Sunday 23 January 2011

مين الكثير من المصريين دول يا مبارك؟

انه يعزي بيريز صاحبه في سونيا حبيبتكم سونيا جاتلكم من اخر الدنيا.. عادي
انه يبقى العربي الوحيد مع عاهر الاردن اللي يعزوا بيريز في مراته .. طول عمرهم
انما ان مبارك يتكلم نيابة عنا ويقول لبيريز: اعلم ان الكثير من المصريين يفكرون فيك في هذه الاوقات الصعبة
اما انك بني ادم هلف صحيح
هو احنا بنفكر فيك انت عشان نفكر في صاحبك الاسرائيلي؟ وانت تعرف ايه عن المصريين اساسا؟ ومين "الكثير" من المصريين دول اللي انت بتتكلم نيابة عنهم؟ هو احمد عز وصفوت الشريف دول مصريين وكتير كمان؟ 
داهية الراجل يصدق
لا.. لا مش حيصدق لا
بيريز مش حيصدقك يا مبارك.. عارف ليه؟ عشان مالي لنا البلد جواسيس وعارف كويس ان مافيش مصري بيطيقه ولا بيطيق العصابة اللي هو عاملها ومسميها بلد، ومافيش حد بيطيقك عشان انت حبيبهم
امشي يا سيادة الرئيس
امشي
دي نصيحة من واحدة في سن بنتك، وعارفة بقى الكثير من المصريين بجد، حسابك تقل قوي، وحتتبهدل
اخلع على جدة قبل ما الناس تطلع عليك تاكلك بسنانها.. وماحدش حيعرف يحوشهم ساعتها، انا عمري كدبت عليك في حاجة؟ امشي.. امشي انت في سن ما يسمحلكش بالبهدلة 
خد المدام والاولاد وصفوت الشريف وامشوا بكرامتكم
احمد عز لا.. احمد عز يلزمنا، عليه لينا فلوس 

9 comments:

admin said...

الله ينور عليكى يا نوارة فعلا لو مصدق مكنش ملاله البلد جواسيس

احمد خليل said...

صباح الخير يا ست الكل انت احس كاتب يكتب المختصر المفيد
وامشوا بكرامتكم احمد عز لا.. احمد عز يلزمنا، عليه لينا فلوس

Unknown said...

enti ,,,, mesh momkena ! :)))

فؤش said...

يسلم فمك يا أستاذة نوارة
صحيح من دهر راجل
على فكرة انا لسه صاحى ع الخبر ده من شوية حاجة تخنق انا بحس ان الناس دى بتتكلم عن مصر تانى خالص
(د/ فؤش)

فؤش said...

انا مبقتش عارف انا عايش ف مصر ولا اثيوبيا
اكيد مبارك ميقصدش مصر يقصد مصر البلد

ash3ab said...

هههههههه
أبقو قابلونى
شعب مهياص و بتاع كلام بس

lastcrazyboys said...

ده "هــرم " مش بس بيستعمــانا

ده بيستعمى ذات نفسـيتـه..وبيتكلم عن ناس هو مشافهمش قبل كــده

وهينزل الشريط الجديد باسمه الحركي " بع باصط " حمــوودة : أنـــا موش عارفهم

lastcrazyboys said...

معلش يا استـاذة مش عارف ليه حسيـت الموضوع ده ليه علاقة بالمصريين اللي يعرفهم

قصـة عبد الحميد شتا

ولو حد سألني بمناسبة ايييه ..يتفضــل
:) مصــر تــنادي أبنــاءها

Mohamed Hossam Ismail said...

عسل والله يا حبيبة قلب مصر
ربنا يخليكي لينا
بس مش أحمد عز لوحده اللي عليه فلوس لينا