Monday, 3 January 2011

نداء الى المسيحيين: بلاش قلة عقل


تحديث:
عشان تعرفوا اني مكشوف عني الحجاب، الامن منع المسلمين من المشاركة في اعتصام كنيسة المسرة وبقى يشوف البطاقات المسيحي يدخله والمسلم يمنعه



طبعا الواحد ما ينفعش في الظروف دي يقول انه سعيد بحاجة، بس ينفع الواحد يقول انه مرتاح لمواقف الناس وردود افعالهم ومبادراتهم
الداخلية بطيئة، والناس كانت سريعة
وكان فيه تفهم كامل لرد فعل المسيحيين، الاغلبية كانت متفهمة تماما، وحتى اللي اتخانقوا ما تقلوش ايدهم في خناق، وفيه تفهم لحق المسيحيين في انهم يرفسوا من الحزن وحقهم ان اللي حواليهم يستحملوهم
بس ده رد فعل اولي ما ينفعش يستمر، خلاص اتعصبنا واتنرفزنا وهسترنا وضربنا ناس مالهاش علاقة بالموضوع والناس تفهمت.. نبتدي نتعامل مع الموضوع على اننا عايزين حقنا مش عايزين نفش غلنا
من الاخر كده، الداخلية مش حتجيب لكم حاجة، الداخلية سايباكم تهبهبوا، وسعيدة جدا انكم بتلوشوا، لانها مش عارفة حاجة، وعمالة تهلوس، وتطلع في اخبار وتقارير ما انزل الله بها من سلطان، يعني ايه: الانتحاري كان نفسه يدخل الكنيسة عشان يموت عدد اكبر بس خاف من الامن؟ ايه العشوائيات دي؟ هم لقوا الدي ان ايه بتاع الانتحاري المزعوم ده اساسا عشان كمان يعرفوا كان نفسه في ايه وخاف من ايه وكان بيحب بنت الجيران وكاتم في قلبه وبيبص عليها من ورا الشيش؟
اسمعوني بقى
الداخلية حتسيبكم تهللوا، لحد ما تخلصوا اللي عندكم وبعدين تلمكم، وتلمكم بمصيبة
بما انكم في حالة هيستيريا فدي حاجة في مصلحة الداخلية، ساعة ما تزهق منكم حتدخل في وسطكم بلطجية يعملوا كارثة، يحرقوا جامع، يشتموا محمد، يرفعوا صورة كاريكاتير من بتوع الدنمارك.. اي حاجة تبقى مصيبة كبيرة تجيب آخر المسلمين اللي لحد دلوقت متفهمين، وانا بصراحة متفاجئة من تفهمهم ده، انا متعودة عليهم دماغهم بتسخن على طول، وزي ما قلت ما ينفعش اقول اني سعيدة، بس ينفع اقول اني مرتاحة لرد الفعل ده، لانه ينم عن حاجات كتير ايجابية
رد فعل الجماهير المسيحية العادية والهيستريا اللي هي فيها طبيعي جدا ومفهوم جدا، لانه مش مجرد حزن، ده خليط من الهلع، والاحساس انهم اتاخدوا على خوانة، والاحساس بان الصبر مش مفتاح الفرج ولا نيلة ده مفتاح الكوارث، والاحساس بالغبن وانهم ما يستاهلوش ده كله، "ده احنا ماشيين جنب الحيط يقوم يتعمل فينا كده" بس لازم يبقى فيه ناس وسط الجماهير دي تعرف تدير الموضوع ولا هو متساب كده؟ ما ينفعش يتساب كده، لان هم كده حقهم حيضيع، وبعد ما يبقى لهم حق، حيلاقوا نفسهم يا بيعتذروا وبيقولوا يا حيطة داريني
اولا: الداخلية لها بلطجية ينفع يدخلوا وسط كل الناس ويعملوا عملة سودا تؤدي الى غضب كبير من الطرف التاني
ثانيا: الطرف التاني برضه حيتزرع فيه بلطجية يعملوا كوارث
رابعا: حتكون النتيجة ان الناس حتسيب الموضوع الاصلي ويمسكوا في الموضوع الفرعي اللي هو ان المسيحيين غلطوا، ولو البلطجية دول فعلا ضربوا مسجد حيبقى خلاص يا عم خالصين، كنيسة انضربت مسجد انضرب، لم تعابينك بقى يا ابونا
خامسا: البابا شنودة في اللحظة دي حيلم الناس فعلا، لان حيبقى فيه خطر عليهم حقيقي
سادسا: يالا بالسلامة.. ابقوا قابلوني لو اخدتم حقكم
ركزوا.. انتوا لكم حق لازم تاخدوه، والكل واقف معاكم في الحق ده، ما تركبوش نفسكم الغلط، عشان الداخلية محتاسة ومش عارفة تجيب اللي عمل كده ومنى عينها انكم تغلطوا عشان تكبر غلطكم وتسلط عليه الضوء وتهرب هي بتقصيرها
وبعدين انتوا بتطردوا المسلمين من مظاهراتكم ليه يا خايبين؟ انتوا محتاجين المسلمين ومحتاجين انهم يسخنوا في المظاهرات معاكم عشان يوم ما البابا شنودة يصدر امر بان مافيش مظاهرات تاني، انتوا حتسمعوا كلامه، وخلاص انا حطيت صوابعي في الشق من الموضوع ده ومش حاتناقش فيه، حتسمعوا كلامه وادي الله وادي حكمته... طب خلاص، اسمعوا انتوا ساعتها كلامه، المسلمين بقى سايبين وما بيسمعوش كلام حد حيكملوا هم مظاهرات لانهم خلاص سخنوا، قوم تقدروا ساعتها بقى تطلعوا معاهم في الاماكن اللي خارج الكاتدرائية وتكملوا تظاهر
بلاش التلويش يمين وشمال عشان نجدة الداخلية في ان تحصل مواجهة بين المسلمين والمسيحيين واكيد المواجهة دي مش في صالح المسيحيين وهي تطلع منها
انا عارفة ان اكيد اللي قاعدين في الاعتصامات مش بيقروا المدونات، بس اكيد فيه ولو واحد بيقراها ياريت يوصل لهم وجهة النظر دي

31 comments:

wutever said...

يا جماعة فرقت ايه مين اللي سوى و مين اللي نييل؟
و انا مقتنع ماحدش هيعرف الحقيقة بس مش فرقه.. في الاخر النظام مسئول و الوحدة ضد النظام مش عشان مسيحيين اتقتلوا انت مخكم راح لبعيد.. توحيد الصفوف عشان دي فرصة (فرصة زفت بس فرصة) عشان دلوقتي نضعف النظام ولا ده كمان مش عاجبكم ما تفتحوا يا ناس شوية المسألة مش صعبة و كل الكلام ده مسائل جانبية ملهاش تلاتة لزمة و بتضر عشان الواحد ابتدا يكتئب و يفقد الأمل في عقليات الناس

جبهة التهييس الشعبية said...

wutever

طب قلت ايه؟ امسح تعليقاتهم؟
انا باقول امسح تعليقاتهم

لان كمان فيه واحد اسمه باسم ما بيعرفش يكون جملة مفيدة بس اللي فهمته انه بيشتم شتيمة طائفية

فما نزلتوش

امسح دول كمان

جبهة التهييس الشعبية said...

كده قشطة

Dina said...

أحلى كلام يا نوارة .. يااااا رب يوصل

الكاتب محب روفائيل said...

طيب وانتى من رأى حضرتك

هنقدر ناخد حقنا ازاى ؟

أنا عموما بعمل اللى اعرف اعمله وفى نفس الوقت بقدر عليه

حملة أنا ضد الارهاب

http://www.elkatebrofail.blogspot.com/

وده على مدونتى الخاصة

أنا عايز الحق نجيبه بس ازاى ؟

ملحوظة كلام حضرتك وصل بس فيه كلام مينفعش يتقال دلوقتى خالص زى اتاخدوا على قفاهم مثلا .

دمتى فى خير

ضياء الخطيب said...

عندك حق. كانت في مظاهرة قبطية في أسيوط إمبارح (الأحد 2/1 )رحت قلت أشاركهم لقيت واحد بيشاور عليا وبيقول (ده مسلم ابن ال......) لولا إني جريت ناحية الأمن كانوا موتوني, طبعا ده غير الشتايم المتطرفة إللي سمعتها منهم,النهاردة واحد زميل أخويا في الشغل بيقوله (الموضوع ده مش هيعدي بسهولة ولازم ننتقم!!!مش كفاية ال120 بنت إللي أنتوا خاطفينهم!!!!)العبيط ده هينتقم من مين؟ وفين أسماء البنات دي إللي بيقول عليها؟ ويعني إيه (إنتوا) أنا مش فاهم, واحد مهووس عمل حاجة زي كده باقي المسلمين الطيبين مالهم, نار الفتنة لو ولعت عندنا في الصعيد هتبقى مصيبة - الصعايدة أساسا دماغهم نيلة يعني مش ناقصة.

جبهة التهييس الشعبية said...

لا انا ما قصدتش اتاخدوا على قفاهم اي اهانة

انا قصدت انهم اتاخدوا على خوانة، وانهم قدموا تنازلات في مقابل الحماية وفجأة لقوا نفسهم عريانين من غير حماية

عموما حاغيرها حاضر

بالنسبة لازاي تاخدوا حقكم

مش حيحصل الا بالاصرار وبمشاركة المسلمين مش بالخناق معاهم ابدا

وفي الحالة دي مش انتوا لوحدكوا تاخدوا حقكم، انتوا وكل القطاعات الاخرى اللي مهضوم حقها بأشكال مختلفة

احنا نرتب اولوياتنا
دلوقت الكارثة اللي حصلت دي دليل على ان مافيش امن

هي حصلت بسبب حاجتين: ان النظام لعب على الفتنة الطائفية مما فتح المجال ان اي حد حتى لو جهات خارجية زي ما هم بيقولوا يستغل الوضع ده

الحاجة التانية ان مافيش تأمين، وزير الداخلية متفرغ يأمن الرئيس مبارك وبقية الشعب يغور في ستين داهية، ممكن ينضرب لما يتظاهر اه، بس مالوش حماية

اذن الدولة فاشلة، الدولة بتعمل فتنة، ومش بتحمي امنها الداخلية

يبقى انت تارك مع الدولة

وده تار حيشاركك فيه كل مصري
وفي الحالة دي نستمر في التظاهر كلنا مسلمين ومسيحيين عشان ناخد حقنا من الدولة
حقنا في الحماية، وحقنا في المساواة، وحقنا في اننا ما يبقاش عندنا مشاكل داخلية تتسبب لنا في اخطار تهدد سلمنا الاجتماعي

جبهة التهييس الشعبية said...

الاخ اللي زعلان اللي راح اسيوط

معلش ما تزعلش

ده رد فعل طبيعي، ما احنا ايام الرسوم المسئية برضه قلبنا الدنيا وهجمنا على سفارة الدنمارك

ده رد فعل طبيعي يعني، الناس منفعلة والكارثة مروعة وفظيعة

خصوصا انهم حاسين انهم ما عملوش حاجة تستاهل ده كله، دول حاسين انهم حاطين جزمة في بقهم وساكتين وكمان بينضربوا

جبهة التهييس الشعبية said...

اهم حاجة دلوقت حق الناس دي يرجع لها

يرجع لها من وزير الداخلية اللي مش بيحمي البلد

يرجع لها من مبارك اللي اتسبب في كل اللي حصل لهم

ولازم كلنا نبقى معاهم في حقهم ده، ده مش بقى حق عمال في مكافأة ولا حق فلاحين في ارض

ده دم

الدم مش بيتمسح

جبهة التهييس الشعبية said...

لو عرفنا ناخد للناس دي حقها بالتظاهر والاعتصامات اليومية المشتركة حنعرف ناخد من مبارك كل حقوقنا

لو الناس دي حقها راح وما عرفناش نقف جنبهم مافيش مصري حيبقى له قومة بعد كده

اديني باقولكم اهو

بحر الحياة said...

والله العظيم يانوارة أنا زيك مستغربة من تفهم المسلمين وقلوبهم والله وجعاهم جدا من اللى حصل بس اللى انا مزبهلة منه هو كلام بعض الأخوة المسيحيين واللى سمعته منهم فى الشغل معايا فيه عك جامد فى الكلام وبيلوشوا انا خايفة قوى من السيناريو اللى أنتى قلتيه ده لأنه منطقى جدا والحكومة عملته قبل كده كتييييييييييير بس أحنا اللى بننسى

بحر الحياة said...

اه نسيت اقولك من عينة العك اللى اتقال أنه مش هينفع غير الأستعانة بدول وقوى خارجيةعشان تحمينا فطبعا رديت وقلت قصدكو امريكا طب ياريت تبصوا على العراق وتشوفوا امريكا عملت فيهم ايه؟ روقت الكل سنة وشيعة ومسحيين ويجعله عامر

trazan said...

كلامك زين العقل كالعادة
بس ازاى هيوصل للناس الغاضبة فى الشوارع والبيوت؟؟؟؟؟؟
وازاى ميسكتوش عن حقهم طيب يعنى من وجهة نظرك يعملوا اية؟؟؟
اعتصام مثلا

ضياء الخطيب said...

على فكرة أنا مش زعلان من إللي حصل في مظاهرة أسيوط وأنا متفهم لمشاعرهم بس أنا مستغرب من التفكير الطائفي إللي لحس دماغ الناس (مسلمين ومسيحيين) , سيادة القانون و الحريات و خروج الكنيسة من السياسة ومبارك و أولاده وأصحاب أولاده يحلوا عن سمانا هو ده بدايةالحل

Sohair said...

عارفين اللى باستغربله جدا هو انه لما الارهابيين بحطوا فيديو خطف او قتل او ذبح بيحطوا فى الباك جراوند القران......طب ليه الربط بين القران و الارهاب؟؟ و ليه ما يجيش اى مسلم يعترض على كده؟ و ليه كل لما نروح اى مكان سواء بنقيس فيه جزم او بنفلع فيه نلاقى القران شغال...ليه؟؟ ليه مافيش احترام؟ و ليه مافيش واحد مسلم يطلع يقول كده؟؟؟؟

Ahmed Moatazic said...

كلام جميل جدا .. بصراحة كلامك لما بتبقى هادية بيبقى احلى بكتير
الموضوع اصلا من الاول مش طائفى .. والحوادث الطائفية لا دى طريقتها ولا دى اسلوبها

محمد نجم said...

نوراة
نظرية المؤامرة عندي اشتغلت
http://www.is-tr.com/vb/showthread.php?t=21992

انا كنت هناك وتبرعت وانا مسلم وكان اغلب المتبرعين مسلمين

الكلام الي في الرابط ده منتشر
الكلام ده الي بيوصل للناس
الكلام ده كذب
افضحوا الكذب

Amr said...

يانواره بجد بحييكى على فكرة أن المسيحيين مش لازم يبعدوا المسلمين عنهم فى المظاهرات والوقفات بالعكس الأيام دى أكتر وقت مطلوب أننا نكون مع بعض علشان زى مانتى شرحتى النهارده أو بكره البابا هايصدر أوامر بوقف المظاهرات لو حس بالخطر وفجأه الموضوع ولا كأنه كان وساعتها هانرجع نستنى الوقفات الفاشله اللى بيحضرها 10 أو 20 كل أسبوعين 3أو

Amr said...

يانواره بجد بحييكى على فكرة أن المسيحيين مش لازم يبعدوا المسلمين عنهم فى المظاهرات والوقفات بالعكس الأيام دى أكتر وقت مطلوب أننا نكون مع بعض علشان زى مانتى شرحتى النهارده أو بكره البابا هايصدر أوامر بوقف المظاهرات لو حس بالخطر وفجأه الموضوع ولا كأنه كان وساعتها هانرجع نستنى الوقفات الفاشله اللى بيحضرها 10 أو 20 كل أسبوعين 3أو

Amr said...

يانواره لو سمحتى ياريت تحطى كود الشير على الفيس بوك هنا فى المدونه لأنى عايز أنشر كل تدويناتك على الصفحه عندى علشان ليا أصحاب أقباط لازم أخليهم يقروا الكلام ده

بهيج الشرير said...

ياترى ياأبلتي سمعتي عن الواد الإرهابي اللي عايز يتبرع للمسيحيين بدم مسموم راح واكل حلة كسكسي مسمومة

أبو هاجر said...

ست الكل أرجو أن تتحملينني قليلا
النداء وجه إلى العنوان الغلط
شوفي يا ست الكل الاحتقان معروف ولا يحتاج إلى شرح .لكن التفجير الاخير شيئأ آخرا. في تقديري يجب ان يناقش بمعزل عن الصراع الطائفي .بعبارة أكثر وضوحا تفجير الإسكندرية ليس نتيجة للصراع الطائفي، إنما استثمر الصراع الطائفي لحسابات غير طائفية، وهذه تفرق كثيرا .وإذا صحت هذه الفرضية فإن الأخوة المسحيين أُستعملهم طرف كدرع ، كحاجز ضد طرف آخر.وبدون شك فإن القيادات المسيحية على وعي بهذه المسألة، كما أنهم على وعي تام أن هكذا عملية إجرامية لا يقوم بها ضدهم نظام يباركونه ويباركون التوريث .وأنا اضيف على ذلك أن ما وقع في اسكندرية ليس من تقاليد الأجهزة الأمنية المصرية ولا الذهنية المصرية
هذا عمل أجهزة
دولية لها أهداف دولية وترتيبات إقليمية يجب ان تقطع الطريق على القوى الوطنية المصرية التي تعيق تنفيذ مشروعها

جبهة التهييس الشعبية said...

الكود شير ده بيتعمل ازاي؟

أبو هاجر said...

إلى الأستاذ المحترم بهيج
هل تعلم أنك الوحيد الذي ترد عليه نوارة وتناقشه وتأخذ ملاحظاته وتعليقاته بجدية وأهتمام كبيرين. أما اليوم فقد جاء في تعليقك مفردة الكسكسي وهذه أكلة شعبية جزائرية ،بل أكلة شعبية في كل المغرب العربي وهو الشئ الوحيد الذي أخذه الفرنسيين من المغرب العربي. لقد أصبح جزءا مكونا للطبق الفرنسي. وهو موجود أيضا بسوريا ويسمى المغربية لكن يطبخ بطريقة اخرى .لكن لم أكن اعرف أنه موجود في الشقيقة مصر .
لكن أوعه كلمة كسكسي في سوريا كلمة عيب

Amr said...

http://www.gamalemara.com/blog/?p=851

الصفحه دى بتشرح أزاى تعملى زرار شير للفيسبوك على كل تدوينه

AhmeD 3llaM said...

اه والنبي قوليلهم عشان انا ابتديت اترحم علي شهدااااااء المسلمين والمستضعفين في الارض منهم
والي طالع عين الي خليفوهم لمجرد ان اسمه احمد او محمد او جهاد او اسلام في بلاد الفرنجه
مظاهرات ووقفنا صليب ورفعنا أأعملهم
ايه تاني ..****

بس انا مش متغاظ غير من كلمة
الداخليه محتاسه الداخليه محتاسه ,هوه مش في تحقيق ونيابه وشغل كبير وناس شغاله ولا هي برررلوم كدا وخلاص

utopia said...

Amr :
ممكن تاخد اللينك بتاع التدوينة من الدريس بار كوبى وتعمل له بيست فى خانى اللينك عندك فى الفيس من غير اى توول

تسلمى يا نوارة على رسالتك دى

Bienveillant أوفياء مصر d'Égypte said...

هى حرب بالوكالة - لكن الجذور ليست حتى فى وجود مشكلة طائفية فى مصر فلا وجود لمشكلة طائفية فى مصر بالمعنى المفهوم فى أوطان الآخرين - ولكن يوجد استثمار ذكى للاحتقان الطائفى - وحتى تعبير احتقان طائفى فهو أكثر بكثير من حقيقة الحال فى مصر بين اتباع الديانتين - المشكلة أن هذا البلد متروك منذ أربعين عاماً يلا مشروع اجتماعى سياسى اقتصادى فى ظل سلطة غير شرعية تحكم بلا تبصر ولا بصيرة وتمارس سلاماً أخرق مع عدو يعرف أهدافه ويستقوى على المنطقة بالأمريكان - وفى ظل هذا المناخ المسموم صعدت إلى السطح فقاقيع وبثور الجدرى والحمى والحصبة الكاذبة دون أن يكون الجسم مصاباً لا بالجدرى ولا بالحصبة ولا بالحمى - سلطة رعت اللصوص تحت مسمى الاستثمار والتنمية - سلكة اعتقدت أن الشرطة ساحر قادر على كل شىء بدءاً من ضرب المتظاهرين حتى محاصرة مشعلى فتيل الحريق الطائفى - ولا ترى سوى الحال ا/لنى لكل شىء - ويحين يجد الجد ويتوجب الأمر تواجد الشرطة تفشل الشرطة ووتخلى عن دورها - فدورها الوحيد هو حماية السلطة - لا حماية البلد ولا حماية المصريين البسطاء - سلطة تخاصم بنى وطنها وتكذب فتقول أنها ترعى مصالحهم - سلطة تسكت عن لصوص المليارات وتحاكم لصوص القروش والملاليم وتنكل بهم - سلطة تصم أذنيها عن أصوات المفكرين والعقلاء ولا تسمع سوى أصوات أهل الغواية والانتهازيين - سلطة على رأسها رئيس غير مثقف ليس له أيديولوجيا من أى نوع كان ولا أى فكر من أى صنف كان - لا يمين ولا يسار ولا فكر إسلامى ولا فكر علمانى ولا فكر ليبرالى ولا فكر يسارى ولا أى شىء مطلقاً - سلطة لا تعمل إلا بمبدأ إطفاء الحرائق حين تشتعل فى حين أنها تترك أعواد الثقاب مشتعلة فى جوار أحواض البنزين فهى تعتقد أن تجاورهما شأن لا يعنيها - سلطة لم تـُطلق من الحريات سوى حرية الكلام فى السر والعلن دون أن تترك الاتجاهات السياسية حرة بشكل حقيقى فى تفاعل جاد يدعم قوة المجتمع - سلطة تصادر عقول الناس وتدعى احتكار الحقيقة - سلطة تعرف ميول غالبية شعبها وارادته ولا تمضى قدماً سوى فى الاتجاه المخالف للإرادة الشعبية - سلطة تحكمنا وكأنها سلطة احتلال أجنبى لا تريد لمصر خيراً ولا مكاناً ولا مكانة - سلطة تتنكر لكل وعودها الكاذبة كأى مومس محترفة بغاء - وشعب واقع فى غواية عاهرة الحى - يذهب إليها قبل الذهاب إلى المسجد والكنيسة ويذهب إليها بعد العودة من المسجد والكنيسة ليسمع نصحها فى شئون الدين والدنيا - وفى مستقبل أولاده وفى مصير الحى - ويحترم هراوة القواد الذى يحمى العاهرة - شعب تجمعه الطبلة والمزمار وتفرقه العصا كما قال المتنبى قبل ألف عام - ويدعو للعاهرة بطول العمر على اعتبار أن (إللى نعرفه أحسن من إللى ما نعرفوش) كما يقولون - والعاهرة يدعمها النظام العالمى الجديد فهى لديه أفضل ألف مرة من أن تأتى على رأس البلاد سلطة وطنية مستقلة الرأى والإرادة تناطحه وتتلاعب به مناطحة السلطة الإيرانية أو حتى التركية أو ترسى قواعد تعليم متميز راق ينتج بشراً إيجابيين قادرين على فعل يذكى روح المقاومة فى العالم العربى المحيط بمصر ضد الهيمنة الصهيونية فى فلسطين - والسلطة الحالية لا تدرى إن كان وراء ماحدث مؤخراً أيد صهيونية أم لا وهى لن تفصح عن ذلك إن كان هذا حقاً هو جذر تفجيرالأسكندرية ببساطة لأن مصالح العاهرة تتوافق مائة فى المائة مع مصالح الصهيونية فى المنطقة - ولن تخرج علينا السلطة إلا بمقولات من نوع هذا هو فعل المجاهديين العراقيين وهراء من هذا القبيل بدعوى أن بعض صبية العراق كانوا قد هددوا بحرق كنائس مصر منذ شهور بسبب احتجاز مسيحية أسلمت - أو بسبب بيان ينسب غزوة الأسكندرية للـ (مجاهدين) - ثم يثور السؤال لماذا فى هذا التوقيت بالذات يأتى أمر الكشف عن جاسوس مصرى كان يعمل لصالح إسرائيل - ثم يأتى تفجير الإسكندرية - أليس التوقيت هو بعد عملية تزوير كبرى جلات لانتخابات مجلس الشعب وفى طليعة عام الانتخابات الرئاسية التى يراد فيها أن يظهر النظام بمظر المدافع عن مصر التى - يعينى - تهددها المخاطر الخارجية ومؤامرات المتأسلمين والسلفيين وبالمرة التجسس لصالح إسرائيل؟ - ثم لماذا تتجسس إسرائيل علينا مادامت وهى والأمريكان قد اخترقا كل جوانب وأسرار الحياة فى مصر طوال الثلاثين عاماً الأخيرة؟

wahat_alshohada said...

لازم يبقى فيه ترتيب جيد اننا كلنا ننزل نقف الخميس بالليل امام الكنائس كحماية وتضامن ورسالة للسفلة اللى ارتكبوا جريمة الاسكندرية - من فضلك يا نوارة اكتبى حاجة عن الموضوع دة وانا عملت شير على الفيس ..... نزولنا الخميس بالليل وقت الصلاة مهم جداااااااا لانه نفس توقيت ضرب الشباب بتاع نجع حمادى السنة اللى فاتت وانا مريت من امام كنائس والامن مش عاجبنى مش كفاية - لازم نكون دروع هناك وانا قدام بيتى كنيسة على بعد 50 متر وجيرانى مسيحيين هروح معاهم واقف قدام الكنيسة لغاية ما يخلصوا ونرجع سوا ان شاء الله.. لازم رسالتنا توصل ومحتاجين نكون يد واحدة مسلم ومسيحى فى الايام المهببة دى

طنطـــا واى said...

الست اوشة اخت مليجى انت عارفة انى واحد من الناس اللى بتفترضى فيهم الغباء

ممكن اى حد بيفهم ينقذنى ويفهمنى

كيف يكون تنفيذ مطالب المسيحيين - المشروعة - وازالة الاحتقان عندهم هو الطريق السليم لعدم تفجيرهم فى المستقبل وانهاء العمليات الارهابية ضدهم ؟؟

هوة اللى فجرهم عمل كدة عشان زعلان عليهم ومتضامن مع مطالبهم؟؟

معلش اصلى فلاح ومش بافهم فى السياسة

dr.lecter said...

يياما نستغل الفرصه زي مانت قولتي ياما كل سنه وانتم طيبيبن