السلفيين، ولما اتلاموا على الحاجات اللي نسيوا نفسهم فيها الناس ما قاوحتش حرام، وسكتوا، وابدوا تفهم شديد لحالة الهيستيريا اللي اصابت الجانب المسيحي، والجانب المسيحي كمان ابدى امتنان شديد لحالة التفهم دي وعبروا عن امتنانهم ده باستقبال حافل وحار وعاطفي جدا للمسلمين خصوصا اصحاب المظهر المتدين من المنقبات والملتحين، مما يؤكد ان العدو الحقيقي، والمتسبب الحقيقي في الحادث سواء بشكل مباشر او غير مباشر، والمتسبب الحقيقي في الطائفية هو مبارك ونظام مبارك، ما تعمقوش الجرح بين المسلمين والمسيحيين دول شعب واحد بجد مش هزار، ومخهم على قدهم زي بعض، وعاطفيين زي بعض، ودمعتهم بتفر بسرعة زي بعض، ودول ابدا، كأنهم بيدافعوا عن مبارك: لا المسلمين هم المسئولين، المسلمين هم المجرم الاثيم والقاتل اللئيم، انبسطوا، دم الواد ده في رقبتكم، لسه امبارح قلت لعمو احمد خليل خفوا على المسلمين شوية وكلامي ما عجبش احد المعلقين اللي قال "المتأسلمين" لازم يصفعوا على وجههم
على الله يكون الاخ بتاع "المتأسلمين" مبسوط دلوقت
هو انتوا مافيكوش فايدة ليه؟ هو انتوا ليه لازم تيجوا على طرف عشان دين ام طرف تاني؟ بقالي يومين عمالة اقول خفوا شوية زودوتها الناس ما عملتش حاجة، لا المسلمين قصروا في الموقف ده مع المسيحيين، ولا المسيحيين زعلانين من المسلمين بالعكس دول ممتنين
يخرب بيت دي بلد
يخرب بيت دي بلد
يخرب بيت دي بلد مافيش فيها يوم عدل بيعدي
عدل بكسر العين وفتحها
اتفو
هو يا اما التهمة مسيحي وعابد صليب
يا اما التهمة مسلم مفجراتي بالفطرة


الداخلية نبيهة زي ما احنا عارفين، يعني بكرة مثلا حتقبض على المدونين والمثقفين وتقول انهم هم السبب في قتل سيد بلال وتعذبهم لحد ما يموتوا، وبعدين واحد يقول لي عاجبك كده؟ لمتي المثقفين والمدونين اهم ماتوا، يقوم الامن يقبض عليا انا ويعذبني لحد ما اموت
ماهو اصل الامن ده مكنة عصر كده مش بتفكر
ما انا راخرة ايه اللي باقوله ده؟
اه والله ايه اللي باقوله ده؟ انا فعلا برمجت نفسي على ان الامن ده مش بني ادمين وانما مكنة ملمسة اي حد يميلها على جنب زيادة عن جنب تعمل ماس، وكل كلامي اللي فات بيؤكد كده، هو احنا مش حنعرف نتكلم يا داخلية خالص ولا ناخد وندي في الكلام؟ افرض يا اخي واحد قال النصارى عباد الصليب ينعل ابو اشكالهم، مش مفروض ان الداخلية دي تحميهم وتكفل للي بيشتم النصارى حرية التعبير؟ افرض بعد ما حصل التفجير كام مثقف من اللي اصلا مسلمين بس هم بجد مش مسلمين ولا كام واحد اسلاموفوبيك ما صدق عايز يثبت نظريته قالوا المشكلة في الاسلام عشان اساسا المسلمين ولاد كلب، تقوموا تقتلوا واحد سلفي؟ هو انتوا قطر من غير فرامل؟ واي حد يقول اي كلمة تمشوا وراه؟ هو انتوا مش لكوا شغل وتحقيقات تعملوها؟ انتوا قاعدين تسمعونا بنقول ايه وتمشوا ورا كلامنا؟ يا اخي احنا بنخرف، بنتكلم بالظن، بالتحليل، بالاغراض، بالاهواء، كلامنا مش مبني على اسس علمية، مش مفروض في دين ام معمل جنائي وتحريات وتحقيقات وشغل تعملوه مبني على اسس علمية انتوا مالكوا احنا كلنا بنقول ايه؟ مالكم ومال كلام السلفيين واقباط المهجر والمثقفين واي كائن في الكون؟ ما بتشتغلوش ليه؟ ما تشتغلوا.. مش كفاية ناشرين صورة الواد ومشغلينا مرشدين عندكم والناس قاعدة تفلي في الصور وتنشر على الفيس بوك لما جابوا المصايب لتلتميت بني ادم يا قلبي؟

احنا ما نعرفش حاجة.. ما نعرفش
السلفي اللي قال النصارى عباد الصليب ما قالش فجروا الكنيسة وما كانش يقصد حد يفجر الكنيسة
اللي قال ان السلفيين كرسوا للخطاب الطائفي ما قالش ان السلفيين هم اللي نفذوا العملية وما يقصدش يتهم السلفيين بتنفيذ العملية
انا دلوقت لما باقول انهم تقلوا ايدهم على المسلمين مش قصدي انهم قتلوا بلال لتروحوا تقبضوا عليهم ما انتوا اغبيا بقى

خلاص بقى يا شعب.. ماحدش يتكلم، احنا مش ضامنين ردود افعال المكنة الملمسة دول وما بيتفاهموش ولا بيفهموا كمان

بس انا شايفة ان مدام المكنة بقت ملمسة بالغباوة دي، يبقى مش حينفع فيها تصليح، ولا حتى تصليح التوكيل لان اساسا الضمان بتاعها خلص من تلاتين سنة
باقول نرموها - ولا حتى تدوها لبتاع الروبابيكية لان حرام ممكن تكهرب الراجل - ونجيبو مكنة جديدة ولو بالقسط ونبطلو نتانة
ما احنا عمالين نصرفو كل فلوسنا على تصليحها لما عملت لنا قفلة في كهربة البيت كله

58 comments:

Ramy said...

خلاااااص الواحد

تعب م البلد صراحة

كل ما الواحد يقول خلاص

يفتحوا جروح جديدة

طب و عاوز اهل القتيل يحبوا البلد

و لا جيرانهم المسيحين

اللى بقى اتحط فى دماغهم انه اتقتل بسببهم

خلاااص الواحد مبقاش مستحمل الصراحة

ابو قردان said...

فعلا الدوس على رجلهم جاب نتيجة عكسية
طالعي المقال ده

http://www.almesryoon.com/news.aspx?id=47125

Mohamed said...

اللهم يخرب بيتنا إحنا و يخلي الزعماء ، عشان يصحو الصبح مايلاؤش حد يحكموه ، و يجيبو عقد عمل بقى و يروحو السعوديه ، اللهم خدنا إحنا و خليهم ، اللهم خد مننا و ايديهم...

lastcrazyboys said...

اللي هيتصـاب بشلل تفكير لو قرا كلامك ده ..هم السلفيين أنفسهم ..لأن عندنا العداء ده بيتاخد كله على بعضه كده ..قوالب يعني .. مينفعش تهاجمي السلفيين امبارح ..والنهاردة تتعاطفي مع اغتيال أحدهم

وأنا شايف إن أهم مافي في الموضوع إن رد فعلك هيوضح لهم ..المبدأ اللي اتنبح صوووتي عشان يفهموا منه جزء صغير "إن أنا مش ضدك كسلفي..ومفيش حاجة اسمها لو مش معايا تبقى ضدي ..انا ضد افكارك الغبية فقط المتعلقة بالمسميات والاستفزاز وعباد الصليبوالرافضة والزنادقة والحاجات دي" إنما مبدأ بوش اللي هم ذات نفسهم ماشيين بيه
هو اللي جايبهم ورا

أما بالنوسبة للتذكير فاسمحي لي أنا أذكر حضرتك كلام ورد في بوست قدييييم حبتين ..حاجة كده قريبة من إن الأمن وصـل لمرحلة إنه بيلوّش برقبة القزازة ومش شايف قدامه من كتر السكر والعربدة

Ahmed Faissl said...

ممممم، كده ممكن تتحل، احنا نعمل زي هيكل توقعات، من اللي هو بتاع المربعات والخطوط والأسهم ده ولو حصل كذا ممكن يحصل كيت ولو ما حصلش كذا ممكن يحصل كيت تاني ولو حصل كيت التاني ده يبقى فيه احتمالين وهكذا
يعني لما نبقى عارفين إن الداخلية بتحدف شمال لما نديها يمين يبقى نديها شمال من الأول لو عايزينها تروح يمين
يعني لو عايزينها تمسك أجانب نقول ان الجناة مصريين وكده

fleur de Rif said...

الطبخة كبيرة.. بدأت من تفجير كنيسة في العراق و منح فرنسا للجوء السياسي بسرررعة لعائلات المسيحيين العراقيين 150 واحد.. والاعلام الاوروبي نازل تقارير ومواضيع كلها عن اضطهاد المسيحيين في الدول الاسلامية .. ودا كلو قبل تفجير كنيسة الاسكندرية

مع ان المساجد دائما بتدمر ففلسطين والعراق وماحد دافع عن حريتهم الدينة واحترام المقدسات

وفي المغرب انطردو مبشرين مسيحيين وتم الرد بسرعة واتحطينا في مقدمة الدول المضطهدة للمسيحية


زمن صداع

جبهة التهييس الشعبية said...

انا عايزة انوه عن كام حاجة كده عشان تبقى الامور واضحة وما نناهدش في بعض كتير

موقع المصريون موقع امنجي بياخد تعليماته من الداخلية

كل اتجاه في مصر، فيه بعض العناصر اللي بتنسق مع الامن ده مش معناه ان الاتجاه كله عميل، لكن فيه اتجاهات رؤوسها كلها يا اما يبقوا امنجية يا اما يتحبسوا

وفيه اتجاهات اخرى الامنجية اللي فيها بيبقى ده باختيارهم

بالمختصر كده عشان ما نقعدش نناطح في بعض كتير

منظر الناس في الكنائس امبارح مسلمين ومسيحيين بيقول حاجة واحدة: عدونا واحد

وهو مبارك ونظامه

ما تقعدوش بقى تشدوا في شعر بعض

عشان مالكوش غير بعض

utopia said...

حسبى الله ونعم الوكيل فى الغباء والفجر بالضمة"
"المشكلة ان الراس الكبيرة عارف ومتأكد
ان اللى عملها الكائن النتن اللى كان معاه فى شرم الشيخ بس ما ينفعش طبعا يتهمهم بالاسم ومادام القاعدة خرجت نفسها يبقى يشيلها واحد من المصريين علشان يقفلوا القضية
لازم كانوا عايزينه يعترف بعلاقته بالتفجير
والله يرحمه مارضيش
منهم لله ...لأمتى بس ياربى

محمود المصرى said...

بسم الله الرحمن الرحيم

معلش عندى سؤال واحد :
انتى زعلانة ليه ؟ مش كنتى عاوزة السلفيين يختفوا ويحسسوكى انهم مش موجودين؟ هانت اهيه الامن واخدهم واحد واحد , وعلى فكرة مش سيد لوحده فى خمستاشر واحد معتقلين لسة , بس طبعا مش هاتتعاطفى معاهم الا وهما فى المشرحة .
يالا خلى اليساريين ورفعت السعيد يفرحوا

جبهة التهييس الشعبية said...

لا بالنسبة للاستاذ محمود المصري

اوعدك ان انت بالذات مش حاتعاطف معاك

مش انت بتاع انفلاش؟

lastcrazyboys said...

كورال في حـب مصـر

أخيييييييراً وجدتها
"لقطــة اليـــوم"-والسنة كلها في احتفالات الأمس ..مش الأغنية الحمضـانة بتـاعة فؤش وبواخة داليا البحيري
طب سامي العــدل ده يجيبوه في كليب ازاااي ..أنا موش فخمتو .!!!!

أسيبكم مع المتعــــة.. والوطـــن

جبهة التهييس الشعبية said...

القصد من الحادث:

ادي احنا قتلنا لكم سلفي يا مسيحيين، اسكتوا بقى

ادي اصلا المسيحيين اتقتلوا والسلفي اتقتل بيهم يا مسلمين اسكتوا بقى

كله بيتك بيتك، خالتي وخالتك واتفرقوا الخالات

لانهم اصلا مش حيجيبوا القاتل الحقيقي

وابقوا تفوا في وشي لو جابوا القاتل الحقيقي سواء في الكنيسة او اللي قتل سيد بلال

هو مش الريس قال جهات اجنبية؟

سيد بلال جهات اجنبية؟

مش العادلي قال خمستاشر اجنبي؟

كان قصده اجنبي يعني من خارج القاهرة يعني؟

هم عايزين يسكتوا الاقباط والمسلمين

بيطقشوهم في بعض وكل واحد يتجرح جرح خلاص خالصين

اسكتوا

محمود المصرى said...

انا مش منتظر تعاطفك ماتشغليش بالك كتير .
بس عاوزك تعرفى ان دم سيد فى رقبة اللى زيك اللى قاعدين يحرضوا الامن على السلفيين , دلوقت جاية تقولى انتى قلتى فى مدونة احمد خليل ماعرفش ايه وجايبة اللينك ؟ههههههه طيب ماترجعى للموضوعات اللى كاتباها فى مدونتك والسب واللعن اللى مغرقها , وعاوز اقولك حاجة , سيد كان فى القائد ابراهيم , فاكرة كنتى قلتى ايه للى كانوا فى القائد ابراهيم؟ مش هاتحتاجى تدورى فى مدونات تانية دورى فى مدونتك , وشوفى قلتى ايه على ابنك حبيب قلبك .
شكرا على تعاطفك بس مش محتاجين تعاطف والله , محتاجين تكفوا السنتكم بس ممكن؟

احمد خليل said...

نداء المرة دي للمسلمين: وقبل ما تخرب.. احب اعمل لكم زي مبارك

آآآآآه.. انا مش قلت؟ أنا قلت وحذرت زي مبارك ما حذر الامريكان كده. انا مش قلت لكم خفوا عليهم؟ قلت لكم مش حيفضلوا يستحملوا كتير، خفوا عنهم، خفوا كل انسان له طاقة، بلاش الشتيمة في الميكروفونات، بلاش الهيجان على كل كنيسة تتبني ولا كل حمام يتصلح، وتطلعوا من صلاة الجمعة على الكنيسة وتحرقوهم وتكسروا لهم الدنيا، بلااااش بلاش يا ام بدوي، بلاش تفافة وقلة ادب وزفة في الشارع، بلاش تمشوا ورا الامن حيوديكوا في داهية، مش كل ما امين شرطة يقول لكم روحوا انصروا دينكم تطلعوا تبرطعوا زي المعزة على الناس تكسروا لهم الدنيا وتخربوا لهم اكل عيشهم من غير ما يعملوا لكم حاجة، بلاش تمشوا ورا ولاد الشيطان اللي عاملين نفسهم شيوخ وهاتك يا شتيمة وسب ولعن في خلق الله وهم قاعدين كافيين خيرهم شرهم، بلاش الهبل اللي بتعلموه على النسوان كل ما يتهيألكم ان واحدة اسلمت، بلاش الكلام الوسخ، بلاش التجريح في الناس، مش حيفضلوا ينضربوا ويسكتوا كتير، دول صعايدة ومخزنين من ايام الكشح، لايموها بقى، حتجيلهم لحظة ويفرقعوا.......

دة كلامك يا ست الكل يوم 1.4.
انا كتبت جيل الكراهية يوم 1.6 كل اللى عملتة انى نقلت جزء من مقدمة كتاب لابراهيم عيسى ... واغلبية اللى الموجودين على التويتر حاطين صورتة!! مش بركة حاطين صورتة لانهم مقتنعين بكلامة يوم 4 تدورى الضرب على المتطرفين بالكرباج ويوم 6 تقوللى خف على المسلمين وانا كل اللى عملتة نقلت كلام ابراهيم عيسى اللى كتبة من 17 سنة
وتقوللى خف على المسلمين
ياست الكل اللى حصل امس من تلاحم فى الكنائس يرجع جزء كبير منه لمقاتك يوم 1.4
الشهيد سيد بلال والشهيد خالد سعيد وغيرهم الكثير ضحايا التعذيب وهذة قصة اخرى

كم حزنت امس حين حرمت من الاحتفال بالعيد مع اخوانا المسيحيين وانت صاحبة الفضل فى المبادرة لهذا الحشد

جبهة التهييس الشعبية said...

محمود المصري

طب انت متساب ليه؟ هو انت من قيادات السلفية؟ :)

اصل اللي انت ما تعرفوش بقى، او تعرفه وعامل عبيط

ان السلفية يا اما يشتغلوا مع الامن يا اما يتحبسوا زي الشيخ محمد كده

صح؟

ده القيادات طبعا

والقيادات عمرهم ما حيتمسكوا

يعني حسان ويعقوب والحويني ودلاديلهم اللي منسقين مع الامن عمرهم ما حيتمسكوا

حيتمسك بس الغلابة اللي بينضحك عليهم بالكلام ده، ويتشبحوا لحد ما يموتوا


عمو احمد خليل


لا انا مش معترضة على البوست خالص بتاعك يا عمو

انا كنت باتكلم على الاخ بتاع المتأسلمين ده فكرني برفعت السعيد هههههه

لكن البوست بتاعك انا موافقة عليه، لكن كان قصدي اننا نقلل اللوم مدام ابتدوا يراجعوا مواقفهم مش اني معترضة على فحوى كلامك، فحوى كلامك موافقة عليه كله وابصم عليه بالعشرة، بس اللي قصدته انهم هم نفسهم ابتدوا يحسوا بالكلام ده فنحاول نشجعهم على انهم ابتدوا ياخدوا مواقف ايجابية

لكن بصراحة الراجل اللي علق بتاع متأسلمين ده عجيب قوي يا عمو، انت جبته منين؟

جبهة التهييس الشعبية said...

ايها حضرة الظابط

انت سايب محمود المصري ليه؟

انا مش متعاطفة معاه ده، له ضحايا كتير، ولا بيشتغل معاكم؟ طب وماله؟ هو انتوا لكم امان؟ عادي جدا ممكن واحد يشتغل معاكم وتخلصوا عليه ما انتوا عالم واطية

محمود المصرى said...

واللى انتى مش قادرة تفهميه انه السلفى مش هو بس اللى يطلق لحيته ويلبس جلبية قصيرة , دا سلفى بالمفهوم الامنى , لكن السلفى بالمعنى العقيدى هو اللى بياخد افكاره من منهج السلف , وبالتالى حسب منطقك ومنطق الامن انا مش سلفى وصلت؟

جبهة التهييس الشعبية said...

لا السلفي هو اللي بيقول انفلاش النصارى ويبث خطاب كراهية؟ هو ده السلفي؟

انت بتاع انفلاش ولا مش انت؟ مبسوط دلوقت لما كنيسة اتفجرت وتلاتة وعشرين بريء ماتوا وزاد عليهم بريء كمان مات من التعذيب؟ مبسوط كده يا بتاع كاميليا وانفلاش؟ وطبعا ماحدش حيهوب ناحيتك.. عشان هم مش ناويين يعملوا للمجرمين الحقيقيين حاجة

هم قاطعين ابونيه مع قتل المساكين

والله اعلم مين اللي طالقك كمان يا بتاع انفلاش انت

انت بقى محتاج تقرا بوست احمد خليل وتفكر فيه كويس عشان تعرف الجريمة اللي امثالك عملوها في الناس، والناس فعلا بريئة وابتدوا يراجعوا نفسهم ويعرفوا اشكالكم على حقيقتهم

حد حيدوس لمحمد حسان على طرف؟ حد حييجي ناحية حسين يعقوب؟ حد حيكلم الحويني؟ ابدا

عشان امنجية وكانوا بيعملوا المطلوب منهم

الغلبان اللي مربي دقنه بس هو اللي يتقتل عشان يلبسوا الناس في بعضها

وانت تستمر تخري خراك

lastcrazyboys said...

وأنا الذي نشأت وترعرعت على مفهوم مختلف خااالص وتعريف مخالف للسلف عن اللي بيقوله أبو حنفي

لا كده يبقى خالتي الله يرحمها ويبشبش الطوبة اللي تحت راسها كانت بتضحك عليا العمر ده كله لما فهمتني إن
"الســلف تـلف ..والـرد خســارة"

وعشان كده مهما يقولوا لا افضل الرد

جبهة التهييس الشعبية said...

لاست كريزي بوي

ههههههههههههههههههههههههههههههههه

هو انت اسكندراني ولا ايه؟

تصدق انت تنبأت بأن السلفيين هم اكتر ناس حيرتبكوا

ده انت مكشوف عنك الحجاب

ابو قردان said...

بصي بالنسبة للجماعة السلفيين رأيي إنهم مريحين الحكومة علشان بيشوشوا فكريا على الإخوان يعني ياخدوا الجماهير المتدينة منهم وكمان بيرضوا الضمير الديني للشعب بيتلاقي الواحد منهم مش مهتم بأي حاجة تحصل في البلد أهم حاجة عنده إنه يمشي على نهج السلف الصالح وخلاص و أكيد ربنا هيعدلها
أنا فاكر إن كان ليا صديق سلفي في الجامعة مكانش بيبطل هجوم على الإخوان و يوصفهم بإنهم منحرفين و بتوع سياسة و بعيدين عن منهج السلف وكان بينهي كلامه دايما بدعوة لله إنه ياخدهم
ربنا يشفي
بس طبعا مش معنى كده إننا نحرض الأمن عليهم و نشمت فيهم
الله يرحم هذا الشاب البرئ و أشوف إللي في بالي زيه

جبهة التهييس الشعبية said...

ابو قردان

بس الواد ده مش اكتر من واحد متدين وواضح ان مالوش اي نشاط يا قلبي

وعمرهم ما حياخدوا حد كان بيشتغل معاهم وله نشاط

هو محمود المصري ده له حق في حاجة

انهم مش بياخدوا السلفيين بمعنى اللي كانوا بيشتغلوا معاهم، هم بياخدوا واحد ملتحي وبجلابية ويقولوا عليه سلفي والواد يبقى اصلا في حاله اخره يربي دقنه ويصوم اتنين وخميس ويتجوز واحدة منقبة ويحضر الصلوات في الجامع وخلاص، ما بيعملش حاجة في حياته تانية

lastcrazyboys said...

هع هع هع
لا والله حتى علاقتي باسكندريـة لا تتعدى الكورنيش وعمري ماعرفت أروح مشوار مرتين من غير ما اتوه
:)
أما بالنوسبـة لموضوع التنبؤات .. فالحكاية مش عايزة "نوستراداموس" يعني ..كا ما هنالك اني تسمعي للخطاب السلفي فترة معينة بحكم الجيرة والصداقة القديمة وإنك مش عايزة تكسفيهم فتفضلي السكوت ..ويا سلااام بقى لو استبشروا خيراً وحاولوا يجندوكي ..بحكم إنك خوسارة في الفكر والتفكير لأن بوادر الالتزام تشع من وجهك ..ونور ربنا منبسط على اساريرك بس محتاج توجيه

وبذلك عليكي الاتجاه الى الطريق القويم والصراط المستقيم - من وجهة نظرهم - من التفكير إلى التكفير
تباديل وتوافيق يعني مش ازمـة

جبهة التهييس الشعبية said...

واحب انوه هنا عن الشيخ محمد خضر اللي لسه مرمي في السجن لأنه سلفي ومش عايز يشتغل مع الامن، وقال لهم سيبوني اهاجر من البلد قالوا له لا، مافيش سلفي يهاجر من البلد ولا يشتغل جوة البلد الا لما يشتغل معانا يا اما انت مش حتخرج تاني

وفعلا هو لسه في السجن

جبهة التهييس الشعبية said...

بحكم إنك خوسارة في الفكر والتفكير لأن بوادر الالتزام تشع من وجهك ..ونور ربنا منبسط على اساريرك بس محتاج توجيه
--------------

هههههههههههههههههههههههه

منك لله ههههههههههههههههههههههههههههههههههههههههههههههههههههههههههه

Hala said...

أكيد سيد بلال ما كانش الوحيد المقبوض عليه للاشتباه. الحقوهم قبل ما حد تانى يتقتل

lastcrazyboys said...

نعمل ايييه بس يا اختشي :)..جابولي شلل في اليفة العقل

وابن الـ......ده جاي يكمل عليــا
صفـوت الشريف : مصر مستهدفـة لأنها !!!!!

وأبــوك السقـا مات

hussein014 said...

استاذة نوارة
ده أول تعليق لي في المدونة مع اني من شهور مش بفوت بوست واحد
واكتر حاجة بتزعجني دايما هي الهجوم على السلفيين الرهيب في البوستات والتعليقات
يمكن لاني ساكن في مكان حوالي سلفيين كتير وفيه اقارب لي سلفيين بحس بتناقض كبير بين المدونة واللي شايفه وحاسه حوالي
وعموما انت ليك الحق في عرض وجهة نظرك وتأييدها والتدليل عليها بس التعميم اللي في كلامك كانه قطر واخد في وشه هو اللي مبالغ فيه شوية
ويمكن لاني قريب من اللي ممكن نسميهم قيادات سلفية لي الحق بس اني اقول ان التعاون بين السلفيين والامن مش بصورة المخبرين ممكن يكون فيه تسامح عند الامن بالنسبة ليهم وممكن يبقى السلفيين مش بيحبوا الصدام وبيتجنبوا المشاكل لاغراض هم شايفين انها دعوية وفيها مصلحة اكبر
وبالنسبة لموضوع الاعتقال والتعذيب الاسماء اللي انتي ذكرتيها خاصة الحويني ويعقوب ومشايخ اسكندرية اعتقلوا واتعذبوا كتير وفيه منهم اللي حصل فيه عاهات مستديمة بسبب التعذيب وحوالي فيه كتير متردد على المعتقلات يمكن اكتر من بيته هم بس اللي ما فيش ليهم صوت موحد يتكلم عنهم ويظهر ده

ultrasound said...

سالخير

رغم متابعتي المستمره لكل مايكتب هنا-من باب معرفة الجديد وليس من باب الاعجاب-بس الحقيقه مش بحب اشارك معاكو لاني احيانا كثيره لا اتفق اساسا علي الافكار المطروحه...بس احيانا بتكتبي بوستات رائعه وده احقاقا للحق.......المهم انتي بتنتقدي من يسمون انفسهم بالسلفيين طول الوقت عشان (خطاب الكراهيه بتاعهم) وبتنتقدي العوا عشان (رد علي بيشوي) ..وبتنتقدي مايسمي بالوهابيه عشان طريقه تدينهم مش ماشيه مع اليومين دول ومش ليبراليين .....وكمان انتقدتي عمرو خالد عشان مشروعه الاصلاحي متوائم مع رؤوس الاموال ولا يعبر عن مشاكل القطاع الاكبر من الجماهير.... معلش انا باقلب في دفاتر قديمه شويه بالنسبالك لان كلها تقريبا شئ واحد...وشئ واحد بيحركك ضد كل دووول.....انك تنويريه وهما كلهم ظلاميين!!!......انتي عندك قدرة تحليلة للاوضاع اكتر من ناس كتير تانيين!!!....وده خلاكي مش بس تنتقدي لا كمان تشرشحي وتردحي وتفرشي الملايه لاي حد منهم... مافيش حد في الدنيا فوق النقد الا الانبياء بس فين الادب وفين البديل وفين الاصلاح...يعني هو مش هجوم وخلاص

انا بقول كل الكلام دا ليه...عشان الفتنه اشد من القتل..والفتنه حضرتك تبدأ من كلمه او دعوة او اشاره او تلميح...وكثرة الكلام حوالين موضوع معين حتي لو في جانب من الحق بيحول الموضوع الي كارثه قوميه وبيحرك اي تطرف ...انا لا انفي ان فيه احتقان الفتره اللي فاتت ...لكن انا شخصيا اتهم برامج التوك شو والصحافه والمدونات والمنتديات - وده حقي-كل دول وانتي منهم اطراف في الفتنه...شغالين رغي رغي رغي في نفس ام الموضوع ليل ونهار ونهار وليل....طبيعي الاحتقان يزيد واللي مش محتقن يحتقن

بصي يانواره انا من متابعتي ليكي عارف انك مثقفه وجدعه وبتقولي اللي انتي حاساه...لكن في حاجات ماينفعش تتقال عالملاء......ليس كل مايعرف يقال...لان دا بداية الفتن بين الشعوب....اراء وتحليلات قائمه علي اشاعات او وجهات نظر الله اعلم جت منين.....لازم الاعلامي يكون عنده ضمير وطني ومايساعدش علي الفتنه..بالعكس يحاول يحلها وينصح ويصلح مش تكون شغلته نشر الفضايح وخلاص....مش محتاجه افكرك بحديث النبي صلي الله عليه وسلم انا زعيم ببيت في ربض الجنه لمن ترك الجدال ولو كان محقا...احنا مش شغلتنا كلام ونشر فضايح ..ولا حتي مظاهرات وهتافات واغاني...احنا دورنا اننا نصلح مش نهرتل...احلي كلمه قولتيها انتي لما قولتي ان مصر ملهاش غيرنا ..فاكره
اه عشان متفتكريش اني بدافع عن حد معين..احب اقولك اني شعبوي تنويري سنتمائي مهترئ مابعد حداثي زي حضرتك وضد كل انظمة الحكم اللي في الدنيا كلها
افتكرت الاستاذ خالد محمد خالد لما طلبوا منه يكتب مقالا عن الاخوان بعد اعتقالاتهم الواسعه ورغم انه كان من اشد المعارضين لهم الا ان موقفه كان في منتهي النبل عندمارفض اوامر عبد الناصر وقال (انا لا اجهز علي جريح)....يانواره التعليق دا مش للنشر دا همسه في اذنك من اخ ليكي ...وبالنسبه للاخوه المسيحيين...يعني انا متعاطف معاهم جدا وحاسس بيهم جدا مثل كل المصريين والمسلمين لكن ياريت كفايه كده.....كفايه كلام وكفايه ضغوط وتخبيط في كل اتجاه بجد.....الناس علي مختلف مشاربهم مش ناقصه والبلد مش ناقصه ...احنا كلنا عارفين ان الحكومه دايما وابدا جزء من المشكله ولن تكون جزء من الحل.....ومافيش عندها اي حلول لاي حاجه....خلينا عالاقل نتلم ونمسح دموع بعض ونطبطب علي بعض ....وكفايه تحريض وخطابات كراهيه متبادله......واحد بيحبك

عُقاب said...

يا استاذة نوارة وحياتك ركزي
في مراهقين بيتابعوكي

زيي كده

و مش ناقصة لخبطة
امبارح كان الجو جو شحن و هوبا و يلا بينا وهنعدي الازمة

و الحمد لله رحنا

متجيش تقلبيها دراما بالله عليكي
انا متعاطف جدا مع سيد بلال
زي خالد عيد بالظبط

بس شوية تفاؤل و حياة والدك و الست والدتك

هنعمل ايه اليومين الجايين
الدنيا ماشية ازاي

انتي شايفة المستقبل ازاي

هنخلص من ام اللي احنا فيه ده امتى و ازاي

عارف انك مش عرافة بس ريحيني ببقين حلوين كده
عشان ميجيليش اكتئاب حاد
لان بيجيلي رغبات انتحارية و ضلمة كده و دمي هيبقى في رقبتك
:(

ابو قردان said...

بالنسبة لتصريح صفوت الشريف بتاع "مصر مستهدفة لأنها متقدمة في كل المجالات" مفيش رد أبلغ من كلام مسيو آكف "طز في مصر و أبو مصر وإللي جابوا مصر"

أبو هاجر said...

ست الكل لم يصل تعليقي أم هي بداية المصادرة

arabi100 said...

هو صحيح مين اللي قال انه مسلم اللي فجر الكنيسة؟؟؟؟؟

محمود المصرى said...

تحسبا لان الرد السابق ماوصلش :

الامن ماكانش بيصطاد اى واحد بدقن ومتجوز منقبة , الامن بيلم اللى ليهم علاقة بوقفات القائد ابراهيم ومسجد النور وعمرو بن العاص , والمعتقلين مش بس سيد ومش بس فى اسكندرية , روحى شوفى مين اللى كان بيحرض عليهم من شهور , ومين اللى طول الاسبوع اللى فات حملهم المسئولية , شوفى مين اللى مارضييش يحمى الوقفات سياسيا ولا اعلاميا , ومين اللى كان عمال يحاصر فيهم ويحرض عليهم , وعلى فكرة مش انتى بس , كل الاعلام كان شغال على نغمة قوى التطرف والفكر الظلامى والسلفية والوهابية , لغاية مالامن قرر يلبسهالهم مادام الكل عاوزهم يلبسوها .
بما انك فاكرة انفلاش فأكيد فاكرة انى قلتلك ان المفروض دور القوى الليبرالية اللى زيك انها توفر الغطاء السياسى ليهم علشان تبقى مطالبهم وطنية مش طائفية , وهما خدوا الخطوة الاولى وكانت اول وقفة ليهم قدام دار القضاء العالى , لكن ولا واحد عبرهم , ولما راحوا المساجد الكل وانتى فيهم قعدوا يسلخوا فيهم , وجاية تقولى كمان واحد برىء؟
ليه لما المسيحيين نزلوا مظاهرات الاسبوع اللى فات نزل معاهم مسلمين؟ مش علشان يوفروا الغطاء الوطنى؟ مش علشان يمنعوا انزلاقهم طائفيا ؟ هل حد فيكم فكر يساند اللى نزلوا وقفات رمضان ؟
اما كلامك عن التفجير وخطاب الكراهية , انا كل كلامى كان فى سياق واحد , هو فصل الكنيسة عن عامة المسيحيين , لم اوجه اى خطاب كراهية للمسيحيين , كل تركيزى على دور الكنيسة ياريت تراجعى الكلام كويس قبل ما ترمى اتهامات, وبعدين انتى بتتكلمى زى مايكون اللى عملها فعلا كان متأثر بالمشاكل السابقة , انا من كام يوم دخلت مدونة الاستاذة صافيناز كاظن وسألتها عن رأيها جاوبت بجملة واحدة :

إنها ليست نتيجة فتنة، بل هي صناعة لفتنة.

بصراحة قول مقنع جدا شوفى مين بقى اللى عاوز يصنع فتنة , وماتقعديش تقولى خطاب كراهية وتحريض , لأن اللى عملها مش مدفوع ورا تحريض لكن بيسعى لتحريض .

ابو قردان said...

قال أحد المصريين الحكماء

لولم اكن مصرياً ...لارتحت نفسياً....وانتعشت مادياً...واصبحت عالمياً...ولكنى مصرياً...فتقهقرت حضارياً....قوتلت انسانياً...فسدت خلقياً..فشلت تعليمياً....اتهزقت بوليسياً...اتظلمت قضائياً....زورت انتخابياً..شحت اقتصادياً.......فاصبحت مواطن كروياً..هايف فكرياً..لا اهتم...... سياسياً... . وربنا يستر و ما اصبحش فى السجن مرمياً

hussein014 said...

كلام الترا سوند صحيح وقال اغلب اللي كنت عاوز اقوله
كتكملة لكلامي اللي فات احب اني الفت انتباهك لحاجة انتي عارفاها
ان الامن مهما بلغت درجت غباءه مش هتصل انه يعتقل او يعذب او يهين شخصية ليها شعبية كبيرة وعندها قوة في المطالبة بحقها
يعني مثلا الشرفاء المناضلين زي والدك وزي ابراهيم عيس ووائل الابراشي وغيرهم ايمته كانت اخر مرة اتعرضوا للاعتقال المستمر والمهين او التعذيب بعد ما وصلوا لشعبيتهم دي مع العلم انهم استحملوا كتيييييييييير قبل كده وحصل فيهم اكتر
وكمان قيادات الاخوان اللي النظام بيكرههم كره للعمى قدر يعذب او يعتقل حد منهم ولما حصل واتقل كام واحد ما طولش معاهم وعاملهم كويس الا عدد بسيط جدا
اظن ان حسان والحويني ويعقوب نفس الوضع تقريبا لان شعبيتهم اكتر من المعارضة ولاخوان سواء ده عجبنا او لا وكمان هم فعلا اتعذبوا كتير زمان قبل ما تكون ليهم الشعبية دي وده والله مش دفاع عنهم اكتر من انه اهتمام بكلامك لانه مدونتك في الفترة الاخيرة شعبيتها زادت خاصة من ساعة معركة الدستور ما بدأت وده حولها من مجرد مكان لعرض ارائك ووجهات نظرك لمكان ليها قراءه والمهتمين بيه اللي بيثقوا فيك وبيلتمسوا فيك الصدق ومن حقهم عليك انك تكوني موضوعية وتكون لهجتك مختلفة شوية زي ما انتي في موقع الدستور او زي ما كنتي في الجريدة قبل كده

hussein014 said...

نسيت اقول حاجة بما انك تعرفي السلفيين في اسكندرية يبقى اكيد تعرفي الدكتور محمد اسماعيل المقدم ولانك ذكية ومن الناس اللي بيحبوا المنطق يبقى خسارة فعلا مش تسمعي للراجل ده لانه ثروة فكرية حقيقية بغض النظر عن كونه سلفي لكن بجد حاولي تسمعي ليه حاجة من محاضراته المنتشرة واللي معروفة ولو تحبي ممكن احط رابط لبعض محاضراته المهمة في السياسة والمعاملات بس انا عارف انك مش بتحبي تنشري روابط فيها كلام لسلفيين عموما هم وحاضراته مشهورة ومنتشرة جدا وانا اظن انك عارفة او سمعته عنه لانه الاب الروحي الحقيقي للسلفيين في مصر ومع ذلك مش عاجبه كتير من اللي بيعملوه الشباب السلفي وطريقة تفكيره واسلوب خطابه
احب اكد تاني ان مدونتك قربت تكون مش مجرد مدونة انما زي صحيفة الكترونية ليها روادج ومتابعين كتير فياريت تاخدي بالك من كده يا استاذة نوارة

جبهة التهييس الشعبية said...

ابو هاجر

مافيش تعليقات لك انت بتمنع خالص

اكيد التعليق اللي ما نزلش لك يبقى ما وصلنيش

لو سمحت ابعته تاني

-----------------


اهو ده عيب التضامن مع واحد سلفي

خرا السلفيين حينطر على المدونة

aldarweesh.org said...

وده الواحد يتضامن معاه ازاي ده يا بيه..؟ :D

hussein014 said...

لو انا مقصود بتعليقك الاخير يبقى ربنا يسامحك
وانا مقدر فعلا انك يبقى عندك هيستريا من انك تلاقي كلام فيه منطق مختلف شوية عن تفكيرك خاصة في موضوع انتي مشحونة جدا فيه
وانا والله ما اعرف اكون سلفي اساسا او اوصل للشرف ده اصلا
انا بس مهتم لكلامك وما دامت دي طريقتك في التفاعل مع القراء اللي مختلفة عن اي صاحب مدونة يبقى خلاص ده من حقك تعملي اللي انت عاوزاه
هحاول ما اكتبش تاني تعليق يخالف ارائك ما دمتي بتحبي ديمقراطية الحكام بتوعنا ومتأثرة بيهم للدرجة
دي
باتمنى ليكي والله كل خير وربنا ما يحرمنا ابدا من متابعاتك وطريقة الرائعة في التحليل

hussein014 said...

علشان بس ما يكونش الهدف الاهم من تعليقاتي راح في وسط الكلام عن السلفيين اللي مش بيعجبك
1- انا مش سلفي ولا حاجة ولا ملتحي ولا لا متجوز منقبة ولا متجوز اصلا ولا بقف في مظاهرات ضد ولا بحرض ضدهم ولا اي حاجة من الجو ده بس عند اي عقل مش بحب حد يلعب فيه بكلام مرسل
2- الرسالة الاهم اللي حبيت اوصلهالك اني بقتنع جدا بتحليلاتك وارائك وبقول لكتير من اصحابي على مدونتك علشان يزورها وبينبهروا فعلا لكن مجرد ما يشوفوا شوية من ردك على بعض التعليقاات او اسلوبك احيانا بيبقوا مش مصدقين ان دي نوارة اللي في الدستور واللي ما صدقوا ليها ليها مكان بتكتب فيه علشان يتابعوها بشكل اكبر

حبيت بس انقل لك وجهة نظرهم لكن بالنسبة لي اتعودت على كده

hussein014 said...

على فكرة اللي اسمه محمود المصري انا نفسي اقبل ليه تعليق واحد
مش عارف ليه حاسس كده ان كل متعقد من نفسه خلقة اساسا ومش عارف هو عاوز ايه من نفسه اصلا

أبو هاجر said...

لا ياأستاذة صافيناز
لا هي فتنة ولا صناعة فتنة
لازلت عند رأيي الذي يقول أن تفجيرات الإسكندرية سياسية وغاياتها سياسية.
بل هي قطيعة مع مرحلة وتدشين أخرى ،
قطيعة مع المصالحة التي بدأت مع المراجعات الفقهية وبترتيبات أمريكية من أجل دمج الإسلاميين داخل العملية السياسية على الطريقة التركية و هي نفس الترتيبات التي جرت عندنا ومن نتائجها دخول الإخوان الإنتخابات وحصولهم على 88 معقد لكن الانتخابات الأخيرة كشفت أنها إنقلاب على تلك الترتيبات التي اقترحتها امريكا على كل المنطقة العربية وبمباركة أوروبية أيضا. هنا ينشأ سؤال أيتها السيدة الفاضلة من يكون وراء ذلك الانقلاب
التي أراه مغامرة كبرى قام بها ليس النظام المصري، إنما قوى داخل النظام .إن إقصاء التيار الإسلامي و التيار الوطني مغامرة بكل المقاييس

أبو هاجر said...

هذا يفسر لنا تفجيرات الإسكندرية وهدفها الأول و الأخير هو تخويف وإسكات القوى الوطنية المصرية بكل اطيافها السياسية من أجل تعبيد الطريق لجيل كامب دايفد للوصول إلى السلطة .
الذي يحمل مشروعا إسرائليا. وأول مهمة موجودة على رأس جدول أعماله هي إضعاف المؤسسة العسكرية حتى يتم تنفيذ بقية المشروع لأنهم يخشون من أحمد عرابي جديد أو عبد الناصر جديد أو هواري بومدين جديد أو عبد الرجمن سوار الذهب جديد
وإضعاف المؤسسة العسكرية يتم تحت شعارات كبيرة وبراقة مثل تحديث الجيش وعصرنة المؤسسةالعسكرية وخلق جيش احترافي لكن الهدف تحويل المؤسسة العسكرية ورجالها إلى مجدر حراس حدود
وإذا قدر لجيل كامب الوصول إلى السلطة، إسمحيلي أيتها السيدة المحترمة والفاضلة على التعبير ،سيحولون مصر إلى رقاصة في كابريه وشيخ الأزهر طبالها .لكن المؤسسة العسكرية تعلم ذلك والإخوان يعلمون ذلك و القوى الوطنية تعلم ذلك هل يسكتون على ذلك

عُقاب said...

نوارة تخطيء الخطأ الذي ضرب من أجله من سبقها نفسه بالبلغة ندماً

بتناقش حد بيعتقد بوحدة الحق و الفئة الناجية و إن أصلا التفكير في امور دينا و حياتنا كبيره و بدعة و اننا لازم نرجع في كل امر للكهنة بتوعنا و إن كلنا هنخش النار إلا الفت اللي هيعرف يهرب

إلحقي نفسك يا نواره بحذرك

ركزي معايا انا
اروح فين و اجي منين مش لاقي حد في مصر معاه رؤية فعاله للتغيير

حتى الرؤية اللي طول عمري مقتنع بيها طلعت خووووودعة

الحقيني
و إلا هيأس
إنتي حرة

جبهة التهييس الشعبية said...

عقاب

همممم

صح

ابو قردان said...

http://aboukerdan.blogspot.com/

محمود المصرى said...

يا حسين


قولى بس ايه اللى مش عارفه وانا افهمهولك بالراحة .

أبو هاجر said...

عن السلفية أتحدث
يا إخوانا المسألة أعمق وأبعد وأخطر مما تعتقدون وما تقولون .السلفية ليست لحية ونقاب ،إنها رؤية للتاريخ هنا مكمن الخطر .السلفية نموذجها الحضاري ومثلها الأعلى يكمن في الماضي. وهذه النظرة على مستوى فلسفة التاريخ ترى مستقبلنا في ماضينا. تأسيسا على ذلك فإن التيار السلفي يرى أننا نحن العرب نتأخر و لا نتقدم لأننا نبتعد عن النموذج الأصلي الصافي النقي الذي لوثه العصر فدخلنا في جاهلية القرن العشرين كما كتب أحدهم ذات يوم
هذا الفهم للتاريخ هو الذي أنتج التيارات التكفيرية بكل تلويناتها لكنها تلتقي في تكفير المجتمع وتعده مرتدا. وهنا أوجدت لنفسها مفردات حتى تعزل نفسها عن المرتدين فأطلقت عن نفسها اسم الفرقة الناجية والتكفير و الهجرة .لكن هذه العزلة ليس من اجل التعبد و التقرب لله والفوز بالجنة و حور الحين، إنما من أجل عد العدة وجمع المال و السلاح و الرجال لفتح هذه المجتمعات من جديد .ونتيجة هذا الفهم دفعت بلادي 200ألف قتيل

ابو قردان said...

أبو هاجر, سلفيينا غير سلفيينكم ,وسلفيينا عمرهم مكانوا زي سلفيينكم ,و سلفيينكم عمرهم مكانوا زي سلفيينا, يقدروا سلفيينا يعملوا زي سلفيينكم,نتكلم بجد السلفيين إللي في مصر هنا دول في حالهم لا بتوع سلاح و لا قتال ولا فتح وعلشان كده الحكومة سايباهم

أبو هاجر said...

إلى السيد أبو قردان المحترم
بشكل عام أتفق معك
لكن ولأنني أعرف مصر لاحظت وجود جيل جديد بذهنية جديدة مغايرة تماما لمصر التاريخية.
بمعى أوضح لم تعد مرجعيته مصرية خالصة نتيجة ثورة الإتصال و المعلوماتية وكنتيجة ذلك أصبحت مثله العليا يستمد معظمها من الآخر بالمعنى الواسع لهذه الكلمة.إسلاميا كان أم لبيراليا.
لك تحياتي الخالصة

SadJoy said...

"لكن بصراحة الراجل اللي علق بتاع متأسلمين ده عجيب قوي يا عمو، انت جبته منين؟ "
بغض النظر عن اسلوبك في الحوار فالملاحظ ان حكاية المتأسلمين دي ماثرة فيكي قوي , ليه ياترى؟

ماعلينا.. اعتقد ان الخلاصه اللي مفروض نطلع بيها من الموضوع اللي سعادتك كاتباه ده ان مهما كان لديك من عبقريه فذه وحكمة وبصيرة وقدره على قراءة المستقبل كالكتاب المفتوح فالغوغاء لن تستمع ابدا لصوت العقل فلا كرامة لنبي في وطنه الخ.. والدليل انك قد حذرتي.. نعم حذرتي الغوغاء من الإشاره بأي شكل من الأشكال الى دور "المتاسلمين" فيما نعيشه من مأساه والتي بلا شك ستؤدي الى احد نتيجتين وربما كلتاهما: أما الى جن جنون ال"متأسلمين" , مما يجعلهم يخرجون عن طورهم فيصبحون كالثور الهائج ويديرون التلطيش والتفجيرات في العالم ويعيثون الفساد ويصبح بذلك ذنب القتلى واليتامي في رقبتنا نحن الغوغاء و/أو الى انتباه الأمن لهم بعد غفلته مما يدفعه الى تعقبهم وتعذيبهم وقتلهم فيصبح ذنب ضحايا الأمن من المتأسلمين في رقبتنا نحن الغوغاء كذلك..
يتبع

SadJoy said...

ولكن هيهات.. كل شويه يطلعلنا واحد مش عارف جايبينه منين يقول المتأسلمين لازم يفوقوا , كفايه بقى مصادره لحياة المصريين المدنيه بأسم الدين , كفايه حالة الهوس الديني والغيبوبه اللي استوردناها من الخليج الى آخر هذا الهراء. فكانت النتيجه ان مش بس الكنيسه انضربت لما المتأسلمين زعلوا لأ دا كمان الأمن عذب وقتل السلفيين الأبرياء.. وكل ده عشان انتقدنا الإسلاميين اللي لازم يبقوا فوق النقد دائما وابدا.

وبالطبع في الحالتين الحل الأمثل هو عدم المساس بالمتأسلمين او الدوس لهم على طرف .. او توجيه اصبع الإتهام لهم .. او انتقادهم بأي شكل من الأشكال!
يعني بالعربي ما حدش يهوب ناحيتهم لحسن دول بلمس!

ويكفينا فخرا انهم.. حسب كلام الأخت اللجنه الشعبيه , تعطفوا وتكرموا و "اخدوا مواقف كويسه" (يعني تلاقيهم دلوقتي في موقف العتبه واللا ايه لأني مش شايف بصراحه ليهم مواقف غير كده؟) , ولا مانع كذلك من بعض المغازلة للسلفيين منهم اللي تكرموا علينا وسكتوا ولا قاوحوش في الموقف الجلل ده!


والله يعني كتر خير السلفيين والمتطرفين .. انا كنت ظالمهم وطلعت انا الظالم اللي يستاهل الحرق وطلعوا هما منها ابرياء براءة او جي سيمسون من قتل مراته والفضل لشطارة المحاميين من حسني النوايا والمضللين.

يتبع

SadJoy said...

ربما يكون المرحوم سيد بلال برئ وربما يكون قد راح ضحية بطش الحكومة الفاسده ولكنه ليس فقط شهيدا لظلم الحكومة بل ايضا للسرطان الذي تفشى في عقله وعقل الملايين من ابناء مصر.



انا لا اشكك للحظه ان الحكومه زباله ومسؤله مسؤليه مباشره عن افساد هذا البلد وتدمير عقول اولاده زي مرض الإيدز بالظبط ما بيدمر جسم الإنسان بس التركيز على الحكومه والتطنيش على بقية المشاكل زي ما نعالج مريض من الإيدز وهو ربنا بلاه بالسرطان كمان في نفس الوقت , ايه فايدة اننا نعالجه من الإيدز ونسيب السرطان يستشري في جسمه؟

واخيرا ارجو ماحدش ياخد كلامي بصفه شخصيه! سلام

جبهة التهييس الشعبية said...

يااااا

ده انت شايل في قلبك قوي

وده من ايه ده؟

طب تحب حضرتك نعمل ايه دلوقت؟ نشنق لك المسلمين كلهم؟ كتير، حنشنق مليار ونص ازاي؟ مش حنخلص يعني، وبعدين مش حنلاقي لهم مقابر تتاويهم

هم زعلوك في ايه بس وانا اشخط لك فيهم

جبهة التهييس الشعبية said...

بالمناسبة

متأسلمين دي مكتوبة في قاموس خطاب الكراهية

زيها زي نيجر وكايك وعباد الصليب والروافض والقردة والخنازير

متأسلمين يعني حضرتك بتدخل في قلوب الناس وتحكم عليهم بالنفاق وتكفرهم

متأسلمين كلمة تكفيرية حضرتك، لانك بتنفي عنهم صفة الاسلام وانت ما تعرفش، وبتلصق بيهم صفة النفاق وانت ما تعرفش، ومش من حقك تحكم عليهم

شوية بوليتيكال كوريكتنس بقى مدام مصمم تبقى خواجة

SadJoy said...

"ده انت شايل في قلبك قوي

وده من ايه ده؟

طب تحب حضرتك نعمل ايه دلوقت؟ نشنق لك المسلمين كلهم؟ كتير، حنشنق مليار ونص ازاي؟ مش حنخلص يعني، وبعدين مش حنلاقي لهم مقابر تتاويهم

هم زعلوك في ايه بس وانا اشخط لك فيهم"

انا آسف جدا بس اسلوب الرد بطريقة "تحب نشنقلك المسلمين كلهم" الخ , ده اسمه كلام فارغ!

الحقيقه كنت متوقع احسن من كده شويه! الظاهر كنت غلطان.

SadJoy said...

متأسلمين دي مكتوبة في قاموس خطاب الكراهية

زيها زي نيجر وكايك وعباد الصليب والروافض والقردة والخنازير

متأسلمين يعني حضرتك بتدخل في قلوب الناس وتحكم عليهم بالنفاق وتكفرهم

متأسلمين كلمة تكفيرية حضرتك، لانك بتنفي عنهم صفة الاسلام وانت ما تعرفش، وبتلصق بيهم صفة النفاق وانت ما تعرفش، ومش من حقك تحكم عليهم

شوية بوليتيكال كوريكتنس بقى مدام مصمم تبقى خواجة

للأسف فيه ناس بتبقى حافظه ومش فاهمه فا بتردد كلام شكله كبير لكنه خالي من المضمون!

"النيجر" لفظ تحقيري وعنصري يستخدم تقليديا لوصف مجموعه كامله من البشر من اصحاب البشرة السوداء وكذلك عباد الصليب والقرده والخنازير تستخدم لوصم مجموعه كامله من البشر الذين يدينون بالمسيحيه وتحقيرهم!
المتأسلمين , "اون ذي آذر هاند" (معلش اصلي خواجه) , هو وصف يستخدم للتفريق بين المسلمين ككل والمتمظهرين بالإسلام (مش بالضروره متظاهرين لأنهم ممكن يكونوا عايشينه فعلا ولكن من المظهر فقط) من امثال اصحاب العمارات اللي بيخصصوا شقه في الدور الأول ويسموها جامع (مش حتى مسجد) للحصول على اعفاء ضريبي وامثال الأستاذ ابراهيم الحرامي اللي كان ماسك الختم في الكليه ويفتحلك الدرج قبل ما يخرج من الأوضه عشان تحطيله العشرة جنيه ويرجع وبنطلونه مشمر عشان كان بيتوضى والأخ اللي كان كاتب على يافطة الإنتخابات بتاعته حديث لحث الناس على انتخابه وكمان بادئه ببسم الله الرحمن الرحيم , وجارنا اللي ركب في الأسانسير جهاز مفزع بيصرخ على اعلى فوليوم بإحدى آيات القرآن بطريقه فجه ومنفره وفرضه على كل السكان بينما هو انسان زباله اصلا , او ابن عمتي المهندس اللي ساب وظيفته المحترمه وربى دقن شعثاء ولبس جلابيه قصيره وراح يشتغل في دار نشر للكتب الصفراء ولا يصافح النساء او انصارى , وغيرهم وغيرهم , فهل من باب البوليتيكال كوركتنس (انا برضه اللى خواجه؟) اننا نتناسي ان كل هؤلاء موجودين؟ كل هؤلاء الذين يستخدمون الدين للترويج لبضاعتهم الفاسده او المغيبين عقليا باسم الدين لا نستطيع ان نميزهم عن البشر الآخرين الذين يرون في الدين مجموعه من القيم والمبادئ الساميه تساعدهم على السمو الأخلاقي بدون ان تسيطر عل كل خلجه من خلجات حياتهم وتصيبهم بالغيبوبه وبدون ان تحولهم من راقصات وجهله الى وعاظ ورعين بين عشيه وضحاها ولا ان تدفعهم لإستغفال واستغلال اخوانهم باسم الدين!

هل انا شايل في قلبي زي ما قلتي؟ نعم بكل تأكيد , لكل ما سبق ذكره!